Skip to content

EDITORIAL: ᓄᓇᕘᑉ ᐊᖅᑯᑎᖓ ᓇᓗᓇᖅᑐᒦᓕᖅᐳᖅ

ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᑦ
ᐃᒪᐃᑦᑑᔮᖅᐳᖅ, ᐊᒃᓱᑦ ᒫᓐᓇᐅᔪᒥ, ᓄᕙᒡᔪᐊᕐᓇᖅ-19 ᑎᑭᐅᑎᙲᓐᓇᖅᐳᖅ ᓄᓇᕗᒻᒧᑦ. ᒫᓐᓇ ᓄᓇᕗᒻᒥ ᒐᕙᒪᒃᑯᑦ ᐱᓕᕆᐊᒃᓴᖃᖅᑎᑕᐅᕗᑦ ᐃᑲᔪᕐᓂᕐᒥ ᓄᓇᕗᒻᒥᐅᓂ ᐅᑎᖅᐸᓪᓕᐊᓂᖏᓐᓂ ᑮᓇᐅᔾᔭᒃᓴᓂᕐᒧᑦ ᑲᑕᖕᓂᐅᔪᒥ ᐊᒻᒪ ᐅᑎᖅᑎᕆᓂᕐᒥ ᐃᓅᓯᕆᔭᐅᓂᐅᔪᓂ ᑕᐃᒪᐃᑉᐸᓚᐅᕐᓂᖓᓄᑦ.

ᓄᓇᕗᒻᒥ ᒐᕙᒪᒃᑯᑦ ᒫᓐᓇᓕᓴᒥ ᓴᖅᑭᑎᑦᑎᓚᐅᖅᐳᑦ ᐸᕐᓇᒍᑎᖓᓐᓂ ᓴᖅᑭᑎᑦᑎᕙᓪᓕᐊᓂᖏᓐᓂ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᓂᐅᔪᓂ ᖄᖓᓂ ᖄᖓᓄᑦ ᐲᔭᐃᕙᓪᓕᐊᕋᔮᖅᖢᑎᒃ ᐸᕐᓇᒍᑎᒥᒃ ᑕᐃᔭᐅᔪᒥ ᓄᓇᕘᑉ ᐊᖅᑯᑎᖓᓐᓂ.

ᐃᓗᓕᑭᑦᑐᖅ 11-ᓂ ᒪᒃᐱᖅᑐᒐᓕᖕᓂ ᑎᑎᖅᑲᖁᑎᒋᔭᐅᔪᒥ ᓴᖅᑭᑕᐅᔪᒥ ᒐᕙᒪᒃᑯᓐᓂ ᐅᖃᖅᓯᒪᕗᖅ ᑐᙵᕕᖃᖅᑐᒥ ᐱᔪᓐᓇᕐᓂᖏᓐᓂ ᑭᐅᓂᕐᒧᑦ ᐊᐃᑦᑐᐃᓐᓇᖅᑐᒥ, ᖃᓄᐃᓕᖓᓂᐅᔪᒥ ᓄᕙᒡᔪᐊᕐᓇᖅ-19–ᒥ ᓄᓇᕗᒻᒥ ᐊᒻᒪ ᖃᓄᐃᓕᖓᓂᐅᔪᓂ ᓴᓂᓕᖏᓐᓂ ᐱᔪᓐᓇᕐᓂᖃᕐᓂᓕᖕᓂ, ᓄᓇᕗᒻᒥ ᒐᕙᒪᒃᑯᑦ ᖃᓱᒋᐊᖅᑎᑦᑎᓂᐊᖅᐳᖅ ᑭᒡᓕᖃᖅᑎᑕᐅᓂᐅᔪᓂ, ᐃᓕᓯᒪᐃᓐᓇᕐᓗᒋᑦ ᐅᕝᕙᓘᓐᓃᑦ ᐃᓚᒋᐊᖅᓯᒃᑲᓐᓂᕐᓗᓂ ᑭᒡᓕᖃᖅᑎᑕᐅᒋᐊᓪᓚᒃᑐᓂ.

ᐅᑯᐊ ᐃᓱᒪᓕᐊᖑᖃᑦᑕᕐᓂᐊᖅᐳᑦ ᐱᓇᓱᐊᕈᓰᑦ ᒪᕐᕉᒃ ᐊᓂᒍᑐᐊᕌᖓᑦ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᖓᓄᑦ, ᓘᒃᑖᖅ ᒪᐃᑯᓪ ᐹᑐᓴᓐᒧᑦ.
ᑎᑎᖅᑲᖁᑕᐅᔪᖅ ᑎᑎᕋᖅᓯᒪᒋᕗᖅ ᖃᓄᐃᓕᐅᕐᓂᐅᔪᓂ ᖃᐅᔨᓴᖅᑕᐅᓯᒪᔪᓄᑦ ᐅᓗᕆᐊᓇᕐᓂᐅᔪᓄᑦ: ᐊᑦᑎᒃᑐᖅ, ᕿᑎᖅᐸᓯᐊᓂ ᐊᒻᒪ ᖁᑦᑎᖕᓂᐅᔪᒥ. ᐊᑦᑎᒃᑐᒥ ᐊᕕᒃᑐᖅᓯᒪᓂᐅᔪᒥ ᐅᑯᐊᖑᕗᑦ ᐸᐃᕆᕝᕕᑦ ᐊᒻᒪ "ᐃᖅᑲᓇᐃᔭᕐᕖᑦ." ᑕᕐᕆᔭᕆᐊᕐᕖᑦ ᐊᒻᒪ ᐃᖅᑲᖅᑐᐃᕖᑦ ᕿᑎᖅᐸᓯᐊᓂ ᐅᓗᕆᐊᓇᕐᓂᐅᕗᑦ ᖃᓄᐃᓕᐅᕐᓂᐅᔪᑦ ᓲᕐᓗ ᓄᓇᓕᖕᓂ ᓂᕆᕕᒡᔪᐊᖅᑎᑦᑎᓂᐅᔪᑦ ᖁᑦᑎᒃᑐᒥ ᐅᓗᕆᐊᓇᕐᓂᐅᕗᑦ.

ᒐᕙᒪᒃᑯᑦ ᒥᒃᖠᒋᐊᖅᑎᑦᑎᕙᓪᓕᐊᑎᓪᓗᒋᑦ ᑭᒡᓕᖃᖅᑎᑕᐅᓂᐅᔪᓂ ᔫᓂ 1–ᒥ ᒪᑐᐃᖅᓯᓂᐅᔪᒥ ᒥᕐᙳᐃᖅᓯᕐᕕᖕᓂ, ᐸᐃᕆᕝᕕᖕᓂ ᐊᒻᒪᓗ ᓄᓇᕘᑉ–ᐃᓗᐊᓂ ᐊᐅᓪᓛᕐᓂᐅᔪᒥ, ᓱᓕ ᐊᐱᖅᑯᑎᒃᓴᖃᕐᓂᖅᓴᐅᕗᖅ ᑭᐅᔾᔪᑕᐅᔪᓂᑦ. ᐅᓇ ᐸᕐᓇᐅᑎ ᐃᓚᑰᓂᖃᖅᐳᖅ ᑭᓱᓕᒫᖑᓂᐅᔪᓂ ᐋᖅᑭᒃᓱᑦᑎᐊᖅᓯᒪᓂᐅᔪᒥ. ᑐᑭᓯᓇᖅᐳᖅ ᐊᔪᕐᓇᙱᓐᓂᖓᓂ ᑎᑎᕋᖅᓯᒪᓂᖓᓂ, ᒐᕙᒪᒃᑯᑦ ᐊᑦᑕᓇᙱᒍᓱᒃᑯᑎᒃ ᐲᖅᓯᓂᕐᒥ ᑭᒡᓕᖃᖅᑎᑕᐅᓂᐅᔪᓂ ᑕᐃᒪᐃᓐᓂᐊᖅᐳᑦ, ᑭᓯᐊᓂ ᐅᓇ ᐸᕐᓇᒍᑕᐅᕗᖅ ᓄᓇᕗᒻᒥᐅᓂ ᐸᕐᓇᒍᓐᓇᕐᓂᖏᓐᓄᑦ.

ᐃᓚᖏᑦ ᓇᖕᒥᓂᖃᖅᑎᐅᔪᑦ ᑐᑭᓯᓇᑦᑎᐊᖅᑐᒥ ᓇᓗᓇᐃᖅᑕᐅᓯᒪᓂᖏᓐᓂ ᐅᑯᓇᓂ ᐱᖑᓱᓄᑦ ᐊᕕᒃᑐᖅᓯᒪᓂᐅᔪᓂ ᐅᓗᕆᐊᓇᕐᓂᖓᓄᑦ ᖃᐅᔨᓴᖅᑕᐅᓂᖓᓂ, ᖃᖓ ᓄᓇᕗᑦ ᑲᒪᒋᔭᖃᕈᓐᓇᕐᓂᐊᕐᓂᖏᓐᓂ ᖁᑦᑎᒃᑐᒥ ᐅᓗᕆᐊᓇᕐᓂᐅᔪᒥ ᖃᓄᐃᓕᐅᕐᓂᐅᔪᓂ ᑕᐅᑐᒃᖢᒍ ᕿᑎᖅᐸᓯᐊᓃᑦᑐᓂ ᑐᑭᓯᓇᑦᑎᐊᙱᓚᖅ, ᐅᕝᕙᓘᓐᓃᑦ ᓇᓕᐊᑦ ᖃᓄᐃᓕᐅᕐᓂᐅᔪᑦ ᕿᑎᖅᐸᓯᐊᓂ–ᐅᓗᕆᐊᓇᕐᓂᐅᔪᒥ ᐊᕕᒃᑐᖅᓯᒪᓂᐅᔪᒥ ᐱᔪᓐᓇᖅᑎᑕᐅᖅᑳᕐᓂᐊᕐᓂᖏᓐᓂ ᐊᑕᐅᑦᑎᒥ ᓇᓗᓇᖅᐳᖅ. ᐊᒻᒪᓗ ᐅᖃᐅᓯᖃᖅᑎᓪᓗᒍ "ᐃᖅᑲᓇᐃᔭᕐᕕᓂᑦ" ᐊᑦᑎᒃᑐᒥ–ᐅᓗᕆᐊᓇᕐᓂᐅᔪᒥ ᐊᕕᒃᑐᖅᓯᒪᓂᐅᔪᒥ, ᑭᓱᓪᓚᕆᐅᕙᑦ?

ᒐᕙᒪᒃᑯᑦ ᐊᐱᕆᕗᑦ ᓄᓇᕗᒻᒥᐅᓂ ᖃᐅᔨᒪᓇᑎᒃ ᐅᒃᐱᕈᓱᑦᑎᐊᕐᓂᖏᓐᓂ ᐊᒻᒪ ᐊᓯᖏᑦ ᑲᓇᑕᒥ ᐊᕕᒃᑐᖅᓯᒪᓂᐅᔪᑦ ᐊᒻᒪ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᑦ ᐋᖅᑭᒃᓱᑦᑎᐊᖅᓯᒪᔪᓂ ᐊᒻᒪ ᐅᓂᒃᑳᕆᓯᒪᑦᑎᐊᖅᑐᓂ ᑐᕌᒐᒃᓴᖃᖅᑎᓪᓗᒋᑦ ᐲᖅᓯᓂᕐᒥ ᑭᒡᓕᖃᖅᑎᑕᐅᓂᐅᔪᓂ, ᒐᕙᒪᒃᑯᑦ ᐅᖃᖅᐳᑦ ᓄᓇᕗᑦ ᐱᔭᕆᐊᖃᙱᓐᓂᖏᓐᓂ ᐅᓂᒃᑳᕆᓯᒪᑦᑎᐊᖅᑐᒥ ᐸᕐᓇᐅᑎᖃᕆᐊᖃᙱᓐᓂᖏᓐᓂ.

ᐃᓚᖏᑦ ᐃᓄᐃᑦ ᐊᒻᒪ ᓇᖕᒥᓂᖃᖅᑎᐅᔪᑦ ᐊᑐᓕᒪᓂᖃᓕᖅᐸᓪᓕᐊᑎᓪᓗᒋᑦ ᐃᑲᔪᖅᓱᐃᓂᐅᔪᓂ ᑮᓇᐅᔭᓂᑦ ᐊᔾᔨᒌᙱᑦᑐᓂ ᑭᒡᓕᐅᔪᓄᑦ ᒐᕙᒪᐅᔪᓂ ᖃᐅᒻᒪᖅᑯᑎᓂ ᐃᑯᒪᑎᑦᑏᓐᓇᕈᓐᓇᕐᓂᕐᒧᑦ, ᐸᕐᓇᒍᓐᓇᕐᓂᕐᒧᑦ ᒪᑐᐃᖅᐸᓪᓕᐊᑎᑦᑎᓂᐅᔪᒥ ᐅᕝᕙᓘᓐᓃᑦ ᐃᖅᑲᓇᐃᔮᒥᓄᑦ ᐅᑎᖅᐸᓪᓕᐊᓂᐅᔪᒥ ᐱᓪᓚᕆᐅᓛᖑᓂᐅᔪᒥ. ᒫᓐᓇᐅᔪᒥ, ᐃᓄᐃᑦ ᐅᑕᖅᑭᔭᕆᐊᖃᕐᓂᐊᖅᐳᑦ ᐱᓇᓱᐊᕈᓯᑕᒫᑦ ᒪᕐᕉᖕᓂ ᓂᕆᐅᒡᓗᑎᒃ ᖃᐅᔨᓇᓱᐊᕐᓂᕐᒧᑦ ᐃᓚᐅᖃᑕᐅᓂᐊᕐᓂᖏᓐᓂ ᒐᕙᒪᐅᔪᒃᑯᑦ ᒪᑐᐃᖅᓯᕙᓪᓕᐊᒃᑲᓐᓂᕐᓂᐅᔪᒥ ᐸᕐᓇᐅᑎᖓᓐᓂ.

ᐅᒃᐱᕈᓱᖕᓂᖅᑕᖃᖅᐳᖅ ᐃᓄᐃᑦ ᑲᒪᒋᔭᖃᖅᑐᓂ ᐆᒪᙵᑦ ᐊᒥᓱᓄᑦ ᖃᓂᒻᒪᓐᓇᐅᔪᒥ ᖃᐅᔨᒪᓂᖏᓐᓂ ᖃᓄᐃᓕᐅᕐᓂᖏᓐᓂ ᐊᒻᒪᓗ ᑐᑭᓯᓇᑦᑎᐊᖅᖢᓂ ᐆᒥᖓ ᐊᒥᓱᓄᑦ ᖃᓂᒻᒪᓐᓇᐅᔪᒥ ᐱᕐᔪᐊᖑᒍᓱᖕᓂᖏᓐᓂ, ᑭᓯᐊᓂ ᓄᓇᕘᑉ ᐊᖅᑯᑎᖓ ᑕᑯᒃᓴᐅᓂᖃᑦᑎᐊᙱᒃᑯᓂ ᓇᓗᓇᕐᓂᐅᔪᒥ, ᑖᓐᓇ ᐅᒃᐱᕈᓱᖕᓂᐅᔪᖅ ᓴᔪᒃᑎᑕᐅᓯᒪᕗᖅ.

ᕼᐊᓐᓇᓚᖏᓐᓂ ᓱᓕ ᓄᑖᖑᔪᓂ ᖃᓄᐃᑉᐸᓪᓕᐊᓂᐅᔪᓂ ᓴᖅᑭᑉᐸᓪᓕᐊᕗᑦ ᖃᐅᑕᒫᒥ ᑲᓇᑕᒥ ᐊᒻᒪᓗ ᑭᓪᓚᑰᓂᐅᔪᒥ ᓴᐳᓗᔭᙳᐊᒥ ᑐᕌᖅᑎᑦᑎᔪᓐᓇᖅᐳᖅ ᐅᓕᓐᓂᐅᔪᒥ ᐱᓕᕆᐊᖑᓂᐅᔪᓄᑦ ᐅᑭᐅᖅᑕᖅᑐᒥ. ᐅᔾᔨᖅᓱᑦᑎᐊᕐᔪᐊᕐᓂᐅᔪᒥ ᐱᔭᕆᐊᖃᖅᐳᑦ, ᑭᓯᐊᓂ ᐸᕐᓇᐅᑎ ᒐᕙᒪᒃᑯᑦ ᓴᖅᑭᓚᐅᖅᑕᖓᓂ ᐱᒋᐊᕈᑕᐅᙱᓚᖅ.

ᑐᑭᓯᓇᖅᐳᖅ ᑭᒡᓕᐅᑎᑕᐅᔪᑦ ᒪᑐᓯᒪᐃᓐᓇᕆᐊᖃᕐᓂᖏᓐᓂ ᑭᓯᐊᓂ ᑭᓇᑐᐃᓐᓇᖅ ᐅᓪᓗᓪᓚᕆᖕᒥ ᕿᓂᖅᑐᒧᑦ ᖃᖓ ᓄᓇᕗᑦ ᐅᑎᕐᓂᐊᕐᓂᖓᓂ ᐃᓕᖅᑯᓯᕆᓚᐅᖅᓯᒪᔭᖓᓄᑦ ᖃᐅᔨᒪᔾᔮᙱᓚᑦ, ᐊᑕᐅᓯᕐᒥᓪᓘᓐᓃᑦ ᓄᕙᒡᔪᐊᕐᓇᖅᑕᖃᙱᓐᓂᖓᓂ ᓄᓇᕗᒻᒥ.