Skip to content

ᓄᓇᕗᒻᒥ ᒐᕙᒪᒃᑯᑦ ᐊᖏᒡᓕᒋᐊᖅᑎᑦᑎᓂᐊᖅᐳᑦ ᐊᔪᙱᓐᓂᐅᔪᓄᑦ ᐱᓕᕆᐊᖑᔪᓄᑦ ᐃᓕᓴᐃᓂᐅᔪᒥ

ᑲᓂ ᐃᓄᐊᕋᖅ ᐊᒃᓱᕉᓴᓚᐅᖅᐳᖅ ᖃᔅᓰᖅᓱᒐᓚᒃᖢᓂ ᖄᖏᖅᓯᓇᓱᐊᕐᓂᕐᒧᑦ ᐱᔭᕆᐊᓕᖕᒥ ᖃᐅᔨᓴᕈᑕᐅᔪᒥ ᐊᔪᙱᓐᓂᐅᔪᓄᑦ ᐱᓕᕆᔨᙳᕐᓂᕐᒧᑦ, ᑭᓯᐊᓂ ᐃᒻᒥᓂᒃ ᓴᐱᓕᖅᑎᑦᑕᐃᓕᒪᓚᐅᖅᐳᖅ.

ᑲᖏᖅᖢᒑᐱᒃᖕᒥᐅᑕᖅ ᑲᓂ ᐃᓄᐊᕋᖅ ᖄᖏᖅᓯᓯᒪᕗᖅ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖓᓂ ᓯᕗᓂᐊᓂ-ᐊᔪᙱᓐᓂᐅᔪᓄᑦ ᐱᓕᕆᐊᖑᔪᓄᑦ ᐱᓕᕆᐊᖑᔪᒥ ᓱᓪᓗᓕᕆᓂᕐᒧᑦ. ᐱᓕᕇᓐᓇᓚᐅᖅᐸᖓ ᐊᔪᙱᓐᓂᐅᔪᓄᑦ ᐱᓕᕆᐊᖑᔪᓄᑦ ᐃᓯᕐᓂᖓᓄᑦ ᖃᐅᔨᓴᕈᑎᖓᓂ ᑭᓯᐊᓂ ᐊᓂᒎᑎᔪᓐᓇᖅᓯᑕᐃᓐᓇᕐᒪᒍ. ᓅᓕᓚᐅᖅᐳᖅ ᑲᖏᖅᖠᓂᕐᒧᑦ ᐃᓕᓐᓂᐊᕆᐊᕐᓂᕐᒧᑦ ᓯᓚᑦᑐᖅᓴᕐᕕᖕᒧᑦ ᐊᒻᒪᓗ ᐱᐅᓯᒋᐊᖅᑎᑦᑎᓂᕐᒧᑦ ᐱᕈᖅᓴᐃᔪᓐᓇᕐᓂᐊᕐᓂᖓᓂ ᐃᓕᓐᓂᐊᓯᓐᓈᕐᓗᓂ ᐃᖅᑲᓇᐃᔭᕐᓗᓂ ᐃᑲᕐᕋᖏᓐᓂ.

"ᐊᑯᓂᐅᔪᒥᒃ ᐱᕕᒃᓴᖃᑦᑎᐊᙱᓐᓂᐅᔪᓂ ᐊᒻᒪ ᐃᑲᔪᖅᑕᐅᙱᓗᐊᕐᓂᖓᓂ, ᖄᖏᕈᓐᓇᓚᐅᙱᓚᕋ ᑕᐃᓐᓇ ᐊᔪᙱᓐᓂᐅᔪᓄᑦ ᐱᓕᕆᐊᖑᔪᓄᑦ ᐃᓯᕈᑕᐅᔪᒥᒃ ᖃᐅᔨᓴᕐᓂᐅᔪᒥ," ᐃᓄᐊᕋᖅ ᐃᖅᑲᐃᓚᐅᖅᐳᖅ.

ᐹᖅᓯᑕᐃᓐᓇᓚᐅᖅᐳᖅ ᐱᓕᕆᓕᒪᔪᒥᒃ ᐊᔪᙱᓐᓂᐅᔪᓄᑦ ᐱᓕᕆᔨᐅᔪᒥᒃ ᑐᓂᓯᓚᐅᖅᑐᒥᒃ ᐊᔪᕆᖅᓱᐃᓂᐅᔪᒥᒃ ᐊᒻᒪ ᐃᑲᔪᓚᐅᖅᑐᒥᒃ ᖄᖏᐅᑎᓂᖓᓂ ᐃᓕᓐᓂᐊᕐᓂᕐᒧᑦ ᐊᒡᕕᐊᕈᑕᐅᔪᒥᒃ ᑲᔪᓯᔾᔪᑎᒋᔪᓐᓇᓚᐅᙱᑕᒥᓂᑦ.

ᐊᓈᓇᓂ ᐊᒻᒪ ᐊᑖᑕᑦᑎᐊᒥᓂᒃ ᐊᓈᓇᑦᑎᐊᒥᓂᒃ ᐃᑲᔪᕈᒪᒐᓗᐊᖅᖢᓂᒋᑦ ᐸᖅᑭᓂᖓᓐᓄᑦ ᐊᖏᕐᕋᖏᓐᓂ, ᐃᓄᐊᕋᖅ ᐸᕐᓇᓚᐅᖅᐳᖅ ᐊᒻᒪ ᕿᒪᒃᖢᓂᐅᒃ ᐊᖏᕐᕋᖓᓂ ᓄᓇᓕᖓᓐᓂ ᑲᖏᖅᖢᒑᐱᖕᒥ ᐊᕐᕌᓂ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕆᐊᕐᓂᕐᒧᑦ ᑲᖏᖅᖠᓂᕐᒥ. ᐱᔭᕇᓚᐅᖅᑎᓪᓗᒍ ᑕᖅᑭᓂᒃ 8-ᓂᒃ ᓯᕗᓂᐊᓂ-ᐊᔪᙱᓐᓂᐅᔪᓄᑦ ᐱᓕᕆᐊᖑᔪᓄᑦ ᐊᐃᑉᕆᓕᒥ, ᐅᓪᓘᑉ ᐃᓚᖓᓐᓂ ᐃᓕᓐᓂᐊᓯᓐᓈᕐᓗᓂ ᐃᖅᑲᓇᐃᔭᓕᓚᐅᖅᐳᖅ ᑲᖏᖅᖠᓂᕐᒥ ᐃᒡᓗᓕᕆᔨᒃᑯᑦ ᑲᑐᔾᔨᖃᑎᒌᖑᔪᓄᑦ.

ᐃᓄᐊᕋᖅ, 30, ᐃᓄᑑᙱᓚᖅ ᐊᒃᓱᕉᓴᖕᓂᖓᓂ ᓴᖅᑭᑎᑕᐅᓯᒪᔪᒥ ᐊᔪᙱᓐᓂᐅᔪᓄᑦ ᐱᓕᕆᐊᖑᔪᓄᑦ ᐃᓯᕈᑕᐅᔪᒥᕐ ᖃᐅᔨᓴᕈᑕᐅᔪᒥᒃ. ᑎᓴᒪᓄᑦ ᖄᖏᖅᓯᒪᓕᖅᑐᓄᑦ ᐊᕐᕌᒍᓄᑦ ᑕᓪᓕᒪᓄᑦ, ᐅᓄᕐᓂᖅᓴᐅᔪᓂ ᓄᓇᕗᒻᒥᐅᓂ ᖄᖏᖅᓯᓯᒪᙱᓚᑦ ᖃᐅᔨᓴᕈᑕᐅᔪᒥᒃ ᖄᖏᖅᓯᓯᒪᔪᓄᑦ. ᐊᑲᐅᙱᓕᐅᕈᑕᐅᕗᖅ ᐱᑎᑦᑎᓯᒪᔪᒥ ᐃᓚᒌᓄᑦ ᐱᔨᑦᑎᕋᕐᓂᕐᒧᑦ, ᑲᒪᒋᔭᖃᖅᑐᒥ ᖃᐅᔨᓴᐃᓂᐅᔪᒥ, ᐸᕐᓇᐅᑎᓕᐅᕐᓂᖏᓐᓄᑦ ᐊᖏᒡᓕᒋᐊᖅᑎᑦᑎᓂᕐᒥ ᐃᓕᓴᐃᓂᕐᓄᑦ ᐱᔨᑦᑎᕋᕐᓂᐅᔪᒥ.

ᐊᔪᙱᓐᓂᐅᔪᓄᑦ ᐱᓕᕆᐊᖑᔪᓄᑦ ᐃᓯᕈᑎᖓᓄᑦ ᖃᐅᔨᓴᐃᓂᕐᒧᑦ ᐃᓕᓴᐃᔨᒥᒃ ᐃᖅᑲᓇᐃᔮᖃᖅᑎᑦᑎᓕᓚᐅᖅᐳᑦ ᓯᕗᓪᓕᖅᐹᒥᒃ ᖃᐅᔨᓴᕈᑕᐅᓪᓗᓂ ᐱᓕᕆᐊᒃᓴᐅᔪᒥ ᖃᓪᓗᓈᑦ ᓄᓇᖓᓐᓂ-ᑐᙵᕕᓕᖕᒥ ᕗᕌᓐᑎᐅᕐ ᓯᓚᑦᑐᖅᓴᕐᕕᖓᓂ 2017-18-ᒥ. ᑕᐃᓐᓇ ᐃᓄᒃ ᑐᓂᓯᓚᐅᖅᐳᖅ ᐃᓕᓴᐃᓂᐅᔪᒥ ᐊᔾᔨᒌᙱᕈᓘᔭᖅᑐᓄᑦ ᐃᓕᓐᓂᐊᕐᓂᐅᔪᓄᑦ ᐅᓐᓄᒃᑯᑦ ᐊᒻᒪ ᐱᓇᓱᐊᕈᓯᐅᑉ ᓄᙳᐊᓂ, ᐃᓕᓐᓂᐊᖅᑏᑦ ᐱᔭᕆᐊᖃᖅᑐᓂ ᐃᖅᑲᓇᐃᔭᕐᓇᐅᑉ ᐅᖓᑖᓂ ᐃᑲᕐᕋᖏᓐᓂ.

ᖄᖏᖅᓯᒪᓂᓕᖅᑐᒥ ᐊᕐᕌᒍᓄᑦ ᒪᕐᕉᖕᓄᑦ, 43 ᐃᓕᓐᓂᐊᖅᑏᑦ ᑐᒃᓯᕋᓚᐅᖅᐳᑦ ᐃᓕᓐᓂᐊᖅᑎᑕᐅᓂᖏᓐᓂ. 28-ᖑᔪᑦ ᐃᒃᓯᖕᓇᐃᓚᐅᖅᐳᑦ ᐱᓇᓱᐊᕐᓂᖏᓐᓂ ᐊᔪᙱᓐᓂᐅᔪᓄᑦ ᐱᓕᕆᔨᐅᓂᕐᓄᑦ. ᖃᔅᓯᒐᓚᐃᑦ ᓱᓕ ᐃᓕᓐᓂᐊᖅᑎᑕᐅᕙᓪᓕᐊᕗᑦ. 9-ᖑᔪᑦ ᑎᑎᕋᐃᓚᐅᖅᐳᑦ ᓯᕗᓂᐊᓂ-ᐊᔪᙱᓐᓂᐅᔪᓄᑦ ᐱᓕᕆᐊᖑᔪᓄᑦ ᖃᐅᔨᓴᖅᑕᐅᓂᖓᓂ. ᒪᕐᕉᒃ ᖄᖏᖅᓯᓚᐅᖅᐳᑦ. ᐱᖓᓱᑦ 7-ᖑᔪᓂ ᖄᖏᖅᓯᓚᐅᙱᑦᑐᓂ ᑎᑎᕋᖅᓯᒪᓚᐅᖅᐳᑦ ᖃᐅᔨᓴᖅᑕᐅᓂᖓᓂ ᓯᕗᓂᐊᓂ ᐊᒻᒪ ᐱᐅᓯᒋᐊᓚᐅᖅᐳᑦ ᖃᐅᔨᓴᖅᑕᐅᓂᖏᓐᓄᑦ ᓇᓗᓇᐃᒃᑯᑕᖏᓐᓂ.

ᐃᓚᖏᑦ ᐃᓕᓐᓂᐊᖅᑏᑦ ᐱᔪᒪᓚᐅᖅᑐᓂ ᐃᓕᓴᐃᔨᒥᒃ "ᐊᖏᔪᒻᒪᕆᐊᓗᖕᒥ ᐃᖏᕐᕋᓂᖃᖅᓯᒪᕗᑦ," ᐅᖃᓚᐅᖅᐳᖅ ᕌᐳᑦ ᑭᓕᕝᑦ, ᑐᑭᒧᐊᒃᑎᑦᑎᔨ ᐃᖅᑲᓇᐃᔮᕆᔪᒪᔭᐅᔪᓄᑦ ᐱᕙᓪᓕᐊᑎᑦᑎᔨ ᐃᓚᒌᓄᑦ ᐱᔨᑦᑎᕋᕐᓂᕐᒧᑦ.

"ᓱᓕ ᐱᐅᔪᒻᒪᕆᐅᙱᓚᖅ ᐊᒥᓱᐃᑦ ᐃᓕᓐᓂᐊᖅᑏᑦ ᐱᒋᐊᕐᒪᑕ ᐃᓚᑰᓂᖃᕐᓂᐅᒐᓚᒃᑐᒥ ᖃᐅᔨᓴᕐᓂᕐᒧᑦ ᐊᒻᒪ ᓇᐃᓴᐅᓯᕆᓂᕐᒧᑦ ᐃᓕᓐᓂᐊᕐᓂᖓᓂ," ᑭᓕᕝᑦ ᐅᖃᓚᐅᖅᐳᖅ.

ᐃᓕᓴᐃᓂᐅᔪᒥ ᐊᖏᒡᓕᒋᐊᖅᑕᐅᓂᖓᓂ, ᐃᖅᑲᓇᐃᔭᕐᓇᐅᑉ ᐅᖓᑖᓂ ᐃᑲᕐᕋᓄᑦ ᐃᓕᓴᐃᔨᒥᒃ ᐃᓂᒋᔭᒦᓐᓂᐊᖅᐳᖅ ᑲᖏᖅᖠᓂᕐᒥ ᑕᒪᑐᒪᓂ ᐅᑭᐊᒃᓵᖑᓂᐊᖅᑐᒥ. ᐊᓯᖓᓐᓂ ᐃᓕᓴᐃᔨᐅᔪᒥᒃ ᑕᖅᑭᓄᑦ-ᑎᓴᒪᓄᑦ ᐱᓕᕆᓂᖃᕐᓂᐊᖅᐳᖅ ᑭᙵᕐᓂ ᓯᕗᓂᐊᓂ ᓄᑖᒥᒃ ᐊᕐᕌᒎᓂᐊᖅᑐᒥ ᐊᒻᒪ ᒪᓕᒃᑕᐅᓂᐊᖅᐳᖅ ᑕᖅᑭᓄᑦ-ᑎᓴᒪᓄᑦ ᐱᓕᕆᓂᐅᔪᒥᒃ ᐃᖃᓗᒃᑑᑦᑎᐊᒥᒃ 2020 ᐱᒋᐊᕐᓂᖓᓂ. ᐅᖃᓪᓚᖕᓂᖃᕆᕗᖅ ᐃᓕᓴᐃᔨᒥᒃ ᐊᑐᐃᓐᓇᐅᑎᑕᐅᓂᖓᓂ ᐊᕐᕕᐊᓂᑦ, ᑭᓕᕝᑦ ᐃᓚᒋᐊᖅᓯᓚᐅᖅᐳᖅ.

ᓄᓇᕗᑦ ᑐᙵᕕᖃᖅᑎᑦᑎᕗᖅ ᐊᔪᙱᓐᓂᐅᔪᓄᑦ ᐱᓕᕆᐊᖑᔪᓄᑦ ᐃᓯᕈᓐᓇᐅᑎᖓᓂ ᖃᐅᔨᓴᕈᑎᖓᓐᓂ ᐋᓪᐴᑕᒥᒃ ᐊᑐᖅᑕᐅᕙᒃᑐᒥ. ᐱᓕᕆᙱᓐᓂᕐᒥ ᖃᐅᔨᓴᖅᑕᐅᓂᖓᓂ ᓂᕈᐊᒐᒃᓴᐅᙱᓚᖅ, ᐅᖃᐅᓯᐅᓪᓗᓂ ᑭᓕᕝᑦᒧᑦ.

ᐱᓕᕆᕝᕕᒃ ᕿᑎᐊᓃᑉᐳᖅ ᐋᖅᑭᒃᓱᐃᒃᑲᓐᓂᕐᓂᕐᒧᑦ ᐊᔪᙱᓐᓂᐅᔪᓄᑦ ᐱᓕᕆᐊᖑᔪᓄᑦ ᐱᓕᒻᒪᒃᓴᕐᓂᖓᓂ ᐊᑐᐃᓐᓇᖃᖅᑎᑦᑎᓂᕐᒧᑦ ᐅᓄᕐᓂᖅᓴᓂ ᐃᓕᓐᓂᐊᕐᓂᕐᒧᑦ ᐃᑲᔪᖅᓱᐃᓂᐅᔪᓂ ᓯᕗᓂᐊᓂ, ᐱᓗᐊᖅᑐᒥ ᓇᐃᓴᐅᓯᕆᓂᕐᒧᑦ ᐊᒻᒪ ᖃᐅᔨᓴᕐᓂᕐᒧᑦ. ᐊᑦᑕᓇᔾᔭᐃᖅᓯᒪᓂᕐᒧᑦ, ᖃᕋᓴᐅᔭᑎᒍᑦ ᐱᓕᒻᒪᒃᓴᕐᓂᐅᔪᒥ ᐊᒻᒪ ᐃᓄᒃᑎᑐᑦ ᐃᓕᓐᓂᐊᕐᓂᐅᔪᓂ ᐃᓚᓕᐅᔾᔭᐅᓂᐊᕆᕗᖅᑕᐅᖅ, ᑭᓕᕝᑦ ᐅᖃᓚᐅᖅᐳᖅ.

ᐃᓄᐊᕋᖅ ᖃᐅᔨᒐᒥ ᒫᓐᓇᓕᓴᒥ ᐃᓚᒌᓄᑦ ᐱᔨᑦᑎᕋᕐᓂᒃᑯᑦ ᐊᖏᒡᓕᒋᐊᖅᓯᓛᕐᓂᖏᓐᓂ ᐅᓄᕐᓂᖅᓴᓄᑦ ᓄᓇᓕᐅᔪᓄᑦ, ᖁᕕᐊᕐᔪᐊᓚᐅᖅᐳᖅ.

"ᖄᓕᖅᑭᓐᓇᒻᒪᕆᒃᑕᕋ ᑐᓴᑐᐃᓐᓇᖅᖢᒍ," ᐅᖃᓚᐅᖅᐳᖅ. "ᑐᓴᒐᒃᓴᑦᑎᐊᕙᒻᒪᕆᐊᓗᒃ! ᐃᑲᔪᖅᑕᐅᒃᑲᓐᓂᕐᓂᐊᖅᐳᒍᑦ. ᑲᒪᓇᑦᑎᐊᖅᑐᖅ."

ᒪᒃᑯᒃᑑᑎᓪᓗᒍ, ᐃᓄᐊᕋᖅ ᐃᓱᒪᒋᔭᖃᑐᐃᓐᓇᓚᐅᖅᐳᖅ ᐱᙳᐊᕐᓂᕐᒧᑦ. ᐃᖅᑲᓇᐃᔮᒥᒃ ᓇᓂᔪᓐᓇᑐᐃᓐᓇᓚᐅᖅᑕᒥᓂᒃ ᑭᒡᓕᖃᖅᑐᒥ ᐃᓕᓐᓂᐊᖅᓯᒪᓂᖓᓂ ᓂᐅᕕᕐᕕᖕᓂᑦ. ᓯᕗᓪᓕᕐᒥ ᐅᐊᔭᓕᕆᔨᙳᕈᒪᓚᐅᖅᐳᖅ ᑭᓯᐊᓂ ᐱᐅᓂᖅᓴᒥᒃ ᐊᖅᑯᑎᒥᒃ ᑕᑯᓚᐅᖅᐳᖅ ᓱᓪᓗᓕᕆᓂᕐᒧᑦ. ᐃᒫᒃ, ᐅᖃᓚᐅᖅᐳᖅ, ᐃᒪᕐᒥ ᑯᑐᖕᓂᐅᔪᑦ "ᓱᕋᑦᑎᕆᓂᖅᐹᖑᓂᐅᕗᖅ," ᑐᕌᖅᑎᑦᑎᔪᒥᒃ ᐅᖁᖕᒧᑦ ᐊᑲᐅᙱᓕᐅᕈᑕᐅᔪᓄᑦ ᐊᖏᕐᕋᕆᔭᐅᔪᓄᑦ ᐊᒻᒪ ᑎᑎᕋᕐᕕᖕᓄᑦ.

"ᐱᒻᒪᕆᐅᓂᖓᓂ ᐃᓱᒪᒋᔭᐅᙱᓐᓂᖅᐹᖑᖃᑕᐅᕗᖅ ᐊᔪᙱᓐᓂᐅᔪᓄᑦ ᐱᓕᕆᐊᖑᔪᓄᑦ," ᐅᖃᓚᐅᖅᐳᖅ ᐃᓄᐊᕋᖅ. "ᕿᓱᕈᓘᔭᖃᐅᖅᑐᐊᓗᒃ. ᑕᐅᕗᖓ ᑕᐅᕗᖓ ᐅᖃᓪᓚᒍᓐᓇᖅᐳᖓ: ᓴᓇᕐᕈᑎᑦ, ᖃᓄᖅ ᑭᒃᑯᓕᒫᓂᒃ ᐊᑦᑕᓇᔾᔭᐃᖅᓯᒪᑎᑦᑎᓂᕐᒧᑦ, ᖃᓄᖅ ᑭᓱᑐᐃᓐᓇᐃᑦ ᓱᓪᓗᑯᑖᒃᑰᓱᖑᓂᖏᓐᓂ. ᖃᐅᔨᔪᒥᓈᓗᒃ. ᐊᒥᓱᐊᓗᖕᓂ ᐃᓕᑦᑎᔭᒃᓴᓕᒃ. ᓱᓕ ᐃᓕᑦᑎᕙᓪᓕᐊᕗᖓ ᖃᐅᑕᒫᑦᑎᐊᖅ, ᐃᖏᕐᕋᐃᓐᓇᕐᓂᐊᖅᑐᒥ ᖃᔅᓯᒐᓚᖕᓄᑦ ᐊᕐᕌᒍᓄᑦ... ᐊᓕᐊᓇᐃᒋᕐᔪᐊᖅᑕᕋ."