74 ᐳᓴᓐᑎᒥ ᓄᓇᕗᒻᒥᐅᓂ ᐅᑭᐅᓕᖕᓂ 16−ᓂ ᐊᒻᒪ ᐅᖓᑖᓄᑦ ᓇᓗᓇᐃᖅᓯᓚᐅᖅᐳᑦ ᓱᐴᖅᑐᖅᑎᐅᓂᖏᓐᓂ 2016−ᒥ.
ᕼᐊᓚᓐ ᑯᐊᕼᐊ ᐃᓚᒋᔭᐅᖃᑕᐅᓚᐅᙱᓚᖅ, ᑭᓯᐊᓂ ᐃᓚᐅᖃᑕᐅᕙᓚᐅᖅᐳᖅ.
ᑲᔪᖏᖅᓴᖅᑕᐅᕐᔪᐊᖅᖢᓂ ᐅᐃᖓᓂ ᐊᒻᒪ ᕿᑐᙵᒥᓂᑦ ᐊᒻᒪ ᐊᒥᓱᐃᖅᓱᖅᖢᓂ ᓄᖅᑲᕋᓱᐊᕐᓂᕐᒧᑦ −ᐊᑯᓂᐅᓂᖃᙱᑦᑐᒥ ᑕᖅᑭᒧᑦ ᐊᑯᓂᐅᑎᒋᔪᒥ ᐊᒃᓱᕉᓴᓗᐊᕐᓂᕐᒧᑦ – ᓴᒃᑯᓚᐅᖅᐸᖏᑦ ᓯᒡᒐᓕᐊᑦ ᑎᓯᐱᕆ 31, 2008−ᒥ. ᐱᒃᑲᓐᓂᓚᐅᖅᓯᒪᙱᓚᖅ ᑕᐃᒪᙵᓂ.
ᐊᑕᐅᓯᕐᒥ ᑲᑎᖃᑎᖃᕐᓂᐅᔪᒥ hypnotist−ᒥ ᐳᓚᕋᖅᑎᓪᓗᒍ ᐃᐊᑦᒪᓐᑕᓐᒧᑦ 1ᐱᔪᓐᓇᖅᑎᑦᑎᓚᐅᖅᐳᖅ, ᐅᖃᓚᐅᖅᐳᖅ.
"ᐊᑭᓖᓚᐅᖅᐳᖅ $200−ᒥ ᐊᒻᒪ ᑕᐃᒪᑐᐊᖅ," ᐅᖃᓚᐅᖅᐳᖅ ᑯᐊᕼᐊ.
ᐃᓚᒋᔭᒥᓂᑦ ᓄᖅᑲᑦᑎᐊᕈᓐᓇᓚᐅᕆᕗᖅ ᓱᐴᖅᑐᖃᑦᑕᕐᓂᕐᒥ ᐃᑲᔪᖅᑕᐅᓪᓗᓂ hypnotist−ᒧᑦ, ᐃᓚᒋᐊᖅᓯᓪᓗᓂ. Hypnosis ᐃᑲᔪᕐᓂᖃᓚᐅᙱᓚᖅ ᐱᖓᔪᖓᓐᓂ ᐃᓄᖕᒥ ᖃᐅᔨᒪᔭᒥᓂᑦ, ᑭᓯᐊᓂ ᒥᖅᑯᑎᕋᓛᓄᑦ ᑲᐳᖅᑕᐅᕙᒃᖢᓂ ᐃᑲᔪᕐᓂᖃᓚᐅᖅᐳᖅ ᑕᐃᔅᓱᒥᖓ ᐃᓄᖕᒥ ᓄᖅᑲᕐᓂᕐᒧᑦ.
ᑯᐊᕼᐊ ᓱᐴᖅᑐᖃᑦᑕᓕᓚᐅᖅᓯᒪᕗᖅ ᐅᑭᐅᖃᖅᖢᓂ 14−ᓂ.
"ᐃᓅᓱᒃᑐᑦᑎᐊᕙᐅᓚᐅᙱᓚᖓ," ᐃᒡᓚᓚᐅᖅᐳᖅ, ᐃᓚᒋᐊᖅᓯᓪᓗᓂ ᐃᒃᐱᒍᓱᒃᑎᑦᑎᕙᓚᐅᕐᓂᖓᓂ "ᐱᐅᔫᓂᖓᓂ" ᐱᖃᓐᓇᕆᔭᖏᑦ ᓱᐴᖅᑐᖅᐸᓚᐅᕐᒥᖕᒪᑕ.
"ᓱᖏᐅᑎᓚᐅᖅᐸᕋ ᐊᒻᒪ ᒪᒪᕆᓪᓗᒍ ᓱᐴᖅᑐᖅᖢᓂ, ᐱᓗᐊᖅᑐᒥ ᑏᑐᓚᐅᖅᑎᓪᓗᖓ ᑳᐱᑐᓚᐅᖅᖢᖓᓘᓐᓃᑦ," ᐃᖅᑲᐅᒪᕗᖅ.
ᐊᑕᐅᓯᕐᒥ ᐴᕐᒥ ᓯᒡᒐᓕᐊᖅᑐᖅᐸᓚᐅᖅᐳᖅ ᐅᓪᓗᑦ ᒪᕐᕉᖕᓂ ᐊᓂᒍᕌᖓᑦ.
ᒫᓐᓇ ᓱᖏᐅᑎᓯᒪᓂᖓ ᐊᑐᕈᓐᓃᕐᒪᒍ ᐊᕐᕌᖑ ᖁᓕᓂᑦ, ᐱᔪᒪᓂᐊᓗᖃᕈᓐᓃᖅᐳᖅ ᐊᒻᒪ ᖃᓂᒃᓴᖅᑐᕕᓂᐅᒍᓂ ᑭᓇᑐᐃᓐᓇᒥᒃ ᓱᐴᖅᑐᖅᑐᒥ, "ᑎᐱᖓ ᒪᒪᕆᙱᑕᕋ," ᐅᖃᓚᐅᖅᐳᖅ.
ᐃᓚᒋᐊᖅᓯᓚᐅᖅᐳᖅ ᐋᓐᓂᐊᒐᔪᙱᓐᓂᖅᓴᐅᓕᕐᓂᖓᓂ ᓯᒡᒐᓕᐊᖅᑐᖅᐸᖕᓇᓂ. ᐋᓐᓂᐊᖃᖅᑕᐃᓕᒪᓂᖓ ᐊᔭᐅᕈᑎᕐᔪᐊᖑᖃᑕᐅᓚᐅᖅᐳᖅ ᓱᕋᒃᓯᓂᕐᒧᑦ ᐅᐃᕆᓯᒪᓂᖓᓄᑦ.
"ᕿᑐᙵᒃᑲ ᑲᑎᑎᑕᐅᑎᓪᓗᒋᑦ ᑕᑯᔪᒪᕙᒃᑲ ᐃᕐᙳᑕᒃᑲᓘᓐᓃᑦ ᑲᑎᑎᑕᐅᑎᓪᓗᒋᑦ," ᐅᖃᓚᐅᖅᐳᖅ. "ᐊᑕᐅᓯᐅᔪᖅ ᐱᒻᒪᕆᐅᓛᖑᔪᓂ ᐱᔾᔪᑎᓐᓂᑦ ᓄᖅᑲᓚᐅᕐᓂᓐᓂ ᖃᓂᒪᔪᒪᙱᓐᓇᒪ ᑳᓐᓱᒧᑦ ᒪᒃᑯᒃᑑᑎᓪᓗᖓ ᓱᓕ."
ᓱᐴᖅᑐᕐᓂᖅ ᑐᕌᖓᓂᖃᖅᑑᓪᓗᓂ ᐱᔾᔪᑕᐅᓲᖑᕗᖅ ᐳᕙᖕᒥ ᑳᓐᓱᑖᕐᓂᕐᒧᑦ ᐅᓄᕐᓂᖏᓐᓂ ᐃᓄᖕᓄᑦ ᐊᒻᒪ ᖁᑦᑎᓛᖑᕗᑦ ᓇᓕᐊᑐᐃᓐᓇᓂ ᓄᓇᖃᕐᓂᐅᔪᓄᑦ ᓄᓇᕐᔪᐊᓕᒫᒥ, ᐅᖃᐅᓯᐅᓪᓗᓂ ᓇᐃᓴᐃᔨᐅᔪᓄᑦ ᑲᓇᑕᒥ.
ᐊᑕᐅᓯᖅ ᑕᓪᓕᒪᓄᑦ ᑐᖁᓂᐅᔪᑦ ᓄᓇᕗᒻᒥ ᐱᔾᔪᑎᖃᖅᐳᖅ ᓱᐴᖅᑐᖃᑦᑕᕐᓂᕐᒧᑦ, ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐅᖃᓚᐅᖅᐳᑦ.
ᐅᓄᕐᓂᖅᓴᐅᔪᓂ 59 ᒥᓕᐊᓐᓂ ᓯᒡᒐᓕᐊᓂ ᓂᐅᕕᖅᑕᐅᓚᐅᖅᐳᖅ ᓄᓇᕗᒻᒥᐅᓄᑦ ᕿᑎᐊᓂ ᐊᐃᑉᕆᓕ 1, 2017−ᒥ ᐊᒻᒪ ᒫᔾᔨ 31, 2018−ᒧᑦ, ᑕᕝᕚᑭᒧᑦ ᐊᐅᓚᑕᐅᓂᖓᓄᑦ ᒪᓕᒐᖅ ᐊᕐᕌᒍᑕᒫᒥ ᐅᓂᒃᑳᓕᐊᖅ ᓴᖅᑭᑎᑦᑎᓯᒪᕗᖅ. ᑕᒪᓐᓇ ᓇᓗᓇᐃᖅᓯᓚᐅᖅᐳᖅ ᒥᑭᑦᑐᒻᒪᕆᑯᓗᖕᒥ ᐊᖏᒡᓕᒋᐊᕐᓂᐅᔪᒥ ᓯᕗᓂᐊᓂ ᐊᕐᕌᒎᓚᐅᖅᑐᒥ. ᑭᓯᐊᓂ, ᓂᐅᕕᕐᓂᐅᔪᑦ ᑕᕝᕚᑭᑐᐃᓐᓇᕐᓄᑦ ᐃᒧᔭᕆᐊᓕᖕᓄᑦ, ᑕᒧᐊᔭᐅᓲᓄᑦ ᐊᒻᒪ ᐊᓯᖏᓐᓂ ᓱᐴᖅᑐᖅᑕᐅᕙᙱᑦᑐᓂ ᑕᕝᕚᑭᒧᑦ ᓴᓇᓯᒪᔪᓄᑦ ᑲᑕᒃᐹᓪᓕᓚᐅᖅᐳᑦ 37.4 ᐳᓴᓐᑎᒧᑦ.
ᖄᒃᑲᓐᓂᐊᒍᑦ ᐳᕙᖕᒧᑦ ᑳᓐᓱᒧᑦ, ᓱᐴᖅᑐᕐᓂᖅ ᑐᕌᕐᓂᖃᓲᖑᕗᖅ ᐳᕝᕕᕆᓂᕐᒧᑦ, ᒪᒥᔪᐃᑦᑐᕐᒥ ᐳᕙᖕᒥ ᐋᓐᓂᐊᕐᓇᒥᑦ ᐊᒻᒪ ᐱᕚᓪᓕᕈᑕᐅᓲᖑᕗᖅ ᐊᓂᕐᓂᑭᓐᓇᕐᒧᑦ ᐊᒻᒪ ᐳᕙᒡᓗᖕᓂᕐᒧᑦ.
ᐃᑲᔪᕐᓂᕐᒧᑦ ᓄᓇᕗᒻᒥᐅᓂ ᓄᖅᑲᕐᓂᕐᒧᑦ ᓯᒡᒐᓕᐊᓂᑦ, ᓄᓇᕗᒻᒥ ᒐᕙᒪᒃᑯᑦ ᑮᓇᐅᔭᖃᖅᑎᑦᑎᓲᖑᕗᖅ ᓄᓇᕗᒻᒥ ᓄᖅᑲᕐᓂᕐᒧᑦ ᐅᖃᓗᒡᕕᐅᔪᒥ, ᖃᖓᑐᐃᓐᓇᑦᑎᐊᒃᑯᑦ ᐅᖃᓗᒡᕕᒃᓴᐅᔪᖅ ᐅᕗᖓ 1-866-368-7848−ᒧᑦ. ᓄᓇᓕᖕᓂ ᐄᔭᒐᖅᑖᕐᕖᑦ ᐊᒻᒪ ᐋᓐᓂᐊᕖᑦ ᐊᑐᐃᓐᓇᖃᓲᖑᒋᕗᑦ ᓄᖅᑲᕈᑎᒃᓴᓂᒃ ᓲᕐᓗ ᐅᐃᕆᓐᓇᖅᑐᒧᑦ ᓂᐱᑎᒐᕐᓂ, ᓂᐅᕈᑕᐅᓲᓂ, ᑕᒧᐊᔭᒐᕐᓄᑦ ᐊᒻᒪ ᐃᓅᓕᓴᐅᑎᓂᑦ ᐃᑲᔪᖅᓱᐃᓂᕐᒧᑦ ᑕᐃᒃᑯᓄᖓ ᓄᖅᑲᕋᓱᐊᖅᑐᓄᑦ ᓱᐴᖅᑐᕐᓂᕐᒧᑦ.