ᐊᑐᐊᒐᕆᔭᐅᔪᑦ ᐱᖑᐊᕈᓯᕐᓄᑦ

by harrymaksagak- November 26, 2017

ᑐᖓᓕᖓᓂ ᐃᓕᓴᕐᕕᖕᒥ ᐃᓕᓴᖅᑎᓪᓗᑕ ᐱᖑᐊᖅᑎᓂ ᐃᓚᐅᖃᑦᑕᓚᐅᖅᓯᒪᒐᒪ ᖃᐅᔨᒪᓇᓚᐅᖅᑐᖅ ᐊᑐᐊᒐᖃᖅᖢᑎᒃ ᐋᕿᒃᓱᖅᓯᒪᓂᖏᓐᓂᒃ ᒪᓕᒃᑕᐅᕙᒃᑐᓂᒃ ᐱᖑᐊᖅᑎᓄᑦ ᑕᐃᒪᐃᒻᒪᑕ ᐱᖑᐊᕈᓯᓕᒫᑦ.

ᐋᑦᑕᐅᔭᖅᑎᓂ ᐹᓯᑭᑦᐸᓪᑐᓂ ᐸᓪᓚᒃᑎᑦᑎᒋᐊᖃᓚᐅᖏᑦᑐᖅ, ᐅᓇᑕᕆᐊᖃᖏᓱᓂᓗ ᐊᓯᖏᓐᓂᒃ ᐊᔭᐅᕆᖃᑦᑕᐅᑎᔪᓂᒃ ᐱᑕᖃᕆᐊᖃᖏᒻᒥᔪᖅ. ᑭᓯᐊᓂᓕ ᑑᖅᑕᖅᑎᓂ, ᑑᖅᓯᒋᐊᖃᕐᓇᖏᒻᒥᔪᖅ ᕿᓗᕆᐊᖓᑕ ᐊᑖᒍᑦ. ᐊᖅᓴᖅᑎᓂ ᓵᑯᓂᒃ, ᐊᒃᑐᖅᓯᒋᐊᖃᖏᑦᑐᖅ ᐱᖑᐊᖅᑎᑦᑎᔨᓂᒃ. ᐊᒻᒪᓗ ᐋᑦᑕᐅᔭᖅᑎᓂ ᕚᓕᐹᓪᓂᒃ, ᒪᑦᑎᑕᐅᑎᒥᒃ ᐊᒃᑐᖅᓯᒋᐊᖃᕐᓇᖏᒻᒥᔪᖅ. ᐱᔭᕆᑐᓗᐊᖏᑦᑐᓂᒃ ᒪᓕᒐᖃᐅᖅᖢᑎᒃ ᑭᓯᐊᓂ ᐊᓯᐊᒍᑦ ᐱᕝᕕᒃᓴᖃᖏᓱᑎᒃ.

ᑕᐃᒫᓴᐃᓐᓇᖅ ᐃᖅᑲᓇᐃᔭᕐᕕᖕᓂ ᐊᔾᔨᒌᖏᑦᑐᓂᒃ ᐊᑐᐊᒐᖃᐅᓲᖑᖕᒥᖕᒪᑕ ᑭᓱᓕᒫᓄᑦ ᖃᓄᓕᒫᕐᓗ ᐊᑐᕐᓂᖃᖅᑐᓂᒃ ᓄᓇᓕᖕᒥᐅᓄᑦ ᐊᑦᑕᕐᓇᖅᑐᖃᖁᓇᒍ ᓴᐳᑎᔭᐅᑦᑎᐊᖅᓯᒪᖁᓪᓗᒋᓪᓗ. ᑭᓯᐊᓂᓕ ᓄᓇᓕᑦᑎᓐᓂ ᑕᒪᑐᒪᓂ ᐃᒻᒪᖅᑯᑏᑦ ᓱᓪᓗᖏᑦ ᐋᕿᒃᑕᐅᓚᐅᖏᓐᓂᖏᓐᓂ ᓄᓇᑦᑎᓐᓂ, ᑕᐃᒪᐃᓐᓂᖓᓄᑦ ᐃᒡᓗᓕᐅᕈᓐᓇᖏᑦᑐᑦ ᒪᕐᕈᖕᓂᒃ ᓇᑎᓕᖕᓂᒃ ᐅᖓᑖᓄᑦ. ᓄᓇᒃᑰᔫᓪᓗ ᐅᓄᖅᓯᕙᓪᓕᐊᖕᒪᑕ ᐊᑐᐊᒐᖃᕆᐊᖃᓕᕐᒥᔪᑦ ᖃᓄᑎᒋ ᓱᒃᑲᓴᕈᓐᓇᕐᒪᖔᑕ ᐊᖅᑯᑎᒃᑯᑦ ᐃᓕᓴᕐᕕᒃᑯᓪᓗ ᓇᓗᓇᐃᒃᑯᑕᖃᐅᕐᓗᑎᒃ ᐊᑐᐊᒐᓂᒃ ᒪᓕᖏᑦᑐᑦ ᐊᑭᓖᑎᑕᐅᑐᐃᓐᓇᕆᐊᖃᕐᓗᑎᒃ. ᖃᖓᑐᐃᓐᓇᖅ ᓄᓇᒃᑰᔪᖃᓕᕐᓂᕈᕕᑦ ᓄᓇᑐᐃᓐᓇᒧᓲᒥᒃ, ᓯᑕᒪᓕᖕᒥᒃ ᐅᕝᕙᓘᓐᓃᑦ ᖃᒧᑕᐅᔭᒥᒃ ᓂᐊᖅᑯᐊᔭᐃᒃᑯᑎᓂᒃ ᓇᓴᖅᓯᒪᒋᐊᖃᓕᕐᒥᔪᑦ. ᑭᒃᑯᑐᐃᓐᓇᐃᑦ ᓄᓇᑐᐃᓐᓇᒨᓲᓂᒃ ᓄᓇᒃᑰᔪᖃᑐᑦ, ᖃᓄᐃᑦᑐᑐᐃᓐᓇᓂᒃ 90 cc ᐅᖓᑖᓅᕈᓐᓇᖅᑐᑦ ᐊᑎᓕᐅᖅᓯᒪᒋᐊᖃᓕᕐᒥᔪᑦ ᓇᓪᓕᐃᒃᑯᑕᖃᕐᓗᑎᒃᓗ, ᐊᒻᒪᓗ ᑕᒪᑐᒪᓂ ᖃᐅᔨᖏᒃᑯᕕᑦ ᓱᓕ ᖃᓄᖅ ᐅᖃᕋᓱᐊᕐᓂᓐᓂᒃ. ᐊᒥᓲᖕᒪᑕ ᐊᑐᐊᒐᐃᑦ ᒪᓕᒐᐃᓪᓗ.

ᐄᐳᓗ 1, 1999-ᒥ, ᐅᑭᐅᖅᑕᖅᑐᒥᐅᑦ ᑕᐅᑦᑐᖓ ᓄᓇᖑᐊᑎᒍᑦ ᐊᓯᔾᔨᓚᐅᕐᒪᑦ. ᑕᒫᓃᖢᓂ ᑕᑯᒃᓴᐅᖏᑦᑐᒥᒃ ᑎᑎᕐᕕᐅᓪᓗᓂ ᓇᐅᒃᑯᑦ ᐊᕕᒃᓯᒪᓂᐊᓕᕐᓂᑦᑎᓐᓂᒃ ᓄᓇᓯᐊᒥᐅᑦ ᓄᓇᕗᒥᐅᓪᓗ. ᐊᖏᕈᑕᐅᓯᒪᒐᓗᐊᖅᑎᓪᓗᒋᑦ ᐋᕿᒃᓱᐃᓯᒪᒐᓗᐊᖅᑎᓪᓗᒋᓪᓗ ᑖᒃᑯᐊ ᒪᕐᕉᒃ ᑲᓇᑕᐅᑉ ᓄᓇᖁᑎᖏᑦ ᓱᓕ, ᐊᑐᓂ ᒪᓕᒐᖃᕐᒪᑕ ᐊᑐᐊᒐᖃᐅᖅᖢᑎᒃᓗ ᒪᓕᒃᑕᐅᒋᐊᓕᖕᓂᒃ ᐊᐅᓚᑕᐅᓗᑎᒃ ᒐᕙᒪᑎᖏᓐᓄᑦ ᐊᑐᓂ ᒐᕙᒪᑎᖃᓕᕐᓗᑎᒃ. ᐃᓛᖏᓛᒃ ᐊᑐᓂ ᐃᓱᒪᖅᓲᑎᒋᔪᓐᓇᖅᑕᖏᑦ ᑎᑎᕋᖅᓯᒪᓕᖅᑑᒐᓗᐊᑦ ᐅᐊᓕᓂᕐᒥᐅᑦ ᐅᖅᑯᒥᐅᓪᓗ, ᑭᓯᐊᓂᓕ ᐃᒻᒥᓄᑦ ᓱᓕ ᑭᐅᑦᑕᖃᑦᑕᐅᑎᒋᐊᖃᕐᒪᑕ ᑭᖑᓪᓕᖅᐹᒥ ᐊᐅᓚᑕᐅᓪᓗᑎᒃ ᑲᓇᑕᐅᑉ ᒐᕙᒪᖓᓄᑦ.

ᐃᓚᖏᓐᓂ, ᑕᒪᐃᓐᓂᐅᖏᑦᑑᒐᓗᐊᖅ, ᓄᓇᓕᑦᑎᓐᓂ ᓄᓇᕗᒥ, ᐅᓐᓄᒃᑯᑦ ᖁᓕᒧᐊᕌᖓᑦ ᓄᑕᕋᐃᑦ ᐃᓯᖅᓯᒪᒋᐊᖃᓕᓲᑦ ᐊᕐᕌᒍᓖᑦ 16 ᐊᑖᓂ ᐊᖅᑯᑎᒦᒋᐊᖃᕈᓐᓃᖅᑎᑕᐅᔪᔪᑦ ᐊᖏᕐᕋᖅᓯᒪᓕᕐᓗᑎᒃ, ᑭᓯᐊᓂᓕ ᑕᐃᒪᓐᓇ ᐊᑐᐊᒐᖃᓚᐅᕋᓗᐊᕐᒪᖔᑕ ᐳᐃᒍᖅᑕᐅᓯᒪᓕᖅᑐᖅ ᐃᓚᖏᓐᓂ ᓱᕚᓪᓕᐅᑕᐅᓚᐅᖏᒻᒪᑦ. ᐃᒻᒪᖄ ᐱᔾᔪᑎᖃᖅᑐᓂᒃ ᑭᓯᐊᓂ ᐊᑐᐊᒐᖃᕆᐊᒃᓴᖅ ᐊᖏᕐᕋᑦᑎᓐᓄᒃ ᐱᔭᕆᑐᖕᒪᑦ ᒪᒃᑯᒃᑐᐃᑦ ᐊᖏᕐᕋᖅᓯᒪᔪᒪᖃᑦᑕᖏᒻᒪᑕ.

ᐊᑐᓂ ᓄᓇᓖᑦ ᓄᓇᕗᒥ, ᐃᒻᒥᒃᑰᕋᓗᐊᖅᖢᑎᒃ, ᐊᖅᑯᑎᖃᐅᕐᒪᑕ ᐊᑐᐊᒐᓂᒃ ᐋᕿᒃᓱᖅᑕᐅᓯᒪᔪᓂᒃ ᐱᕈᖅᓴᕈᑎᖏᓐᓄᑦ ᐊᖏᒡᓕᕙᓪᓕᐊᔪᑎᖏᓐᓄᑦ ᑕᒪᑐᒪᓂᓴᐃᓐᓇᑦ ᐊᑦᑕᕐᓇᑦᑐᖃᖅᑕᐃᓕᖁᓪᓗᒍ ᓄᓇᓕᖕᒥᐅᓄᑦ ᐃᖏᕐᕋᕕᐅᖃᑦᑕᖅᑐᑦ ᐊᑐᕆᐊᖃᐅᖅᖢᑎᒃ ᐊᑦᑕᕐᓇᖏᑦᑐᓂᒃ. ᓄᓇᓕᕗᑦ ᐱᕈᖅᐸᓪᓕᐊᑎᓪᓗᒋᑦ ᓄᓇᓖᓪᓗ ᐃᒡᓗᖏᑦ ᐅᓄᖅᓯᕙᓪᓕᐊᑎᓪᓗᒋᑦ ᓄᓇᓕᓕᕆᔪᑏᑦ ᐊᖑᒻᒪᑎᒋᐊᖃᕐᒪᑕ ᐃᑲᔪᖅᓴᖅᑕᐅᒐᓗᐊᖅᖢᑎᒃ ᓄᓇᓕᓕᕆᔨᒃᑯᓐᓄᑦ ᒐᕙᒪᑎᓕᕆᔨᒃᑯᓐᓄᓪᓗ, ᓄᓇᓕᑦᑎᓐᓂ ᓇᖕᒥᓂᖅ ᓄᓇᓕᒥᓄᑦ ᐋᕿᒃᓱᐃᓯᒪᓲᖑᖕᒥᒐᑦᑕ. ᖃᐅᔨᒪᓇᕐᒪᑦ ᓄᓇᓕᖓᓂ ᐱᑕᖃᐅᖅᑐᖅ ᓴᓇᕕᓄᑦ ᐃᒡᓗᓂᒃ ᐊᒻᒪᓗ ᐊᖏᕐᕋᕆᔭᐅᔪᓄᑦ ᐃᒡᓗᓂᒃ, ᓂᐅᕕᕐᕖᑦ ᓴᓇᕖᓪᓗ ᐃᓚᖓᓃᑎᑕᐅᓱᑦ ᐃᒻᒥᒃᑰᖅᖢᑎᒃ ᐊᒻᒪᓗ ᓄᓇᒃᑰᔫᒃᑯᕖᑦ ᖃᖓᑕᓲᒃᑯᕖᓪᓗ ᐊᓯᖏᓐᓃᒃᑭᓪᓗᑎᒃ. ᑕᐃᒪᓐᓇ ᐋᕿᒃᓱᐃᓯᒪᓲᑦ ᐃᓗᐊᕐᓂᖅᓴᐅᓇᓱᐊᖅᖢᒍ ᓄᓇᓕᖕᒥᐅᓄᑦ ᐃᑲᔪᕋᓱᐊᖅᖢᒋᑦ ᖃᐅᔨᒪᓂᐊᕐᒪᑕ ᓇᒦᒋᐊᒃᓴᖏᓐᓂᒃ ᓄᓇᓕᖓᓂ ᐋᕿᓱᖅᓯᒪᖃᑦᑕᕐᒥᔪᑦ ᑲᑎᒪᔨᖏᓐᓄᑦ ᐱᕙᓪᓕᐊᑎᑕᐅᔪᑦ ᕼᐊᒪᓚᑦᑎᓐᓂ, ᓄᓇᓕᕐᔪᐊᓂ ᓄᓇᓕᐸᐅᔭᓂᓗ ᓄᓇᕗᒥ.

ᐊᑐᐊᒐᖃᐅᖃᑦᑕᖏᒃᑯᑦᑕ ᒪᓕᒃᑕᐅᒋᐊᓕᖕᓂᒃ ᑎᑎᕋᖅᓯᒪᓗᑎᒃ ᒪᓕᒐᑎᒍᑦ ᑲᔪᓯᑎᑕᐅᔪᓐᓇᖅᑐᓂᒃ, ᓄᓇᓕᕗᑦ ᐋᕿᒃᓱᑦᓯᒪᖏᑦᑎᐊᕋᔭᖅᐳᖅ ᑭᒡᓕᖃᖏᓪᓗᓂ ᐱᕙᓪᓕᐊᑎᑕᐅᔪᒪᔪᑦ ᑲᔪᓯᑦᑎᐊᕈᓐᓇᖏᓪᓗᑎᒃ ᓄᓇᓕᐅᓇᔭᖅᐳᑦ ᐊᔾᔨᒋᖏᑦᑐᓂᒃ ᐱᕈᖅᓂᖃᕐᓗᑎᒃ ᓇᓗᓇᕐᓗᑎᒃ ᖃᓄᐃᓐᓂᐊᕐᓂᖏᑦ ᓯᕘᕋᓇᕐᓗᑎᒃ ᐊᑦᑕᕐᓇᓕᕋᔭᖅᑐᑦ.

Leave a Comment:

Your email address will not be published. Required fields are marked *