Skip to content

9-ᓂᒃ ᐊᕐᕌᒍᓕᒃ ᐃᖃᓗᒃᑑᑦᑎᐊᒥᐅᖅ ᐊᖑᑎᑯᓗᒃ ᑮᓇᐅᔭᒃᓴᐅᑎᐅᔪᓐᓇᖅᑐᓂᒃ ᖃᐅᔨᒪᓕᕇᖅᑐᖅ

ᔨᕆᒪᐃᔭ ᒪᓂᔪᒌᓇ 9-ᓂᒃ ᓱᓕ ᐊᕐᕌᒍᖃᖅᖢᓂ, ᐃᓕᓴᓕᕇᖅᑐᖅ ᖃᓄᖅ ᑮᓇᐅᔭᒃᓴᕈᓐᓇᕐᓂᕐᒥᓂᒃ ᖃᓄᕐᓗ ᐊᑐᕐᓂᖃᕐᓂᖓᓂᒃ ᑮᓇᐅᔭᒃᓴᕈᓐᓇᕈᓂ ᐃᒻᒥᓄᑦ.

9-ᓂᒃ ᐊᕐᕌᒍᖃᓕᖅᖢᓂ, ᔨᐅᕆᒪᐃᔭ ᒪᓂᔪᒌᓇ ᓯᓚᒥ ᐱᖑᐊᕈᓐᓇᖅᓯᒐᒥ ᐳᐊᕆᔭᖃᑦᑕᓕᓚᐅᕐᒪᑦ ᐊᐳᑎᓂᒃ ᐃᖃᓗᒃᑑᑦᑎᐊ ᐸᐃᕆᕝᕕᐊᑕ ᐃᓯᕐᕕᐊᓂᒃ.

ᑕᒪᑐᒪᓂ ᐱᖅᓯᖅᑐᐊᓘᖃᑦᑕᓚᐅᕐᒪᑦ ᐃᖃᓗᒃᑑᑦᑎᐊᒥ ᐅᑭᐊᒃᓴᕙᓪᓕᐊᓕᖅᑎᓪᓗᒍ, ᔨᐅᕆᒪᐃᔭ ᐊᓈᓇᒥᓄᑦ ᓵᓚᐅᕐᒪᑦ, ᓱᓴᓐᒧᑦ ᐊᒻᒪᓗ ᑮᓇᐅᔭᒃᓴᐅᑕᐅᔪᓐᓇᖅᑐᒥᒃ ᐅᓂᒃᑲᐅᑎᓪᓗᓂᐅᒃ.
“ᐅᓂᒃᑳᖅᖢᓂ, ‘ᐊᓈᓈᒃ, ᐊᑎᓐᓂᒃ ᕖᔅᐳᒃᑯᑎᒍᑦ ᑕᑯᒃᓴᐅᑎᑦᑎᖁᔭᒋᑦ ᐳᐊᕆᔭᕈᓐᓇᕐᓂᕋᕐᓗᖓ,’” ᐅᓂᒃᑳᓚᐅᖅᑐᖅ. ᑭᐅᓚᐅᖅᑕᕋ, “ᐅᐊᑯᑦᑐᖔ, ᓱᓕᕖᑦ?’ ᐊᒻᒪᓗ ᑭᐅᓪᓗᓂᖓ, ‘ᐄ.’ ᐊᓱᐃᓛᒃ ᐊᑎᖓ ᑕᑯᒃᓴᐅᑎᓚᐅᖅᑕᕋ ᐊᒻᒪᓗ ᐳᐊᕆᔭᖅᑎᐅᓕᓚᐅᖅᑐᖅ ᐸᐃᕆᕝᕕᐅᑉ ᐃᓯᕐᕕᐊᓂᒃ ᑕᒪᑐᒪᓂᓴᐃᓐᓇᖅ ᐅᓪᓗᒥ. ᐅᐱᒋᓚᐅᖅᑕᕋ ᑕᐃᒪᓐᓇ ᐅᖃᕐᒪᑦ ᐅᕙᓐᓄᑦ.”
ᔨᐅᕋᒪᐃᔭ, ᑭᖑᓪᓕᐅᓪᓗᓂ ᐃᓅᓚᐅᖅᑐᖅ ᓯᑕᒪᓂᒃ ᕿᑐᖓᖃᕋᒪ, ᐅᑎᓚᐅᖅᑐᖅ ᐸᐃᕆᕝᕕᖕᒥᑦ ᐃᒻᒪᖄ ᐃᑲᕐᕋᒥ ᐊᑕᐅᓯᕐᒥ ᓇᑉᐸᒥᓗ, ᐳᐊᕆᔭᕐᓂᖅᖢᓂ ᐃᓯᕐᕕᐊᓂᒃ, ᒪᔪᕋᐅᑎᖓᓂᒃᓗ ᐱᓱᒃᕕᐊᓂᒃᓗ ᐊᖅᑯᑎᐊᓂᒃ ᐊᐳᑕᐃᔭᐃᓪᓗᓂ.
“ᑕᐃᒪᓐᓇ ᐱᓚᐅᖅᑐᖅ ᐃᓄᑑᓪᓗᓂ,” ᓲᓴᓐ ᐅᓂᒃᑳᓚᐅᖅᑐᖅ. “ᐊᖏᕐᕋᖅᓯᒪᑎᓪᓗᖓ ᑕᒪᑐᒪᓂ ᐅᓪᓗᒥ ᑕᑯᓚᐅᖅᑕᕋ ᐃᒐᓛᒃᑯᑦ ᐊᖏᕐᕋᐅᓪᓗᓂ ᐅᓪᓚᒃᑐᖅ ᑐᐊᕕᖅᖢᓂ. ᐊᐅᒃᑲᓕᖓᒻᒪᕆᒃᑐᖅ ᐊᓂᖅᑎᕆᓪᓗᓂᓗ ᑐᐊᕕᓗᐊᒧᑦ, ᐳᐊᓗᓂ ᐲᓴᐅᑎᒋᓪᓗᓂᒋᑦ ᐅᖃᖅᖢᓂ, “ᑕᑯᒋᑦ ᐊᓈᓈᒃ!' ᑕᑯᑎᖢᓂᖓᓗ ᐊᑭᓕᐅᓯᐊᒥᓂᒃ ᑮᓇᐅᔭᓂᒃ ᐊᒃᓱᐊᓗᒃ ᖁᕕᐊᓱᒃᖢᓂ. ᐱᒃᑯᒥᒍᓱᓗᐊᒧᑦ ᐃᒻᒥᓂᒃ ᓴᕆᒪᓱᒻᒪᕆᓚᐅᖅᑐᖅ ᑮᓇᐅᔭᒃᓴᕈᓐᓇᖅᓯᒐᒥ.”`
ᐃᒻᒪᖄ ᐊᑖᑕᒥᓂᒃ ᒪᓕᒃᑐᖅ ᔨᐅᕋᒪᐃᔭ ᐊᑖᑕᖓᑦᑕᐅᖅ ᑕᐃᒪᐃᒻᒪᑦ. ᐱᕈᖅᓴᓂᑰᖕᒪᑦ ᔭᓗᓇᐃᕝᒥ, ᓲᓴᓐ ᐅᓂᒃᑳᕆᓪᓗᓂ ᔨᐅᕋᒪᐃᔭᐅᑉ ᐊᑖᑕᖓ ᐊᑦᑕᖓᓗ ᐊᑖᑕᖓᑕ ᓇᔭᖓ ᓯᓚᒥ ᐃᒡᓗᐃᑦ ᐊᖅᑯᑎᖏᓐᓂᒃ ᐳᐊᕆᔭᐃᕙᓚᐅᕐᓂᕐᒪᑕ.
“ᑐᓴᕐᓇᖅᑐᑎᒍᓪᓘᓐᓃᑦ ᑕᑯᒃᓴᐅᑎᑕᐅᓚᐅᖅᓯᒪᖕᒪᑕ ᓄᑕᕋᐅᑎᓪᓗᒋᑦ,” ᐅᓂᒃᑳᕆᓪᓗᓂ. “ᐊᓱᐃᓛᒃᓘᓐᓂᑦ (ᐱᕙᓪᓕᐊᔪᑎᒍᑦ) ᑕᑯᒃᓴᐅᑎᑕᐅᔪᕕᓂᖅ ᐊᔾᔨᖑᐊᖓ ᐱᓯᒪᔭᕗᑦ ᓱᓕ, ᓇᔭᖓᓗ ᐳᐊᕆᔭᐃᒋᐊᖅᑐᖃᑦᑕᕐᓂᕐᒪᑕ ᐊᖏᕐᕋᕆᔭᐅᔪᒃ ᐊᖅᑯᑎᖏᓐᓂᒃ ᔭᓗᓇᐃᕝᒥ.”
ᑕᒫᓂᓕ ᑖᓱᒧᖓ ᓯᕗᓪᓕᖅᐹᖑᔫᒐᓗᐊᖅ ᑖᓐᓇ ᓇᖕᒥᓂᖅ ᑲᒪᒋᔭᖓ ᔨᐅᕋᒪᐃᔭᐅᑉ ᐳᐊᕆᔭᐃᒋᐊᖅᑐᖃᑦᑕᕐᓂᖅ ᓇᖕᒥᓂᖅ ᑮᓇᐅᔭᒃᓴᐅᑎᒋᓪᓗᒍ, ᐊᓯᖏᓐᓂᒃᑕᐅᖅ ᐃᑲᔪᖃᑦᑕᕐᒥᖕᒪᑦ ᐊᖏᕐᕋᒥᓂ ᐱᓇᓱᐊᕈᓯᑕᒫᑦ ᐊᑭᓕᐅᓯᐊᕈᑎᒋᐊᕐᔪᖃᒃᑕᖅᑕᒥᓄᑦ ᐃᓚᓕᐅᑎᕙᒃᖢᓂᒋᑦ. ᑕᐃᓱᒪᓂᐅᑎᓪᓗᒍ ᓱᓕᒃᑲᓐᓂᖅ ᓇᓂᓯᓚᐅᖅᓯᒪᒋᓪᓗᓂ ᑮᓇᐅᔭᒃᓴᐅᑎᒋᔪᓐᓇᖅᑕᒥᓂᒃ ᓄᓇᓕᑦᑎᓐᓂ.
“ᓄᑕᕋᒃᑲᓐᓂᐅᑎᓪᓗᒍ ᐅᖃᐅᑎᕙᓚᐅᖅᓯᒪᖕᒫᖓ ᓂᐅᕕᐊᒃᓴᖑᖁᓪᓗᓂᒋᑦ ᐱᖑᐊᓂ,” ᓲᓴᓐ ᐅᖃᕆᓪᓗᓂ ᐃᖅᑲᐅᒪᔭᒥᓂᒃ ᐅᓂᒃᑳᖅᖢᓂ ᐃᒡᓚᒻᒪᕆᓕᖅᖢᓂᓗ.
ᐃᓛᖏᓛᒃ ᑖᓐᓇ ᔨᐅᕋᒪᐃᔭ ᑕᒪᑐᒪᓂᓴᐅᑎᒋ ᓂᐅᕕᕋᓱᐊᕐᓗᓂ ᑮᓇᐅᔭᒃᓴᕋᓱᐊᖏᑦᑑᒐᓗᐊᕐᓕ ᓄᑖᓂᒃ ᐱᖑᐊᖅᑖᕈᑎᒋᓂᐊᕐᓗᓂᒋᑦ.
“ᑕᐃᒪᖓᓂᑦ ᑮᓇᐅᔭᓂᒃ ᑲᑎᖅᓱᐃᖃᑦᑕᕐᒪᑦ ᐳᐃᒍᖅᐸᒃᖢᓂᒋᑦ,” ᐅᓂᒃᑳᕆᓪᓗᓂ ᓲᓴᓐ. “ᑭᓱᑐᐃᓐᓇᒥᒃ ᐱᒃᑯᒥᒋᔭᖃᐅᓗᐊᖏᑦᑑᒐᓗᐊᖅ (ᓄᑕᕋᐃᑦ ᒪᑯᐊ ᑲᑎᖅᓱᐃᓲᖑᖕᒪᑕ ᐱᒃᑯᒥᒋᔭᒥᓂᒃ, ᑕᐃᒪᐃᖏᑦᑐᕐᓕ) ᑭᓯᐊᓂᓕ ᑲᐃᕙᔪᑯᓗᖕᓂᒃ ᓄᐃᑦᑐᖃᕐᒪᑦ ᓂᐅᕕᕐᕕᖕᒥ ᓂᐅᕕᕈᒪᓕᕋᒥ ᐱᓚᐅᖅᑐᖅ.”
ᔨᐅᕋᒪᐃᔭ ᑕᒪᑐᒪᓂ ᐅᓂᒃᑳᓕᐅᖅᑎᓪᓗᑕ ᐅᖃᓪᓚᒃᕕᒋᔪᓐᓇᖅᓯᓚᐅᖏᓐᓇᑦᑎᒍ ᓄᓇᕗᒥ ᐱᕙᓪᓕᐊᔪᑎᒍ ᑕᑯᒃᓴᐅᓂᐊᖅᑐᒥᒃ, ᑭᓯᐊᓂᓕ ᐊᓈᓇᖓ ᖁᕕᐊᓱᓚᐅᖅᑐᖅ ᐅᓐᓂᖅᓴᐅᑎᒋᒋᐊᒃᓴᖅ ᐃᕐᓂᓂ ᐅᐱᒍᓱᖕᓂᖓ ᓇᓗᓇᓚᐅᖏᑦᑐᖅ ᓂᐱᖓᓄᑦ ᐅᓄᒃᑲᐅᓯᕆᓪᓗᓂᐅᒃ.
“ᐊᒃᓱᐊᓗᒃ ᖁᕕᐊᒋᓚᐅᖅᑕᕋ ᑕᐃᒪᓐᓇ ᐊᐱᕆᖕᒪᖓ ᐊᑎᕐᒥᓂᒃ ᑕᑯᒃᓴᐅᑎᑦᑎᖁᔨᓪᓗᓂ (ᖃᕆᑕᐅᔭᑎᒍᑦ) ᐳᐊᕆᔭᕈᓐᓇᕐᓂᕐᒥᓂᒃ ᐃᒡᓗᐃᑦ ᐃᓯᕐᕕᖏᓐᓂᒃ.” ᓱᓴᓐ ᐅᓂᒃᑳᕆᓪᓗᓂ.