ᑲᖏᖏᖅᖠᓂᕐᒥ Rankin Rock Peewee A-ᑯᑦ ᓵᓚᖃᓚᐅᖅᑐᑦ ᔭᓗᓇᐃᒥᐅᓂᒃ, ᓄᓇᑦᑎᐊᕐᒥᐅᓂᒃ, 4-2 ᑭᖑᓪᓕᖅᐹᖅᓯᐅᖅᖢᑎᒃ ᓵᓚᒃᓴᖅᖢᑎᒃ ᐅᐱᕐᖔᒃᑯᑦ ᖁᕕᐊᓲᑎᖃᖅᖢᑎᒃ Hᐊᑭᕕᒡᔪᐊᖅᑐᓂᒃ ᐃᐊᑦᒪᓐᑕᒥ ᒫᑦᓯ 25-ᒥ 31-ᒧᑦ.
ᑲᖏᖅᖠᓂᕐᒥᐅᑦ Peewee-ᑯᑦ Hᐊᑭᖅᑎᖏᑦ ᐱᙳᐊᖃᑕᐅᓚᐅᕐᒥᔪᑦ ᖁᕕᐊᒋᔭᐅᑦᑎᐊᖅᖢᓂ ᑕᒪᓐᓇ ᐱᙳᐊᖅᑎᓄᑦ, ᒥᐊᓂᖅᓯᔨᓄᑦ ᐅᕝᕙᓘᓐᓃᑦ ᐊᖓᔪᖅᑳᕆᔭᐅᔪᓄᑦ ᑕᒪᓐᓇ ᐳᐃᒍᖅᑕᐅᑲᐅᑎᒋᔾᔮᙱᑦᑐᖅ.
ᐅᐱᕐᖔᒃᑯᑦ ᖁᕕᐊᓲᑎᖃᕐᓂᕐᒧᑦ Hᐊᑭᕐᓂᐅᔪᖅ ᐅᐸᒃᑕᐅᓂᖃᓚᐅᖅᑐᖅ ᐊᕙᑎᓄᑦ Hᐊᑭᖃᑎᒌᒃᐸᒃᑐᓄᑦ Novice-ᑯᑦ, Atoms-ᑯᑦ, ᐊᒻᒪᓗ Peewee-ᑯᑦ.
ᑲᖏᖅᖠᓂᕐᒥᐅᑦ Hᐊᑭᖅᑎᖏᑦᑕ A-ᑯᑦ ᒥᐊᓂᖅᓯᔨᖓ ᑕᐃᕝ ᐅᐊᐃᔅᒪᓐ ᐅᖃᓚᐅᖅᑐᖅ ᐱᙳᐊᖅᑎᑯᓗᐃᒡᒎᖅ ᐱᙳᐊᕐᓂᕆᓚᐅᖅᑕᖏᑦ ᑕᑯᑎᑦᑎᓯᒪᓚᐅᖅᑐᑦ ᖃᓄᖅ ᑲᖏᖅᖠᓂᕐᒥ Hᐊᑭᖃᑦᑕᖅᑐᑦ ᐱᕚᓪᓕᖅᑎᒋᓯᒪᓕᕐᒪᖔᑕ ᐅᑭᐅᓂᒃ ᖄᖏᖅᓯᒪᓕᖅᑐᓂᒃ.
ᐅᖃᖅᖢᓂ Hᐊᑭᖅᑎᑯᓗᐃᒡᒎᖅ A-ᒦᑦᑐᑦ ᓵᓚᖃᓚᐅᖅᑎᓪᓗᒋᑦ 4-1-ᑯᑦ Peewee AA-ᒥ Hᐊᑭᕕᒡᔪᐊᕐᓂᖃᖅᑎᓪᓗᒋᑦ ᐱᔭᕆᐊᑐᔫᖕᒪᑦ.
“ᐊᑕᐅᓰᖅᖢᑕ ᓵᓚᒋᔭᐅᓚᐅᖅᑎᓪᓗᑕ ᑕᐃᑉᑯᐊ ᐊᑭᕋᕆᔭᖅᐳᑦ ᐱᓕᕆᓂᖅᓴᐅᓚᐅᖅᑐᑦ ᓇᓗᓇᙱᑦᑐᖅ ᑕᐃᒪᐃᑦᑐᓂᒃ ᑕᑯᒐᔪᖕᓇᙱᑦᑐᖅ," ᑕᐃᒪᓐᓇ ᐅᖃᖅᖢᓂ ᐅᐊᐃᔅᒪᓐ.
“ᐱᙳᐊᖅᑎᕗᑦ ᐱᙳᐊᖃᑎᒥᓂᒃ ᐱᑦᑎᐊᖅᑐᒻᒪᕆᐊᓘᖃᑦᑕᓚᐅᖅᑐᑦ ᐊᑭᒋᐊᖅᑐᐊᓘᖃᑦᑕᓚᐅᙱᑦᑐᑦ ᖃᓄᐃᓕᐅᖅᑕᐅᒐᓗᐊᕌᖓᒥᒃ, ᑭᓯᐊᓂ ᑎᒍᔭᐅᒐᔪᓚᐅᖅᑐᒍᑦ ᐱᙳᐊᖅᑎᓪᓗᑕ ᐊᒻᒪᓗ ᐊᒥᒐᖅᓯᒐᔪᒃᖢᑕ.
“ᐊᓕᐊᓇᐃᙱᑦᑐᒻᒪᕆᐊᓘᓚᐅᖅᑐᖅ ᐃᓅᓂᖅᐳᑦ ᑲᑕᒃᑎᖅᑕᐅᓕᕐᒪᑦ ᐱᙳᐊᖅᑎᓪᓗᒋᑦ Hᐊᑭᖅᑎᑯᓗᒃᐳᑦ, ᑭᓯᐊᓂ ᑕᒪᓐᓇ ᐃᓱᒪᒋᔭᐅᔪᑑᖁᙱᑕᕋ ᐱᐊᓂᒃᓯᑦᑎᐊᓚᐅᕐᓂᕗᑦ ᐃᓱᒪᒋᔭᐅᖔᖁᔭᕋ.
“ᑕᒪᓐᓇ ᖃᑯᒍᒃᑲᓐᓂᕐᒧᑦ ᐅᖃᖃᑎᒌᒍᑕᐅᔪᓐᓇᕐᒪᑦ."
ᐅᐊᐃᔅᒪᓐ ᐅᖃᖅᖢᓂ, ᐱᖃᑖᒍᓪᓕᒎᖅ, ᑕᒪᓐᓇ ᐱᙳᐊᕆᐊᖅᑐᓚᐅᕐᓂᖅ ᐱᕚᓪᓕᕈᑕᐅᓪᓚᕆᒃᓯᒪᓂᐊᖅᑐᖅ ᐱᙳᐊᕆᐊᖅᑐᖅᑐᑯᓘᓚᐅᖅᑐᓄᑦ ᑕᐃᑉᑯᐊᓗ B-ᒦᑦᑐᑦ ᐃᓅᖃᑎᖃᑦᑎᐊᓕᓚᐅᖅᖢᑎᒃ Valleyview Icebears-ᑯᓐᓂᒃ.
ᐅᖃᖅᖢᓂ ᑕᒪᐃᓐᓂᒎᖅ ᐱᙳᐊᖅᑏᑦ ᐃᓚᓐᓈᕇᑦᑎᐊᖏᓐᓇᓚᐅᖅᑐᑦ, ᓇᔭᒌᒃᑎᑐᑦ ᓄᑲᕇᒃᑎᑐᑦ ᐊᓂᒌᒃᑎᑐᑦ ᐱᙳᐊᖅᑎᓪᓗᒋᑦ, ᐊᒻᒪᓗ ᓇᓗᓇᙱᑦᑐᕉᖅ ᑕᐅᕗᙵᓗᒃᑖᖅ ᐃᓚᓐᓈᕇᖏᓐᓇᕐᓂᐊᓕᕐᒪᑕ.
“ᑕᐅᑐᒋᐊᖅᑐᕈᓐᓇᓚᐅᕐᒥᔪᒍᑦ Edmonton Oilers-ᑯᑦ Hᐊᑭᖅᑎᕐᔪᐊᑦ ᐊᔪᕈᓐᓃᖅᓴᖅᑎᓪᓗᒋᑦ, ᐊᒻᒪᓗ ᑕᒪᕐᒥᒃ ᐱᙳᐊᖅᑎᑯᓗᒃᐳᑦ ᑭᐊᕙᓐ ᓘᒥᒃ ᑕᑯᒋᐅᕈᓐᓇᓚᐅᖅᖢᑎᒃ.
“ᑭᐊᕙᓐ ᓘ ᐊᔾᔨᓕᐅᖅᑕᐅᑲᑕᓚᐅᖅᑐᖅ ᓄᑕᖅᑲᓪᓗ ᐊᒻᒪᓗ ᐊᑎᓕᐅᕆᑲᑕᒃᖢᓂ ᐊᔾᔨᓂᒃ.
“Oiler-ᑯᑦ ᐃᓕᑕᕆᔭᐅᔾᔪᑎᑖᕐᕕᖓᓃᓚᐅᕐᒥᔪᒍᑦ, Hᐊᑭᖅᑎᕐᔪᐊᓪᓗ Hᐊᑭᖅᑎᓪᓗᒋᑦ ᑕᐅᑐᓚᐅᖅᖢᑎᒍᑦ ᐊᒻᒪᓗ ᐅᐃᓐ ᒍᕆᑦᓯᑭᐅᑉ ᓂᕆᕝᕕᖓᓄᑦ ᓂᕆᔭᖅᑐᖅᖢᑕ, Studio 99-ᒧᑦ."