ᐋᓐᓂᐊᖅᑐᓕᕆᔭᐅᓂᖅ ᖃᓄᐃᖏᑦᓯᐊᕐᓂᕐᓗ

78

ᖁᕕᐊᒋᑦᓯᐊᖅᐸᕋ ᑲᓇᑕᐅᑉ ᒐᕙᒪᒃᑯᖏᑦ ᑐᓴᖅᑎᑎᒍᑎᖃᕌᖓᑕ ᐊᑲᐅᓯᕚᓪᓕᖅᑎᑦᓯᓂᐊᕐᓂᖏᓐᓄᑦ ᑮᓇᐅᔭᓕᐅᕈᓯᑦᑎᓐᓂᒃ, ᐆᒻᒪᖁᑎᑦᑎᓐᓂᒡᓗ ᐊᒻᒪ ᐃᖅᑲᓇᐃᔭᒐᒃᓴᖅᑖᑐᐃᓐᓇᕆᐊᖃᕐᓂᑦᑎᓐᓄᓪᓗ, ᐊᒻᒪ ᑮᓇᐅᔭᓂᒃ ᐊᒥᓱᓂᒃ ᓴᖅᑭᑎᑎᓂᐊᖅᖢᑎᒃ ᑕᐅᓴᓃᑦᑐᓂᒃ ᒥᓕᔭᓃᑦᑐᓂᒡᓗ ᐊᑲᐅᓯᕚᓪᓕᖅᑎᑎᓂᐊᕐᓗᑎᒃ ᓱᕙᓕᑭᐊᕆᔭᑦᑎᓐᓂᒃ ᐊᑲᐅᔪᒦᓐᓂᖅᓴᐅᔪᓐᓇᖁᓪᓗᑕ. ᑕᐃᒪᑐᖅ ᑕᒪᒃᑯᐊ ᐱᓕᕆᐊᕆᓯᒪᔭᖏᑦ ᐋᖅᑭᖕᓂᐊᖅᐳᑦ ᓯᕗᓂᒃᓴᐅᓂᐊᖅᑐᒥ ᓱᓕ ᐃᓅᑎᓪᓗᖓ, ᑭᓯᐊᓂ ᐱᒻᒪᕆᐅᓂᖅᓴᐅᓪᓗᓂ ᐃᓐᖑᑕᕗᑦ ᐃᓗᓕᖅᐳᓪᓗ ᓯᕗᓂᒃᓴᐅᓂᐊᖅᑐᒥ ᐊᑲᐅᓯᕚᓪᓕᕈᑎᒃᓴᖏᓐᓄᑦ.

ᓱᕈᖅᑕᐅᓯᒪᓕᖅᐳᑦ ᐊᕙᑎᒥᐅᑕᕗᑦ, ᓄᓇ ᐊᓂᖅᓵᖅᑐᕐᕕᒃᐳᓪᓗ, ᐃᓅᓪᓗᓴᓗ ᑕᒪᓐᓇ ᐊᑭᒋᐊᕈᑎᒋᓯᒪᕙᕗᑦ ᑭᖑᕙᓗᐊᖅᖢᑕ ᑭᓯᐊᓂ?

ᖃᐅᔨᓴᖅᑕᐅᖏᓐᓇᐅᔭᖅᐳᖅ ᑕᒪᓐᓇ ᓯᓚ ᐆᓇᖅᓯᕙᓪᓕᐊᓂᖓᓂᒃ ᐊᕙᑎᒥᐅᑕᕗᓪᓗ ᐃᒃᐱᒍᓱᒍᑕᐅᕗᑦ ᐆᒪᔪᓄᑦ ᓄᓇᒥ ᑕᕆᐅᒥᓗ.

ᐊᑯᓂᐅᓕᖅᑐᖅ, ᐃᓱᒪᓚᐅᕋᑦᑕ ᓱᓇᑐᐃᓐᓇᖅ ᐱᑕᖃᕐᓂᐊᕐᓂᖓᓄᑦ ᒫᓐᓇ ᓯᕗᓂᒃᓴᐅᓂᐊᖅᑐᒥᓗ, ᖃᐅᔨᕙᓪᓕᐊᓕᖅᐳᒍᑦ ᓂᕿᖃᖅᑎᑕᐅᓂᖅ, ᐊᖑᓇᓱᐊᖃᑦᑕᕐᓂᖅ, ᓯᓚ ᐊᓯᔾᔨᖅᐸᓪᓕᐊᓂᖓ ᖃᖓᑕᔫᖅᑕᖃᖅᐸᓪᓕᐊᑐᐃᓐᓇᕐᓂᖓᓗ ᑕᒪᒃᑯᐊ ᐆᒪᔪᐃᑦ ᐃᖏᕐᕋᓂᖏᑦ ᐊᓯᔾᔨᖅᐸᓪᓕᐊᓕᕐᒪᑦ ᑐᒃᑐᐃᓪᓗ ᐅᒥᖕᒪᐃᓪᓗ ᓂᕿᖏᑦ ᐊᓯᔾᔨᖅᑕᐅᕙᓪᓕᐊᓕᖅᖢᑎᒃ. ᐆᓇᖅᓯᕙᓪᓕᐊᑐᐃᓐᓇᕐᓂᖓᓂ ᑐᒃᑐᕙᖃᖃᑦᑕᓕᖅᐳᖅ ᐊᔾᔨᒌᖏᑦᑐᓂᒡᓗ ᑎᖕᒥᐊᓂᒃ ᓇᐹᖅᑐᖃᖏᑦᑐᒥ ᑕᑯᔭᐅᓚᐅᖅᓯᒪᖏᑦᑐᓂᒃ, ᑕᒪᒃᑯᐊᓗ ᓇᖅᑐᕋᓕᒃ ᐊᓯᖏᓪᓗ ᑕᒪᐅᖓᖅᐸᓪᓕᐊᑐᐃᓐᓇᓕᖅᖢᑎᒃ.

ᑯᔭᓐᓇᒦᕈᑎᖃᕋᓗᐊᖅᖢᑕ ᐊᕙᑎᒥᐅᑕᓕᕆᓂᕐᒧᑦ ᐆᒻᒪᖁᑎᓕᕆᓂᕐᒧᓪᓗ ᐃᑲᔪᖅᑕᐅᓂᕐᒧᑦ, ᐊᑲᐅᖏᓕᐅᕈᑕᐅᒻᒪᕆᖕᓂᐊᖅᑐᒥᒃ ᖃᐅᔨᒪᒋᐊᖃᖅᐳᒍᑦ ᓄᓇᖃᖅᑳᓯᒪᔪᑦ ᓄᓇᖏᓐᓂ ᐃᒡᓗᖃᑦᓯᐊᖏᑦᖢᓂ, ᓂᕿᖃᑦᓯᐊᖃᑦᑕᖏᑦᖢᑕᓗ ᐋᓐᓂᐊᖅᑐᖃᕋᔪᒃᖢᓂᓗ ᐃᓅᑦᓯᐊᖏᑦᖢᑕᓗ. ᐳᕙᒡᓗᖕᓇᖅ ᐅᑎᖅᓯᒪᓕᕆᓪᓗᓂ ᐱᔾᔪᑎᖃᖅᖢᑎᒃ ᐃᒡᓗᖃᑦᓯᐊᖏᓐᓂᖅ ᐊᒥᓲᓗᐊᖅᑐᓂᒃ ᐃᒡᓗᒥᐅᑕᖃᑎᒌᖕᓂᖅ ᐃᓂᖃᑦᓯᐊᖏᓐᓂᕐᓗ ᐃᓚᔭᕇᑦ. ᑕᐃᒪᓐᓇᐃᓕᐅᖅᐳᖅ ᓄᓇᕗᒥ ᐊᒥᓱᓪᓗ ᓄᓇᓕᖕᓂᒥᐅᑦ ᑲᓇᑕᒥᐅᑕᐅᖃᑎᑦᑎᓐᓂ ᐃᖅᑭᓖᑦ ᓄᓇᖏᓐᓂᓗ.

ᐅᖃᐅᓯᕆᒃᑲᓐᓂᕈᒪᕙᕋ ᐃᒡᓗᖃᖅᑎᑕᐅᒋᐊᖃᕐᓂᑦᑎᓐᓄᑦ ᐊᑭᑭᓐᓂᖅᓴᓂᒃ, ᐃᑲᔪᖅᑕᐅᓂᖅᓴᐅᓗᑕᓗ ᓂᕿᓄᑦ ᐋᓐᓂᐊᖅᑐᓕᕆᔭᐅᑦᓯᐊᖅᐸᒡᓗᑕᓗ ᑕᐃᒪᓐᓇ ᐃᒡᓗᒃᓴᓄᑦ ᑎᑭᑕᐅᖏᓐᓂᑦᑎᓐᓂ.

ᐅᒃᐱᕈᓱᒃᐳᖓ ᓄᓇᕗᒥᐅᑦ ᐱᔪᓐᓇᕐᓂᖃᑦᓯᐊᕐᒪᑕ ᐃᒡᓗᖃᖅᑎᑕᐅᒋᐊᖃᓪᓚᕆᒃᖢᑎᒡᓗ, ᓂᕿᖃᖅᑎᑕᐅᑦᓯᐊᕐᓗᑎᒡᓗ ᐊᓐᓄᕌᖃᖅᑎᑕᐅᑦᓯᐊᕐᓗᑎᒡᓗ. ᐱᓕᕆᖃᑎᒌᖏᓐᓇᕆᐊᖃᖅᐳᒍᑦ ᐊᑕᐅᓯᕐᒥᒃ ᐱᓕᕆᐊᖃᕋᓱᐊᕐᓂᑦᑎᓐᓂ, ᓄᑖᓂᒃ ᐃᓱᒪᓕᐅᕈᑎᖃᖅᐸᒡᓗᑕ ᐊᑐᕈᓐᓇᑦᑕᑦᑎᓐᓂᒃ, ᐱᔨᑦᓯᕋᑦᓯᐊᕐᓗᑕᓗ ᐃᓚᔭᕇᓂᒃ ᓄᓇᓕᖕᓂᒥᐅᑕᓂᒡᓗ.