ᐸᓖᓯᒧᑦ–ᐱᔾᔪᑕᐅᔪᒥ ᑐᖁᓂᖅᑕᖃᒃᑲᓐᓂᕆᕗᖅ ᓄᓇᕗᒻᒥ ᐊᒻᒪ ᓱᓕ ᖃᐅᔨᓴᖅᑕᐅᒃᑲᓐᓂᕐᓂᐅᔪᒥ ᐋᑐᕚᒥ ᐸᓖᓯᒃᑯᓐᓂ ᐱᔨᑦᑎᕋᕐᓂᐅᔪᒥ, ᑭᓯᐊᓂ ᐊᔾᔨᓕᐅᕆᔭᐅᓂᑯᒥ ᐊᑐᕈᓐᓇᙱᓐᓂᕐᒧᑦ ᖃᓄᐃᓐᓂᐅᔪᒥ ᑎᒥᒧᑦ ᐊᑕᔪᒥ ᐊᔾᔨᓕᐅᕈᑕᐅᔪᒥ ᑐᓂᓯᔪᓐᓇᕋᔭᓚᐅᕐᓂᖓᓂ, ᐸᓖᓯᒃᑯᑦ ᐱᓕᕆᐊᒃᓴᖃᓕᖅᐳᑦ ᑲᑎᖅᓱᐃᓂᖏᓐᓂ ᐅᓂᒃᑳᕆᓂᐅᔪᒥ ᐱᔪᓐᓇᕐᓂᓕᒫᖓᓐᓂ ᐅᖃᐅᓯᐅᓂᐅᔪᒃᑯᑐᐊᖅ.
photo courtesy of RCMP
ᒫᓐᓇᓕᓴᐅᓛᖑᔪᒥ ᖁᑭᖅᓯᓂᐅᓚᐅᖅᑐᒥ ᑲᖏᖅᖢᒑᐱᖕᒥ ᒪᐃ 5,–ᒥ ᒪᕐᕈᖓᓄᑦ ᒫᓐᓇᓕᓴᐅᓛᖑᔪᒥ ᑭᙵᕐᓂ ᕕᕈᐊᕆ 26–ᒥ, ᐊᓯᖓᓄᑦ ᖁᑭᐅᓯᔭᕐᓂᐅᔪᒥ ᑭᙵᕐᓂ ᐃᖃᓗᖕᒥᐅᑕᒥ ᐊᖑᒻᒧᑦ ᐃᖅᑲᖅᑐᒐᒃᓴᙳᖅᖢᓂ ᑎᒃᑯᐊᖅᓯᓂᖓᓂ ᖁᑭᐅᒻᒥ ᑲᓇᑕᒥ ᐸᓖᓯᒃᑯᓐᓄᑦ, ᓱᑲᖓᓂᐅᔪᑦ ᖁᑦᑎᓛᖑᓂᐅᔮᖅᐳᖅ ᓄᓇᕗᒻᒥ.
ᑲᑉᐱᐊᓇᖅᑐᓂ ᐊᒻᒪ ᐅᓗᕆᐊᓇᖅᑐᓂ ᖃᓄᐃᓐᓂᐅᔪᓂ ᑕᐃᒪᐃᒐᔪᓕᕐᓂᖓᓂ ᐃᓄᑭᓛᖑᔪᒥ ᑲᓇᑕᐅᑉ ᐊᕕᒃᑐᖅᓯᒪᓂᖓᓂ ᐅᕝᕙᓘᓐᓃᑦ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᒥ, ᑲᓇᑕᒥ ᐸᓖᓯᒃᑯᑦ ᐱᐅᒋᓂᖅᓴᐅᔭᖓ ᒫᓐᓇᐅᔪᒥ ᖃᓄᐃᓕᖓᓂᐅᔪᒥ ᐋᖅᑭᒃᓯᒪᓂᐅᕗᖅ ᐱᓂᕐᓗᒡᔪᐊᕐᓂᐅᔪᒧᑦ ᐊᒻᒪ ᖃᓄᐃᓕᐅᕐᓂᖃᔾᔮᙱᓚᑦ ᒪᒥᓴᐃᓂᕐᒧᑦ ᐱᓕᕆᖃᑎᖃᕐᓂᐅᔪᒥ ᒪᓕᒐᓕᐅᖅᑎᐅᔪᓂ ᐊᒻᒪ ᓄᓇᕗᒻᒥᐅᓂ, ᐅᖃᓚᐅᖅᑕᑦᑎᓐᓂ ᒫᔾᔨ 19–ᒥ ᑎᑎᕋᐅᓯᐅᓂᐅᓚᐅᖅᑐᒥ.
ᒫᓐᓇ ᓄᓇᕘᑉ ᑲᓇᑕᒥ ᒪᓕᒐᓕᐊᕆᔭᐅᔪᓂᒃ ᐅᖃᐅᔾᔨᔨᖓ, ᑕᓂᔅ ᐹᑐᓴᓐ, ᐊᒻᒪ ᐃᓚᒋᔭᐅᔪᖅ ᑲᓇᑕᐅᑉ ᒪᓕᒐᓕᐅᖅᑎᖏᑕ ᒧᒥᓛᖅ ᖃᖅᑲᖅ, ᐃᓚᐅᖃᑕᐅᓕᖅᐳᑦ ᑐᓄᓂᕐᒧᑦ ᒪᓕᒐᓕᐅᖅᑎ ᑕᐃᕕᑦ ᖃᒪᓂᕐᒥ ᐅᓇᑕᕐᓂᐅᔪᒥ ᐃᑲᔪᖅᓱᐃᓂᕐᒥ ᐃᓕᓯᓂᐅᔪᒥ ᑎᒥᒧᑦ ᐊᑕᔪᒥ ᐊᔾᔨᓕᐅᕈᑕᐅᔪᓂ.
ᐹᑐᓴᓐ ᐅᖃᐅᓯᖃᖅᐳᖅ “ᓱᕋᑦᑎᕙᓪᓕᐊᓂᖃᕐᓂᖓᓂ ᐅᒃᐱᕈᓱᖕᓂᐅᔪᒥ ᐅᑯᓇᓂ ᑲᓇᑕᒥ ᐸᓖᓯᒃᑯᓐᓂ ᐊᒻᒪ ᓄᓇᕗᒻᒥᐅᓂ ᐊᔪᕐᓇᖅᑎᑦᑎᔪᒥ ᑎᑭᐅᒪᑎᑦᑏᓐᓇᕐᓂᕐᒧᑦ ᐱᓕᕆᐊᒃᓴᒥᓂ ᐱᔨᑦᑎᕋᕐᓂᕐᒧᑦ ᐊᒻᒪ ᓴᐳᔾᔨᓂᕐᒧᑦ.”
ᐊᒻᒪᓗ ᑲᓇᑕᒥ ᐸᓖᓯᒃᑯᑦ ᐆᒥᖓ ᖃᐅᔨᒪᒋᕗᑦ. ᐊᓯᖏᓐᓂ ᐱᔪᓐᓇᕐᓂᖃᕐᓂᐅᔪᓂ, ᐊᒻᒪ ᓄᓇᕐᔪᐊᓕᒫᒥ, ᐊᑐᐊᒐᐅᔪᓂ ᐊᔾᔨᓕᐅᕆᓂᕐᒧᑦ ᐊᔾᔨᓕᐅᖅᑕᐅᓂᑯᓂ ᓇᓗᓇᐃᒃᑯᑕᑦᑎᐊᕙᐅᓛᖑᕗᖅ ᐱᓕᕆᐊᕆᔭᐅᓂᖓᓂ ᓱᓕᓂᐅᔪᒥ ᐊᒻᒪ ᐱᓕᕆᓂᑦᑎᐊᕙᐅᕗᖅ ᖃᐅᔨᓇᓱᐊᕐᓂᕐᒥ ᑕᒻᒪᕐᓂᐅᔪᒥ ᐊᒻᒪ ᐃᓕᓐᓂᐊᖅᑎᑦᑎᓂᕐᒥ ᒫᓐᓇ ᐸᓖᓯᐅᔪᓂ ᐱᓕᕆᔾᔪᓯᖏᓐᓂ ᐊᒻᒪ ᖁᑦᑎᒃᑐᒥ–ᐱᓕᕆᓂᐅᔪᓄᑦ ᐃᓱᒪᓕᐅᕆᓂᕐᓂ.
ᐃᒪᐃᒃᑲᔭᕆᕗᖅ, ᖃᖅᑲᖅ ᐅᖃᐅᓯᕆᔭᖓᓂ, ᑐᓂᓯᓇᔭᖅᐳᖅ “ᑐᑭᓯᐅᒪᓂᖅᓴᐅᔪᓐᓇᕋᔭᖅᐳᒍᑦ ᐊᒃᓱᕈᕐᓂᐅᔪᓂ ᐊᒻᒪ ᐱᕕᒃᓴᖃᕐᓗᓂ ᐱᐅᓯᒋᐊᒃᑲᓐᓂᕐᓂᐅᔪᒥ ᐃᓗᐊᓂ ᒪᓕᒐᓕᕆᓂᕐᓄᑦ ᐱᓕᕆᔾᔪᓯᐅᔪᒥ.”
ᐱᒻᒪᕆᐅᓂᖅᓴᐅᔪᒥ ᐸᓖᓯᒃᑯᓐᓄᑦ, ᑎᒥᒧᑦ ᐊᑕᔪᒥ ᐊᔾᔨᓕᐅᕈᑕᐅᔪᓂ ᐊᔾᔨᓕᐅᕆᔭᐅᓂᑯᓂ ᐱᔨᑦᑎᕋᕐᓂᖃᕋᔭᖅᐳᖅ ᐸᓖᓯᐅᔪᓄᑦ ᐸᓯᔭᐅᔪᓂ ᑕᒻᒪᖅᖢᑎᒃ ᐱᓕᕆᓚᐅᕐᓂᖏᓐᓂ ᓱᓕᓂᐅᔪᖅ ᐊᑲᐅᙱᓕᐅᕈᑕᐅᑎᓪᓗᒍ.
ᓄᓇᕘᑉ V ᐊᕕᒃᓯᒪᓂᐅᔪᒥ ᓯᕗᓕᐅᖅᑎᖓ, ᐊᖓᔪᖅᑳᖅ ᐊᒫᓐᑕ ᔫᓐᔅ ᓯᕗᓂᐊᓂ ᐅᖃᐅᓯᖃᖅᓯᒪᕗᖅ ᓇᓗᓇᖅᑐᒥ ᐊᐅᓚᑕᐅᓂᖓᓂ ᐊᒃᓱᕈᕐᓂᐅᔪᓂ ᐊᒻᒪ ᑮᓇᐅᔭᖅᑕᖃᙱᓗᐊᕐᓂᖓᓂ ᐱᔾᔪᑎᓪᓗᐊᑕᐅᓂᖓᓂ ᖃᓄᐃᒻᒪᑦ ᐅᑯᐊ ᐊᔾᔨᓕᐅᕈᑕᐅᔪᑦ ᐊᑐᖅᑕᐅᕙᙱᓐᓂᖏᓐᓂ, ᑭᓯᐊᓂ ᐊᑭᖏᑦ ᐅᑯᓄᖓ ᖁᑦᑎᓗᐊᖅᑐᒃᓴᐅᕗᑦ ᑲᓇᑕᒥ ᐸᓖᓯᒃᑯᑦ ᐱᔨᑦᑎᕋᕐᓂᕐᒧᑦ ᐱᒻᒪᕆᐅᒍᓱᙱᒃᑯᑎᒃ ᐊᑐᕐᓂᕐᒧᑦ ᐅᑭᐅᖅᑕᖅᑐᒥ ᐱᔪᓐᓇᕐᓂᖃᕐᓂᐅᔪᓂ.
ᐅᓇ ᑭᐅᓂᐅᔪᖅ, ᐊᒻᒪ ᐱᑕᖃᙱᓗᐊᕐᓂᖓᓂ ᐃᖏᕐᕋᓂᐅᔪᒥ ᓯᕗᓪᓕᖅᐹᒥ ᐱᓕᕆᐊᕆᔭᐅᔪᒪᔪᒥ ᐃᖃᓗᖕᓂ, ᓴᖅᑭᑎᑦᑎᕗᖅ ᑲᓇᑕᒥ ᐸᓖᓯᒃᑯᑦ ᐱᒋᐊᕐᓂᖓᓄᑦ ᐱᓕᕆᓂᖓᓃᙱᒻᒪᕆᖕᒪᑦ ᐊᑐᓕᖅᑎᑦᑎᓂᕐᒥ ᓄᑖᖑᔪᓂ ᐊᑐᐊᒐᐅᔪᓂᑦ.
ᑭᓯᐊᓂ ᑕᑯᒃᓴᐅᑎᑦᑎᔫᔮᕆᕗᖅ ᐱᓕᕆᓂᖃᕈᒪᙱᓐᓂᖏᓐᓂ. ᑎᒥᒧᑦ ᐊᑕᔪᒥ ᐊᔾᔨᓕᐅᕈᑕᐅᔪᓂ ᐊᒻᒪᓗ ᐱᕙᓪᓕᐊᔪᓐᓇᕆᐊᒃᓴᖓ ᓂᕈᐊᒐᒃᓴᐅᙱᓪᓚᕆᒃᑯᓂ ᐅᑭᐅᖅᑕᖅᑐᒥ, ᑲᓇᑕᒥ ᐸᓖᓯᒃᑯᑦ ᓴᖅᑭᑎᑦᑎᓪᓗᐊᖅᐳᑦ ᐊᑲᐅᙱᓕᐅᕈᑕᐅᔪᓂ ᓇᓚᐅᓯᒪᑦᑎᐊᖅᑐᒥ ᐃᓄᓕᒫᓄᑦ ᐊᒻᒪ ᑕᑯᒃᓴᐅᑎᑦᑎᓗᑎᒃ ᖃᓄᐃᒻᒪᑦ ᓂᕈᐊᒐᒃᓴᐅᙱᓐᓂᖓᓂ ᑐᓂᓯᑐᐃᓐᓇᙱᓪᓗᑎᒃ ᐃᓱᒫᓘᑕᐅᔪᒥ ᖁᑦᑎᓛᖑᔪᓄᑦ ᐊᖓᔪᖅᑳᖑᔪᓄᑦ ᐋᑐᕚᒥ.
ᐱᓪᓚᕆᐅᔪᓂ ᑎᑎᖅᑲᖁᑎᖃᕐᓂᐅᔪᒥ ᐱᒻᒪᕆᐅᒋᔭᐅᕐᔪᐊᖅᐳᖅ ᓄᓇᕐᔪᐊᒥ ᑎᑎᕋᐃᓂᐅᔪᒥ ᑐᓴᒐᒃᓴᓂᑦᑕᐅᖅ. ᐱᓕᕆᓂᖃᖅᐳᖅ ᓴᐳᔾᔨᓯᒪᓂᐅᔪᒥ ᑕᐃᒃᑯᓄᖓ ᑐᕌᖅᑎᑦᑎᓂᖃᖅᐸᒃᑐᓂ ᓱᓕᓂᐅᔪᓂ ᐅᓂᒃᑳᕆᓂᑦᑎᓐᓂ ᐊᒻᒪ ᓴᐳᔾᔨᓂᐅᕗᑦ ᐅᕙᑦᑎᓐᓄᑦ ᐱᙳᐊᖅᑐᓄᑦ ᐅᖃᖅᐸᒃᑐᓄᑦ ᐱᓕᕆᐊᖃᕈᓐᓃᖅᑎᑦᑎᓂᐊᕐᓂᕋᐃᔪᓂᑦ. ᑕᐃᒪᓐᓇᑎᒋ ᐊᔾᔨᐸᓗᐊᓂ ᐅᖃᐅᓯᐅᔪᓐᓇᖅᐳᖅ ᐸᓖᓯᒃᑯᓐᓂ ᐱᓕᕆᓂᐅᔪᒥ, ᑭᓯᐊᓂ ᐱᓕᕆᓂᖓᑦ ᐱᔾᔪᑎᖃᖅᐳᖅ ᐆᒪᓂᕐᒧᑦ ᐊᒻᒪ ᑐᖁᓂᐅᔪᒥ. ᓄᓇᕗᒻᒥ ᐸᓖᓯᒃᑯᑦ ᓵᙵᕗᑦ ᖁᒻᒧᑦ ᖃᓕᕈᓯᕐᒧᑦ ᐅᓇᑕᕐᓂᐅᔪᒥ ᓵᓚᖃᕋᓱᐊᕐᓂᕐᒥ ᐅᒃᐱᕆᔭᐅᓂᖏᓐᓂ ᑕᐃᒃᑯᓄᖓ ᐱᓕᕆᔾᔪᔾᔨᕆᐊᖃᖅᑕᒥᓂᑦ ᓴᐳᔾᔨᓯᒪᓂᕐᒧᑦ ᐊᒻᒪᓗ ᑎᒥᒧᑦ ᐊᑕᔪᒥ ᐊᔾᔨᓕᐅᕈᑎᖃᕐᓇᑎᒃ, ᑕᒪᓐᓇ ᐱᓕᕆᐊᒃᓴᖅ ᐊᔪᕐᓇᑦᑎᐊᑲᓴᒃᑑᔮᖅᐳᖅ.