ᐊᒥᓱᑲᓪᓚᐃᑦ ᓇᒃᑭᐅᑏᑦ ᐸᕐᓇᒃᐸᓪᓕᐊᓂᐊᖅᑐᑦ ᑐᒡᓕᕆᓕᖅᑕᖓᓂᑦ ᑲᖏᖅᖠᓂᕐᒥᑦ ᑎᑭᕋᕐᔪᐊᕐᒧᑦ ᓯᑭᑑᒃᑯᑦ ᓇᒃᑭᐅᓐᓂᖅ ᑎᕆᒡᓗᐃᑦ 1-ᒥᐅᓇᔭᖅᑐᖅ (ᓯᓚ ᐱᔪᖕᓇᖅᑎᑦᑎᒃᐸᑦ) ᑲᖏᖅᖠᓂᕐᒥᑦ.
ᑲᑎᖦᖢᒋᑦ 13-ᖑᓚᐅᖅᑐᑦ ᓇᒃᑭᐅᑦᑐᑦ 2023-ᒥᑦ, 40 ᖃᓂᑖᓃᓕ ᓇᒃᑭᐅᖅᑏᑦ ᓂᕆᐅᒋᔭᐅᑉᓗᑎᒃ ᐅᑭᐅᖑᔪᒥᑦ ᓇᒃᑭᐅᓐᓂᐊᖅᑐᓂᑦ.
ᓃᑰ ᑕᐅᑐᙱ ᐅᖃᖅᑐᖅ ᐃᓚᐅᖁᔭᐅᑉᓗᓂ ᓇᒃᑭᐅᑦᑐᓂᑦ ᐅᖃᐅᑎᔭᐅᖃᑦᑕᖅᑐᖅ ᐅᒡᓚᕌᖓᒍ ᐊᖓᓂ, ᓄᐃᐅᓪ ᖃᓗᔾᔭᖅ, ᓇᒃᑭᐅᓐᓂᕐᒥᒃ ᐅᑎᖅᑎᑦᑎᔪᒪᓚᐅᖅᑐᖅ ᓇᒃᑭᐅᓐᓂᖅ ᐊᑯᓐᓂᖏᓐᓂᑦ ᒪᕐᕉᒃ ᓄᓇᓖᖕᓂᑦ ᐊᕐᕌᓂ.
ᓇᑭᐅᓐᓂᖅ ᖁᕕᐊᒋᔭᐅᓚᐅᖅᑐᖅ 1970-ᖏᓐᓂᑦ ᐊᒻᒪᓗ 1980-ᖏᓐᓂᑦ.
ᓇᒃᑭᐅᓐᓂᖅ 170 ᑭᓛᒥᑕᐃᑦ ᖃᓂᑖᓂᑦ ᐅᖓᓯᒃᑎᒋᔪᖅ ᐅᑎᒧᑦ.
ᑕᐅᑐᙱ ᐅᖃᓚᐅᖅᑐᖅ ᐱᐊᓚᔪᒻᒪᕆᐅᓚᐅᖅᑐᖅ ᐋᖅᕿᒃᓯᒪᑕ ᑲᑎᒪᔨᐊᓛᓂᒃ ᐊᕐᕌᓂ.
ᐅᖃᖅᑐᖅ ᐅᑭᐅᖑᔪᖅ ᓇᒃᑭᐅᓐᓂᖅ ᑕᑭᓂᖅᓴᐅᕌᕐᔪᒃᑎᑕᖓᑦ, ᓇᒃᑭᐅᑏᑦ 75 ᑭᓛᒥᑕᒃᑲᓐᓂᕐᓂᒃ ᐅᖓᑖᓅᕐᓂᐊᖅᑐᖅ ᑎᑭᕋᕐᔪᐊᕐᒥᑦ ᑕᐃᑲᙵᑦ ᐅᑎᕆᐊᕐᓗᑎᒃ ᑲᖏᖅᖠᓂᕐᒧᑦ.
“ᐅᑭᐅᖅ ᓇᒃᑭᐅᓐᓂᐊᖅᑐᑦ 150 ᒪᐃᓕᓂᑦ (241 ᑭᓛᒥᑕᐃᑦ) ᐅᖓᓯᒃᑎᒋᔪᒥᑦ ᐊᕐᕌᓂ ᓇᒃᑭᐅᑦᑐᑦ ᐊᑕᐅᓯᖅ ᐃᑲᕐᕋᐅᑉ ᐅᖓᑖᓄᑐᐃᓐᓇᐅᓚᐅᕐᒪᑦ ᑕᐃᑯᖓ ᐅᑎᒧᓪᓗ, ᓇᐃᑦᑐᒻᒪᕆᐅᓚᐅᕐᒪᑦ ᓇᒃᑭᐅᓐᓂᖅ ᐅᖓᓯᖕᓂᖅᓴᐅᑎᑦᑐᒪᔭᕗᑦ ᐅᑭᐅᖑᔪᖅ”, ᐅᖃᖅᑐᖅ ᑕᐅᑐᙱ.
“ᐊᕐᕌᓂ ᓯᕗᓪᓕᖅᐹᖑᓚᐅᖅᑐᖅ ᑕᐃᒪᓐᓇᐃᑦᑐᒥᑦ ᓇᒃᑭᐅᓐᓂᖅ ᑕᐃᒪᙵᓂᑦ 40 ᐅᑭᐅᑦ ᖃᓂᑖᓂᑦ ᐊᓂᒍᖅᑐᓂᑦ ᐊᒻᒪᓗ ᖃᓄᐃᖏᑦᑎᐊᓚᐅᖅᑐᖅ ᑭᑐᓗᒃᑖᓄᑦ.
“ᓂᕆᐅᒋᓚᐅᖏᑕᕗᑦ ᑕᐃᒪᓐᓇᐃᓐᓂᐊᕐᒪᑦ ᕿᑎᐊᓂᑦ ᓇᒃᑭᐅᑎᑦᑎᔭᕆᐊᖃᓚᐅᕋᑉᑕ ᐊᑯᓐᓂᖓᓂᑦ ᑲᖏᖅᖠᓂᕐᒥᑦ ᓇᒃᑭᐅᖅᑎᑦᑎᔩᑦ ᐊᒻᒪᓗ ᐃᒡᓗᓕᒑᕐᔪᖕᒥᑦ ᓇᒃᑭᐅᑎᑦᑎᔩᑦ. ᑐᐊᕕᕐᓗᑕ ᐱᓕᕆᔭᕆᐊᖃᓚᐅᖅᑐᒍᑦ ᓯᓚᕐᓘᑎᙳᐊᓚᓴᓚᐅᕐᒪᑦ.
“ᐃᓃᑦ ᒪᓂᒃᑐᒻᒪᕆᐅᓚᐅᖅᑐᑦ ᐊᕐᕌᓂ, ᑭᓯᐊᓂ ᐅᑭᐅᖑᔪᖅ ᐊᔾᔨᒋᔾᔮᖏᑕᖓ ᐱᖅᓯᕋᔪᒃᑲᑉᑕ, ᐃᓱᒪᔪᖓ ᐃᓃᑦ ᒪᓂᕋᐅᖏᓐᓂᖅᓴᐅᓂᐊᕐᒪᑕ ᐅᑭᐅᖑᔪᖅ ᐊᐳᑎᑕᖃᕐᓂᖅᓴᐅᑎᓪᓗᒍ.”
ᔮᕕᔅ ᑕᐅᑐᙱ ᓵᓚᒃᓴᓚᐅᖅᑐᖅ 2023-ᒥᑦ, ᓯᕗᓪᓕᖅᐸᐅᑎᐊᕐᔪᒃᖢᓂ ᑐᒡᓕᐅᑉᓗᓂ ᐱᐊᓂᒃᑐᒥᑦ ᓇᓇᐅᖅ ᑕᓄᔭᖅ.
ᓇᒃᑭᐅᑎᑦᑎᕐᔪᐊᕌᖓᑕᑐᑦ, ᐊᑦᑕᕐᓇᖅᑐᖃᙱᑎᑦᑎᓂᖅ ᓯᕗᓪᓕᖅᐸᐅᑎᔭᐅᔪᖅ.
ᓃᑯ ᐅᖃᖅᑐᖅ ᓇᒃᑭᐅᑎᑦᑎᔪᑦ ᐊᑐᕐᓂᐊᖅᑐᑦ ᐊᒥᐊᓕᑲᒥ ᑲᒻᐸᓂᒥᑦ ᖃᐅᔨᓴᐃᓂᕐᒧᑦ ᐊᑐᖅᑕᐅᔪᓂᒃ ᐱᖃᖅᑎᑕᐅᓂᐊᕐᓗᑎᒃ ᓇᒃᑭᐅᑦᑐᓗᒃᑖᑦ, ᓇᓗᓇᐃᖅᓯᖃᑦᑕᖅᑐᑦ ᐱᖓᓱᐃᑦ ᓴᑲᓐᓂᑕᒫᑦ ᑕᑯᒃᓴᐅᑎᖦᖢᒋᑦ ᑕᒪᕐᒥᓗᒃᑖᖅ ᓇᒃᑭᐅᖃᑕᐅᔪᑦ ᓇᓃᒻᒪᖓᑖ ᐊᒻᒪᓗ ᖃᐅᔨᑦᑎᑉᓗᓂ ᓄᖅᖃᖅᐸᑕ.
ᐅᖃᖅᑐᖅ ᖁᓕᒥᒎᓕᖕᒥᑦ ᐊᑐᕈᒪᑉᓗᑎᒃ ᐋᖅᕿᒃᓱᐃᔪᑦ ᐊᕐᕕᐊᓂᑦ ᖁᓕᒥᒎᓕᖕᒥᑦ ᐊᖁᒃᑎᐅᔪᖅ ᑭᐊᓕ ᐊᐅᓚᔾᔫᑉ ᑲᒻᐸᓂᖓᓂᑦ ᓇᒃᑭᐅᑦᑐᑦ ᖁᓛᓂᑦ ᖃᐅᔨᓴᕐᓂᐊᕐᓗᒋᑦ, ᑭᓯᐊᓂ ᑕᒪᓐᓇ ᑭᖑᓪᓕᖅᐹᒃᑰᖓᓕᖅᓯᒪᙱᑦᑐᖅ ᓱᓕ ᐅᑉᓗᒥᒧᑦ ᑎᑭᖦᖢᒍ.
“ᓂᕆᐅᒃᑐᖓ ᐃᑲᔪᖅᑎᓂᒃ ᐱᑕᖃᐅᕐᓂᐊᕐᒪᑦ ᐃᓂᐅᔪᓂᑦ, ᐃᒻᒪᖅᖄ 15 ᒥᓂᑦᓂᒃ ᑭᓇᑐᐃᓐᓇᒧᑦ ᐱᓂᕐᓗᐊᕿᔪᒧᐊᕈᖕᓇᕐᓗᑎᒃ, ᑭᓯᐊᓂ ᐊᖏᔫᔪᖅ ᑲᒪᒋᔭᕆᐊᖃᕐᕕᐅᔪᖅ.
“ᐅᕙᑉᑎᖕᓄᑦ ᐊᖏᔫᔪᖅ ᑭᑐᓗᒃᑖᑦ ᐊᑦᑕᕐᓇᖅᑐᒦᑎᓐᓂᐊᖏᓪᓗᒋᑦ ᐊᒻᒪᓗ ᓇᒃᑭᐅᑏᑦ ᓇᒃᑭᐅᖃᑦᑕᖅᓯᒪᓂᑰᓗᑎᒃ ᐊᑐᕐᓗᑎᒃ ᓈᒻᒪᒃᑐᓂᒃ ᓯᑭᑑᓂᒃ ᐊᒻᒪᓗ ᐊᑐᕐᓗᑎᒃ ᐊᑦᑕᕐᓇᖅᑐᖃᙱᑎᑦᑎᔪᓂᒃ ᐊᑐᕆᐊᖃᖅᑕᖏᓐᓂᑦ.
“ᑮᓇᐅᔭᓂᒃ ᐱᕈᐃᑎᑦᑎᓂᖅ ᐱᐅᑦᑎᐊᖅᑐᖅ ᒫᓐᓇᒧᑦ ᑎᑭᖦᖢᒍ. ᐃᑲᔪᖅᑐᖅᑕᐅᔪᒍᑦ ᖁᕕᐊᒋᔭᖃᖅᑐᓂᑦ, ᐊᒻᒪᓗ ᐊᒧᔭᒃᓴᐅᑎᒃᓴᕗᑦ ᐊᒻᒪᓗ ᐸᑦᑕᖕᓂᑦ ᐊᑕᐅᓯᓕᒃᑖᕋᓱᖕᓂᖅ ᐊᖏᒡᓕᕙᓪᓕᐊᖏᓐᓇᖅᑐᖅ. ᖃᓄᐃᖏᓗᒃᑖᖅᐸᑦ, ᓇᒃᑭᐅᓐᓂᖅ ᐱᒋᐊᕐᓂᐊᖅᑐᖅ ᐅᑉᓗᕆᕈᒥᑕᕐᓇᒥᑦ ᖃᓂᑖᓂᑦ ᐃᒃᓴᕐᕕᐅᑉ ᑲᖏᖅᖠᓂᐅᑉ ᓵᖓᓂᑦ ᑎᕆᒡᓗᐃᑦ 1-ᒥᑦ.
“ᐱᑦᑕᐅᔪᓂᒃ ᐊᔾᔨᒌᙱᑦᑐᓂᑦ ᐱᑖᒃᓴᖃᐅᖅᑐᒍᑦ ᐅᑭᐅᖑᔪᖅ ᓇᒃᑭᐅᖅᑎᑦᑎᓂᕐᒧᑦ ᐊᒻᒪᓗ ᓂᕆᐅᖕᓂᖃᖅᐸᓪᓕᐊᓂᖅ ᐱᕙᓪᓕᐊᓗᓂ ᓇᒃᑭᐅᓐᓂᐊᖅᑐᓄᑦ ᐅᑉᓗᖅ ᖃᒡᓕᕙᓪᓕᐊᓂᖓ ᒪᓕᒡᓗᒍ.”