Skip to content

EDITORIAL: ᐃᓱᒪᒃᓴᖅᓯᐅᒃᑲᓐᓂᕐᓗᑎᑦ ᐊᐅᓪᓛᓚᐅᙱᓐᓂᕐᓄᑦ ᖃᓪᓗᓈᑦ ᓄᓇᖓᓐᓄᑦ

ᓯᕗᓕᖅᑎ ᔫ ᓴᕕᑲᑖᖅ ᐊᒻᒪ ᑲᑎᙵᓂᖃᑎᒋᔭᖏᑦ ᑕᑯᒃᓴᐅᑎᑦᑎᓚᐅᖅᐳᑦ ᓄᓇᕗᒻᒥᐅᓂ ᐅᒡᒍᐊᕐᓂᐅᔪᒥ ᒪᒥᐊᓐᓂᖓᓄᑦ ᐃᓕᓴᐃᔨᓄᑦ ᐱᔾᔪᑎᖃᖅᑐᒥ ᐃᒃᐱᒍᓱᑦᑎᐊᕐᓂᖃᙱᓐᓂᐅᔪᒥ ᐅᖃᐅᓯᖏᓐᓂ ᐱᓇᓱᐊᕈᓯᐅᓚᐅᖅᑐᒥ.

ᐅᓇ ᑕᑯᔭᐅᒐᔪᙱᕕᒡᔪᐊᖅᑐᖅ ᑲᑎᒪᔨᕐᔪᐊᖑᔪᓂ ᐊᒻᒪ ᑐᓴᕈᒥᓇᓚᐅᖅᐳᖅ ᓄᕙᒡᔪᐊᕐᓇᖅ ᐊᑦᑕᓇᕐᓂᐅᔪᒥ, ᐅᔾᔨᕆᓪᓗᓂ ᒐᕙᒪᑐᖃᒃᑯᓐᓂ ᓯᕗᓕᐅᖅᑎᐅᔪᑦ ᓱᓕ ᐅᖃᕆᐊᖃᕐᓂᖏᓐᓂ ᑕᒻᒪᕐᓂᑯᖏᓐᓄᑦ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒥ ᑲᓇᑕᒨᖅᑎᑦᑕᐃᓕᒪᓂᕐᒧᑦ ᐅᕝᕙᓘᓐᓃᑦ ᑐᓴᖅᑎᑦᑎᓂᕐᒥ ᐱᒻᒪᕆᐅᔪᓂ ᐅᖃᐅᓯᒃᓴᓂ ᒥᒃᖠᒋᐊᖅᑎᑦᑎᔪᓐᓇᕋᔭᓚᐅᖅᑐᒥ ᐊᑦᑕᓇᕐᓂᐅᔪᒥ ᓵᙵᓕᖅᑕᑦᑎᓐᓂ ᒫᓐᓇᒥ.

ᐊᔾᔨᐸᓗᐊᓂ ᑕᑯᒃᓴᐅᑎᑦᑎᓂᐅᔪᒥ ᐃᓅᓂᐅᔪᒥ ᓄᓇᕗᒻᒥ ᑲᑎᒪᔨᐅᔪᓄᑦ ᑕᑯᒃᓴᐅᓚᐅᕆᕗᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔪᐊᔾ ᕼᐃᒃᔅ ᐅᖃᐅᓯᖃᓚᐅᖅᑎᓪᓗᒍ ᓴᖑᓂᐅᔪᒥ ᐃᓱᒪᓕᐊᖑᔪᒥ ᐊᑭᓖᖃᑦᑕᔾᔮᕈᓐᓃᕐᓂᖏᓐᓂ ᐅᐸᒃᑕᐅᑦᑕᐃᓕᒪᓂᐅᔪᒥ ᐊᑭᓕᐅᑎᓂᒃ ᑕᐃᒃᑯᓄᖓ ᐊᐅᓪᓛᖅᐸᒃᑐᓄᑦ ᑕᐃᒪᙵᓂ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᐊᕕᕐᓇᖅᑐᒥ ᐱᒋᐊᓚᐅᖅᑎᓪᓗᒍ.
ᓯᕗᓪᓕᕐᒥ ᐸᕐᓇᒍᑎ ᑕᐃᒃᑯᓂᖓ ᓴᓇᔪᓂᒃ "ᐱᓪᓚᕆᐅᙱᑦᑐᒥ" ᐊᐅᓪᓛᕐᓂᐅᔪᓂ ᖃᓪᓗᓈᑦ ᓄᓇᖓᓐᓄᑦ ᐊᑭᓖᓂᖏᓐᓂ ᐊᑭᐅᔪᓂ ᐃᓕᔭᐅᓂᖏᓐᓂ ᓄᓇᕗᒻᒥ ᒐᕙᒪᒃᑯᓐᓄ–ᐊᖏᖅᑕᐅᓯᒪᔪᓄᑦ ᐊᒻᒪ ᐋᖅᑭᒃᓱᖅᑕᐅᓯᒪᕙᒌᖅᑐᓄᑦ ᐃᓂᐅᔪᒥ ᐊᑭᖃᐸᓗᒃᑐᒥ $2,100–ᒥ.

ᐅᓇ ᐱᔾᔪᑎᖃᕐᓂᕈᓂ ᐅᖁᒪᐃᓐᓂᐅᔪᒥ ᐱᓕᕆᑦᑎᐊᕈᒪᓂᕐᒧᑦ ᒐᕙᒪᒃᑯᓐᓂ ᐊᑭᓕᒐᒃᓴᓕᐅᖅᑎᑦᑎᔪᒪᓇᑎᒃ ᐊᒃᓱᕈᓗᐊᕌᓂᒃᑐᓄᑦ ᓄᓇᕗᒻᒥᐅᓂ ᐅᕝᕙᓘᓐᓃᑦ ᓇᓗᓇᖅᑐᒥ ᐊᐅᓚᑕᐅᓂᖓᓂ ᐊᒥᓱᓄᑦ ᐊᑐᖅᑕᐅᔪᓂ ᐊᑭᖓᓐᓂ ᐅᑎᖅᑎᕆᓂᕐᒥ ᐊᑭᓕᐅᑎᓂᑦ ᑕᐅᑐᒃᖢᒍ ᖃᓄᖅ ᐊᑭᖃᕋᔭᕐᓂᖓᓂ ᐊᑭᓖᖔᕐᓂᕐᒥ ᐊᑭᓕᒐᒃᓴᓂ ᐃᒻᒥᓂᒃ, ᐃᓄᓕᒫᑦ ᖃᐅᔨᓪᓚᕆᓚᐅᖅᓯᒪᔾᔮᙱᓚᑦ.

ᖃᐅᔨᒪᔭᐅᔪᖅ ᒫᓐᓇᒧᑦ ᑎᑭᖦᖢᒍ 1,000 ᐅᖓᑖᓂ ᓄᓇᖃᖅᑎᐅᔪᑦ ᐅᐸᒃᑕᐅᑦᑕᐃᓕᒪᓯᒪᕗᑦ ᖃᓪᓗᓈᑦ ᓄᓇᖓᓐᓂ, ᐱᓪᓚᕆᐅᔪᑦ ᐊᒻᒪ ᐊᓯᖏᑦ, ᐊᒻᒪ ᐊᑭᖃᖅᓯᒪᕗᖅ ᓄᓇᕗᒻᒥ ᒐᕙᒪᒃᑯᓐᓄᑦ $4 ᒥᓕᐊᓐ–ᑲᓴᑦᑎᐊᓂ.

ᕼᐃᒃᔅ ᑕᐃᓯᒪᕙᖓ ᐆᒥᖓ ᐸᕐᓇᒍᑕᐅᔪᒥ ᐃᓕᓯᒪᑦᑎᐊᖅᑐᒥ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᓂ ᐊᒻᒪ ᑮᓇᐅᔭᐃᑦ ᐊᑐᖅᑕᐅᔪᓂ ᓇᓗᓇᐃᖅᓯᓂᕐᒧᑦ ᓄᓇᕗᑦ ᓄᕙᒡᔪᐊᕐᓇᖃᙲᓐᓇᕐᓂᖓᓂ.

ᐱᐅᕗᖅ ᑐᓴᖅᖢᓂ ᐅᑯᐊ ᐅᓄᕐᓂᐅᔪᑦ ᑐᑭᓕᐊᑦᑎᐊᕐᓂᖏᓐᓂ ᓯᕗᓪᓕᕐᒥ ᓇᓚᐅᑦᑖᕆᔭᐅᓯᒪᔪᓄᑦ, ᑭᓯᐊᓂ ᐅᔾᔨᕈᓱᓪᓗᐊᖅᐳᑦ ᐃᓱᖃᕐᓂᖓᓂ ᓈᓴᐅᑎᓂ ᐊᖏᓂᖓᓂ ᑮᓇᐅᔭᓂᒃ ᑮᓇᐅᔭᒃᑯᕕᖕᒥ ᓄᓇᕗᒻᒥ ᒐᕙᒪᒃᑯᑦ ᐃᑲᔪᖅᓱᐃᔪᓐᓇᕐᓂᕆᔭᖏᓐᓄᑦ ᑕᒪᑐᒪᓂ ᐊᒃᓱᕈᕐᓇᕐᓂᐅᔪᒥ ᐊᒻᒪ ᐊᒥᓱᑦ ᑲᓱᒃᑐᖅᓯᒪᕗᑦ.

ᓇᓗᓇᐃᖅᓯᓂᐅᔪᖅ ᐱᓕᕆᐊᖑᔪᒥ–ᐱᓕᕆᐊᖑᔪᒧᑦ ᐋᖅᑭᒃᑕᐅᔪᖃᓪᓗᐊᓚᐅᖅᐳᖅ ᐅᖃᐅᓯᒃᓴᓕᐅᖅᑐᖃᓚᐅᖅᑳᕋᓂ ᑭᓇ ᐊᑭᓖᓇᔭᕐᓂᖓᓂ ᐊᑭᓕᒐᒃᓴᐅᔪᓂ ᐅᐸᒃᑕᐅᑦᑕᐃᓕᒪᓂᐅᔪᒥ ᐊᑭᓕᐅᑎᒃᓴᓄᑦ. ᐱᓪᓚᕆᐅᙱᑦᑐᒥ ᐊᐅᓪᓛᕐᓂᖅ ᑭᓱᑐᐃᓐᓇᐅᕗᖅ ᐃᓅᓕᓴᖅᑕᐅᔭᖅᑐᙱᑦᑐᒧᑦ ᐅᕝᕙᓘᓐᓃᑦ ᐱᓂᖃᙱᑦᑐᒥ ᐃᖅᑲᓇᐃᔮᖑᔪᓄᑦ ᓲᕐᓗ ᓂᕿᒃᓴᓂ ᐊᒻᒪ ᐆᒻᒪᖅᑯᑎᓂ ᐃᖏᕐᕋᐃᓐᓇᕐᓂᖏᓐᓄᑦ. ᑐᑭᖓ ᑭᓯᐊᓂ, ᐃᓱᒪᒋᔭᖃᖅᑐᒥ ᐊᐅᓪᓛᕐᓂᐅᔪᑦ ᖃᓪᓗᓈᑦ ᓄᓇᖓᓐᓄᑦ ᐃᓚᖏᑦ ᓂᐅᕕᕆᐊᖅᖢᑎᒃ ᐱᖁᑎᓄᑦ ᐊᑭᖃᕋᔭᓪᓗᐊᖅᑐᓄᑦ ᐊᑭᑐᔪᒻᒪᕆᐊᓗᖕᒥ ᐊᖏᕐᕋᖓᓂ ᓄᓇᓕᖏᓐᓂ ᐊᒥᓱᐃᑦ ᐱᓪᓚᕆᐅᒋᔭᐅᕙᖕᓂᖏᓐᓂ.

ᐊᐅᓪᓛᕐᓂᕐᒧᑦ ᖃᓪᓗᓈᑦ ᓄᓇᖓᓐᓄᑦ ᐱᓪᓚᕆᐅᔪᒧᑦ ᐳᓚᕋᕐᓂᐅᔪᒥ ᐃᓚᒌᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐅᕝᕙᓘᓐᓃᑦ ᐊᐃᒃᓯᕐᓂᕐᒧᑦ ᐱᔭᐅᔭᕆᐊᖃᓪᓚᕆᒃᑐᓂ ᓱᓇᒃᑯᑖᓂᑦ, ᑭᓯᐊᓂ ᖃᓱᓴᕆᐊᑐᐃᓐᓇᕐᓂᕐᒨᙱᑦᑐᖅ ᐅᕝᕙᓘᓐᓃᑦ ᐊᓯᐊᓄᑦ ᓄᓇᓕᐊᓚᐅᑲᑐᐃᓐᓇᕐᓂᕐᒨᙱᑦᑐᖅ.

ᓄᓇᕗᒻᒥᐅᑦ ᐅᔾᔨᕈᓱᓪᓗᐊᖅᐳᑦ ᐊᒃᓱᕈᕐᓂᐅᔪᑦ ᓴᖅᑭᑕᐅᔪᓄᑦ ᓄᕙᒡᔪᐊᕐᓇᕐᒧᑦ ᐃᒃᐱᒋᔭᐅᓂᖏᓐᓂ ᑲᓇᑕᓕᒫᒥ ᐊᒻᒪ ᐊᒥᓱᑦ ᐊᒃᓱᕈᕐᓇᖅᑐᓂ ᓴᒃᑯᐃᑦᑎᓂᕐᒥ ᐱᓐᓇᕆᔭᐅᔪᒥ ᒫᓐᓇᐅᔪᒥ.
ᐅᓗᕆᐊᓇᕐᓂᐅᒋᕗᖅ ᑕᒪᐃᑎᒍᑦ ᐃᓄᓕᒫᓄᑦ ᐋᓐᓂᐊᖃᖅᑕᐃᓕᒪᑎᑦᑎᓂᕐᒧᑦ ᐊᐅᓪᓛᕐᓂᖃᕐᓂᕐᒧᑦ ᓄᓇᕗᑦ ᐱᓕᕆᓯᒪᑦᑎᐊᖅᑐᒻᒪᕆᐊᓘᒐᓗᐊᖅᑎᓪᓗᒋᑦ ᓄᕙᒡᔪᐊᕐᓇᖃᖅᑎᑦᑎᙱᓐᓂᐅᔪᒥ.
ᐅᑯᐊ ᖃᓪᓗᓈᑦ ᓄᓇᖓᓄᑦ ᐊᐅᓪᓛᕐᓂᐅᔪᑦ ᐱᓪᓚᕆᐅᔪᒥ ᐊᑭᖃᖅᐳᑦ ᐊᑭᓕᖅᑕᐅᓂᐊᖅᑐᓄᑦ, ᒫᓐᓇᐅᙱᒃᑲᓗᐊᕈᓂ, ᓯᕗᓂᒃᓴᒥ ᓄᓇᕗᒻᒥᐅᓕᒫᓄᑦ ᐊᒻᒪ ᑭᒃᑯᓕᒫᑦ ᐊᒃᓱᕈᕐᓗᑎᒃ ᐃᓱᒪᓇᓱᐊᓪᓗᐊᖅᐳᑦ ᐊᐅᓪᓛᕐᓂᐅᔪᒥ ᖃᓪᓗᓈᑦ ᓄᓇᖓᓐᓄᑦ ᒫᓐᓇᐅᔪᒥ ᐊᑑᑎᖃᓪᓚᕆᒃᑲᓗᐊᕐᒪᖔᑦ.