ᖃᔅᓯᐊᕐᔪᖕᓂ ᐊᑲᐅᙱᓕᐅᕈᑕᐅᔪᓂ ᐅᖃᐅᓯᕆᓚᐅᖅᑕᓐᓂ ᐊᖕᒪᓗᖅᓯᓯᒪᓂᕐᒧᑦ ᓇᓕᒧᓕᖅᑎᑦᑎᓯᒪᓂᕐᒧᑦ. ᐅᓇ ᐃᒃᐱᒍᓱᖕᓂᐅᔪᖅ ᓇᓕᒧᓕᖅᑎᑦᑎᓯᒪᓂᕐᒧᑦ ᕿᓚᒥᐊᓗᒃ ᐊᔭᐅᕆᔭᐅᓲᖑᕗᖅ ᖃᓄᐃᓐᓂᐅᔪᓄᑦ ᐊᒻᒪ ᖃᓄᐃᓕᖓᓂᐅᓂᐅᔪᓂ.
ᐱᓕᕆᑎᓪᓗᑕ ᐃᓚᐅᖃᑕᐅᓂᕆᔭᑦᑎᓐᓂ ᐊᒻᒪ ᑭᒡᓕᖃᖅᑎᑕᐅᔪᓂ ᐃᓅᖃᑎᒌᖑᔪᓄᑦ ᖃᓄᐃᓐᓂᐅᔪᓄᑦ ᑭᓱᑐᐃᓐᓇᒧᑦ ᐃᖅᑲᐃᓂᕐᓗᒃᑎᑦᑎᔪᓐᓇᖅᐳᖅ ᐊᒻᒪᓗ ᐊᐅᓚᑦᑎᔪᓐᓇᐃᓪᓕᔫᔮᖅᖢᑕ. ᐅᓇ ᐃᓅᓪᓗᑕ ᐃᓕᖅᑯᓯᕆᔭᕗᑦ ᐊᒻᒪᓗ ᐱᔪᓐᓇᖅᑎᑦᑕᕆᐊᖃᖅᐸᕗᑦ ᑕᐃᒪᐃᓐᓂᖓᓄᑦ ᑭᓯᐊᓂ ᓱᒃᑲᔪᒥᒃ ᑲᒪᒋᑲᐅᖅᑐᕆᐊᖃᖅᐸᕗᑦ ᐅᕝᕙᓘᓐᓃᑦ ᐊᓯᐅᔨᑦᑎᐊᒻᒪᕆᖕᓂᐊᖅᐸᕗᑦ ᐊᐅᓚᔪᓐᓇᕐᓂᑦᑎᓐᓂ. ᐃᓱᒪᕗᑦ ᐊᒻᒪ ᐱᔪᒪᓂᖅᐳᑦ ᓴᙱᕗᖅ ᑭᓯᐊᓂ ᑕᐅᑕᒃᑕᑐᐊᖃᑲᐃᓐᓇᕆᐊᖃᖅᐳᒍᑦ. ᐅᕙᓂ ᐋᖅᑭᒋᐊᖅᓯᓲᖑᕗᒍᑦ ᐃᓱᒪᓂᑦᑎᓐᓂ ᐊᒻᒪ ᐅᒃᐱᕆᔭᑦᑎᓐᓂ ᑐᙵᕕᒋᔭᑦᑎᓐᓂ ᓇᓕᒧᑎᑦᑎᓂᕐᒧᑦ ᑎᒥᒧᑦ ᐊᒻᒪ ᐃᓱᒪᒧᑦ ᐊᕙᓗᒋᔭᑦᑎᓐᓂ.
ᐃᓛᓐᓂᒃᑯᑦ ᐃᒃᓯᕚᑐᐃᓐᓇᕆᐊᖃᖅᐳᒍᑦ ᐊᒻᒪᓗ ᕿᒥᕐᕈᓗᑕ ᓇᒦᓐᓂᑦᑎᓐᓂ ᐊᒻᒪᓗ ᓇᒦᑦᑐᒪᓂᑦᑎᓐᓂ ... ᐃᖅᑲᐅᒪᓂᐅᔪᒥ ᐊᒻᒪᓗ ᐃᓱᒪᒃᓴᖅᓯᐅᒃᑲᓐᓂᕐᓂᕐᒥ ᐃᓱᒪᒋᔭᖃᕈᓯᑦᑎᓐᓂ. ᐃᓚᖏᑦ ᐊᑐᕐᓂᑯᕗᑦ ᐅᕙᑦᑎᓐᓂ ᑐᓂᓯᓯᒪᕗᑦ ᐃᓗᑐᔪᓂ ᕿᓕᕈᕐᓂ ᐊᒻᒪᓗ ᐃᖅᑲᐃᓂᕐᓗᒃᑎᑦᑎᓂᐅᔪᒥ ᓴᖅᑭᑦᑐᖃᕌᖓᑦ ᒪᑐᐃᖅᓯᒃᑲᓐᓂᓲᖑᕗᖅ ᐋᓐᓂᕐᓂᑰᔪᓂ ᐊᒻᒪᓗ ᐋᓐᓂᐊᕐᓂᖅ ᐅᑎᖅᐳᖅ. ᑕᐃᒪᐃᒐᔪᓗᐊᖅᑐᒥ ᑕᐃᑲᓃᑐᐃᓐᓇᓲᖑᕗᒍᑦ ᐊᒻᒪ ᐅᒡᒐᖅᓱᖅᖢᑕ ᐱᓕᕆᑐᐃᓐᓇᕆᐊᖃᖅᑎᓪᓗᑕ ᐅᖃᓪᓚᒍᑎᒋᓗᒍ. ᑲᑎᙵᓂᖃᕐᓂᖃᓲᖑᕗᑦ ᑕᐃᒪᐃᑦᑐᓐᓇᕐᕕᐅᔪᒥ ᐊᑦᑕᓇᙱᓪᓗᓂ ᐊᒻᒪᓗ ᐅᕙᑦᑎᓐᓂ ᑐᓂᓯᓲᖑᕗᖅ ᖃᓱᕚᓪᓕᕐᓂᐅᔪᒥ ᐊᓂᑎᑦᑎᓗᓂ.
ᐅᔾᔨᕆᓯᒪᕗᖓ ᐃᓛᓐᓂᒃᑯᑦ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᐅᔪᑦ ᐊᓂᐊᑎᑦᑎᕝᕕᐅᖃᑦᑕᕐᓂᖓᓂ, ᑭᓯᐊᓂ ᐱᐅᙱᓐᓂᖃᕆᕗᖅ ᐊᒻᒪᓗ ᑕᒪᓐᓇ ᐊᑐᖁᓇᔭᙱᓚᕋ. ᐃᓚᖏᑦ ᐅᖃᓕᒫᖅᑎᐅᔪᑦ ᐆᒻᒪᑎᖃᙱᓚᑦ ᐅᕝᕙᓘᓐᓃᑦ ᑐᑭᓯᐅᒪᓂᖃᙱᓚᑦ ᐊᒻᒪ ᖃᓄᐃᓐᓂᐅᔪᒥ ᐱᐅᙱᑎᑦᑎᒋᐊᓪᓚᓲᖑᕗᑦ.
ᐱᐅᓂᖅᐹᖑᕗᖅ ᐅᖃᓪᓚᖃᑎᖃᕐᓂᕐᒥ ᐅᒃᐱᕆᔭᒥ ᐱᖃᓐᓇᕆᔭᒥ ᐅᕝᕙᓘᓐᓃᑦ ᐃᓅᓯᓕᕆᔨᐅᔪᒥ ᐅᕝᕙᓘᓐᓃᑦ ᐃᑲᔪᖅᓱᐃᔨᐅᔪᓄᑦ ᑲᑎᙵᓂᐅᔪᓄᑦ ᓲᕐᓗ ᐊᖑᑎᓄᑦ ᐊᒻᒪ ᐊᕐᓇᓄᑦ ᑲᑐᔾᔨᖃᑎᒌᖑᔪᓄᑦ ᐅᕝᕙᓘᓐᓃᑦ ᒪᒃᑯᒃᑐᓄᑦ ᑲᑎᙵᓂᐅᔪᓄᑦ. ᐅᑯᓂᖓᓘᓐᓃᑦ ᐃᑲᔪᖅᓱᐃᓂᐅᔪᒧᑦ ᑲᑎᙵᓂᐅᔪᓄᑦ ᐱᒻᒪᕆᐅᕗᖅ ᖁᔭᒋᔭᖃᕐᓂᕐᒥ ᐊᓯᒧᑦ ᑐᓴᖅᑕᐅᔭᕆᐊᖃᙱᓐᓂᖏᓐᓂ ᐱᖁᔭᓕᐊᒃᓴᒦᑦᑐᒥ ᐊᒻᒪᓗ ᐱᓯᒪᓗᒍ ᑐᓴᖅᑕᕐᓂ ᐊᓯᐊᓄᑦ ᑐᓴᖅᑕᐅᙱᓐᓂᖓᓂ.
ᐅᓇ ᐊᖕᒪᓗᖅᓯᓯᒪᓂᖅ ᓇᓕᒧᓕᖅᑎᑦᑎᓯᒪᓂᕐᒧᑦ ᖃᐅᑕᒫᒥ ᐅᖃᐅᓯᐅᖏᓐᓇᐅᔭᕆᐊᖃᖅᐳᖅ. ᐃᒃᐱᒍᓱᑦᑎᐊᓕᖅᑎᓪᓗᑎᑦ ᑭᓱᓕᒫᑦ ᖃᓄᐃᑦᑐᓐᓃᕐᓂᖏᓐᓂ, ᑭᓱᑐᐃᓐᓇᒥᒃ ᓴᖅᑭᑦᑐᖃᖅᐳᖅ ᐊᒻᒪᓗ ᑕᒪᓐᓇ ᐊᖕᒪᓗᖅᓯᓯᒪᓂᐅᔪᖅ ᖃᐅᔨᓴᖅᑕᐅᕗᖅ. ᑕᐃᒫᒃ ᐅᖃᓲᖑᕗᒍᑦ, "ᐆᒪᓲᖑᕗᒍᑦ ᐊᒻᒪ ᐃᓕᑦᑎᓲᖑᕗᒍᑦ". ᐃᓱᒪᒋᔭᓐᓂ, ᐃᖏᕐᕋᐃᓐᓇᕈᒪᒍᑦᑕ ᐃᒃᐱᒍᓱᖕᓂᐅᔪᒥ ᓇᓕᒧᑎᑦᑎᓯᒪᓂᕐᒧᑦ, ᐃᓅᔭᕆᐊᖃᖅᐳᒍᑦ ᐃᓄᐃᑦ ᖃᐅᔨᒪᔭᑐᖃᖏᓐᓂ ᑐᙵᕕᒋᔭᑦᑎᓐᓂ ᐅᑯᐊ ᑐᙵᕕᐅᔪᑦ ᐅᕙᑦᑎᓐᓂ ᐃᖅᑲᐃᑎᑦᑎᓲᖑᖕᒪᑕ ᐊᓯᖏᓐᓂ ᐃᓄᖕᓂ ᖃᓂᒋᔭᑦᑎᓐᓃᒻᒪᑕ ᐊᒻᒪᓗ ᐅᕙᑦᑎᓐᓂ ᓴᓂᕐᕙᐃᔭᕆᐊᖃᖅᐳᒍᑦ.
ᐃᒻᒥᓂᒃ–ᐸᖅᑭᑦᑎᐊᕐᓂᖅ ᐅᕙᑦᑎᓐᓂ ᐊᔪᕆᖅᓱᐃᒐᔪᒃᐳᖅ ᐅᕙᑦᑎᓐᓂ ᐅᔾᔨᕆᑎᑦᑎᓲᖑᕗᑦ ᐊᓯᑦᑎᓐᓂ ᐃᑲᔪᕈᒪᒍᑦᑕ ᓇᓕᒧᒌᒋᐊᖃᖅᐳᒍᑦ. ᐃᓅᓯᖅ ᐊᔪᕐᓇᖅᑐᐊᓘᕗᖅ ᑭᓯᐊᓂ ᐃᓯᒐᕗᑦ ᐃᓕᓯᒪᑦᑎᐊᖅᑎᓪᓗᒋᑦ ᑐᙵᕕᖃᑦᑎᐊᖅᑐᒥ, ᓯᕗᒻᒧᑦ ᐃᖏᕐᕋᔪᓐᓇᖅᐳᒍᑦ ᖃᐅᔨᒪᓗᑕ ᐊᐅᓚᑦᑎᓂᖃᕐᓂᑦᑎᓐᓂ.
ᐅᓇ ᐊᖕᒪᓗᖅᓯᓯᒪᓂᖅ ᓇᓕᒧᓕᖅᑎᑦᑎᓯᒪᓂᕐᒧᑦ ᐃᓚᖃᖅᐳᖅ ᐃᓱᒪᒧᑦ, ᐃᒃᐱᒋᔭᕐᓄᑦ, ᑎᒥᒧᑦ ᐊᒻᒪ ᐅᒃᐱᕈᓱᖕᓂᐅᔪᒥ ᑐᙵᕕᒋᔭᑦᑎᓐᓂ ᐊᒻᒪᓗ ᐱᓕᕆᖃᑎᒌᒋᐊᖃᖅᐳᑦ ᐊᐅᓚᔪᓐᓇᕐᓂᑦᑎᓐᓂ ᐅᒃᐱᕈᓱᖕᓂᖃᑦᑎᐊᕐᓗᑕ.