ᓯᓚ ᖃᓄᐃᓐᓂᖓ ᐊᓯᔾᔨᖅᐸᓪᓕᐊᑎᓪᓗᒍ

183

ᓯᓚ ᐆᓇᖅᓯᕙᓪᓕᐊᓕᖅᑎᓪᓗᒍ ᐊᐅᔭᓕᖅᑎᓪᓗᑕᓗ ᓱᑲᑦᑐᒥᒃ, ᐃᓱᒪᕙᓪᓕᐊᓕᖅᐳᒍᑦ ᐸᕐᓇᒍᑎᖃᖅᐸᓪᓕᐊᓪᓗᑕ ᐊᐅᔭᖅ ᖃᓄᐃᓕᐅᕐᓂᐊᕐᓂᕐᒧᑦ. ᑐᐸᖃᑦᑕᓕᖅᐳᒍᑦ ᓯᕿᓐᓂᖅᑐᒧᑦ ᑕᐃᒪᓗ ᓯᕿᓐᓂᖅᑎᓪᓗᒍ ᓱᓕ ᓯᓂᒐᓱᐊᖃᑦᑕᕐᓂᐊᓕᕆᓪᓗᑕ. ᐆᒻᒪᕆᒃᓯᓯᒪᓕᖅᖢᑕᓗ ᓂᕆᐅᒋᔭᖃᖅᖢᑕᓗ ᓯᓚᒥ.

ᖃᓄᑐᐃᓐᓇᖅ ᐃᓕᓐᓇᖅᐳᑦ ᑕᑯᓐᓇᕐᓗᓂ ᐊᕙᑎᒥᐅᑕᓂᒃ ᐊᒻᒪ ᐆᒪᔪᐃᑦ ᖃᓄᐃᓕᐅᕐᓂᖏᓐᓂᒃ, ᑕᐃᒪᓐᓇ ᐊᑐᖃᑦᑕᕆᐊᖃᖅᐳᒍᑦ ᐅᓪᓗᑕᒫᖅᓯᐅᑎᑎᒍᑦ. ᓯᓚ ᐊᓯᔾᔨᖅᐸᓪᓕᐊᓂᖓᓂ, ᐃᓱᒪᕗᑦ ᖃᓄᐃᓕᐅᕐᓂᖅᐳᓪᓗ ᐊᓯᔾᔨᖃᑦᑕᕆᓪᓗᓂ.

ᖃᐅᔨᒪᕗᒍᑦ ᖃᓄᑐᐃᓐᓇᖅ ᐊᑐᕐᓗᓂ ᓂᐱᖃᕐᓂᖅᓴᐅᕗᖅ ᐅᖃᐅᓯᑦ ᓴᓂᐊᒍᑦ ᐅᔾᔨᕆᒋᐊᖃᖅᐸᕗᑦ ᑕᒪᓐᓇ ᓄᑕᖃᑦ ᐱᕈᖅᐸᓪᓕᐊᓂᖏᓐᓂ. ᖃᓄᑐᐃᓐᓇᖅ ᐱᓕᕆᐊᖃᕐᓂᐊᕈᑦᑕ ᖃᓄᑐᐃᓐᓇᖅ ᐅᖃᕐᓂᐊᕈᑦᑕᓗ, ᐃᔾᔪᐊᖅᓯᑲᐅᑎᒋᕙᖕᒪᑕ. ᐱᑦᓯᐊᕐᓗᑕ ᐅᖃᓪᓚᒑᖓᑦᑕ, ᓂᐱᖃᓗᐊᖏᑦᖢᑕ, ᐃᓚᐅᒍᒪᕙᒃᐳᑦ ᓂᐱᖃᓗᐊᖏᑦᖢᒡᓗ ᐅᖃᓪᓚᒍᒪᕙᒃᖢᑎᒃ ᐃᔾᔪᐊᖅᓯᓪᓗᑎᒃ.

ᑐᓴᖃᑦᑕᖅᐳᒍᑦ ᐊᒥᓱᐃᖅᑕᖅᖢᑕ ᖃᓄᐃᓕᐅᕈᑎᒋᔭᖅᐳᑦ ᖃᓄᐃᓐᓂᕆᔭᖅᐳᓪᓗ ᑕᐃᒪᓐᓇ ᐃᓅᓂᑦᑎᓐᓄᑦ ᐊᒃᑐᐊᖕᒪᑕ. ᐱᓕᕆᓪᓗᑕ ᐋᓐᓂᐊᓕᖅᐸᒃᐳᒍᑦ ᖃᓄᐃᖏᑦᓯᐊᖅᖢᑕᓘᓐᓃᑦ; ᓲᕐᓗ ᓯᒡᒐᓖᖅᑐᓗᐊᖅᐸᒃᖢᑕ ᓱᐳᖅᑐᒐᕐᓗᒃᑐᓗᐊᖅᐸᒃᖢᑕᓗ. ᑕᒪᒃᑯᐊ ᐃᓱᒪᖕᓄᑦ ᐊᓯᔾᔨᕈᑕᐅᓪᓗᑎᒃ ᐱᕙᒃᐳᑦ, ᓄᑭᒃᑎᓐᓄᓪᓗ, ᐊᑭᐊᕈᑦᑎᓐᓄᓪᓗ, ᐊᓯᖏᓐᓄᓪᓗ ᑎᒥᑦᑕ ᐃᓗᐊᓂᒥᐅᑕᖏᓐᓄᑦ, ᑎᖑᒃ, ᑕᖅᑐᑦ, ᐊᒻᒪ ᐳᕙᐃᑦ ᑕᐃᒪᓐᓇ ᐱᓕᕆᒍᒪᖏᓕᖅᖢᓂᓗ.

ᑕᒪᒃᑯᐊ ᐱᓕᕆᐊᕆᓪᓗᒋᑦ ᑕᑯᓐᓇᖅᑕᐅᖏᓐᓇᖅᐳᒍᑦ ᓄᑕᖃᓄᑦ ᐃᒪᓐᓇᓗ ᐅᖃᖅᐸᒃᖢᑎᒃ, “ᐊᓈᓇᒐ ᐊᑖᑕᒐᓗ ᑕᐃᒪᓐᓇᐃᓕᐅᕈᓐᓇᖅᐸᑕ, ᑕᐃᒪᓐᓇᐃᓕᐅᕈᓐᓇᕆᕗᖓᑦᑕᐅᖅ.” ᐃᒪᓐᓇᐃᑦᑐᖃᖅᐸᒃᐳᖅ ᓄᑕᕋᐅᓪᓗᓂ ᐱᕈᖅᓴᓪᓗᓂ ᑕᑯᓐᓇᖅᖢᓂᓗ ᐊᓈᓇᒥᖕᓂᒃ ᐊᑖᑕᒥᖕᓂᒡᓗ ᐊᓯᖏᓐᓂᒡᓗ. ᑕᐃᒪᓐᓇ ᐃᔾᔪᐊᖅᓯᓕᖅᖢᑎᒃ ᐱᕈᖅᓴᓪᓗᑎᒃ ᐊᖓᔪᖄᒥᖕᓂᒃ ᐅᕙᓘᓐᓃᑦ ᐅᖃᖅᓯᒪᕙᒃᐳᑦ ᐊᒃᑐᖅᓯᒪᒍᒪᖏᑦᖢᑎᒃ ᐃᒥᐊᓗᖕᓂᒃ ᐊᖓᔮᕐᓇᖅᑐᓂᒡᓗ ᐱᕈᖅᓴᓪᓗᑎᒃ ᑕᑯᓐᓇᓗᐊᕐᓂᑯᒧᑦ ᑕᐃᒪᓐᓇᐃᓕᐅᖅᑐᓂᒃ ᖃᓄᐃᓕᐅᕈᑕᐅᔪᓐᓇᕐᓂᖓᓄᓪᓗ ᐊᖓᔪᖄᒥᖕᓄᑦ ᖃᐅᔨᒪᖕᒪᑕ.

ᑕᐃᒪ ᐊᓯᔾᔨᖅᐸᓪᓕᐊᑎᓪᓗᒋᑦ ᓱᓇᑐᐃᓐᓇᑦ ᓯᓚᓗ ᐊᓯᔾᔨᖅᐸᓪᓕᐊᔪᓐᓇᖅᐳᒍᑦ ᖃᓄᑐᐃᓐᓇᖅ, ᓲᕐᓗ ᐱᑦᓯᐊᕋᓱᐊᓕᕐᓗᓂ, ᐊᑐᕈᒪᖏᓐᓂᖅ ᐊᖓᔮᕐᓇᖅᑐᓂᒃ ᐃᒥᐊᓗᖕᓂᒡᓗ. ᐊᒻᒪ ᐃᖅᑲᐅᒪᓗᑕ ᖃᐅᔨᒪᒋᐊᖃᖅᐳᒍᑦ ᑕᑯᓐᓇᖅᑕᐅᒐᑦᑕ ᓱᕈᓯᓄᑦ ᑐᓴᖅᑕᐅᕙᓪᓕᐊᓪᓗᑕᓗ ᐅᖃᓪᓚᒃᑳᖓᑦᑕ.