Skip to content

ᖁᐊᓴ ᑎᒃᑯᐊᖅᑕᐅᕗᖅ ᓄᑖᖑᓪᓗᓂ ᐅᖃᖅᑎᐅᓂᖓᓂ ᒪᓕᒐᓕᐅᕐᕕᖕᒥ

ᓄᓇᕗᒻᒥ ᓯᕗᓕᐅᖅᑎᓄᑦ ᑲᑎᒪᔨᐅᔪᑦ ᓂᕈᐊᓚᐅᖅᐳᑦ ᐊᒡᒍ ᐃᓚᒋᔭᐅᔪᒥ ᒪᓕᒐᓕᐅᕐᕕᖕᒥ ᐹᓪ ᖁᐊᓴᒥ ᓄᑖᖑᓪᓗᓂ ᐅᖃᖅᑎᐅᓂᖓᓂ ᒪᓕᒐᓕᐅᕐᕕᖕᒥ ᐱᖓᔪᐊᓐᓂ.

ᖄᒃᑲᓐᓂᐊᒍᑦ ᖁᐊᓴᒧᑦ, ᐱᖓᓱᓂ ᐊᓯᖏᓐᓂ ᐃᓚᒋᔭᐅᔪᓂ ᒪᓕᒐᓕᐅᕐᕕᖕᒥ ᓂᕈᐊᖅᑕᐅᓚᐅᖅᐳᑦ ᐃᓂᒃᓴᐅᔪᒧᑦ: ᐅᖅᑯᕐᒥᐅᑦ ᐸᐅᓗᓯ ᕿᔪᒃᑖᖅ, ᐅᖅᓱᖅᑑᑉ ᑑᓂ ᐊᑯᐊᒃ ᐊᒻᒪ ᐊᒥᑦᑐᕐᒥᐅᑦ ᔪᐃᓕ ᖃᐃᕐᓂᖅ. ᑕᒪᒃᑭᑦ ᕿᔪᒃᑖᖅ ᐊᒻᒪ ᖃᐃᕐᓂᖅ ᐱᔪᒪᓚᐅᙱᓚᑦ ᓂᕈᐊᖅᑕᐅᓂᐅᔪᒥ. ᐃᓚᒋᔭᐅᔪᑦ ᑕᑯᒃᓴᐅᙱᑦᑐᒥ ᓂᕈᐊᓚᐅᖅᐳᑦ ᓇᓕᐊᖕᓄᑐᐃᓐᓇᒧᑦ ᖁᐊᓴ ᐅᕝᕙᓘᓐᓃᑦ ᐊᑯᐊᒃᒧᑦ.

ᓄᑖᖑᓪᓗᓂ ᑎᒃᑯᐊᖅᑕᐅᔪᖅ ᐅᖃᖅᑎᐅᓂᕐᒧᑦ ᒪᓕᒐᓕᐅᕐᕕᖕᒥ, ᐹᓪ ᖁᐊᓴ ᐃᒃᓯᕚᖅᐳᖅ ᐅᖃᖅᑎᐅᑉ ᐃᒃᓯᕙᐅᑕᖓᓂ.

ᑲᖏᖅᓱᐊᓗᖕᒧᑦ ᐃᓚᒋᔭᐅᔪᒥ ᒪᓕᒐᓕᐅᕐᕕᖕᒥ ᐋᓚᓐ ᕋᒻᐴᓪᑦ ᑕᒻᒪᖅᖢᓂ ᐅᖃᐅᓯᖃᓚᐅᖅᐳᖅ ᓯᕗᓕᖅᑎᐅᓚᐅᖅᑐᒥ ᐹᓪ ᐅᑲᓕᐅᑉ ᐊᑎᖓᓂ ᐅᖃᖅᑳᕐᓂᐊᕐᓂᕐᒧᑦ ᖁᐊᓴ ᓵᓚᖃᖅᑎᐅᓂᖓᓂ. ᐃᒡᓚᓚᐅᑲᒃᑎᓪᓗᒋᑦ, ᐃᓚᒋᔭᐅᔪᑦ ᐅᐱᒍᓱᓚᐅᖅᐳᑦ ᓄᑖᖑᔪᒥ ᐅᖃᖅᑎᑖᓵᖑᔪᒥᑦ.

ᓄᑖᒥ ᐅᐱᓐᓇᕆᔭᐅᓂᖓᓂ ᑕᐃᔭᐅᓂᕐᒧᑦ ᐅᖃᖅᑎᐅᔪᒧᑦ, ᖁᐊᓴ ᐃᓚᓯᓂᐊᓕᖅᐳᖅ ᐱᓕᕆᐊᕆᓂᑯᖏᓐᓂ ᑲᑎᒪᔨᐅᓂᕐᒧᑦ ᐊᑐᕐᓂᑯᖏᓐᓂ. ᐱᕕᒃᓴᖃᓚᐅᖅᓯᒪᒋᕗᖅ ᐃᓚᒋᔭᐅᓂᖓᓂ ᑎᓴᒪᖓᓐᓂ ᒪᓕᒐᓕᐅᕐᕕᖕᒥ, ᐱᔨᑦᑎᕋᓚᐅᖅᖢᓂ ᒐᕙᒪᒃᑯᓐᓂ ᐊᐅᓚᑦᑎᔨᓄᑦ ᓯᕗᓕᖅᑎᖓᓄᑦ, ᒥᓂᔅᑕ ᐃᓕᓐᓂᐊᕐᓂᓕᕆᔨᒃᑯᓐᓂ ᐊᒻᒪ ᒥᓂᔅᑕ ᑲᒪᒋᔭᖃᖅᑐᒥ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖓᓂ.

ᕿᑎᐊᓂ ᓄᕕᐱᕆ 2017–ᒥ ᐊᒻᒪ ᔫᓂ 2018–ᒥ, ᖁᐊᓴ ᐱᔨᑦᑎᕋᓚᐅᖅᐳᖅ ᓄᓇᕗᒻᒥ ᑎᓴᒪᒋᔭᐅᓪᓗᓂ ᓯᕗᓕᖅᑎᐅᓂᖓᓂ. ᐊᓂᑕᐅᓚᐅᖅᐳᖅ ᐆᒪᙵᑦ ᐊᑐᕐᓂᖃᐅᑎᖓᓂ ᔫᓂ 14, 2018–ᒥ ᐊᒻᒪ ᐃᓇᖏᖅᑕᐅᓪᓗᓂ ᒫᓐᓇᐅᔪᒥ ᓯᕗᓕᖅᑎᐅᓕᖅᑐᒥ ᔫ ᓴᕕᑲᑖᕐᒧᑦ.

ᒫᓐᓇᓕᓴᐅᓛᖑᔪᒥ, ᑕᐃᒪᙵᓂ ᐅᒃᑐᐱᕆ 30, 2017–ᒥ, ᑭᒡᒐᖅᑐᐃᓯᒪᕗᖅ ᓂᕈᐊᖅᑕᐅᓯᒪᕝᕕᖓᓐᓂ ᐊᒡᒍᒧᑦ ᑕᓪᓕᒪᖓᓐᓂ ᒪᓕᒐᓕᐅᕐᕕᖓᓐᓂ ᓄᓇᕗᒻᒥ.

ᖁᐊᓴ, ᓇᓗᖅᑯᑎᓪᓗᓂ ᓄᑖᖑᔪᒥ ᐅᐱᒋᔭᐅᓂᐅᔪᒥ, ᐅᖃᐅᓯᖃᓚᐅᖅᐳᖅ, "ᐃᓱᒪᒌᓐᓇᐅᔭᖅᓯᒪᕙᕋ ᓂᕈᐊᖅᑕᐅᓚᐅᖅᑎᓪᓗᖓ ᐃᓚᒋᔭᐅᓂᕐᒧᑦ ᒪᓕᒐᓕᐅᕐᕕᖕᒥ. ᖃᖓᑭᐊᖅ, ᐅᖃᖅᑎᐅᔪᒪᓚᐅᖅᓯᒪᕗᖓ ᓄᖅᑲᓚᐅᖅᑳᕐᓂᓐᓂ."

ᐃᖃᓗᐃᑦ-ᓂᐊᖁᙴ ᐃᓚᒋᔭᐅᔪᒥ ᒪᓕᒐᓕᐅᕐᕕᖕᒥ ᐹᑦ ᐊᕐᓇᒃᑲᖅ ᓂᕈᐊᓚᐅᖅᑐᒥ ᖁᐊᓴᒥ, ᐅᒃᐱᕈᓱᒃᐳᖅ "ᐱᔪᓐᓇᕐᔪᐊᕐᓂᖓᓂ" ᐱᓕᕆᐊᒃᓴᐅᔪᒥ.

"ᐊᐅᓚᑦᑎᔪᓐᓇᕐᓂᖓᓂ ᐅᖃᓪᓚᖕᓂᕐᒧᑦ ᐊᒻᒪ ᑐᑭᓯᐅᒪᓂᕐᒧᑦ ᖃᓪᓗᓈᑎᑐᑦ ᐊᒻᒪ ᐃᓄᒃᑎᑐᑦ ᓴᙱᕐᔪᐊᖅᐳᑦ ᐊᒻᒪ ᐃᒃᐱᒍᓱᒃᐳᖓ ᐊᑐᕐᓂᑯᖏᑦ ᒐᕙᒪᒃᑯᓐᓄᑦ ᒥᓂᔅᑕᐅᓚᐅᖅᓯᒪᓂᖓᓂ ᐊᒻᒪᓗ ᐊᑐᕐᓂᖃᐅᑎᖓ ᐃᓚᒋᔭᐅᔪᒥ ᒪᓕᒐᓕᐅᕐᕕᖕᒥ ᐃᓚᒋᐊᖅᓯᑐᐃᓐᓇᕐᓂᐊᖅᐳᖅ ᓴᙱᓂᖏᓐᓄᑦ ᐊᒻᒪ ᐱᔪᓐᓇᕐᓂᕆᔭᖏᓐᓂ ᐱᓕᕆᓂᕐᒧᑦ ᐱᓕᕆᐊᒃᓴᐅᔪᒧᑦ," ᐅᖃᓚᐅᖅᐳᖅ ᐊᕐᓇᒃᑲᖅ.

ᓂᕆᐅᒋᕙᖓ ᑲᑎᒪᑦᑎᐊᖅᑎᑦᑎᖃᑦᑕᕐᓂᐊᕐᓂᖓᓂ ᐊᒻᒪᓗ ᓇᓗᓇᐃᖅᓯᓂᕐᒥ ᐃᓚᒋᔭᐅᔪᑦ ᒪᓕᖕᓂᖏᓐᓂ ᐊᑐᕆᐊᓕᖕᓂᑦ.
ᐅᖃᖅᑎᐅᓚᐅᖅᑐᖅ ᐊᒻᒪ ᖃᒪᓂᑦᑐᐊᕐᒥ ᐃᓚᒋᔭᐅᔪᒥ ᒪᓕᒐᓕᐅᕐᕕᖕᒥ ᓯᒥᐅᓐ ᒥᒃᑯᙳᐊᖅ ᐅᖃᐅᓯᖃᓚᐅᖅᐳᖅ ᓄᖅᑲᕐᓂᖓᓂ ᒪᓕᒐᓕᐅᕐᕕᖕᒥ ᓇᒡᒐᔾᔭᐅᒥ. ᐱᔨᑦᑎᕋᓚᐅᖅᐳᖅ ᐅᖃᖅᑎᐅᓂᕐᒧᑦ ᑕᐃᒪᙵᓂ ᒪᐃ 28, 2019–ᒥ.

ᒥᒃᑯᙳᐊᖅ ᐅᓂᒃᑳᓚᐅᖅᐳᖅ ᓄᓕᐊᖓᑕ ᐋᓐᓂᐊᖃᖅᑕᐃᓕᒪᓂᖓ ᐃᓚᖏᑕ ᓯᕗᓪᓕᖅᐸᐅᑎᑕᐅᓯᒪᓂᖓᓂ ᐊᒻᒪ ᑐᕌᖅᑎᑦᑎᒃᑲᓐᓂᕆᐊᖃᕐᓂᖓᓂ ᐊᒃᓱᕈᕐᓂᖓᓂ.

"ᐅᒃᐱᕈᓱᒃᐳᖓ ᓈᒻᒪᒃᓯᓂᖓᓂ ᑕᐅᑐᒃᑕᑐᐊᖃᑲᐃᓐᓇᕐᓂᕐᒥ ᑕᒪᒃᑭᓂ ᐊᒃᓱᕈᕐᓂᓐᓂ ᐃᓚᓐᓃᓐᓂᕐᒧᑦ ᐊᖏᕐᕋᒥ," ᐅᖃᓚᐅᖅᐳᖅ.
ᐊᕐᕕᐊᑦ ᐅᐊᖕᓇᒥ-ᑎᑭᕋᕐᔪᐊᕐᒥ ᐃᓚᒋᔭᐅᔪᒥ ᒪᓕᒐᓕᐅᕐᕕᖕᒥ ᔮᓐ ᒪᐃᓐ ᐅᖃᓚᐅᖅᐳᖅ ᓄᒫᓱᖕᓂᖓᓂ ᒥᒃᑯᙳᐊᕐᒥ ᓄᖅᑲᕐᓂᖓᓂ ᒪᓕᒐᓕᐅᕐᕕᖕᒥ, ᑭᓯᐊᓂ ᑐᑭᓯᕗᖅ ᖃᓄᐃᒻᒪᑦ ᓄᖅᑲᕆᐊᖃᕐᓂᖓᓂ.

ᑕᐃᔅᓱᒧᖓ ᓄᑖᖑᔪᒧᑦ ᐅᖃᖅᑎᙳᖅᑐᒧᑦ, ᒪᐃᓐ ᑭᐅᓚᐅᖅᐳᖅ, "ᐅᒃᐱᕈᓱᑦᑎᐊᖅᐳᖓ ᒥᔅᑐᕐ ᖁᐊᓴ ᐊᑐᖅᑎᑦᑎᓂᐊᕐᓂᖓᓂ ᑐᙵᕕᒋᔭᐅᔪᓂ ᐃᓚᓐᓂᖅᓴᐃᙱᓐᓂᐅᔪᒥ ᐊᒻᒪ ᐅᐱᒋᔭᐅᑦᑎᐊᕐᓂᐅᔪᒥ ᐱᔭᕆᐊᖃᖅᑐᓄᑦ ᐅᖃᖅᑎᐅᓂᕐᒧᑦ ᒪᓕᒐᓕᐅᕐᕕᖕᒥ."