ᓃᑕᓐ ᐊᓐᓇᓇᐅᑦ ᐱᕈᖅᓴᑎᓪᓗᒍ ᖃᒪᓂᑦᑐᐊᕐᒥᑦ 1980-ᖏᓐᓂᑦ, ᓱᓕᕆᐊᒃᓴᖃᓗᐊᖃᑦᑕᓚᐅᖏᑦᑐᖅ, ᓱᓇᑕᖃᓗᐊᖅᑑᔭᙱᑦᑐᓂᒃ ᕿᓂᖃᑦᑕᖅᖢᓂ ᐊᓯᖏᓐᓂᑦ ᓄᓇᓕᖕᓂᑦ ᐊᒻᒪᓗ ᖃᓄᐃᓕᐅᖅᑎᑦᑎᔪᓂᒃ ᐊᒻᒪᓗ ᑐᕌᖓᔪᓂᒃ ᐱᑕᖃᖅᑐᓂᒃ.
“ᓱᓕᕆᐊᒃᓴᖃᓗᐊᓚᐅᖏᑦᑐᖓ ᐃᓅᓯᒻᓂᑦ,” ᐅᖃᖅᑐᖅ ᐊᓐᓇᓇᐅᑦ, ᒫᓐᓇ ᕿᑎᒃᑎᑎᔨᓄᑦ ᑐᑭᒧᐊᒃᑎᑦᑎᔨᐅᔪᖅ ᖃᒪᓂᑦᑐᐊᕐᒥᑦ ᕼᐋᒻᓚᒃᑯᓐᓄᑦ.
ᐅᑭᐅᖅ ᕿᑎᒃᑎᑦᑎᔩᑦ ᐊᒻᒪᓗ ᒥᕐᖑᐃᖅᓯᕐᕕᖕᓄᑦ ᑲᑐᔾᔨᖃᑎᒌᒃᑯᑦ ᓄᓇᕗᒻᒥ ᕿᑎᒃᑐᓄᑦ ᐊᒻᒪᓗ ᐱᙳᐊᖅᑎᓂᒃ ᐃᓕᑕᖅᓯᑎᓪᓗᒋᑦ, ᓂᕈᐊᖅᑕᐅᓚᐅᖅᑐᖅ ᐅᑭᐅᕐᒥᑦ ᕿᑎᒃᑎᑦᑎᔨᓄᑦ ᓯᕗᓕᖅᑎᐅᓂᕐᒧᑦ. ᐊᒻᒪᓗ ᒫᓐᓇ ᐱᓕᕆᐊᕆᓕᖅᑕᖓ, ᐊᓐᓇᓇᐅᑦ ᐱᕕᖃᖅᑎᑦᑎᖃᑦᑕᖅᑐᖅ ᐃᖕᒥᓄᑦ ᐱᔪᒪᓇᔭᓚᐅᖅᑕᖏᓐᓂᑦ.
“ᖁᒃᓴᓪᓚᓚᐅᖅᑐᖓ,” ᐅᖃᖅᑐᖅ ᐃᓕᑕᕆᔭᐅᔾᔪᑎᑖᖓᓂᒃ ᐱᔾᔪᑎᖃᖅᖢᓂ, ᐅᖃᖅᖢᓂ ᐱᓕᕆᓯᒪᓕᖅᑐᖅ ᐊᑕᐅᓯᖅ ᐅᑭᐅᖅ ᓇᑉᐸᖓᓐᓗᑐᐃᓐᓇᖅ. “ᐱᓕᕆᓐᓇᖅᑐᒻᒪᕆᐅᔪᖅ ᓯᕗᓪᓕᖅᐹᖅ ᐅᑭᐅᖑᔪᖅ.”
ᐃᓱᒪᒋᔭᖓ ᑭᑐᓗᒃᑖᑦ ᐃᓚᐅᖃᑕᐅᔪᖕᓇᕆᐊᖃᖅᑐᑦ ᕿᑎᒃᑐᓂᑦ ᐊᒻᒪᓗ ᐱᙳᐊᖅᑐᓂᑦ - ᐊᔪᙱᓐᓂᖃᖅᑐᑐᐃᓐᓇᐅᖏᑦᑐᑦ ᐅᕝᕙᓘᓐᓃᑦ ᐊᔾᔨᒌᓂᒃ ᐅᑭᐅᖃᖅᑐᐃᓐᓇᐃᑦ ᕿᑎᖃᑎᒌᒃᑎᑕᐅᓗᑎᑐᐃᓐᓇᖏᑦᑐᖅ.
“ᑭᓇᑐᐃᓐᓇᒥᒃ ᐃᓚᐅᖏᑎᑦᑎᔪᒪᙱᑦᑐᖓ,” ᐅᖃᖅᑐᖅ ᐊᓐᓇᓇᐅᑦ. “ᑭᓇᑐᐃᓐᓇᒥᒃ ᓵᓚᖃᕐᓗᖓ ᐱᔪᒪᙱᑦᑐᖓ. ᑭᑐᓗᒃᑖᑦ ᖁᕕᐊᓇᖅᑐᓕᕆᖁᔭᒃᑲ, ᐋᓐᓂᐊᖃᖅᑕᐃᓕᒪᓂᖏᑦ ᖃᓄᐃᖏᑦᑎᐊᕐᓗᑎᒃ. ᖃᓄᐃᖏᑦᑎᐊᕐᓗᑎᒃ ᐃᓱᒪᒃᑯᑦ, ᑎᒥᖏᑦ, ᐊᒻᒪᓗ ᐃᓗᒃᑯᑦ - ᕿᑎᒃᑎᑦᑎᓂᖅ ᑕᐃᒪᓐᓇᐃᑦᑑᔪᖅ.”
ᐊᓐᓇᓇᐅᑦ ᑲᒪᒋᔭᖃᓚᐅᖅᑐᖅ ᖃᑉᓯᐊᕐᔪᖕᓂᑦ ᐱᓕᕆᐊᒃᓴᓂᒃ ᓄᓇᓕᖕᒥᑦ, ᓲᕐᓗ ᐱᓕᕆᐊᕆᑉᓗᒍ ᓯᓚᒥᑦ ᐃᓗᐊᓄᑦ ᑕᐅᑐᒃᖢᓂ, ᐃᓕᓐᓂᐊᖅᑎᑦᑎᓚᐅᖅᑐᖅ ᒪᒃᑯᒃᑐᓂᒃ ᒧᒥᕆᐅᒃᓴᓂᕐᒧᑦ ᐊᒻᒪᓗ ᒧᒥᕆᐊᖅᑐᓚᐅᖅᑐᓪᓘᓐᓃᑦ ᐋᓐᑎᐅᕆᔪᒥᑦ. ᑕᐃᒪᐅᓂᐅᖅᑐᒥᑦ, ᒪᒃᑯᒃᑐᓂᒃ ᐅᐃᓂᐲᒡᓕᐊᕈᔾᔨᔪᒪᔪᖅ ᑕᖕᒫᕐᕕᖕᒥᑦ ᐅᖃᓪᓚᐅᔾᔨᔨᐅᓂᕐᒧᑦ ᐊᔪᕈᖕᓃᖅᓴᖅᑕᐅᓗᑎᒃ ᐅᖃᖅᖢᓂᓗ ᐱᓕᕆᖃᑎᒋᔭᖏᑦ ᐳᓘ ᔩᒃᑯᑦ (Blue Jays) ᐃᓐᓇᕆᔭᐅᔪᓄᑦ ᑐᕌᖓᔪᒧᑦ ᐊᓯᖏᓪᓗ ᐱᓕᕆᐊᒃᓴᓄᑦ ᐃᑲᔪᖅᑐᐃᔪᓂᒃ ᐊᕐᓇᓂᒃ ᓂᕕᐊᖅᓯᐊᓂᒃ ᐋᑦᑕᐃᔭᖃᑕᐅᓂᐊᕐᓗᑎᒃ.
“ᓱᓕᕆᙱᖦᖢᓂ, ᓄᖅᖃᖓᑐᐃᓐᓇᖅᑐᑎᑦ ᐊᐃᓯᒪᑉᓗᑎᑦ,” ᐃᖅᖃᐅᒪᔪᖅ ᐊᓐᓇᓇᐅᑦ. “ᓂᙵᐅᒪᓕᑐᐃᓐᓇᖃᑦᑕᖅᑐᑎᑦ ᐊᒻᒪᓗ ᐱᐅᖏᑦᑐᓂᒃ ᐃᓱᒪᓕᕐᓗᑎᑦ ᐊᒻᒪᓗ ᐊᓯᖏᓐᓄᑦ ᓂᙵᖃᑦᑕᖅᖢᑎᑦ, ᐱᐅᖏᑦᑐᓂᒃ ᐃᓱᒪᖃᓕᖅᑎᖦᖢᒋᑦ.”
ᑭᓯᐊᓂ ᕿᑎᒃᑐᓄᐊᖅᖢᓂ, ᑎᒦᑦ ᐊᑐᕐᓗᒍ ᖃᓄᐃᓕᐅᕐᓗᓂ ᐊᒻᒪᓗ ᐃᓅᖃᑎᒋᔭᕐᓂᑦ ᐱᖃᑎᖃᕐᓗᑎᑦ ᑕᒪᑐᒥᙵᑦ ᐊᓯᐊᙳᖅᓯᖃᑦᑕᖅᑐᖅ, ᐅᖃᖅᑐᖅ ᐊᓐᓇᓇᐅᑦ.
“ᐱᑦᑕᐅᔪᖅ ᐃᓱᒪᒧᑦ, ᐱᑦᑕᐅᔪᖅ ᑎᒥᒧᑦ ᐊᒻᒪᓗ ᐱᑦᑕᐅᑦᑎᐊᖅᑐᖅ ᐃᓗᒃᑯᑦ,” ᐅᖃᖅᑐᖅ ᐊᓐᓇᓇᐅᑦ. “ᐅᒃᐱᕆᔭᕋ ᕿᑎᖕᓂᖅ ᐋᖅᕿᒃᓯᔪᖕᓇᖅᑐᖅ ᐊᒥᓱᓂᒃ ᐃᖢᐃᓗᑕᓂᒃ, ᓱᓇᓗᒃᑖᓂᐅᖦᖤᙱᑉᐸᑦ.”
ᐱᑦᑕᐅᔪᒥᒃ ᐱᒋᐊᖅᑎᑦᑎᔪᖅ ᐃᓅᖃᑎᒌᓂᒃ ᐱᖃᑎᖃᕐᓂᕐᒧᑦ, ᐅᖃᖅᑐᖅ ᐊᓐᓇᓇᐅᑦ: ᖃᓄᐃᖏᑦᑎᐊᕐᓗᓂ ᐊᒻᒪᓗ ᖁᕕᐊᓱᒡᓗᓂ ᑐᓂᓯᖃᑦᑕᖅᑐᖅ ᐊᓯᖏᓐᓄᑦ ᐃᓄᖕᓂᑦ ᐊᒻᒪᓗ ᖁᕐᕙᒃᑎᑦᑎᖃᑦᑕᖅᑐᖅ ᐃᓄᖕᓂᒃ.
ᑕᐃᒪᙵᓂᑦ ᐱᒋᐊᕐᒪᑦ, ᐱᓕᕆᐊᒃᓴᖃᐃᓐᓇᖃᑦᑕᖅᑐᖅ ᖃᒪᓂᑦᑐᐊᕐᒥᑦ. ᑭᕙᓪᓕᕐᒥᑦ ᑐᓴᒐᒃᓴᓕᕆᔨᒃᑯᑦ ᐊᐱᕆᔪᑦ ᖃᓄᖅ ᐱᔪᒪᓂᕆᔭᖓ ᐱᓯᒪᔪᖕᓇᕐᒪᖔᒍ.
“ᓇᒡᓕᒋᔭᕆᐊᖃᖅᑕᑎᑦ ᐃᓄᐃᑦ ᐊᒻᒪᓗ ᓄᓇᓕᒃ,” ᐅᖃᖅᑐᖅ ᐊᓐᓇᓇᐅᑦ. “ᐊᓕᐊᓇᐃᒋᔭᕆᐊᖃᖅᑕᑎᑦ ᕿᑎᖕᓂᖅ ᐱᙳᐊᕐᓂᕐᓘᓐᓃᑦ.”
ᐃᓚᐅᑉᓗᓂ ᐊᓐᓇᓇᐅᑦ ᐃᓕᑕᕆᔭᐅᔾᔪᑎᖓᓄᑦ, ᖃᒪᓂᑦᑐᐊᖅ ᐱᑖᖃᑕᐅᓚᐅᖅᑐᖅ 2023 ᑳᒻᒥᐊᒃᑯᑦ ᓄᓇᓕᖕᒥᑦ ᕿᑎᒃᑐᓄᑦ ᐃᓕᑕᕆᔭᐅᔾᔪᑎᒥᑦ.
“ᐱᑦᑕᐅᑦᑎᐊᕐᓂᕆᔭᖓ ᖃᒪᓂᑦᑐᐊᑉ,” ᐅᖃᖅᑐᖅ ᐊᓐᓇᓇᐅᑦ, ᐅᖃᐅᓯᕆᑉᓗᒋᑦ ᑕᒪᕐᒥᓗᒃᑖᖅ ᐊᐅᓚᑦᑎᔨᐅᔪᑦ ᐊᒻᒪᓗ ᐃᓄᐃᑦ ᓄᓇᓕᖕᒥᑦ ᖃᓄᐃᓕᐅᖅᑎᑦᑎᓂᖃᐃᓐᓇᖃᑦᑕᖅᑐᑦ ᐊᒻᒪᓗ ᐱᕕᖃᖅᑎᑦᑎᑉᓗᑎᒃ.
ᖃᒪᓂᑦᑐᐊᕐᒥᑦ ᒪᒃᑯᒃᑐᐃᑦ ᐱᖃᐃᓕᓴᕐᓂᕐᒧᑦ ᑲᑐᔾᔨᖃᑎᒌᑦ ᐃᑲᔪᕐᔪᐊᖅᓯᒪᔪᑦ ᕿᑎᒃᑎᑦᑎᓂᕐᓄᑦ, ᐅᖃᖅᑐᖅ ᐊᓐᓇᓇᐅᑦ.
“ᐱᐅᓯᒋᐊᖅᓯᓂᖃᕆᐊᖃᙱᑦᑐᖓᓘᓐᓃᑦ ᑕᒪᑐᒧᖓ, ᐱᓕᕆᑦᑎᐊᖅᑐᒻᒪᕆᐅᖕᒪᑕ ᓇᓗᓇᙱᑦᑐᖅ, ᐃᑲᔪᖅᖢᑎᒃ ᐊᒻᒪᓗ ᐱᓕᕆᔪᑦ ᐊᑭᓕᖅᑕᐅᖏᖦᖢᑎᒃ,” ᐅᖃᖅᑐᖅ ᐊᓐᓇᓇᐅᑦ. “ᑕᒪᑐᒧᙵ ᐱᑦᑕᐅᔾᔪᑎᒋᔭᖓ ᖃᒪᓂᑦᑐᐊᕐᒥᑦ ᒪᒃᑯᒃᑐᐃᑦ ᐱᖃᐃᓕᓴᕐᓂᕐᒧᑦ ᑲᑐᔾᔨᖃᑎᒌᒃᑯᑦ ᐊᒻᒪᓗ ᑕᒪᕐᒥᓗᒃᑖᖅ ᐊᐅᓚᑦᑎᔨᐅᔪᑦ, ᓲᕐᓗ ᐊᖓᔪᖅᖄᖑᔪᓄᑦ ᐊᐅᓚᑕᐅᑉᓗᓂ ᒪᒃᑯᒃᑐᑦ ᕼᐋᑭᑏᑦ ᑲᑐᔾᔨᖃᑎᒌᒃᑯᑦ. ᐃᑲᔪᖃᑦᑕᖅᑐᑦ ᐃᑲᔪᕐᓂᖃᖅᑐᑦ, ᐃᓄᐃᑦ ᖃᓄᐃᓕᐅᕈᑎᖃᖅᑐᑦ ᓄᓇᓕᖕᒧᑦ ᐱᑦᑎᐊᕐᓂᒃᑯᑦ ᐆᒻᒪᑎᖏᓐᓂᙶᖅᑐᓂᒃ. ᑕᒪᑐᒧᙵ ᖃᒪᓂᑦᑐᐊᖅ ᐊᔾᔨᐅᖏᑦᑑᓂᕆᔭᖓ. ᐅᒃᐱᕈᓱᒃᑐᖓ ᖃᒪᓂᑦᑐᐊᖅ ᐃᓕᑕᕆᔭᐅᔾᔪᑎᑖᓚᐅᖅᑐᖅ ᐃᓄᖏᑦ ᐱᔾᔪᑎᒋᑉᓗᒋᑦ. ᐃᑲᔪᖃᑦᑕᖅᑐᑦ ᐊᔪᙱᑎᑦᑎᔪᑦ, ᐊᒻᒪᓗ ᐊᖓᔪᖅᖄᕆᔭᐅᔪᑦ ᐃᑲᔪᖅᑐᐃᑉᓗᑎᒃ ᓄᑕᖅᖃᓂᒃ, ᑭᑐᓗᒃᑖᓂᒃ, ᐃᓕᓐᓂᐊᖅᑎᑦᑎᔨᓂᒃ, ᓯᕗᓕᖅᑎᓂᒃ.”
ᖃᐅᔨᑎᑦᑎᔪᖅ ᓴᕆᒪᓲᑎᖃᕐᓂᕆᔭᖓᓂᒃ ᓄᓇᓕᖕᒥᑦ.
“ᑕᐅᑐᒃᑕᕋ ᖃᒪᓂᑦᑐᐊᖅ ᓯᕗᓕᖅᑎᐅᓗᓂ ᐱᓕᕆᐊᖃᕐᓂᕆᔭᖓᓂᒃ, ᓯᐊᒻᒪᒃᑎᑦᑎᓗᓂ ᓱᓇᓗᒃᑖᓂᒃ ᐊᒻᒪᓗ ᐊᓯᖏᑦ ᓄᓇᓖᑦ ᒪᓕᒡᓗᑎᒃ,” ᐅᖃᖅᑐᖅ ᐊᓐᓇᓇᐅᑦ. “ᖃᐅᔨᒪᔪᖓ ᖃᒪᓂᑦᑐᐊᖅ ᐆᒃᑑᑎᐅᔪᖕᓇᕐᒪᑦ ᐊᒥᓱᓄᑦ ᐅᑭᐅᖅᑕᖅᑐᒥᑦ ᓄᓇᓕᖕᓄᑦ, ᐃᓛ ᑕᐃᒪᓐᓇᐃᑦᑑᓂᕆᔭᖓᓄᑦ ᖃᒪᓂᑦᑐᐊᖅ. ᖃᐅᔨᒪᔪᖓ ᐃᖢᐃᑦᑐᓂᒃ ᐱᑕᖃᖃᑦᑕᖅᑐᒍᑦ ᐊᒻᒪᓗ ᐱᔾᔪᑕᐅᔪᓂᒃ, ᑭᓯᐊᓂ ᐱᐅᔪᒥᒃ ᐱᑕᖃᕐᒥᔪᖅ.
ᐅᑉᓘᑉ ᐃᓱᐊᓂᑦ, ᐊᓐᓇᓇᐅᑦ ᐃᓚᓯᑉᓗᓂ, ᑮᓇᐅᔭᖅ ᐊᒥᓱᓂᒃ ᑲᑎᑎᑦᑎᖃᑦᑕᖅᑐᖅ, ᐊᒻᒪᓗ ᖁᔭᓐᓇᒦᖅᑕᖏᑦ ᐊᐅᓚᑦᑎᓂᖃᖅᑐᓗᒃᑖᑦ ᑮᓇᐅᔭᖃᖅᑎᑦᑎᖃᑦᑕᖅᑐᑦ ᕿᑎᒃᑎᓂᒃ ᐊᒻᒪᓗ ᐱᙳᐊᖅᑎᑦᑎᓂᕐᒧᑦ ᐱᓕᕆᐊᒃᓴᓂᒃ, ᓲᕐᓗ ᑳᒻᒥᐊᒃᑯᑦ ᐃᑲᔪᖅᖢᑎᒃ ᐃᖏᕐᕋᔭᖕᓂᕐᒧᑦ ᐊᒻᒪᓗ “ᐊᖏᔪᐊᓗᖕᒥᑦ” ᓄᓇᓕᖕᒥᑦ ᐱᓕᕆᖃᑎᒌᖕᓂᖏᓐᓄᑦ ᐃᑲᔪᖅᓯᒪᔪᑦ.