NEWS BRIEFS: ᑕᐅᖅᓰᕈᑕᐅᓚᐅᖅᑐᖅ ᐃᓕᓴᖅᑎᓄᑦ ᐱᖅᑯᓯᑐᖃᖅᑎᑐᑦ ᐃᓅᓯᖃᖅᑐᑦ ᓄᓇᓕᐸᐅᔭᒥ

400

ᑎᑭᕋᕐᔪᐊᒥ

ᒪᒃᑯᒃᑐᐃᑦ ᑎᑭᕋᕐᔪᐊᒥᐅᑦ ᐊᒻᒪᓗ ᐋᑐᕚᒥ ᐃᓄᐃᑦ ᐃᓕᓴᕆᐊᖅᓯᒪᔪᑦ ᓄᑕᕋᒃᑯᕕᐊᓂ ᐳᓚᕋᖃᑦᑕᐅᑎᑲᐃᓐᓇᕐᒪᑦ ᓄᓇᓕᖕᒥᐅᑦ ᐄᐳᓗᒥ ᒪᐃᒥᓗ.

ᑕᐅᖅᓰᖃᑦᑕᐅᑎᓚᐅᕐᒪᑕ ᓇᑯᕐᒦᒃ YMCA-ᑯᑦ ᒪᒃᑯᒃᑐᓂᒃ ᑕᐅᖅᓰᑎᑦᑎᔨᖏᑦ ᐊᖅᑯᑎᒋᔭᐅᓪᓗᑎᒃ ᑕᐃᒪᓐᓇ ᑲᓇᑕᒥ ᐱᑎᑦᑎᖃᑦᑕᕐᒪᑕ.

ᐋᑐᕚᒥᐅᑦ ᑐᓐᖓᓵᓚᐅᖅᑐᑦ 15-ᓂᒃ ᐃᓕᓴᖅᑎᓂᒃ ᐃᓄᕐᓛᑉ ᐃᓕᓴᕐᕕᐊᓂᑦ ᐱᔪᓂᒃ ᒪᐃ 6-ᒥᑦ 12-ᒧᑦ. ᐃᓕᓴᖅᑏᑦ ᐳᓛᕆᐊᓚᐅᖅᑐᑦ ᑲᓇᑕᐅᑉ ᑲᑎᒪᕕᒃᔪᐊᖓᓄᑦ, ᖃᐅᔨᓴᕆᐊᓚᐅᕐᒥᔪᑦ ᑕᑯᔭᖅᑐᖅᖢᑎᒃ ᐋᑐᕚᒥ ᓄᓇᕗᑦ ᓯᕗᓂᒃᓴᕗᒃᑯᑦ ᐃᓕᓴᕐᕕᒃᔪᐊᖓᓂᒃ, ᐃᑲᔪᖅᖢᑎᒃ ᐋᕿᒃᓱᐃᓪᓗᑎᒃ ᓄᑕᕋᓛᑦ ᕿᐱᖏᓐᓂᒃ ᐋᓐᓂᐊᕕᖕᒥ ᐊᑐᖅᑕᐅᓂᐊᖅᑐᓂᒃ, ᕿᒥᕈᒋᐊᖅᑐᖅᖢᑎᒃᓗ ᑲᓇᑕᒥᐅᑦ ᐃᑦᑕᕐᓂᑕᒃᑯᕕᐊᓄᑦ, ᑕᑯᔭᖅᑐᖅᓯᒪᒋᓪᓗᑎᒃ ᐃᓚᒥᓂᒃ ᐃᓚᓐᓈᒥᓂᒃᓗ ᐋᑐᕚᒥᐅᑕᐅᓕᖅᑐᓂᒃ ᖁᕕᐊᓇᓚᐅᖅᑐᖅ ᑖᕙᓂᕐᒥᐅᑦ ᐃᓅᓯᖏᓐᓂᒃ ᐆᖅᑐᕋᖅᖢᑎᒃ, ᐅᓂᒃᑳᓚᐅᖅᑐᑦ ᐃᓄᕐᓘᑉ ᐃᓕᓴᕐᕕᐊᓂ ᐃᓕᓴᐃᔨ ᐳᕌᓐᑕᓐ ᒪᒃᑮ.

ᐃᓄᐃᑦ ᒪᒃᑯᒃᑐᐃᑦ ᐋᑐᕚᒥᐅᑦ ᓂᐅᕈᖔᕆᓪᓗᑎᒃ ᑎᑭᕋᕐᔪᐊᒥᐅᓄᑦ ᐄᐳᓗᒥ ᐅᑎᖅᖢᑎᒃ ᐊᖏᕐᕋᒥᓄᑦ ᓄᓇᒧᑦ ᐃᓄᖕᓄᓪᓗ. ᓄᓇᒥ ᐊᓯᕙᖅᓯᒪᓚᐅᖅᑐᑦ, ᐊᑐᕆᐊᓪᓚᒃᑲᓐᓂᖅᖢᑎᒃ ᐃᓄᐃᑦ ᐱᖅᑯᓯᖏᓐᓂᒃ ᓴᓇᐅᒐᖏᓐᓂᒃᓗ, ᐱᖅᑯᓯᑐᖃᕐᒥᑎᑐᓪᓗ ᐱᖑᐊᕈᓯᖏᓐᓂᒃ, ᐱᓕᕆᐅᓯᖏᓐᓂᒃ ᑕᑯᕋᓐᓈᖅᑎᑦᑎᔨᐅᓪᓗᑎᒃ.

 

ᐱᖅᑯᓯᑐᖃᕐᓂᒃ ᑕᑯᒃᓴᐅᑎᑦᑎᕕᐅᑉ ᒪᑐᐃᖅᑕᐅᓂᐊᕐᓂᖓ ᐅᓪᓗᖅ ᐋᕿᒃᑕᐅᔪᖅ, ᐊᐅᓚᑦᑎᔨᒃᓴᕐᓗ ᐱᔭᐅᓪᓗᓂ

ᑭᓐᖓᓂ

ᑎᑎᓚᐅᒃᑭᑦ ᓯᑎᐱᕆ 5 ᐊᒻᒪᓗ ᓯᑎᐱᕆ 8 ᐅᓪᓗᖅᓯᐅᑎᒃᑯᑦ.

ᑖᒃᑯᓇᓂ ᐅᓪᓗᓂ “ᒪᑐᐃᖅᓯᓂᐊᕐᒪᑕ” ᐊᒻᒪᓗ ᐃᓕᑕᕆᔭᐅᓗᓂ ᒪᑐᐃᖅᓯᒪᓕᕐᓂᖓᓄᑦ ᓄᓇᕐᔪᐊᒥᐅᓄᑦ ᑕᑯᖅᑯᔭᐅᓂᐊᕐᒪᑦ ᕿᓐᓄᐊᔪᐊᖅ ᐋᓯᕙᐅᑉ ᐱᖅᑯᓯᑐᖃᓂᒃ ᓴᓇᕕᐊ ᐸᑎᒃᑕᒐᓂᒃᓗ ᐊᔾᔨᖑᐊᓕᐅᕐᕕᐊ.

ᒪᕐᕈᐃᓕᖓᓂᐊᖅᑐᖅ ᒪᑐᐃᖅᑕᐅᕕᐊ ᓯᕗᓂᖓᓂ ᓄᓇᓕᖕᒥᐅᓄᑦ ᑭᖑᓂᖓᓂ ᐊᖓᔪᖅᑲᐅᓯᕐᓄᑦ ᓄᓇᕗᑦ ᒐᕙᒪᖓᓂᑦ, ᒐᕙᒪᑎᑐᖃᒃᑯᓐᓂᑦ, ᐃᓄᐃᑦ ᑎᒥᖁᑎᖏᓐᓂᑦ ᐊᒻᒪᓗ ᓇᖕᒥᓂᖅ ᐱᓇᓱᐊᒐᖃᖅᑐᓪᓗ ᑮᓇᐅᔭᑎᒍᑦ ᐃᑲᔪᖅᓴᖅᑐᕕᓃᑦ ᓴᓇᔭᐅᑎᓪᓗᒍ ᐊᒥᓱᓗᐊᓄᑦ ᑎᑭᑕᐅᓂᐊᕐᒪᑕ ᓄᓇᓕᖕᒥᐅᑦ ᐃᓂᒃᓴᖃᔮᖏᒻᒪᑕ, ᐅᓂᒃᑳᓚᐅᖅᑐᖅ ᔮᓐ ᕼᐊᓯ, ᑭᓐᖓᒥᐅᑦ ᓄᓇᓕᓕᕆᔨᖏᑕ ᐊᖓᔪᖅᑳᖓ. ᐊᓱᐃᓛᒃ ᕼᐊᒪᓚᖓᓂ ᒪᑐᐃᖅᓯᓂᐊᓕᖅᑐᑦ ᓯᑎᐱᕆ 5-ᒥ “ᓯᕗᓂᖓᓂ ᒪᑐᐃᖅᑕᐅᓗᓂ” ᓄᓇᓕᖕᒥᐅᓄᑦ ᑕᑯᔭᐅᖅᑳᕐᓂᐊᖅᑐᖅ ᐱᐊᓂᒃᓯᒪᓕᖅᑎᓪᓗᒍ ᑖᓐᓇ $10.2-ᒥᓕᐊᓐᑖᓚᕌᖅᑐᖅ ᐃᒡᓗᕐᔪᐊᖅ ᓴᓇᖑᐊᕐᕕᒃ.

 

ᖁᕐᓗᖅᑑᑉ ᑰᖓ ᓱᐱᓇᓵᓚᐅᖅᑐᖅ

ᖁᕐᓗᖅᑐᒥ

ᖁᕐᓗᖅᑐᒥᐅᑦ ᐅᑕᖅᑭᒋᐊᖃᖔᓕᓚᐅᖅᑐᑦ ᔫᓐ 18-ᒥ ᑭᓯᐊᓂ ᓯᑯ ᐃᕗᕙᓪᓕᐊᓕᓚᐅᕐᒪᑦ ᖁᕐᓗᖅᑑᑉ ᑰᖓᓂᑦ.

“ᐊᓱᐃᓛᒃ ᑕᐃᒪ ᓯᒥᖓ ᒪᑐᐃᖅᐳᖅ, ᑖᓐᓇ ᐱᐅᔪᖅ,” ᐅᖃᕆᓪᓗᓂ ᐊᒫᓐᑕ ᑑᒫᓐ, ᐊᐅᓚᑦᑎᔨᒋᔭᐅᔪᖅ ᖁᕐᓗᖅᑐᒥᐅᑦ ᐊᖑᓇᓱᒃᑎᖏᑕ ᒥᑭᒋᐊᓐᓂᐊᖅᑎᖕᑕᓗ ᑲᑐᔾᔨᖃᑎᒌᖓᓐᓄᑦ, ᔫᓐ 19-ᒥ, ᑕᒪᑐᒪᓂ ᑭᓯᐊᓂ ᐅᓪᓗᒥ ᐅᖅᑰᓂᖃᓕᖅᑎᓪᓗᒍ 22ᑕ-ᒥᒃ.

ᑰᖓ ᓱᐱᓚᐅᕐᒪᓪᓕ ᐊᕐᕌᓂ ᓯᕗᓂᖓᓂ, ᔫᓐ 1-ᒥ. ᑕᐃᒪᖓᓂᑦ ᓱᐱᓲᖑᒐᓗᐊᕐᒪᑦ ᑐᖓᓕᖓᓂ ᐱᓇᓱᐊᕈᓯᕐᒥ ᔫᓐᒥ, ᐅᖃᕆᓪᓗᓂ ᑑᒫᓐ.