ᕿᑎᐊᓂ, ᓴᐅᒥᖕᒥ: ᐋᓂ ᐃᐱᖅ, ᕇᑯ ᒪᓃᑦᑐᖅ, ᑎᕇᓴ ᓯᑯᐊᖅ, ᐱᕐᓇᑎ ᐅᑕᒃ, ᒥᐅᕆᐊᒻ ᐊᒡᓘᒃᑲᖅ, ᓯᑐᓂ ᓂᕐᓗᖓᔪᖅ, ᕗᕌᓐᓯᔅ ᖃᐳᑦ, ᓇᑖᖅ ᐅᖔᓛᖅ ᐊᒻᒪ ᐃᒧᕉᑦ ᒪᒃᑖᓄᑦ. ᓯᕗᓂᐊᓂ, ᓴᐅᒥᖕᒥ: ᔫᓂᔅ ᐋᕆᐊᖅ, ᐊᓕᐊᓇᐃᑦᓂᕕᐊᑦᓴᖅ, ᐊᓕ ᖁᒪᖔᐱᒃ ᐊᒻᒪ ᓄᑲᖓ, ᐋᓇᐱᓚ ᐱᐅᒑᑦᑐᒃ, ᓰᓇ ᐊᑯᒪᓕᒃ, ᑑᒪ ᓚᐃᓴ, ᑯᕆᔅᑏᓐ ᑑᑑ ᐊᒻᒪ ᒧᕇ ᐱᓘ.
$500,000-ᑖᖅᖢᑎᒃ ᒐᕙᒪᑐᖃᒃᑯᓐᓂ, ᖃᒡᒋᐊᕘᑦ ᖃᓂᓐᓂᖅᓴᒻᒪᕆᐅᓕᖅᐳᑦ ᑎᑭᐅᑎᓂᖏᓐᓂ ᐃᓱᒪᒋᔭᐅᓯᒪᔪᒥ ᖁᙱᐊᖅᑕᐅᓂᕐᒧᑦ ᓴᓇᐅᒐᓕᕆᕝᕕᖕᒥ ᓄᓇᕗᒻᒥ.
"ᐊᑕᐅᓯᖅ ᑭᐅᓘᑎᐅᓂᐅᔪᖅ ᑕᒪᓐᓇ ᐱᐅᕐᔪᐊᕋᔭᕐᓂᖓᓂ ᑮᓇᐅᔾᔭᒃᓴᓂᑦᑐᓐᓄᑦ, ᑭᓯᐊᓂ ᐃᓕᖅᑯᓯᑎᒍᑦ ᐳᓚᕋᖅᑐᓕᕆᓂᕐᒧᑦ ᐱᑕᖃᕈᓐᓇᕐᓂᖃᕐᒪᑦ ᖃᒡᒋᖅ ᑲᑎ1ᕝᕕᐅᔪᕐᒧᑦ," ᐅᖃᓚᐅᖅᐳᖅ ᐃᓱᒻᒥᖅᑐᐃᔨ ᐊᓚᓐ ᕼᐋᒧᓪᑎᓐ, ᑭᓱᓄᑦ ᖃᒡᒋᐊᕘᑦ ᐱᓕᕆᓂᖏᓐᓂ ᑮᓇᐅᔭᓄᑦ.
ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑕᐅᓂᖓᓂ ᑎᑭᓚᐅᖅᐳᖅ ᐅᕘᓇ ᐃᓱᒪᑐᔪᓄᑦ ᓂᐅᕐᕈᑎᖃᕐᓂᐅᔪᒥ ᑲᓇᑕᒥ ᐱᓕᕆᐊᖑᔪᒧᑦ, ᐊᒻᒪᓗ ᖃᒡᒋᐊᕘᑦ ᓄᓇᕗᒻᒥ ᖁᙱᐊᖅᑕᐅᕙᒃᑐᓄᑦ ᓴᓇᐅᒐᓕᕆᕝᕕᖓᓄᑦ ᐊᑕᐅᓯᐅᕗᖅ 20-ᓂ ᐱᓕᕆᐊᒃᓴᐅᔪᓄᑦ ᐱᔪᓂ ᑲᑎᓪᓗᒍ $7.8 ᒥᓕᐊᓐᓂ.
ᑮᓇᐅᔭᖃᖅᑎᑕᐅᓂᖅ ᑐᕌᖓᓂᖃᓪᓗᐊᑕᓚᐅᖅᐳᖅ ᐱᓕᕆᓂᐅᔪᓄᑦ ᐱᔾᔪᑎᖃᖅᑐᓄᑦ ᐸᕐᓇᐃᓂᕐᒧᑦ ᒪᕐᕉᖕᓄᑦ ᑕᑯᒃᓴᐅᓂᐅᔪᓄᑦ – ᐅᐱᒋᔭᐅᕐᔪᐊᖅᑐᒥ ᑭᕕᐅᖅ ᐅᑎᖅᐳᖅ ᐊᒻᒪ ᐅᑭᐅᖅᑕᖅᑐᒥ ᐱᓰᑦ – ᓄᓇᕐᔪᐊᒧᑦ ᖁᙱᐊᖅᑕᐅᓂᐅᔪᒧᑦ, ᐃᓚᖃᖅᑐᒥ ᓄᓇᕐᔪᐊᒥ ᓂᐅᕕᐊᒃᓴᖃᕆᐊᖅᑐᕐᓂᕐᒧᑦ, ᖁᕝᕙᖅᓴᖅᑕᐅᓂᖓᓄᑦ, ᐊᒻᒪ ᑕᑯᒃᓴᐅᑎᑦᑎᓂᐅᔪᒧᑦ.
ᐅᑭᐅᖅᑕᖅᑐᒥ ᐱᓰᑦ ᖃᒡᒋᐊᕘᑦ ᑭᖑᓪᓕᖅᐹᖑᓪᓗᓂ ᓴᖅᑭᑎᑕᐅᓂᕆᕙᖓ, ᐱᒋᐊᓚᐅᖅᑐᒥ ᐊᐅᔭᒥ 2018-ᒥ ᐱᓰᑦ ᐃᓕᓐᓂᐊᕐᓂᐅᔪᒥ, ᑐᕌᕐᓂᖃᓚᐅᕐᒥᔪᒥ ᖃᕋᓴᐅᔭᑎᒍᑦ ᐊᑐᓕᖅᑎᑦᑎᓂᐅᔪᒥ.
"ᑮᓇᐅᔭᖃᖅᑎᑕᐅᓂᖅ ᐅᕙᑦᑎᓐᓂ ᐱᔪᓐᓇᖅᑎᑦᑎᓚᐅᖅᐳᖅ ᐃᖅᑲᓇᐃᔭᖅᑎᑦᑎᓂᕐᒥ 42-ᐸᓗᖕᓂ ᐃᓄᖕᓂ ᓴᓇᐅᒐᓕᕆᔨᐅᔪᓄᑦ, ᓴᓇᐅᒐᓄᑦ ᐊᐅᓚᑦᑎᔨᐅᔪᓂ, ᑕᕐᕆᔭᓕᐊᒧᑦ ᑕᑯᒃᓴᐅᑎᑦᑎᔨᐅᔪᓄᑦ, ᐊᔾᔨᓕᐅᕆᔨᓂ, ᑎᑕᒃᑎᓂ, ᐃᙱᖅᑎᓂ, ᕿᓚᐅᔾᔭᖅᑎᓂᑦ ᐊᒻᒪ ᓴᓇᐅᒐᓄᑦ ᐱᓕᕆᔨᐅᔪᓂᑦ," ᐅᖃᓚᐅᖅᐳᖅ ᕼᐋᒧᓪᑎᓐ.
"ᐃᓚᖃᓚᐅᖅᐳᖅ ᐱᓕᒻᒪᒃᓴᕐᓂᐅᔪᒥ ᐃᖃᓗᖕᓂ ᐊᒻᒪ ᒪᓐᑐᕆᐊᒥ ᑲᓇᑕᒥ ᖁᙱᐊᕐᕕᐅᔪᒥ ᐃᓕᓐᓂᐊᕐᕕᖓᓂ ᑲᓇᑕᒥ ᐊᒻᒪ ᑕᑯᒃᓴᐅᑎᑦᑎᓂᐅᔪᓄᑦ ᓄᓇᕐᔪᐊᒥ ᖁᕕᐊᓱᒍᑕᐅᔪᓄᑦ, ᖁᙱᐊᕐᕕᓂᑦᐊᒻᒪ ᑕᑯᒃᓴᐅᑎᑦᑎᓂᐅᔪᓂᑦ. ᐱᔪᓐᓇᖅᑎᑦᑎᓚᐅᕆᕗᖅ ᐱᕙᓪᓕᐊᑎᑦᑎᓂᕐᒥ ᑕᕐᕆᔭᓕᐊᖑᔪᓄᑦ ᕈᕝᕙᖅᓴᐃᓂᐅᔪᓂ ᓱᓇᒃᑯᑖᓂᑦ."
ᒫᓐᓇᓕᓴᐅᓛᖑᔪᒥ, ᖃᒡᒋᐊᕘᑦ ᓴᖅᑭᑎᑦᑎᓚᐅᖅᐳᑦ ᐅᑭᐅᖅᑕᖅᑐᒥ ᐱᓯᕐᓂᑦ ᒪᓐᑐᕆᐊᒥ ᓄᓇᕐᔪᐊᒧᑦ ᑎᑕᖕᓂᕐᒧᑦ ᖁᕕᐊᓱᒍᑕᐅᔪᓄᑦ ᓄᓇᕐᔪᐊᒥ ᐃᓄᖕᓄᑦ ᑲᑐᔾᔨᖃᑎᒌᖑᔪᓄᑦ ᕕᕈᐊᕆᐅᑉ-ᕿᑎᖅᐸᓯᐊᓂ. ᐱᑎᑦᑎᓂᖃᓚᐅᖅᐳᖅ ᖁᙱᐊᖅᑕᐅᓂᐅᓂᐊᖅᑐᓂ ᕕᓐᓛᓐᒥ ᔫᓂᒥ, ᓄᐊᕙᐃᒧᑦ ᔪᓚᐃᒥ, ᕗᕌᓐᔅᒥ ᐋᒍᔅᑎᒥ, ᓵᖕᕼᐊᐃ, ᓴᐃᓇᒧᑦ ᓯᑎᐱᕆᒥ, ᐊᒻᒪᓗᑦᑕᐅᖅ ᓄᓇᖃᖅᑳᖅᓯᒪᔪᓄᑦ ᑎᑕᖕᓂᕐᒧᑦᖁᕕᐊᓱᒍᑕᐅᔪᓂᑦ ᑲᓇᑕᒥ.
ᖃᒡᒋᐊᕘᑦ ᖁᙱᐊᖅᑕᐅᕙᒃᑐᖅ ᐊᒻᒪ ᐱᓕᕆᐊᒃᓴᒧᑦ ᐊᐅᓚᑦᑎᔨ ᑯᕆᔅᑏᓐ ᑑᑑ ᐊᒻᒪ ᕕᓂ ᖃᕆᑕᖅ ᐊᐅᓪᓛᕐᓂᐊᖅᐳᑦ ᐃᑎᖕᐴᒡ ᖁᕕᐊᓱᒍᑎᖓᓂ ᐃᓚᒋᔭᐅᓂᐅᔪᓄᑦ ᐋᒍᔅᑎᒥ ᓴᖅᑭᑎᑦᑎᓂᕐᒧᑦ ᑭᕕᐅᖅ ᐅᑎᖅᐳᖅ ᖁᙱᐊᕐᕕᐅᔪᓄᑦ ᐊᒻᒪ ᖁᙱᐊᕐᕕᓄᑦ ᖁᕕᐊᓱᒍᑕᐅᔪᓄᑦ ᓄᓇᕐᔪᐊᓕᒫᒧᑦ.
"ᐊᖏᓛᖑᓪᓗᓂ ᑕᑯᒃᓴᐅᑎᑕᐅᓂᐅᓂᐊᖅᐳᖅ ᖁᙱᐊᖅᑕᐅᕙᒃᑐᓄᑦ ᓄᓇᕐᔪᐊᓕᒫᒥ, ᐊᒻᒪ ᑭᒃᑯᓕᒫᑦ ᕿᓂᖅᑐᓄᑦ ᐊᔾᔨᐅᙱᑦᑐᓄᑦ ᐊᒻᒪ ᑕᑯᒥᓇᖅᑐᓂ ᖁᙱᐊᖅᑕᐅᓂᐅᔪᓂ ᑕᐃᑲᓃᓐᓂᐊᖅᐳᑦ," ᐅᖃᓚᐅᖅᐳᖅ ᕼᐋᒧᓪᑎᓐ.
ᑑᑑ ᖁᕕᐊᑉᐳᖅ.
"ᑭᓯᐊᓂ ᖁᓱᕈᔪᒃᑐᖓ," ᐅᖃᓚᐅᖅᐳᖅ ᒪᒃᑯᒃᑐᖅ ᖁᙱᐊᖅᑕᐅᕙᒃᑐᖅ.
"ᐱᔭᕆᐅᖅᓴᕆᐊᖃᕐᓂᐊᖅᐳᖓ."
ᒫᓐᓇᐅᔪᒥ, ᐱᓕᕆᐊᒃᓴᐅᔪᒧᑦ ᐊᐅᓚᑦᑎᔨ ᐊᒻᒪ ᓴᓇᐅᒐᓕᕆᔨ ᑳᑦᓖᓐ ᒥᐊᕆᑦ ᒫᓐᓇᐅᔪᒥ ᐊᐅᓚᑦᑎᕗᖅ ᑭᓱᓕᒫᓂᒃ ᐅᑭᐅᖅᑕᖅᑐᒥ ᐱᓯᕐᓂᑦ.
ᖃᒡᒋᐊᕘᑦ ᐳᓚᕋᐃᓐᓇᖅᐳᑦ ᓄᓇᕗᒻᒥ ᓄᓇᓕᐅᔪᓄᑦ, ᓴᖅᑭᑎᑦᑎᓪᓗᑎᒃ ᐃᓕᓐᓂᐊᕐᓂᐅᔪᓂ ᒪᒃᑯᒃᑐᓄᑦ ᐃᓄᖕᓄᑦ ᐱᔪᒪᓂᖃᖅᑐᓂ ᖁᙱᐊᖅᑕᐅᓂᕐᓄᑦ ᓴᓇᐅᒐᓕᕆᓂᕐᓄᑦ. ᐃᓕᓐᓂᐊᕐᓃᑦ ᑲᑎᙵᓂᖃᖅᐳᖅ ᑕᑯᒃᓴᐅᑎᑕᐅᓂᐅᕙᒃᑐᓄᑦ.
ᐱᓕᕆᐊᒃᓴᐅᔪᒧᑦ ᐊᐅᓚᑦᑎᔨ, ᖁᙱᐊᖅᑕᐅᕙᒃᑐᖅ ᐊᒻᒪ ᖁᙱᐊᖅᑕᐅᕙᒃᑐᓂ ᐋᖅᑭᒃᓱᐃᔨ ᕇᑯ ᒪᓃᑦᑐᖅ ᐊᑐᐃᓐᓇᖃᖅᑎᑦᑎᕗᖅ ᐆᒃᑑᑎᐅᔪᒥ ᖃᓄᐃᒻᒪᑦ ᐱᕙᓪᓕᐊᑎᑦᑎᓂᕐᒥ ᖁᙱᐊᖅᑕᐅᕙᒃᑐᓄᑦ ᓴᓇᐅᒐᓕᕆᓂᖅ ᓄᓇᕗᒻᒥ ᐱᒻᒪᕆᐅᔪᓐᓇᕐᓂᖃᕈᓐᓇᕐᓂᖓᓂ ᐅᔭᕋᖕᓂᐊᕐᓂᓂᑐᑦ, ᒫᓐᓇᓕᓴᒥ ᑲᑎᙵᓂᖃᕐᓂᕋᖅᑕᐅᔪᒥ ᖁᑦᑎᖕᓂᖅᓴᒥ ᐃᓱᓕᑦᑎᓂᐅᔪᓄᑦ ᐅᓄᕐᓂᖏᓐᓂ. ᒪᒃᑯᒃᑐᑦ ᓄᖅᑲᖅᓯᒪᔪᓄᑦ ᐃᓕᓐᓂᐊᕐᕕᖕᒥ, ᐅᑎᓚᐅᖅᐳᑦ ᐃᓕᓐᓂᐊᕐᕕᓄᑦ.
"ᑕᑯᓚᐅᖅᐳᑦ ᑎᑭᑉᐸᓪᓕᐊᓂᑦᑎᓐᓂ, ᐊᒻᒪ ᐃᓚᒋᔭᐅᔪᒪᓚᐅᖅᐳᑦ ᐃᓕᓐᓂᐊᕐᓂᕆᔭᑦᑎᓐᓂ," ᒪᓃᑦᑐᖅ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐃᓕᓐᓂᐊᕐᕕᖕᓃᑦᑕᕆᐊᖃᖅᐳᑦ ᐃᓚᐅᖃᑕᐅᓂᕐᒧᑦ.
"ᐊᑕᐅᓯᖅ ᐃᖅᑲᐅᒪᓇᓗᐊᖅᐳᖅ. ᐊᑕᐅᓯᕐᒥ ᓄᓇᓕᖕᓃᑎᓪᓗᑕ, ᐊᑕᐅᓯᕐᒥ ᒪᒃᑯᒃᑐᒥ ᐅᕙᓐᓄᐊᓚᐅᖅᐳᖅ ᐊᒻᒪ ᐅᖃᖅᖢᓂ, 'ᐱᖃᓐᓇᕆᔭᕋ ᐃᒻᒥᓃᓚᐅᖅᑎᓪᓗᒍ ᑕᖅᑭᒥᑦ ᒪᕐᕉᖕᓂᓪᓘᓐᓃᑦ ᓯᕗᓂᐊᓂ …' ᐃᓕᓐᓂᐊᓚᐅᙱᓚᖅ. ᖃᐅᔨᒐᒥ ᓄᓇᓕᖓᓐᓄᐊᕐᓂᐊᕐᓂᑦᑎᓐᓂ, ᐃᓚᒋᔭᐅᖃᑕᐅᔪᒪᓚᐅᖅᐳᖅ.
"ᑲᑉᐱᐊᓇᒐᓚᒃᑑᔮᓚᐅᖅᐳᖅ,ᑭᓯᐊᓂ ᐱᒋᐊᕋᑦᑕ ᐃᓕᓐᓂᐊᕐᓂᐅᔪᓂ, ᖁᕕᐊᑦᑕᒃᐹᓪᓕᓚᐅᖅᐳᖅ. ᐅᖃᐅᔾᔨᓚᐅᖅᐳᖅ ᒪᒃᑯᖕᓂᖅᓴᓂ ᓱᕈᓯᕐᓂᑦ, 'ᑕᑯᒋᑦ, ᐅᑯᐊ ᐃᓄᐃᑦ ᐅᕙᓃᑦᑐᑦ ᐃᓕᖕᓂ ᐃᓕᓐᓂᐊᖅᑎᑦᑎᔭᖅᑐᖅᖢᑎᒃ. ᓈᓚᓚᐅᕆᑦ.' ᐊᒻᒪ ᐃᓕᓐᓂᐊᕆᐊᖏᓐᓇᓚᐅᖅᐳᖅ."
ᒪᓃᑦᑐᖅ, ᑲᖏᖅᖠᓂᕐᒥᐅᑕᖅ, ᐅᖃᓚᐅᕆᕗᖅ ᐊᑖᑕᖓ ᐊᒻᒪ ᐊᒃᑲᖓ ᐃᖅᑲᓇᐃᔭᖅᐳᑦ ᐅᔭᕋᖕᓂᐊᕐᕕᖕᒥ.
"ᐊᒻᒪ ᐅᕙᓐᓂᑦ ᑕᑯᙱᓚᖓ ᑕᐃᒪᐃᓐᓂᕐᒧᑦ. ᓯᕗᓪᓕᖅᐸᐅᔪᒃᓴᐅᕗᖓ ᐃᓚᓐᓂᑦ ᑕᐃᒪᐃᓕᐅᕐᓂᕐᒧᑦ ᒫᓐᓇ ᐱᓕᕆᔭᓐᓂᑦ. ᐃᒪᐃᑉᐳᑦ, 'ᖃᓄᐃᒻᒪᑦ ᓄᓇᕗᒻᒥ ᒐᕙᒪᒃᑯᓐᓄᑦ ᐃᖅᑲᓇᐃᔮᖅᑖᙱᓚᑎᑦ?' ᐊᓕᐊᓇᐃᒋᕙᕋ ᐱᓕᕆᐊᕆᔭᓐᓂ. ᐊᑭᓕᖅᓱᖅᑕᐅᓲᖑᕗᖓ ᐱᓕᕆᓂᕐᒧᑦ," ᐅᖃᓚᐅᖅᐳᖅ ᒪᓃᑦᑐᖅ.
ᖃᒡᒋᐊᕘᑦ ᓂᕆᐅᒃᐳᑦ ᐱᒋᐊᓛᕐᓂᕐᒧᑦ ᐊᔪᕐᓇᕐᔮᙱᒃᑲᓗᐊᕐᒪᖔᑦ ᖃᐅᔨᓴᖅᑕᐅᓂᕐᒧᑦ ᒪᐃᒥ ᑐᓂᓯᓂᕐᒥ ᐱᔭᕆᐊᖃᖅᑐᓂ ᐅᓂᒃᑳᕆᓂᐅᔪᓂ ᓇᑉᐸᖅᑎᕆᓂᕐᓄᑦ ᐊᑭᖏᓐᓂ, ᓴᓇᔭᐅᓂᖓᓂ, ᐊᐅᓚᑕᐅᓂᖓᓂ, ᐊᐅᓚᑦᑎᓂᐅᔪᓄᑦ ᐊᒻᒪ ᑮᓇᐅᔭᖃᖅᑎᑕᐅᓂᐅᔪᓄᑦ.