Skip to content

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐋᖅᑭᒃᓯᕗᑦ ᓱᕋᒐᒃᓴᐅᙱᑦᑐᒥ ᐱᓕᕆᓂᐅᔪᒥ

ᖃᔅᓰᖅᓱᖅᖢᑎᑦ ᑐᓴᖅᓯᒪᕕᑦ ᐅᔭᕋᖕᓂᐊᓂᕐᒧᑦ ᑲᒻᐸᓂᐅᔪᑦ ᑎᑭᓐᓂᖏᓐᓂ ᐊᒻᒪ ᐱᕚᓪᓕᕈᑎᖃᖅᖢᑎᒃ ᐃᑲᔪᕈᑎᒃᓴᒥ ᓄᓇᒥᒃ, ᑮᓇᐅᔭᓕᐅᕐᔪᐊᖅᖢᑎᒃ ᐊᒻᒪ ᐊᓱᐃᓛᒃ ᓴᓂᕐᔪᐊᕌᓗᖕᓂ ᕿᒪᐃᓪᓗᑎᒃ?
ᐊᒥᓱᐃᖅᓱᕐᔪᐊᖅᑐᒥ, ᓇᓗᓇᙱᓚᖅ.

ᑕᐃᒪᐃᒐᔪᖕᓂᐅᔪᒥ, ᑕᒪᓐᓇ ᓱᓕᓂᖃᒐᓚᒃᐳᖅ ᐆᒧᖓ. ᑭᓯᐊᓂ ᐊᓯᔾᔨᖅᐸᓪᓕᐊᓕᖅᐳᖅ ᐊᒻᒪ ᐊᖏᔪᒥ ᐊᐅᓚᑦᑎᓂᐅᔪᒥ ᐱᓕᕆᓂᐅᕗᑦ ᓲᕐᓗ ᑕᐃᓐᓇ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ (QIA) ᐊᑎᓕᐅᓚᐅᖅᑕᖓᓂ ᐹᕙᓐᓛᓐ ᓴᕕᕋᔭᒃᓴᓄᑦ ᐅᔭᕋᖕᓂᐊᕐᕕᖓᓄᑦ ᔫᓂᒥ.

ᐃᓄᐃᑦ ᐃᑲᔫᑎᒃᓴᖏᓐᓄᑦ ᐊᖏᕈᑎᒃᓴᖓ ᐃᓗᓕᖃᐅᕐᔪᐊᖅᐳᖅ ᐃᓱᒪᑐᔪᒻᒪᕆᐅᔪᓂ ᐋᔩᖃᑎᒌᖕᓂᐅᔪᓂ ᐸᕐᓇᒍᑎᐅᔪᓄᑦ ᐊᒻᒪᓗ ᐅᖓᓯᒃᑐᒧ– ᑐᕌᖓᓂᖃᖅᐳᖅ ᑎᑎᕋᖅᓯᒪᓂᖓᓂ. ᓄᓘᔭᕐᓂ ᐅᔭᕋᖕᓂᐊᕐᕕᖓᓄᑦ ᐱᓕᖅᑭᒃᑕᕐᓂᖓᓂ ᒪᕐᕈᖓᓂ ᐊᖏᒡᓕᒋᐊᖅᓯᓂᐅᔪᒥ ᑐᒃᓯᕋᐅᑎᖓ ᓯᕗᒻᒧᑦ ᐃᖏᕐᕋᓂᐊᕈᓂ, ᕿᑭᖅᑕᓂ ᐃᓄᐃᑦ ᓴᙱᔪᒥ ᐃᓂᒦᑉᐳᑦ ᐱᕚᓪᓕᕐᓂᐊᕐᓂᖏᓐᓂ.

ᑮᓇᐅᔾᔭᒃᓴᓂᕐᒧᑦ ᖃᑭᓂᐅᔪᒥ ᐱᒻᒪᕆᐅᔪᒥ ᐃᓚᒋᔭᐅᓂᖓᓂ, ᑮᓇᐅᔭᓄᑐᐊᖅ ᐃᓱᒪᒋᔭᖃᙱᓚᖅ. ᐃᓄᖕᓂ ᑲᒪᑦᑎᐊᙱᓐᓂᖅ ᐅᔭᕋᖕᓂᐊᕐᕕᐅᑉ ᐊᐅᓚᑕᖏᓐᓂ ᐊᒻᒪ ᐊᒃᑐᐃᓂᐅᔪᓄᑦ ᐱᐅᓯᕚᓪᓕᕋᔭᖅᐳᑦ. ᑲᑎᒪᔨᕋᓛᖑᔪᓂ ᐋᖅᑭᒃᓯᓇᔭᖅᐳᑦ ᓇᐅᑦᑎᖅᓱᕐᓂᕐᒥ ᐊᒥᓱᓄᑦ ᐊᑲᐅᙱᓕᐅᕈᑕᐅᔪᓄᑦ ᓲᕐᓗ ᐅᖃᐅᓯᕐᒥ ᐸᐸᑦᑏᓐᓇᕐᓂᕐᒧᑦ, ᐊᑐᐃᓐᓇᖃᕐᓂᖓᓂ ᓂᕿᓪᓚᑦᑖᓂ, ᐃᑲᔪᖅᓱᐃᓂᐅᔪᒥ ᒪᒃᑯᒃᑐᓄᑦ ᐊᒻᒪ ᐃᓄᑐᖃᕐᓄᑦ, ᐃᓅᓯᐅᑉ ᐱᐅᓂᖓᓂ, ᐃᒡᓗᖃᖅᑎᑕᐅᓂᕐᒥ, ᑮᓇᐅᔾᔭᒃᓴᓂᕐᒧᑦ ᐊᒻᒪ ᐃᓅᓂᕐᒧᑦ ᐊᑭᖓᓐᓂ, ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᐃᓕᓐᓂᐊᕐᓂᕐᒧᑦ ᐊᒻᒪ ᐱᓕᒻᒪᒃᓴᐃᓂᕐᒧᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᓯᕗᒻᒧᑦ– ᐃᓱᒪᓚᐅᖅᐳᑦ ᐱᔾᔪᑎᖃᖅᑐᒥ ᓱᕈᓯᕐᓂ ᐸᐃᕆᔭᐅᓂᐅᔪᒥᑦᑕᐅᖅ. ᐅᓇ ᐊᖏᔫᓪᓗᓂ ᐊᒡᕕᐊᕈᑕᐅᕗᖅ ᐃᓚᒌᖑᔪᓄᑦ ᖄᖏᐅᑎᓂᖏᓐᓂ ᖁᑦᑎᒃᑐᒥ ᐊᑭᐅᔪᓄᑦ ᐅᑭᐅᖅᑕᖅᑐᒥᐅᑕᐅᓂᕐᒧᑦ. ᒪᕐᕉᖕᓂ ᐊᖓᔪᖅᑳᖑᔪᓂ ᐃᖅᑲᓇᐃᔭᖅᑐᓂ– ᐱᓗᐊᖅᑐᒥ ᐊᑕᐅᓯᖅ ᐅᖓᓯᒃᑐᒦᑎᓪᓗᒍ ᐱᓇᓱᐊᕈᓯᕐᓄᑦ ᒪᕐᕉᖕᓄᑦ ᐊᑕᐅᑦᑎᒥ– ᐊᔪᕐᓇᑲᓴᑦᑎᐊᖅᐳᖅ ᐸᖅᑭᔨᑕᖃᕐᓇᓂ ᓱᕈᓯᕐᓂᑦ. ᑕᐃᒫᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐊᖏᖅᑎᑦᑎᓚᐅᖅᐳᑦ ᐹᕙᓐᓛᓐᑯᓐᓂ ᐃᓕᓯᓂᖏᓐᓂ $15 ᒥᓕᐊᓐᓂ ᐸᐃᕆᕝᕕᖕᓄᑦ ᐃᒡᓗᕐᔪᐊᓄᑦ ᒥᑦᑎᒪᑕᓕᖕᒥ, ᐃᒡᓗᓕᒃ, ᓴᓂᕋᔭᒃ, ᑲᖏᖅᖢᒑᐱᒃ ᐊᒻᒪ ᐃᒃᐱᐊᕐᔪᖕᓂ. ᐅᔭᕋᖕᓂᐊᕐᕕᖕᒧᑦ ᐊᖏᒡᓕᒋᐊᕐᓂᖓ ᑎᑭᐅᑎᒍᓂ ᑲᖏᖅᖢᕐᔪᐊᕐᒧᑦ, ᐊᓱᐃᓛᒃ ᑭᙵᐃᑦ ᐊᒻᒪ ᑭᒻᒥᕈᑦ ᐱᓇᔭᕆᕗᑦ $3 ᒥᓕᐊᓐᓂ ᐱᕚᓪᓕᕈᑎᒥᒃ. ᑖᓐᓇᑐᐊᖑᙱᑦᑐᖅ, ᑭᓯᐊᓂ ᐹᕙᓐᓛᓐ ᐊᑭᓖᓂᐊᖅᐳᑦ $19– ᒥ ᐊᑐᓂ ᐅᓪᓗᕐᒥ ᐊᑐᓂ ᓱᕈᓯᕐᒧᑦ ᖃᐅᑕᒫᒥ ᐃᑲᔫᓯᖅᑕᐅᕙᒃᑐᓄᑦ ᓱᕈᓯᕐᓄᑦ ᐸᐃᕆᔭᐅᓂᖏᓐᓄᑦ.
“ᑲᑎᖅᓱᖅᑕᐅᕙᓪᓕᐊᓂᕐᒥ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐱᒋᐊᓕᓵᖅᑐᓄᑦ ᓱᕈᓯᕐᓄᑦ ᐊᑭᓖᓂᐊᖅᐳᑦ ᑮᓇᐅᔭᓕᐅᖅᑕᐅᓂᖏᓐᓂ ᓱᕈᓯᕐᓄᑦ ᐸᐃᕆᔭᐅᓂᖏᓐᓄᑦ,” ᐅᖃᓚᐅᖅᐳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐊᖓᔪᖅᑳᖓ P.J. ᐊᕿᐊᕈᖅ.

ᐱᔭᕆᐊᖃᕐᓂᖃᕐᓂᐊᕆᕗᖅ ᐹᕙᓐᓛᓐᑯᓐᓂ ᐃᓕᓯᓂᖏᓐᓂ $10-ᒥᓕᐊᓐᓂ ᐱᓕᕆᐊᒃᓴᐅᔪᒧᑦ ᐊᑭᓖᔪᒫᕐᓂᐊᕈᒻᒥ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐱᕝᕕᒋᔪᓐᓇᖅᑕᖓᓂ ᐹᕙᓐᓛᓐᑯᑦ ᑭᐅᙱᑦᑐᕕᓂᐅᔭᕌᖓᑦ ᐊᖏᖅᓯᒪᓂᖏᓐᓂ ᐅᕝᕙᓘᓐᓃᑦ ᑐᕌᒐᒃᓴᖏᓐᓂ – ᐊᒻᒪᓗ ᑕᐃᓐᓇ $10 ᒥᓕᐊᓐ ᐃᓗᓪᓕᖅᑕᐅᒃᑲᓐᓂᕆᐊᖃᖅᐳᖅ. ᑕᐃᒪᓐᓇᑎᑐᑦ, ᐊᖏᐸᓗᒃᑐᓂ ᑮᓇᐅᔭᑎᒍᑦ ᐊᑭᓖᔭᕆᐊᖃᕐᓂᐅᔪᓂ ᐃᓕᓯᒪᔪᖃᖅᐳᖅ ᐹᕙᓐᓛᓐ ᑭᐅᙱᒃᑯᓂ ᐃᓄᖕᓂ ᐃᖅᑲᓇᐃᔮᖃᖅᑎᑦᑎᓂᐅᔪᒥ ᑐᕌᖅᑕᐅᓇᓱᐊᖅᑐᓄᑦ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᓂᖏᖅᑕᕐᓂᖓ ᖁᕝᕙᕆᐊᕋᔭᖅᐳᖅ 3%– ᒧᑦ ᑕᖅᑭᑦ 72– ᓂ ᐱᓕᖅᑭᒃᑕᕐᓂᖅ ᒪᕐᕈᖓᓂ ᓄᓘᔭᕐᓂ ᐊᖏᒡᓕᒋᐊᖅᓯᓂᐅᔪᒥ. ᕼᐊᓐᓇᓚᖏᓐᓂ ᒥᓕᐊᓐᓂ ᐊᑭᓪᓗᐊᖓᓂ ᓴᕕᕋᔭᒃᓴᒥ ᐲᖅᑕᐅᕙᓪᓕᐊᔪᓂ ᕿᑭᖅᑕᓂ ᐊᕕᒃᑐᖅᓯᒪᓂᐅᔪᒥ ᐊᕐᕌᒍᑕᒫᒥ, ᓂᖏᖅᑕᕐᓂᖅ ᐊᖏᒡᓕᕙᓪᓕᐊᓂᐊᖅᐳᖅ. ᐊᓱᐃᓛᒃ ᖃᔅᓯᒐᓚᖕᓂ ᐊᑕᐅᓯᐊᖅᑐᒥ ᐊᑭᓖᓂᐅᔪᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᓄᑦ ᒥᓕᐊᓐ– ᖏᓃᑦᑐᓄᑦ ᐊᔾᔨᒌᙱᑦᑐᓄᑦ ᑎᑭᐅᑎᔭᐅᓂᐅᔪᓄᑦ.

ᑕᒪᕐᒥᓕᒫᑦ ᐱᕈᖅᓴᐃᓲᖑᕗᖅ ᐋᔩᖃᑎᒌᒃᑲᓐᓂᕐᓂᐅᔪᒥ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᑦ ᐊᖏᕈᑎᒧᑦ ᐅᑯᓇᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᓄᑦ ᐊᒻᒪᓗ ᐹᕙᓐᓛᓐᑯᓐᓄᑦ, ᐅᖃᐅᓯᐅᓚᐅᖅᑐᒥ ᐅᒃᑐᐱᕆ 2018– ᒥ.

ᑭᓯᐊᓂ, ᓇᓗᓇᐃᖅᓯᓂᖃᙱᓚᑦ ᐹᕙᓐᓛᓐᑯᑦ ᐃᖏᕐᕋᓂᖓᓂ ᐱᓕᖅᑭᒃᑕᕐᓂᕐᒥ ᒪᕐᕈᖓᓂ. ᑕᐃᑲᐅᕗᖅ ᓱᓕ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐱᓕᕆᓂᐅᔪᒥ ᐱᔭᕇᖅᑕᐅᔭᕆᐊᓕᖕᒥ, ᐃᓚᖃᖅᑐᒥ ᐃᓄᓕᒫᓄᑦ ᑐᓵᔭᐅᓂᐅᔪᓂᑦ. ᐊᕿᐊᕈᖅ ᓇᓗᓇᐃᖅᓯᕗᖅ ᑕᕆᐅᕐᒥ ᐃᓱᒫᓘᑕᐅᔪᓂ, ᐱᔾᔪᑎᖃᖅᑐᒥ ᐊᖏᒡᓕᒋᐊᖅᑐᒥ ᐅᓯᑲᑦᑕᕐᓂᐅᔪᒥ, ᓱᓕ ᐋᖅᑭᒃᑕᐅᔭᕆᐊᖃᕐᓂᖓᓂ.
ᖃᓄᐃᓐᓂᓕᒫᖑᔪᓄᑦ, ᓄᓘᔭᕐᓂ ᐱᓕᖅᑭᒃᑕᕐᓂᖓ ᒪᕐᕈᖓᓐᓂ ᐱᓪᓚᕆᐅᓕᖅᐸᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐱᓕᕆᑦᑎᐊᖅᑐᒻᒪᕆᐅᓪᓗᑎᒃ ᐋᖅᑭᒃᓯᕗᑦ ᐅᖃᐅᓯᐅᔪᓂ ᐊᖏᒡᓕᒋᐊᖅᓯᓂᐊᖅᑐᒥ ᐃᓅᓯᐅᔪᒥ ᐃᓚᒋᔭᐅᔪᓄᑦ ᖃᓄᕈᓘᔮᓗᒃ ᐊᒥᓱᓄᑦ ᐊᕐᕌᒍᓄᑦ ᑎᑭᑉᐸᓪᓕᐊᔪᓄᑦ.