ᐱᓕᕆᒃᑳᓗᒃ ᓇᐅᔮᓂ ᑯᐊᐸᒃᑯᑦ ᐊᖓᔪᖅᑳᖓ ᐱᐅ ᑯᐸᒃ ᑐᓴᒐᒃᓴᖃᑦᑎᐊᕐᔪᐊᓚᐅᖅᐳᖅ ᐃᓚᒋᔭᐅᔪᓄᑦ ᐊᕐᕌᒍᑕᒫᒥ ᑲᑎᒪᕐᔪᐊᕐᓂᐅᔪᒥ ᐱᓕᕆᐊᖑᔪᒥ ᓄᕕᐱᕆ 24−ᒥ – $1 ᒥᓕᐊᓐᓂ ᐅᑎᕐᓂᐊᖅᐳᑦ ᐃᓚᒋᔭᐅᔪᓄᑦ ᓂᐅᕕᕈᓐᓇᐅᑎᖏᓐᓄᑦ ᐊᕕᒃᑐᖅᑕᐅᓂᖏᑦ ᕿᑐᕐᙱᐅᕈᑎᓂᑦ.
2017-2018-ᒥ ᓇᐅᔮᓂ ᑯᐊᐸᒃᑯᑦ ᑲᑎᒪᔨᖏᑦ ᖁᕕᐊᓱᒍᑎᖃᖅᐳᑦ $1 ᒥᓕᐊᓐᓂ ᐊᕐᕌᒍᒥ ᐊᕕᒃᑐᖅᑕᐅᓂᖏᑦ ᕿᑐᕐᙱᐅᕈᑎᓂᑦ ᐃᓚᒋᔭᐅᔪᓄᑦ ᐊᕐᕌᒍᑕᒫᒥ ᑕᒪᐃᑎᒍᑦ ᑲᑎᒪᓂᐅᔪᒥ ᓄᕕᐱᕆ 24−ᖑᑎᓪᓗᒍ. ᓴᐅᒥᖕᒥ: ᒥᓯᐅᓪ ᐊᒃᑯᐊᕐᔪᒃ, ᒥᐊᕆ ᑯᐸᒃ, ᐲᑕ ᒪᓂᒃ, ᐊᖓᔪᖅᑳᖅ ᐱᐅ ᑯᐸᒃ, ᐊᖓᔪᖅᑳᑉ ᑐᖏᓕᐊ ᓚᐃᒥᑭ ᒪᓕᑭ, ᒥᐊᕆ ᑐᒃᑐᑦᔪᒃ ᐊᒻᒪ ᔨᒥ ᐃᒻᒥᖓᒃ. ᒪᓕᒐᓕᐅᖅᑎᐅᓚᐅᖅᑐᖅ ᓯᑏᕝ ᒪᑉᓴᓚᒃ ᐊᒻᒪ ᐱᐊᕆᑕ ᖃᐅᓐᓇᖅ ᓂᕈᐊᖅᑕᐅᓚᐅᖅᐳᑦ ᑲᑎᒪᔨᓄᑦ ᐃᓇᖏᖅᓯᓂᕐᒥ ᔨᒥ ᐃᒻᒥᖓᕐᒥ ᐊᒻᒪ ᒥᐊᕆ ᑯᐸᒃᒥ.
"ᐊᖓᔪᖅᑳᖑᓪᓗᖓ ᑯᐊᐸᒃᑯᓐᓂ, ᐅᕙᓐᓄᑦ ᖁᕕᐊᓇᖅᐳᖅ ᑕᑯᓪᓗᓂ ᓂᐅᕕᖅᐸᒃᑐᓂ ᓂᐅᕕᕋᖅᑐᓂᑦ ᑯᐊᐸᒃᑯᓐᓂ ᐱᔪᓄᑦ ᐃᓚᒋᔭᐅᖃᑕᐅᓂᖏᓐᓄᑦ ᐊᑭᓕᐅᑎᒥᓄᑦ−ᐅᑎᖅᑎᓐᓂᐅᔪᓂᑦ," ᑯᐸᒃ ᐅᖃᓚᐅᖅᐳᖅ.
ᑯᐸᒃ, ᐅᖁᒪᐃᑦᑐᓄᑦ ᓄᓇᓯᐅᑎᓂᑦ ᐊᖁᑎᐅᔪᖅ ᕼᐋᒻᓚᒃᑯᓐᓂ, ᐊᖓᔪᖅᑳᖑᓯᒪᕗᖅ ᐊᕐᕌᒍᐸᓗᖕᓄᑦ ᑎᓴᒪᓄᑦ. ᐱᒋᐊᓚᐅᖅᓯᒪᕗᖅ ᑲᑎᒪᔨᑐᐃᓐᓇᐅᓪᓗᓂ ᓂᕈᐊᖅᑕᐅᓵᖅᑎᓪᓗᒍ, ᐊᖓᔪᖅᑳᑉ−ᑐᖏᓕᕆᓚᐅᖅᖢᓂᐅᒃ ᖃᔅᓯᐊᕐᔪᖕᓄᑦ ᐊᕐᕌᒍᓄᑦ. ᓂᕈᐊᖅᑕᐅᒃᑲᓐᓂᕋᑖᖅᑐᖅ ᑲᑎᒪᔨᓄᑦ. ᓂᕈᐊᕐᓂᐅᔪᑦ ᐃᓱᒻᒥᖅᑐᐃᔨᓄᑦ ᐱᓕᕆᐊᖑᓂᐊᖅᐳᑦ ᓯᕗᓪᓕᖅᐹᒥ ᑲᑎᒪᓂᐅᔪᒥ.
"ᐊᓕᐊᓇᐃᒋᔭᕋ ᑲᑎᒪᔨᐅᖃᑕᐅᓪᓗᓂ ᓇᐅᔮᓂ ᑯᐊᐸᒃᑯᓐᓂ ᐊᓕᐊᓇᐃᒋᒐᒃᑯ ᐃᓄᖕᓂ ᐃᑲᔪᕐᓂᕐᒧᑦ. ᐊᓕᐊᓇᐃᒋᔭᕋ ᓄᓇᓕᖕᓂ ᐃᑲᔪᕐᓂᕐᒧᑦ," ᐅᖃᓚᐅᖅᐳᖅ.
ᐃᓚᒋᔭᐅᓪᓗᓂ ᑯᐸᒃ, ᒥᓯᐅᓪ ᐊᒃᑯᐊᕐᔪᒃ, ᐲᑕ ᒪᓂᒃ, ᓚᐃᒥᑭ ᒪᓕᑭ ᐊᒻᒪ ᒥᐊᕆ ᑐᒃᑐᑦᔪᒃ ᓱᓕ ᑲᒪᔨᐅᖃᑕᐅᕗᑦ, ᒪᓕᒐᓕᐅᖅᑎᐅᓚᐅᖅᑐᖅ ᓯᑏᕝ ᒪᑉᓴᓚᒃᓗ ᐊᒻᒪ ᐱᐊᕆᑕ ᖃᐅᓪᓇᖅ ᓂᕈᐊᖅᑕᐅᓪᓗᓂ ᐃᓚᖏᖅᓯᓂᕐᒧᑦ ᔨᒥ ᐃᒻᒥᖓᕐᒥ ᐊᒻᒪ ᒥᐊᕆ ᑯᐸᒃ.
ᓂᕈᐊᖅᑕᐅᒃᑲᓐᓂᖅᑐᖅ ᑯᐸᒃ ᐅᖃᓚᐅᖅᐳᖅ ᑯᐊᐸᒃᑯᓐᓂ ᐃᓚᒋᔭᐅᔪᑦ ᐱᓚᐅᙱᓚᑦ ᐊᕕᒃᑐᖅᑕᐅᓂᖏᑦ ᕿᑐᕐᙱᐅᕈᑏᑦ ᐊᑯᓂᐸᓗᖕᒥ ᑭᓯᐊᓂ ᐊᐅᓚᑦᑎᔨᑖᑦᑎᐊᖅᒪᑕ.
"2009−ᒥ ᐱᕙᓪᓕᐊᓕᓚᐅᖅᐳᒍᑦ (ᐊᕕᒃᑐᖅᑕᐅᓂᖏᑦ ᕿᑐᕐᙱᐅᕈᑎᓂᑦ) ᐅᑎᖅᑎᕆᓂᐅᔪᓂ ᐃᓚᒋᔭᐅᔪᓄᑦ," ᐅᖃᓚᐅᖅᐳᖅ. "ᐊᒻᒪᓗ ᑕᐃᒪᙵᓂ ᐱᖃᑦᑕᐃᓐᓇᓕᖅᐳᒍᑦ (ᐊᕕᒃᑐᖅᑕᐅᓂᖏᑦ ᕿᑐᕐᙱᐅᕈᑏᑦ) ᐊᕐᕌᒍᑕᒫᒥ."
ᑕᐃᒪᙵᓂ 2009−ᒥ, ᑯᐊᐸᒃᑯᑦ ᑕᐃᒪᐃᒐᔪᒃᖢᑎᒃ ᑐᓂᓯᓯᒪᕗᑦ $1 ᒥᓕᐊᓐᐸᓗᖕᓂ ᐊᕕᒃᑐᖅᑕᐅᓂᖏᑦ ᕿᑐᕐᙱᐅᕈᑎᓂᑦ ᐊᕐᕌᒍᑕᒫᒥ.
ᑭᒡᒐᖅᑐᐃᐸᓗᒃᐳᑦ $11 ᒥᓕᐊᓐᐸᓗᖕᓂ ᓂᐅᕕᖅᑕᐅᓂᐅᔪᓂ ᐊᕐᕌᒍᑕᒫᑦ.
"ᓇᓗᓇᙱᓚᖅ ᐃᓄᐃᑦ ᐃᑲᔪᖅᓱᐃᕐᔪᐊᕐᓂᖏᓐᓂ ᑯᐊᐸᒃᑯᓐᓂ," ᐅᖃᓚᐅᖅᐳᖅ ᐊᐅᓚᑦᑎᔨᐅᔪᖅ ᑐᕈᐊᐃ ᓚᐸᓛᖕᒃ, ᓄᓇᓕᖕᓄᑦ ᐅᑎᓚᐅᖅᑐᒥ 2015−ᒥ.
ᑯᐸᒃ ᐅᖃᓚᐅᖅᐳᖅ ᐊᐅᓚᑦᑎᔨᑦᑎᐊᕙᐅᔪᒥ ᐱᒻᒪᕆᐅᓪᓗᓂ ᐱᔾᔪᑕᐅᕗᖅ ᐱᓕᕆᑦᑎᐊᕈᓐᓇᕐᓂᐅᔪᒥ.
"ᐊᔪᕐᓇᐃᓐᓇᐅᔭᖅᐳᖅ ᓇᓂᓯᓂᕐᒥ ᐊᐅᓚᑦᑎᔨᑦᑎᐊᕙᐅᔪᒥ ᓂᐅᕕᕐᕕᖕᓄᑦ. ᐅᐱᓐᓇᖅᐳᖅ, ᐊᐅᓚᑦᑎᔨᑦᑎᐊᖃᖃᑦᑕᕋᑦᑕ. ᑐᕈᐊᐃᑕᖃᓚᐅᖅᑳᕋᑕ ᔮᓐ ᑳᕝᒥᓐ ᐊᐅᓚᑦᑎᔨᒋᓚᐅᖅᐸᕗᑦ. ᐱᐅᔪᒻᒪᕆᐅᓚᐅᕆᕗᖅᑕᐅᖅ," ᐅᖃᓚᐅᖅᐳᖅ ᑯᐸᒃ.
50-ᓂ-ᐅᑭᐅᓕᒃ ᓇᐅᔮᓂ ᑯᐊᐸᒃᑯᑦ ᐃᓚᒋᔭᐅᔪᓄᑦ-ᓇᖕᒥᓂᕆᔭᐅᕗᖅ ᓂᐅᕕᕐᕕᐅᓪᓗᓂ. ᑳᓪᒻ ᐃᐊᒃᑯᓐᓂ ᐱᓕᕆᔨᐅᒋᕗᑦ ᓇᐅᔮᓂ, ᑕᓚᕖᓴᓄᑦ ᑲᐃᐳᖃᖅᑎᐅᒋᕗᑦ, ᐊᒻᒪ ᑐᔪᕐᒥᕕᖃᖅᖢᑎᒃ ᐊᒻᒪ ᐊᑐᖅᑐᐊᒐᒃᓴᓂ−ᐱᖁᑎᓂᑦ ᓇᖕᒥᓂᖃᖅᑎᐅᕗᑦ. ᓱᓕᒃᑲᓐᓂᖅ, ᓇᖕᒥᓂᕆᔭᐅᔪᖅ ᑎᒍᒥᐊᕆᕗᑦ ᐅᖅᓱᐊᓗᖕᒧᑦ ᑳᓐᑐᕌᖃᖅᐳᑦ ᓄᓇᕗᒻᒥ ᒐᕙᒪᒃᑯᓐᓂ, ᑲᒪᒋᔭᖃᓲᖑᕗᑦ ᖃᖓᑕᓲᒃᑯᑦ−ᐅᓯᔭᐅᔪᓄᑦ ᑐᓂᓯᓂᐅᔪᓂ ᐱᔭᕆᐊᖃᕌᖓᑕ, ᐊᒻᒪ ᓇᖕᒥᓂᖃᖅᖢᑎᒃ ᐊᓯᐊᒎᖅᑐᒥ ᑕᓐᑐᕋ ᓂᕿᓂᑦ−ᑎᑭᓴᐃᕕᖕᒥ ᐊᒻᒪ ᓂᐅᕕᕐᕕᕋᓛᒥ.
40−ᓂ ᐃᖅᑲᓇᐃᔭᖅᑎᖃᖅᖢᑎᒃ, ᑯᐊᐸᒃᑯᑦ ᐊᖏᓛᖑᖃᑕᐅᓪᓗᑎᒃ ᐃᖅᑲᓇᐃᔭᖅᑎᖁᑎᐅᕗᑦ ᓄᓇᓕᖕᓂ.
"ᕼᐋᒻᓚᒃᑯᑦ ᐅᓄᕐᓂᖅᓴᓂ ᐃᖅᑲᓇᐃᔭᖅᑎᖁᑎᖃᑐᐃᓐᓇᕆᐊᓕᒃ," ᐅᖃᓚᐅᖅᐳᖅ ᓚᐸᓛᖕᒃ.
" ᑯᐊᐸᒃᑯᑦ ᐃᓚᐅᖃᑕᐅᕐᔪᐊᖅᐳᑦ ᓄᓇᓕᐅᔪᒥ. ᑯᐊᐸᒃᑯᑦ ᑐᓂᓯᓚᐅᖅᐳᑦ $50,000−ᓂ ᕼᐋᒻᓚᒃᑯᓐᓄᑦ ᕿᑯᕐᒥ (ᑐᙵᕕᒃᓴᓕᐅᕐᓂᕐᒥ) ᐊᓐᓂᑭᑕᕐᕕᖕᒧᑦ. ᐊᒻᒪ ᐊᓯᖏᓐᓂ ᑲᑐᔾᔨᖃᑎᒌᖑᔪᓂᑦ, ᓲᕐᓗ ᐸᖅᓴᐃᔨᓂᑦ ᓴᐳᔾᔨᔨᐅᔪᓂᓪᓗ. ᑕᒪᒃᑭᓕᒫᑦ ᐊᓯᖏᑦ ᑲᑐᔾᔨᖃᑎᒌᖑᔪᑦ, ᐊᐱᕆᒑᖓᑕ ᑮᓇᐅᔭᖅᑖᖅᑎᑕᐅᔪᒪᓪᓗᑎᒃ, ᐃᑲᔪᕋᓱᐊᐃᓐᓇᐅᔭᖅᐸᕗᑦ," ᐅᖃᓚᐅᖅᐳᖅ ᑯᐸᒃ.
ᑲᑎᓪᓗᒍ, ᑯᐊᐸᒃᑯᑦ ᑐᓂᓯᓯᒪᕗᑦ $88,000 ᐊᕐᕌᒎᓚᐅᖅᑐᒥ.
530−ᐸᓗᖕᓂ ᐃᓚᒋᔭᐅᔪᖃᖅᐳᖅ ᓄᓇᓕᐅᔪᒥ 1100−ᖑᔪᓄᑦ.
"ᐊᑐᓂ ᐃᓄᒃ ᓂᐅᕕᕆᐊᓲᖅ ᑕᐃᑲᓂ ᐃᓚᒋᔭᐅᒐᔪᒃᐳᑦ. ᐊᑐᓂ ᐃᓄᒃ ᐃᓚᒋᔭᐅᓕᖃᑕᐅᔪᖅ ᓂᐅᕕᓲᖑᕗᖅ ᐊᑕᐅᓯᕐᒥ ᓇᖕᒥᓂᖃᖃᑕᐅᓂᕐᒧᑦ ᑯᐊᐸᒃᑯᓐᓂ ᐊᒻᒪ ᐊᓱᐃᓛᒃ ᓂᐅᕕᖅᑕᖏᑦ ᑕᒪᒃᑭᑦ ᑎᑎᕋᖅᑕᐅᕙᓪᓕᐊᓲᖑᕗᑦ. ᑭᐅᒪᔭᕆᐊᖃᖅᐳᑦ ᒥᑭᓛᖓᓐᓂ ᐊᖏᓂᐅᔪᒥ ᑕᐃᒪᐃᓪᓗᐊᖅᑎᑕᐅᓂᕐᒥ ᑯᐊᐸᒃᑯᓐᓂ ᐊᒻᒪ ᑎᑭᐅᑎᒑᖓᒥᒃ ᒥᑭᓛᖓᓂ ᐊᖏᓂᐅᔪᒥ ᐳᓴᓐᑎᖓᓂ ᐅᑎᓲᖑᕗᑦ ᓂᐅᕕᕈᓐᓇᐅᑎᖏᓐᓄᑦ," ᐅᖃᓚᐅᖅᐳᖅ ᓚᐸᓛᖕᒃ, ᐃᓚᒋᐊᖅᓯᓪᓗᓂ ᐃᓄᖕᒥ ᐊᕐᕌᒍᒥ ᒪᕐᕉᖕᓂᓪᓘᓐᓃᑦ ᐃᓚᒋᔭᐅᓕᖅᑎᓪᓗᒋᑦ ᐱᕙᓪᓕᐊᓂᖏᓐᓂ 10−ᒥ 20 ᐳᓴᓐᑎᒥ ᐊᕕᒃᑐᖅᑕᐅᓂᖏᑦ ᕿᑐᕐᙱᐅᕈᑎᓂᑦ.
"ᐃᓄᖕᒥ ᓂᐅᕕᖅᓯᒪᓂᖃᕈᓂ $100,000−ᓂ ᐊᒻᒪ ᐱᒍᕕᑦ 10 ᐳᓴᓐᑎᒥ ᐅᑎᖅᑎᑕᐅᓂᐅᔪᒥ, ᐱᕗᑎᑦ $10,000−ᓂ."
ᐊᕕᒃᑐᖅᑕᐅᓂᖏᑦ ᕿᑐᕐᙱᐅᕈᑏᑦ ᐊᑐᖅᑕᐅᔪᓐᓇᖅᐳᖅ ᓂᐅᕕᕐᓂᕐᒧᑦ ᐱᖁᑎᓂᑦ ᓯᕗᓂᒃᓴᐅᔪᒥ, ᐊᑭᓖᓄᓕᓘᓐᓃᑦ ᐊᑭᓕᒃᓴᖏᓐᓂ ᐱᑕᖄᓂᒃᑐᒥ ᐊᑯᓂᐅᔪᒃᑯᑦ ᐊᑐᖅᑐᐊᖅᑕᐅᓂᐅᔪᒥ ᐊᖏᓂᖅᓴᐅᔪᓄᑦ ᐱᖁᑎᓄᑦ.
"ᐊᒥᓱᐊᓗᖕᓂ ᐃᑲᔪᓲᖑᕗᖅ ᐃᓚᒋᔭᐅᖃᑕᐅᓂᖏᓐᓄᑦ ᐊᑭᓕᐅᑎᐅᔪᒥ ᐱᑎᑕᐅᓗᑎᒃ," ᐅᖃᓚᐅᖅᐳᖅ ᑯᐸᒃ.
"ᐊᒥᓱᐊᓗᖕᓂ ᓂᕿᑖᓲᖑᕗᑦ, ᓂᐅᕕᕐᓗᑎᒡᓘᓐᓃᑦ ᔮᒪᕼᐋᒥ ᑎᓴᒪᓕᖕᒥᓪᓘᓐᓃᑦ."
ᓇᐅᔮᓂ ᑯᐊᐸᒃᑯᑦ ᑐᓂᓯᓲᖑᕗᑦ ᐊᕕᒃᑐᖅᑕᐅᓂᖏᑦ ᕿᑐᕐᙱᐅᕈᑎᓂᑦ ᒪᕐᕉᖕᓂ ᑐᓂᓯᓂᐅᔪᓂ, ᑎᓯᐱᕆᒥ ᐊᒻᒪ ᒪᐃᒥ.