ᑐᓐᖓᓱᒋᑦᓯ ᕿᑭᖅᑕᖓᓪᓗᑦ ᑭᓪᓕᓂᕐᒥᐅᑦ, ᐃᓄᐃᓐᓇᐃᑦ ᓄᓇᖓᑦ.
ᐃᖃᓗᒃᑑᑦᓯᐊᖅ ᓄᓇᒥᐅᑕᖓᓗ ᐆᓇᖅᓯᔪᒻᒪᕆᐅᖃᑦᑕᖅᐳᑦ ᐱᓇᓱᐊᕈᓯᐅᓚᐅᖅᑐᒥ, 24–ᒻᒪᕆᐅᓚᐅᖅᖢᓂ.
ᐆᓇᖅᑐᒻᒪᕆᐅᓚᐅᖅᐳᖅ, ᐊᒥᓱᑦ ᓄᓇᓕᖕᓂᒥᐅᑦ ᖃᓄᑐᐃᓐᓇᖅ ᐅᑭᐅᖃᖅᑐᑦ ᑕᕆᐅᒧᑦ ᐃᒫᖃᑦᑕᓚᐅᖅᐳᑦ ᐆᓇᓗᐊᕐᓂᖓᓄᑦ.
ᐃᖃᓗᒃᑑᑦᓯᐊᒥ ᓯᐅᕋᑦᓯᐊᕙᖃᖅᑐᒥᒃ ᓯᒡᔭᖃᖅᐳᑦ ᑕᐃᑲᓂ Long Point–ᒥ ᑕᐃᑲᓂᓗ Gravel Pit–ᒥ. ᐳᐃᔾᔪᕋᕆᐊᖅᑐᕐᕕᐅᖃᑦᑕᕐᒥᔪᖅ ᑕᐃᑲᓂ ᑰᒐᓛᒥ ᑰᖓᑕᓗ ᐃᑳᕐᕕᖓᓂ.
ᕿᒃᑐᕆᐊᖃᖃᑦᑕᖅᐳᖅ ᓯᓚ ᐆᓇᖅᑎᓪᓗᒍ. ᖃᑦᓯᑲᓪᓚᓂᒃ ᐅᓪᓗᓂᒃ ᒪᖁᖃᑦᑕᓚᐅᕐᒪᑦ ᐊᓄᕆᓪᓗᓂᓗ ᐊᑲᐅᓯᓚᐅᖅᐳᖅ ᐊᒥᓱᑦ ᐃᓄᐃᑦ. ᓯᑯᖃᖏᓕᖅᖢᓂᓗ ᑕᕆᐅᒥ, ᖃᔭᕆᐊᖅᑐᖅᑎᓪᓗ ᑐᒃᑐᓯᐅᖃᑦᑕᖅᖢᑎᒃ ᓄᓇᒧᑦ ᐸᐅᕐᙵᖅᑕᕆᐊᖅᖢᑎᒡᓗ. ᐊᖏᕐᕋᐅᓕᖅᖢᑎᒡᓗ ᖁᕕᐊᓱᑦᓯᐊᖅᐸᒃᖢᑎᒡᓗ ᐊᖏᕐᕋᑕᐃᓐᓇᕌᖓᒥᒃ! ᖃᐅᔨᒪᑦᓯᐊᖅᐳᖓᓗ ᖃᓄᐃᓕᖓᓐᓇᕐᒪᖔᑦ ᐊᖏᕐᕋᑕᐃᓐᓇᖅᖢᓂ.
ᐃᓄᐃᑦ ᑕᒪᕐᒥᒃ ᖁᕕᐊᓱᒃᑐᒃᓴᐅᕗᑦ ᐅᓗᕆᐊᓇᖅᑐᒦᙱᖦᖢᑎᒡᓗ ᑕᐃᑲᓂ ᐸᐃ ᓴᐃᒨᒥ ᕿᖓᐅᒥᓗ.
ᖁᕕᐊᓱᖕᓂᐊᖅᐳᓯ ᓄᓇᒥ ᐊᔾᔨᐅᖏᑦᑐᒥ ᐱᕈᖅᓯᒪᔪᓂᒥᐅᑕᐅᓪᓗᓂ.
ᐊᖑᓇᓱᐊᖅᑎᑦ ᑐᒃᑐᓯᒪᓚᐅᖅᐳᑦ ᑕᐃᑲᙵᑦ Lyall's Cove–ᒥᑦ, ᐃᖃᓗᒃᑑᑦᓯᐊᑉ ᓴᓂᐊᓂ ᑐᒃᑐᑕᖃᓗᐊᓱᐃᑦᑑᓕᕋᓗᐊᖅᑎᓪᓗᒍ. ᑐᒃᑐᑐᕈᒪᓪᓚᕆᖕᓇᖅᐳᑦ ᓂᒃᑯᓕᐅᕐᓗᓂᓗ.
ᓇᓄᐃᑦ ᑕᑯᔭᐅᓚᐅᕆᓪᓗᑎᒃ ᑕᐃᑲᓂ Long Point–ᒥ ᐱᓇᓱᐊᕈᓯᐅᑉ ᓄᙳᐊᓂ, ᒪᕐᕈᖕᓂᒃ ᐊᑎᖅᑕᓕᒃ. ᐅᐊᖕᓇᖅᐸᓯᖕᒧᙵᐅᓚᐅᖅᐳᑦ ᓂᐱᖃᖏᓐᓂᖅᓴᐅᖕᒪᑦ ᐃᓄᖃᖏᓐᓂᖅᓴᐅᓪᓗᓂᓗ. ᐅᓗᕆᐊᓇᖅᑐᒦᑦᑕᐃᓕᒋᑦᓯ ᓄᓇᒥ.
ᐊᖅᑯᑎᕗᑦ ᓄᓇᑦᑎᓐᓂ ᐳᔪᒻᒪᕆᐅᖃᑦᑕᕐᒪᑕ ᐊᕐᕌᒍᑕᒫᑦ ᐊᒻᒪ ᑐᓴᖅᑎᑕᐅᓚᖅᐳᒍᑦ ᐳᔪᓗᐊᖅᑕᐃᓕᒍᑎᓂᒃ ᐱᓕᕆᐊᖃᕐᓂᐊᕐᒪᑕ ᐊᖅᑯᑎᑦᑎᓐᓂ. ᒫᓐᓇᐅᓂᖓᓂ ᐃᒥᖅᑕᐅᑎᑦ ᐃᒻᒥᖅᑐᐃᖃᑦᑕᖅᐳᑦ ᒪᖁᓚᐅᖅᑎᓪᓗᒍ ᐃᑲᔪᕐᓂᐊᖅᖢᓂᓗ ᑕᒪᓐᓇ.
ᒪᖁᖕᓂᐊᖅᑎᓪᓗᒍ ᑲᓪᓗᖕᓂᐊᖅᑎᓪᓗᒍᓗ ᖃᐅᒻᒪᓪᓛᓗᓂᓗ ᐅᖅᑰᓂᐊᖅᐳᖅ. ᐱᓇᓱᐊᕈᓯᐅᑉ ᓄᙳᐊᓂ ᐃᖃᓗᒃᑑᑦᓯᐊᒥᐅᑦ ᑲᓪᓗᒃᐸᓗᖃᑦᑕᓚᐅᖅᐳᑦ ᖃᐅᒻᒪᓪᓛᓪᓗᓂᓗ ᒪᖁᒃᑐᒻᒪᕆᐅᓚᐅᖅᖢᓂᓗ, ᖁᕕᐊᓇᓚᐅᖅᐳᖅ ᑕᐅᑐᒃᖢᒍ. ᑕᑯᕋᓐᓂᖅᑐᖅᓯᐅᓚᐅᖅᐳᑦ ᐊᐅᓪᓛᖅᓯᒪᔪᑦ.
ᐃᓕᓐᓂᐊᕆᐊᕐᓂᐊᓕᖅᐳᑦ ᐊᐅᒐᓯ 20, 2020–ᒥ ᑕᒡᕙᓂ ᐃᖃᓗᒃᑑᑦᓯᐊᒥ, ᓄᓇᕗᑦ ᓂᕆᐅᒃᐳᒍᓪᓗ ᓄᑕᖅᑲᑦ ᐅᑎᑦᓯᐊᕈᓐᓇᖁᓪᓗᒋᑦ ᓯᓂᑦᓯᐊᖃᑦᑕᕐᓗᑎᒡᓗ ᐃᑲᕐᕋᓂ ᓯᓂᒋᐊᖃᓕᕌᖓᒥᒃ ᐃᓕᓐᓂᐊᕆᐊᖃᑦᑕᕐᓂᐊᕐᒪᑕ 8:45ᐅᓪᓛᒃᑯᑦ. ᐱᓕᕆᑦᑎᐊᕐᓂᐊᖅᐳᓯ ᓄᑕᖅᑲᑦ ᑕᒪᕐᒥᒃ ᐅᑎᕐᓂᐊᓕᕐᒥᔪᑦ ᐃᓕᓐᓂᐊᕐᕕᖕᒧᑦ, ᖃᒪᑦᓯᐊᕐᓂᐊᖅᐳᓯ ᐅᓗᕆᐊᓇᖅᑐᒦᑦᑕᐃᓕᓗᓯᓗ.
ᐅᒥᐊᖅᑐᕐᓗᓯ ᐅᓗᕆᐊᓇᖅᑐᒦᑦᑕᐃᓕᒋᑦᓯ ᐊᐅᓪᓛᖅᓯᒪᓗᓯᓗ ᐸᐅᕐᙵᖅᑕᕆᐊᖅᓯᒪᓗᓯᓗ.