Skip to content

EDITORIAL: ᓄᓇᕘᑉ ᐅᓪᓗᖓ ᓇᓗᓇᐃᖅᓯᒃᑲᓐᓂᖅᐳᖅ ᐊᕐᕌᒍᒃᑲᓐᓂᐅᔪᒥ ᐃᖏᕐᕋᓂᐅᔪᒥ

ᑕᒪᑐᒪᓂ ᓄᓇᕘᑉ ᐅᓪᓗᖓᓂ ᐅᓄᕐᓂᖅᓴᓂ ᐃᓄᖕᓂ ᕿᑲᕈᓐᓇᕐᓂᐊᓕᖅᐳᑦ ᐃᖅᑲᓇᐃᔭᕐᓂᕐᒥ ᐊᒻᒪ ᖁᕕᐊᓱᒍᑎᖃᕐᓗᑎᒃ ᓄᓇᕘᑉ ᐃᓅᕝᕕᕕᓂᐊᓂ ᖁᔭᓐᓇᒦᒃ ᓄᑖᖑᔪᒥ ᑎᓕᐅᕈᑕᐅᔪᒥ ᓄᓇᕗᒻᒥ ᒐᕙᒪᒃᑯᓐᓂ ᐊᖏᒡᓕᒋᐊᖅᓯᓂᕐᒧᑦ ᕿᑲᕐᓂᐅᔪᒥ ᐃᓚᖃᒃᑲᓐᓂᕐᓂᕐᒧᑦ ᐅᓄᕐᓂᖅᓴᓂ ᓴᓇᔨᐅᔪᓂᑦ.

ᑕᒪᒃᑭᓄᑦ ᐹᐱᑭᐅᕐᓂᐅᔪᓂ ᐊᒻᒪ ᖁᕕᐊᓱᒍᑕᐅᔪᓂ, ᑕᒪᒃᑭᐅᙱᑦᑐᑦ ᐃᖅᑲᐅᒪᓂᖃᑦᑎᐊᕐᓂᐊᖅᐳᑦ ᓄᓇᕘᑉ ᐊᑐᖅᐸᓚᐅᖅᑕᖏᓐᓂ, ᑭᓯᐊᓂ ᐊᒥᓱᓂ ᓄᓇᕗᒻᒥᐅᑦ ᐅᐱᐅᖅᑲᔪᓐᓇᕐᓂᖏᓐᓄᑦ ᖄᖏᖅᓯᒪᓕᖅᑐᓂ ᐊᕐᕌᒍᓄᑦ 21–ᓄᑦ.

ᐊᑎᓕᐅᕆᓂᕐᒥ ᓄᓇᕘᑉ ᓄᓇᑖᕋᓱᐊᕐᓂᕐᒧᑦ ᐊᖏᕈᑎᖓᓐᓂ ᓇᓗᓇᐃᖅᓯᓚᐅᖅᐳᖅ ᐊᖏᓛᖑᔪᒥ ᓄᓇᑖᕋᓱᐊᕐᓂᐅᔪᒥ ᑲᓇᑕᐅᑉ ᐊᑐᖅᐸᓚᐅᖅᑕᖏᓐᓂ ᐊᒻᒪ ᐱᔪᓐᓇᐅᒻᒥ ᐸᐸᑦᑎᕗᑦ ᐊᖑᓇᓱᖕᓂᕐᒥ, ᓄᓇᒥ ᐊᐅᓚᑦᑎᓂᕐᒧᑦ ᐊᒻᒪ ᐃᒻᒥᖕᓂᒃ–ᐊᐅᓚᑦᑎᓂᕐᒧᑦ ᐱᔪᓐᓇᐅᑎᓂᒃ ᐃᓄᖕᓄᑦ. 

ᒫᓐᓇᓕᓴᐅᔪᓂ ᐊᕐᕌᒍᓂ ᐊᒃᓱᕈᕐᓂᕐᔪᐊᓂ ᐃᓕᓯᓯᒪᕗᑦ ᐊᖏᒡᓕᒋᐊᖅᓯᓂᐅᔪᒥ ᐃᓄᐃᑦ ᐃᓕᖅᑯᓯᖏᓐᓄᑦ ᐱᓕᕆᐊᖑᔪᓂ ᐸᐸᑏᓐᓇᕐᓂᕐᒧᑦ ᐃᓄᒃᑎᑐᒻᒥ ᐊᒻᒪ ᐃᓄᐃᓐᓇᖅᑐᒻᒥ, ᑭᓯᐊᓂ ᐊᖏᔪᐊᓗᖕᓂ ᐃᓚᑰᓂᖃᕋᓗᐊᖅᑎᓪᓗᒍ ᓄᓇᕗᒻᒥ ᒐᕙᒪᒃᑯᑦ ᐱᔪᓐᓇᕐᓂᖓᓂ ᑐᓂᓯᓂᕐᒧᑦ ᐃᓄᒃᑎᑐᒻᒥ ᐃᓕᓐᓂᐊᕐᕕᓂᑦ ᐃᓕᓐᓂᐊᕐᓂᓕᕆᔨᒃᑯᑦ ᒥᓂᔅᑕᖓ ᑕᐃᕕᑦ ᔪᐊᓇᓯ ᓇᓚᐅᑦᑖᕆᓂᖓᓂ ᐊᕐᕌᓂ ᑐᕌᒐᒃᓴᖓ ᑎᑭᐅᑎᔭᐅᔪᓐᓇᕐᓂᐊᕐᓂᖓᓂ 2039–ᒥ.

ᐃᓱᒪᒋᓇᒍ ᑎᑭᐅᑎᔪᓐᓇᔾᔮᙱᓐᓂᐅᔪᒥ ᐆᒥᖓ ᐃᑲᔪᖅᓱᐃᓂᕐᔪᐊᖑᔪᒥ ᑐᕌᒐᒃᓴᐅᔪᒥ ᐋᖅᑭᒃᑕᐅᓯᒪᓂᖏᑎᒍᑦ ᓄᓇᕗᒻᒥ ᐊᖏᕈᑕᐅᔪᒥ, ᐅᓄᖅᓯᕙᓪᓕᐊᔪᓂ ᐃᓕᖅᑯᓯᒧᑦ ᑕᖕᒫᕐᓂᐅᔪᓂ ᓴᖅᑭᑦᑐᖃᖅᐸᓪᓕᐊᓕᖅᐳᖅ ᓄᓇᕗᓕᒫᒥ, ᐃᖃᓗᒃᑑᑦᑎᐊᕐᒥ ᐃᖃᓗᖕᓄᑦ ᑲᖏᖅᖠᓂᕐᒧᑦ ᐊᒻᒪ ᐊᒥᓱᒃᑲᓐᓂᕐᓄᑦ ᓄᓇᓕᐅᔪᓄᑦ. ᐅᓇ ᐱᔪᓐᓇᖅᑎᑦᑎᕗᖅ ᐃᓄᑐᖃᕐᓂ ᑐᓂᓯᓂᖏᓐᓂ ᖃᐅᔨᒪᓂᖏᓐᓂ ᐊᒻᒪ ᐊᔪᙱᓐᓂᖏᓐᓂ ᐅᓄᖅᓯᕙᓪᓕᐊᑐᐃᓐᓇᖅᑐᒥ ᐱᔪᒪᔪᓄᑦ ᒪᒃᑯᒃᑐᓄᑦ ᐃᓄᒋᐊᖕᓂᐅᔪᓄᑦ, ᑕᐃᒃᑯᐊᖑᓂᐊᖅᑐᓄᑦ ᐱᓛᕐᓂᖏᓐᓂ ᓄᓇᒥᒃ ᐊᒻᒪᓗ ᑲᒪᒋᔭᖃᕆᐊᖃᕐᓂᐊᖅᑐᒥ ᐃᓄᐃᑦ ᐱᓕᕆᔾᔪᓯᖏᓐᓂ ᐆᒪᑎᑦᑎᓂᕐᒧᑦ ᐊᒻᒪ ᑐᕌᖅᑎᑦᑎᓂᕐᒥ ᓄᓇᕗᒻᒥ ᐱᓕᕆᑦᑎᐊᕈᓐᓇᖅᑐᒧᑦ ᓯᕗᓂᒃᓴᐅᔪᒧᑦ.

ᐱᐅᓂᖅᓴᒥ ᐆᒃᑑᑎᑕᖃᙱᓚᖅ ᑕᐃᒪᐃᑦᑐᒧᑦ ᓯᕗᓕᐅᖅᑎᐅᓂᕐᒧᑦ ᐆᒪᙵᑦ ᒧᒥᓛᖅ ᖃᖅᑲᒥᑦ, ᒫᓐᓇᓕᓴᐅᔪᒥ ᓂᕈᐊᖅᑕᐅᓚᐅᖅᑐᒥ ᐃᓚᒋᔭᐅᔪᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ, ᑕᐃᔅᓱᒪᓂ ᓂᕈᐊᕐᓂᐅᓚᐅᖅᑐᒥ ᑕᐃᒪᓐᓇᑎᒋᐸᓗᒃ ᐅᑭᐅᖃᖃᑎᖃᓚᐅᖅᐳᖅ ᑕᐃᒪᐃᒐᔪᒃᑐᒥ ᐅᑭᐅᖑᔪᒥ ᓄᓇᕘᔪᒥ – ᐊᑕᐅᓯᐅᓪᓗᓂ ᓱᒃᑲᓛᖑᔪᒥ ᐱᕈᖅᐸᓪᓕᐊᔪᒥ ᐊᕕᒃᑐᖅᓯᒪᓂᐅᔪᓄᑦ ᑲᓇᑕᒥ.

ᖃᖅᑲᖅ ᓂᐱᖃᒐᔪᒡᔪᐊᖅᐳᖅ ᑲᓇᑕᐅᑉ ᒪᓕᒐᓕᐅᕐᕕᖓᑕ ᑲᑎᒪᕕᒡᔪᐊᖓᓐᓂ ᐊᒻᒪᓗ ᖃᐃᖁᔨᓯᒪᓂᖃᖅᐳᖅ ᑕᑯᒃᓴᐅᕐᔪᐊᖅᑐᓂ ᐃᓚᑰᓂᐅᔪᓂ ᓱᕐᕋᒃᑕᐅᙱᓐᓂᕐᒧᑦ ᐃᓄᖕᓄᑦ ᐱᔪᓐᓇᐅᑕᐅᔪᓂ ᓄᓇᕗᒻᒥᐅᓄᑦ, ᐃᓚᖃᖅᑐᒥ ᐊᑐᐃᓐᓇᖃᕐᓂᕐᒥ ᐃᒡᓗᖃᕈᓐᓇᕐᓂᐅᔪᒥ, ᓈᒻᒪᒃᑐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ ᐊᒻᒪ ᐱᓕᕆᐊᖑᔪᓂ ᑲᒪᒋᔭᖃᕐᓂᕐᒧᑦ ᐊᑯᓂᐅᔪᒥ–ᓇᖏᕐᓂᖃᖅᑐᓄᑦ ᐊᑲᐅᙱᓕᐅᕈᑕᐅᔪᓄᑦ. 

ᑲᓇᑕ ᐃᓗᐃᑦᑑᓪᓗᓂ, ᒫᓐᓇᓕᓴᒥ ᖁᕕᐊᓱᒍᑎᖃᓚᐅᖅᐳᖅ 153–ᖓᓂ ᓇᓪᓕᐅᓐᓂᖅᓯᐅᕐᓂᖓᓂ, ᐃᖏᕐᕋᕙᓪᓕᐊᒋᕗᖅ ᐃᓕᓴᖅᓯᓂᕐᒥ ᒪᓕᒐᓕᕆᑦᑎᐊᙱᓐᓂᐅᔪᓄᑦ ᑕᐃᔅᓱᒪᓂᐅᓚᐅᖅᑐᒧᑦ. ᑲᓇᑕᐅᑉ ᐊᖓᔪᖅᑳᕐᔪᐊᖓ ᔭᔅᑎᓐ ᑐᕉᑑ ᑕᐃᔅᓱᒪᓂᑐᖃᐅᓚᐅᖅᑐᒧᑦ ᒪᒥᐊᓐᓂᖃᓚᐅᖅᐳᖅ ᑲᒪᒋᔭᖃᑦᑎᐊᙱᓐᓂᐅᔪᒥ ᐳᕙᒡᓗᖕᓂᕐᒧᑦ ᐋᓐᓂᐊᕐᓂᐅᓚᐅᖅᑐᓄᑦ ᕿᑎᖅᐸᓯᐊᓂ 1900–ᐸᓗᖕᓂ ᐊᕐᕌᒍᒋᔭᐅᔪᓄᑦ ᐅᒃᑐᐱᕆ 2019–ᒥ, ᒪᓕᖕᓂᖃᓚᐅᖅᑐᒥ ᒪᒥᐊᓐᓂᐅᔪᒥ ᑕᐃᔅᓱᒪᓂ ᒥᓂᔅᑕᐅᓚᐅᖅᑐᒥ ᑯᐃᓐᒧᑦ–ᓄᓇᖃᖅᑳᖅᓯᒪᔪᓄᑦ ᐱᓕᕆᓂᕐᒧᑦ ᑭᐊᓚᐃᓐ ᐸᓂᑦᒧᑦ ᐱᖅᑯᓯᕆᙱᑕᓄᑦ ᐱᐅᓯᖃᓕᖅᑎᑕᐅᓂᐅᔪᒥ ᖃᓄᐃᓕᐅᕐᓂᐅᔪᓄᑦ ᑕᐃᑲᓂᑦᑕᐃᓐᓇᖅ ᐱᓕᕆᐊᖑᓚᐅᖅᓯᒪᔪᓄᑦ.

ᐅᑯᐊ ᓇᓗᓇᐃᒃᑯᑕᐅᕗᑦ ᐃᖏᕐᕋᓂᐅᔪᒥ, ᑭᓯᐊᓂ ᖃᓂᒡᓕᓂᖃᙱᓚᑦ ᐱᔭᕆᐊᖃᕐᓂᐅᔪᓄᑦ ᖁᕝᕙᕆᐊᖅᑎᑦᑎᓂᕐᒧᑦ ᑲᓇᑕᐅᑉ ᐃᓄᖕᓂ ᓱᓕᓂᐅᔪᒧᑦ ᓇᓕᒧᑎᑕᐅᓂᖏᓐᓄᑦ.

ᓄᕙᒡᔪᐊᕐᓇᖅ-19 ᓱᕋᑦᑎᕆᓯᒪᕐᔪᐊᕐᓂᖓᓄᑦ ᓄᓇᕐᔪᐊᒥ ᑮᓇᐅᔾᔭᒃᓴᒍᓐᓇᕐᓂᐅᔪᒥ ᐊᒻᒪ ᐊᓯᔾᔩᓯᒪᓪᓗᓂ ᑕᒪᒃᑭᑦᑎᐊᖅ ᐃᓱᒪᒋᓯᒪᔭᑦᑎᓐᓂ, ᓄᓇᕗᒻᒥᐅᑦ ᑕᑯᒃᓴᐅᑎᑦᑎᓯᒪᕗᑦ ᓄᓇᕐᔪᐊᒥ ᐃᓱᒪᒋᔭᖃᑦᑎᐊᕐᓂᐅᔪᒥ ᐃᓱᒪᓕᐅᕆᓂᕐᓂ, ᐸᖅᑭᓂᕐᒧᑦ ᐊᑐᓂ ᓄᓇᓕᒋᔭᖏᓐᓄᑦ ᐊᒻᒪ ᑕᑯᒃᓴᐅᑎᑦᑎᓂᕐᒥ ᐃᓚᑰᑎᑦᑎᙱᓐᓂᐅᔪᒥ ᑕᕐᓂᖃᕐᓂᕐᒥ ᐱᔭᕆᐊᖃᕐᓂᖏᓐᓂ ᐃᒻᒥᖕᓂᑦ ᐊᑦᑕᓇᔾᔭᐃᖅᓯᓯᒪᓂᕐᒧᑦ.

ᐅᓇ ᓄᓇᕘᑉ ᐅᓪᓗᖓ ᑭᒡᒐᖅᑐᐃᕗᖅ ᐊᓯᖓᓐᓂ ᐱᓱᖕᓂᐅᔪᒥ ᑐᕌᒐᒃᓴᐅᔪᓄᑦ ᐋᖅᑭᒃᑕᐅᓯᒪᔪᓄᑦ ᓄᓇᕗᒻᒥ ᐊᖏᕈᑕᐅᔪᒥ, ᐊᒻᒪ ᖁᕕᐊᓲᑎᖃᓪᓗᐊᖅᐳᑦ.