ᐃᓕᓐᓂᐊᕐᓂᖅ ᑐᑭᖃᑦᑕᐅᑎᓂᕐᒥᒃ

60

Taekwon-do-ᒥᒃ ᑐᑭᖃᑦᑕᐅᑎᓂᕐᒥᒃ ᐃᓕᓐᓂᐊᖅᑐᑦ ᐊᕐᕕᐊᓂ ᐊᒥᓱᕈᖅᐸᓪᓕᐊᔪᑦ.
ᑐᑭᖃᑦᑕᐅᑎᓂᕐᒧᑦ ᐃᓕᓐᓂᐊᕈᑎ ᐃᓕᓐᓂᐊᖅᑎᑦᑎᒍᑕᐅᔪᖅ ᐅᐃᒋᖕᓄᑦ ᓄᓕᐊᕇᖕᓄᑦ ᔮᓐ ᐊᕐᓈᓗᒡᔪᐊᖅ ᐃᓕᓐᓂᐊᕐᕕᖕᒥ ᐃᓱᒪᑕᕐᒧᑦ ᑖᓐ ᐲᑕᔅᒧᑦ ᐊᒻᒪᓗ ᓄᓕᐊᖓ, ᔪᐊᓐ.

Instructor Joanne Peters puts her students through their paces during a gathering of the new taekwon-do club in Arviat on March 2, 2019. Photo courtesy Gord Billard
Instructor Joanne Peters puts her students through their paces during a gathering of the new taekwon-do club in Arviat on March 2, 2019. Photo courtesy Gord Billard

ᑐᑭᖃᑦᑕᐅᑎᓂᖅ ᑑᖅᑲᑦᑕᐅᑎᓂᕐᓗ ᐱᒡᒍᓴᐅᔾᔪᐊᕈᑕᐅᖃᑦᑕᖅᓯᒪᔪᖅ ᑯᐊᕇᔭᒥᐅᓄᑦ ᓱᖏᐅᑎᖃᕋᓂ ᐅᓇᑕᕈᑎ ᑐᑭᖃᑦᑕᐅᑎᓂᖅ ᐃᖕᒥᓂᒃ ᓴᐳᓐᓂᐊᕈᑕᐅᖅᑳᖃᑦᑕᓚᐅᖅᓯᒪᔪᖅ ᑕᐃᔭᐅᔪᖅ ᑕᐃᒪᓐᓇ tae kyon-ᒥᒃ.
ᓂᑯᕕᖓᑉᓗᓂ ᐋᓐᓂᖅᑐᖃᑦᑕᐅᑎᓂᐅᔪᖅ ᑐᕌᖓᓂᖅᓴᐅᑉᓗᓂ ᑐᑭᖃᑦᑕᐅᑎᓂᒃᑯᑦ, ᑭᓯᐊᓂ ᑑᖅᓯᖃᑦᑕᐅᑎᓂᕐᒧᓪᓗ ᑐᕌᖓᔪᖅ, ᓰᖅᑯᒃᑯᓪᓗ ᐊᔭᒃᓯᖃᑦᑕᕐᓂᕐᒧᑦ, ᐊᒻᒪᓗ ᐃᑯᓯᒃᑯᑦ.
ᐃᓕᓐᓂᐊᖅᑐᑦ ᐃᓕᓐᓂᐊᓚᐅᕐᒥᔪᑦ ᖃᓄᐃᓕᔭᐅᒋᐊᕐᓗᓂ ᓄᖅᑲᖅᓯᖃᑦᑕᕋᔭᕐᓂᕐᒧᑦ, ᐅᕐᕈᑦᑕᐃᓕᖃᑦᑕᕐᓂᕐᒧᓪᓗ, ᓂᑯᕕᖓᔪᓐᓇᕐᓂᕐᒧᑦ ᐊᑕᐅᓯᕐᒥᒃ ᓂᐅᒋᔭᕐᒥᒃ ᐊᑐᕐᓗᓂ ᐊᒻᒪᓗ ᖃᓄᖅ ᐃᑎᒐᒥᓂᒃ ᐊᑐᕈᓐᓇᕐᓂᕐᒧᑦ.
ᑖᓐ, ᓯᕗᓪᓕᖅᐹᒥ ᐅᑭᐅᒥ ᐃᓕᓐᓂᐊᕐᕕᖕᒥ ᐃᓱᒪᑕᕆᔭᐅᓕᖅᖢᓂ, ᑐᑭᖃᑦᑕᐅᑎᓂᒃᑯᑦ ᐱᓕᕆᖃᑦᑕᓕᓚᐅᖅᑐᖅ 20-ᓂᒃ ᐅᑭᐅᖃᓕᖅᖢᓂ ᐊᒻᒪᓗ ᒫᓐᓇᐅᔪᖅ ᖁᑦᑎᖕᓂᖅᐹᒃᑯᑦ ᑕᐃᒪᐃᑦᑐᓕᕆᔨᐅᖃᑕᐅᓕᖅᑐᖅ ᕿᕐᓂᖅᑐᒥᒃ ᑕᑉᓯᖃᖅᖢᓂ ᖁᑦᑎᖕᓂᓕᒃᑯᑦ ᓯᑕᒪᒃᑯᑦ 30 ᐅᑭᐅᑦ ᐅᖓᑖᓂ ᑕᐃᒪᐃᑦᑐᓕᕆᔨᐅᓕᖅᖢᓂ ᐊᒻᒪᓗ ᑲᓇᑕᒥ ᐃᓕᓐᓂᐊᖅᑎᑦᑎᔨᐅᔪᓐᓇᕐᓂᕐᒧᑦ ᑕᐃᒪᐃᑦᑐᒃᑯᑦ ᐃᓕᑕᕆᔭᐅᔾᔪᑎᖃᖅᖢᓂ.
ᔪᐊᓐ ᑐᒡᓕᐊᒍᑦ ᖁᑦᑎᖕᓂᓕᒃᑯᑦ ᕿᕐᓂᖅᑐᒥᒃ ᑕᑉᓯᓕᒃ ᐊᒻᒪᓗ ᑕᐃᒪᐃᑦᑐᓕᕆᔨᐅᖃᑦᑕᖅᓯᒪᓕᖅᑐᖅ ᐃᒻᒪᖄ 9-ᖑᓕᖅᑐᓂᒃ ᐅᑭᐅᓂᒃ ᑖᓐ, ᐊᖅᓴᕐᓃᑦ ᐃᓕᓐᓂᐊᕐᕕᖕᒥ ᐃᖃᓗᖕᓂ 9-ᓂᒃ ᐅᑭᐅᓂᒃ ᐃᓱᒪᑕᕆᔭᐅᓵᓚᐅᖅᑐᖅ, ᐱᒋᐊᖅᑎᑦᑎᖅᑳᖃᑕᐅᓚᐅᖅᓯᒪᔪᖅ ᐃᖃᓗᖕᓂ ᑐᑭᖃᑦᑕᐅᑎᓂᒃᑯᑦ ᐃᓕᓐᓂᐊᕈᑎᒥᒃ.
ᐅᖃᖅᖢᓂ ᐃᓕᓐᓂᐊᕈᑎᒥᒎᖅ ᓴᖅᑭᑎᑦᑎᕙᓪᓕᐊᑉᓗᓂ ᐊᕐᕕᐊᓂ, ᐃᖕᒥᓂᒃ ᐊᒻᒪᓗ ᔪᐊᓐ ᐃᓱᒪᓚᐅᖅᑐᑦ ᓴᖅᑭᑎᑦᑎᔪᒪᑉᓗᑎᒃ ᐃᓅᓯᒃᑯᑦ ᑕᐅᕗᙵᓗᒃᑕᖅ ᐊᑐᖅᑕᐅᖃᑦᑕᕋᔭᖅᑐᒥᒃ ᐱᒋᐊᖅᑎᑦᑎᔪᒪᑉᓗᑎᒃ ᒪᒃᑯᒃᑐᓄᑦ.
“ᓴᓇᑦᑕᐃᓕᐊᕈᓯᕐᒥ ᐃᓕᓐᓂᐊᖃᑦᑕᖅᑐᑦ ᐃᓕᓐᓂᐊᕐᕕᒡᔪᕐᒥ ᐃᓕᓐᓂᐊᖅᑐᑦ, ᐊᒻᒪᓗ ᐃᓚᐅᖃᑕᐅᑐᐃᓐᓇᓕᖅᖢᑎᒃ ᒥᑭᓂᖅᓴᑦ ᓄᑕᖅᑲᑦ, ᓄᑕᖅᑲᑦ ᐅᑭᐅᓖᑦ 11 ᐅᖓᑖᓂ ᐊᒻᒪᓗ ᐊᖓᔪᖅᑳᑦ ᓄᓇᖅᑲᑎᒌᑦ ᐱᓕᕆᖃᑎᒌᒍᓐᓇᖁᑉᓗᒋᑦ,” ᑕᐃᒪᓐᓇ ᐅᖃᖅᖢᓂ ᑖᓐ.
“ᐃᓕᓐᓂᐊᖅᑎᑦᑎᖃᑦᑕᓚᐅᖅᑐᖓ ᐃᓄᖕᓂᒃ ᑕᒡᕙᓂ ᖃᐅᔨᒪᓚᐅᖅᑐᓂᒃ ᕿᕐᓂᖅᑐᒥᒃ ᑕᑉᓯᖃᕐᓂᒻᓄᑦ, ᑭᓯᐊᓂ ᐊᐅᓪᓛᓕᖅᑐᖅ ᑕᒪᓐᓇ ᑕᖅᑭᓗᒃᑖᒥᖃᐃ ᐊᒻᒪᓗ 50 ᑐᖔᓃᖦᖢᑎᒃ ᐃᓚᐅᖃᑕᐅᓲᑦ.
“ᐃᓕᓐᓂᐊᖃᑦᑕᖅᑐᑦ ᒪᕐᕈᐃᖅᑕᖅᖢᑎᒃ ᐅᑉᓗᒃᑯᑦ ᐱᓇᓱᐊᕈᓯᐅᑉ ᐃᓗᐊᓂ ᐅᑉᓗᕈᒥᑕᕐᓇᖅᑎᓪᓗᒍ ᐊᒻᒪᓗ, ᓴᓇᑦᑕᐃᓕᐊᕈᓯᕐᒥ ᐅᑉᓗᒃᑯᑦ, 3:00-ᒥ ᐅᑉᓗᒃᑯᑦ 4:30-ᒧᑦ ᐅᕝᕙᓘᓐᓃᑦ 5:00-ᒧᑦ.”
ᑖᓐ ᐅᖃᖅᖢᓂ ᑐᑭᖃᑦᑕᐅᑎᓂᖅ ᖃᓄᐃᓕᐅᕈᑕᐅᓲᖅ ᓅᑲᑕᕈᓘᔭᕐᓇᖅᐸᒃᖢᓂ ᐊᒻᒪᓗ ᐱᔭᕆᐊᑐᑉᓗᓂ.
ᐅᖃᖅᖢᓂ ᒫᓐᓇᐅᔪᕉᖅ, ᐱᒋᐊᓕᓵᕌᖓᑕ, ᐃᑲᔫᑕᐅᓇᓱᖃᑦᑕᖅᑐᖅ ᓄᑕᖅᑲᑦ ᓄᖅᑲᖓᑐᐃᓐᓇᖁᓇᒋᑦ ᐱᓕᕆᓂᖅᓴᐅᓂᒃᑯᑦ ᐃᓕᓐᓂᐊᖁᑉᓗᒋᑦ ᐊᒻᒪᓗ ᖁᕕᐊᓱᖁᑉᓗᒋᑦ ᖁᕕᐊᓱᖃᑎᖃᕐᓗᑎᒃ ᐃᓅᖃᑎᒥᓂᒃ.
“ᒥᑭᔪᓂᒃ ᐊᖓᔪᒃᖠᐊᕐᔪᐃᑦ ᐊᒻᒪᓗ ᐃᓕᓐᓂᐊᕐᕕᒡᔪᐊᕐᒥ ᐃᓕᓐᓂᐊᖅᑐᑦ ᑕᒪᑐᒥᙵ ᖁᕕᐊᒋᔭᖃᑦᑎᐊᖅᑐᑦ.
“ᑕᒪᓐᓇᓗ ᓇᑭᑦ ᐱᒋᐊᖅᓯᒪᓂᖓ ᑐᑭᖃᑦᑕᐅᑎᖃᑦᑕᕐᓂᖅ ᐱᒻᒪᕆᐊᓘᑉᓗᓂ, ᑯᐊᕇᔭᒥᐅᑦ ᐱᒋᐊᕈᑎᒋᖅᑳᖅᓯᒪᔭᖏᑦ, ᑕᐃᒪᐃᒻᒪᑦ ᐃᓕᓐᓂᐊᖅᑎᑦᑎᖃᑦᑕᖅᑐᒍᑦ ᑯᐊᕇᔭᒃᑯᑦ ᐱᒋᐊᕐᓂᕆᖅᑳᓚᐅᖅᓯᒪᔭᖏᓐᓂᒃ ᐊᒻᒪᓗ ᐃᓕᓐᓂᐊᖅᑎᑦᑎᕙᒃᖢᑕ ᕿᕐᓂᖅᑐᒥᒃ ᑕᑉᓯᑖᕈᒪᔪᑦ ᖃᓄᖅ ᐃᓕᖅᑯᓯᖃᕋᔪᖕᒪᖔᑕ.
“ᑕᒪᓐᓇ ᐃᓕᓐᓂᐊᕈᑎᒃᓴᑦᑎᐊᕚᓗᒃ.”
ᑖᓐ ᐅᖃᖅᖢᓂ ᐃᖕᒥᓂᒃ ᔪᐊᓐᓗᒎᖅ ᐅᖃᓪᓚᒐᔪᒃᑐᑦ ᐃᓕᓐᓂᐊᖅᑐᓄᑦ ᐅᒃᐱᕆᔭᐅᔪᑦ ᒥᒃᓵᓄᑦ taekwon-do ᒥᒃᓵᓄᑦ ᓲᕐᓗ ᐃᖕᒥᓂᒃ ᐊᔪᙱᓐᓂᕐᒥᓂᒃ ᐅᒃᐱᕈᓱᖃᑦᑕᕆᐊᖃᕐᓂᕐᒧᑦ, ᐃᑲᔪᒃᑲᐅᔭᕆᐊᖃᕐᓂᕐᒧᑦ ᐃᓅᖄᑎᒥᓂᒃ, ᐱᕙᓪᓕᐊᑦᑎᐊᕈᒪᖃᑦᑕᕐᓂᕐᒧᑦ ᐊᒻᒪᓗ ᐃᖕᒥᓂᒃ ᐊᐅᓚᑦᑎᑦᑎᐊᕈᓐᓇᕐᓂᕐᒧᑦ.
ᐅᖃᖅᖢᓂ ᖃᑉᓗᓈᑎᑐᒡᒎᖅ ᑎᑎᕋᖅᑕᐅᓯᒪᓂᖓ ᐱᒻᒪᕆᐅᓂᖅᐹᖑᖃᑕᐅᔪᖅ ᑐᑭᖃᑦᑕᐅᑎᓂᒃᑯᑦ.
“ᑎᑎᕋᖅᓯᒪᓂᖓ ‘do’ ᑕᐃᒎᓯᖓᒍᑦ ᑐᑭᖃᕐᒪᑦ ᐃᓱᒪᒥᒃ ᐊᑐᕆᐊᖃᕐᓂᕐᒧᑦ ᖃᐅᔨᒪᓂᐊᕐᓗᓂ ᖃᖓ taekwon-do ᐊᑐᖅᑕᐅᓇᔭᕐᒪᖔᑦ, ᐃᖕᒥᓂᒃ ᓴᐳᓐᓂᐊᕐᓂᕐᒧᑦ ᐃᓚᒥᓂᒡᓗ – ᐱᑦᑎᐊᙱᓐᓇᓱᖕᓂᕐᒧᑐᐃᓐᓇᐅᙱᑦᑐᖅ ᐸᒡᕕᓵᕈᑕᐅᓂᒃᑰᙱᑦᑐᖅ ᐃᓅᖄᑎᒧᑦ.
“ᖃᐅᔨᖃᑦᑕᖅᓯᒪᒐᒪ ᓄᑕᖅᑲᑦ ᐱᕕᒃᓴᖃᖅᑎᑕᐅᔭᕌᖓᑕ ᑐᑭᖅᓯᔪᓐᓇᕐᓂᒃᑯᑦ ᑑᖅᓯᔪᓐᓇᕐᓂᒃᑯᑦ ᐃᓕᓐᓂᐊᕈᑎᒃᑯᑦ ᑐᕌᖓᑎᓪᓗᒍ ᐋᖅᑭᒃᓱᖅᑕᐅᓯᒪᔪᒃᑯᑦ, ᑕᐃᒪᐃᓕᐅᖅᑎᑕᐅᒐᔪᓕᕌᖓᒥᒃ ᑕᐃᒪᐃᓕᐅᑐᐃᓐᓇᕋᓱᒍᓐᓇᐃᓪᓕᓲᑦ ᓯᓚᑖᒍᑦ.
“ᑕᐃᒪᐃᓕᐅᕈᒪᓂᓂ ᓄᖑᓲᑦ ᐃᓕᓐᓂᐊᖅᑎᑕᐅᑎᓪᓗᒋᑦ. ᑕᒪᓐᓇ ᐃᑲᔫᑕᐅᑦᑎᐊᕋᓱᒋᖃᑦᑕᖅᑕᕋ.”