Skip to content

ᐃᓐᓇᑐᖃᐃᑦ ᐊᑭᓕᖅᑕᐅᒍᑎᖏᑦ ᐊᑲᐅᖏᓕᐅᕈᑕᐅᓂᖏᑦ

ᑕᑯᓚᐅᕋᒪ ᑐᓴᖅᑎᑦᓯᒍᑎᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑭᒡᒐᒃᑐᖅᑎᖓᓐᓂᑦ ᐃᓐᓇᑐᖃᖅ ᑮᓇᐅᔭᖅᑖᖃᑦᑕᖅᑐᖅ ᐃᓐᓇᑐᖃᐅᓂᖓᓄᑦ ᑮᓇᐅᔭᖅᑖᒃᑲᓐᓂᕐᓂᐊᕐᓂᖓᓄᑦ ᓄᕙᒡᔪᐊᕐᓇᖅ -19 ᐱᔾᔪᑎᒋᓪᓗᒍ ᑮᓇᐅᔭᖅᑖᕈᑕᐅᒃᑲᓐᓂᕐᓂᐊᖅᑐᓂᑦ. ᑕᒪᓐᓇ ᑲᖑᓇᒻᒪᕆᒃᐳᖅ ᐃᓐᓇᑐᖃᓄᑦ ᐅᑭᐅᖅᑕᖅᑐᒥᐅᑕᐅᔪᓄᑦ ᓲᕐᓗ ᓱᕙᓕᑭᐊᖑᓂᖓᓄᑦ, ᒥᑭᓗᐊᕐᓂᖓᓄᑦ.

ᐃᓐᓇᑐᖃᐅᖃᑕᐅᓕᕋᒪ, ᑕᐃᒪᓐᓇ ᖃᐅᔨᒪᓪᓗᖓᓗ ᐊᑭᑐᓂᖏᑦ ᓱᓇᑐᐃᓐᓇᐃᑦ ᐃᓱᒪᒋᔭᐅᓚᐅᖏᓐᓂᖓᓄᑦ ᑕᐃᒪᓐᓇ ᐊᑭᓕᖅᑕᐅᒃᑲᓐᓂᕐᓂᐊᕐᓗᓂ. ᐅᑭᐅᖅᑕᖅᑐᒥ, ᖁᔭᓈᖃᑦᑕᖏᑉᐸᕗᑦ ᐱᒍᒪᓕᕌᖓᑕ ᐃᓚᕗᑦ ᐃᑲᔪᐃᓐᓇᖅᐸᒃᐸᕗᑦ. ᖃᑕᖑᒃᑲᓗ ᓂᐅᕕᖅᓯᒪᓕᖅᐳᒍᑦ ᓇᖕᒥᓂᖅ ᐃᒡᓗᑉᑎᓐᓂᒃ ᐃᑲᔪᖅᓯᒪᓪᓗᖓᓗ ᐊᓯᒃᑲᓂᒃ ᐅᖅᓱᐊᓗᒃᑖᕈᒪᔪᓂᐅᑭᐅᒃᑯᑦ ᑮᓇᐅᔭᖃᖏᒃᑳᖓᑕ. ᐃᑲᔪᖅᓯᒪᓪᓗᖓᓗ ᓂᕿᑖᕆᐊᖃᖅᑐᓂᒃ ᑮᓇᐅᔭᖃᖏᒃᑳᖓᑕ ᑮᓇᐅᔭᓂᒃ ᐅᑎᕐᕕᐅᖏᒃᑲᓗᐊᖅᖢᖓ ᐃᓄᐃᑦ ᓂᕿᖏᓐᓂᒃ ᐱᑎᑕᐅᕙᒃᐳᖓ ᐃᑲᔪᖅᓯᒪᓪᓗᒋᓪᓗ ᖃᓄᑐᐃᓐᓇᖅ ᐊᒻᒪ ᓯᑭᑑᖏᑦ ᐋᖅᑭᒃᓱᖅᑕᐅᒋᐊᖃᖅᐸᑕ. ᐊᒥᓲᓗᐊᖏᑉᐳᒍᑦ ᐃᓐᓇᑐᖃᐅᔪᒍᑦ ᓄᓇᑦᑎᓐᓂ ᐃᓚᖏᓪᓗ ᐃᖃᓗᒃᓯᐅᖅᐸᒃᖢᑎᒃ ᐊᖑᓇᓱᐊᖅᐸᒃᖢᑎᒡᓗ ᐃᑲᔪᖅᑕᐅᓪᓗᑎᒃ ᐃᓐᓇᑐᖃᖅᓯᐅᑎᒥᖕᓂᑦ ᑮᓇᐅᔭᓂᑦ ᐊᒻᒪ ᑮᓇᐅᔭᒃᑲᓐᓂᖅᑖᕌᕐᔪᒃᐸᒃᖢᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ. ᐊᐃᑦᑖ ᑲᖑᓇᖅ, ᐊᐃᑦᑖᒻᒪᕆᒃ ᑲᖑᓇᖅᐳᖅ ᒥᑭᓗᐊᖅᑐᓂᒃ ᐱᑎᑕᐅᖃᑦᑕᕐᒪᑕ.

ᑖᒃᑯᐊ ᐃᓐᓇᑐᖃᐃᑦ ᐃᓅᓯᖃᖅᓯᒪᕗᑦ ᐳᐃᒍᖅᓯᒪᓕᖅᑕᑦᑎᓐᓂᒃ. ᐊᒃᓱᕈᖅᐸᓚᐅᖅᖢᑎᒡᓗ, ᑕᑯᓐᓇᒐᒃᓴᑦᑎᓐᓂᒃ ᐱᑎᑦᓯᒍᒪᓪᓗᑎᒃ ᒪᒃᑯᒃᑐᓂᒃ ᓂᕆᐅᖕᓂᖃᑦᓯᐊᖁᓪᓗᒋᑦ, ᒪᑭᑉᐸᓪᓕᐊᖏᓐᓇᖁᓪᓗᒋᑦ, ᐅᑕᕿᑦᓯᐊᖁᓪᓗᒋᑦ, ᑐᓂᐅᖃᐃᑦᓯᐊᖅᐸᒡᓗᑎᒃ, ᐃᓚᐅᑎᑦᓯᑦᓯᐊᖁᓪᓗᒋᓪᓗ ᐃᓅᖃᑎᒥᖕᓂᒃ. ᑕᐃᒪᑐᖅ ᒪᒃᑯᒃᑐᑦ ᐅᐱᑦᓯᐊᕐᓂᐊᖅᐳᑦ ᖁᔭᓐᓇᒦᕈᑎᖃᑦᓯᐊᕐᓗᑎᒡᓗ ᑕᒪᒃᑯᓂᖓ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐱᑎᑦᓯᓚᐅᖅᓯᒪᔪᓂᒃ ᒪᓕᒐᖃᑦᓯᐊᕈᓐᓇᖁᓪᓗᑕ.

ᓄᓇᕗᑦ ᐅᓪᓗᖓ ᑎᑭᐊᓂᓚᐅᖅᐳᖅ ᐊᓂᒍᖅᓯᒪᓕᖅᖢᓂᓗ ᖃᐅᔨᒪᕕᑕ ᑐᑭᓯᐅᒪᕕᑕᓗ ᓱᖕᒪᑦ ᖁᕕᐊᓱᒍᑎᖃᖃᑦᑕᕐᒪᖔᑦᑕ ᓄᓇᕗᑦ ᐅᓪᓗᖓᓂ? ᑕᒪᒃᑯᐊ ᐊᒃᓱᕈᖅᓯᒪᔪᑦ ᐱᕙᓪᓕᐊᑎᑦᓯᓪᓗᑎᒃ ᐊᑐᓕᖅᑎᑦᓯᓪᓗᑎᒡᓗ ᒐᕙᒪᒋᓕᖅᑕᑦᑎᓐᓂᒃ ᐱᑕᖃᖏᓕᕐᒪᑕ. ᐊᑖᑕᒋᓚᐅᖅᑕᕋ ᔮᓐ ᒪᒃᓴᒐᒃ ᑖᓐᓇᐅᖃᑕᐅᓚᐅᖅᓯᒪᕗᖅ ᐊᒃᓱᕈᓚᐅᖅᓯᒪᔪᖅ ᓄᓇᖃᕈᓐᓇᖁᓪᓗᑕ ᓄᓇᕗᖃᕈᓐᓇᖁᓪᓗᑕ. ᖁᕕᐊᓱᒍᑎᕙᕋ ᐃᓚᖏᓪᓗ ᓄᓇᕗᑖᖅᑎᑦᓯᓚᐅᖅᑐᑦ ᐃᓅᔪᑦ ᓱᓕ ᐃᓚᖏᓪᓗ ᑐᖁᖓᓕᖅᑐᑦ.

ᑲᓇᑕᐅᑉ ᒐᕙᒪᒃᑯᖏᑦ ᐃᓚᒋᔭᐅᓚᐅᖅᐳᑦ ᐊᖏᖃᑎᒌᖃᑎᒋᔭᐅᓪᓗᑎᒃ ᑭᓯᐊᓂ ᓱᖁᑎᒃᓴᖅᑑᔮᖏᑉᐳᑦ ᓄᓇᕗᒥᐅᓂᒃ ᐃᖕᒥᒃᑰᕈᒪᓂᖏᓐᓄᑦ, ᓄᓇᓕᓪᓗ ᐊᒥᓲᓪᓗᑎᒃ ᐅᖓᓯᒌᖃᑦᑕᐅᓪᓗᑎᒡᓗ ᓄᓇᕗᒥ. ᒐᕙᒪᒃᑯᑦ ᖃᐅᔨᒪᒋᐊᖃᖅᐳᑦ ᓱᓕ ᐊᐅᓚᑦᓯᓗᐊᕈᒪᓂᖏᓐᓄᑦ ᓴᒃᑯᑦᓯᒋᐊᖃᖅᐳᓪᓗ.

ᑕᒪᒃᑯᐊ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐊᐅᓚᔨᔪᒃᓴᐅᕗᑦ ᑐᒃᓯᐊᕈᑕᐅᕙᓚᐅᖅᑐᒥᒃ ᓂᕆᓂᐊᓕᕌᖓᑦᑕ; “ᒎᑎ ᓂᕆᓂᐊᖅᑕᕗᑦ ᓴᐃᒻᒪᖅᑎᓚᐅᒃᑭᑦ ᓴᐃᒻᒪᖅᑎᓪᓗᑕᓗ ᐱᔨᑦᓯᕋᖁᓪᓗᑕ, ᐊᒻᒪ ᖃᐅᔨᒪᑎᑕᐅᑦᓯᐊᖁᓪᓗᑕ ᐱᒍᒪᔭᐅᔪᓂᒃ ᐊᓯᑦᑎᓐᓄᑦ.”