ᑕᐃᑦᓱᒪᓂᑐᖃᖅ ᐊᑐᖅᑕᐅᕙᓚᐅᖅᑐᑦ ᐊᒃᓱᕈᕐᓇᕈᓐᓇᖅᐳᑦ, ᐃᓛᓐᓂᒃᑯᓪᓗ ᐊᑲᐅᔪᒥᒃ ᐱᔾᔪᑎᖃᖅᐸᒃᖢᑎᒃ.
ᐃᑦᓇ ᐃᓚᐃᔭᔅ ᑕᐃᒪᓐᓇ ᐊᑐᓚᐅᖅᐳᖅ ᑕᕐᕆᔭᐅᑎᓕᐅᖃᑕᐅᓪᓗᓂ ᐊᑎᖃᖅᑐᒥᒃ Edna's Bloodline, ᐅᓂᒃᑳᖅ ᐱᔾᔪᑎᖃᖅᑐᖅ ᐊᑖᑕᑦᓯᐊᕌᓗᐊᓂᒃ ᖃᓄᐃᓕᐅᓚᐅᖅᓯᒪᓂᖓᓄᓪᓗ.
ᐲᑕ ᓄᐊᐳᒃ Petter Norberg, ᓱᕕᑕᓐᒥᐅᑕᖅ, ᐃᓚᖃᐅᖅᖢᓂᓗ ᖁᕐᓗᖅᑐᒥ, ᐃᓄᕕᖕᒥ ᐊᒻᒪ ᔪᑳᓐᒥ. ᑲᓇᑕᐅᑉ ᐅᑭᐅᖅᑕᖅᑐᖓᓄᐊᓚᐅᖏᑦᖢᓂ ᓱᓕ ᑕᒫᓂ ᐊᕐᕌᒍᓂ 1800-ᓂ, ᐱᓕᕆᑎᑕᐅᓚᐅᖅᐳᑦ ᐃᓚᖏᓪᓗ ᐊᒃᓱᕈᕐᓇᖅᑐᓂᒃ ᐱᓕᕆᐊᖃᖅᑎᑕᐅᓪᓗᑎᒃ.
“ᑕᒪᒃᑯᐊ ᐊᔪᖅᓴᖅᑐᑦ ᓂᐅᕕᖅᑕᐅᕙᓚᐅᖅᐳᑦ ᐊᑭᑦᑐᕋᐅᑎᒍᑎᒃᑯᑦ ᐱᓕᕆᑎᑕᐅᔪᒃᓴᐅᓂᐊᖅᖢᑎᒃ ᓂᐅᕕᖅᑕᐅᕙᒃᖢᑎᒃ ᐊᒃᓱᕈᕐᓇᖅᑐᓂᒃ. ᑕᐃᒪᓐᓇ ᐱᓕᕆᔨᓪᓚᕆᐅᑎᑕᐅᓪᓗᑎᒃ ᐊᒃᓱᕈᖅᑎᑕᐅᓪᓗᑎᒃ, ᐃᓚᐃᔭᔅ ᐅᖃᓚᐅᖅᐳᖅ. “ᑕᐃᒪᓐᓇ ᓱᕖᑕᓐᒥᑦ ᐊᐅᓪᓚᓚᐅᖅᓯᒪᔪᒃᓴᐅᕗᖅ ᑮᓇᐅᔭᓕᐅᕈᒪᓪᓗᓂ ᐃᑲᓚᕈᒪᓪᓗᓂ ᐃᓚᒥᓂᒃ ᕿᒪᒃᑕᒥᓂᒃ... ᑕᐃᒪ ᐊᕐᕌᒍᖃᓕᖅᖢᓂ 16-ᓂᒃ, ᐅᒥᐊᖅᑐᖅᑎᐅᓕᓚᐅᖅᐳᖅ ᐊᐅᓪᓚᖅᖢᓂ.”
ᑲᓇᑕᒧᑦ ᑎᑭᓐᓇᒥ, ᓄᐊᐳᒃ ᒥᑭᒋᐊᕐᓂᐊᕐᓂᕐᒧᑦ ᐱᓕᕆᐊᖃᖅᖢᓂ ᓂᐅᕕᖅᑎᒃᑯᓐᓄᑦ ᕼᐊᑦᓴᐲᒃᑯᓐᓄᑦ ᐃᖅᑲᓇᐃᔭᖅᖢᓂᓗ ᐃᓚᒋᔭᐅᓚᐅᖏᓐᓇᒥ ᒎᓗᑎᓯᐅᖅᑐᓄᑦ. ᐱᕐᓗᐊᕿᓪᓗᓂ ᐋᓐᓂᓚᐅᖅᐳᖅ. ᐃᒫᖅᖢᓂ ᐃᐱᓚᐅᖅᓯᒪᕗᖅ ᖁᕐᓗᖅᑐᑉ ᑰᖓᓂ 1930-ᒥ ᑎᒥᖓ ᓇᓂᔭᐅᓚᐅᖅᓯᒪᖏᑦᖢᓂᓗ. ᑭᓯᐊᓂ ᕿᒪᐃᓚᐅᖅᐳᖅ 100-ᓂᒃ ᐊᐅᖃᑎᒥᓂᒃ, ᐃᓚᐃᔭᔅ ᐅᖃᓚᐅᖅᐳᖅ.
ᐊᕐᕌᒎᓯᒪᓕᖅᑐᓂ, ᑕᕐᕆᔭᐅᑎᓕᐅᖃᑕᐅᓚᐅᖅᐳᑦ ᓄᐊᐳᒃ ᐱᔾᔪᑎᒋᓪᓗᒍ. ᑎᑎᕋᖅᑕᐅᓯᒪᔪᖅ ᓱᕕᑕᓐᒥᐅᑕᒧᑦ, ᐃᑦᓇᒧᓪᓗ ᑐᓴᖅᑎᑎᓚᐅᖅᓱᓂ. ᑖᓐᓇ ᐅᓂᒃᑳᓕᐅᖅᑕᐅᓯᒪᔪᖅ ᐱᔾᔪᑎᖃᓚᐅᖅᓱᓂ ᖁᕐᓗᖅᑐᒥ ᑕᕐᕆᔭᐅᖅᓯᐅᖅᑕᐅᖁᔭᐅᓪᓗᓂ ᖁᓕᓪᓗ ᒪᕐᕉᒡᓗ ᐃᓄᐃ ᑕᕐᕆᔭᐅᑎᓕᐅᖅᑕᐅᖃᑕᐅᓗᑎᒃ ᐊᓯᖏᓪᓗ ᐃᖏᕐᕋᔭᖕᓂᕐᒧᑦ ᐃᑲᔪᓚᐅᖅᓱᑎᒃ.
“ᖁᕕᐊᒋᑦᓯᐊᖅᐸᕋ ᖃᓄᐃᓕᐅᕈᑕᐅᔪᑦ,” ᐃᓚᐅᔭᔅ ᐅᖃᓚᐅᖅᐳᖅ ᐱᐊᓂᒃᓯᒪᓕᖅᑐᒥᒃ ᐅᖃᐅᓯᖃᖅᓱᓂ. “ᑕᑯᒃᓴᐅᑎᑦᓯᒃᑲᓐᓂᕈᒪᓚᐅᕋᓗᐊᖅᐳᒍᑦ ᑭᓯᐊᓂ ᐃᓂᒃᓴᖃᕈᓐᓇᕐᒪᑦ ᐃᑲᕋᒥᒃ ᐅᖃᐅᓯᖃᓪᓚᕆᒋᐊᖃᖅᓱᓂᓗ ᐅᓂᒃᑳᕆᔭᐅᔪᒥᒃ.”
ᑕᑯᓚᐅᖅᓱᓂᐅᒡᓗ ᑕᕐᕆᔭᐅᓯᐊᑉ ᑭᖑᓪᓕᖅᐹᒃᑯᑦ ᐋᖅᑭᒃᓱᖅᑕᐅᓯᒪᓕᕐᓂᖓᓂ ᑕᐃᑲᓂ Harnosand, Sweden ᓱᕕᑕᓐᒥ– ᐲᑦᑕᐅᑉ ᓄᓇᖓ − ᐊᐅᒐᓯᒥ.
“ᑲᖑᓱᓕᓚᐅᖅᐳᖓ ᑕᑯᒐᒪ ᐃᓄᖕᓂᒃ ᐅᑕᕿᔪᓂᒃ ᐃᓯᖅᐸᓪᓕᐊᓂᐊᖅᖢᑎᒃ ᑕᑯᓐᓇᒐᒃᓴᖃᕐᕕᖕᒧᑦ,” ᐃᓚᐅᔭᔅ ᐅᖃᓚᐅᖅᐳᖅ. “ᐃᒻᒪᖄ ᐊᒥᓱᑦ 200 ᐃᓄᐃᑦ ᐅᑕᕿᔪᑦ.”
ᓯᕗᓪᓕᖅᐸᐅᓪᓗᓂ ᑕᑯᓐᓇᓚᐅᖅᐸᖓ Edna's Bloodline ᖁᕐᓗᖅᑐᒥ ᓄᕕᐱᕆ 2−ᒥ. ᑭᓯᐊᓂ ᐊᒥᓲᓗᐊᓚᐅᖏᒻᒪᑕ ᐃᓚᐅᔪᑦ − ᓈᓚᐅᑎᒃᑯᑦ ᐱᓐᖒᕐᓇᐅᑎᓪᓗᒍ ᑕᑯᒃᓴᐅᑎᑎᓚᐅᕐᒪᑕ ᐊᒻᒪ ᑭᒃᑯᑐᐃᓐᓇᕐᓂᒃ ᐃᓄᖕᓂᒃ ᑲᑎᒪᑎᑦᓯᓪᓗᑎᒃ − ᓄᓇᕗᒥᐅᑦ ᑕᑯᓐᓇᕈᓐᓇᖃᑕᐅᓂᐊᖅᑐᒃᓴᐅᕗᑦ ᑕᓚᕕᓴᒃᑯᑦ. ᑕᓐᓇ ᑕᑯᒃᓴᐅᑎᑕᐅᔪᒃᓴᓂᒃ ᑲᒪᔨ Eva Wunderman ᑕᑯᒃᓴᐅᑎᑕᐅᔪᓐᓇᕋᔭᕐᓂᖓᓄᑦ Edna's Bloodline ᓄᓇᖃᖅᑳᖅᓯᒪᔪᑦ ᑕᑯᓐᓇᒐᒃᓴᓕᕆᔨᒃᑯᖏᑦᑎᒍᑦ, ᐃᓚᐅᔭᔅ ᐅᖃᓚᐅᖅᐳᖅ.
ᑖᓐᓇ ᑕᕐᕆᔭᐅᑎᓕᐅᖅᑕᐅᓯᒪᔪᖅ Edna's Bloodline ᑕᑯᒃᓴᐅᑎᑕᐅᓚᐅᖅᐳᖅ ᔭᓗᓇᐃᒥ ᑕᕐᕆᔭᐅᑎᓕᐅᖅᑎᑦ ᖃᓄᐃᓕᐅᕈᑎᖃᖅᑎᓪᓗᒋᑦ ᐊᒃᑐᐱᕆ 28-ᒥ. ᐃᓚᐃᔭᔅ ᐃᓚᐅᔪᓐᓇᓚᐅᖏᒃᑲᓗᐊᖅᓱᓂ, ᐱᐅᓚᐅᕐᓂᖓᓄᑦ ᐅᖃᐅᑎᔭᐅᖃᑦᑕᓚᐅᖅᐳᖅ.
“ᑐᓴᖅᑎᑕᐅᓚᐅᖅᐳᖓ ᑕᒪᒃᑯᓄᖓ ᐅᐸᓚᐅᖅᑐᓄᑦ ᐅᖃᓚᐅᖅᐳᓪᓗ ᑲᒪᓇᓚᐅᕐᓂᖓᓄᑦ ᕿᐊᓱᖑᓇᖃᑦᑕᓚᐅᕐᓂᖓᓄᓪᓗ. ᖃᐅᔨᒪᓚᐅᖏᑦᖢᑎᒡᓗ ᐊᐅᖃᕐᓂᕋᓂᒃ ᓱᕖᑕᓐᒥᑦ ᐊᒻᒪ ᒍᐃᑦᓯᓐ ᐊᓪᓚᖏᓐᓂᒃ,” ᐅᖃᓚᐅᖅᐳᖅ.
ᐅᖃᓚᐅᖅᖢᓂᓗ ᑕᕐᕆᔭᒐᒃᓴᖅ ᑕᑯᒃᓴᐅᑎᓐᓂᐊᖅᖢᓂᐅᒃ ᐃᖃᓗᖕᓂ, ᐱᔪᓐᓇᖅᓯᑐᐊᕈᓂ.
ᐃᓚᐃᔭᔅ ᑕᐃᒪᓐᓇ ᐱᔭᕇᖏᑉᐳᑦ ᓇᑭᖔᖅᓯᒪᓂᕐᒥᓂᒃ ᖃᐅᔨᓴᕐᓂᕐᒥᒃ. ᐊᑖᑕᑦᓯᐊᖓ Johnny Norberg ᖃᓄᐃᓕᐅᓚᐅᖅᓯᒪᓂᖓᓂᒃ ᐱᓕᕆᐊᕐᓂᐊᖅᐳᖅ.
“ᑖᓐᓇ ᑕᕐᕆᔭᐅᑎᓕᐊᖅ ᐊᓯᖏᓐᓂᒃ ᐃᓱᒪᔪᓐᓃᓚᐅᑲᒃᑲᒪ ᑕᐃᒪ ᕿᒪᓚᐅᕋᒃᑯ ᐅᑎᕐᕕᒋᒋᐊᖃᓕᖅᐸᕋ,” ᐅᖃᓚᐅᖅᐳᖅ.