ᐃᓚᐅᑎᓪᓗᒍ ᑲᖏᖅᖠᓂᖅ ᐃᓗᐊᖅᓴᐅᑎᓄᑦ ᑲᒪᔨᐅᓂᐊᖅᑐᑦ

NNSL- February 4, 2018

ᖃᕆᑕᐅᔭᑎᒍᑦ ᐅᓂᒃᑳᑦ ᐊᒃᓱᑲᓪᓚᐅᓕᓚᐅᖅᑐᑦ ᐱᓇᓱᐊᕈᓯᐅᓚᐅᖅᑐᒥ ᐅᖃᓕᒫᖅᑐᑦ ᐅᓂᒃᑳᓚᐅᖅᑐᑦ ᐊᑕᐅᓯᕐᒥ ᐅᓂᒃᑳᒥᒃ ᐱᒃᑯᒥᒍᓱᓗᐊᖅᖢᑎᒃ: ᒫᓐᓇ ᐃᓱᒪᒃᓴᖅᓯᐅᕈᑕᐅᓕᖅᑐᒥᒃ ᑰᒃᔪᐊᕌᓗᒃ ᐃᓗᐊᖅᓴᐃᔪᑎᓄᑦ ᑲᑎᖅᓱᐃᕝᕕᐅᖁᓪᓗᒍ ᑕᒪᐃᓐᓂᒃ ᐃᓗᐊᖅᓴᐃᔪᑎᓂᒃ ᐱᑕᖃᓕᕐᓗᓂ ᑭᕙᓪᓕᕐᒥᐅᓄᑦ ᐊᑐᖅᑕᐅᒋᐊᓕᖕᓂᒃ.

ᐅᖃᖃᑦᑕᖅᓯᒪᖕᒪᑕ ᒫᓂᑑᐸᒥᐅᑦ ᐃᓐᑏᐲᒃᑯᑦ ᒐᕙᒪᖓᑕ ᐊᖓᔪᖅᑳᖓ ᕗᐊᑉ ᑭᓂᐅ, ᐊᒃᓱᕉᑎᖃᓕᕐᒪᑦ ᑰᒃᔪᐊᕌᓗᖕᒥᒃ ᐊᓯᐅᖁᓇᒍ ᐃᓂᖓ ᑕᒪᓐᓇ ᓈᒻᒪᑦᑎᐊᕐᒪᑦ ᐅᑭᐅᖅᑕᖅᑐᒥᐅᓄᑦ ᐊᖅᑯᓵᖅᑕᐅᖏᓐᓇᐅᔭᕐᒪᑦ ᒫᓂᑑᐸᒥ ᑭᕙᓪᓕᕐᒥᓗ ᓄᓇᓕᖕᓄᑦ ᖃᓂᓐᓂᖅᓴᐅᓪᓗᓂ. ᐋᓐᓂᐊᕕᖓᓂ ᑐᐊᕕᖅᑐᒥᒃ ᑲᒪᕕᖃᖅᖢᑎᒃ ᐊᒻᒪᓗ ᐱᓚᒃᑐᐃᕕᖃᖅᖢᓂ, ᐊᒻᒪᓗ ᒥᑦᑕᕐᕕᖃᑦᑎᐊᖅᖢᓂ.

ᐊᕐᕕᐊᒥᐅᓄᑦ-ᑎᑭᕋᕐᔪᐊᒥᐊᓄᓪᓗ ᒪᓕᒐᓕᐅᖅᑎ ᔮᓐ ᒪᐃᓐ ᐱᒃᑯᒥᒍᓱᓚᐅᖅᑐᖅ ᑕᒪᑐᒥᖓ ᑐᓴᕋᒥ. ᑕᒪᐃᓐᓂᒃ ᑮᓇᐅᔭᑎᒍᑦ ᐃᑲᔪᖅᓴᕈᒪᔪᓂᒃ ᑐᓐᖓᓱᖕᓂᕋᖅᑐᖅ ᐃᓗᐊᖅᓴᐃᔪᑎᓄᑦ ᐱᓇᓱᐊᒐᓂᒃ ᐃᑲᔪᖅᓴᕆᐊᒃᓴᖅ, ᓇᐅᒃᑯᑐᐃᓐᓇᖅ ᐃᓗᐊᕐᓂᖅᓴᒥᒃ ᐋᕿᒃᓯᒋᐊᖃᕋᑦᑕ ᒫᓐᓇ ᐱᖁᑎᒋᓕᖅᑕᑦᑎᓐᓂᒃ.

ᖄᖓᒍᑦ ᑕᑯᓪᓗᒍ, ᓱᓕᔪᖅ ᐊᐃᕙᐅᑎᒋᓇᓱᐊᕈᑦᑎᒍ. ᐅᓄᕐᓂᖅᓴᐃᑦ ᐅᖃᓕᒫᖅᑎᕗᑦ nunavutnews.com-ᒥ ᑎᑎᕋᖃᑦᑕᓚᐅᖅᑐᑦ ᐊᒻᒪᓗ ᕖᔅᐳᒃᑯᑎᒍᑦ ᑐᕌᕐᕕᑦᑎᓐᓄᑦ ᑭᓯᐊᓂᓕ ᐃᓚᖏᑦ ᓇᒻᒪᒃᓴᓚᐅᖏᑦᑐᑦ.

ᓱᖕᒪᑦ ᓈᒻᒪᒃᓴᖏᒻᒪᖔᕐᒥᓂᒃ ᑭᐅᖃᑦᑕᓚᐅᖅᑐᑦ, ᐅᖃᓕᒫᖅᑎᕗᑦ ᒫᓐᓇ ᕗᐃᓂᐲᒃᒧᖓᐅᖃᑦᑕᕆᐊᒃᓴᖅ ᖁᕕᐊᓱᖕᓂᕋᖅᖢᑎᒃ ᓄᓇᓕᐸᐅᔭᖓᓂ ᐋᓐᓂᐊᕖᑦ ᓴᓇᖅᑯᑎᖃᑦᑎᐊᕐᒪᑕ, ᑰᒃᔪᐊᕌᓗᖕᒨᖃᑦᑕᓕᖅᐸᑕ ᐱᒃᑯᒥᓇᖏᓐᓂᖅᓴᐅᓂᐊᕐᒪᑦ ᓄᓇᕗᒥᐅᑦ ᐱᐅᓂᖅᐹᒥᒃ ᑲᒪᒋᔭᐅᔪᑎᖃᕆᐊᖃᕐᒪᑕ. ᐊᑕᐅᓯᖅ ᐅᖃᒻᒪᕆᓚᐅᖅᑐᖅ, “ᐋᒃᑲᑦᑎᐊᒥᐊᖅᖢᓂ,” ᑰᒃᔪᐊᕌᓗᒃ ᓇᓄᖃᐅᓗᐊᕐᓂᖓᓄᑦ ᓇᒥᑐᐃᓐᓇᓕᒫᖅ.

ᑭᓯᐊᓂᓕ ᐊᑐᐊᒐᓕᐅᖅᑏᑦ ᑭᒃᑯᑐᐃᓐᓇᐃᑦ ᐃᓱᒫᓗᒋᔭᖃᔮᖏᓐᓂᒃ ᑲᒪᔮᖏᒻᒪᑕ. ᓱᓕᔪᓂᒃ ᐊᑐᐊᒐᖃᕐᓗᑎᒃ ᑐᑭᑖᕈᑎᖃᕐᓂᐊᕐᒪᑕ ᓄᓇᕗᒥᐅᓄᑦ ᐃᒃᐱᖕᓇᕐᓂᖃᖅᑐᓂᒃ ᐊᑐᓂ ᓂᑭᑦᑖᕐᓗᑎᒃ ᐃᓱᒪᒋᔭᒥᓂᒃ ᐊᑐᕐᓂᐊᕐᒪᑕ ᖃᓄᖅ ᑖᒃᓰᔭᐃᔭᖅᑕᐅᔪᑎᖏᑦ ᐊᑐᖅᑕᐅᓂᐊᓂᖏᓐᓄᑦ.

ᒫᓐᓇ ᐊᑭᖃᕐᒪᑦ ᖃᖓᑕᓲᒃᑯᑦ ᐃᖏᕐᕋᓪᓗᓂ ᑲᖏᖅᖠᓂᕐᒥᑦ ᑰᒃᔪᐊᕌᓗᖕᒧᑦ $1,500-ᒥᑦ $2,000-ᒧᑦ, ᓇᓕᐊᖕᓂ ᐅᓪᓗᓂ ᐱᓇᓱᐊᕈᓯᕐᒥ ᐃᖏᕐᕋᓃᑦ ᒪᓕᒃᓗᒍ. ᑲᖏᖅᖠᓂᕐᒧᓪᓗ ᕗᐃᓂᐱᒃᒥᑦ $2,100-ᒥᑦ $3,400-ᒧᑦ, ᓇᓕᐊᖕᓂ ᐅᓪᓗᓂ ᒪᓕᒃᓗᒍ. ᐊᒥᓱᑦ ᖃᖓᑕᓲᑦ ᕗᐃᓂᐲᒃᒧᖓᐅᔪᑦ ᓄᖅᑲᓚᐅᑲᖃᒃᑕᕐᒪᑕ ᑰᒃᔪᐊᕌᓗᖕᒥ. ᐃᖏᕐᕋᔪᑏᑦ ᐊᑭᖏᑎᒍᑦ ᕿᒥᕐᕈᓪᓗᒍ ᐃᓗᐊᕐᓂᖅᓴᐅᔪᒥᓇᖅᑐᖅ ᑰᒃᔪᐊᕌᓗᒃ ᕗᐃᓂᐱᒃᒥᑦ, ᐱᓗᐊᖑᐊᖅᑐᒥᒃ ᑕᐅᓴᖏᓐᓂᑦ ᐊᑭᖏᑦ ᐃᓱᒪᒋᓪᓗᒋᑦ ᐊᑐᓂ ᐃᓄᖕᓄᑦ ᖃᐅᔨᓴᖅᑕᐅᒋᐊᖅᑐᖅᑐᓄᑦ ᐃᖏᕐᕋᔪᑎᓄᓪᓗ.

ᖃᖓᑕᓱᒃᑯᑦ ᐃᖏᕐᕋᓪᓗᓂ ᑲᖏᖅᖠᓂᕐᒥᑦ ᑰᒃᔪᐊᕌᓗᖕᒧᑦ ᐃᑲᕐᕋᐃᓐᓇᐅᖕᒪᑦ, ᑕᒪᑐᒪᓂᓴᐃᓐᓇᑦ 2.5 ᐃᑲᕐᕋᐅᑎᓪᓗᒍ ᕗᐃᓂᐱᒃᒧᑦ ᑲᖏᖅᖠᓂᕐᒥᑦ. ᐋᓐᓂᐊᖅᖢᓂ, ᐊᓐᓂᐊᕕᒧᖓᐅᔭᐅᓪᓗᓂ ᓱᒃᑲᓕᓂᖅᐸᒥᒃ ᐊᑐᕆᐊᖃᕐᓇᕐᒪᑦ ᓱᓕᔪᕐᓕ ᑕᒪᓐᓇ.

ᑭᓯᐊᓂᓕᑦᑕᐅᖅ ᐊᑐᖅᑕᐅᓂᐊᖅᑐᑦ ᐃᖏᕐᕋᔪᒧᑦ ᐃᓱᒪᒋᔭᐅᒋᐊᖃᕐᒥᖕᒪᑕ ᐋᓐᓂᐊᕕᓕᐊᑐᐃᓐᓇᖏᑦᑐᓄᑦ. ᐊᖏᕐᕋᕆᔭᐅᓇᔭᖅᑐᑦ ᑕᐃᑲᓃᓐᓂᕐᒥᓂ? ᖃᓗᐃᑦᑐᓂᒃ ᓇᖕᒥᓂᑦ ᐃᓅᓯᕐᓂ ᐱᐅᒃᓴᖅᐱᑦ ᓇᔪᒐᖃᕆᐊᒃᓴᖅ ᐊᐅᓪᓚᖅᓯᒪᓕᕌᖓᕕᑦ? ᑰᒃᔪᐊᕌᓗᖕᒥ ᐃᓗᐊᖅᓴᐃᔩᑦ ᐊᔪᖅᑕᒥᓂᒃ ᑰᒃᔪᐊᕌᓗᖕᒥᒃ ᕗᐃᓂᐱᒃᒧᑦ ᐊᐅᓪᓚᖅᑎᑦᑎᖔᖃᑦᑕᕐᓂᐊᖅᐹᑦ? ᑲᒪᒋᔪᓐᓇᖏᑕᒥᓄᑦ. ᑕᐃᒪᐃᓐᓂᐊᖅᐸᑕ ᐊᐱᖅᓱᕐᓇᕐᒥᖕᒪᑦ ᓱᖕᒪᑦ ᓯᕗᓪᓕᖅᐹᒥ ᑖᕗᖓᖅᑎᑕᐅᓴᐅᑎᒋᓂᖏᓚᖓ? ᖃᖓᓕ ᑕᐃᒪ ᐃᓚᒃᑲ ᑕᑯᔪᓐᓇᕐᓂᐊᕆᕙᒃᑲ?

ᐊᒥᓱᑦ ᐊᐱᖅᓲᑕᐅᖃᑦᑕᖅᑐᑦ ᑭᐅᔭᐅᒋᐊᖃᕐᓂᐊᕐᒥᖕᒪᑕ ᑭᓂᐅᑉ ᐊᐱᖅᑯᑎᒋᔭᖏᑦ: ᑰᒃᔪᐊᕌᓗᒃ ᓄᓇᓕᖓ ᐱᔭᒃᓴᖃᖅᑎᑕᐅᒋᐊᖃᕐᒥᖕᒪᑦ ᐊᓯᐅᑐᐃᓐᓇᖏᓪᓗᓂ. ᑐᓚᒃᑕᕐᕕᖓ ᐅᒥᐊᕐᔪᐊᓄᑦ ᓄᓇᒃᑯᔫᕐᔪᐊᓄᓪᓗ ᐊᑐᖅᑕᐅᖃᖅᑕᕈᓐᓃᕐᒪᑦ ᓄᓇᒃᑰᔫᕐᔪᐊᑉ ᐊᖅᑯᑎᖓ ᑲᒪᒋᔭᐅᔪᓐᓃᖅᑎᓪᓗᒍ ᖃᓪᓗᓈᓄᖓᐅᔪᖅ, ᑰᒃᔪᐊᕌᓗᖕᒥᐅᑦ ᒫᓐᓇ ᓱᓕᔪᒥᒃ ᑮᓇᐅᔭᒃᓴᐅᑎᒃᓴᒥᓂᒃ ᕿᓂᕐᒪᑕ ᐃᓗᐊᖅᓯᕚᓪᓕᐅᑕᐅᔪᓐᓇᖅᑐᓂᒃ ᒫᓐᓇ ᓄᓇᓕᖓᓂ ᓴᓇᖅᑯᑎᓄᑦ ᐱᕚᓪᓕᐅᑕᐅᔪᓐᓇᖅᑐᓂᒃ ᑕᒪᓐᓇ ᐃᓗᐊᖅᓂᖅᐹᖑᔫᔮᖅᑐᖅ.

ᑭᓯᐊᓂᓕ ᐅᖃᓕᒫᖅᑎᕗᑦ ᓄᓇᕗᒥᐅᑦ ᑕᑯᔪᒪᓇᔭᕐᒪᑕ ᓄᓇᕗᒥ ᑮᓇᐅᔭᑦ ᐊᑐᖅᑕᐅᖔᖅᐸᑕ. ᓱᓕᔪᖅᑕᐅᖅ ᑖᓐᓇ.

ᐊᒥᓱᐊᓗᖕᓂᒃ ᒥᓕᐊᖏᓐᓃᑦᑐᓂᒃ ᑮᓇᐅᔭᓂᒃ ᐊᑐᕐᓂᐊᖅᐸᑕ, ᐃᒻᒪᖄ ᐱᐅᓂᖅᓴᐅᓇᔭᖅᐳᖅ ᓴᓇᖅᑯᑏᑦ ᓄᑖᖑᕆᐊᖅᑎᑕᐅᒃᐸᑕ ᑲᖏᖅᖠᓂᕐᒦᑦᑐᑦ ᐊᒻᒪᓗ ᑲᖏᖅᖠᓂᖅ ᐃᓗᐊᖅᓴᐃᔨᓄᑦ ᐊᖏᕐᕋᕆᔭᐅᓕᕐᓗᓂ. (ᐊᑕᐅᓯᖅ ᐅᖃᓕᒫᖅᑎ ᐅᖃᐅᓯᖃᓚᐅᕐᒥᔪᖅ ᑐᔪᕐᒥᕕᑭᒃᓴᖃᑦᑕᕐᒪᑕ ᓄᓇᓕᖓᓂ, ᑕᒪᓐᓇ ᐊᐅᓪᓚᖅᓯᒪᓂᖏᓐᓂ ᐃᒡᓗᒃᓴᖓ ᐅᖃᐅᓯᐅᒋᐊᖃᕋᔭᕐᒥᔪᖅ, ᖃᓄᖅᑑᕈᑎᖃᖅᑐᓄᑦ.)

ᑕᐃᒫᓴᐃᓐᓇᖅᑕᐅᖅ ᐊᒃᓱᕈᑕᐅᓚᐅᕐᒥᖕᒪᑕ ᐃᒥᐊᓗᓗᐊᓕᔭᑦᑐᓄᑦ ᐃᓗᐊᖅᓴᐃᕕᖕᒥᒃ ᐸᓂᖅᓰᕕᒃᑖᕆᐊᖃᕐᓂᖏᑦ ᐊᒻᒪᓗ ᑎᒍᔭᐅᓯᒪᔪᓄᑦ ᐃᒡᓗᖃᕆᐊᖃᖅᖢᑎᒃ. ᓄᓇᖃᖅᑳᖅᑐᓄᑦ ᐊᓯᐅᔨᔭᐅᓯᒪᔪᓂᒃ ᐅᑎᖅᑎᑦᑎᓂᐊᖅᐸᑕ ᓄᓇᕗᒥᐅᓄᑦ ᓄᓇᕗᒥ ᑕᒪᒃᑯᓂᖓ ᐃᓄᓕᕆᔪᑎᓂᒃ ᐱᑕᖃᕆᐊᖃᓕᕐᒪᑦ, ᐃᓗᐊᖅᓴᐅᑎᓂᒃ, ᑎᒍᔭᐅᓯᒪᔪᑎᓂᒃ, ᐊᔪᓕᖅᓯᒪᔪᓂᒃ ᐃᑲᔪᖅᑕᐅᕕᖕᓂᒃ, ᐃᓗᐊᖅᓴᐃᔩᓪᓗ ᑕᐃᒪᖓᓂᑦ ᓄᓇᓕᖕᓂ ᐱᑕᖃᕆᐊᖃᖅᓗᑎᒃ, ᓄᓇᕗᒥ ᑕᒫᓂ.

ᑕᒪᑐᒪᓂ ᓇᓕᐊᒃ ᐊᑭᑐᓂᖅᓴᐅᓇᔭᕐᒪᖔᑦ ᑲᑎᒪᔨᓄᑦ ᐋᔩᖃᑎᒌᒍᑕᐅᓕᖅᐸᑕ ᐊᑐᕐᓂᖃᕐᓂᐊᕐᒥᖕᒪᑕ ᒫᓐᓇ ᓈᓴᐅᑎᖏᑦ ᐱᓯᒪᖏᓱᒋᑦ ᖃᓄᖅ ᐃᓱᒪᒃᓴᖅᓯᐅᕈᑎᒋᒋᐊᒃᓴᖅ ᐊᔪᕐᓇᕐᒪᑦ. ᒪᓕᒐᓕᐅᖅᑎᕗᑦ ᒐᕙᒪᑎᒃᑯᑦ ᐃᖅᑲᓇᐃᔭᖅᑎᖏᓐᓂᒃ ᑎᓕᐅᕆᔪᓐᓇᖅᑐᒃᓴᐅᕗᑦ ᓈᓴᐅᑎᓂᒃ ᐆᒃᑐᕋᐅᑎᓂᒃ ᐋᕿᒃᓱᐃᖁᓗᒋᑦ ᓇᓕᐊᒃ ᐊᑭᑭᓐᓂᖅᓴᐅᓇᔭᕐᒪᖔᑦ ᑕᑯᑎᑦᑎᔪᑕᐅᔪᓐᓇᖅᑐᓂᒃ.

ᑰᒃᔪᐊᕌᓗᒃ ᐱᒃᑯᒥᓇᕐᓂᖅᓴᐅᒃᐸᑦ ᕗᐃᓂᐱᒃᒥᑦ, ᐊᑏ ᑕᐃᒪᓐᓇ ᐱᓇᓱᐊᓕᖅᑕ. ᑭᓯᐊᓂᓕ ᐊᔪᕐᓇᖏᒻᒥᖕᒪᑦ ᑲᖏᖅᖠᓂᖅ ᑐᓚᒃᑕᕐᕕᐅᓕᕈᓐᓇᕐᒥᖕᒪᑦ ᑕᒪᒃᑯᓄᖓ.

ᐃᓗᐊᖅᓴᐃᔪᑏᑦ ᓄᓇᓕᖕᒥᐅᓄᑦ ᐊᑐᖅᑕᐅᒐᔪᒃᑐᑦ ᐃᓱᒪᒋᔭᐅᒋᐊᖃᕐᒥᔪᑦ ᓇᒥ ᑲᒪᒋᔭᐅᕕᖃᕐᓂᐊᕐᒪᖔᑕ – ᓇᒥᓗ ᑮᓇᐅᔭᑎᒍᑦ ᐊᔪᕐᓇᖏᒻᒪᖔᑦ ᐃᓗᐊᖅᓴᐅᑎᓂᒃ ᐱᑕᖃᓕᖅᐸᑕ ᐊᐅᓪᓚᖃᑦᑕᕆᐊᖃᖅᑎᓪᓗᒋᑦ ᐃᓅᓕᓴᖅᑕᐅᒋᐊᖅᑐᖅᖢᑎᒃ ᑭᕙᓪᓕᕐᒥᐅᑦ – ᑕᒪᑐᒪᓂ ᐃᓱᒪᓕᐅᕈᑎᒋᒋᐊᖃᓕᖅᑕᕗᑦ ᓇᓕᐊᖕᓂᒃ ᐃᓗᐊᖅᓴᕐᓂᖅᓴᐅᓂᐊᕐᒪᖔᑕ.

 

 

Leave a Comment: