Skip to content

ᕿᓐᓄᐊᔪᐊᖅ ᐋᓯᕙᒃ ᐊᒥᐊᒐᖅ ᑲᓇᑕᒥ ᐊᖏᓛᖑᓂᐅᔪᒥ ᓂᐅᕕᖅᑕᐅᕗᖅ

ᕿᓐᓄᐊᔪᐊᖅ ᐋᓯᕙᖕᒥ ᐅᔭᖅᑲᒧᑦ-ᓴᓇᙳᐊᒐᒧᑦ ᐊᒥᐊᒐᖅ ᑕᐃᒎᓯᓕᖕᒥ ᑲᒪᓇᖅᑐᐊᓗᒃ ᐅᒃᐱᒡᔪᐊᖅ ᑲᑎᙵᓂᐅᔪᒥ ᓄᑖᒥ ᑐᕌᒐᒃᓴᓕᐅᓚᐅᖅᐳᖅ ᐊᒥᐊᒐᓄᑦ ᑲᓇᑕᒥ ᐊᑭᑦᑐᕋᐅᑎᓂᐅᔪᒥ, ᐱᓪᓗᓂ $216,000-ᒥ ᑐᕌᓐᑐᒥ ᓄᕕᐱᕆ 20-ᒥᑦ.

ᑲᒪᓇᖅᑐᐊᓗᒃ ᐅᒃᐱᒡᔪᐊᖅ ᕿᓐᓄᐊᔪᐊᖅ ᐋᓯᕙᐅᓚᐅᖅᑑᑉ ᑮᙵᕐᒥᐅᑕᐅᓚᐅᖅᑐᒥ ᓂᐅᕕᖅᑕᐅᓚᐅᖅᐳᖅ $216,000-ᒧᑦ ᑐᕌᓐᑐᒥ ᐊᐃᑉᐹᓂ ᐅᓐᓄᖓᓂ, ᓯᖁᒥᑦᑎᓪᓗᓂ ᑲᓇᑕᒥ ᑎᑎᕋᖅᓯᒪᓂᐅᔪᒥ ᐊᒥᐊᒐᕐᓄᑦ ᓂᐅᕕᖅᑕᐅᓂᐅᔪᒧᑦ ᐊᑭᑦᑐᕋᐅᑎᓂᕐᒧᑦ.

ᐊᖏᓂᖓ ᖄᖅᓯᓚᐅᖅᐳᖅ $100,000-$120,000 ᓇᓚᐅᑦᑖᒐᖓᓂ ᐋᖅᑭᒃᑕᐅᕙᒌᓚᐅᖅᑐᒥ ᓯᕗᓂᐊᓂ ᐊᑭᑦᑐᕋᐅᑎᓂᐅᓂᐊᖅᑐᒥ.

"ᐃᖅᑲᐅᒪᓂᑦᑎᐊᕙᐅᕗᖅ ᓴᓇᐅᒐᓕᕆᔨᕐᔪᐊᒧᑦ," ᐅᖃᓚᐅᖅᐳᖅ ᐊᑭᑦᑐᕋᖅᑎᑦᑎᔨᐅᔪᒧᑦ ᑕᓐᑭᓐ ᒪᒃᓚᐃᓐ, ᐱᔨᑦᑎᕋᓲᖅ ᐃᓄᖕᓄᑦ ᓴᓇᐅᒐᓄᑦ ᐱᓕᕆᔨᒻᒪᕆᐅᓪᓗᓂ ᐅᐊᑎᖕᑕᓐᔅᓄᑦ, ᐊᑭᑦᑐᕋᐅᑎᓂᕐᒧᑦ ᐃᒡᓗᒧᑦ ᑲᒪᒋᔭᖃᓚᐅᖅᑐᒥ ᖃᓄᐃᓐᓂᐅᔪᒥ.

ᓯᕗᓂᐊᓂ ᑎᑎᕋᖅᑕᐅᓯᒪᓂᐅᔪᖅ ᑲᓇᑕᒥ ᐊᒥᐊᕆᔭᐅᓂᑯᒥ ᐱᒋᔭᐅᓚᐅᖅᐳᖅ ᓯᐳᓪ ᐋᓐᑐᕉᔅᒧᑦ, ᐃᖕᓚᓐᒥᐅᑕᒥ-ᑲᓇᑕᒥᐅᑕᒥ ᓴᓇᐅᒐᓕᕆᔨᒧᑦ ᓄᓇᖃᓚᐅᖅᑐᒥ Campbell River, B.C-ᒥ. ᑎᑎᕋᐅᔭᒐᖓ ᑕᐃᒎᓯᓕᒃ Speedway-ᒥ ᓂᐅᕕᖅᑕᐅᓚᐅᖅᓯᒪᕗᖅ $129,000-ᒧᑦ 2015-ᒥ.

ᓯᕗᓂᐊᓂ ᖁᑦᑎᒃᑐᒥ ᐊᑭᖓᓐᓂ ᐊᑭᓕᖅᑕᐅᔪᒥ ᕿᓐᓄᐊᔪᐊᕐᒧᑦ ᐊᒥᐊᒐᒥ ᐅᑲᓕᖅ ᕿᖅᑯᐊᒥ ᓂᕆᔪᒥ, ᓂᐅᕕᖅᑕᐅᓚᐅᖅᑐᒥ $59,000-ᒧᑦ.

"ᑲᒪᕐᔪᐊᓚᐅᖅᐳᖓ," ᐅᖃᓚᐅᖅᐳᖅ ᔫᒥ ᑕᒃᐸᐅᖓᐃ, ᓴᓇᐅᒐᓕᕆᓂᕐᒧᑦ ᐊᐅᓚᑦᑎᔨᒧᑦ ᐃᑲᔪᖅᑎᐅᔪᖅ ᐱᓇᖕᓇᒥ ᕿᑭᖅᑖᓗᖕᒥ ᑯᐊᐸᒃᑯᓐᓄᑦ ᑭᙵᕐᓂ, ᓄᑖᖑᔪᒥ ᐊᑭᑐᓛᖑᔪᒧᑦ ᓂᐅᕕᖅᑕᐅᓂᖓᓄᑦ ᐊᑭᖓᓂ. "ᖁᕕᐊᓱᑦᑎᐊᖅᐳᒍᑦ ᑕᐃᒪᐃᓚᐅᕐᓂᖓᓂ... ᕿᓐᓄᐊᔪᐊᑉ ᐊᔪᙱᓐᓂᐊᓗᖓ ᖃᐅᔨᒪᔭᐅᑦᑎᐊᖅᐳᖅ ᐊᒻᒪ ᐅᐱᒋᔭᐅᑦᑎᐊᖅᓯᒪᕗᖅ ᓄᓇᓖᑦ ᐃᓗᐊᓂ. ᑲᔪᖏᖅᓴᐃᓯᒪᖃᑦᑕᓚᐅᖅᐳᖅ ᒪᒃᑯᖕᓂᖅᓴᐅᔪᓄᑦ ᒫᓐᓇᒧᑦ ᑎᑭᖦᖢᒍ, ᑭᓯᐊᓂ ᓂᕆᐅᒃᐳᖓ ᐱᔪᒪᓂᖃᕐᓂᖅᓴᐅᔪᓂ ᒪᒃᑯᒃᑐᓂ ᓴᓇᐅᒐᓕᕆᔨᑖᕐᓂᐊᕐᓂᕐᒧᑦ ᐱᓕᕆᕙᓪᓕᐊᔪᓄᑦ ᐱᓕᕆᐊᒥᓂᑦ. ᐊᑯᓂᐸᓗᖕᒥ ᐃᓕᓴᕆᔭᐅᓐᓇᖅᐳᖅ."

ᐅᐊᑎᖕᑕᓐ ᓴᖅᑭᑎᑦᑎᔪᒪᓚᐅᙱᓚᑦ ᑐᓴᒐᒃᓴᓂ ᓂᐅᕕᓚᐅᖅᑐᒥ ᑲᒪᓇᖅᑐᐊᓗᒃ ᐅᒃᐱᒡᔪᐊᕐᒧᑦ ᐊᒥᐊᒐᐅᔪᒧᑦ, ᓇᓚᐅᑦᑖᕆᓚᐅᖅᑐᒥ $180,000-ᒥ ᐊᒻᒪ ᐊᑭᓖᓪᓗᓂ 20 ᐳᓴᓐᑎᒥ ᓂᐅᕕᖅᑐᒧᑦ ᓇᓪᓕᐅᒃᑯᒫᓄᑦ ᐊᒻᒪ ᑖᒃᓯᓄᑦ ᑎᑭᐅᑎᓪᓗᓂ ᑭᖑᓪᓕᖅᐹᖓᓂ ᐊᑭᐅᔪᒥ $216,000-ᓄᑦ.

$180,000-ᒥ ᐊᑭᑦᑐᕋᐅᑎᓂᖓ ᓂᐅᕕᖅᑎᐅᔪᒨᕐᓂᐊᖅᐳᖅ ᐊᒥᐊᒐᐅᔪᒧᑦ.

ᑲᒪᓇᖅᑐᐊᓗᒃ ᐅᒃᐱᒡᔪᐊᖅ ᓴᓇᔭᐅᓚᐅᖅᐳᖅ 1960-ᖏᓐᓂ ᐊᒻᒪ ᓯᕗᓪᓕᕐᒥ ᓂᐅᕕᖅᑕᐅᓚᐅᖅᐳᖅ $24-ᒧᑦ. ᓂᐅᕕᖅᑕᐅᒃᑲᓐᓂᕐᓂᖓ ᐱᓚᐅᖅᐳᖅ $60,000-ᒥ, ᕿᓄᐊᔪᐊᕐᒧᙵᐅᓚᐅᙱᑦᑎᐊᖅᑐᒥ. ᑮᓇᐅᔭᑦ ᑕᐅᖅᓰᔪᑦ ᐊᒡᒐᓄᑦ ᓄᕕᐱᕆ 20-ᒥ ᐊᑭᑦᑐᕋᐅᑎᓂᕐᒧᑦ ᑐᕌᖓᓂᓕᖕᒥ ᐱᕙᓪᓕᕈᑎᖃᔾᔮᙱᓚᖅ ᕿᓐᓄᐊᔪᐊᑉ ᐃᓚᖏᓐᓂ.

ᑲᓇᑕᒥ ᓴᓇᐅᒐᓕᕆᓂᕐᒧᑦ ᑭᒡᒐᖅᑐᐃᔨᐅᔪᑦ (CARFAC), ᑲᓇᑕᒥ ᑲᑐᔾᔨᖃᑎᒌᖑᔪᑦ ᑕᑯᒃᓴᐅᓂᐅᔪᒧᑦ ᓴᓇᐅᒐᓕᕆᔨᐅᔪᓄᑦ, ᐱᓕᕆᔾᔪᔾᔨᓯᒪᓇᓱᐊᖅᐳᑦ ᑕᐃᒪᙵᓂ 2011-ᓂ 5 ᐳᓴᓐᑎᒧᑦ ᓂᖏᖅᑕᕐᓂᕐᒧᑦ ᓴᓇᐅᒐᓕᕆᔨᓄᐊᓲᒥᒃ ᓴᓇᔭᖏᓐᓂ ᓂᐅᕕᖅᑕᐅᑎᓪᓗᒋᑦ $1,000 ᐅᖓᑖᓄᑦ. ᒫᓐᓇᒧᑦ ᑎᑭᖦᖢᒍ, ᒐᕙᒪᑐᖃᒃᑯᑦ ᐊᑐᓕᖅᓯᒪᙱᓚᑦ ᑕᐃᒪᐃᑦᑐᒥ ᒪᓕᒐᓕᐊᖑᓯᒪᔪᒥ.

"ᐃᓱᒪᓂᑦᑎᐊᕚᓘᕗᖅ. ᓴᓇᐅᒐᓕᕆᔨᐅᓚᐅᖅᑐᖅ ᐱᕙᓪᓕᕈᑎᖃᕋᔭᓚᐅᖅᐳᖅ, ᐊᒻᒪᓗ ᑭᖑᕚᖏᑦ ᐱᕙᓪᓕᕈᑎᖃᕋᔭᓚᐅᖅᐳᖅ ᑖᔅᓱᒧᖓ," ᑕᒃᐸᐅᖓᐃ ᐅᖃᓚᐅᖅᐳᖅ.

ᐋᓯᕙᒃ, ᖃᐅᔨᒪᔭᐅᕐᔪᐊᖅᑐᒥ ᑭᙵᕐᒥᐅᑕᐅᓪᓗᓂ ᓴᓇᐅᒐᓕᕆᔨ ᐃᓅᓂᖃᓚᐅᖅᑐᖅ 1927-2013-ᒧᑦ, ᐃᓕᖅᑯᓯᓕᕆᕝᕕᖕᒥ ᐊᒻᒪ ᐊᒥᐊᒐᓕᐅᕐᓂᕐᒧᑦ ᓂᐅᕕᕐᕕᖕᒥ ᐊᑦᑎᖅᑕᐅᓯᒪᓂᖃᖅᐳᖅ ᐃᖅᑲᐅᒪᔭᐅᓪᓗᓂ ᐊᖏᕐᕋᖓᓂ ᓄᓇᖓᓐᓂ.

ᐊᓯᖏᓐᓂ ᐱᐅᕐᔪᐊᖅᑐᓂ ᓴᓇᐅᒐᓂ ᓂᐅᕕᖅᑕᐅᓚᐅᖅᑐᓂ ᓄᕕᐱᕆ 20-ᒥ ᐊᑭᑦᑐᕋᐅᑎᓂᐅᔪᒥ ᐃᓚᖃᓚᐅᖅᐳᖅ ᓴᓇᙳᐊᒐᕐᒥ ᐅᓱᐃᑦᑐᖅ ᐊᐃᐱᓕᐅᓚᐅᖅᑐᒥ ᑭᙵᕐᒥᐅᑕᕕᓂᕐᒧᑦ. ᓴᓇᙳᐊᒐᖅ, ᑕᐃᒎᓯᓕᒃ ᑐᒃᑐ ᓇᖏᖅᑐᖅ, ᐊᑭᑦᑐᕋᐅᑎᔪᒨᓚᐅᖅᐳᖅ ᐊᑭᓖᔪᒪᔪᒥ $16,000-ᒥ. ᒧᒥᖅᑐᒥ ᓇᓄᕐᒥ ᓴᓇᙳᐊᒐᒥ ᑭᙵᕐᒥᐅᑕᒧᑦ ᐸᐅᑕ ᓴᐃᓚᒧᑦ ᓂᐅᕕᖅᑕᐅᓚᐅᖅᐳᖅ $12,000-ᒧᑦ.