ᑭᓐᖓᒥᐅᖅ ᓴᓇᐅᒐᖅᑎ ᑕᑯᒃᓴᐅᑎᑦᑎᔪᖅ ᓴᓇᐅᒐᒥᓂᒃ ᑐᕌᓐᑐᒥ

929

ᐃᓄᐃᑦ ᓴᓇᐅᒐᖏᑦ ᓯᕗᓪᓕᖅᐹᒥ ᐅᓄᕐᓂᖅᐹᖑᓪᓗᑎᒃ ᐊᐅᔭᖅ ᑕᑯᒃᓴᐅᑎᑕᐅᓂᐊᕐᒪᑕ ᑐᕌᓐᑐᒥ ᑕᑯᒃᓴᐅᑎᑦᑎᕕᐊᓂ ᐊᓐᑎᐅᕆᐅᒥ (AGO)-ᒥ.

ᕿᓐᓄᐊᔪᐊᖅ ᐋᓯᕙᒃ ᐅᔪᕈᖓᓗ ᑎᒨᑎ ᐱᑦᓯᐅᓛᖅ ᕕᕼᐃᓕᒃᑯᑦ ᓴᓇᐅᒐᑦᑎᐊᕙᓂᒃ ᑕᑯᒃᓴᐅᑎᑦᑎᕕᐊᓂ ᑐᕌᓐᑐᒥ, ᐃᒻᒪᖄ 2011-ᒥ. ᐃᓅᔪᓐᓃᓚᐅᖅᓯᒪᔪᖅ ᑖᓐᓇ ᕿᓐᖓᒥᐅᖅ ᓴᓇᐅᒐᖏᑦ ᑕᑯᒃᓴᐅᑎᑕᐅᓂᐊᕐᒪᑕ ᑖᒃᑯᐊ ᑕᑯᒃᓴᐅᑎᑦᑎᕕᐊᓂ – Sam & Ayala Zacks Pavilion-ᒥ – ᐃᒡᓗᕐᔪᐊᒥ ᓴᓇᐅᒐᓂᒃ ᑕᑯᒃᓴᐅᑎᑦᑎᕕᖕᒥ ᐊᓐᑎᐅᕆᐅᒥ ᐊᐅᔭᖅ.

ᑎᑎᖅᑐᕋᖅᑕᐅᓯᒪᔪᑦ ᑭᓐᖓᒥᐅᒧᑦ ᕿᓐᓄᐊᔪᐊᖅ ᐋᓯᕙᒃᒧᑦ ᐅᔪᕈᖓᓄᓪᓗ ᑎᒨᑎ (ᑎᒻ) ᐱᑦᓯᐅᓛᒧᑦ ᑕᑯᒃᓴᐅᑎᑕᐅᓂᐊᕐᒪᑕ ᐊᐅᔭᓕᒫᖅ ᑕᐃᔭᐅᓗᑎᒃ – “ᑐᓂᕐᕈᓯᐊᖏᑦ” ᐃᓄᒃᑎᑐᑦ – ᔫᓐ 16-ᒥᑦ ᐋᒋᓯ 12-ᒧᑦ ᑎᑭᓪᓗᒍ. ᑭᒃᑯᑐᐃᓐᓇᐃᑦ ᐊᑭᓖᑎᑕᐅᖏᓪᓗᑎᒃ ᐃᓯᕈᓐᓇᕐᓂᐊᖅᑐᑦ ᒪᑐᐃᖅᑕᐅᓕᖅᐸᑦ ᐅᓐᓄᒃᑯᑦ ᐊᓐᓄᕌᑦᑎᐊᖅᓯᒪᓗᑎᒃ ᑭᒃᑯᑐᐃᓐᓇᐃᑦ ᐃᓚᐅᔪᓐᓇᕐᓂᐊᖅᑐᑦ ᔫᓐ 13-ᒥ.

ᐃᓛᒃ ᑕᒪᑐᒪᓂ ᐋᓯᕙᒃ ᐃᓕᑕᕆᔭᐅᖃᑦᑕᖅᓯᒪᓕᕐᒪᑦ ᑲᓇᑕᒥ ᐅᔭᒥᒃᑖᖅᑎᑕᐅᓯᒪᒋᓪᓗᓂ ᓴᓇᓯᑎᐅᓂᖓᓄᑦ ᐃᓅᓪᓗᓂ, ᐊᐅᔭᐅᓂᐊᖅᑐᕐᓗ ᑎᑎᖅᑐᒐᖏᑦ ᑕᑯᒃᓴᐅᑎᑕᐅᓂᐊᕆᓪᓗᑎᒃ – ᐃᒻᒪᖄ ᑲᑎᖢᒋᑦ 110-ᓂᒃ ᑎᑎᖅᑐᒐᖏᓐᓂᒃ ᑕᑯᓯᒪᔭᒥᓂᒃ – ᓄᑖᓂᒃᓗ ᓴᖅᑭᑎᑦᑎᔪᑕᐅᓂᐊᖅᑐᑦ ᐱᔭᕆᑐᔪᓂᒃ ᐅᓂᒃᑳᖅᓯᒪᔪᓂᒃ ᐃᓄᐃᑦ ᐃᓅᓯᖏᓐᓂᒃ ᕿᒥᕈᔪᑕᐅᔪᓐᓇᕐᓗᑎᒃ ᐱᑦᓯᐅᓛᑉ ᓴᓇᐅᒐᖏᓐᓂᒃ, ᐅᓂᒃᑳᖅᓯᒪᓚᐅᖅᑐᖅ ᑕᐃᒪᓐᓇ AGO-ᒃᑯᑦ ᐅᖃᓕᒫᒐᖓᒍᑦ.

“ᑎᒨᑎ ᑎᑎᖅᑐᕋᓲᖑᖕᒪᑦ ᑕᒪᐃᓐᓂᓕᒫᑦᑎᐊᖅ ᑕᑯᒃᓴᐅᑎᑦᑎᓪᓗᓂ ᑕᐃᒪᐃᒻᒪᑦ ᑕᒪᑐᒪᓂ ᐊᖑᓇᓱᒍᓯᕐᓂᒃ, ᖃᓄᖅ ᐊᖑᓇᓱᒃᑏᑦ ᐱᓲᖑᓂᖏᓐᓂᒃ ᓄᓇᒥ ᐆᒪᔪᓐᓂᐊᖅᖢᑎᒃ, ᑕᑯᒃᓴᐅᑎᑕᐅᔪᑦ ᑎᑎᖅᑐᕋᖅᑕᖓ ᐊᐃᕕᓐᓂᐊᖅᑎᓪᓗᒋᑦ. ᐊᒻᒪᓗ, ᐅᓂᒃᑳᖅᓯᒪᓪᓗᓂ ᖃᓄᖅ ᐊᖑᓇᓱᒃᑏᑦ ᐱᓲᖑᓂᖏᓐᓂᒃ, ᖃᓄᕐᓗ ᐅᒥᐊᖏᑦ ᐸᕐᓇᒃᑕᐅᓲᖑᓂᖏᑦ ᑭᓱᓂᒃᓗ ᓇᒃᓴᓲᖑᓂᖏᑦ ᐊᖑᓇᓱᒋᐊᕐᓂᐊᓕᕌᖓᒥᒃ ᑕᑯᒃᓴᐅᔪᑦ – ᑭᓱᓕᒫᑦᑎᐊᖏᑦ ᑎᑎᖅᑐᕋᖅᓯᒪᓪᓗᓂᒋᑦ ᐱᐅᓗᐊᖑᐊᖅᑐᑦ ᐅᕙᓐᓄᑦ,” ᐅᖃᓚᐅᖅᑐᖅ ᑖᓐᓇ ᐃᖃᓗᖕᒥᐅᖅ ᓛᑯᓗᒃ ᕗᐃᓕᐊᒻᓴᓐ ᐸᑐᕆ, ᑕᑯᒃᓴᐅᑎᑕᐅᔪᓂᒃ ᐋᕿᒃᓱᐃᔨᐅᖃᑕᐅᔪᖅ. “ᑎᒨᑎ ᐱᑦᓯᐅᓛᖅ ᖃᐅᔨᒪᔭᐅᑦᑎᐊᓕᓚᐅᕐᒪᑦ ᓴᓇᐅᒐᖅᑎᓂ ᐃᓄᖕᓂ.”

ᑕᑯᒃᓴᐅᑎᑦᑎᔨᐅᖃᑕᐅᔪᖅ ᔪᐊᔩᓇ ᐅᕼᐃᓪᕆᒃ, ᐱᖃᑎᖃᖅᖢᓂ AGO-ᑯᓐᓂᒥᐅᓂᒃ ᓄᓇᖃᖅᑳᖅᑐᓂᒃ ᑲᓇᑕᒥ ᓴᓇᐅᒐᖅᑎᓂᒃ ᑲᒪᔨᓂᒃ, ᐅᓂᒃᑳᓚᐅᕐᒥᔪᖅ ᐱᑦᓯᐅᓛᖅ ᕿᒥᕈᑎᑦᑎᒃᒪᑦ ᑎᑎᖅᑐᕋᕐᒥᒍᑦ ᖃᓄᖅ ᐅᑭᐅᖅᑕᖅᑐᒥᐅᑦ ᐱᖅᑯᓯᖏᑦ ᐊᓯᔾᔨᖅᐸᓪᓕᐊᓂᖏᓐᓂᒃ ᐅᓪᓗᒥᒧᑦ ᑎᑭᖢᒍ ᓴᓇᖅᑯᑎᓂᒃ ᐊᑐᖃᑦᑕᓕᖅᑎᓪᓗᒋᑦ.

ᕗᐃᓕᐊᒻᓴᓐ ᐹᑐᕆ ᐅᓂᒃᑳᕆᓪᓗᓂ ᑕᒪᐃᑕ ᑖᒃᑯᐊ ᓴᓇᐅᒐᖅᑏᒃ ᐱᓇᓱᐊᒐᒥᓂᒃ ᐊᔪᖏᒻᒪᑕ ᑕᑯᒥᓇᖅᑐᓂᒃ ᓴᓇᖃᑦᑕᕐᒪᑕ ᓱᓕᔪᓂᒃ ᐃᓱᒪᑐᐃᓐᓇᐅᔪᓂᒃᓗ ᑕᑯᒃᓴᐅᓕᖅᑎᑦᑎᓪᓗᑎᒃ.

ᕿᓐᓄᐊᔪᐊᖅ ᐋᓯᕙᐅᑉ ᐸᑎᒃᑕᒐᐅᓪᓗᓂ ᓴᓇᓯᒪᔭᖓ ᑕᐃᓪᓗᓂᐅᒃ ᖃᐅᒪᔪᖅ ᐃᖃᓗᒃᐱᒃ 2008-ᒥ.

“ᕿᓐᓄᐊᔪᐊᖅ ᑎᑎᖅᑐᕋᖏᑦ ᓲᖑᓚᐅᕐᒥᖕᒪᑕ ᕿᒥᕈᓗᒋᑦ ᑭᓯᐊᓂᐅᕙᖕᒪᑕ. ᐅᓂᒃᑲᐅᓯᕆᓲᒃᑲ ᖃᓄᖅ ᑕᒪᒃᑯᐊ ᐊᖕᒪᓗᒃᑐᓕᐊᕆᓯᒪᔭᖏᑦ ᓯᓚᑖᒍᑦ ᓴᓇᐅᒐᖏᓐᓂᒃ ᐊᕙᓗᓯᒪᔪᑦ ᑎᖕᒥᐊᖑᐊᓂᒃ ᓱᕐᓗ ᓴᖏᓂᖓᓂᒃ ᐃᓗᐊᓃᑎᑦᑎᔪᑦ ᖃᐅᒻᒪᖏᓐᓂᒃ,” ᐅᖃᕆᓪᓗᓂ. “ᐊᒃᓱᐊᓗᒃ ᑕᑯᓪᓗᒋᑦ ᑎᒥᓐᓄᑦ ᐃᒃᐱᖕᓇᒻᒪᕆᒃᑐᑦ.”

ᐋᓯᕙᒃ ᐃᓅᔪᓐᓃᓚᐅᕐᒪᑦ 2013-ᒥ, ᐱᑦᓯᐅᓛᖅ 2016-ᒥ.

ᐅᓪᔭᕆᒃ ᐅᖃᕆᓪᓗᓂ ᑕᐃᒪᑑᕉᖅ ᑕᑯᒃᓴᐅᑎᑕᐅᔪᓂᒃ ᑕᑯᔭᖅᑐᖅᓯᒪᔪᑦ ᐱᒃᑯᒥᒋᔭᒥᓂᒃ ᑕᑯᓗᑎᒃ ᐃᔾᔪᐊᖅᓯᓂᐊᖅᐳᑦ ᓴᓇᓕᕈᑎᒃ ᑕᑯᒃᓴᐅᓂᖏᑦ ᐊᔾᔨᐅᖏᒻᒪᑕ.

“ᑐᑭᓯᓇᓱᐊᕐᓗᒋᑦ ᑖᒃᑯᐊ ᐅᕙᑦᑎᓐᓄᑦ ᑐᓂᔭᐅᓯᒪᔪᑦ ᐱᔭᕆᑐᖕᒪᑦ ᐃᓅᓯᖏᑦ ᐱᒃᑯᒥᓇᕐᒪᑕ ᓴᓇᐅᒐᖏᓐᓂ ᑕᑯᓪᓗᒋᑦ ᐊᒻᒪᓗ ᐅᕙᑦᑎᓐᓂᒃ ᑲᒪᑦᑎᐊᓕᕈᒥᓇᕐᒪᑕ ᓯᕗᓂᕆᓂᐊᖅᑕᑦᑎᓐᓄᑦ ᐊᒃᑐᐊᓂᖃᕐᒪᑕ ᐃᓱᒪᒋᓪᓗᒋᑦ,” ᐅᖃᕆᓪᓗᓂ. “ᐃᓱᒪᔪᖓᓕ ᑖᒃᑯᐊ ᓄᑖᒥᒃ ᓴᓇᐅᒐᕈᓯᕐᒥᒃ ᓴᖅᑭᑎᔪᑕᐅᖕᒪᑕ ᖃᐅᔨᒪᓇᕐᒪᑦ ᑕᑯᓐᓇᒐᒃᓴᖃᕐᕕᓂ ᐱᓕᕆᔨᐅᓪᓗᓂ (ᑕᑯᒃᓴᐅᑎᑦᑎᔨ) ᓴᓇᐅᒐᖏᑦ ᐃᒃᐱᖕᓇᕐᓂᖃᕐᓂᖏᓐᓄᑦ … ᐃᓯᖅᑐᓄᑦ ᑕᕝᕗᖓ ᑕᑯᒃᓴᐅᑎᑦᑎᕕᖕᒧᑦ ᐊᔾᔨᒌᖏᑦᑐᓂᒃ ᐊᔾᔨᖑᐊᓂᒃ ᑕᑯᓂᐊᕐᒪᑕ ᖃᓄᑎᒋ ᕿᓐᓄᐊᔪᐊᖅ ᑕᑯᒃᓴᐅᓕᖅᑎᑦᑎᔪᓐᓇᕐᓂᖓᓂᒃ ᑎᑎᖅᑐᕋᕐᒥᒍᑦ ᐃᓱᒪᓇᓗᐊᖏᑦᑐᓂᒃ. ᐅᕙᖓᓕ ᐃᓱᒪᔪᖓ ᑕᒪᓐᓇ ᓄᑖᖑᖕᒪᑦ ᐃᓱᒪᓇᖅᑐᓂᒃ ᓴᓇᐅᒐᕐᓂᖅ ᐅᑭᐅᖅᑕᖅᑐᒥ.”

ᐊᓯᖏᑦ ᑐᓂᓯᓚᐅᕐᒪᑕ ᐃᓚᐅᑎᑕᐅᓂᐊᖅᑐᑦ ᐃᓚᐅᖕᒪᑕ ᑐᓂᕐᕈᓯᐊᖏᑦ ᐋᕿᒃᓱᖅᑕᐅᑎᓪᓗᒍ ᐃᓕᓯᓚᐅᖅᑐᑦ ᐱᓯᒪᔭᒥᓂᒃ ᐅᑯᐊ: ᑯᒻᒧᐊᒃᑐᖅ (ᑰᔨ) ᑰᓕ ᐋᑐᕚᒥᐅᖅ; ᑕᖅᕋᓕᒃ ᐹᑐᕆᔾ, ᒫᓐᓇ ᐊᖏᕐᕋᖃᖅᑐᖅ ᑲᐅᑐᑭᓄᒥ, ᓄᐊᕗᐃᒥ; ᔮᓯᓕᓐ ᐱᕋᐃᓐᓂᖅ ᐋᑐᕚᒥᐅᖅ; ᐊᒻᒪᓗ ᐋᓐ ᕼᑦᓯᓐ ᑐᕌᓐᑐᒥᐅᖅ.

ᑕᐃᒫᓴᐃᓐᓇᖅᑕᐅᖅ ᑕᐃᒪᖓᓂᑦ ᑭᓐᖓᒥᐅᑦ ᖃᐅᔨᒪᔭᐅᓕᕐᒪᑕ ᓴᓇᐅᒐᖅᑎᖏᑦ ᐱᓯᑎᐅᓂᖏᓐᓂᒃ, ᐱᑕᖃᖃᑦᑕᖅᓯᒪᖕᒪᑕ ᐊᔪᖏᑦᑐᓂᒃ ᑖᒃᑯᓂᖓ ᐋᓯᕙᒃᑯᓐᓂᒃ ᐱᑦᓯᐅᓛᒃᑯᓐᓂᒃᓗ, ᕗᐅᓕᐊᒻᓴᓐ ᐹᑐᕆ ᐅᖃᓚᐅᖅᑐᖅ ᓄᓇᓕᖕᒥᐅᑦ ᓇᖕᒥᓂᖅ ᐊᑭᓖᓯᒪᓪᓗᑎᒃ ᓴᓇᐅᒐᕐᒥᓄᑦ ᖁᕝᕙᖓᑎᑕᐅᖕᒪᑕ ᓂᐅᕕᐊᒃᓴᕆᓪᓗᓂᒋᑦ ᐱᓇᓱᐊᒐᕆᔭᐅᖕᒪᑕ ᐃᓚᒌᓄᑦ 1950-ᓂᑦ. ᐊᒻᒪᓗ, ᖃᑕᖑᑎᒌᓄᑦ ᐱᓇᓱᐊᒐᕆᔭᐅᓕᖅᖢᑎᒃ ᑭᖑᕚᖏᓐᓄᑦ ᓴᓇᐅᒐᖅᑎᓄᑦᑕᐅᖅ ‘ᐃᓕᓴᖅᓯᒪᔪᓄᑦ ᐃᓚᒥᓂᑦ ᐃᑲᔪᖃᑦᑕᐅᑎᓯᒪᖕᒪᑕ ᑕᐃᒪᓐᓇ ᐃᓚᒥᓄᑦ,” ᐅᖃᕆᓪᓗᓂ.