ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᑦ
ᓄᓇᕗᒻᒥ ᒐᕙᒪᒃᑯᑦ ᐃᓕᔭᐅᓯᒪᕗᑦ ᕿᑎᐊᓂ ᐅᔭᕋᖕᒥ ᐊᒻᒪ ᑎᓯᓂᐅᔪᒥ ᐃᓅᓕᓴᖅᑕᐅᓂᕐᒧᑦ ᑮᓇᐅᔭᖃᖅᑎᑕᐅᓂᐅᔪᒥ ᐊᑐᐃᓐᓇᐅᑎᑕᐅᔪᒥ ᒐᕙᒪᑐᖃᒃᑯᓐᓂ.

ᓇᓪᓕᐅᒃᑯᒫᒃᑰᙱᑦᑐᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᕚᓪᓕᕈᑎᒥ ᐱᓕᕆᐊᖑᔪᖅ — ᐊᑭᓖᓲᒥᒃ ᐃᓅᓕᓴᖅᑕᐅᓂᕐᒧᑦ ᖃᖓᑕᓂᐅᔪᒥ — ᒐᕙᒪᑐᖃᒃᑯᑦ ᑎᑭᐅᑎᑎᓪᓗᒍ ᐃᓱᖓᓂ ᑳᓐᑐᕌᖓᓂ ᑕᐃᔅᓱᒧᖓ ᓄᕙᒡᔪᐊᕐᓇᖅ–19–ᒥ, ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᒥᓂᔅᑕ ᔪᐊᔾ ᕼᐃᒃᔅ ᓇᓗᓇᐃᖅᓯᓯᒪᕗᖅ ᐊᑎᓕᐅᕆᒃᑲᓐᓂᕈᒪᙱᓐᓂᖓᓂ “ᐊᑯᓂᐅᔪᒥ ᐊᑐᖅᑕᐅᔪᒥ ᐱᓕᕆᐊᖑᔪᒥ.”

“ᐊᑎᓕᐅᕆᔾᔮᙱᓚᖓ ᐃᑲᔫᓯᐊᒧᑦ ᐊᖏᕈᑎᒥᑦ, ᐊᒻᒪ ᑲᒪᒋᔭᖃᕐᓂᕐᒥ ᐅᑎᕐᓂᐊᕐᓗᓂ ᒐᕙᒪᑐᖃᒃᑯᓐᓄᑦ,” ᕼᐃᒃᔅ ᐅᖃᓚᐅᖅᐳᖅ ᒪᓕᒐᓕᐅᖅᑎᖃᕐᕕᖓᓂ ᒫᔾᔨ 12–ᒥ.

ᐱᔾᔪᑎᖓ ᐱᔪᒪᙱᓐᓂᖓᓂ ᒐᕙᒪᑐᖃᒃᑯᑦ ᓇᖕᒥᓂᖅ ᑲᒪᒋᔭᖃᙱᓗᐊᕐᓂᖏᓐᓂ ᐱᓕᕆᐊᖑᔪᒧᑦ, ᕿᒪᐃᓪᓗᑎᒃ ᑖᒃᓯᓂ–ᐊᑭᓖᕙᒃᑐᓂ ᓄᓇᕗᒻᒥᐅᓂ ᐊᑭᓖᓂᖏᓐᓂ ᐊᑭᓕᒐᒃᓴᐅᔪᓂ.

ᐅᓂᒃᑳᕆᔭᐅᓯᒪᕗᖅ ᑭᖑᓪᓕᖅᐹᒥ ᑮᓇᐅᔭᓕᕆᓂᕐᒧᑦ ᐊᕐᕌᒍᖓᓂ ᓄᓇᕗᒻᒥ ᒐᕙᒪᒃᑯᑦ ᐃᑲᔪᖅᓱᐃᓯᒪᓂᖏᓐᓂ $78 ᒥᓕᐊᓐᓂ ᒐᕙᒪᑐᖃᒃᑯᑦ ᐊᑭᓖᓯᒪᑐᐃᓐᓇᕐᓂᖏᓐᓂ $3.7 ᒥᓕᐊᓐᓂ, ᐃᓚᙵᖅᓯᓂᒐᓛᑐᐃᓐᓇᖅ “ᐊᑎᖃᙱᑦᑐᒥ ᖃᑦᑕᕐᒥ” ᐃᓅᓕᓴᖅᑕᐅᓂᕐᒧᑦ ᖃᖓᑦᑕᐅᑎᓄᑦ, ᐊᕐᕕᐊᑦ ᐅᐊᖕᓇᒥ-ᑎᑭᕋᕐᔪᐊᒥ ᐃᓚᒋᔭᐅᔪᖅ ᒪᓕᒐᓕᐅᖅᑎᓂ ᔮᓐ ᒪᐃᓐ ᐅᓂᒃᑳᕆᓯᒪᓂᖓᓂ.

ᒐᕙᒪᑐᖃᒃᑯᑦ ᐅᖃᖅᐳᑦ ᐊᖏᓂᖓ ᑎᑭᐅᑎᓚᐅᖅᓯᒪᕗᖅ $49.5 ᒥᓕᐊᓐᓄᑦ ᑐᔪᕐᒥᕕᒃᓴᖏᑦ ᐊᒻᒪ ᓄᓇᒥ ᐅᓯᑲᑦᑕᕐᓂᐅᔪᑦ ᐃᓱᒪᒋᔭᐅᑎᓪᓗᒋᑦ, ᑭᓯᐊᓂ ᓱᓕ ᐃᓚᑰᓂᖃᐅᖅᐳᖅ ᐃᓱᒪᒋᓪᓗᒍ ᐱᓪᓚᕆᐅᔪᒥ ᐱᔭᕆᐊᖃᕐᓂᐅᔪᒥ ᐆᒧᖓ ᖃᖓᑕᓂᐅᔪᒧᑦ ᐊᒻᒪᓗ ᐊᖏᒡᓕᕙᓪᓕᐊᖏᓐᓇᐅᔭᖅᑐᒥ ᐊᑭᐅᔪᒥ.

ᐃᓱᒪᒋᓇᒍ ᓄᓇᕗᒻᒥ ᒐᕙᒪᒃᑯᑦ ᐊᒃᓱᕈᕐᓂᕆᔭᖏᓐᓂ ᐱᓇᓱᐊᕐᓂᕐᒧᑦ ᐅᑎᕐᕕᐅᔭᕆᐊᖃᕐᓂᐅᔪᒥ, ᓄᓇᖃᖅᑳᖅᓯᒪᔪᓄᑦ ᐱᔨᑦᑎᕋᕐᓂᕐᒧᑦ ᒥᓂᔅᑕᖓ ᒫᒃ ᒥᓗᕐ ᒫᓐᓇᓕᓴᒥ ᓱᓕᓂᕋᖅᖢᓂ ᐅᖃᓚᐅᖅᐳᖅ ᒐᕙᒪᑐᖃᒃᑯᑦ ᐊᑭᓖᖃᑎᖃᕐᓂᕆᔭᖏᓐᓂ ᐊᖏᒡᓕᒋᐊᑐᐃᓐᓇᕐᓂᐊᕐᓂᖓᓂ “ᒥᑭᑦᑐᒻᒪᕆᑯᓗᖕᒥ” ᐊᒻᒪ ᕼᐃᒃᔅ ᐃᓱᒪᒋᕙᖓ ᐱᓕᕆᐊᖑᔪᖅ ᐋᖅᑭᒃᑕᐅᓯᒪᙱᓐᓂᖓᓂ.
ᐅᑯᐊ ᑮᓇᐅᔭᖃᖅᑎᑕᐅᓂᐅᔪᑦ, ᑭᓯᐊᓂ, ᒫᓐᓇᐅᔪᒥ ᐱᓪᓚᕆᐅᕗᑦ ᓄᕙᒡᔪᐊᕐᓇᖅ–19–ᒥ ᓱᑲᒃᑎᒋᐊᖅᓯᑎᓪᓗᒍ ᑎᒍᒥᐊᕐᓂᖏᓐᓂ ᑲᓇᑕᒧᑦ ᐊᒻᒪ ᖃᓂᒡᓕᕙᓪᓕᐊᑐᐃᓐᓇᖅᑎᓪᓗᒍ ᓄᓇᕗᒻᒧᑦ.

ᓄᓇᕗᑦ ᐱᑐᐃᓐᓇᖅᓯᒪᕗᑦ $516,000–ᓂ $500 ᒥᓕᐊᓐᓂ ᒐᕙᒪᑐᖃᒃᑯᓐᓂ ᐃᑲᔪᖅᓯᖅᑕᐅᓂᕐᒧᑦ ᑮᓇᐅᔭᓂᑦ ᓄᕙᒡᔪᐊᕐᓇᕐᒧᑦ ᐊᒻᒪ ᑕᒪᓐᓇ ᐊᖏᓂᖓ ᑐᙵᕕᖃᑐᐃᓐᓇᖅᐳᖅ ᐊᑐᓂ ᐃᓄᖕᒧᑦ ᑮᓇᐅᔭᖃᖅᑎᑕᐅᓂᕐᒧᑦ ᐆᒃᑑᑕᐅᔪᒥ.
ᐃᓚᖏᓐᓂ ᖁᑦᑎᓛᖑᔪᒥ ᐊᑭᖃᕐᓂᐅᔪᒥ ᐊᒻᒪ ᐊᔪᕐᓇᓛᖑᔪᒥ ᑐᓂᓯᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ ᑲᓇᑕᓕᒫᒥ, ᒐᕙᒪᒃᑯᑦ ᑐᓂᓯᑐᐃᓐᓇᓪᓗᐊᓚᐅᖅᐳᑦ ᓴᐸᖓᕐᓂ ᐊᒻᒪ ᑕᕝᕚᑭᒥ ᐊᑭᓪᓗᐊᕆᔭᖓᓄᑦ. ᐃᓱᒪᒋᓪᓗᒍ ᖃᓄᐃᓐᓂᕆᔭᖓᓂ ᐆᒪᙵᑦ ᐊᖏᔪᒻᒪᕆᐊᓗᖕᒥ ᓄᓇᐅᔪᒥ, ᓄᓇᖃᕐᔪᐊᖅᑐᒥ ᐃᓄᑭᑦᑐᓂ ᐃᓄᓕᖕᓂ, ᑭᒡᓕᓪᓗᐊᖓᓂ ᑲᓇᑕᒥᐅᑕᐅᙱᑦᑑᔮᖅᐳᖅ ᐅᖃᐅᓯᖃᕐᓂᕐᒥ ᐊᑐᓂ ᐃᓄᖕᒧᑦ ᑮᓇᐅᔭᖃᖅᑎᑕᐅᓂᐅᔪᒥ ᓈᒻᒪᖕᓂᖓᓂ, ᐊᒻᒪ ᐃᓱᒪᒋᔭᖃᙱᓚᖅ ᑎᑎᕋᐅᓯᐅᓯᒪᑦᑎᐊᖅᑐᒥ ᐊᒻᒪ ᐱᑕᖃᐃᓐᓇᖅᑐᒥ ᐋᓂᐊᖃᕐᓇᙱᑦᑐᓕᕆᓂᕐᒧᑦ ᐊᑲᐅᙱᓕᐅᕈᑕᐅᔪᓂ (ᐱᓗᐊᖅᑐᒥ ᐊᓂᖅᑎᕆᓂᕐᓄᑦ ᐱᔾᔪᑕᐅᔪᓂ) ᓄᓇᕗᒻᒥᐅᑦ ᓵᙵᕙᖕᓂᖏᓐᓂ.

ᒐᕙᒪᑐᖃᒃᑯᑦ ᐅᖃᖅᓯᒪᙱᓚᑦ ᐅᑭᐅᖅᑕᖅᑐᒥ ᖃᖓᑕᓲᒃᑰᕐᓂᖓᓂ ᐱᓪᓚᕆᐅᓂᖓᓂᑦᑕᐅᖅ, ᐊᖓᔪᖅᑳᖅ ᐃᓄᐃᖅ ᑕᐱᕇᑦ ᑲᓇᑕᒥ, ᓇᑖᓐ ᐆᐱᑦ, ᖃᐃᖁᔨᓂᖓᓂ ᐅᑭᐅᖅᑕᖅᑐᒥ ᖃᖓᑕᓲᑦ ᐱᓪᓚᕆᐅᖕᒪᑕ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ–ᐸᖅᑭᓂᐅᔪᒧᑦ ᐱᓕᕆᔾᔪᓯᐅᓂᖓᓂ.

“ᑭᖑᕙᕆᐊᕐᓂᐅᔪᓂ ᐅᕙᙵᑦ ᐱᓕᕆᔾᔪᓯᐅᔪᒥ ᐱᔾᔪᑎᖃᖅᑐᒥ ᒥᒃᖠᒋᐊᖅᑕᐅᕐᔪᐊᖅᑐᓂ ᖃᖓᑕᓂᕐᒧᑦ ᐋᖅᑭᒃᑕᐅᓯᒪᓂᐅᔪᓄᑦ ᓴᖅᑭᑎᑦᑎᕗᖅ ᐊᖏᕐᔪᐊᖅᑐᒥ ᐅᓗᕆᐊᓇᕐᓂᐅᔪᒥ ᐃᓄᐃᑦ ᐋᓐᓂᐊᖃᕐᓇᙱᑦᑐᓕᕆᓂᖏᓐᓄᑦ ᐊᒻᒪ ᖃᓄᐃᙱᑦᑎᐊᕐᓂᖏᓐᓄᑦ,” ᐅᖃᓚᐅᖅᐳᖅ ᐆᐱᑦ, ᐅᖃᐅᓯᖃᖅᖢᓂ ᖃᖓᑕᓲᒃᑰᕐᓂᐅᔪᒥ 51–ᓄᑦ ᐃᓄᖕᓄᑦ ᓄᓇᓕᐅᔪᓄᑦ ᑲᓇᑕᒥ.

ᒫᓐᓇᐅᔪᒥ, ᖃᖓᑕᓲᑦ ᐊᒃᓱᕉᓴᒃᐳᑦ ᒪᑭᒪᑎᑦᑎᓇᓱᐊᕐᓂᕐᒧᑦ ᐅᑭᐅᖅᑕᖅᑐᒥ ᒥᒃᖠᒋᐊᖅᑎᓪᓗᒋᑦ ᖃᖓᑕᓂᖏᓐᓂ ᐊᑭᓂᑦ ᒥᒃᖠᒋᐊᖅᑎᑦᑎᓇᓱᐊᖅᑎᓪᓗᒋᑦ ᐃᑭᒪᔪᓄᑦ ᐅᓄᕐᓂᖏᑦ ᑲᑕᕐᔪᐊᖅᑎᓪᓗᒋᑦ.

ᐊᒃᓱᕈᐃᓐᓇᕐᓂᒃᑯᑦ, ᐱᓕᕇᓐᓇᕋᓱᐊᕐᓂᒃᑯᑦ ᐊᒻᒪ ᐱᓕᕆᑦᑎᐊᕐᓂᒃᑯᑦ ᓄᕙᒡᔪᐊᕐᓇᖅ–19 ᑎᑭᐅᑎᓯᒪᙱᓚᖅ ᓄᓇᕗᒻᒧᑦ — ᓱᓕ. ᑭᓯᐊᓂ ᒐᕙᒪᑐᖃᒃᑯᑦ ᐱᓕᕆᑦᑎᐊᒃᑲᓐᓂᓕᕈᑎᒃ ᑲᒪᒋᔭᕆᐊᖃᖅᑕᒥᓂᑦ ᐅᑭᐅᖅᑕᖅᑐᒧᑦ ᐊᒻᒪ ᐱᑎᑦᑎᑦᑎᐊᒃᑲᓐᓂᖅᑐᒥ ᑐᓂᓯᓗᑎᒃ ᐃᑲᔪᖅᓱᐃᓂᐅᔪᒥ ᐅᑭᐅᖅᑕᖅᑐᕐᒥᐅᑦ ᐱᔭᕆᐊᓕᖏᓐᓂ, ᐃᓅᓯᕐᓂ ᐱᙳᐊᕈᑎᖃᑐᐃᓐᓇᖅᐳᑦ.

Advertisement