ᑕᒪᕐᒥᒃ ᐊᕐᓇᐃᑦ ᐊᑐᓲᖑᕗᑦ ᐃᓅᓯᕐᒥ ᐊᔾᔨᐅᙱᑦᑐᒥ ᑕᑯᓐᓇᕐᓂᐅᔪᒥ. ᐊᔾᔨᒌᙱᓐᓂᐅᔪᓂ, ᐃᓱᒪᒃᑯᑦ, ᐃᓕᖅᑯᓯᒃᑯᑦ ᐊᒻᒪ ᐃᓅᖃᑎᒌᖕᓂᒃᑯᑦ ᐱᔾᔪᑕᐅᔪᓂ ᑎᓕᐅᕆᔪᓐᓇᖅᐳᖅ ᐃᓱᒪᒋᔭᖏᓐᓂ ᐊᒻᒪ ᐃᓕᖅᑯᓯᖃᕐᕕᒋᔭᖏᓐᓂ. ᖃᓄᐃᑉᐸ ᐃᓅᓪᓗᓂ ᐊᕐᓇᐅᓪᓗᓂ? ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᐃᓴᓚᐅᖅᐳᑦ ᐱᖓᓱᓄᑦ ᐃᓄᖕᓄᑦ ᐊᕐᓇᓄᑦ ᐃᑦᑐᐊᕐᓂᕐᒧᑦ ᓄᓇᕐᔪᐊᖏᓐᓄᑦ.
ᔮᑭ ᐃᕿᓚᓐ
ᔮᑭ ᐃᕿᓚᓐᒧᑦ ᐃᓅᓪᓗᓂ ᐊᕐᓇᐅᓪᓗᓂ ᑐᑭᖃᖅᐳᖅ ᓱᖏᐅᑎᓴᕋᐃᓪᓗᓂ, ᓴᙱᓗᓂ ᐊᒻᒪ "ᑎᔅᓯᓈᖃᓂᖃᕐᔪᐊᕐᓗᓂ." ᐅᒃᐱᕈᓱᒃᐳᖅ ᐃᓕᓯᒪᕐᔪᐊᕐᓂᖓᓂ ᐃᓗᒃᑯᑦ ᐃᓄᖕᓂ ᐊᕐᓇᓄᑦ ᖄᖏᐅᑎᓂᕐᒥ ᐊᒃᓱᕈᕈᑕᐅᔪᓂᑦ ᐊᒻᒪ ᐊᒃᓱᕈᕐᓂᐅᔪᓂ ᐃᓱᒫᓗᓗᐊᕐᓇᓂ.
ᐃᓱᒪᒃᑯᑦ ᑭᓯᐊᓂ, ᐃᕿᓚᓐ ᐅᖃᖅᐳᖅ ᐃᒃᐱᒍᓱᓲᖑᕗᖅ ᐅᖁᒪᐃᓐᓂᖓᓂ ᐱᖅᑯᓯᖃᑎᒌᒃᑐᓄᑦ ᐱᓂᕐᓗᖕᓂᕐᔪᐊᖑᔪᓂ. ᐅᓂᒃᑳᖅᐳᖅ, ᐊᓈᓇᑦᑎᐊᖓ, ᐊᑐᓚᐅᖅᑐᒥ ᐊᒃᓱᕈᕐᓂᐅᔪᓂ, ᒪᒥᓴᕈᓐᓇᓚᐅᙱᑉᐳᖅ ᐱᔾᔪᑎᖃᖅᑐᒥ ᐱᑕᖃᙱᓗᐊᕐᓂᖓᓂ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᕐᓂᐅᔪᒥ.
"ᐅᓇ ᑐᑭᖃᖅᐳᖅ ᓯᕗᓪᓕᖅᐹᖑᓂᓐᓂ ᓵᙵᓂᓐᓂ ᐃᓗᑐᓂᐅᔪᓂ ᐅᕙᓐᓂᑐᐊᖑᙱᑦᑐᖅ ᒪᒥᓴᐃᓂᕐᒥ, ᑭᓯᐊᓂᑦᑕᐅᖅ ᒪᒥᓴᕐᓂᓐᓂ ᐊᓈᓇᓐᓄᑦ ᐊᒻᒪ ᐊᓈᓇᑦᑎᐊᓐᓄᑦ ᐃᓗᓐᓂ ᐊᑐᖅᑎᓪᓗᒍ," ᐅᖃᓚᐅᖅᐳᖅ ᐃᕿᓚᓐ.
"ᐅᖁᒪᐃᕐᔪᐊᖅᖢᓂ ᐃᒃᐱᒍᓱᖕᓂᐅᕗᖅ, ᐃᓱᒪᒃᑯᑦ," ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᕿᑎᖅᐸᓯᐊᓂ-20–ᖏᓐᓃᓕᖅᑎᓪᓗᒍ ᑐᑭᓯᓕᑕᐃᓐᓇᕐᓂᖓᓂ ᐃᓱᒪᖓᓂ ᐋᓐᓂᐊᖃᕐᓇᙱᑦᑐᓕᕆᓂᖓ ᑐᓂᔭᐅᓯᒪᓂᖓᓂ ᓯᕗᕚᖏᓐᓂ.
"ᐊᒥᓱᐊᖅᓱᖅᖢᖓ, ᑕᒪᕐᒥᒐᓚᖕᒥ ᐃᓅᓯᓐᓂ, ᐃᒃᐱᒍᓱᒃᓯᒪᕗᖓ ᐅᖁᒪᐃᓐᓂᖓᓂ ᑭᓯᐊᓂ ᐃᓱᒪᕙᓚᐅᖅᐳᖓ ᐱᑎᑦᑎᓚᐅᕐᓂᓐᓂ ᐊᒻᒪ ᐊᑲᐅᙱᓕᐅᕈᑎᒋᔭᑐᐊᕆᓂᓐᓂ," ᐅᓂᒃᑳᓚᐅᖅᐳᖅ ᐃᕿᓚᓐ.
ᐃᓅᓪᓗᓂ ᐊᕐᓇᐅᓪᓗᓂ, ᐃᒃᐱᒍᓱᓲᖑᕗᖅ ᖃᐅᔨᒪᓂᖃᓪᓗᐊᕐᓂᖓᓂ ᖃᓄᖅ ᓄᓇᒥᑦ ᐊᖑᓇᓱᒍᓐᓇᕐᓂᕐᒧᑦ.
"ᓂᕆᐅᒋᔭᐅᕗᖓ ᖃᐅᔨᒪᓂᕐᒧᑦ ᐊᖑᓇᓱᖕᓂᕐᒥ, ᐸᕐᓇᐃᓂᕐᒧᑦ, ᓂᖅᖠᐅᕐᓂᕐᒧᑦ ᐊᒻᒪ ᒥᖅᓱᕐᓂᕐᒧᑦ," ᐅᖃᓚᐅᖅᐳᖅ 28–ᓂ ᐅᑭᐅᓕᒃ, ᐃᓚᒋᐊᖅᓯᓪᓗᓂ "ᐊᑐᐃᓐᓇᖃᕐᓇᓂ ᐆᒥᖓ ᖃᐅᔨᒪᓂᐅᔪᒥ ᐱᕈᖅᓴᑎᓪᓗᖓ ᐅᕙᓐᓄᑦ ᐃᓕᓯᓯᒪᕗᖅ ᐃᓗᐊᙱᑦᑐᒥ ᐃᓂᐅᔪᒥ ᑕᓗᕈᒃᑯᑎᓂᕐᒥ, ᑲᙳᓱᖕᓂᕐᒥ ᐊᒻᒪ ᐅᒡᒍᐊᕐᓂᕐᒥ."
ᐊᓯᐊᒍᑦ ᐊᒃᓱᕈᕐᓂᐅᔪᒥ ᐊᒡᔭᖅᓯᓂᕐᒧᑦ ᐃᓗᑐᔪᒥ ᐱᖅᑯᓯᑐᖃᖅᑎᒍᑦ ᐊᒻᒪ ᐊᔪᙱᓐᓂᐅᔪᓂ, ᓂᕆᐅᖕᓂᖃᖅᐳᖅ ᐅᖓᕙᑦᑎᐊᕈᓐᓇᕐᓂᕐᒧᑦ ᐃᓗᐊᓂ ᖃᓪᓗᓈᑦ ᓄᓇᖓᓐᓂ, ᐅᖃᓚᐅᖅᐳᖅ, ᐅᖃᐅᓯᖃᖅᖢᓂ ᑮᓇᐅᔭᓄᑦ, ᐃᓕᓐᓂᐊᕐᓂᕐᒧᑦ ᐊᒻᒪ ᐃᖅᑲᓇᐃᔮᖑᔪᒧᑦ ᖃᓄᐃᓕᖓᓂᖓᓂ.
"ᐊᔭᐅᕆᓂᖃᕐᔪᐊᖅᐳᖅ ᐱᐅᓂᖅᐹᖑᓂᕐᒥ ᒪᕐᕉᖕᓂ ᓄᓇᕐᔪᐊᖑᔪᓂ ᐅᓪᓗᒥᒥ ᐊᒻᒪ ᐅᒃᐱᕐᓇᙱᑦᑐᒥ ᖁᑦᑎᕐᔪᐊᖅᑐᒥ ᓂᕆᐅᖕᓂᖃᕐᓂᐅᔪᒥ ᐱᓱᑦᑎᐊᕈᓐᓇᕐᓂᕐᒧᑦ ᑕᒪᒃᑭᓄᑦ."
ᐅᒃᐱᕈᓱᒃᑭᕗᖅ ᐊᔾᔨᒋᙱᑕᖓᓂ ᐊᑐᒐᒃᓴᓂ ᐋᖅᑭᒃᑕᐅᓯᒪᔪᓂ ᐃᓕᓯᒪᔪᒥ ᐊᖑᑎᓄᑦ ᐊᒻᒪ ᐊᕐᓇᓄᑦ ᐃᓂᐃᑦ ᐃᓕᖅᑯᓯᖓᓐᓂ. ᐃᕿᓚᓐ ᑭᐅᓪᓚᕆᖕᓂᖃᓚᐅᖅᐳᖅ ᐊᑲᐅᙱᓕᐅᕈᑕᐅᔪᒥ ᐋᓐᓂᖅᓯᕆᓂᐅᔪᓄᑦ ᐊᕐᓇᓄᑦ.
"ᓲᕐᓗ ᐊᕐᓇᐃᑦ ᐱᓕᕆᐊᖑᓲᖑᕗᑦ ᑕᒪᕐᒥᒃ ᑲᒪᒋᔭᖃᕐᓂᐅᔪᒥ ᒪᒥᓴᐃᓂᕐᒧᑦ ᓄᓇᓕᐅᔪᓂ," ᐅᖃᓚᐅᖅᐳᖅ. ᐃᒃᐱᒍᓱᒃᐳᖅ ᐊᖑᑏᑦ ᖃᓄᐃᓕᐅᕐᓂᖃᕆᐊᖃᖅᐳᑦ ᐃᒻᒥᖕᓂᒃ ᒪᒥᓴᕐᓂᕐᒧᑦ.
ᒥᐊᕆ–ᓖ ᐊᓕᔭᖅ
ᒥᐊᕆ–ᓖ ᐊᓕᔭᖅ ᐃᒃᐱᒍᓱᒃᐳᖅ ᐊᑕᐅᓯᕐᒥ ᐊᑐᕐᓂᖃᐅᑎᖓᓂ ᐃᓅᓪᓗᓂ ᐊᕐᓇᐅᓪᓗᓂ ᐅᑎᖅᑎᕆᓂᕐᒥ ᐃᓄᐃᑦ ᖃᐅᔨᒪᔭᑐᖃᖏᓐᓂ ᐊᒻᒪ ᑲᔪᖏᖅᓴᐃᓗᓂ ᐊᓯᖏᓐᓂ ᑕᐃᒪᐃᓕᐅᕐᓂᕐᒧᑦ.
"ᐊᒥᓱᒻᒪᕆᐊᓗᖕᓂ ᑐᓂᔭᐅᓯᒪᕗᑦ ᑕᐃᔅᓱᒪᓂᐅᔪᒥ, ᖄᖏᖅᓯᒪᓕᖅᑐᓂ ᐊᕐᕌᒍᓄᑦ 40–ᓄᑦ, ᐱᓗᐊᖅᑐᒥ ᓂᕆᐅᒋᔭᐅᓂᐅᔪᓄᑦ ᐃᓅᓪᓗᓂ ᐊᕐᓇᐅᓪᓗᓂ," ᐅᖃᓚᐅᖅᐳᖅ.
ᐅᑎᖅᑎᕆᔪᒪᕗᖅ ᐱᐅᓂᖓᓂ ᐊᒻᒪ ᐊᔾᔨᐅᙱᓐᓂᐅᔪᒥ ᐃᓚᖃᖅᑐᒥ ᐃᓅᓪᓗᓂ ᐊᕐᓇᐅᓪᓗᓂ. ᐊᓕᔭᖅ ᐅᒃᐱᕈᓱᒃᐳᖅ ᐃᓄᐃᑦ ᐊᕐᓇᐃᑦ ᓴᙱᔭᕆᐊᖃᖅᐳᑦ, ᖃᓄᐃᑦᑐᓐᓃᑲᐅᖅᑐᖅᐸᒡᓗᑎᒃ ᐊᒻᒪ ᓱᖏᐅᑎᓴᕋᐃᓪᓗᑎᒃ. ᐊᖏᕐᕋᖃᖅᑎᑦᑎᔪᓐᓇᓪᓗᐊᖅᐳᑦ ᐃᓚᖏᓐᓄᑦ, ᓂᕆᑎᑦᑎᕙᒡᓗᑎᒃ ᐊᒻᒪ ᐊᓐᓄᕌᖅᑐᖅᓯᕙᒡᓗᑎᒃ ᕿᑐᕐᙵᒥᓂᑦ.
ᐊᑐᓲᕆᕙᖓ ᐅᑯᓂᖓ ᐱᓐᓇᕆᔭᐅᓂᐅᔪᓄᑦ ᐱᖓᓱᓄᑦ ᕿᑐᕐᙵᒥᓄᑦ. ᒥᖅᓱᒐᔪᒃᑭᕗᖅ ᐃᓄᐃᑦ ᐊᓐᓄᕌᖏᓐᓂᑦ.
ᐃᓅᓪᓗᓂ ᐊᕐᓇᐅᓪᓗᓂ, ᐃᒃᐱᒍᓱᒃᐳᖅ ᓇᓕᒧᑦᑑᓂᖓᓂ ᐅᐃᖓᓄᑦ ᐊᔾᔨᒌᙱᓐᓂᖃᕋᓗᐊᖅᑎᓪᓗᒋᑦ ᐊᑐᕐᓂᖃᐅᑎᖏᓐᓂᑦ.
ᐃᓗᐊᓂ ᐃᓄᐃᑦ ᐃᓕᖅᑯᓯᖓᓐᓂ ᐃᒃᐱᒋᔭᐅᑦᑎᐊᖅᑑᔮᖅᐳᖅ ᐊᕐᓇᐅᓂᖓᓂ ᐊᒻᒪ ᑲᑎᙵᓂᖃᕐᓂᖓᓂ ᓄᓇᓕᖓᓐᓄᑦ. ᐃᖅᑲᓇᐃᔭᙱᑎᓪᓗᒍ ᐅᓪᓗᓕᒫᖅᓯᐅᑎᒥ ᐃᖅᑲᓇᐃᔮᖓᓂ ᐅᕝᕙᓘᓐᓃᑦ ᐸᖅᑭᓂᖓᓂ ᐃᓚᖏᓐᓄᑦ, ᐃᓚᐅᖃᑕᐅᕐᔪᐊᖅᐳᖅ ᓄᓇᓕᖕᓂ ᖃᓄᐃᓐᓂᐅᔪᓄᑦ.
ᐱᐅᒃᓴᕈᓐᓇᕐᓂᕐᒥ ᐊᒻᒪ ᓈᒻᒪᒍᓱᒍᓐᓇᕐᓂᕐᒥ ᑭᓇᐅᓂᖓᓂ ᐃᓅᓪᓗᓂ ᐊᕐᓇᐅᓪᓗᓂ ᐱᔪᓐᓇᖅᑎᑦᑎᓯᒪᕗᖅ ᐃᒻᒥᓂᒃ ᐅᒃᐱᕈᓱᑦᑎᐊᕈᓐᓇᕐᓂᖓᓂ.
"ᖁᕕᐊᓱᑦᑎᐊᖅᐳᖓ ᐊᒻᒪ ᐅᐱᐅᖅᑲᕗᖓ ᐃᓅᓂᓐᓂ," ᐅᖃᓚᐅᖅᐳᖅ ᐊᓕᔭᖅ.
ᑳᑎ ᑕᐅᑐᙱ
ᐃᓚᒋᔭᐅᔪᖅ ᒪᓕᒐᓕᐅᕐᕕᖕᒥ ᑳᑎ ᑕᐅᑐᙱ, 60, ᐱᕈᖅᓴᓚᐅᖅᐳᖅᐃᓕᑦᑎᓂᕐᒥ ᐱᒻᒪᕆᐅᓂᖓᓂ ᒥᖅᓱᕈᓐᓇᕐᓂᕐᒧᑦ. ᐊᔪᙱᓐᓂᐅᕗᖅ ᐃᒃᐱᒋᓯᒪᔭᖓᓂ ᐋᖅᑭᑦᑎᐊᒃᑲᓐᓂᕈᓐᓇᓚᐅᕐᓂᖓᓂ ᐊᕐᕌᒍᒐᓴᐅᔪᓄᑦ.
"ᐃᒻᒥᓂᒃ ᐅᒃᐱᕈᓱᖕᓂᖃᑦᑎᐊᖅᐳᖓ ᒥᖅᓱᕐᓂᓐᓂ," ᐅᖃᓚᐅᖅᐳᖅ.
ᒥᖅᓱᕈᓐᓇᖅᐳᖅ ᐊᔾᔨᒌᙱᕈᓘᔭᖅᑐᓂ ᐊᓐᓄᕌᓂᒃ (ᔭᐃᑲᐃᑦ, ᓯᓚᐹᑦ, ᐳᐊᓗᐃᑦ) ᑕᒪᒃᑭᓂ ᑐᒃᑑᑉ ᐊᒥᖓᓂ ᐊᒻᒪ ᓇᑦᑎᐅᑉ ᕿᓯᖓᓐᓂ. "ᐱᓇᓱᐊᖅᓯᒪᕗᖓ ᐊᔪᙱᓐᓂᓕᒫᓐᓂ ᐱᓯᒪᐃᓐᓇᕋᓱᐊᕐᓂᕐᒥ (ᒥᖅᓱᕐᓂᕐᒧᑦ) ᐱᖅᑯᓯᑐᖃᐅᔪᒥ," ᐅᖃᓚᐅᖅᐳᖅ.
ᐃᓅᓪᓗᓂ ᐊᕐᓇᐅᓪᓗᓂ, ᐃᓕᓐᓂᐊᖅᑎᑕᐅᓯᒪᒋᕗᖅ ᐸᓂᖅᑎᕆᓂᕐᒥ, ᐱᓚᒃᑐᐃᓂᕐᒥ ᐊᒻᒪ ᑐᖅᑯᐃᓂᕐᒥ ᑐᒃᑑᑉ ᓂᕿᖓᓐᓂ ᐋᖅᑭᑦᑎᐊᖅᓯᒪᓗᑎᒃ ᐅᑭᐅᕐᒧᑦ. ᐊᑐᖅᖢᓂ ᑐᒃᑑᑉ ᓴᐅᓂᖏᓐᓂ ᓴᓇᓂᕐᒧᑦ ᒪᒪᕆᔭᐅᕐᔪᐊᖅᑐᒥ ᓂᕆᔭᐅᕙᒃᑐᓂ (ᐸᖅᑯᑎ) ᐊᔪᙱᓐᓂᒃᑲᓐᓂᐅᓚᐅᖅᐳᖅ ᑐᓂᔭᐅᔪᒥ ᓯᕗᕚᖏᓐᓂ.
ᑕᐅᑐᙱᒧᑦ, ᐃᓅᓪᓗᓂ ᐊᕐᓇᐅᓪᓗᓂ ᑐᑭᖃᖅᐳᖅ "ᓴᓗᒪᔪᒥ ᑕᕐᓂᖃᕐᓂᕐᒧᑦ" (ᑕᕐᓂᖅ). "ᓴᓗᒪᓂᕐᒧᑦ, ᐅᖃᖅᐳᖓ, ᐃᒥᖅᐸᙱᓚᖓ (ᐃᒥᐊᓗᖕᒥ) ᐊᒻᒪ ᐅᖃᐱᓗᓲᖑᙱᓚᖓ," ᐅᓂᒃᑳᓚᐅᖅᐳᖅ. ᓂᕕᐊᖅᓵᖑᑎᓪᓗᒍ, ᐃᓱᒪᓂᐅᔪᒥ ᓴᓗᒪᑦᑎᐊᖅᑐᒥ ᐃᒡᓗᖃᕐᓂᕐᒥ ᐅᕙᓐᓄᑦ ᐃᓕᑎᑕᐅᓚᐅᖅᓯᒪᒋᕗᖅ.
"ᐊᓈᓇᑦᑎᐊᒪ ᐅᖃᐅᑎᕙᓚᐅᖅᐹᖓ, 'ᐊᖏᕐᕋᐃᑦ ᕿᒪᖕᓂᐊᕌᖓᕕᐅᒃ, ᓴᓗᒻᒪᖅᓴᕐᓗᒍ, ᕿᒪᒃᐸᒡᓗᒍ ᓴᓗᒪᓗᓂ. ᐅᑎᕈᕕᑦ ᑕᖃᖓᓗᑎᑦ, ᐊᖏᕐᕋᕐᓂᐊᖅᐳᑎᑦ ᓴᓗᒪᔪᒧᑦ ᐊᖏᕐᕋᒧᑦ", ᐅᖃᓚᐅᖅᐳᖅ ᑕᐅᑐᙱ.
ᐃᓱᒪᒃᑯᑦ, ᑕᐅᑐᙱ ᐃᓗᐊᖅᓴᕐᓂᖃᖅᐳᖅ ᓄᓇᒦᓐᓂᕐᒥ ᐱᔾᔪᑎᖃᖅᑐᒥ "ᑲᑎᙵᓂᖃᑦᑎᐊᕐᓂᖓᓂ" ᓯᓚᒧᑦ.
"ᓄᓇᓕᐊᖅᐸᒃᐳᖓ ᓇᓂᓯᓂᕐᒧᑦ ᐃᓄᑑᓂᐅᔪᒥ," ᐅᖃᓚᐅᖅᐳᖅ. ᓯᓚ ᑐᙵᕕᖃᖅᑎᑦᑎᐊᓲᖑᕗᖅ ᐊᒻᒪ ᐱᔪᓐᓇᖅᑎᑦᑎᓪᓗᓂ ᓇᓂᓯᓂᕐᒥ ᓇᓕᒧᓕᑦᑎᐊᕐᓂᐅᔪᒥ ᐃᓅᓯᖓᓐᓂ.