ᔮᓇᑕᓐ ᕼᐃᕿᓂᖅ ᐆᒪᓯᒪᕗᖅ ᑕᑯᓂᕐᒧᑦ 100-ᓂ ᐊᕐᕌᒍᓄᑦ, ᐊᒻᒪ ᐃᒻᒥᓂᒃ ᐅᒃᐱᒋᙱᓚᐅᒃ, ᓄᑲᖅᖠᖅᐹᖁᑖ ᐸᓂᖓ ᐅᖃᓚᐅᖅᐳᖅ.
"ᐅᕙᑦᑎᓐᓄᑦ ᐅᖃᖅᐸᓚᐅᖅᐳᖅ ᑎᑭᐅᑎᓚᐅᖅᓯᒪᔾᔮᙱᓐᓂᖓᓂ ᐊᕐᕌᒍᓄᑦ 100-ᓄᑦ," ᐅᖃᓚᐅᖅᐳᖅ ᓲᓯ ᕼᐃᕿᓂᖅ. "ᑲᒪᕐᔪᐊᖅᑐᖅ ᓱᓕ ᐃᓅᓂᖓᓂ."
ᔮᓇᑕᓐ ᖃᓂᒋᔭᖓᓐᓂ 80-ᓂ ᐃᕐᙳᑕᖃᖅᐳᖅ, ᓲᓯ ᓇᓚᐅᑦᑖᕆᕗᖅ. ᐃᓗᓕᖃᖅᖢᓂᓗ ᐊᒻᒪᓘᓐᓃᑦ ᐊᔭᐅᑉᐱᐊᖃᖅᖢᓂ.
ᐃᒻᒥᓂᒃ ᐊᒻᒪ ᓄᓕᐊᖓ ᒫᑕᒪ ᐃᓅᔪᓐᓃᓚᐅᖅᑐᒥ ᐊᕐᕌᒍᑦ ᒪᕐᕉᖕᓂ ᐊᓂᒍᖅᓯᒪᓕᖅᑐᓂ, 13-ᓂ ᕿᑐᕐᙵᖃᓚᐅᖅᐳᑦ ᓇᖕᒥᓂᖏᓐᓂ. 7 ᓱᓕ ᐆᒪᕗᑦ.
ᔮᓇᑕᓐ ᐱᕈᖅᓴᓯᒪᕗᖅ ᓄᓇᒥᑦ ᐊᒻᒪ ᐅᖅᓱᖅᑑᕐᒧᐊᓚᐅᖅᐳᖅ "ᓂᐅᕕᕐᕕᕋᓛᖃᑐᐃᓐᓇᖅᑎᓪᓗᒍ ᐊᒻᒪ ᖃᔅᓯᐊᕐᔪᖕᓂ ᐃᒡᓗᖃᖅᖢᓂ," ᐅᖃᓚᐅᖅᐳᖅ ᐳᓃᔅ ᑕᕙᓗᒃ, ᔮᓇᑕᓐ ᐃᑉᙳᑕᖓ.
ᓲᓯ ᐃᖅᑲᐅᒪᕗᖅ ᓂᕕᐊᖅᓵᖑᑎᓪᓗᒍ ᐊᒻᒪ ᑕᐅᑐᒃᐸᒃᖢᓂᐅᒃ ᐃᖅᑲᓇᐃᔭᕆᐊᖅᐸᒃᑎᓪᓗᒍ ᐃᒪᕐᒧᑦ, ᑯᕕᖅᑕᐅᒻᒧᑦ ᐊᒻᒪ ᐊᒃᑕᐅᑎᒧᑦ ᓄᓇᓯᐅᑎᓄᑦ ᐊᖁᑎᐅᓪᓗᓂ ᐱᕈᖅᐸᓪᓕᐊᔪᒧᑦ ᕼᐋᒻᓚᐅᔪᒧᑦ ᐊᒻᒪ ᐊᖏᕐᕋᖅᐸᒃᖢᓂ ᐃᖅᑲᓇᐃᔮᓂᒃᑳᖓᒥ, ᐱᓇᓱᐊᕈᓯᐅᑉ ᓄᙳᐊᓂ ᐃᓚᒌᖑᔪᓂ ᓄᓇᓕᐊᕈᑎᒐᔪᓚᐅᖅᐸᖏᑦ, ᐃᖅᑲᐅᒪᕗᖅ.
ᐃᓛᓐᓂᒃᑯᑦ, ᐱᓇᓱᐊᕈᓯᖅ ᓄᙳᐊ ᐃᓱᓕᑉᐸᓪᓕᐊᓕᕌᖓᑦ, ᕿᒪᒃᐸᓚᐅᖅᐸᖏᑦ ᐃᓚᒌᑦ ᑕᖕᒫᕐᕕᖓᓂ ᐊᒻᒪ ᓄᓇᓕᖕᓄᑦ ᐅᑎᖅᐸᒃᖢᓂ ᐃᓄᑑᓪᓗᓂ ᐱᓕᕆᔭᖅᑐᖅᖢᓂ ᐃᖅᑲᓇᐃᔮᒥᓄᑦ. ᐊᓱᐃᓛᒃ ᐅᑎᖅᐸᒃᖢᓂ ᐅᐸᒃᖢᓂᖏᑦ ᓄᓕᐊᓂ ᐊᒻᒪ ᓱᕈᓯᖏᓐᓂ.
ᖁᕕᐊᒋᔭᖃᓚᐅᖅᐳᖅ ᐅᓂᒃᑳᖅᑐᐊᕐᓂᕐᒥ, ᓲᓯ ᐅᖃᓚᐅᖅᐳᖅ.
"ᐊᑕᐅᓯᐊᖅᑐᒥ ᐅᖃᐅᔾᔨᓚᐅᖅᐳᖅ ᐅᕙᑦᑎᓐᓄᑦ ᐱᕈᖅᓴᑎᓪᓗᑎᑦ, ᓈᓚᐃᓐᓇᐅᔭᕆᐊᖃᖅᐳᓯ ᐊᖓᔪᖅᑳᕆᔭᕐᓄᑦ ᐊᒻᒪ ᐊᑖᑕᑦᑎᐊᒃᑯᓯᖕᓄᑦ ᐊᓈᓇᑦᑎᐊᒃᑯᓯᖕᓄᑦ, ᖃᓄᐃᓕᓂᖏᓐᓄᑦ. ᑕᐃᒫᒃ ᐃᓅᓯᑯᑖᖃᕐᓂᐊᖅᐳᓯ," ᐅᖃᓚᐅᖅᐳᖅ.
ᐃᖅᑲᐅᒪᒋᕗᖅ ᐃᓕᓐᓂᐊᖅᑎᑦᑎᑎᓪᓗᒍ ᕿᒻᒥᖃᕐᓂᕐᒧᑦ ᕿᒧᒃᓯᖃᓚᐅᕐᒪᑦ ᑲᒪᒋᔭᕆᐊᖃᖅᑕᒥᓂᑦ.
"ᐃᓕᑦᑎᕐᔪᐊᖅᓯᒪᕗᖓ ᐊᑖᑕᓐᓂ ᐱᕈᖅᓴᑎᓪᓗᖓ," ᐅᖃᓚᐅᖅᐳᖅ.
ᐳᓃᔅ ᐃᖅᑲᐅᒪᕗᖅ ᔮᓇᑕᓐ ᐅᖃᐅᔾᔪᖅᑕᖓᓂ ᖃᓄᖅ ᐅᑭᐅᒃᑯᑦ ᐃᖏᕐᕋᓂᕐᒥ ᕿᒧᒡᔪᑎᒍᑦ, ᖃᓄᖅ ᐅᖅᑯᐊᓕᐅᕐᓂᕐᒧᑦ ᐊᐳᓯᐅᒻᒥ ᓴᕕᖕᒧᑦ ᐊᒻᒪ ᓇᒥ ᓇᐅᑦᑎᖅᓱᕆᐊᖃᕐᓂᕐᒥ ᓴᙱᔪᓄᑦ ᐃᖏᕐᕋᓂᐅᔪᓄᑦ.
ᔮᓇᑕᓐ ᐋᖕᓕᑲᓄᑦ ᐊᔪᕆᖅᓱᐃᔨᐅᓚᐅᖅᓯᒪᒋᕗᖅ ᐅᖅᓱᖅᑑᒥ ᐊᒥᓱᓄᑦ ᐊᕐᕌᒍᓄᑦ, ᑭᓯᐊᓂ ᑕᐅᑐᑦᑎᐊᕈᓐᓃᕐᔪᐊᕐᒪᑦ ᐊᒻᒪ ᐅᖃᓕᒫᕈᓐᓇᐃᓪᓕᒐᒥ, ᐅᖃᓚᐅᖅᐳᖅ ᓲᓯ
ᐅᓪᓗᒥ, ᐃᒡᓗᖃᖅᐳᖅ ᑎᓴᒪᓂᒃ-ᐃᒡᓗᕈᓯᓕᖕᓂ ᐃᒡᓗᒥᑦ ᐊᕙᓗᔭᐅᓯᒪᓪᓗᓂ ᐃᓚᖏᓐᓄᑦ, ᐊᓯᖏᓪᓗ ᐃᓚᒋᔭᖏᑦ ᐅᐸᒃᐸᒃᖢᑎᒃ ᐊᓂᕙᒃᖢᑎᒡᓗ ᐅᓪᓗᓕᒫᒥᒃ.
"ᐅᕙᑦᑎᓐᓄᑦ ᐅᖃᓲᖑᕗᖅ ᖁᙱᐊᕈᒪᓂᖓᓂ ᐃᕐᙳᑕᒥᓂᑦ ᐊᒻᒪ ᐸᓂᖏᓐᓂ ᐊᒻᒪ ᐃᕐᓂᖏᓐᓂ. ᐅᖃᓚᐅᖅᐳᖅ ᐱᐅᓂᖅᓴᐅᕗᖅ ᐊᖏᕐᕋᖏᓃᓪᓗᑎᒃ," ᓲᓯ ᐅᖃᓚᐅᖅᐳᖅ. "ᐃᑲᔪᖅᓯᖅᑕᐅᑦᑎᐊᖃᑦᑕᖅᐳᖅ...ᖁᕕᐊᓱᒃᐳᖅ ᐃᓚᒥᓂᒃ ᖁᙱᐊᖅᖢᓂ."
ᐳᓃᔅ ᐅᖃᖅᐳᖅ, "ᓴᙱᔫᓪᓗᓂ ᐊᖑᑕᐅᕗᖅ. ᓱᓕ ᐱᓕᕆᓇᓱᐊᓲᖑᕗᖅ ᐃᒻᒥᓂᒃ ᐅᓪᓗᒥ."
ᐃᒻᒥᓂᒃ ᓱᓕ ᐱᓱᓲᖑᕗᖅ ᐊᒻᒪ ᐅᖃᓪᓚᖃᑎᖃᓲᖑᓪᓗᓂ ᐃᓄᒃᑎᑐᑦ, ᐃᓚᒋᐊᖅᓯᓚᐅᖅᐳᖅ.
ᒪᕐᕉᖕᓂ ᖁᕕᐊᓱᒍᑎᖃᓚᐅᖅᐳᑦ ᕼᐃᕿᓂᕐᒥ ᐅᐱᒋᔭᐅᓪᓗᓂ ᒫᓐᓇᓕᓴᐅᔪᒥ. ᐃᓚᒌᑦ ᑲᑎᖃᑎᒌᓚᐅᖅᐳᑦ ᐊᖏᕐᕋᖓᓂ ᔪᓚᐃ 27-ᒥ ᓇᓪᓕᐅᓐᓂᖅᓯᐅᕐᓂᖓᓄᑦ. ᓂᕆᕕᒡᔪᐊᕐᓂᖃᓚᐅᖅᐳᑦ ᐊᒻᒪ ᐱᙳᐊᕈᓘᔭᖅᖢᑎᒃ. ᐊᒥᓱᐊᓗᖕᓂ ᖁᕕᐊᓲᓯᐊᓚᐅᖅᐳᖅ.
"ᖃᐅᔨᒪᒐᑦᑕ ᐊᖑᓇᓱᒋᐊᖅᐸᒍᓐᓃᕐᓂᖓᓂ ᑕᐃᒫᒃ ᑐᓂᓚᐅᖅᐸᕗᑦ ᐃᕐᙳᓯᓂᒃ, ᐃᒪᖃᐅᑎᓂᒃ, ᑏᓕᐅᕈᒻᒥ, ᐊᓕᖅᓯᓂᑦ, ᖃᓕᐹᓂᑦ, ᑲᒥᓪᓛᕈᑎᓂᑦ," ᓲᓯ ᐅᖃᓚᐅᖅᐳᖅ. "ᐊᓕᐊᓇᐃᒍᓱᒃᑐᐃᓐᓇᐅᓚᐅᖅᐳᑦ. ᖁᕕᐊᓇᓚᐅᖅᐳᖅ ᑕᑯᓂᕐᒥ ᐊᒥᓱᓂ ᐃᓄᖕᓂ."
ᐊᓱᐃᓛᒃ ᔪᓚᐃ 29-ᒥ, ᖃᓄᐃᓐᓂᐅᔪᒥᒃ ᐱᓕᕆᓂᖃᓚᐅᖅᐳᑦ ᐱᙳᐊᕐᕕᖕᒥ ᐃᓚᖃᓚᐅᖅᑐᒥ ᕿᓚᐅᔾᔭᕐᓂᐅᔪᒥ ᐱᖅᑯᓯᑐᖃᖅᑎᒍᑦ. ᖃᓂᒋᔭᖓᓂ 60-ᓂ ᐃᓄᖕᓂ ᐅᐸᒃᑐᖃᓚᐅᖅᐳᖅ, ᐅᖃᓚᐅᖅᐳᖅ ᐳᓃᔅ.
"ᐊᓕᐊᓇᐃᒋᑦᑎᐊᓚᐅᖅᐸᖓ," ᓲᓯ ᐅᖃᓚᐅᖅᐳᖅ.