Skip to content

ᖁᕐᓗᖅᑐᒥᐅᑦ ᒪᓕᒐᓕᐅᖅᑎᖃᓕᖅᑐᑦ

ᒦᓚ ᐊᑦᔪᑲᖅ ᑲᒥᓐᖑᐊᖅ ᓂᕈᐊᖅᑕᐅᓇᓱᐊᖅᓗᓂ ᐊᒃᓱᕈᕆᐊᖃᖏᑦᑐᖅ ᒪᓕᒐᓕᐅᖅᑎᖑᕋᓱᐊᕐᓗᓂ ᖁᕐᓗᖅᑐᒥᐅᓄᑦ, ᑭᓯᐊᓂᓕ ᐸᕐᓇᒃᓯᒪᔭᒥᓂᒃ ᐊᑐᕐᓂᐊᖅᑐᖅ ᓄᓇᓕᖓᓂᒥᐅᑦ ᐃᓱᒪᒋᔭᖏᓐᓂᒃ ᑲᑎᖅᓱᐃᓗᓂ ᐳᓚᕋᕐᓂᐊᖅᑕᖏᒎᖅ ᑐᓴᕐᕕᒋᓇᓱᐊᕐᓗᒋᑦ ᐃᓱᒪᒋᔭᖏᓐᓂᒃ.

ᒦᓚ ᐊᑦᔪᑲᖅ ᑲᒥᖕᖑᐊᖅ ᑖᓐᓇᑑᓪᓗᓂ ᓂᕈᐊᒐᑦᓴᐅᖕᒪᑦ ᐃᓕᔭᐅᓴᐅᑎᒋᓚᐅᖅᑐᖅ ᒪᓕᒐᓕᐅᖅᑎᐅᓂᐊᓕᖅᑐᖅ ᖁᕐᓗᖅᑐᒥᐅᓄᑦ ᓯᑎᐱᕆ 29-ᒥ, ᑖᓐᓇᑐᐊᖅ ᐊᑭᒪᔨᒃᓴᖃᖏᓱᓂ ᑕᐃᒪᓐᓇ ᐱᓚᐅᖅᑐᖅ ᓄᓇᕗᓕᒫᒥ. ᐊᔾᔨ ᐱᔭᐅᔪᖅ ᒦᓚ ᐊᑦᔪᑲᖅ ᑲᒥᖕᖑᐊᒥᑦ

“ᓱᓕ ᓄᓇᓕᖕᒥᐅᓄᑦ ᐳᓚᕋᑲᑕᖕᓂᐊᖅᑐᖓ ᓂᕈᐊᖅᑕᐅᓇᓱᐊᖅᑐᑎᑐᑦ ᑕᒪᐃᓐᓂᒃ ᐊᖏᕐᕋᕆᔭᐅᔪᓄᑦ ᐃᓯᑲᑕᖕᓂᐊᖅᑐᖓ ᑕᒫᓂ ᑭᒡᒐᖅᑐᖅᑎᐅᕕᒋᓂᐊᖅᑕᓐᓂ ᒪᓕᒐᓕᐅᖅᕕᖕᒥ ᑲᑎᒪᔨᐅᓕᕈᒪ ᖃᐅᔨᕝᕕᒋᓇᓱᐊᕐᓗᒋᑦ ᖃᓄᐃᑦᑐᓂᒃ ᕿᓚᓈᕆᔭᖃᕐᒪᖔᑕ ᖃᓄᐃᑦᑐᓂᒃᓗ ᐃᓱᒫᓗᒋᔭᖃᕐᒪᖔᑕ,” ᐅᖃᕆᓪᓗᓂ. ᐃᓚᓪᓗᓂᐅᒃ ᓇᖕᒥᓂᖅ ‘ᐅᔾᔨᕆᑳᓪᓚᖕᓇᖅᑐᖅ’ ᓯᕗᓪᓕᖅᐹᒥᒃ ᑭᒡᒐᖅᑐᖅᑎᐅᓕᕋᒪ ᓄᓇᓕᖕᒥᐅᓄᑦ ᒪᓕᒐᓕᐅᕐᕕᖕᒥ. “ᓇᖕᒥᓂᖅ ᐊᒃᓱᐊᓗᒃ ᓄᓇᓕᕗᑦ ᐱᒃᑯᒥᒋᒐᒃᑯ ᑭᒡᒐᖅᑐᖅᑎᐅᔪᒪᔪᒐᒪ ᑕᐃᒪᓐᓇ.

ᑖᓐᓇ 31-ᓂᒃ ᐊᕐᕌᒍᓕᒃ ᕿᑐᖓᖃᖅᑐᖅ ᑕᓪᓕᒪᓂᒃ ᐅᓂᒃᑳᓚᐅᖅᑐᖅ ᑕᐃᒪᓐᓇᒥᐊᖅ ᐃᓕᔭᐅᓴᐅᑎᒋᓂᐊᕋᓱᒋᓚᐅᖏᓐᓇᒥᒎᖅ. ᑐᓴᕋᒥᓕ ᓯᕗᓕᖅᑎ ᐲᑕ ᑕᑉᑑᓇ ᓂᕈᐊᖅᑕᐅᓇᓱᐊᔮᖏᓐᓂᕋᕐᒪᑦ ᖁᕐᓗᖅᑐᒥᐅᓄᑦ ᒪᓕᒐᓕᐅᖅᑎᒋᔭᐅᓪᓗᓂ ᖁᕐᓗᓚᐅᖅᑐᖓ, ᐅᖃᕆᓪᓗᓂ. ᐃᓛᖏᓛᒃ ᐸᕐᓇᒃᓯᒪᓚᐅᕋᒪ ᐊᑭᒪᖃᑦᑕᐅᑎᓂᐊᕋᓱᒋᓪᓗᒍ ᓂᕈᐊᖅᑕᓇᓱᐊᕐᓗᓄᒃ, ᐅᐱᓐᓇᖅᑐᒻᒪᕆᐅᖕᒪᑦ ᐱᖅᑯᓯᖓ.

“ᐊᒃᓱᐊᓗᒃ ᑕᑉᑑᓇ ᐱᓕᕆᑦᑎᐊᖅᓯᒪᖕᒪᑦ ᐅᕙᑦᑎᓐᓄᑦ. ᑕᒪᑐᒪᓂ ᖃᐅᔨᒪᔭᐅᖁᔭᕋ ᐊᒃᓱᕈᖃᑦᑕᖅᓯᒪᖕᒪᑦ ᒪᓕᒐᓕᐅᖅᑎᐅᓪᓗᓂ ᖁᕐᓗᖅᑐᒥᐅᓄᑦ ᓯᕗᓕᖅᑎᐅᓪᓗᓂᓗ ᓄᓇᕗᒥᐅᓄᑦ ᐅᐱᓐᓇᖅᑐᒥᒃ ᐱᖅᑯᓯᖃᖅᓯᒪᖕᒪᑦ,” ᐅᖃᕆᓪᓗᓂ. “ᕿᒪᐃᓯᒪᖕᒪᑦ ᐅᕙᑦᑎᓐᓄᑦ ᑭᖑᕚᕆᓂᐊᖅᑕᖏᓐᓄᑦ ᐊᖏᔪᒥᒃ ᐊᖑᒻᒪᑎᒐᓱᐊᕆᐊᖃᕐᓂᐊᖅᑕᒃᑲᓂᒃ.”

ᐃᓚᖏᑦ ᐊᒃᓱᕉᑎᒋᓂᐊᖅᓯᒪᔭᖏᑦ ᐃᓱᒫᓗᒋᔭᐅᓯᒪᔪᑦ ᒪᑯᐊ ᐃᓱᒪᓐᓂᐊᕈᑏᑦ ᐃᓱᒪᔮᖃᑦᑕᖅᑐᓂᒃ ᑲᒪᔪᑏᑦ, ᐊᒻᒪᓗ ᐃᓕᓴᕈᑏᑦ, ᐸᐃᕆᕝᕕᓕᕆᔪᑏᑦ, ᐱᕙᓪᓕᐊᑎᑦᑎᔪᑏᑦ ᓄᓇᓕᖕᒥᐅᓂᒃ ᐃᖅᑲᓇᐃᔮᖃᕈᑎᖏᓐᓂᒃ ᐊᒻᒪᓗ ᐃᓕᓴᐃᔪᑏᑦ ᐃᖅᑲᓇᐃᔮᒃᓴᓂᒃ ᓄᐃᑉᐸᓪᓕᐊᓂᐊᖅᑐᓂᒃ.

ᑕᒪᑐᒪᓂ ᓂᑭᑦᑖᑯᓗᒃᓗᒋᑦ ᐅᓂᒃᑲᐅᓯᕆᔮᖏᓯᒪᔭᒃᑲ ᐊᒃᓱᕉᑎᒋᓂᐊᖅᑕᒃᑲ,” ᐅᖃᕆᓪᓗᓂ, ᐃᓚᓪᓗᓂᐅᒃ ᓄᓇᓕᖕᒥᐅᑦ ᐱᒃᑯᒥᒋᔭᖏᓐᓂᒃ ᐊᒃᓱᕉᑎᖃᖔᕐᓂᐊᕋᒪ ᑲᑎᒪᔨᐅᓂᓐᓂ. “ᑕᒪᐅᖓ ᑎᑭᓯᒪᒐᒪ ᑭᒡᒐᖅᑐᖅᑎᐅᕕᒋᓂᐊᖅᑕᓐᓄ ᒪᑐᐃᖓᑦᑎᐊᖅᑐᖓ ᓄᑖᖑᓪᓗᖓ ᐋᕿᒃᓱᐃᓇᓱᐊᖃᑎᒋᓂᐊᖅᑕᒃᑲ. ᒫᓐᓇ ᐅᕙᓐᓄᑦ ᐱᒃᑯᒥᒋᔭᓐᓃᑦᑐᖓ ᐃᑲᔪᕈᓐᓇᕐᓂᐊᕋᒪ ᓄᓇᓕᖕᒥᐅᖑᖃᑎᓐᓂᒃ.”

ᑲᒥᖕᖑᐊᖅ, ᐃᓕᖅᑯᓯᓕᕆᔨᒃᑯᓐᓂ ᐱᖅᑯᓯᓕᕆᔨᒃᑯᓐᓂᓗ ᓄᓇᓕᖓᓂ ᐊᖓᔪᖅᑳᖓᓄᑦ ᒫᓐᓇ ᐃᑲᔪᖅᑎᐅᔪᖅ, ᐊᒻᒪᓗ ᓯᕗᓂᐊᓂ ᑲᑎᒪᔨᐅᕕᖃᓚᐅᖅᓯᒪᓇᓂ ᓂᕈᐊᖅᑕᐅᓯᒪᓪᓗᓂ ᓄᓇᓕᖓᓂ ᓄᓇᕗᒥᓘᓐᓃᑦ ᑲᑎᒪᕕᓂ ᑲᑎᒪᔨᕋᓛᓂᓗ ᐃᓚᐅᓚᐅᖅᓯᒪᖏᑦᑐᖅ.

“ᐊᒃᓱᕈᖅᑎᑐᐃᓐᓇᐅᔪᖓ ᐊᓈᓇᐅᓪᓗᖓ.” ᐅᖃᕆᓪᓗᓂ, ᐃᓚᓪᓗᒍ ᐃᑲᔪᖅᓴᖅᓯᒪᖕᒫᖓ ᐊᐃᑉᐸᕐᒪ ᑕᒪᑐᒧᖓ ᐱᔪᒪᔭᓐᓄᑦ ᕿᑐᖓᒃᑲᓗ ᖁᕕᐊᓱᒃᑐᑦ ᒪᓕᒐᓕᐅᖅᑎᐅᔪᒪᓂᓐᓂᒃ ᓄᓇᓕᑦᑎᓐᓄᑦ ᐊᐅᓪᓚᖃᑦᑕᕐᓂᐊᖅᑐᖓ ᐃᖃᓗᖕᓄᑦ ᒪᓕᒐᓕᐅᖅᑎᒃᑯᑦ ᑲᑎᒪᓂᐊᓕᕌᖓᑕ. “ᐊᒃᓱᐊᓗᒃ ᖁᕕᐊᓱᒃᑐᖓ ᐃᑲᔪᖅᓴᖅᑕᐅᑦᑎᐊᕋᒪ ᓄᓇᓕᑦᑎᓐᓂ…ᑕᒪᐃᓐᓄᑦ ᐊᔭᐅᖅᑕᐅᓚᐅᖏᒃᑯᒪ ᑕᐃᒪᓐᓇ ᐱᓇᓱᐊᕋᔭᓚᐅᖏᓐᓇᒪ.”

ᑲᒥᖕᖑᐊᖅ ᐅᖃᕆᓪᓗᓂ ᑕᐃᒪᑑᖅ ᑕᐅᑐᒃᑕᐊᓗᖓ ᐊᕐᓇᐅᖃᑎᓐᓄᑦ ᐱᒃᑯᒥᒍᓱᓕᖅᑎᑦᑎᔪᓐᓇᕐᓂᐊᖅᐳᖓ ᓄᓇᓕᖕᓂ ᐊᕐᓇᐃᑦ ᑲᑎᒪᕕᓂ ᐃᓚᐅᓇᓱᐊᖃᑦᑕᖁᒐᒃᑭᑦ ᑲᑎᒪᔨᖃᕐᕕᐅᔪᓂ, ᐱᓗᐊᖑᐊᖅᑐᒥᒃ ᑕᐃᒃᑯᐊ ᐃᖅᑲᓇᐃᔭᖅᑐᑦ ᐊᓈᓇᐅᓪᓗᑎᒃ.

“ᑭᓱᑐᐃᓐᓇᐃᑦ ᐊᔪᕐᓇᖏᑦᑐᑦ ᐊᒃᓱᕉᑎᒋᑐᐊᕈᕕᒋᑦ,” ᐅᖃᕆᓪᓗᓂ. “ᐊᒃᓱᕈᕈᓐᓇᕋᑦᑕ ᐊᓈᓇᐅᓪᓗᑕ ᐱᓕᕆᔨᐅᖏᓐᓇᐅᔭᕋᑦᑕ ᐃᓚᑦᑎᓐᓂᒃ ᐃᑲᔪᕈᓐᓇᖅᑐᒍᑦ ᐱᒃᑯᒥᒋᔭᐅᔪᓂᒃ ᐱᑎᑦᑎᓇᓱᐊᕐᓗᑕ, ᓱᓕᕗᖓ ᐊᐃ?”