ᖃᓄᖅ ᓱᕋᑦᑎᕆᓲᖑᕕᑦ ᐃᓚᐃᓐᓈᕐᓂᐅᔪᒥ ᐃᓗᑦᑎᓐᓃᕐᔪᐊᖅᑎᓪᓗᒍ ᐃᓕᖅᑯᓯᑦᑎᓐᓄᑦ ᐃᓗᐃᑦᑑᔪᒥ?
ᓄᓇᕐᔪᐊᒥ ᐊᕐᓇᐃᑦ ᐅᓪᓗᖓᓂ ᐅᕙᑦᑎᓐᓂ ᐊᒃᓱᕈᖅᑎᑦᑎᕗᖅ ᑕᒪᑐᒪᓂ ᐊᕐᕌᒎᔪᒥ ‘ᓱᕋᑦᑎᕆᓂᕐᒥ ᐃᓚᐃᓐᓛᕐᓂᐅᔪᒥ’, ᐃᓛᓐᓂᒃᑯᑦ ᐃᓱᒪᓇᓂ, ᐊᒃᑐᐃᕙᒃᑐᒥ ᐊᕐᓇᓂ ᐃᖅᑲᓇᐃᔭᕐᕕᖕᒥ, ᐊᖏᕐᕋᒥ ᐃᓅᖃᑎᒌᖑᔪᓂᓪᓘᓐᓃᑦ ᑕᒪᐃᑎᒍᑦ.
ᐊᒥᓱᑦ ᐊᕐᓇᐃᑦ ᓱᕋᑦᑎᕆᕙᓪᓕᐊᕗᑦ ᐊᒡᕕᐊᕈᑕᐅᔪᓂ ᐊᒻᒪ ᐱᕙᓕᖅᐳᑦ ᓯᕗᓕᐅᖅᑎᐅᓂᕐᒥ ᐃᓂᒃᓴᐅᔪᓂ ᓄᓇᓕᖏᓐᓂ, ᒪᓕᒐᓕᐅᕐᕕᖕᒥ, ᐃᖅᑲᓇᐃᔭᕐᕕᓂ ᐊᒻᒪ ᐅᖓᑖᓄᑦ – ᓇᓂᓯᔪᓐᓇᖅᐳᒍᑦ ᑲᔪᖏᖅᓴᐃᓂᐅᔪᒥ ᓇᒥᓕᒫᑲᓴᒃ ᑕᑯᔭᑦᑎᓐᓂ ᐊᕐᓇᓂ ᐋᖅᑭᒃᓱᐃᔪᓂ ᓯᕗᒻᒧᑦ ᓯᕗᓂᒃᓴᒧᑦ ᐱᐅᓯᖃᑎᒌᖑᔪᓄᑦ.
ᒪᓕᒐᓕᐅᕐᕕᒃ ᑕᑯᓯᒪᕗᖅ ᐊᖏᒡᓕᒋᐊᕐᓂᐅᔪᒥ ᐊᑕᐅᓯᕐᒥ ᐊᕐᓇᐅᔪᒥ ᐃᓚᒋᔭᐅᖃᑕᐅᔪᒥ ᑕᒪᐃᑎᒍᑦ ᑭᖑᓪᓕᖅᐹᖑᔪᒥ ᓂᕈᐊᕐᓂᐅᓚᐅᖅᑐᒥ, ᒫᓐᓇ 6–ᖑᔪᑦ 22–ᖑᔪᓂ ᐃᒃᓯᕙᐅᑕᕆᔭᐅᔪᓂ ᐊᕐᓇᓄᑦ, ᐱᖓᓱᑦ ᐃᓚᒋᔭᐅᖃᑕᐅᔪᓂ ᒥᓂᔅᑕᐃᑦ ᑲᑎᒪᔨᐅᖃᑕᐅᔪᓄᑦ.
ᑎᒃᑯᐊᖅᑕᐅᓂᐅᔪᒥ ᒥᐊᕆ ᓴᐃᒪᓐᒥ, ᓯᕗᓪᓕᖅᐹᖑᓪᓗᓂ ᑯᐃᑉ ᑭᒡᒐᖅᑐᖅᑎᖓᓂ ᑲᓇᑕᒥ, ᐊᑕᐅᓯᐅᔪᒧᑦ ᖁᑦᑎᓛᖑᔪᒥ ᑎᑎᕋᕐᕕᐅᔪᓂ ᑲᓇᑕᒥ ᑲᔪᖏᖅᓴᐃᓂᓪᓚᕆᐅᕗᖅ, ᑕᑯᑎᑦᑎᔪᒥᒃ ᒪᒃᑯᒃᑐᓂ ᐊᕐᓇᓂ ᓇᒡᓕᒋᔭᖃᕐᓂᖅ ᐊᒻᒪ ᐊᒃᓱᕈᖅᖢᓂ ᐱᓕᕆᓂᐅᔪᒥ ᑐᕌᖅᑎᑦᑎᔪᓐᓇᕐᓂᖓᓂ ᐃᓂᐅᔪᓄᑦ ᓂᕆᐅᓇᓚᐅᙱᑦᑐᒥ ᑕᐃᔅᓱᒪᓂᒃᑲᓐᓂᕐᓂ.
ᓲᖃᐃᒻᒪ, ᐊᔪᕐᓇᙱᓚᖅ ᓇᓂᓯᓂᕐᒥ ᑲᔪᖏᖅᓴᐃᓂᕐᒥ ᐃᒡᓘᑉ ᖁᓕᖏᓐᓂ ᓯᖁᒥᑕᐅᑎᓪᓗᒋᑦ; ᑭᓇᑐᐃᓐᓇᖅ ᑎᑭᐅᑎᔪᓄᑦ ᓄᑖᓄᑦ ᖁᑦᑎᖕᓂᐅᔪᓄᑦ ᐊᓯᖏᓐᓂ ᐊᔭᐅᕆᓇᔭᓪᓚᕆᒃᐳᖅ ᑕᐃᒪᐃᓐᓇᓱᐊᕐᓂᕐᒥᓐᓂᑦᑕᐅᖅ, ᑭᓯᐊᓂ ᓇᓂᓯᓂᕐᒥᓪᓕ ᐃᓗᐊᕐᓂᐅᔪᒥ ᑕᐃᒪᐃᒐᔪᖕᓂᐅᔪᒥ?
ᑕᐃᒪᓐᓇᑎᑐᑦ ᐱᓕᕆᓂᐅᔪᒥ ᒥᐊᕆ ᕗᕋᑦᓚᓐᑎᑐᑦ, ᓄᖅᑲᓵᓚᐅᖅᑐᒥ ᐊᕐᕌᒍᑦ 25 ᐅᖓᑖᓂ, ᐊᒻᒪᓗ ᓇᐃᓴᒐᒃᓴᐅᙱᑦᑐᑦ ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑎᐅᔪᑦ ᑐᓂᓯᕙᒃᑐᓂ ᓄᓇᓕᖕᓄᑦ ᐊᒥᓱᓂ ᑐᑭᖃᑦᑎᐊᕐᓂᐅᔪᓂ ᐱᓕᕆᓂᐅᔪᓂ.
ᐅᕝᕙᓘᓐᓃᑦ ᐃᖃᓗᖕᓂ, 30 ᐳᓴᓐᑎᒥ ᑐᐊᕕᕐᓇᖅᑐᒥ ᑭᐅᔨᐅᔪᑦ ᐊᕐᓇᐅᓪᓗᑎᒃ – ᓱᓕᓂᐅᔪᖅ ᓄᓇᓕᒃ ᖁᕕᐊᓱᒍᑎᖃᕐᓂᖓᓂ ᐊᒻᒪ ᑕᑯᒃᓴᐅᑎᑦᑎᔪᒥ ᓄᓇᕐᔪᐊᒥ ᐊᕐᓇᓄᑦ ᐅᓪᓗᖓᓂ, ᒫᔾᔨ 8–ᒥ.
“ᖁᕝᕙᖅᓴᐅᑎᑦᑎᐊᕙᐅᕗᖅ, ᐃᓱᒪᕗᖓ, ᐱᓗᐊᖅᑐᒥ ᒪᒃᑯᖕᓂᖅᓴᓄᑦ ᐊᕐᓇᓄᑦ ᑕᑯᓂᕐᒧᑦ ᐃᖅᑲᓇᐃᔮᒃᓴᒧᑦ ᐱᕕᒃᓴᐅᓂᖓᓂ ᐃᒻᒥᖕᓄᑦ,” ᐅᖃᖅᐳᖅ ᖃᑦᑎᕆᔨᓄᑦ ᐊᖓᔪᖅᑳᖑᓚᐅᑲᒃᑐᒥ ᓯᐊᕋᓐ ᓇᐅᓚᓐ.
ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᐊᐱᖅᓱᓚᐅᖅᐳᑦ ᐊᔭᐅᕆᔨᐅᔪᒥ ᐊᒻᒪ ᐃᓄᒃᑎᑐᑦ ᐃᓕᓴᐃᔨᐅᔪᒥ ᐊᓕᖃ ᐃᓪᓚᐅᕐᒥ, ᐅᖃᓚᐅᖅᑐᒥ ᐱᓯᒪᓂᖓᓂ ᑕᐃᒪᓐᓇᑎᒋ ᐃᒻᒥᓂᒃ ᐃᒃᐱᒍᓱᑦᑎᐊᕐᓂᐅᔪᒥ ᐃᓄᖕᒧᑦ ᑮᓇᐅᔭᖅᑖᕈᒪᔪᒥ ᐊᖅᑯᒻᒥ ᑭᓇᑐᐃᓐᓇᒥᑦ.
“ᐃᓚᖏᑦ ᐆᓇᖅᑐᒥ ᓂᕆᔭᒃᓴᖃᕐᓂᕐᒥ ᐅᓪᓗᕐᒥ ᐱᕕᒃᓴᖃᓲᖑᕗᑦ, ᐊᒻᒪ ᓱᓕ ᖁᖓᑦᑐᓐᓇᖅᐳᑦ ᐊᒻᒪ ᑕᑯᒃᓴᐅᑎᑦᑎᓗᑎᒃ ᓇᒡᓕᒍᓱᖕᓂᖃᕐᓂᕐᒥ. ᑕᒪᓐᓇ ᑲᔪᖏᖅᓴᐃᓐᓇᖅᑐᖅ. ᑲᒪᓇᕐᔪᐊᕆᕙᕋ,” ᐅᖃᖅᐳᖅ. “ᐅᓪᓘᑉ ᐃᓱᐊᓂ, ᑕᒪᒃᑭᒐᓚᑦ ᑕᑯᒃᓴᐅᑎᑦᑎᓂᐊᖅᐳᑦ ᓇᒡᓕᒍᓱᖕᓂᖅᓴᐅᔪᒥ ᑕᐃᒃᑯᓇᙵᑦ ᑎᒥᖁᑕᐅᔪᓂ ᐊᐅᓚᑦᑎᔨᒻᒪᕆᐅᔪᒥ ᐊᒻᒪ ᐅᒃᐱᕐᓇᕐᓂᖅᓴᐅᓂᐊᖅᖢᑎᒃ: ᐊᖏᓛᖑᔪᒥ ᑲᔪᖏᖅᓴᐃᓂᕆᔭᕋ: ᖁᙱᐊᖅᖢᓂ ᐃᓄᖕᓂ ᖁᕝᕙᕆᐊᕐᓂᖏᓐᓂ ᐋᓐᓂᐊᕐᓂᖏᓐᓂ ᐊᒻᒪ ᐱᕕᒃᓴᖃᑐᐃᓐᓇᕐᓂᕐᒥ ᓈᓚᖕᓂᕐᒥ.”
ᕿᑎᐊᓃᑉᐳᒍᑦ ᖃᔅᓯᒐᓚᖕᓂ ᒪᓕᖃᑦᑕᐅᑎᔪᓂ ᑐᐊᕕᕐᓇᕐᓂᐅᔪᓂ, ᐋᓐᓂᖅᓯᕆᓂᐅᔪᓂ ᐊᕐᓇᓂ, ᐃᒻᒥᓃᕐᓂᕐᒧᑦ ᐊᒻᒪ ᐊᔪᖅᓴᕐᓂᐅᔪᒥ ᑲᑎᖃᑎᒌᒃᖢᑎᒃ ᓴᓇᓂᕐᒧᑦ ᐊᔪᕐᓇᖅᑐᓂ ᖃᓄᐃᓐᓂᐅᔪᓄᑦ ᓴᙱᓛᖑᔪᒧᓪᓘᓐᓃᑦ ᐅᕙᑦᑎᓐᓂ.
ᐃᑲᔪᕈᑎᒃᓴᓂ ᓴᓇᔭᐅᔪᖃᕋᓗᐊᖅᑎᓪᓗᒍ ᖃᓱᒋᐊᖅᑎᑦᑎᓇᓱᐊᕐᓂᕐᒥ ᐊᖏᔪᒻᒪᕆᐊᓗᖕᓂ ᐅᖁᒪᐃᔾᔪᑕᐅᔪᓂ ᐱᓕᕆᐊᖑᔪᓂ – ᖃᕋᓴᐅᔭᑎᒍᑦ ᐊᒻᒪ ᐅᖃᓘᑎᒃᑯᑦ ᐃᓅᓯᓕᕆᓂᐅᔪᒥ, ᐃᓅᖃᑎᒌᖑᔪᓄᑦ ᐱᓕᕆᐊᖑᔪᑦ ᓲᕐᓗ ᓂᖃᐃᓱᕐᓂᕐᒥ, ᐊᒻᒪ $11 ᒥᓕᐊᓐᓂ ᑮᓇᐅᔭᖃᖅᑎᑕᐅᓂᐅᔪᓂ ᓄᑖᓄᑦ ᕿᒫᕕᖕᓄᑦ ᑕᐃᒃᑯᓄᖓ ᕿᒫᔪᓄᑦ ᐋᓐᓂᖅᓯᖅᑕᐅᖃᑦᑕᕐᓂᕐᒥ ᖃᓄᐃᓐᓂᐅᔪᓄᑦ – ᐊᒥᓱᑦ ᐅᑯᓂᖓ ᑐᕌᖓᓇᓱᐊᖅᑐᓂ ᖃᓄᐃᓐᓂᐅᔪᓂ ᐃᑲᔪᖅᑕᐅᓂᕐᒧᑦ ᓱᓕ ᐊᔪᕐᓇᖅᐳᑦ ᐊᑐᐃᓐᓇᖃᕐᓂᕐᒥ ᐅᕝᕙᓘᓐᓃᑦ ᐊᑑᑎᖃᙱᑦᑐᒥ, ᒪᓕᒃᑐᒥ ᖃᓄᐃᓐᓂᐅᔪᒥ.
ᖃᒪᓂᑦᑐᐊᖅ, ᐅᖅᓱᖅᑑᖅ, ᐸᖕᓂᖅᑑᖅ ᐊᒻᒪ ᒥᑦᑎᒪᑕᓕᒃ ᐅᑕᖅᑭᕗᑦ ᓄᑖᓂ ᕿᒫᕝᕕᒃᓴᖅᑖᕐᓂᕐᒧᑦ ᓴᖅᑭᑕᐅᔪᓂ, ᐃᓚᖃᖅᑐᒥ ᐱᑕᖃᖅᐸᒌᖅᑐᓂ ᐃᖃᓗᒃᑑᑦᑎᐊᕐᒥ, ᐃᖃᓗᖕᓂ, ᑰᒑᕐᔪᒃ, ᖁᕐᓗᖅᑑᖅ ᐊᒻᒪ ᑲᖏᖅᖠᓂᕐᒥ.
ᐊᖓᑕᓲᒃᑰᕆᐊᖃᖅᑎᑕᐅᓂᕐᒥ ᐊᖏᕐᕋᖕᓂ ᓄᓇᓕᖕᓂ ᐊᑦᑕᓇᖅᑐᒦᑦᑕᐃᓕᒪᓂᕐᒧᑦ ᓈᒻᒪᙱᓚᖅ, ᐱᓗᐊᖅᑐᒥ ᐆᒪᔪᕕᓂᕐᓄᑦ ᐋᓐᓂᖅᓯᕆᓂᐅᔪᒥ. 9 ᓄᓇᓕᐅᔪᑦ ᐱᐅᓂᖅᓴᒥ ᐃᓂᒦᑉᐳᑦ ᑕᓪᓕᒪᓃᖏᔪᓂ ᐅᕝᕙᓘᓐᓃᑦ 0–ᒥ, ᑭᓯᐊᓂ ᐊᑲᐅᙱᓕᐅᕈᑕᐅᓪᓚᕆᒃᑐᖅ ᓱᓕ ᐋᓐᓂᖅᓯᕆᓂᐅᔪᖅ ᐃᒻᒥᖕᓂᒃ, ᐊᒻᒪ ᒪᒥᓴᕐᓂᖓ ᐱᔭᕆᐊᓕᒃ ᐊᖑᑎᓄᑦ ᐊᕐᓇᓄᓪᓗ ᓯᕗᒻᒧᑦ ᐃᖏᕐᕋᖃᑎᒌᖕᓂᐅᔪᒥ.