ᑕᐃᒪᙵᓂᑦ 2019-ᒥᑦ, ᐃᓄᐃᑦ ᐅᖃᐅᓯᖓᓄᑦ ᐊᒻᒪᓗ ᐱᖅᖁᓯᕐᒧᑦ ᑐᕌᖓᔪᖅ ᑐᓂᐅᖅᖃᐃᖃᑦᑕᖅᓯᒪᓕᖅᑐᖅ ᐅᖃᐅᓯᕐᒧᑦ ᐱᖅᖁᓯᕆᔭᐅᔪᒧᑦ ᑮᓇᐅᔭᓂᒃ ᐊᒻᒪᓗ ᐃᑲᔪᖃᑦᑕᕐᓗᑎᒃ ᐊᐅᓚᑦᑎᔨᐅᔪᓂᒃ, ᓲᕐᓗ ᐊᐃᐲᓰᒃᑯᓐᓂᑦ, ᐱᓕᕆᐊᕆᔭᖏᓐᓄᑦ ᐊᓯᐅᔨᑦᑕᐃᓕᓂᕐᒥᒃ ᐊᒻᒪᓗ ᐊᖏᒡᓕᒋᐊᕐᓗᒋᑦ ᐃᓄᐃᑦ ᐅᖃᐅᓯᖏᓐᓂᒃ ᐱᔨᑦᑎᕋᐅᑏᑦ.
ᑭᓯᐊᓂ, ᐊᑯᓪᓕᕈᕐᕕᖕᒥᑦ, ᒐᕙᒪᑐᖃᒃᑯᑦ ᑲᓇᑕᒥᑦ ᐃᑦᑕᕐᓂᑕᓕᕆᔨᒃᑯᖏᑦ ᑐᓴᖅᑎᑦᑎᓚᐅᖅᑐᑦ ᓄᑖᒥᒃ ᑮᓇᐅᔭᖃᖅᑎᑦᑎᓂᕐᒧᑦ ᐊᑐᖅᑕᐅᔪᒥᒃ ᑮᓇᐅᔭᓗᒃᑖᑦ ᐃᑲᔪᖅᑐᐃᔪᑦ ᐃᓄᐃᑦ ᐅᖃᐅᓯᖓᓂᒃ ᑐᓂᐅᖅᖃᐅᑕᐅᖔᕐᓗᑎᒃ ᓄᓇᑖᕐᓂᕐᒧᑦ ᐊᐅᓚᑦᑎᔨᐅᔪᓄᑦ.
“ᐊᐃᐲᓰᒃᑯᑦ ᑲᑎᒪᔨᖏᑦ ᐃᓱᒫᓘᑎᖃᖅᑐᑦ ᐊᓯᐊᙳᖅᑐᒥᑦ ᐅᖃᐅᓯᓕᕆᓂᕐᒥᒃ ᐱᓕᕆᐊᖃᕐᓂᕐᒧᑦ ᑐᒃᓯᕋᐅᓯᐅᖅᑐᖃᕐᓂᐊᕐᒪᑦ ᓱᓕ ᓇᓕᑐᐃᓐᓇᖏᓐᓂᑦ ᐃᓄᐃᑦ ᓄᓇᑖᕐᓂᕐᒧᑦ ᐊᐅᓚᑦᑎᔨᐅᔪᓂᑦ… ᐊᒻᒪᓗ, ᑕᒪᓗᒃᑖᕐᓚᒃ ᓄᓇᑖᖅᓯᒪᓂᕐᒧᑦ ᐊᐅᓚᑦᑎᔨᐅᔪᑦ ᐱᔾᔪᑕᐅᔪᒥᒃ ᐱᓕᕆᐊᒃᓴᖃᙱᑦᑐᑦ ᐱᔾᔪᑎᖃᖅᑐᓂᒃ ᐅᖃᐅᓯᕐᒥᒃ ᐸᐸᑦᑎᓂᕐᒧᑦ ᐅᕝᕙᓘᓐᓃᑦ ᐱᓕᕆᔨᐅᔪᑦ ᑕᒪᑐᒥᙵᑦ ᐱᓕᕆᐊᖃᕐᓂᐊᕐᓗᑎᒃ.” ᐃᖃᓗᖕᓃᑦᑐᖅ ᐊᐃᐲᓰᒃᑯᑦ ᐅᖃᖅᑐᑦ ᐅᑭᐅᓖᑦ 19-ᒥᑦ.
ᐊᐃᐲᓰᒃᑯᑦ ᓈᒻᒪᒃᓴᓚᐅᖏᒻᒥᔪᑦ ᐱᑕᖃᙱᓐᓂᖓ ᑕᑯᒃᓴᐅᔪᒃᑯᑦ ᐃᓱᒪᓕᐅᕈᑕᐅᔪᒥᑦ, ᐅᖃᖅᖢᑎᒃ ᐃᓚᖏᑦ ᐃᓄᐃᑦ ᐱᖃᖃᑕᐅᔪᑦ ᐃᓚᐅᑎᑕᐅᓚᐅᖏᒻᒪᑕ ᐃᓱᒪᓕᐅᕆᓂᕐᒥᑦ.
“ᐃᓱᒫᓘᑎᖃᖅᑐᒍᑦ ᓄᑖᖅ ᐋᖅᕿᐅᒪᔪᖅ ᐊᑐᓕᖅᑕᐅᓂᖓ ᐅᖃᖃᑎᖃᓚᐅᖏᖦᖢᑎᒃ ᐃᓄᖕᓂᑦ ᓄᓇᑖᖃᑕᐅᓯᒪᔪᓂᒃ, ᐊᒻᒪᓗ ᐱᔪᑎᖃᖅᑐᖅ ᐱᒻᒪᕆᐅᓛᖑᔪᒧᑦ ᐱᖅᖁᓯᕆᔭᑉᑎᖕᓄᑦ: ᐅᖃᐅᓯᖅ,” ᐅᖃᖅᑐᖅ ᐋᑕᒥ ᐃᑦᑐᐊᑦᓯᐊᖅ, ᐃᒃᓯᕙᐅᑕᐅᑉ ᑐᖏᓕᖓ ᐊᐃᐲᓰᒃᑯᑦ ᑲᑎᒪᔨᖏᓐᓄᑦ.
“ᐃᓄᒃᑎᑐᑦ ᐱᓕᕆᐊᖑᓂᖓ, ᐆᒻᒪᖅᑎᑕᐅᒃᑲᓐᓂᕐᓂᖅ ᐊᒻᒪᓗ ᐅᑎᖅᑎᑕᐅᓂᖓ - ᐊᐃᐲᓰᒃᑯᑦ ᐊᑐᖅᓯᒪᓕᖅᑕᖓᑦ 40 ᐅᑭᐅᑦ ᐅᖓᑖᓄᑦ ᐃᓄᒃᑎᑐᑦ ᐅᖃᐅᓯᕐᒧᑦ ᑐᕌᖓᔪᑉᑎᒍᑦ ᓯᕗᓪᓕᕐᒥᑦ ᑕᑯᒃᓴᐅᖅᖃᐅᑕᐅᖃᑦᑕᓚᐅᖅᑐᖅ TVNC-ᑯᑦ ᐊᒻᒪᓗ ᐅᑉᓗᒥ APTN-ᑰᓪᓕᖅᑐᖅ, ᐊᒻᒪᓗ ᒫᓐᓇᓵᖑᓕᖅᑐᒥᑦ ᖃᕆᑕᐅᔭᒃᑯᑦ ᐊᒻᒪᓗ ᐃᓄᐃᑦ ᐱᔪᖕᓇᕐᓂᖅᓴᐅᓕᕐᓂᖏᓐᓄᑦ ᐊᒥᓱᑲᓪᓚᐃᑦ ᑲᑎᑕᐅᓯᒪᔪᑦ ᑐᖅᖁᖅᓯᒪᔭᑉᑎᖕᓂᑦ.” ᐅᖃᓕᒫᖅᑐᖅ ᐊᐃᐲᓰᒃᑯᑦ ᑭᐅᔭᖓᓂᒃ ᑲᓇᑕᒥᑦ ᐃᑦᑕᕐᓂᑕᓕᕆᔨᒃᑯᓐᓄᑦ. “ᑲᔪᓯᑎᑦᑎᓂᖅ ᖁᕕᐊᓲᑎᖃᕐᓂᕐᒥᒃ ᐊᒻᒪᓗ ᓴᖅᕿᔮᖅᑎᑕᐅᓂᖏᑦ ᐃᓄᒃᑎᑐᑦ ᐅᖃᐅᓯᖅ, ᐊᒻᒪᓗ ᐃᓄᐃᑦ ᐱᖅᖁᓯᖓᑦ ᐊᒻᒪᓗ ᐱᒻᒪᕆᐅᒋᔭᐅᔪᑦ ᑭᑐᑐᐃᓐᓇᓄᑦ ᐱᔭᐅᔪᖕᓇᕐᓂᖏᑦᑎᒍᑦ ᐊᐃᐲᓰᒃᑯᓐᓂᑦ ᑐᖅᖁᖅᑕᐅᓯᒪᔪᑦ ᐱᑕᖃᕆᐊᖃᖅᑐᖅ.”
ᒪᓃᑦᑐᖅ ᑖᒻᑉᓴᓐ, ᐊᐃᐲᓰᒃᑯᑦ ᐊᖓᔪᖅᖄᖓᑦ, ᐃᓚᓯᔪᖅ, “ᓄᓇᕗᑦ ᑐᙵᕕᒃᑯᑦ ᑐᕌᖓᔪᒧᑦ ᑮᓇᐅᔭᖅ ᐱᓂᐊᖅᑕᖓᑦ, ᐱᔭᕆᐊᖃᖅᑎᑕᐅᖏᑦᑐᑦ ᐱᓂᐊᕐᓗᒍ ᐊᒻᒪᓗ ᐱᓕᕆᐊᕆᓗᒍ. ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒥᑦ ᐱᔭᕆᐊᖃᖅᑎᑕᐅᖏᑦᑐᑦ. (ᓄᓇᕗᒻᒥ ᒐᕙᒪᒃᑯᑦ) ᐱᖅᖁᓯᕆᔭᐅᔪᓄᑦ ᐊᒻᒪᓗ ᐅᖃᐅᓯᕐᒧᑦ ᒥᓂᔅᑕ ᑕᒪᑐᒧᖓ ᐅᖃᕈᖕᓇᕆᐊᕆᐊᖃᖅᑐᖅ.
“ᒐᕙᒪᑐᖃᒃᑯᑦ ᑲᒪᒋᔭᖓᑦ ᓄᓇᑖᖅᓯᒪᓂᖅ ᐃᖅᕿᓖᑦ ᑲᑎᒪᔨᖏᑦᑎᑐᑦ. ᓄᓇᕗᒻᒥᑦ, ᑮᓇᐅᔭᖃᖅᑎᑦᑎᓂᖅ ᐅᖃᐅᓯᕐᒧᑦ, ᐋᓐᓂᐊᖃᖅᑕᐃᓕᒪᓂᕐᒧᑦ ᐊᒻᒪᓗ, ᐃᓱᒪᔪᖓ, ᖃᑯᒍᑦᑎᐊᖑᓂᐊᖅᑐᖅ ᐃᓕᓐᓂᐊᖅᑐᓕᕆᓂᕐᒧᑦ ᐃᓚᖓᒍᑦ ᓄᓇᑖᖅᓯᒪᓂᒃᑰᖅᑎᑕᐅᔪᖅ. ᐅᒃᐱᕆᔭᕋ (ᐅᑭᐅᖅᑕᖅᑐᒥᑦ) ᒐᕙᒪᒃᑯᑦ ᐅᖃᖃᑕᐅᓯᒪᙱᒻᒪᑕ ᐃᓄᐃᑦ ᐱᓕᕆᖃᑎᒋᔭᐅᔪᓄᑦ ᐊᒻᒪᓗ ᒐᕙᒪᑐᖃᒃᑯᑦ ᒥᓂᔅᑕᖏᓐᓄᑦ.”
ᐊᒻᒪᓗ ᐊᑯᓪᓕᕈᕐᕕᖕᒥᑦ, ᐊᐃᐲᓰᒃᑯᑦ ᑭᐅᓚᐅᖅᑐᑦ ᖃᐅᔨᒃᑲᐃᔪᖅ ᑎᑎᕋᖅᑕᐅᔪᖅ ᑲᓇᑕᒥᑦ ᐃᑦᑕᕐᓂᑕᓕᕆᔨᒃᑯᓐᓂᑦ ᐊᐱᖅᓱᖅᑐᑦ ᓇᓗᓇᐃᔭᖅᓯᒪᔪᓂᒃ ᕿᑎᕈᔪᐊᓂᑦ ᐅᑭᐅᕐᒥᑦ ᐊᓯᐊᙳᖅᑐᒥᑦ, ᐊᒻᒪᓗ ᐊᓯᖏᓐᓂᒃ ᐊᐱᕈᑉᓗᑎᒃ, ᐅᖃᖅᖢᓂ ᒐᕙᒪᑐᖃᒃᑯᑦ ᑭᐅᓚᐅᖏᒻᒪᑕ ᑭᖑᓂᐊᒍᑦ ᑎᑎᕋᖅᑕᐅᔪᖅ ᐅᑉᓗᕐᒥᑦ ᐅᑭᐅᓖᑦ 16-ᒥᑦ. ᑭᐅᔾᔪᑕᐅᔪᖅ ᒪᕐᕈᐃᓐᓇᐅᓚᐅᖅᑐᑦ ᑎᑎᕋᖅᓯᒪᔪᑦ ᑲᑎᒪᑉᓗᑎᒃ.
“2023-2024-ᒧᑦ, (ᑲᓇᑕᒥᑦ ᐃᑦᑕᕐᓂᑕᓕᕆᔨᒃᑯ) ᐊᓯᐊᓄᐊᖅᐸᓪᓕᐊᓂᐊᖅᑐᑦ ᓄᑖᒧᑦ ᑮᓇᐅᔭᖃᖅᑎᑦᑎᓂᕐᒥᒃ ᐊᑐᖅᑕᖓᓂᑦ ᐃᑲᔪᕐᓂᐊᕐᓗᓂ ᐃᓄᒃᑎᑐᑦ ᐅᖃᐅᓯᕐᒥᑦ ᐱᓕᕆᐊᖑᓂᖓᓄᑦ, ᐆᒻᒪᒃᑲᓐᓂᖅᑎᑕᐅᓂᖓᓄᑦ, ᐊᒻᒪᓗ ᐅᑎᖅᑎᑦᑎᓂᕐᒧᑦ,” ᐅᖃᖅᓯᒪᔪᖅ ᑎᑎᖅᖃᒥᑦ, ᐊᑎᓕᐅᖅᑕᐅᓚᐅᖅᑐᖅ ᐊᖏᔪᖅᖄᖅ ᐸᐅᓕ ᐱᓚᑎᐄ-ᒧᑦ (Paul Pelletier).
ᐅᖃᖅᓯᒪᑉᓗᓂ ᓇᓗᓇᐃᕐᓂᐊᕐᓗᒍ ᑐᓴᖅᑎᑦᑎᔾᔪᑕᐅᕌᓂᓚᐅᖅᑐᖅ ᐱᓂᐊᕐᓂᕆᔭᖏᓐᓂᑦ ᑲᓇᑕᒥᑦ ᐃᑦᑕᕐᓂᑕᓕᕆᔨᒃᑯᑦ ᑐᓂᐅᖅᖃᐅᑎᒋᓂᐊᕐᓗᒍ ᑮᓇᐅᔭᖃᖅᑎᑦᑎᓂᖅ ᓄᓇᖃᖅᖄᖅᑐᑦ ᓄᓇᑖᖅᓯᒪᕐᓂᕐᒧᑦ ᐊᐅᓚᑦᑎᔨᐅᔪᓄᑦ.
ᐊᐱᕆᔭᐅᖕᒪᑕ ᓇᓗᓇᐃᖅᓯᖁᔭᐅᑉᓗᑎᒃ, ᐊᐃᐲᓰᒃᑯᑦ ᐊᐱᖅᖁᑎᖏᓐᓄᑦ, ᐃᑦᑕᕐᓂᑕᓕᕆᔨᒃᑯᑦ ᑭᑐᑐᐃᓐᓇᓄᑦ ᑲᒪᔨᖏᑦ ᐊᐅᓪᓚᖅᑎᑦᑎᓚᐅᖅᑐᑦ ᑭᐅᔭᖓᓐᓂᒃ ᓄᓇᑦᑎᐊᕐᒥᑦ ᑐᓴᒐᒃᓴᓕᕆᔨᒃᑯᓐᓄᑦ:
“ᑲᓇᑕᒥᑦ ᒐᕙᒪᒃᑯᑦ ᐊᑐᕐᓂᐊᖅᑐᑦ ᓄᓇᖃᖅᖄᖅᑐᑦ ᐅᖃᐅᓯᖓᓄᑦ ᐱᖁᔭᕐᒥᑦ ᐱᓕᕆᖃᑎᒋᓗᒋᑦ ᐃᖅᕿᓖᑦ ᓄᓇᖅᖃᑎᒌᑦ, ᐃᓄᐃᑦ ᐊᒻᒪᓗ ᒦᑏ… ᐅᑭᐅᕆᔭᐅᔪᒥᑦ, ᐅᑯᐊ ᐊᐅᓚᑦᑎᔨᐅᔪᑦ ᑮᓇᐅᔭᖃᖅᑎᑕᐅᔪᒥᒃ ᐊᐅᓚᑦᑎᓂᐊᖅᑐᑦ ᒪᓕᒡᓗᒋᑦ ᐃᓄᖕᓄᑦ ᓯᕗᓪᓕᖅᐸᐅᑎᔭᐅᔪᒪᔪᑦ, ᖃᓄᖅᑑᕈᑏᑦ, ᐊᒻᒪᓗ ᖃᓄᐃᓕᐅᕈᑕᐅᔪᑦ ᐃᑲᔪᖅᑐᑦ ᐃᓄᒃᑎᑐᑦ ᐅᖃᐅᓯᕐᒥᑦ:
-ᐃᓄᕕᐊᓗᐃᑦ ᐊᐅᓚᑦᑎᔩᑦ: ᑭᒡᒐᖅᑐᐃᔪᑦ ᐃᓄᕕᐊᓗᐃᑦ ᓄᓇᖃᕐᕕᖓᓐᓂᑦ ᓄᓇᑦᑎᐊᕐᒥᑦ
-ᒪᑭᕝᕕᒃ: ᐊᐅᓚᑦᑎᔨᐅᔪᖅ ᑭᒡᒐᖅᑐᐃᑉᓗᑎᒃ ᐃᓄᖏᓐᓂᑦ ᓄᓇᕕᖕᒥᑦ ᑯᐸᐃᒃᒥᑦ
-ᓄᓇᑦᓯᐊᕗᑦ ᒐᕙᒪᒃᑯᑦ: ᐃᓂᐅᔪᒥᑦ ᓄᓇᑦᓯᐊᕗᑦ ᒐᕙᒪᒃᑯᖏᑦ ᓂᐅᕙᓐᓛᓐᒥᑦ ᐊᒻᒪᓗ ᓛᐳᕋᑐᐊᒥᑦ
-ᓄᓇᕗᑦ ᑐᙵᕕᒃᑯᑦ: ᐊᐅᓚᑦᑎᔨᐅᔪᑦ ᑭᒡᒐᖅᑐᐃᑉᓗᑎᒃ ᐃᓄᖕᓂᑦ ᓄᓇᕗᒻᒥᑦ
ᐃᓄᐃᑦ ᐊᐅᓚᑦᑎᔩᑦ ᐱᓕᕆᐊᖃᕈᒪᔪᑦ ᐃᓄᒃᑎᑐᑦ ᐅᖃᐅᓯᓕᕆᓂᕐᒥᒃ, ᐆᒻᒪᖅᑎᑦᑎᓂᕐᒥᒃ ᐊᒻᒪᓗ ᐅᑎᖅᑎᑦᑎᓂᕐᒥᒃ ᖃᐅᔨᒋᐊᖁᔭᐅᔪᑦ ᐊᐅᓚᑦᑎᔨᐅᔪᒥᒃ ᓇᓕᒨᖓᑦᑎᐊᓛᖑᔪᒥᒃ ᓱᓕᓂᕆᔭᖏᓐᓄᑦ… ᐊᑐᖅᑕᐅᔪᖅ ᐊᔾᔨᒋᔭᖓ ᓄᓇᖃᖅᖄᖅᑐᑦ ᐅᖃᐅᓯᖓᓄᑦ ᐱᖁᔭᕐᒥᑦ, ᐃᓕᑕᖅᓯᓯᒪᑉᓗᓂ ᓄᓇᖃᖅᖄᖅᑐᑦ ᐃᓄᐃᑦ ᐋᖅᕿᐅᒪᓛᖑᔪᑦ ᓯᕗᓕᐅᖅᑎᐅᓂᕐᒥᒃ ᐱᓕᕆᐊᕆᓂᐊᕐᓗᒍ ᐅᑎᖅᑎᑦᑎᓂᕐᒧᑦ, ᐆᒻᒪᒃᑲᓐᓂᖅᑎᑦᑎᓂᕐᒧᑦ, ᐊᒻᒪᓗ ᐱᓕᕆᐊᖃᕐᓂᕐᒥᒃ ᐊᒻᒪᓗ ᓴᙱᒃᑎᑎᕆᓂᕐᒥᒃ ᐅᖃᐅᓯᖏᓐᓂᑦ.”
ᖃᐅᔨᒋᐊᕐᕕᖕᒪᑕ ᐅᖃᐅᓯᒃᓴᖃᕐᒪᖔᑕ, ᓄᓇᕗᑦ ᑐᙵᕕᒃᑯᑦ ᑭᐅᓚᐅᖏᑦᑐᑦ.
ᐊᐃᐲᓰᒃᑯᓐᓄᑦ ᐅᖃᓪᓚᒃᑎ ᑭᐅᕆᓐ ᐳᕋᓐᑎᔅ (Karen Prentice) ᐅᖃᐅᑎᓚᐅᖅᑕᖏᑦ ᓄᓇᑦᑎᐊᕐᒥᑦ ᑐᓴᒐᒃᓴᓕᕆᔨᒃᑯᑦ, “ᐊᐃᐲᓰᒃᑯᑦ ᖃᓄᐃᒃᓴᙱᑦᑐᑦ ᒐᕙᒪᑐᖃᒃᑯᑦ ᐅᖃᐅᓯᕐᒧᑦ ᑮᓇᐅᔭᓂᒃ ᐃᓄᐃᑦ ᓄᓇᑖᖅᓯᒪᓂᕐᒧᑦ ᐊᐅᓚᑦᑎᔨᓄᐊᖅᓯᓂᖏᑦ ᓄᑖᖑᔪᒧᑦ ᐅᖃᐅᓯᕐᒧᑦ ᐊᑐᖅᑕᐅᔪᒥᑦ. ᐃᓱᒫᓘᑎᒋᔭᕗᑦ, ᐊᐅᓚᑦᑎᔨᐅᔪᑦ ᖃᐅᑕᒫᒃᑯᑦ ᐱᓕᕆᐊᖃᓕᐊᓂᓚᐅᖅᑐᑦ ᑕᒪᑐᒥᙵᑦ ᖃᐅᔨᒪᙱᓕᖅᑐᑦ ᖃᓄᖅ ᑐᒃᓯᕋᐅᓯᐅᕆᐊᒃᓴᖅ ᑮᓇᐅᔭᒧᑦ, ᓄᑖᖅ ᐊᑐᖅᑕᐅᔪᖅ ᖃᓄᖅ ᐊᔪᙱᓐᓂᐊᕐᒪᖔᑦ, ᐊᒻᒪᓗ ᖃᓄᖅ ᐊᖏᑎᒋᔪᒥᒃ ᑮᓇᐅᔭᖃᖅᑎᑕᐅᓂᖅ ᒪᓂᒪᓂᐊᕐᒪᖔᑦ. ᐊᒻᒪᓗ, ᐅᖃᖅᓯᒪᓂᖓᑐᑦ ᑐᓴᒐᒃᓴᒥᑦ, ᐅᑭᐅᕆᔭᐅᔪᒥᑦ 7 ᑕᖅᕿᓃᓕᐊᓂᒃᑐᒍᑦ ᐊᒻᒪᓗ ᑐᒃᓯᕋᐅᓯᐅᖁᔨᓚᐅᖏᑦᑐᑦ ᓱᓕ.