ᑲᓇᑕᒥ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐅᓪᓗᖓᓂ ᕿᓚᒻᒥᐅᔪᒥ ᑎᑭᓐᓂᐊᓕᖅᐳᖅ, ᑭᓯᐊᓂ ᐃᓱᒪᒋᓇᒍ ᑎᑭᐅᑎᕐᔪᐊᖅᓯᒪᓂᐅᔪᓂ ᓄᓇᕗᒻᒥ ᐃᓅᔪᓂᑦ, ᓱᓕ ᓵᙵᓂᖃᖅᐳᑦ ᐃᓚᐃᓐᓈᕐᓂᖃᕐᔪᐊᖅᓯᒪᕗᑦ ᐅᕘᓇ ᐱᖅᑯᓯᕆᙱᑖᓄᑦ ᐱᐅᓯᖃᓕᖅᑎᑕᐅᓂᕐᒥ ᐱᓕᕆᔾᔪᓯᐅᔪᒥ.

ᐅᑯᐊ ᐃᓚᐃᓐᓈᕐᓂᖃᕐᓂᐅᔪᑦ ᑕᐃᒪᐃᓯᒪᕗᑦ ᐊᑯᓂᐅᓂᐅᔪᒥ ᑲᓇᑕᒥ ᑐᒥᖏᓐᓂ ᐃᒃᐱᒋᔭᐅᓯᒪᓂᖓᓂ ᐅᑭᐅᖅᑕᖅᑐᒥ ᑭᓯᐊᓂ ᒫᓐᓇᓕᓴᐅᔪᒥ ᐅᔾᔨᕐᓇᖅᓯᑕᐃᓐᓇᖅᐳᑦ ᐱᐅᙱᑦᑐᒻᒪᕆᐊᓗᖕᒥ ᑲᓇᑕᒥ ᐸᓖᓯᒃᑯᓐᓂ ᖃᓄᐃᓐᓂᐅᓚᐅᖅᑐᒥ ᓄᓇᓕᐅᔪᒥ ᑭᙵᕐᓂ.

ᓄᓇᕐᔪᐊᖅ ᖁᒃᓴᓪᓚᒡᔪᐊᖅᓯᒪᑎᓪᓗᒋᑦ ᑐᖁᓂᐅᔪᒥ ᔪᐊᔾ ᕗᓗᐊᐃᑦᒥ ᒥᓂᐋᐳᓕᔅᒥ ᐸᓖᓯᐅᔪᒧᑦ, ᐸᓖᓯᒥᒃ ᑭᙵᕐᓂ ᑕᕐᕆᔭᓕᐊᖑᓚᐅᖅᐳᖅ ᐋᓐᓂᖅᓯᕆᓪᓗᓂ ᐋᖓᔮᖅᑐᒥ ᐊᖑᒻᒥ ᓇᖏᕈᓐᓇᙱᑲᓴᒃᑐᒥ.

ᐊᒻᒪᓗ ᐊᖑᑦ ᐋᓐᓂᐊᖅᑎᑕᐅᓚᐅᕋᓗᐊᖅᑎᓪᓗᒍ, ᐊᓄᓪᓚᒃᓰᕕᖕᒧᐊᖅᑕᐅᓚᐅᖅᐳᖅ ᐊᓯᐊᓂ ᐋᖓᔮᖅᑐᒥ ᐊᖑᒻᒥ ᑐᓂᓯᓂᕋᖅᑕᐅᓚᐅᖅᐳᖅ ᐋᓐᓂᖅᓯᕆᓂᕐᔪᐊᖑᓂᐅᔪᒥ ᐸᓖᓯᒃᑯᑦ ᐊᓃᖅᑎᓪᓗᒋᑦ ᑭᐅᓂᕐᒧᑦ ᐊᓯᖏᓐᓂ ᖃᐃᖁᔭᐅᓂᐅᔪᓂ. ᑭᙵᕐᓂ ᐊᓄᓪᓚᒃᓰᕖᑦ ᐃᓄᖃᕈᓐᓇᑐᐃᓐᓇᓪᓗᐊᖅᐳᑦ ᑎᓴᒪᓂ ᐃᓄᖕᓂ, ᑭᓯᐊᓂ ᐊᓄᓪᓚᒃᓰᓚᐅᖅᐳᑦ 7–ᓂ ᐋᖓᔮᖅᑐᓂ ᐃᓄᖕᓂ. ᐅᓇ ᓇᓗᓇᐃᖅᓯᕗᖅ ᐃᑲᔪᕈᑎᒃᓴᓂ ᐱᑕᖃᙱᓗᐊᕐᓂᖓᓂ ᐊᑐᐃᓐᓇᐅᔪᓄᑦ ᑲᓇᑕᒥ ᐸᓖᓯᒃᑯᓐᓄᑦ, ᑭᓯᐊᓂ ᑐᒃᓯᕋᖅᐳᖅ ᐊᐱᖅᑯᑕᐅᔪᒥ ᐸᓖᓯᒃᑯᑦ ᑲᒪᒋᔭᖃᕐᓂᖏᓐᓂ ᐋᖓᔮᖅᑐᓂ ᐃᓄᖕᓂ ᓈᒻᒪᒃᑐᒥ ᑭᐅᓂᐅᒋᐊᒃᓴᖓᓂ.

ᐃᓄᖕᒧᑦ ᑕᕐᕆᔭᓕᐊᖑᓚᐅᖅᑐᖅ ᓴᖅᑭᑎᑦᑎᓚᐅᖅᐳᖅ ᐊᑲᖅᓴᙱᕐᔪᐊᕐᓂᐅᔪᒥ ᓄᓇᕗᓕᒫᒥ, ᐱᓗᐊᖅᑐᒥ ᐊᔾᔨᒌᙱᑎᑕᐅᓂᕐᒧᑦ ᓄᓇᖃᖅᑎᐅᔪᓄᑦ.

ᓇᓚᐅᑦᑖᕆᓂᐅᔪᒥ ᐅᕙᑦᑎᓐᓄᑦ ᑎᑭᓯᒪᓕᖅᐳᖅ ᑲᓇᑕᒥ ᐸᓖᓯᒃᑯᑦ ᐊᒻᒪᓗ ᐸᓖᓯᒃᑯᓐᓂ ᑲᓇᑕᓕᒫᒥ ᑲᒪᒋᔭᖃᓪᓚᕆᒃᐸᒃᑐᓂ ᓄᓇᖃᖅᑳᖅᓯᒪᔪᓄᑦ ᑲᓇᑕᒥᐅᑕᓂᑦ ᐱᕕᒃᓴᖃᖅᑎᑕᐅᖃᑦᑕᕐᒪᖔᑕ ᑐᑭᓯᓇᑦᑎᐊᖅᑐᒥ ᐊᒻᒪ ᐱᓪᓚᕆᐅᔪᒥ ᐊᓯᔾᔨᕐᓂᖃᕐᓂᕐᒧᑦ ᖃᓄᖅ ᐊᐅᓚᑦᑎᕙᖕᓂᖏᓐᓂ.

ᓄᓇᕗᒻᒥ, 6–ᓂ ᖃᓄᐃᓕᐅᕐᓂᖅᑕᖃᖅᐳᖅ ᐱᔭᕆᐊᖃᖅᑎᑦᑎᔪᓂ ᐱᖓᔪᖓᓐᓂ–ᐱᓕᕆᖃᑕᐅᔪᓄᑦ ᖃᐅᔨᓴᖅᑕᐅᓂᐅᔪᓂ ᓯᓚᑖᓃᑦᑐᓄᑦ ᐸᓖᓯᒃᑯᓐᓂ, ᓲᕐᓗ ᐋᑐᕚᒥ ᐸᓖᓯᒃᑯᓐᓂ ᐱᔨᑦᑎᕋᖅᑎᐅᔪᓂ, ᑕᒪᑐᒪᓂ ᐊᕐᕌᒎᔪᒥᑐᐊᖅ. ᐱᖓᓱᑦ ᖃᓄᐃᓐᓂᐅᓚᐅᖅᑐᓄᑦ ᖁᑭᖅᓯᓂᐅᕗᑦ.

ᑎᒥᒧᑦ-ᐊᑕᔪᓄᑦ ᐊᔾᔨᓕᐅᕈᑎᓂᑦ ᐊᔾᔨᐅᓕᐅᕆᓂᖃᕐᓇᑎᒃ, ᐅᓄᖅᓯᕙᓪᓕᐊᑐᐃᓐᓇᖅᑐᓂ ᓄᓇᖃᖅᑎᐅᔪᓂ ᐊᒻᒪ ᑲᑎᒪᔨᕐᔪᐊᖑᔪᓂ, ᐃᓚᖃᖅᑐᒥ ᑲᓇᑕᒥ ᐊᖓᔪᖅᑳᕐᔪᐊᖅ ᔪᔅᑎᓐ ᑐᕉᑑ, ᐊᖏᒡᓕᕙᓪᓕᐊᔪᒥ, ᖃᐃᖁᔨᓯᒪᓂᖓᓐᓂ, ᒫᓐᓇᐅᔪᒥ ᐸᓖᓯᐅᑉ ᖃᓄᐃᓐᓂᕋᖅᑕᖓᓂ ᐊᓯᖏᓐᓂ ᓵᓚᖃᖅᖢᓂ.

ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᖃᐅᔨᒪᕗᑦ ᐊᒥᓱᓂ ᑲᓇᑕᒥ ᐸᓖᓯᒃᑯᑦ ᐸᓖᓯᖏᓐᓂ ᐃᖅᑲᓇᐃᔮᒥᓂᒃ ᐱᓕᕆᑦᑎᐊᖅᑐᒻᒪᕆᐊᓘᓂᖏᓐᓂ ᓄᓇᕗᒻᒥ ᑭᓯᐊᓂ ᐱᓕᕆᖃᑎᖃᕐᓂᐅᔪᓂ ᐊᒃᓱᕈᕐᓂᐅᓯᒪᕗᑦ ᐊᒻᒪ ᐅᒃᐱᕈᓱᖕᓂᐅᔪᒥ ᓴᔪᒃᑎᓯᒪᓪᓗᓂ ᐊᒥᓱᓂ ᐱᓕᕆᐊᖑᔪᓄᑦ ᑕᒻᒪᖅᓴᐃᓂᐅᔪᓄᑦ ᐸᓖᓯᒃᑯᓐᓄᑦ ᓴᖅᑭᑎᑕᐅᓯᒪᕗᑦ ᓄᓇᕗᒻᒥᐅᓄᑦ.

ᑲᓇᑕᓕᒫᒥ ᑲᓇᑕᒥ ᐸᓖᓯᒃᑯᑦ ᑲᒥᓴᓇᖓ ᖁᕕᐊᓗᐊᕌᓗᖅᑰᔨᙱᒃᑲᓗᐊᖅᑎᓪᓗᒍ ᕿᒥᕐᕈᓇᖕᓂᕐᒧᑦ ᑎᒥᒧᑦ ᐊᑕᔪᓄᑦ ᐊᔾᔨᓕᐅᕈᑎᓂᒃ ᐅᑭᐅᖅᑕᖅᑐᒥ, ᒫᓐᓇ ᓈᒻᒪᒃᓯᕗᖅ ᑕᒪᒃᑭᐅᒪᔪᒥ ᖃᐅᔨᓴᕐᓂᕐᒧᑦ ᐅᖃᐅᓯᐅᓂᐅᔪᒥ ᐊᒻᒪ ᐋᖅᑭᒃᓱᐃᓗᑎᒃ ᐱᓕᕆᖃᑎᒌᖕᓂᐅᔪᒥ ᓄᓇᖃᖅᑎᐅᔪᓄᑦ ᐱᓕᕆᐊᒃᓴᖃᖅᑎᑕᐅᔪᓂ ᓴᐳᔾᔨᓯᒪᓂᕐᒧᑦ.

ᐸᓖᓯᐅᔪᑦ ᕿᓂᑐᐃᓐᓇᕆᐊᖃᖅᐳᑦ ᐅᖓᓯᓗᐊᙱᑦᑐᒥ ᓄᓇᕕᖕᒥ ᓄᓇᓕᖕᓂ ᐸᓖᓯᐅᔪᑦ ᓯᕗᓪᓕᖅᐹᒥᒃ ᐱᓕᕆᐊᕆᔭᐅᔪᒥ ᑎᒥᒧᑦ ᐊᑕᔪᒥᑦ ᐊᔾᔨᓕᐅᕈᑎᒥᑦ ᐱᓕᕆᐊᒃᓴᐅᔪᒥ ᑕᐃᒪᙵᓂ ᔭᓄᐊᕆᒥ. ᓄᓇᕕᐅᑉ ᖃᐅᔨᓴᕈᑎᒋᔭᖓᓂ ᐅᕙᑦᑎᓐᓂ ᑕᑯᒃᓴᐅᑎᑦᑎᔪᓐᓇᕈᓂ ᑭᓱᑐᐃᓐᓇᒥᒃ, ᐅᑯᐊ ᑲᓇᑕᒥ ᐸᓖᓯᒃᑯᑦ ᓈᒻᒪᙱᓐᓂᖓᓂ-ᓄᑖᙳᖅᐸᓪᓕᐊᓂᐅᔪᒥ ᑭᐅᓘᑎᖓᓐᓂ ᓈᒻᒪᙱᓚᖅ.

ᑎᒃᑯᐊᕈᑕᐅᓯᒪᓂᖓᓂ ᐊᒥᓱᐃᖅᓱᕐᔪᐊᖅᖢᓂ ᓯᕗᓂᐊᓂ, ᑎᒥᒧᑦ ᐊᑕᔪᓄᑦ ᐊᔾᔨᓕᐅᕈᑏᑦ ᓴᐳᔾᔨᓯᒪᓲᖑᕗᑦ ᐃᓄᑐᐃᓐᓇᕐᓂ ᐊᒻᒪ ᐸᓖᓯᒃᑯᓐᓂ ᑕᒪᒃᑭᓂᑦ ᐊᒻᒪ ᓄᖅᑲᖅᑎᑦᑎᔪᓐᓇᕋᔭᖅᐳᖅ ᑲᐅᐳᐊᐃᑎᑐᑦ ᖃᓄᐃᓕᐅᕐᓂᐅᔪᓂ ᑕᕐᕆᔭᓕᐊᖑᓚᐅᖅᑐᒥ ᓄᓇᖃᖅᑎᐅᔫᑉ ᑕᕐᕆᔭᓕᐊᖓᓂ ᑭᙵᕐᓂ.

ᑭᓯᐊᓂ ᑎᒥᒧᑦ ᐊᑕᔪᓄᑦ ᐊᔾᔨᓕᐅᕈᑏᑦ ᐱᒋᐊᕐᓂᑐᐃᓐᓇᐅᕗᑦ.

ᓈᒻᒪᒃᓯᕗᖅ ᑕᒪᒃᑭᐅᒪᔪᒥ ᑐᑭᓯᒋᐊᕐᓂᐅᔪᒥ ᖃᓄᖅ ᐸᓖᓯᒃᑯᑦ ᑲᒪᒋᔭᖃᖅᐸᖕᒪᖔᑕ ᓄᓇᖃᖅᑳᖅᓯᒪᔪᓄᑦ ᐃᓄᖕᓂ ᐅᕙᓂ ᑲᓇᑕᒥ ᐊᒻᒪ ᓇᓂᓯᓗᑎᒃ ᐱᓕᕆᓂᐅᔪᓂ ᑲᒪᑦᑎᐊᕐᓂᖅᓴᐅᓂᐅᔪᓂ ᓄᓇᖃᖅᑳᖅᓯᒪᔪᓄᑦ ᐊᑐᖅᑕᐅᓂᑯᓂᑦ.

ᒥᑭᓐᓂᖅᓴᐅᔪᒥ ᐱᓕᕆᓂᐅᔪᒥ ᐊᑲᐅᒃᓴᙱᕐᔪᐊᕐᓂᐅᓇᔭᖅᐳᖅ ᓴᐃᒻᒪᖃᑎᒌᖕᓂᕐᒥ, ᓱᓕᓂᕋᖅᖢᑎᒃ ᑕᐃᒪᐃᓐᓂᐊᕐᓂᕋᖅᑕᐅᖏᓐᓇᐅᔭᖅᑐᒥ ᐊᒥᓱᐊᖅᓱᖅᑕᐅᓪᓗᓂ.

Advertisement