ᐱᕙᓪᓕᐊᑎᑦᑎᓂᖅ ᖃᐅᔨᒪᓂᕐᒥᒃ ᑮᓇᐅᔭᒃᓴᐅᔪᓂᒃ ᐱᕙᓪᓕᐊᑎᑦᑎᔨᐅᓪᓗᓂ

722

ᒫᑕ ᔮ ᐊᔾᔨᐅᖏᑦᑐᒥᒃ ᐊᑐᖅᓯᒪᔪᖅ ᑕᒪᑐᒪᓂ ᐃᖅᑲᓇᐃᔮᒥᒍᑦ ᐸᐃᕆᕝᕕᖕᒥ ᐸᖅᑭᔨᐅᓚᐅᖅᖢᓂ ᓄᓇᓕᖓᓂ ᑮᓇᐅᔭᒃᓴᐅᑎᓂᒃ ᐱᕙᓪᓕᐊᑎᑦᑎᔨᖑᖅᑐᖅ.

ᒫᑕ ᔮ ᑭᓐᖓᒥᐅᓄᑦ ᑮᓇᐅᔭᒃᓴᐅᑎᓂᒃ ᐱᕙᓪᓕᐊᑎᑦᑎᔨᒋᔭᐅᓕᓚᐅᕐᒪᑦ ᓄᓇᓕᖓᓂ ᓯᑎᐱᕆᒥ. ᐅᓂᒃᑳᓚᐅᕐᒪᑦ ᐃᓕᑉᐹᓪᓕᒻᒪᕆᖕᓂᕋᖅᖢᓂ ᑕᒪᑐᒪᓂ ᑕᖅᑭᐅᕋᑖᖅᑐᓂ ᓯᑕᒪᓂ ᐊᒻᒪᓗ ᐊᓱᐃᓛᒃ ᑲᔪᓯᑦᑎᐊᕋᑖᖅᖢᓂ ᐃᖅᑲᓇᐃᔮᒥᓂ ᐃᓂᓪᓚᒃᑲᒥ.

ᐃᓄᒻᒪᕆᒃᑐᖅ ᖁᕝᕙᖅᐸᓪᓕᐊᔪᒪᓪᓗᓂᓗ, ᔮ ᐅᓂᒃᑳᒥᓂᒃ ᓄᓇᓕᖓᓂ ᐊᒡᓚᒡᕕᓄᑦ ᑐᓂᐅᖅᑲᐃᔪᕕᓂᖅ ᑭᓐᖓᓂ, ᐊᓯᖏᓐᓂᓗ ᓴᓇᕕᓂ ᓄᓇᓕᖓᓂ ᐊᕐᕌᓂ.

ᐅᖃᓗᒃᕕᐅᓕᖅᑐᕕᓂᖅ ᖃᖓᑦᑎᐊᖑᓕᖅᑎᓪᓗᒍ ᐊᐱᕆᔭᐅᓪᓗᓂ ᐱᒃᑯᒥᒍᓱᒃᑲᔭᕐᒪᖔᖅ ᓄᓇᓕᖓᓂ ᑮᓇᐅᔭᒃᓴᐅᑎᓂᒃ ᐱᕙᓪᓕᐊᑎᑦᑎᔨᐅᓕᖅᐸᑦ, ᐊᑯᓂ ᑖᓐᓇ ᐃᓄᖃᖐᓐᓇᓕᕐᒪᑦ ᑕᖅᑭᓂᒃ ᐊᒥᓱᓂᒃ.

ᐃᖅᑲᓇᐃᔮᖃᓚᐅᕈᓯᖓᓂ ᐸᐃᕆᔨᐅᓂᕐᒥᒃ ᑎᑎᕋᖅᓯᒪᑐᐃᓐᓇᖅᑐᒥᒃ ᑐᓂᓚᐅᕋᒥᒋᑦ ᐸᐃᕆᕝᕕᖕᒥ ᐊᖏᕐᕋᕆᔭᐅᔪᓂᓗ. ᐊᒻᒪᓗ ᓇᖕᒥᓂᖅ ᕿᑐᖓᖅᑖᕆᓪᓗᓂ. ᐃᖅᑲᓇᐃᔭᖅᑎᑖᕆᔭᐅᓚᐅᖅᑐᖅ ᕼᐊᒪᓚᖓᓂ ᓯᑎᐱᕆᒥ ᕿᓚᒥ ᐃᖅᑲᓇᐃᔭᖅᑖᓚᐅᖅᑐᖅ ᕿᑐᖓᖅᑖᕈᓯᐊᖏᑦ ᐃᓱᓕᒻᒪᑕ.

ᑕᒪᓐᓇ ᔮᒧᑦ ᓯᕗᓪᓕᖅᐹᖑᓪᓗᓂ ᐊᒡᓚᒡᕕᖕᒥ ᐃᖅᑲᓇᐃᔭᓯᒋᐊᕈᑎᒋᖕᒪᒍ ᑕᐃᒪᓐᓇ ᐊᒃᓱᕈᕈᑎᒋᓯᒪᔭᖓ ᐱᖅᑯᓯᒥᓂᒃ ᐋᕿᒃᓯᓇᓱᐊᕈᑎᒋᓪᓗᒍ, ᐊᖏᓚᐅᖅᑐᖅ.

ᐃᓕᑉᐸᓪᓕᐊᖏᓐᓇᖅᑐᖓ ᖃᐅᑕᒫᑦ, ᑕᐃᒪᓐᓇ ᑭᓯᐊᓂᐅᖕᒪᑦ,” ᐅᖃᕆᓪᓗᓂ. “ᓯᕗᓪᓕᖅᐹᒥ ᑕᖅᑭᒥ ᐱᒋᐊᓕᖅᑎᓪᓗᖓ ᐊᒃᓱᕉᑕᐅᖃᑦᑕᓚᐅᕋᒪ ᓇᓗᓗᐊᒃᓂᓐᓄᑦ. ᐅᓐᓃᑦ ᓄᖅᑲᕈᒪᖃᑦᑕᓕᓚᐅᖅᑐᖓ ᖃᑦᓰᖅᓱᖅᖢᖓᑭᐊᖅ ᑭᓯᐊᓂᓕ ᒫᓐᓇ ᖃᓄᐃᓗᐊᕈᓐᓃᖅᑐᖅ.”

ᖃᐅᑕᒫᑦ ᐃᖅᑲᓇᐃᔭᕐᕕᖕᒥᓂ ᐃᖅᑲᓇᐃᔮᒥᓂᒃ ᑲᒪᖃᑦᑕᖅᑐᖅ ᐃᖅᑲᓇᐃᔮᒃᓴᑦ ᐅᓂᒃᑲᖏᓐᓂᒃ ᓴᖅᑭᔮᖅᑐᒨᖅᓯᕙᒃᖢᓂ, ᖃᕆᑕᐅᔭᒃᑯᑦ ᐊᐱᖅᓱᖅᑐᓂᒃ ᑭᐅᓯᕙᒃᖢᓂ, ᑮᓇᐅᔭᓂᒃᓗ ᐱᓇᓱᐊᒐᓕᐊᒐᓄᑦ ᑐᒃᓯᕋᖅᑐᓂᒃ ᐃᑲᔪᖃᑦᑕᖅᖢᓂ ᐊᔾᔨᒌᖏᑦᑐᓂᑦ ᑎᒥᖁᑎᒋᔭᐅᔪᓂᑦ ᐱᔭᐅᔪᓐᓇᖅᑐᓂᒃ ᓴᓇᕕᓕᐅᕈᒪᔪᓄᑦ. ᑕᒪᑐᒪᓂ ᒪᒃᑯᒃᑐᓂᒃ ᐃᓕᓴᕆᐊᕈᓐᓇᖅᑎᑦᑎᑲᐃᓐᓇᖅᑐᖅ ᐃᖃᓗᖕᓄᑦ ᐊᔪᖏᓴᐅᑎᓂᒃ ᐃᓕᓴᕐᕕᖕᒧᑦ, ᐃᒫᒃ. ᐃᑲᔪᖃᑦᑕᕆᓪᓗᓂ ᑐᒃᓯᕋᐅᑐᓂᒃ ᑕᑕᑎᕆᔪᓂᒃ ᐊᒡᓚᒡᕕᖓᓂ ᐊᔾᔨᒌᖏᑦᑐᓂᒃ ᑐᓂᓯᔪᓐᓇᖅᑐᓄᑦ, ᒪᑯᓄᖓ ᓴᓇᖑᐊᕈᑏᓂᒃ ᓴᓇᖅᑯᑎᓂᒃᓗ.

ᖃᖓᑐᐃᓐᓇᖅ ᐃᑲᔪᖅᑕᐅᒋᐊᖃᕌᖓᒥ, ᐊᐱᕆᔭᖅᑐᖃᑦᑕᖅᑐᖅ ᓄᓇᓕᖓᓂ ᓄᓇᓕᓕᕆᔨᒃᑯᑦ ᐊᖓᔪᖅᑳᖓᓐᓄᑦ ᔮᓐ ᕼᐊᓯᒧᑦ ᐅᕝᕙᓘᓐᓃᑦ ᓄᓇᕗᑦ ᒐᕙᒪᖓᓂ ᑮᓇᐅᔭᒃᓴᐅᑎᓂᒃ ᐱᕙᓪᓕᐊᑎᑦᑎᔨᒃᑯᓐᓄᑦ ᐃᖏᕐᕋᔪᑎᓕᕆᔨᒃᑯᓐᓄᓪᓗ ᐃᖅᑲᓇᐃᔭᖅᑎᖏᓐᓄᑦ ᐃᑲᔪᖅᑕᐅᖃᑦᑕᖅᑐᖅ, ᐅᖃᕆᓪᓗᓂ.

ᑕᒪᑐᒪᓂ ᐃᓕᓴᕆᐊᖅᖢᓂ ᐃᖅᑲᓇᐃᔮᒥᓂᒃ ᐊᐅᓪᓚᕆᐊᖃᖃᑦᑕᖅᓯᒪᔪᖅ ᐃᖃᓗᖕᓄᑦ ᔮᓐᓄᐊᕆᒥ ᐃᓚᐅᓚᐅᖅᑐᖅ ᐃᓄᒃᑎᑐᑦ ᑎᑎᕋᐅᓯᕐᒥᒃ ᒐᕙᒪᑎᒃᑯᑦ ᑎᑎᕋᖁᑎᖏᓐᓂᒃ ᐊᑕᐅᓯᕐᒥ ᐅᓪᓗᒥ ᓄᓇᓕᖕᓂ ᑮᓇᐅᔭᒃᓴᐅᑎᓂᒃ ᐱᕙᓪᓕᐊᑎᑦᑎᔩᑦ ᑲᑎᒪᕕᒃᔪᐊᖅᑎᓪᓗᒋᑦ ᑎᓯᐱᕆᒥ – ᐅᓪᓗᒥᒃ ᐊᑕᐅᓯᕐᒥᒃ ᑭᖑᕙᕆᐊᖃᓚᐅᕐᒪᑦ ᓯᓚᒧᑦ.

ᓄᓇᓕᖕᓂ ᑮᓇᐅᔭᒃᓴᐅᑎᓂᒃ ᐱᕙᓪᓕᐊᑎᑦᑎᔨᐅᓪᓗᓂ ᒪᓕᒐᖃᓗᐊᖏᒻᒪᑦ ᑎᑎᕋᖅᓯᒪᔪᓂᒃ ᐅᔭᕋᓂ.

ᐃᓛᓐᓂᒃᑯᑦ ᐃᓱᒪᖃᑦᑕᓕᖅᑐᖓ ᓯᓚᑦᑐᒃᓴᕐᕕᒃᔪᐊᒧᑦ ᐃᓕᓴᕆᐊᖔᕈᒪᓪᓗᖓ ᐅᕝᕙᓘᓐᓃᑦ ᐃᖅᑲᓇᐃᔮᓐᓃᖏᓐᓇᕐᓗᖓ. ᓇᓗᓇᖅᓯᒪᔪᖅ ᒫᓐᓇ,” ᔮ ᐅᖃᕆᓪᓗᓂ.