ᓇᐅᔮᑦ ᐃᓚᒋᔭᐅᔪᓄᑦ ᑯᐊᐸᒃᑯᓐᓂ ᓂᐅᕕᕐᕕᑐᐊᖑᕗᖅ ᓄᓇᕗᒻᒥ ᓇᖕᒥᓂᓕᖕᒥ ᐃᒐᕕᖕᒥ, ᐊᒻᒪᓗ ᓯᐊᕈᓪ ᓯᐅᓴᕐᓈᖅ ᐃᒐᔨᐅᕗᖅ.
"ᓯᐊᕈᓪ ᐃᒐᔨᓪᓗᐊᑕᐅᕗᖅ, ᐊᒻᒪ ᑲᐃᒃᓂ ᑕᖅᓯᖅᓱᐃᔨᐅᕗᖅ. ᐅᕙᓂ ᑲᐃᒃᓕᐅᓲᖑᒋᕗᒍᑦ, ᐊᒻᒪ ᐊᔪᙱᓐᓂᓕᖓᓗᒃ ᑕᑯᓚᐅᖅᓯᒪᙱᑕᓐᓂ ᐅᑭᐅᖅᑕᖅᑐᒥ ᑲᐃᒃᓕᐅᕐᓂᕐᒧᑦ. ᐊᔪᙱᑦᑐᕐᔪᐊᕌᓘᕗᖅ ᐊᕐᓇᐅᓪᓗᓂ," ᐅᖃᓚᐅᖅᐳᖅ ᐊᐅᓚᑦᑎᔨᐅᔪᖅ ᑐᕈᐊᐃ ᓚᐸᓛᖕᒃ.
Cheryl Siusangnark is the Naujaat Co-op resident baker, who also specializes in custom-decorated cakes for the community.
ᓯᐅᓴᕐᓈᖅ, ᐃᒻᒥᓂ-ᐃᓕᑦᑎᓂᑰᔪᖅ ᑲᐃᒃᓂ ᑕᖅᓯᖅᓱᐃᔨ, ᐊᖏᓚᐅᖅᐳᖅ ᑭᐅᓂᖓᓂ ᖃᔅᓯᐊᕐᔪᓂᑦ ᐊᐱᖅᑯᑎᑦᑎᓐᓂ ᖃᕋᓴᐅᔭᑎᒍᑦ ᑎᑎᕋᕐᓂᒃᑯᑦ.
ᖁᕕᐊᒋᔭᖃᕐᓂᖓᓂ ᐃᒐᓂᕐᒧᑦ ᐊᒻᒪ ᑲᐃᒃᓂ ᑕᖅᓯᖅᓱᐃᓂᕐᒥ ᐱᔪᒪᓕᖅᑎᑦᑎᓚᐅᖅᐳᖅ ᐃᖅᑲᓇᐃᔮᖑᔪᒧᑦ.
"ᐅᓪᓘᔪᒥ ᓴᓇᔪᒪᓕᓚᐅᖅᐳᖓ ᑲᐃᒃᒥ ᐊᒻᒪ ᑕᖅᓯᖅᓱᕐᓗᒍ ᑲᓇᑕᒥ ᕼᐋᑭᖅᑎᐅᔪᓄᑦ ᑕᖅᓴᖓᓂ, ᐅᔾᔨᕆᓕᖅᖢᖓ ᖁᕕᐊᒋᑦᑎᐊᕐᓂᓐᓂ ᐊᒻᒪ ᑕᐃᒪᙵᓂ ᐱᓕᕆᐊᕆᕙᕋ. ᐃᒐᒐᔪᓚᐅᖅᐳᖓ ᓯᕗᓂᐊᓂ ᐊᒻᒪ ᑕᒪᓐᓇ ᐱᔾᔪᑎᒋᒃᑲᓐᓂᖅᖢᓂᐅᒃ ᐃᖅᑲᓇᐃᔭᕈᒪᓚᐅᕐᓂᓐᓂ ᐃᒐᕕᖕᒥ," ᓯᐅᓴᕐᓈᖅ ᐅᖃᓚᐅᖅᐳᖅ.
ᓚᐸᓛᖕᒃ ᐅᓂᒃᑳᓚᐅᖅᐳᖅ ᑕᐃᒪᐃᒐᔪᒃᑐᓂ ᐃᒐᕕᐅᙱᓚᖅ.
"ᐃᒐᒍᕕᑦ ᐃᓚᒃᓴᓕᒫᖏᓐᓂ ᐆᑦᑎᓗᓂ, ᐃᓚᒃᓴᖏᑦ ᐊᑭᑐᓂᖅᓴᒻᒪᕆᐅᓇᔭᖅᐳᑦ. ᐱᖃᖅᐳᒍᑦ ᑕᐃᔭᐅᔪᒥ Bake Off-ᒥ. ᖁᐊᖑᓪᓗᓂ ᐸᓚᐅᒑᒃᓴᓕᐊᖑᕗᖅ, ᓴᖅᑭᖦᖢᑎᒍᑦ ᐊᒻᒪ ᐱᕈᓲᖑᕗᖅ. ᐊᓱᐃᓛᒃ ᐆᑦᑎᓪᓗᑎᒍᑦ," ᐅᖃᓚᐅᖅᐳᖅ ᓚᐸᓛᖕᒃ.
"ᐊᑐᓲᕆᕙᕗᑦ ᖃᐅᓪᓗᖅᑐᖅ ᐸᓚᐅᒑᖅ ᐊᔾᔨᒌᙱᕈᓘᔭᖅᑐᓄᑦ. ᓴᓇᓲᖑᕗᒍᑦ ᐸᐅᕐᙵᓕᖕᓂ ᐸᓚᐅᒑᕐᓂ, ᓯᓂᒥᓐ ᐸᓚᐅᒑᕋᓛᓂᑦ, ᐊᔾᔨᒌᙱᑦᑐᓂ ᐸᐃᔅᑐᕆᓂᑦ, ᑑᓇᑦᓂ, ᖃᔅᓯᒐᓚᖕᓂ ᐊᔾᔨᒌᙱᑦᑑᑕᐅᔪᓂ ᐸᓚᐅᒑᕐᓂ, ᐅᐃᕖᑦ ᐸᓚᐅᒑᖏᓐᓂ. ᑖᔅᓱᒥᖓᑦᑕᐃᓐᓇᖅ ᐊᑐᕈᓐᓇᖅᐳᑎᑦ ᐊᔾᔨᒌᙱᑦᑑᑎᕈᓘᔭᓂᑦ ᓴᓇᓂᕐᒧᑦ."
ᐃᒐᓲᖑᕗᑦ ᐅᓪᓗᓄᑦ ᑕᓪᓕᒪᓄᑦ, ᐃᓛᓐᓂᒃᑯᑦ 6-ᓂ.
ᓲᓴᓈ ᒪᑉᓕᒃ, ᒪᕐᕈᒋᔭᐅᓪᓗᓂ ᐃᒐᔨᐅᕗᖅ, ᐸᓚᐅᒑᓕᕆᔨᐅᓪᓗᓂ ᐊᒻᒪ ᐸᐃᔅᑐᕆᓂᑦ.
"ᑭᓱᑐᐃᓐᓇᓂ ᐱᓕᕆᓂᐊᖅᐳᖅ ᑭᓯᐊᓂ ᑲᐃᒃᓂ."
ᐃᒐᕕᖓ ᓴᓇᓲᖑᒋᕗᑦ ᓴᓇᔭᐅᓵᕐᓂᑯᓂ ᐃᑭᐊᕐᒥᓕᖕᓂᑦ, ᐃᑭᐊᕐᒥᑯᑖᖑᔪᓂᑦ ᐊᒻᒪ ᐅᐃᕖᓄᑦ ᐸᓚᐅᒑᓕᐊᒥ ᐃᑭᐊᕐᒥᓕᖕᓂᑦ.
ᓚᐸᓛᖕᒃ ᐅᖃᓚᐅᖅᐳᖅ ᓂᐅᕕᑐᐃᓐᓇᓲᖑᕗᖅ ᐃᒐᕕᐅᑉ ᐸᓚᐅᒑᓕᐊᖏᓐᓂ, ᓂᐅᕕᕐᕕᒃ ᐆᑦᑎᓯᒪᕙᒌᖅᑐᓂ ᐸᓚᐅᒑᖃᕋᓗᐊᖅᑎᓪᓗᒍ.
"ᒪᒪᕆᙱᑕᒃᑲ ᐸᓚᐅᒑᑦ ᑎᑭᓲᖑᔪᓂ ᐆᑦᑎᓯᒪᕙᒌᖅᑐᓂᑦ. ᓂᐅᕕᓲᖑᕗᖓ ᐃᒐᕕᖕᒥ ᖃᓂᓛᖑᖕᒪᑦ ᐊᖏᕐᕋᒥ ᓴᓇᔭᐅᓯᒪᔪᒥ ᐸᓚᐅᒑᕐᒥ ᐅᑭᐅᖅᑕᖅᑐᒥ. ᒪᒪᖅᑐᒻᒪᕆᐊᓗᒃ."
ᓯᐅᓴᕐᓈᖅ ᓂᕆᓲᖑᕗᖅ ᐃᒐᕕᐅᑉ ᓴᓇᔭᖏᓐᓂ "ᖃᖓᓕᒫᑦᑎᐊᖅ. ᐃᓛᓐᓂᒃᑯᑦ ᐱᓗᐊᒪᔮᖅᖢᓂ," ᐅᖃᖅᖢᓂ ᖁᖓᙳᐊᖅᑐᒥ ᐃᓕᓯᓪᓗᓂ ᑎᑎᕋᖅᑕᒥᓂᑦ.
"ᐱᐅᒋᓛᕆᓚᐅᖅᑕᕋ ᑲᐃᒃᒥ ᓴᓇᓚᐅᖅᓯᒪᔭᓐᓂ ᑲᑎᑎᑕᐅᔪᓄᑦ ᑲᐃᒃᒥ ᓄᓇᓕᖕᒥᐅᑕᐅᔪᒧᑦ ᓇᐅᔮᓂᑦ. ᐱᐅᒋᕐᔪᐊᓚᐅᖅᐸᕋ ᐋᖅᑭᖕᓂᖓᓂ. ᐃᓄᐃᑦ ᐱᐅᒃᓴᑦᑎᐊᖅᐳᑦ ᑲᐃᒃᓂ ᖃᓄᑐᐃᓐᓇᑦᑎᐊᖅ ᐋᖅᑭᒃᓱᕈᓐᓇᕋᑦᑎᒍᑦ ᓂᕆᔭᐅᔪᓐᓇᖅᑐᓂ ᐊᔾᔨᙳᐊᓕᖕᓂ ᐱᐅᒋᓛᒥᓂᓪᓘᓐᓃᑦ ᐱᙳᐊᖅᑎᐅᔪᓄᑦ ᑲᑎᙵᓂᐅᔪᓄᑦ, ᐊᓯᖏᓐᓂᓪᓗ."
ᐊᐱᕆᔭᐅᒐᒥ ᑐᓴᓲᖑᖕᒪᖔᑦ ᓂᐅᕕᖅᐸᒃᑐᓂ, ᓯᐅᓴᕐᓈᖅ ᑭᐅᓚᐅᖅᐳᖅ “ᐃᓄᐃᑦ ᐅᖃᐃᓐᓇᐅᔭᖅᐳᑦ ᐱᐅᒋᔭᐅᕐᔪᐊᕐᓂᖏᓐᓂ ᑲᐃᒃᓂ ᑕᖅᓯᖅᓱᖅᑕᓐᓂᑦ ᐊᒻᒪ ᐃᒐᔭᓐᓂᑦ. ᑖᔅᓱᒥᖓ ᖃᐅᔨᒪᓪᓗᓂ ᖁᕕᐊᓱᖕᓇᑦᑎᐊᖅᐳᖅ."
ᓚᐸᓛᖕᒃ ᐅᖃᓚᐅᖅᐳᖅ ᐃᓚᖏᑦ ᐃᓄᐃᑦ ᓂᐅᕕᑐᐃᓐᓇᓲᖑᕗᑦ ᐃᒐᕕᐅᑉ ᐸᓚᐅᒑᖏᓐᓂ, ᑭᓯᐊᓂ ᒥᑭᓐᓂᖅᓴᐅᖕᒪᑦ ᐆᑦᑎᓯᒪᕙᒌᖅᑐᒥ ᐸᓚᐅᒑᕐᒥ, ᐃᓄᒋᐊᖕᓂᖅᓴᐅᔪᑦ ᐃᓚᒌᑦ ᓂᕈᐊᓲᖑᕗᑦ ᐱᑕᖃᒐᔪᒃᑐᓂ ᐊᕕᒃᑐᖅᓯᒪᕙᒌᖅᑐᓂ ᐸᓚᐅᒑᓂᑦ ᖁᓕᕈᐊᓂᑦ.
"ᐃᓚᖏᑦ ᐃᓄᐃᑦ ᓂᐅᕕᑐᐃᓐᓇᓲᖑᕗᑦ ᐃᒐᕕᐅᑉ ᐸᓚᐅᒑᖏᓐᓂ ᒪᒪᑕᒍᑕᐅᓪᓗᑎᒃ," ᐅᖃᓚᐅᖅᐳᖅ.
"ᐃᓄᐃᑦ ᐱᐅᒃᓴᑦᑎᐊᖅᐳᑦ ᐃᒐᕕᖕᒥ, ᐱᓗᐊᖅᑐᒥ ᐸᓚᐅᒑᕋᓛᓂᑦ – ᑭᓇᓕᒫᒧᑦ ᒪᒪᕆᔭᐅᓛᖑᕗᑦ," ᐅᖃᓚᐅᖅᐳᖅ ᓯᐅᓴᕐᓈᖅ.
ᓚᐸᓛᖕᒃ ᐅᖃᓚᐅᖅᐳᖅ ᐃᒐᔨᐅᔪᒥ ᓇᐅᔮᕐᓄᐊᖅᑐᖃᓛᖅᐳᖅ ᐃᓕᓐᓂᐊᖅᑎᑦᑎᓂᕐᒧᑦ ᓯᐅᓴᕐᓈᕐᒥ ᖃᔅᓯᐊᕐᔪᖕᓄᑦ ᐱᓕᕆᓂᐅᔪᓄᑦ ᐊᒻᒪ ᐃᑲᔪᕈᑎᒃᓴᓄᑦ, ᐊᒻᒪᓗ ᐊᓯᖏᓐᓂ ᓄᑖᓂᑦ ᓴᓇᔭᕆᐊᓕᖕᓄᑦ ᐊᒻᒪ ᓰᕐᓇᖅᑐᓂᑦ.
ᐃᒐᕕᖓ, ᐃᓚᓕᐅᔾᔨᓯᒪᓪᓗᓂ ᐸᕐᓇᐅᑎᓂᑦ ᓄᑖᖑᔪᒥ ᓂᐅᕕᕐᕕᖕᒥ ᒪᑐᐃᓚᐅᖅᑐᒥ 2012-ᒥ, ᐊᑯᓂᐊᓗᖕᒥ ᐃᓱᒪᒋᔭᐅᓯᒪᔪᒥ ᐊᐅᓚᑦᑎᔨᐅᓚᐅᖅᑐᒧᑦ.
"ᔮᓪ ᑳᒪᓐ, ᐊᐅᓚᑦᑎᔨᐅᓚᐅᖅᑐᖅ ᐅᕙᓂ ᐊᕐᕌᒍᓄᑦ 17-ᓄᑦ, ᑐᕌᒐᒃᓴᕋᐃᓐᓇᓚᐅᖅᑕᖓᓂ ᐃᒐᕕᒃᑖᕐᓂᕐᒧᑦ. ᑕᐃᒪᐃᓕᖅᐳᖅ," ᓚᐸᓛᖕᒃ ᐅᖃᓚᐅᖅᐳᖅ. "ᖃᔅᓯᒐᓚᖕᓂ ᐃᖅᑲᓇᐃᔭᖅᑎᐅᔪᓄᑦ ᐃᓕᓐᓂᐊᖅᑎᑕᐅᓯᒪᔪᓂ ᐊᕐᕌᒍᒐᓴᓂ. ᐱᐅᓂᕐᔪᐊᖑᕗᖅ ᓄᓇᓕᖕᓄᑦ, ᐄᓪᓚᕆᒃ. ᐊᖏᕐᕋᒥ-ᐆᑦᑎᔭᐅᔪᕕᓂᕐᓂ ᐱᒐᔪᙱᑉᐳᑦ ᑭᓯᐊᓂ ᓇᖕᒥᓂᕐᓂ ᓂᕿᓕᐅᕐᕕᖕᓂᑦ. ᐊᒻᒪ ᑭᓇ ᐃᒐᐃᓐᓇᐅᔭᕈᒪᕙ?"