ᑕᐃᒪ ᐊᓪᓗᕐᓂᐊᓕᕐᒥᑎᓪᓗᑕ 2020–ᒧᑦ ᑕᐃᒪᓐᓇᐃᓕᐅᕈᓐᓇᕐᓂᐊᖅᐳᒍᑦ ᐃᓕᑉᐹᓪᓕᖅᓯᒪᓕᕐᓗᑕ ᑕᐃᑦᓱᒪᓂᐅᓚᐅᖅᑐᒥᑦ.
ᐃᓚᖏᑦ ᐊᒃᓱᕈᕐᓇᓚᐅᖅᖢᑎᒃ ᐃᓱᒪᑐᐃᓐᓇᕈᑕᐅᓪᓗᑎᒃ, ᖃᐅᔨᓴᖅᑕᐅᓯᒪᙱᖦᖢᑎᒡᓗ, ᐊᓯᑦᑎᓐᓄᑦ ᐱᓕᕆᐊᕆᔭᐅᑎᑐᐃᓐᓇᓚᐅᕋᑦᑎᒍᓗ.
ᐅᖃᕈᒪᕗᖓ ᑕᒪᒃᑯᐊ ᐃᓕᑉᐸᓪᓕᕈᑎᒋᓯᒪᔭᕗᑦ ᐅᕙᑦᑎᓐᓂᒃ ᐱᔾᔪᑎᖃᖏᑉᐳᑦ ᓵᑕᐅᔪᒃᓴᐅᖏᑉᐳᒍᑦ ᑕᐃᒪᐃᓕᖓᓂᑦᑎᓐᓄᑦ. ᖃᓄᖅ ᓇᐅᒃᑯᓪᓗ ᐱᒋᐊᕆᐊᖃᖅᐱᑕ? ᓯᕗᒻᒧᐊᒃᐸᓪᓕᐊᓂᐊᕈᑦᑕ ᐅᑎᕗᑦ ᑕᑯᒋᐊᕆᐊᖃᖅᐳᒍᑦ ᑕᑯᓇᓱᐊᕐᓗᑕ ᓱᓇᐃᑦ ᐊᒃᓱᕈᕈᑎᒋᓚᐅᕐᒪᖔᑦᑎᒍ, ᑕᒪᓐᓇ ᐊᒃᓱᕈᕐᓇᖃᑕᐅᓂᐊᖅᐳᖅ.
ᐅᖃᓕᒫᓚᐅᖅᐳᖓ ᓇᑭᒃᑯᐊᖅ, ᐱᕙᓪᓕᐊᔪᑎᒍᖃᐃ, ᑕᒪᒃᑯᐊ ᑕᕆᐅᑉ ᐊᑭᐊᓂᒥᐅᑕᐃᑦ ᑎᑭᖃᑦᑕᓕᓵᖅᖢᑎᒃ ᓄᓇᑦᑎᓐᓄᑦ ᐅᓂᒃᑳᓕᐅᖅᐸᓚᐅᕐᒪᑕ ᓄᓇᒥᖕᓄᑦ ᓇᓂᓯᓂᕋᖅᖢᑎᒃ ᐊᔾᔨᐅᖏᑦᑐᓂᒃ ᐃᓄᖕᓂᒃ, ᑕᐃᑦᓱᒪᓂᑐᖃᒥᐅᓂᒃ ᐊᐅᓚᑕᐅᒋᐊᖃᖅᖢᑎᒡᓗ. ᑕᐃᒪᓐᓇᐃᓕᐅᕐᓂᖏᓐᓂ ᑕᐃᒪᓐᓇ ᐃᓱᒪᓂᖏᓐᓂᓗ ᖃᐅᔨᒪᓪᓚᕆᒃᑲᑎᒃ ᐅᕙᑦᑎᓐᓂᒃ ᐊᔾᔨᐅᖏᑦᑑᓇᓱᒋᓚᐅᖏᑉᐳᒍᑦ ᐊᐅᓚᑕᐅᒋᐊᖃᕐᓂᕋᖅᑕᐅᓪᓗᑕᓗ ᐃᓅᓇᓱᒋᔭᐅᙱᖦᖢᑕ. ᐅᕕᓂᒃᐳᖅ ᐊᔾᔨᐅᖏᑦᑑᓂᖏᓐᓄᑦ ᐅᕕᓂᖃᑎᒋᖏᓐᓇᑦᑎᒍ, "ᑕᐃᒪᓐᓇᑎᑐᑦ ᐃᓅᓯᖏᑦᑎᑑᖏᓐᓂᑦᑎᓐᓄᓪᓗ" ᐊᓐᓄᕌᕗᓪᓗ ᐊᔾᔨᐅᙱᖠᖢᑎᒃ ᐅᖃᐅᓯᕗᓪᓗ ᐊᖓᔪᖃᐅᑕᐅᓂᖅᓴᐅᓇᓱᒋᓚᐅᕐᒪᑕ ᓇᖕᒥᓂᖅ ᒥᑭᓂᖅᓴᐅᓇᓱᒋᔭᐅᓪᓗᑕᓗ. ᓇᓗᒐᒪ ᖃᓄᖅ ᐅᖃᕆᐊᒃᓴᖅ ᓱᖕᒪᑦ ᑕᐃᒪᓐᓇ ᐱᐅᓂᖅᓴᐅᓇᓱᒋᓚᐅᕐᓂᖏᑦ ᓇᖕᒥᓂᖅ. ᓄᖅᑲᕐᓗᓂ ᐃᓱᒪᒋᓗᒍᓗ ᓇᓗᓇᐃᔭᕐᓗᒍᓗ ᑕᐃᒍᖅᑕᐅᒐᔭᖅᐳᖅ "ᐱᐅᓱᒋᓂᖏᓐᓄᑦ".
ᓄᓇᑦᑎᓐᓂᒥᐅᑕᐅᓯᒪᓕᖅᐳᖓ ᐊᕐᕌᒍᓄᑦ 59-ᓄᑦ ᑕᑯᓯᒪᓪᓗᖓᓗ ᑕᒪᐃᓐᓂᒃ ᐱᐅᔪᓂᒃ ᐱᐅᖏᑦᑐᓂᒡᓗ ᐊᕐᕌᒎᓯᒪᓕᖅᑐᓂ. ᒐᕙᒪᒃᑯᑦ ᓯᓚᑐᒐᓱᒋᓪᓗᑎᒃ ᑮᓇᐅᔭᓕᐅᕈᑎᖃᕋᓱᐊᖅᐸᒃᐳᑦ ᐊᑭᑐᔪᓂᒃ ᓴᖅᑭᑎᑎᓇᓱᐊᖅᖢᑎᒃ ᓂᐅᕐᕈᑎᒋᔪᓐᓇᖅᑕᒥᖕᓂᒃ ᑎᐹᓂᒃ ᐃᒥᐊᓗᖕᓂᒡᓗ ᑕᐃᒪᓐᓇᓗ ᒪᓕᒐᑎᒍᑦ ᐋᖅᑭᒃᓯᓚᐅᕆᓪᓗᑎᒃ ᒪᓕᒐᑎᒍᑦ ᐱᔭᐅᔪᓐᓇᖅᓯᑎᑦᓯᓪᓗᑎᒃ ᓱᐴᖅᑐᒐᕐᓗᖕᓂᒃ ᐊᖓᔮᕐᓇᖅᑐᓂᒃ ᐅᖃᐅᓯᖃᓚᐅᙱᖦᖢᑎᒡᓗ ᐊᑯᓂ ᑕᒪᒃᑯᐊ ᐊᑐᖅᑕᐅᓪᓗᑎᒃ ᐊᑲᐅᖏᓕᐅᕈᑕᐅᓕᕈᓐᓇᕐᓂᖏᓐᓄᑦ. ᑕᒪᒃᑯᐊ ᐅᐃᕆᓕᕈᑕᐅᔪᓐᓇᕐᒪᑕ ᐋᓐᓂᐊᓕᕈᑕᐅᔪᓐᓇᖅᖢᑎᒡᓗ ᑐᖁᒍᑕᐅᔪᓐᓇᖅᖢᑎᒡᓗ. ᑕᒪᒃᑯᐊ ᖃᐅᔨᒪᔭᐅᓪᓗᑎᒃ ᑎᑎᕋᖅᑕᐅᓯᒪᓪᓗᑎᒡᓗ ᐊᐃᑉᐸᕇᓄᑦ ᐊᕕᒍᑕᐅᔪᓐᓇᕐᓂᖏᓐᓄᑦ. ᑐᓴᖃᑦᑕᖅᓯᒪᕗᖓ ᒪᒃᑯᒃᑐᓂᒃ ᑳᓕᖃᑦᑕᖅᑐᓂᒃ ᐊᓐᓄᕌᖅᑖᕈᓐᓇᖏᑦᑐᓂᒡᓗ ᓄᑖᓂᒃ ᐊᖓᔪᖄᖏᑦ ᑲᑎᖅᓱᐃᓂᖏᓐᓄᑦ ᑮᓇᐅᔭᓂᒃ ᐊᖓᔮᕐᓇᖅᑐᓂᒃ ᓂᐅᕕᕈᑕᐅᔪᒃᓴᐅᓂᐊᖅᑐᓂᒃ.
ᒐᕙᒪᒃᑯᒃ ᓯᓚᑐᒐᓱᒋᓗᐊᒧᑦ ᐊᑐᖅᑎᑦᑎᔪᓐᓇᖅᓯᕗᑦ ᐊᖓᔮᕐᓇᖅᑐᓂᒃ ᑕᒪᒃᑯᓂᖓ ᓱᐴᖅᑐᒐᕐᓗᖕᓂᒃ ᐋᖅᑭᒃᓯᓇᑎᒃ ᐊᔪᓕᕈᑎᖃᖅᑐᓄᑦ ᐃᖢᐊᖅᓴᕐᕕᒃᓴᓂᒃ. ᐃᓚᖏᓐᓂ, ᐃᓄᐃᑦ ᐊᐅᓪᓚᖅᑎᑕᐅᖃᑦᑕᖅᐳᑦ ᐃᓚᒥᖕᓂᒃ ᕿᒪᐃᓪᓗᑎᒃ ᐱᖃᓐᓇᕆᔭᒥᖕᓂᒡᓗ ᐅᑎᕌᖓᑕᓗ ᐅᕙᒡᕕᒃᓴᖃᖅᑎᑕᐅᙱᖦᖢᑎᒃ ᐋᖅᑭᒃᓱᖅᑕᐅᒃᑲᓐᓂᕐᕕᒃᓴᖏᓐᓂᒃ.
ᑕᒪᒃᑯᐊ ᐃᓚᓐᓇᖏᑦ ᐅᖃᐅᓯᕆᕙᒃᑲ ᐊᑲᐅᖏᓕᐅᕈᑎᒋᓯᒪᔭᖅᐳᑦ ᐊᒃᓱᕈᕈᑎᒋᓯᒪᔭᖅᐳᓪᓗ ᑕᐃᑦᓱᒪᓂ.
ᐅᖃᐅᓯᕆᖃᑦᑕᖅᓯᒪᓪᓗᒋᓪᓗ ᐊᒥᓱᐃᖅᑕᖅᖢᖓ ᐅᖃᐅᓯᕆᒃᑲᓐᓂᕈᒪᓪᓗᒋᓪᓗ, ᒐᕙᒪᒃᑯᑦ ᑎᒥᖁᑎᖏᑦ ᐊᒻᒪ ᑲᒪᔨᒋᓇᓱᐊᖅᑕᕗᑦ ᐊᑲᐅᖏᓕᐅᕈᑕᐅᔪᓂᒃ ᖃᓄᐃᓕᐅᕈᑎᖃᖅᐸᓪᓕᐊᓗᐊᖏᒻᒪᑕ ᐃᑲᔪᕋᓱᐊᓪᓗᐊᖏᓐᓂᖅᓴᐅᓪᓗᑎᒃ ᑕᐃᒪᓐᓇ ᐃᓄᖁᑎᕗᑦ ᐅᐃᕆᓯᒪᔭᖃᖅᐸᓪᓕᐊᑎᑕᐅᑐᐃᓐᓇᖅᖢᑎᒃ. ᑕᐃᒪᓐᓇ ᒪᓕᒃᓴᕈᑕᐅᕙᓪᓕᐊᖏᓐᓇᕐᓂᐊᖅᐳᖅ ᑕᒪᓐᓇ ᐃᓄᖕᓄᑦ ᐃᓚᒌᓄᑦ ᐊᑐᖅᑕᐅᕙᓪᓕᐊᑐᐃᓐᓇᕐᓗᓂ ᑕᒪᒃᑯᐊᓗ ᑲᒪᑦᓯᐊᕈᒪᔪᑦ ᑐᓴᖅᑕᐅᕙᓪᓕᐊᙱᖦᖢᑎᒃ ᐃᑲᔪᖅᑕᐅᒍᒪᒐᓗᐊᖅᑐᓄᑦ. ᒪᓕᒐᐃᑦ ᐱᓐᖑᖅᑎᑕᐅᓂᐊᖅᐸᑕ, ᒐᕙᒪᓄᑦ ᖃᐅᔨᒪᔭᐅᑦᓯᐊᕆᐊᖃᖅᐳᑦ, ᑕᒪᒃᑯᐊ ᐋᓐᓂᐊᓕᖅᐸᓪᓕᐊᔪᑦ ᓱᖁᑎᒋᔭᐅᙱᖦᖢᑎᒃ, ᐊᕕᑉᐸᓪᓕᐊᔪᑦ ᓱᖁᑎᒋᔭᐅᙱᖦᖢᑎᒡᓗ, ᑐᖁᕙᓪᓕᐊᔪᑦ ᓱᖁᑎᒋᔭᐅᙱᖦᖢᑎᒡᓗ, ᐃᓅᓯᕐᒥᖕᓂᒃ ᑭᐱᓯᔪᑦ ᓱᖁᑎᒋᔭᐅᙱᖦᖢᑎᒃ. ᑕᐃᒪᓐᓇ ᐅᖃᐅᓯᕆᖏᓐᓂᕋᖅᐸᒃᑲ ᐃᓚᖏᑦ ᐊᖏᓂᖅᓴᐅᒻᒪᕆᒃᑐᑦ.