ᕼᐃᒃᔅ ᑲᒫᓗᖃᖅᐳᖅ, ᑕᐃᒪ ᐱᓕᕆᔭᕆᐊᖃᓯᕗᖅ

122

ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᑦ

ᐱᓇᓱᐊᕈᓯᐅᓚᐅᖅᑐᒥ, ᐅᓂᒃᑳᕆᓚᐅᖅᐳᒍᑦ ᑮᓇᐅᔭᓕᕆᓂᕐᒧᑦ ᒥᓂᔅᑕᖓ ᔪᐊᔾ ᕼᐃᒃᔅ ᐃᓕᓴᖅᑎᑕᐅᓚᐳᖅᐳᖅ ᐊᑖᑕᖓᓄᑦ, ᒫᓂᑑᐸᒥ ᒪᓕᒐᓕᐅᖅᑎᐅᓚᐅᖅᓯᒪᔪᒥ ᔪᐊᔾ ᕼᐃᒃᔅ ᐊᖓᔪᒃᖠᕐᒧᑦ, ᒪᓕᖁᔨᙱᖦᖢᓂ ᑐᒥᖏᓐᓂ, ᑭᓯᐊᓂ ᓇᖕᒥᓂᖅ ᑐᒥᓕᐅᕆᓗᓂ – ᐊᒻᒪ ᑐᒥᓕᐊᖑᓪᓗᐊᖅᐳᑦ ᐱᓕᕆᓂᕐᒧᑦ ᑲᒫᓘᔪᓄᑦ. ᐊᑐᓚᐅᖅᐳᖅ ᐅᑯᓇᓂ ᑲᒫᓗᖕᓂ ᑐᓂᓯᓂᖓᓂ ᓯᕗᓪᓕᖅᐹᖓᓂ ᑮᓇᐅᔭᐃᑦ ᐊᑐᖅᑐᒃᓴᓄᑦ.

ᑕᑯᔾᔮᙱᑕᕐᓂ ᐊᔾᔨᙳᐊᒥ ᓴᖅᑭᑎᓚᐅᖅᑕᑦᑎᓐᓂ ᐱᓇᓱᐊᕈᓯᐅᓚᐅᖅᑐᒥ ᑎᒍᔭᐅᔪᒧᑦ ᐊᑦᑐᖏᕈᑕᐅᔪᓂᑦ. ᐊᑐᖅᑐᒃᓴᐅᓐᓂᖅᐳᖅ ᑐᓂᓯᓂᕐᒧᑦ ᑮᓇᐅᔭᐃᑦ ᐊᑐᖅᑐᒃᓴᒥ ᑐᓂᓚᐅᖅᑕᒥᓂᑦ.

“ᐊᕐᕌᒍᑕᒫᒥ ᐱᓕᕆᓂᖅᓴᐅᕗᒍᑦ ᑮᓇᐅᔭᖃᙱᓐᓂᖅᓴᐅᔪᓂ,” ᐅᖃᐅᔾᔨᓚᐅᖅᐳᖅ ᐅᓂᒃᑳᓕᐅᖅᑎᓄᑦ. ᐊᐃᑦᑖᖑᒐᓗᐊᖅ, ᓄᓇᕗᒻᒥᐅᑦ ᐊᒃᑐᖅᑕᐅᓂᖃᓛᖑᕗᑦ ᐆᒧᖓ ᓱᓕᓂᐅᔪᒧᑦ.

ᐅᔾᔨᕐᓇᓗᐊᖅᑐᒥ, ᒐᕙᒪᒃᑯᑦ ᓇᓗᓇᐃᖅᓯᓯᒪᕗᑦ ᓈᒻᒪᒃᑐᓂ ᑮᓇᐅᔭᓂᒃ ᓴᓇᓂᕐᒧᑦ 100-ᓂ ᓄᑖᖑᔪᓂ ᐃᒡᓗᒃᓴᐅᓂᐊᖅᑐᓄᑦ ᑎᑭᑉᐸᓪᓕᐊᔪᒥ ᑮᓇᐅᔭᓕᕆᓂᕐᒧᑦ ᐊᕐᕌᒎᔪᒥ. ᐅᑭᐊᒃᓵᒥ, ᐅᓂᒃᑳᕆᓚᐅᖅᐳᒍᑦ ᓄᓇᕗᑦ ᓵᙵᓂᖓᓂ ᐊᒥᒐᓗᐊᖅᐳᑦ 3,500-ᓂ ᐃᒡᓗᒃᓴᐅᔪᓂ, ᐃᓄᒋᐊᖕᓂᐅᔪᑦ ᐱᕈᖅᐸᓪᓕᐊᑎᓪᓗᒍ 500 ᐃᓄᖕᓂ ᐊᕐᕌᒍᑕᒫᒥ.

ᑐᑭᓯᓇᖅᑐᒥ ᐅᖃᕐᓗᒍ, 100-ᓂ ᓄᑖᖑᔪᓂ ᐃᒡᓗᒃᓴᓂ ᐅᓄᙱᓗᐊᖅᑐᒻᒪᕆᐅᕗᑦ. ᐊᒻᒪ ᓱᓕ, ᓄᓇᓕᐅᔪᑦ ᐊᑭᓖᔪᓐᓇᙱᓚᑦ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᐱᕈᖅᐸᓪᓕᐅᓂᐅᔪᓄᑦ, ᑐᑭᖃᖅᑐᒥ ᕼᐃᒃᔅ ᐊᒡᒐᖏᑦ ᕿᓚᒃᓯᒪᓪᓚᕆᖕᓂᖏᓐᓂ.

ᐱᓇᓱᐊᕈᓯᐅᓚᐅᖅᑐᒥ, ᐅᖃᖃᑎᖃᓚᐅᖅᐳᒍᑦ ᐊᑕᐅᓯᕐᒥ ᐃᒡᓗᓕᐅᖅᑎᒻᒪᕆᐅᔪᓂ ᐃᖃᓗᖕᓂ ᒫᓐᓇᐅᔪᒥ ᐊᖏᕐᕋᓂ ᓇᑉᐸᖅᑎᕆᓂᐅᔪᓄᑦ ᐱᓕᕆᐊᒃᓴᐅᔪᓄᑦ, ᐊᒻᒪ ᑭᐅᔾᔪᑎᒋᓪᓚᕆᓚᐅᖅᑕᖓ ᐃᒪᐃᓕᖓᓚᐅᖅᐳᖅ, “ᐱᑕᖃᙱᑦᑐᖅ. ᓄᓇᒃᓴᖃᙱᓚᑦ.” ᓄᓇᓕᖅᐸᐅᔭᒥ ᑲᑎᒪᔨᐅᔪᑦ ᐅᖃᐱᓗᒃᓯᒪᕗᑦ ᐊᑭᓖᒃᑲᓐᓂᕈᓐᓇᙱᓐᓂᖏᓐᓂ ᓄᓇᒃᑲᓐᓂᕐᓂ ᐊᑐᐃᓐᓇᙳᖅᑎᑦᑎᓂᕐᒥ, 30-ᐸᓗᖕᓂ ᐃᒡᓗᒃᓴᓄᑦ ᐃᓂᒃᓴᐅᔪᓂ ᒪᑐᐃᖅᑐᓂ ᖄᖏᖅᓯᒪᓕᖅᑐᓂ ᐊᕐᕌᒍᓄᑦ ᐱᖓᓱᓄᑦ. ᓄᓇᓕᖅᐸᐅᔭᖅ ᐊᒡᔭᖅᓯᕗᑦ ᐅᖁᒪᐃᓐᓂᐅᔪᒥ ᐱᕈᖅᐸᓪᓕᐊᓂᐅᔪᒥ ᐃᓱᒪᒋᓇᒍ ᐃᓚᒋᐊᖅᑐᒥ ᐊᒃᓱᕉᓴᖕᓂᐅᔪᒥ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᐊᒡᔭᖅᓯᔪᓐᓇᙱᓐᓂᐅᔪᒥ.

ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᓇᓚᐅᖦᖢᓂ ᐊᐃᑦᑖᕈᓱᓚᐅᖅᐳᖅ ᑕᑯᓂᕐᒧᑦ ᐅᓄᙱᓗᐊᕐᓂᐅᔪᓂ ᐊᖏᓂᖓᓂ ᓇᓗᓇᐃᒃᑯᓯᖅᓯᒪᔪᓄᑦ ᐃᓄᒃᑐᑦ ᐃᓕᓐᓂᐊᕐᓂᐅᔪᒥ. ᓄᓇᕗᑦ ᓴᓇᔭᕆᐊᖃᓪᓚᕆᒃᐳᑦ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂᒃ ᑐᖅᑯᖅᑕᐅᓯᒪᓪᓗᑎᒃ ᖁᕝᕙᖅᓴᐃᓂᕐᒧᑦ ᖃᓄᐃᓕᖓᓂᐅᔪᒥ ᐃᓄᒃᑐᑦ-ᐅᖃᓪᓚᒃᑐᓄᑦ ᐃᓕᓴᐃᔨᖏᓐᓄᑦ ᑭᓯᐊᓂ ᐃᓕᓐᓂᐊᖅᑐᓕᕆᔨᒃᑯᓐᓂ ᒥᓂᔅᑕᖓ ᑕᐃᕕᑦ ᔪᐊᓇᓯᐅᑉ ᓴᖅᑭᑎᑦᑎᓂᖓᓂ ᐱᖁᔭᒃᓴᒥ ᑭᖑᕙᕆᐊᖅᑎᑦᑎᓂᕐᒧᑦ ᐊᑐᓕᖅᑎᑕᐅᓂᖓᓂ ᒪᕐᕉᖕᓂᒃ ᐅᖃᐅᓯᕐᓂᒃ ᐃᓕᓐᓂᐊᕐᓂᕐᒧᑦ ᐱᔭᕆᐊᖃᕐᓂᐅᔪᓂ ᑕᑯᒃᓴᐅᑎᑦᑎᕗᖅ ᒐᕙᒪᒃᑯᑦ ᓂᕆᐅᖕᓂᖃᙱᓚᑦ ᑎᑭᐅᑎᔪᓐᓇᕐᓂᐊᕐᓂᖏᓐᓂ ᒪᓕᒐᑎᒍᑦ ᐱᔭᕆᐊᓕᖏᓐᓂᑦ.

ᐅᖃᐅᓯᒃᓴᕆᔭᐅᔮᖅᑐᒥ ᐅᕙᓂ ᐱᖁᔭᒃᓴᐅᔪᒥ ᐊᒻᒪᓗ ᑮᓇᐅᔭᐃᑦ ᐊᑐᖅᑐᒃᓴᓄᑦ ᒐᕙᒪᒃᑯᑦ ᐊᒡᒐᖏᑦ ᐊᑦᑐᖏᖅᓯᒪᕗᑦ.

ᐅᖃᕈᓐᓇᖅᐳᒍᑦ ᒐᕙᒪᒃᑯᑦ ᐊᔪᕐᓇᖅᑐᓂ ᐊᑲᐅᙱᓕᐅᕈᑎᖃᖅᐳᑦ ᐋᖅᑭᒃᑕᐅᔭᕆᐊᓕᖕᓂ. ᑕᐃᒪᓐᓇ ᓱᒃᑲᐃᓐᓂᐅᔪᒥ, ᐋᖅᑭᒃᑕᐅᓚᐅᖅᓯᒪᔾᔮᙱᓚᑦ.

ᐃᑲᔪᖅᓱᐃᓂᕐᒧᑦ ᐆᒥᖓ, ᐱᒻᒪᕆᐅᕗᖅ ᐅᔾᔨᕈᓱᖕᓂᕐᒥ ᒐᕙᒪᒃᑯᑦ ᓂᕈᐊᓚᐅᖅᐳᑦ ᐃᖏᕐᕋᓂᖃᕐᓂᕐᒧᑦ ᓇᓕᒧᑎᑦᑎᐊᖅᑐᒥ ᑮᓇᐅᔭᐃᑦ ᐊᑐᖅᑐᒃᓴᓄᑦ – ᐱᑕᖃᑐᐃᓐᓇᕆᐊᖃᕐᓗᓂ ᐊᐅᓚᑦᑎᓂᕐᒧᑦ ᖃᑭᔾᔪᑎᓂᑦ ᑐᙵᕕᖃᖅᑐᒥ ᑮᓇᐅᔭᐃᑦ ᐊᑐᖅᑐᒃᓴᓕᐊᖑᔪᓂᑦ $30 ᒥᓕᐊᓐᓂ ᓯᕗᓂᒃᓴᒧᑦ ᑮᓇᐅᔭᐅᔪᓄᑦ – ᓇᓚᐅᑦᑖᕆᔭᐅᔪᒥ ᖄᖏᐅᑎᓂᐅᔪᓂ $4 ᒥᓕᐊᓐᓂ. ᐱᔾᔪᑎᒋᔭᐅᔪᖅ ᐆᒧᖓ ᒐᕙᒪᒃᑯᑦ ᑮᓇᐅᔭᖅᑖᕆᔭᐅᕙᓪᓕᐊᔪᑦ ᐋᖅᑭᒃᓱᖅᑕᐅᓯᒪᖕᒪᑕ ᐱᕈᖅᐸᓪᓕᐊᓂᖏᓐᓂ ᓱᒃᑲᐃᓐᓂᖅᓴᐅᔪᒥ ᐊᑭᒋᔭᖓᓐᓂ ᑐᓂᓯᓂᕐᒥ ᐱᔨᑦᑎᕋᕐᓂᐅᔪᒥ.

ᐃᓱᒪᒋᓪᓗᒍ ᐱᑕᖃᑐᐃᓐᓇᕆᐊᖃᕐᓂᖓᓂ ᖃᑭᔾᔪᑎᓂᑦ ᐊᒻᒪ ᓱᓕᓂᐅᔪᒥ ᒐᕙᒪᑐᖃᒃᑯᑦ ᓅᑎᕆᓂᖏᓐᓂ $67 ᒥᓕᐊᓐᓂ ᐅᓄᕐᓂᖅᓴᐅᔪᓂ ᐊᕐᕌᒎᓚᐅᖅᑐᒥ, ᐃᓱᒪᕗᒍᑦ ᖃᓄᐃᒻᒪᑦ ᓴᕕᑲᑖᖅ ᒐᕙᒪᖓᑦ ᓂᕈᐊᕐᓂᖏᓐᓂ ᑕᔪᓯᑎᑦᑏᓐᓇᕐᓂᖓᓂ ᐱᑕᖃᖅᐸᒌᖅᑐᒥ ᖃᓄᐃᓕᐅᕐᓂᐅᔪᓂᑦ.

ᐅᑯᐊ ᓇᐃᓴᐅᑏᑦ ᐅᕙᑦᑎᓐᓄᑦ ᐅᖃᖅᑑᔮᖅᐳᑦ ᒐᕙᒪᒃᑯᑦ ᐱᓕᕆᙱᓗᐊᕐᓂᖏᓐᓂ ᐊᖏᒡᓕᒋᐊᖅᓯᓂᕐᒧᑦ ᑮᓇᐅᔭᖅᑖᕆᔭᐅᕙᓪᓕᐊᔪᓄᑦ ᐱᔭᕆᐊᓕᖏᓐᓂ ᐊᐅᓚᑦᑎᓂᕐᒧᑦ, ᐅᕘᓈᕈᑎᒃ ᐊᖏᒡᓕᒋᐊᖅᑐᓄᑦ ᑖᒃᓯᓂᑦ – ᓄᓇᕗᒻᒥᐅᑦ ᐊᑭᓖᓲᖑᕗᑦ ᐊᑦᑎᓛᒥ ᑮᓇᐅᔭᓕᐊᖑᔪᓄᑦ ᑖᒃᓯᓂᑦ ᑲᓇᑕᒥ, ᓄᓇᕗᒻᒥ ᒐᕙᒪᒃᑯᑦ ᖃᕋᓴᐅᔭᑎᒍᑦ ᑐᑭᓯᒋᐊᖅᑕᕐᕕᖓ ᐅᐱᐅᖅᑲᓪᓗᑎᒃ ᐅᖃᖅᐳᑦ – ᐅᕝᕙᓘᓐᓃᑦ ᐊᖏᒡᓕᒋᐊᖅᑐᒥ ᐊᒃᓱᕈᖅᑎᑦᑎᓂᐅᔪᒥ ᒐᕙᒪᑐᖃᒃᑯᓐᓄᑦ ᑐᓂᓯᓂᖏᓐᓄᑦ.

ᑭᓱᑐᐃᓐᓇᑦᑎᐊᑦ ᐊᔪᕐᓇᙱᓚᑦ ᓈᒻᒪᒃᑐᓂ ᑮᓇᐅᔭᖃᕐᓗᓂ. ᕼᐋᒻᓚᐅᔪᑦ ᑮᓇᐅᔭᖃᒃᑲᓐᓂᕈᑎᒃ ᐱᕙᓪᓕᐊᑎᑦᑎᓂᕐᒧᑦ ᓄᓇᒥᑦ, ᑕᐃᒪᐃᓐᓇᔭᖅᐳᑦ. ᓄᓇᕗᒻᒥ ᒐᕙᒪᒃᑯᑦ ᐊᒻᒪ ᑲᓇᑕᒥ ᐱᔪᒪᓪᓚᕆᒃᑯᑎᒃ ᐃᒡᓗᖃᖅᑎᑕᐅᓂᖅᓴᐅᔪᒥ ᐊᒻᒪ ᐃᓄᒃᑐᑦ ᐃᓕᓴᐃᔨᓂᑦ, ᓈᒻᒪᒃᑐᓂ ᑮᓇᐅᔭᓂ ᓇᓂᓯᓇᔭᖅᐳᑦ ᑕᐃᒪᐃᑎᑦᑎᓂᕐᒧᑦ.

ᑲᒫᓗᖃᖅᐳᖅ, ᑕᐃᒫᒃ ᑲᔪᖏᖅᓴᕗᒍᑦ ᒥᔅᑕ ᕼᐃᒃᔅᒥ ᕿᓚᕈᑎᖏᓐᓂ ᓱᑲᑦᑎᒋᐊᖅᓯᓂᖓᓂ ᐊᒻᒪ ᐱᓕᕆᓕᕐᓗᓂ ᓇᓂᓯᕐᓂᕐᒧᑦ ᑕᐃᒃᑯᓂᖓ ᑮᓇᐅᔭᐅᔪᓂᑦ.