Skip to content

ᓵᓚᒃᓴᐅᑎᖃᑦᑕᐅᑎᓂᐊᖅᑐᑦ

ᕼᐋᑭᖅᑎᑦ ᑲᖏᖅᖠᓂᕐᒥᑦ Team Rankin Inlet ᐊᒃᓱᕈᕐᓗᓂ ᓵᓚᒋᔭᐅᒋᐊᖃᕐᓂᐊᖅᐳᑦ ᐱᓐᖑᐊᕐᓂᐊᖅᑎᓪᓗᒋᑦ ᐃᖅᑲᐅᒪᑉᓗᒍ ᔮᓐ ᓕᓐᑎᐅ ᑳᒻᒥᐊ ᑲᑉ ᐊᖑᑎᑦ ᐃᓐᓇᐃᑦ ᑕᒡᕙᓂ ᐱᓇᓱᐊᕈᓯᒥ ᔭᓐᓄᐊᕆ 25 − 28−ᒧᑦ, ᐊᕐᕕᐊᓂ.

ᐱᓐᖑᐊᖅᑎᑦ ᑏᑦ ᑲᖏᖅᖠᓂᖅ Team Rankin Inlet ᓵᓚᒃᓴᕋᓱᐊᒃᑲᓐᓂᕐᓂᐊᖅᐳᑦ 2017-ᒥ ᔮᓐ ᓕᓐᑎᐅ ᐃᖅᑲᐅᒪᑉᓗᒍ ᑳᒻᒥᐊ ᑲᑉ ᐊᖑᑎᑦ ᐃᓐᓇᐃᑦ ᓵᓚᒃᓴᐅᑎᖃᓚᐅᖅᑎᓪᓗᒋᑦ 2018-ᒥ ᐱᓐᖑᐊᓕᖅᐸᑕ ᓵᓚᒃᓴᕋᓱᐊᕐᓂᐊᖅᖢᑎᒃ ᐱᓇᓱᐊᕈᓯᒥ ᐊᕐᕕᐊᓂ.

ᐊᕐᕌᒍᒥ ᑕᒡᕙᓂ 8ᖑᓂᐊᖅᐳᑦ ᐱᓐᖑᐊᖅᑎᑦ, ᐊᕝᕙᓪᓗᐊᖏᑦ ᒎᓗᑎᑖᕋᓱᐊᖃᑕᐅᓂᐊᖅᖢᑎᒃ ᐊᕐᕕᐊᓂ.

ᑕᒪᒃᑯᐊ ᐱᓐᖑᐊᖃᑕᐅᓂᐊᖅᑐᑦ ᑲᖏᖅᖠᓂᕐᒥᐅᑦ, Arctic Connection, ᑎᑭᕋᕐᔪᐊᒥᐅᑦ ᐊᒻᒪ Arviat Underdogs ᑕᒡᕙᓂ A Division−ᒥ, ᐊᒻᒪ ᑭᕙᓪᓕᕐᒥ Team Kivalliq, Karetakers, ᓴᓪᓕᕐᒥᐅᑦ ᐊᒻᒪ ᐊᕐᕕᐊᒥᐅᒃᑲᓐᓂᑦ Arviat Legends B ᒥᐅᑕᐃᑦ ᐱᓐᖑᐊᖃᑕᐅᓂᐊᖅᖢᑎᒃ.

ᑕᒪᒃᑯᐊ ᑭᕙᓪᓕᕐᒥ ᐱᓐᖑᐊᖅᑎᑦ ᐊᒥᓲᓂᖅᓴᐃᑦ ᐅᑯᓇᖔᖅᐳᑦ ᐱᓐᖑᐊᖅᑎᑦ, ᓇᐅᔮᓂᑦ, ᐃᓚᓕᐅᑎᓯᒪᑉᓗᑎᒃ ᐊᕐᕕᐊᒥᐅᓄᑦ ᑲᖏᖅᖠᓂᕐᒥᐅᓄᓪᓗ, ᑖᒃᑯᐊ Arctic Connection ᐱᓐᖑᐊᖅᑎᖏᑦ ᐃᓚᓕᐅᑎᑎᑦᓯᓯᒪᑉᓗᑎᒃ ᕙᓂᐹᖕᒥᐅᓂᑦ.
ᑖᒃᑯᐊ ᐊᔪᖏᑦᑐᑦ ᐱᖓᓱᑦ ᐱᓐᖑᐊᖅᑎᑦ ᐊᑐᓂ ᐱᓐᖑᐊᕐᔪᖃᑕᐅᓂᐊᖅᐳᑦ − ᒪᕐᕉᒃ ᓯᕗᓪᓕᖅ ᐲᖅᓯᖃᑦᑕᐅᑎᓂᐊᖅᖢᑎᒃ.

ᑕᒪᑐᒥᖓ ᕼᐋᑭᕐᔪᐊᕐᓇᐅᓂᐊᖅᑐᒥᒃ ᐊᐅᓚᑦᓯᓂᐊᖅᑐᖅ ᒋᓕᓴᓐ ᐅᐸᕼᐅᐊᒃ ᐅᖃᓚᐅᖅᐳᖅ ᐊᕐᕕᐊᒥᐅᑦ ᖁᕕᐊᓱᑦᓯᐊᕐᒪᑕ ᐱᓐᖑᐊᕐᔪᐊᕐᓇᐅᓂᐊᖅᑐᖅ ᖃᒡᓕᕙᓪᓕᐊᓕᖅᑎᓪᓗᒍ.

ᐅᖃᓚᐅᖅᖢᓂᓗ ᓄᓇᓕᖕᓂᒥᐅᑦ ᖁᕕᐊᓱᑦᓯᐊᕐᒪᑕ ᑐᓐᖓᓱᑦᑎᑦᓯᓂᐊᖅᖢᑎᒡᓗ ᓴᓪᓕᕐᒥᐅᓂᒃ ᓯᕗᓪᓕᕐᒥ ᐃᓚᐅᓂᐊᕐᒪᑕ.
"ᐊᖏᖃᑎᒌᓚᐅᖅᐳᒍᑦ ᓴᓪᓕᕐᒥᐅᑦ ᐱᓐᖑᐊᕐᔪᐊᖃᑕᐅᔭᖅᑐᖅᐸᑕ, ᐊᕐᕕᐊᒥᐅᑦ ᐊᐅᓪᓚᖅᑎᑦᓯᒐᔭᕐᓗᑎᒃ ᐱᓐᖑᐊᖅᑎᓂᒃ ᐅᕙᑦᓯᐊᕈᒃᑲᓐᓂᖅ ᓴᓪᓕᕐᒧᑦ," ᐅᖃᓚᐅᖅᐳᖅ ᐅᐸᕼᐅᐊᒃ.

"ᓴᓪᓕᕐᒥᐅᑦ ᑕᒡᕙᓃᖃᑕᐅᑎᓪᓗᒋᑦ ᓴᓐᖏᓂᖅᓴᐅᖕᒪᑦ ᐱᓐᖑᐊᕐᓂᖅᐳᑦ, ᑕᐃᒪᓐᓇᐃᒍᒪᑉᓗᑕᓗ, ᖁᕕᐊᓱᒃᐳᒍᑦ ᐃᓚᐅᔪᓐᓇᕐᒪᑕ, ᓯᓚᑦᓯᐊᖑᖁᕙᕗᓪᓗ ᑕᒪᐃᓐᓄᑦ ᐃᓄᖕᓄᑦ ᑎᑭᓐᓂᐊᖅᑐᓄᑦ.

"ᐱᓐᖑᐊᖅᑎᕗᑦ ᐱᓕᕆᕐᔪᐊᕐᓂᐊᖅᐳᑦ ᐊᒃᓱᕈᕐᓗᑎᒃ ᑮᓇᐅᔭᓕᐅᕋᓱᐊᕐᓗᑎᒃ ᓴᓪᓕᕐᒧᑦ ᐱᓐᖑᐊᕆᐊᖅᑐᕈᓐᓇᖁᑉᓗᒋᑦ, ᑕᐃᒪᓐᓇ ᓯᕗᓂᒃᓴᐅᓂᐊᖅᑐᒥ ᑕᐃᒪᓐᓇᐃᓕᐅᖃᑦᑕᕈᒪᑉᓗᑕᓗ."

ᓴᓪᓕᕐᒥᐅᑦ ᑎᑭᑎᑕᐅᓂᐊᕐᓂᖏᓐᓄᑦ ᓯᑯ ᓯᐊᕐᕆᔮᕐᕕᒃ ᐊᒃᓱᕈᕐᓇᕆᐊᖃᕐᓂᐊᖅᐳᖅ ᓇᐅᔮᒥᐅᓄᑦ ᑖᒃᑯᓄᖓ ᐱᓐᖑᐊᖃᑕᐅᓂᐊᖅᑐᓄᑦ Team Kivalliq, ᐊᑭᕋᕇᑦ ᐱᓐᖑᐊᖃᑎᒌᖕᓂᐊᖅᖢᑎᒃ ᓴᓪᓕᕐᒥᐅᑦ ᐊᒻᒪ Arctic Connection.

ᐅᐸᕼᐅᐊᒃ ᐅᖃᓚᐅᖅᐳᖅ ᐱᖃᓐᓇᕇᑦᓯᐊᕋᓗᐊᖅᖢᑎᒃ ᑭᓯᐊᓂ ᐊᒃᓱᕈᕐᓂᐊᖅᐳᑦ ᐊᑭᕋᕇᑦ ᑕᒪᓐᓇ ᐱᐅᓂᐊᖅᖢᓂᓗ ᑭᕙᓪᓕᕐᒥ ᕼᐋᑭᖅᑎᓄᑦ ᑕᐅᑐᖃᑦᑕᖅᑐᓄᓪᓗ.

ᐅᖃᓚᐅᖅᖢᓂᓗ ᐱᓐᖑᐊᕐᓂᖏᑦ ᐊᔾᔨᒌᕐᓚᒃᐸᑕ, ᐃᑕᒋᔭᐅᖏᓐᓂᖅᓴᐅᒃᐸᑕ ᐅᕙᓘᓐᓃᑦ ᑖᒃᑯᐊᖏᓐᓇᐅᓗᐊᖅᐸᑕ ᓵᓚᒃᓴᖃᑦᑕᐃᓐᓇᖅᑐᑦ, ᑕᐃᒪᓐᓇ ᖁᕕᐊᓇᕐᓂᖅᓴᐅᖕᒪᑦ ᑭᕙᓪᓕᕐᒥ ᕼᐋᑭᕐᔪᐊᖅᑐᓂ ᑕᐅᑐᒡᓗᒋᑦ ᐱᓐᖑᐊᖅᑎᓄᓪᓗ ᑕᐅᑐᒋᐊᖅᓯᒪᔪᓄᓪᓗ.

"ᑲᖏᖅᖠᓂᖅ ᓴᓐᖏᔫᓂᐊᕐᒪᑕ, ᐱᓐᖑᐊᖅᑎᖏᑦ ᓴᓐᖏᑉᓗᑎᒡᓗ, ᖃᐅᔨᒪᓗᒃᑖᕋᑉᑎᒍᑦ ᑕᒪᓐᓇ, ᑭᓯᐊᓂ ᑕᐃᒪᓐᓇ ᐊᔪᖐᓐᓇᖏᑐᐃᓐᓇᕆᐊᖃᖅᐳᑦ ᐊᕐᕌᒍᒥ ᐊᑐᖅᑐᒥ.

"ᑕᒪᕐᒥᒃ ᐱᓐᖑᐊᖃᑎᒌᑦ ᑕᐱᕇᑦ ᖃᐅᔨᒪᖕᒪᑕ A-ᑯᓐᓂ ᐱᓐᖑᐊᑦᓯᐊᕆᐊᖃᕐᓂᐊᖅᐳᑦ ᑲᖏᖅᖠᓂᕐᒥᐅᓂᒃ ᓵᓚᒃᓴᕈᒪᒍᑎᒃ, ᐊᒥᓱᑦ ᐱᓐᖑᐊᕆᐊᖃᕐᓂᐊᖅᐳᑦ."

ᐊᐅᓚᑦᓯᔨᐅᑉᓗᖓ ᑕᒪᒃᑯᓂᖓ ᔮᓐ ᓕᓐᑎᐅ ᐃᖅᑲᐅᒪᑉᓗᒍ ᑳᒻᒥᐊ ᑲᑉ ᑕᐃᒪᓐᓇ ᐊᖏᔫᖃᑕᐅᑉᓗᓂ ᐱᓐᖑᐊᖅᑕᐅᖃᑦᑕᖅᑐᖅ ᑭᕙᓪᓕᕐᒥ ᑕᐃᒪᓐᓇ, ᐅᑉᐸᕼᐅᐊᒃ ᐱᓐᖑᐊᖅᑎᑦᓯᓇᓱᐊᖅᓯᒪᕗᑦ ᒫᓂᑑᐸᒥᐅᓂᒃ ᑕᐃᒪᓐᓇ ᐱᓐᖑᐊᖃᑕᐅᖃᑦᑕᖁᑉᓗᒋᑦ ᐊᑯᓂᐅᓕᖅᑐᖅ ᐅᑭᐅᓂ ᐱᓕᕆᐊᕆᓯᒪᑉᓗᓂᐅᒃ.

ᑕᒡᕙᓂ ᐊᕐᕌᒍᒥ ᐊᑐᖅᑐᒥ, ᕙᓂᐹᖕᒥᐅᑕᐅᑉᓗᓂ ᐃᓕᓐᓂᐊᕆᐊᖅᖢᓂ, ᑕᐃᒪᓐᓇ ᒫᓂᑑᐸᒥᐅᓂᒃ ᐱᓐᖑᐊᖅᑎᖃᑐᐃᓐᓇᕆᐊᖃᕐᓂᐊᖅᐳᖅ ᓯᕗᓪᓕᖅᐹᑦᓯᐊᒥ.

"ᐱᖓᓱᓂᒃ ᓇᒃᓴᕐᓂᐊᕋᒪ ᐊᒻᒪ ᒎᓕᖓᓐᓂᒃ ᕙᓂᐹᖕᒥᑦ ᐱᓐᖑᐊᖃᑕᐅᓂᐊᕐᒪᑕ ᑖᒃᑯᓄᖓ Arctic Connection−ᑯᓐᓄᑦ," ᐅᖃᓚᐅᖅᐳᖅ ᐅᑉᐸᕼᐅᐊᒃ.

"ᕙᓂᐹᖕᒥᐅᑕᐅᔪᓗᒃᑖᑦ ᓇᒃᓴᕋᓱᓚᐅᕋᓗᐊᕋᑉᑭᑦ, ᑕᒪᓐᓇ ᐱᒋᐊᕈᑎᑦᓯᐊᕙᐅᔪᓐᓇᕐᓂᐊᕐᒪᑦ.

"ᖃᓄᐃᓐᓂᐊᕐᒪᖔᑕ ᖃᐅᔨᓂᐊᖅᐳᒍᑦ, ᐱᓐᖑᐊᕐᔪᐊᕌᓂᒃᐸᑕᓗ ᐊᐱᖅᓱᕐᓂᐊᖅᖢᒋᑦ ᖃᓄᖅ ᐃᓱᒪᖕᒪᖔᑕ, ᑭᓯᐊᓂ ᐱᓕᕆᐊᖃᕋᓱᐊᖅᐳᒍᑦ ᔮᓐ ᓕᓐᑎᐅ ᐃᖅᑲᐅᒪᑉᓗᒍ ᕼᐋᑭᕐᔪᐊᕐᓂᖅ ᐊᒥᓱᓄᑦ ᐃᓚᐅᕕᐅᖃᑦᑕᓕᖅᐸᓪᓕᐊᖁᒐᑉᑎᒍ ᐊᕐᕌᒍᑕᒫᑦ.

"ᑕᐃᒪ ᖁᕕᐊᒋᔭᐅᒃᐸᑦ ᐱᓐᖑᐊᖅᑎᓄᑦ ᐱᓐᖑᐊᖃᑕᐅᓂᐊᖅᑐᓄᑦ ᖁᕕᐊᓱᖃᑎᒌᒃᐸᑕᓗ, ᐊᓯᖏᑦ ᐱᓐᖑᐊᖅᑎᑦ ᕙᓂᐹᖕᒥᐅᑕᐃᓪᓗ ᐃᓚᐅᑐᐃᓐᓇᕆᐊᖃᕐᓂᐊᖅᐳᑦ ᐊᕐᕌᒍ."