ᖃᒧᑕᐅᔭᒃᑰᕐᓂᖅ

by Derek Neary- November 5, 2017

ᐅᑭᐅᖑᕐᒥᖕᒪᑦ ᖃᒧᑕᐅᔭᐃᑦ ᐊᑐᖅᑕᐅᖃᑦᑕᕐᓂᐊᓕᕆᕗᑦ ᓱᒃᑲᓴᐅᑎᓗᑎᒡᓗ ᐊᒥᓱᑦ ᖃᐅᑕᐅᔭᖃᑦᑕᑦ.

ᐃᐅᕆᓐ ᑕᕐᑕᒃ ᑲᖏᖅᖠᓂᕐᒥᐅᑕᖅ ᓱᒃᑲᓴᐅᑎᒍᒪᒃᑲᐅᕗᖅ ᖃᒧᑕᐅᔭᒃᑯᑦ. ᑭᖑᕙᕆᐊᕐᓂᐊᖅᐳᑦ ᓱᒃᑲᓴᐅᑎᖃᑕᐅᓂᖓ ᐃᓕᓐᓂᐊᕐᓂᐊᕐᓂᖓᓄᑦ ᐃᑦᒪᓐᑕᒥ, ᑭᓯᐊᓂ ᕿᑎᐊᓂ ᑎᓴᐱᕆ ᖃᒧᑕᐅᔭᓕᕆᒍᓇᕐᓂᐊᖅᐳᖅ.

ᐃᐅᕆᓐ ᑕᕐᑕᒃ ᐃᓚᐅᓪᓗᓂ. ᐃᑦᒪᓐᑕᒦᑉᐳᖅ ᐅᖁᒪᐃᑦᑐᑦ ᓄᓇᓯᐅᑎᑦ ᐊᐅᓚᐅᑎᖏᓐᓂᒃ ᐋᖅᑭᒃᓱᐃᔨᐅᓂᕐᒧᑦ ᐃᓕᓐᓂᐊᖅᖢᓂ ᑎᓴᐱᕆ 17-ᒧᐊᕋᓱᐊᕐᓂᖓᓂ, ᑭᓯᐊᓂ, ᐅᑎᕐᓂᐊᖅᐳᖅ ᑲᖏᖅᖠᓂᕐᒧᑦ ᖃᒧᑕᐅᔭᕐᓂᐊᕆᓪᓗᓂᓗ Polaris-ᒥᓂᒃ.

“ᐄᓪᓚᕆᒃ, ᖃᒧᑕᐅᔭᕈᒪᓪᓕᖅᐳᖓ,” ᐅᖃᓚᐅᖅᐳᖅ ᑕᕐᑕᒃ.

ᐅᖓᓯᒃᑐᒧᑦ ᓱᒃᑲᓴᐅᑎᒍᒪᒃᑲᐅᓪᓗᓂ, ᓴᖑᖃᑦᑕᖅᑐᒃᑰᕐᓗᓂ ᖁᕕᐊᒋᓪᓗᓂᐅᒃ.

ᓱᒃᑲᓴᐅᑎᖃᑕᐅᖃᑦᑕᖅᑐᖅ ᑳᓚᓐ ᓂᑉᑕᓇᑦᓯᐊᒃ ᖁᕐᓗᖅᑐᒥᐅᑕᖅ ᐱᐅᒃᓴᕐᓂᖅᓴᐅᓪᓗᓂ ᐸᐸᑎᐊᓂᒃ ᖃᒧᑕᐅᔭᓂᒃ ᐊᐅᓪᓛᑦᓯᐊᕈᓐᓇᕐᓂᖏᓐᓄᑦ – ᑕᐃᒪᓐᓇᐃᑦᑐᓂᒃ ᐊᑐᕆᐊᖃᕋᒥ 1,000 ᑭᓛᒥᑕᓂᒃ ᐅᖓᓯᖕᓂᖃᖅᑐᒧᐊᕈᓐᓇᕐᒪᑕ ᐱᓇᓱᐊᕈᓯᑦ ᓄᖑᐊᓂ ᓄᓇᒃᑯᑦ.

ᖃᓂᑦᑐᒧᑦ ᓱᒃᑲᓴᐅᑎᖃᑕᐅᖃᑦᑕᖅᖢᓂᓗ ᐅᖓᓯᒃᑐᒧᓪᓗ ᐊᑯᓂ ᐊᕐᕌᒍᓂ ᓵᓚᒃᓴᖅᓯᒪᓪᓗᓂᓗ. ᐊᕐᕌᒍᖃᓕᖅᖢᓂ 40-ᓂᒃ, ᐅᖃᓚᐅᖅᖢᓂᓗ ᐊᑯᓂᐅᓂᖅᓴᖅ ᐃᒡᓕᕐᒥᓂᑯᑖᕐᓂᖅᓴᐅᖃᑦᑕᕋᒥ, ᐊᒻᒪ ᐊᑲᐅᖏᓕᖅᐸᓪᓕᐊᓂᖅᓴᐅᓪᓗᓂᓗ ᓱᒃᑲᓴᐅᑎᖃᑕᐅᓂᕐᒧᑦ. ᑭᓯᐊᓂ ᑕᐃᒪᓐᓇᐃᒃᑲᓗᐊᖅᑎᓪᓗᒍ, ᓱᒃᑲᓴᐅᑎᖃᑕᐅᓂᐊᕆᕗᖅ, ᐅᖃᓚᐅᖅᐳᖅ.

ᓂᑉᑕᓇᑦᓯᐊᒃ, ᓱᒃᑲᓴᐅᑎᖃᑕᐅᖃᑦᑕᖅᓯᒪᓕᖅᐳᖅ ᐊᕐᕌᒍᓄᑦ ᖁᓕᓄᑦ 11-ᓄᓪᓘᓐᓃᑦ, ᐅᖃᓚᐅᖅᖢᓂᓗ ᖃᒧᑕᐅᔭᐃᑦ ᐋᖅᑭᐅᒪᑦᓯᐊᕆᐊᖃᕐᓂᖏᓐᓄᑦ. ᑕᒪᒃᑯᐊ ᐅᖅᓴᒃᓴᐅᑎᕕᓂᖏᑦ ᑯᕕᖃᑦᑕᖅᖢᒋᑦ ᐊᕐᕌᒍᑉ ᓄᖑᐊᓂ ᐃᒪᖅᑕᖃᖁᖏᑦᖢᒋᑦ ᒑᓯᖃᕐᕕᖓᓂ ᖃᒧᑎᖏᓪᓗ ᖃᓱᒋᐊᖅᐸᒃᖢᒋᑦ ᐊᓕᒃᐸᓪᓕᐊᓂᐊᖏᒻᒪᑕ.

ᑕᕐᑕᒃ ᐋᖅᑭᒃᓱᐃᑦᓯᐊᕈᒪᐃᓐᓇᖅᐳᖅ ᖃᐅᑕᐅᔭᒥᓂᒃ.

“ᑕᒪᒃᑯᐊ ᓱᓇᑐᐃᓐᓇᐃᑦ ᐊᐅᓚᐅᑎᖏᑦ ᐅᖅᓴᖅᓴᖃᑦᑕᖅᐸᒃᑲ ᑕᒪᕐᒥᒡᓗ ᐊᓯᖏᑦ ᐅᑭᐅᖑᓚᐅᖏᓐᓂᐊᓂ, ᐸᕐᓇᒃᖢᒍ ᐊᑐᕐᓂᐊᕋᑉᑯ ᐅᑭᐅᖅᐸᑦ,” ᐅᖃᓚᐅᖅᐳᖅ.

ᔪᐊᓇᓯ ᐃᑎᓪᓗᐃᑦ ᑭᓐᖓᕐᒥᐅᑕᖅ, 18-ᓂᒃ ᐊᕐᕌᒍᓂᒃ ᖃᒧᑕᐅᔭᖅᐸᓕᖅᑐᖅ ᖃᐅᔨᒪᑦᓯᐊᖅᐳᖅ ᐅᑭᐅᖃᓕᖅᖢᓂ 30-ᓂᒃ, ᐃᓕᓐᓂᐊᓚᐅᖅᓯᒪᕗᖅ ᖃᒧᑕᐅᔭᓂᒃ ᐊᓯᖏᓐᓂᒡᓗ ᒥᑭᔪᓂᒃ ᐊᐅᓚᐅᑎᖃᖅᑐᓂᒃ ᐋᖅᑭᒃᓱᐃᔨᐅᓂᕐᒧᑦ ᑕᐃᑦᓱᒪᓂᑐᖃᖅ, ᐊᒻᒪ ᐊᐅᓚᐅᑎᓕᕆᖃᑦᑕᖅᖢᓂ ᐊᓯᖏᓐᓂᒃ. ᑕᐃᒪᓐᓇᑎᑐᑦ ᓂᑉᑕᓇᑦᓯᐊᑎᑐᑦ, ᐱᐅᒃᓴᖅᖢᓂ ᑕᒪᒃᑯᓂᖓ ᐸᐸᑎᐊᓂᒃ ᓯᑕᒪᓂᒃ ᑕᐃᒪᐃᑦᑐᖃᖅᖢᓂᓗ. ᓂᐅᕕᕐᓂᐊᖅᖢᓂᓗ ᓄᑕᐅᖏᓐᓂᖅᓴᓂᒃ ᓱᕋᒃᓯᒪᔪᓂᒡᓗ ᖃᒧᑕᐅᔭᓂᒃ ᐊᐅᓚᐅᑎᓕᕆᓂᐊᖅᖢᓂᒋᑦ ᐃᓚᒃᓴᕆᓂᐊᖅᖢᓂᒋᑦ.

ᐃᑎᓪᓗᐃᑦ ᓱᒃᑲᓴᐅᑎᖃᑦᑕᖏᑦᖢᓂ, ᐊᑐᖃᑦᑕᖅᐸᖓ ᖃᒧᑕᐅᔭᓂ ᐊᖑᓇᓱᐊᓕᕌᖓᒥ. ᑕᐃᒪᓐᓇ ᐱᔾᔪᑎᒋᓪᓗᒍ, ᐅᖃᓚᐅᖅᐳᖅ ᓂᒡᓕᓯᐅᑎᖃᖅᑐᓂᒃ ᐱᐅᒃᓴᕐᓂᖅᑕᐅᓂᕐᒥᓄᑦ ᑕᒪᒃᑯᐊ ᖃᐅᓯᒧᑦ ᓂᒡᓕᓯᐅᑎᖃᖅᑐᑦ ᐆᓇᖅᓯᓴᕋᐃᓐᓂᖅᓴᐅᖕᒪᑕ.

ᐅᑭᐅᒃᑯᑦ ᑐᖅᑯᐃᖃᑦᑕᖅᖢᓂ, ᖃᒧᑕᐅᔭᒥᓂᒃ ᐳᖅᑐᔪᒥ, ᑐᓐᖓᑦᑕᐃᓕᑎᑦᖢᒋᑦ, ᖁᐊᖁᖏᑦᖢᒋᑦ ᖃᒧᑎᖏᑦ ᓯᑯᒥ ᓱᕋᑐᐃᓐᓇᕆᐊᖃᕐᒪᑕ, ᐅᖃᓚᐅᖅᐳᖅ.

Leave a Comment:

Your email address will not be published. Required fields are marked *