Skip to content

ᓄᓇᕗᒻᒥ ᑐᙵᕕᒃᑯᓐᓂ ᓯᓚᕐᔪᐊᓕᒫᓄᑦ: ᓄᓇᕗᒻᒥ ᐃᓕᓐᓂᐊᕐᓂᕆᔭᖓ ᐱᕋᔭᖕᓂᐅᕗᖅ ᐃᓄᖕᓄᑦ

ᓄᓇᕗᒻᒥ ᐃᓕᓐᓂᐊᕐᓂᓕᕆᓂᕐᒧᑦ ᐱᓕᕆᔾᔪᓯᖓ ᓱᕋᐃᓂᖃᖅᐳᖅ ᐊᖏᕐᕋᕆᔭᐅᔪᓄᑦ ᐊᒻᒪ ᓄᓇᕐᒧᐊᒥ ᒪᓕᒐᐅᔪᓄᑦ, ᐅᖃᐅᓯᐅᓪᓗᓂ ᓄᑖᖑᔪᒥ ᖃᐅᔨᓴᕐᓂᕐᒧᑦ ᐅᓂᒃᑳᓕᐊᖑᔪᒥ ᑎᓕᐅᕈᑕᐅᓯᒪᔪᒧᑦ ᓄᓇᕗᒻᒥ ᑐᙵᕕᒃᑯᓐᓄ( ᐊᒻᒪ ᓴᖅᑭᑎᑕᐅᓪᓗᓂ 18-ᖓᓂ ᑲᑎᒪᓂᕐᔪᐊᕆᔭᐅᔪᒥ ᓯᓚᕐᔪᐊᓕᒫᓄᑦ ᐃᓕᓯᒪᐃᓐᓇᕐᓂᐊᖅᑐᓄᑦ ᑲᑎᒪᓂᐅᔪᒧᑦ ᓄᓇᖃᖅᑳᖅᓯᒪᔪᓄᑦ ᐊᑲᐅᙱᓕᐅᕈᑕᐅᔪᓂᑦ ᓂᐅ ᔪᐊᒃ ᓄᓇᓕᖅᐸᐅᔭᖓᓂ ᐊᐃᑉᕆᓕ 22-ᒥ.

ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ, ᒫᕐᕈᖓᓂ ᑕᓕᖅᐱᖕᒥ, ᓴᖅᑭᑎᑦᑎᕗᖅ ᓄᑖᖑᔪᒥ ᖃᐅᔨᓴᕐᓂᕐᒧᑦ ᐅᓂᒃᑳᓕᐊᒥ, "ᓄᓇᕗᒻᒥ ᐃᓕᓐᓂᐊᕐᓂᖓ ᐱᕋᔭᖕᓂᒃᑯᑦ ᓈᒻᒪᙱᓚᖅ? ᖃᐅᔨᓴᐃᓂᐅᔪᒥ ᒫᓐᓇᐅᔪᓄᑦ ᐊᑐᐊᒐᓄᑦ ᐃᓄᒃᑐᒻᒧᑦ ᐊᒻᒪ ᖃᓪᓗᓈᑎᑐᑦ ᐃᓕᓐᓂᐊᕐᓂᐅᔪᒥ, ᓄᓇᕐᔪᐊᒥ ᐊᒻᒪ ᑲᓇᑕᒥ ᒪᓕᒐᐅᔪᖅ, ᐅᖃᐅᓯᕐᒥ ᖃᐅᔨᓴᕐᓂᐅᔪᒥ ᐊᒻᒪ ᐃᓕᖅᑯᓯᒧᑦ ᑐᖁᕋᐃᓂᐅᔪᓂ ᐊᒻᒪ ᐱᕋᔭᖕᓂᐅᔪᓄᑦ ᐃᓅᖃᑎᒌᖑᔪᓄᑦ", 18-ᖓᓂ ᑲᑎᒪᕕᒡᔪᐊᕐᓂᐅᔪᒥ ᓯᓚᕐᔪᐊᓕᒫᓄᑦ ᐃᓕᓯᒪᐃᓐᓇᕐᓂᐊᖅᑐᓄᑦ ᑲᑎᒪᓂᐅᔪᒧᑦ ᓄᓇᖃᖅᑳᖅᓯᒪᔪᓄᑦ ᐊᑲᐅᙱᓕᐅᕈᑕᐅᔪᓂᑦ ᓂᐅ ᔪᐊᒃ ᓄᓇᓕᖅᐸᐅᔭᖓᓂ ᐊᐃᑉᕆᓕ 22-ᒥ.

"ᐃᓕᓐᓂᐊᕐᓂᓕᕆᓂᖅ ᓄᓇᕗᒻᒥ ᐱᓕᕆᓕᒪᓂᖃᖅᐳᖅ ᐃᓕᖅᑯᓯᒧᑦ ᑐᖁᕋᐃᓂᐅᔪᓂ, ᐅᖃᐅᓯᕐᒥ ᖃᐅᔨᓴᕐᓂᐅᔪᒥ ᑐᖁᕋᐃᓂᐅᔪᒥ, ᑮᓇᐅᔾᔭᒃᓴᓂᕐᒧᑦ ᑐᖁᕋᐃᓂᐅᔪᒥ ᐊᒻᒪ ᐊᑐᖅᑕᐅᕙᓚᐅᖅᑐᓂ ᑐᖁᕋᐃᓂᐅᔪᓂᑦ, ᐊᒻᒪ ᑕᐃᒪᐃᓕᐅᖏᓐᓇᖅᐳᖅ ᐅᓪᓗᒥᒧᑦ," ᐅᖃᓚᐅᖅᐳᖅ ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᑐᓴᒐᒃᓴᓕᐊᖑᓂᐅᔪᒥ.

"ᐃᓄᐃᑦ ᓱᕈᓰᑦ ᐱᕙᒃᐳᑦ ᑕᒪᕐᒥᒐᓚᑦ ᐃᓕᓐᓂᐊᕐᓂᖏᓐᓂ ᓴᙱᓂᖅᓴᐅᔪᒥ ᐅᖃᐅᓯᐅᔪᒥ ᐅᖃᐅᓯᓪᓚᕆᒥᓂᐅᖔᖏᑦᑐᒥᑦ. ᑕᒪᓐᓇ ᐱᑎᑦᑎᕗᖅ ᐃᓕᖅᑯᓯᒧᑦ ᑐᖁᕋᐃᓂᐅᔪᒥ."

ᓄᓇᕗᒻᒥ, ᐃᓄᐃᑦ ᓱᕈᓰᑦ ᐱᔪᓐᓇᕐᓂᖃᖅᐳᑦ ᐃᓕᓐᓂᐊᕐᓂᐅᔪᒥ ᐃᓄᒃᑐᑦ.

83-ᓂ ᒪᒃᐱᖅᑐᒐᓕᖕᓂ ᐅᓂᒃᑳᓕᐊᖅ ᑕᐃᒎᓯᖃᖅᐳᖅ: "ᓄᓇᕗᒻᒥ ᐃᓕᓐᓂᐊᕐᓂᖓ ᐱᕋᔭᖕᓂᒃᑯᑦ ᓈᒻᒪᙱᓚᖅ? ᖃᐅᔨᓴᐃᓂᐅᔪᒥ ᒫᓐᓇᐅᔪᓄᑦ ᐊᑐᐊᒐᓄᑦ ᐃᓄᒃᑐᒻᒧᑦ ᐊᒻᒪ ᖃᓪᓗᓈᑎᑐᑦ ᐃᓕᓐᓂᐊᕐᓂᐅᔪᒥ, ᓄᓇᕐᔪᐊᒥ ᐊᒻᒪ ᑲᓇᑕᒥ ᒪᓕᒐᐅᔪᖅ, ᐅᖃᐅᓯᕐᒥ ᖃᐅᔨᓴᕐᓂᐅᔪᒥ ᐊᒻᒪ ᐃᓕᖅᑯᓯᒧᑦ ᑐᖁᕋᐃᓂᐅᔪᓂ ᐊᒻᒪ ᐱᕋᔭᖕᓂᐅᔪᓄᑦ ᐃᓅᖃᑎᒌᖑᔪᓄᑦ".

ᐅᓂᒃᑳᓕᐊᖅ ᑎᑎᕋᖅᑕᐅᓯᒪᕗᖅ ᐃᓄᖕᓄᑦ ᐱᔪᓐᓇᕐᓂᕆᔭᐅᔪᓄᑦ ᓴᐳᔾᔨᔨᒧᑦ ᕌᐳᑦ ᑕᓐᐹᕐᒧᑦ, ᐱᓕᕆᒐᔪᒃᑐᒥ ᐃᓄᑭᑦᑐᓄᑦ ᐱᔪᓐᓇᕐᓂᕆᔭᐅᔪᓄᑦ, ᐊᒻᒪ ᑐᕝ ᔅᑯᑦᓈᑉ-ᑲᖓᔅ ᐊᒻᒪ ᕌᐳᑦ ᕕᓕᑉᓯᓐ, ᑎᑎᕋᖃᑎᒌᓚᐅᖅᑐᓂ ᐊᒻᒪ ᐋᖅᑭᒋᐊᖅᓯᓪᓗᑎᒃ ᐊᒥᓱᓂᑦ ᐅᖃᓕᒫᒐᕐᓂ ᐅᖃᐅᓯᕐᒥ ᖃᐅᔨᓴᕐᓂᐅᔪᒥ ᐃᓄᖕᓄᑦ ᐱᔪᓐᓇᕐᓂᕆᔭᐅᔪᓄᑦ ᓄᓇᕐᔪᐊᓕᒫᒥ, ᐊᔾᔨᒌᙱᑦᑐᓂᒃ ᐅᖃᐅᓯᓕᖕᓄᑦ ᐃᓕᓐᓂᐊᕐᓂᕐᒧᑦ ᐊᑐᐊᒐᕐᓂ, ᐃᓚᖃᖅᑐᒥ ᐅᖃᐅᓯᓪᓚᕆᖏᓐᓂ ᑐᙵᕕᓕᖕᓂ ᐊᔾᔨᒌᙱᑦᑐᓂᒃ ᐅᖃᐅᓯᓕᖕᓄᑦ ᐃᓕᓐᓂᐊᕐᓂᕐᒧᑦ, ᐊᒻᒪ ᖃᓪᓗᓈᑎᑐᑦ ᐊᑐᕐᓂᖃᐅᑎᖓᓂ ᒫᓐᓇᐅᔪᒥ ᓄᓇᕐᔪᐊᖑᔪᒥ.

"ᓄᓇᕗᒻᒥ ᐃᒪᐃᓕᖓᔫᔮᖅᐳᖅ, ᐊᒥᓱᓂ ᐱᐅᔪᓂ ᐱᓕᕆᓇᓱᐊᕐᓂᐅᔪᓄᑦ ᐊᒻᒪ ᐸᕐᓇᐅᑎᓂᑦ, ᐃᓕᓐᓂᐊᕐᓂᓪᓚᕆᐅᔪᖅ ᐃᓄᖕᓄᑦ ᐃᓕᓐᓂᐊᖅᑎᓄᑦ ᑎᑭᐅᑎᙱᒻᒪᑦ ᐱᐅᔪᓂ ᖃᓄᐃᓕᖓᓂᐅᔪᓄᑦ, ᐊᒻᒪᓗ ᑎᑭᐅᑎᓯᒪᓂᖃᙱᓚᖅ ᐱᔪᒪᔭᐅᓂᐅᔪᓄᑦ ᑕᒪᕐᒥᒐᓚᖕᓂ ᐊᖓᔪᖅᑳᖑᔪᓄᑦ, ᐅᕝᕙᓘᓐᓃᑦ ᒪᓕᖕᓂᖃᙱᓚᑦ ᑐᙵᕕᐅᔪᓄᑦ ᖃᐅᔨᓴᕐᓂᐅᔪᒥ ᓇᓗᓇᐃᖅᓯᓯᒪᓂᖓᓂ ᐱᔭᕆᐊᖃᕐᓂᐅᔪᓄᑦ ᐱᐅᔪᓄᑦ ᖃᓄᐃᓕᖓᓂᐅᔪᓄᑦ," ᐅᖃᓚᐅᖅᐳᑦ ᑎᑎᕋᖅᓯᒪᔪᓄᑦ.

ᐅᓂᒃᑳᓕᐊᖅ ᓇᓗᓇᐃᖅᓯᓯᒪᕗᖅ ᐱᓕᕆᖃᑎᒌᖕᓂᐅᔪᒥ ᐃᓕᓐᓂᐊᕐᓂᐅᔪᒥ ᓄᓇᕗᒻᒥ ᐊᒻᒪ ᐃᓅᖃᑎᒌᖕᓂᕐᒧᑦ ᐊᒻᒪ ᑮᓇᐅᔾᔭᒃᓴᓂᕐᒧᑦ ᖃᓄᐃᓕᖓᓂᐅᔪᓄᑦ ᐃᓄᖕᓄᑦ, ᐱᓕᕆᓂᑦᑎᐊᕙᐅᙱᑦᑐᒻᒪᕆᐅᓪᓗᓂ ᑕᐅᑐᒃᖢᒍ ᑕᐃᒃᑯᓄᖓ ᖁᕕᐊᒋᔭᐅᕙᒃᑐᓄᑦ ᑲᓇᑕᒥᐅᑕᓄᑦ ᑕᒪᐃᑎᒍᑦ.

"ᐃᓕᓐᓂᐊᕐᓂᓕᕆᓂᕐᒧᑦ ᐱᓕᕆᔾᔪᓯᐅᔪᖅ ᐊᑐᖅᑕᐅᓯᒪᕗᖅ ᓴᖅᑭᑎᑦᑎᓂᕐᒧᑦ ᐊᒥᓱᓂ ᐱᐅᙱᑦᑐᓂ ᐃᓅᖃᑎᒌᖕᓂᐅᔪᓄᑦ ᐊᒃᑐᐃᓂᐅᔪᓄᑦ ᑎᑎᕋᖅᓯᒪᔪᓂ ᐅᕙᓂ ᐅᓂᒃᑳᓕᐊᒥ. ᐱᔭᕆᐊᖃᕐᓂᐅᕗᖅ ᐃᓕᓐᓂᐊᕐᓂᓕᕆᓂᕐᒧᑦ ᐱᓕᕆᔾᔪᓯᖓ ᐊᑐᖅᑕᐅᓂᖓᓂ ᑭᐅᒃᑲᓐᓂᖃᕐᓂᖏᓐᓂ ᐅᑯᓂᖓ ᐊᒃᑐᐃᓂᐅᔪᓄᑦ," ᐅᖃᓚᐅᖅᐳᑦ ᓄᓇᕗᒻᒥ ᑐᙵᕕᒃᑯᑦ.

"ᓴᙱᔪᒥᒃ ᐱᓕᕆᐊᖑᔪᒥ ᒪᕐᕉᖕᓄᑦ ᐅᖃᐅᓯᓕᖕᓂ ᐃᓕᓐᓂᐊᕐᓂᐅᔪᒥ ᐊᑐᓕᖅᑎᑕᐅᔭᕆᐊᖃᖅᐳᖅ."

ᑭᓯᐊᓂ, ᐅᓂᒃᑳᓕᐊᒧᑦ ᑎᑎᕋᖅᑎᐅᔪᑦ ᐃᓱᓕᑦᑎᕗᑦ, ᒫᓐᓇᐅᔪᒥ ᐊᒃᓱᕈᕈᑕᐅᔪᓂ ᒪᕐᕉᖕᓄᑦ ᐅᖃᐅᓯᓕᖕᓂ ᐃᓕᓐᓂᐊᕐᓂᐅᔪᒥ ᓄᓇᕗᒻᒥ ᐱᓕᕆᓂᖃᑦᑎᐊᙱᓚᑦ ᐃᓄᖕᓄᑦ.

"ᑕᑯᔭᐅᓂᐅᓪᓗᓂ ᐃᓕᓐᓂᐊᓂᓕᕆᓂᕐᒧᑦ ᐊᒻᒪ ᐃᓱᒪᑎᒍᑦ ᑕᑯᔭᐅᓂᐅᔪᒥ, ᐊᒻᒪ ᐃᓅᖃᑎᒌᖕᓂᕐᓄᑦ ᖃᓄᐃᓐᓂᐅᔪᓄᑦ ᒫᓐᓇᐅᔪᒥ ᐊᑐᖅᑕᐅᕙᒃᑐᓂ, ᓯᕗᓪᓕᖅᐹᖓᓂ ᑕᑯᒃᓴᐅᓂᖃᖅᐳᖅ ᐃᓕᓐᓂᐊᕐᓂᐅᔪᒥ ᓄᓇᕗᒻᒥ ᐃᓚᐅᖃᑕᐅᓂᖓᓂ ᐱᓕᕆᓂᐅᔪᓄᑦ ᐊᒻᒪ ᐊᑐᖅᑕᐅᕙᒃᑐᓂ ᐅᖃᐅᓯᕐᒥ ᖃᐅᔨᓴᕐᓂᐅᔪᒥ and ᐃᓕᖅᑯᓯᒧᑦ ᑐᖁᕋᐃᓂᐅᔪᓂ," ᐅᖃᓚᐅᖅᐳᑦ ᑎᑎᕋᖅᑎᐅᔪᓄᑦ.

ᐅᓂᒃᑳᓕᐊᖅ ᓴᖅᑭᑎᑦᑎᒋᕗᑦ "ᐱᕋᔭᖕᓂᒃᑯᑦ ᓱᓕᙱᓐᓂᐅᔪᓂ" ᐱᔾᔪᑎᖃᖅᑐᒥ ᐊᐅᓚᑕᐅᖏᓐᓇᕐᓂᐅᔪᓄᑦ ᖃᓪᓗᓈᑎᑐᒻᒥ, ᐊᒻᒪ ᖃᓄᐃᓕᖓᓂᐅᔪᓐᓇᖅᑐᓂ ᐅᒃᐱᕈᓱᖕᓂᕐᒧᑦ ᐅᑯᓂᖓ ᓱᓕᙱᓐᓂᐅᔪᓄᑦ.

ᐅᓂᒃᑳᓕᐊᒧᑦ ᑎᑎᕋᖅᑎᐅᔪᑦ ᓇᓗᓇᐃᖅᓯᒐᓗᐊᖅᑎᓪᓗᒋᑦ ᐃᓕᖅᑯᓯᒧᑦ ᑐᖁᕋᐃᓂᐅᔪᓂ ᐱᔾᔪᑎᖃᖅᑐᒥ ᑎᒥᒧᑦ ᓱᕋᑦᑎᕙᓪᓕᐊᓂᐅᓂᖓᓄᑦ, ᑎᒃᑯᐊᕆᕗᑦ ᓯᓚᑦᑐᖅᓴᕐᕕᒡᔪᐊᖑᔪᒥ ᕉᕼᐋᒻᑉᑎᓐ (ᓄᓇᕐᔪᐊᓕᒫᒧᑦ) ᐃᓕᓴᐃᔨᐅᔪᖅ ᐃᓄᖕᓄᑦ ᐱᔪᓐᓇᕐᓂᕆᔭᐅᔪᓄᑦ ᒪᓕᒐᖓᓂ ᔨᐊᕆᒥ ᒋᐅᓪᐳᑦ ᐃᓱᓕᑦᑎᓯᒪᕗᖅ: "ᐃᒪᐃᑦᑑᔮᖅᐳᖅ ᐃᖅᑲᖅᑐᐃᔨᐅᔪᑦ ᑐᑭᓯᓇᕐᓂᖏᓐᓂ ᐃᓕᖅᑯᓯᒧᑦ ᑐᖁᕋᐃᓂᐅᔪᖅ ᐃᓚᒋᔭᐅᙱᓐᓂᖓᓂ (ᑐᖁᕋᐃᓂᐅᔪᒥ) ᑲᑎᒪᓂᕐᒧᑦ ᑎᑎᕋᖅᑕᐅᓯᒪᓂᖓᑎᒍᑦ, ᐃᓕᖅᑯᓯᒧᑦ ᐹᖅᓯᓂᐅᔪᓂ ᓇᓗᓇᐃᖅᑕᐅᓯᒪᔪᓄᑦ ᑲᑎᙵᓂᐅᔪᓄᑦ ᐱᔨᑦᑎᕋᕈᓐᓇᕐᓂᖓᓂ ᑕᑯᒃᓴᐅᓂᐅᔪᒥ ᓱᓕᓂᐅᔪᒥ ᓴᖅᑭᑎᑦᑎᓂᕐᒧᑦ ᑐᕌᒐᕆᔭᖓᓂ ᑎᒥᒥᑎᑦ ᓱᕋᐃᓂᐅᔪᒥ ᑲᑎᙵᓂᐅᔪᒥ."

ᑭᖑᓪᓕᖅᐹᖑᔪᒥ ᓴᖅᑭᑎᑕᐅᓂᐅᔪᒥ ᓄᓇᕗᒻᒥ ᑐᙵᕕᒃᑯᓐᓄᐱᔾᔪᑎᖃᖅᑐᒥ ᐃᓕᓐᓂᐊᕐᓂᓕᕆᓂᕐᒧᑦ ᐊᒻᒪ ᐃᓄᒃᑐᒻᒥ ᑎᑭᑉᐳᖅ ᓄᓇᕗᒻᒥ ᒐᕙᒪᒃᑯᑦ ᖄᖏᖅᑎᑦᑎᓚᐅᖅᑎᓪᓗᒋᑦ ᒫᓐᓇᐅᔪᒥ ᐅᖃᐅᓯᐅᔪᒥ ᐃᓕᓴᐃᓂᐅᔪᒥ ᒪᓕᒐᖓᓐᓂ ᑭᖑᓪᓕᖅᐹᖓᓂ ᐃᒃᓯᕚᕐᓂᐅᓚᐅᖅᑐᒥ ᒪᓕᒐᓕᐅᖅᑎᒃᑯᓐᓂ. ᐱᖁᔭᒃᓴᖅ ᐃᓚᒋᐊᖅᓯᓂᕐᒧᑦ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᕐᒥ ᐊᒻᒪ ᐃᓄᐃᑦ ᐅᖃᐅᓯᖓᓐᓂ ᓴᐳᔾᔨᓯᒪᓂᐅᔪᒥ ᒪᓕᒐᖓ ᓴᖅᑭᑕᐅᔪᒃᓴᐅᑕᐅᕗᖅ ᔫᓂᒥ ᐃᒃᓯᕚᕐᓂᐅᓛᖅᑐᒥ. ᐅᑯᐊ ᐱᓕᕆᓂᐅᔪᑦ ᐅᖓᕆᐊᖅᑎᑦᑏᓐᓇᖅᐳᑦ ᒪᕐᕉᖕᓂ ᐅᖃᐅᓯᕐᓄᑦ ᐃᓄᒃᑐᑦ ᐊᒻᒪ ᖃᓪᓗᓈᑎᑐᑦ ᐅᕝᕙᓘᓐᓃᑦ ᐅᐃᕖᑎᑐᑦ ᐃᓕᓐᓂᐊᕐᓂᐅᔪᒥ ᑕᒪᒃᑭᓄᑦ ᐃᓄᖕᓄᑦ ᐃᓕᓐᓂᐊᖅᑎᐅᔪᓄᑦ.

ᐅᓂᒃᑳᓕᐊᑉ ᑎᑎᕋᖅᑎᐅᔪᑦ ᐅᖃᖅᓯᒪᓂᖏᓐᓂ: " 2016-ᒥ (ᐅᓇ ᓄᑖᖑᓛᖑᕗᖅ ᐅᖃᐅᓯᒃᓴᓕᐊᓂ ᐱᓯᒪᔭᑦᑎᓐᓂ, ᐊᐃᑉᕆᓕ 2019-ᒥ), 11-ᓂ ᐃᓕᓐᓂᐊᕐᕕᓂᑦ ᐱᔪᓐᓇᕐᓂᖃᖅᑐᓂ ᑐᓂᓯᓂᕐᒧᑦ ᐃᓄᒃᑐᑦ-ᐱᓕᕆᓂᐅᔪᒥ ᐃᓕᓐᓂᐊᕐᓂᐅᔪᒥ ᐱᒋᐊᓕᓵᖅᑐᓂ ᖁᑦᑎᖕᓂᓕᖕᓄᑦ 3-ᒧᑦ; 7-ᓂ ᐃᓕᓐᓂᐊᕐᕕᓂᑦ ᑐᓂᓯᔪᓐᓇᖅᑐᓄᑦ ᑎᑭᐅᑎᔪᒧᑦ ᖁᑦᑎᖕᓂᓕᖕᓄᑦ 4-ᒧᑦ, ᐊᒻᒪ ᐊᑕᐅᓯᖅ ᑎᑭᑎᐅᔪᒧᑦ ᖁᑦᑎᖕᓂᓕᖕᒧᑦ 5-ᒧᑦ. ᐊᒥᐊᒃᑯᖏᑦ ᐃᓕᓐᓂᐊᕐᕕᐅᔪᑦ ᑐᓂᓯᓂᖃᓚᐅᙱᓚᑦ ᒥᑭᓛᖑᔪᒥ K-3 ᐃᓄᒃᑐᑦ-ᐱᓕᕆᓂᐅᔪᒥ ᐃᓕᓐᓂᐊᕐᓂᐅᔪᒥ, ᐱᔭᕆᐊᖃᖅᑎᑕᐅᔪᒥ ᓄᓇᕗᒻᒥ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᖓᓐᓂ."

ᒫᓐᓇᐅᔪᒥ, ᒐᕙᒪᑐᖃᒃᑯᑦ ᐱᓕᕆᕙᓪᓕᐊᕗᑦ ᖄᖏᖅᓯᓂᖏᓐᓂ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᓄᑦ ᒪᓕᒐᖓᓐᓂ, ᐱᖁᔭᒃᓴᖅ C-91.

"ᐱᑕᖃᙱᓐᓂᖓᓂ ᐃᓄᖕᓄᑦ-ᑐᕌᖓᔪᓄᑦ ᐃᓗᓕᖃᕐᓂᖓᓂ ᐅᖃᖅᑑᔮᖅᐳᖅ ᐅᓇ ᐱᖁᔭᒃᓴᖅ ᓱᓕ ᒪᓕᒐᓕᐅᕆᓂᕐᒧᑦ ᐱᒋᐊᕈᑕᐅᒋᕗᖅ ᐱᕙᓪᓕᐊᑎᑕᐅᓯᒪᔪᒥ ᒪᑐᓯᒪᔪᓄᑦ ᐹᓄᑦ ᓇᖕᒥᓂᖅ ᐊᐅᓚᓂᖃᓪᓚᕆᙱᑦᑐᒥ ᐱᓕᕆᔾᔪᓯᐅᔪᒥᒃ ᐊᒻᒪ ᐊᓱᐃᓛᒃ ᑎᓕᐅᕈᑕᐅᓪᓗᓂ ᐃᓄᖕᓄᑦ," ᐅᖃᓚᐅᖅᐳᖅ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᓇᑖᓐ ᐆᐱᑦ ᕕᐊᕆᒥ ᐊᖏᖅᑕᐅᓇᓱᐊᖅᑐᒥ ᐱᖁᔭᒃᓴᒥ ᓴᖅᑭᑎᑕᐅᑎᓪᓗᒍ.

ᐅᓇ ᒐᕙᒪᑐᖃᒃᑯᓐᓂ ᐃᖏᕐᕋᓂᐅᔪᒥ ᑎᑭᓚᐅᖅᐳᖅ ᐊᖓᔪᖅᑳᖑᔪᖅ ᓯᓚᕐᔪᐊᓕᒫᓄᑦ ᐱᒋᐊᖅᑎᑦᑎᓚᐅᖅᑎᓪᓗᒍ ᑲᑎᒪᓂᐅᔪᒥ ᖁᑦᑎᒃᑐᒧᑦ-ᑭᒡᓕᐅᔪᒧᑦ ᖃᓄᐃᓐᓂᐅᔪᒥ ᓇᓗᓇᐃᖅᓯᓂᕐᒧᑦ ᓄᓇᕐᔪᐊᒥ ᐱᒋᐊᖅᑎᑕᐅᓂᖓᓂ 2019-ᒥ ᓄᓇᕐᔪᐊᒥ ᐊᕐᕌᒍᖓᓂ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᓄᑦ.

"ᐃᑲᔪᖅᓱᐃᖏᓐᓇᖅᐳᒍᑦ ᐃᓄᐃᑦ ᐱᔪᓐᓇᕐᓂᕆᔭᐅᔪᓄᑦ ᐊᒻᒪ ᐃᓕᓴᖅᓯᕗᒍᑦ ᒐᕙᒪᐅᔪᑦ ᑲᒪᒋᔭᒃᓴᖃᕐᓂᖏᓐᓂ. ᑐᐊᕕᕐᓇᖅᑐᒥ, ᐊᐅᓚᑕᐅᑦᑎᐊᖅᑐᒥ ᖃᓄᐃᓕᐅᕐᓂᐅᔪᒥ ᐱᔭᐅᔭᕆᐊᖃᖅᐳᖅ ᒫᓐᓇ. ᓄᓇᕗᒻᒥ ᑐᙵᕕᒃᑯᑦ ᓇᓗᓇᐃᖅᓯᖃᑎᖃᖅᐳᑦ ᐃᖏᕐᕋᐃᓐᓇᖅᑐᒥ ᐊᖏᖃᑎᖃᕐᓂᐅᔪᒥ ᐱᓕᕆᓂᕐᒧᑦ ᐊᑑᑎᖃᖅᑐᓄᑦ ᒐᕙᒪᐅᔪᓄᑦ ᐊᒻᒪ ᐊᓯᖏᓐᓂ ᐱᓕᕆᖃᑎᒋᔭᐅᔪᓄᑦ," ᐅᖃᓚᐅᖅᐳᖅ ᑰᑦᑎᖅ.

-30-

ᓱᓕᓂᐅᔪᖅ ᑎᑎᖅᑲᖁᑕᐅᔪᑦ:

ᐃᓱᓕᑦᑎᓂᐅᔪᑦ ᓄᓇᕗᒻᒥ ᑐᙵᕕᒃᑯᓐᓄᖃᐅᔨᓴᕐᓂᕐᒧᑦ ᐅᓂᒃᑳᓕᐊᖑᔪᒥ, "ᓄᓇᕗᒻᒥ ᐃᓕᓐᓂᐊᕐᓂᖓ ᐱᕋᔭᖕᓂᒃᑯᑦ ᓈᒻᒪᙱᓚᖅ? ᖃᐅᔨᓴᐃᓂᐅᔪᒥ ᒫᓐᓇᐅᔪᒥ ᐊᑐᐊᒐᕐᓂ ᐃᓄᒃᑐᒻᒧᑦ ᐊᒻᒪ ᖃᓪᓗᓈᑎᑐᑦ ᐃᓕᓐᓂᐊᕐᓂᐅᔪᒥ, ᓄᓇᕐᔪᐊᓕᒫᒥ ᐊᒻᒪ ᑲᓇᑕᒥ ᒪᓕᒐᖓᓐᓂ, ᐅᖃᐅᓯᕐᒥ ᖃᐅᔨᓴᕐᓂᐅᔪᒥ ᐊᒻᒪ ᐃᓕᖅᑯᓯᒧᑦ ᑐᖁᕋᐃᓂᐅᔪᓂ ᐊᒻᒪ ᐱᕋᔭᖕᓂᐅᔪᓂ ᐃᓅᖃᑎᒌᖑᔪᓄᑦ":

- ᐅᓇᐅᒐᓗᐊᖅᑎᓪᓗᒍ ᐃᕐᙲᓐᓇᑲᐅᑎᒋ ᐊᒃᑐᐃᓂᐅᔪᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᖏᓂᖅᓴᕐᔪᐊᖑᓂᖓᓂ ᐅᖓᓯᒃᑐᒥ ᐅᑭᐅᖅᑕᖅᑐᒥ ᑲᓇᑕᒥ ᐊᓯᓕᒫᖏᓐᓂᑦ;

- ᐅᓇᐅᒐᓗᐊᖅᑎᓪᓗᒍ ᐊᒥᓱᓂ ᑕᑯᒃᓴᐅᓂᐅᔪᓂ ᐃᓅᓯᐅᑉ ᐱᐅᓂᖓᓂ ᓄᓇᕗᒻᒥ ᓈᒻᒪᙱᑦᑐᒥ ᐊᑦᑎᖕᓂᖃᕐᓂᖓᓂ ᑕᐅᑐᒃᖢᒍ ᐊᒥᐊᒃᑯᖓᓂ ᑲᓇᑕᒥ;

- ᐅᓇᐅᒐᓗᐊᖅᑎᓪᓗᒍ ᑕᑯᒃᓴᐅᓂᖓᓂ ᑕᒪᕐᒥᒐᓚᑦ ᓇᓗᓇᐃᖅᑕᐅᒍᑎᐅᔪᓂ ᓇᓕᒧᙱᑦᑐᓄᑦ ᐊᒻᒪ ᒥᑭᑎᑕᐅᖏᓐᓇᕐᓂᐅᔪᓂ ᐊᑐᕐᓂᐅᔪᒥ ᑮᓇᐅᔾᔭᒃᓴᓂᒃᑯᑦ, ᑲᑎᒪᔨᕐᔪᐊᖑᔪᑎᒍᑦ, ᐃᓕᖅᑯᓯᑎᒍᑦ ᐊᒃᓱᕈᕐᓂᐅᔪᓄᑦ ᐊᐅᓚᑦᑎᓂᕐᓄᑦ ᐃᓅᖃᑎᒌᖑᔪᓂ ᐱᑕᖃᕐᓂᖓᓂ ᓄᓇᕗᒻᒥ;

- ᐅᓇᐅᒐᓗᐊᖅᑎᓪᓗᒍ ᓱᓕᓂᕐᒧᑦ ᐊᒻᒪ ᐃᓱᒪᒋᔪᓐᓃᖃᑎᒌᖕᓂᐅᔪᒥ ᑲᑎᒪᔨᐅᔪᑦ ᐃᓱᒪᓕᐅᕆᓂᖏᓐᓂ ᐱᓕᕆᓂᖃᕐᓂᖓᓂ ᐃᓕᖅᑯᓯᒧᑦ ᑐᖁᕋᐃᓂᐅᔪᓂ ᓄᓇᕗᒻᒥ, ᐊᒻᒪ ᐊᑐᓕᖁᔨᓪᓗᑎᒃ ᐊᓯᔾᔨᕐᓂᐅᔪᓂ ᑐᕌᖅᑎᑦᑎᔪᓐᓇᖅᑐᓂ ᐊᖏᓂᖅᓴᐅᔪᒧᑦ ᐃᓅᖃᑎᒌᖕᓂᕐᓄᑦ ᒪᓕᒐᓕᕆᓂᕐᓄᑦ;

- ᐅᓇᐅᒐᓗᐊᖅᑎᓪᓗᒍ ᐃᓂᖅᑎᕆᓂᐅᔪᓂ ᐊᒻᒪ ᑕᑯᒃᓴᐅᓂᐅᔪᒥ ᐃᓄᒃᑐᑦ ᐊᒻᒪ ᐃᓕᖅᑯᓯᒧᑦ ᐅᖃᐅᓯᐅᓂᖓᓂ ᐅᓗᕆᐊᓇᖅᑐᒦᕐᔪᐊᕐᓂᖏᓐᓂ ᐆᒪᔪᓐᓇᔾᔮᙱᓐᓂᖏᓐᓂ; ᐊᒻᒪᓗ

- ᐅᓇᐅᒐᓗᐊᖅᑎᓪᓗᒍ ᐱᓕᕆᓂᐅᔪᓂ ᓴᙱᒃᑎᒋᐊᖅᓯᓂᕐᓄᑦ ᐃᓄᒃᑐᒻᒥ ᐃᓕᓐᓂᐊᕐᓂᓕᕆᓂᕐᒧᑦ ᐱᓕᕆᔾᔪᓯᐅᔪᒥ ᓄᓇᕗᒻᒥ:

- ᐃᓄᐃᑦ ᐅᖃᐅᓯᖓ ᐱᓪᓚᕆᐅᕗᖅ ᑎᑭᐅᑎᔪᓐᓇᕐᓂᕐᒧᑦ ᑐᙵᕕᒋᔭᐅᔪᓄᑦ ᐃᓄᓕᒫᓄᑦ ᐃᓕᓐᓂᐊᓂᓕᕆᓂᕐᒧᑦ 3ᐱᓕᕆᔾᒧᓯᖓᓂ ᑐᙵᕕᖃᕆᐊᖃᓪᓗᐊᕐᓂᖓᓂ;

- ᐃᓄᒃᑐᒻᒥ ᐊᑐᕐᓂᕐᒥ ᐅᓄᕐᓂᖅᓴᐅᔪᓄᑦ ᓄᓇᕗᒻᒥ ᐃᓅᖃᑎᒌᖑᔪᓄᑦ ᒥᒃᖠᕙᓪᓕᐊᕗᖅ, ᐱᓗᐊᖅᑐᒥ ᓱᕈᓯᕐᓄᑦ ᐊᒻᒪ ᒪᒃᑯᒃᑐᓄᑦ;

- ᑐᕌᒐᒃᓴᐅᔪᑦ ᓴᐳᔾᔨᓯᒪᓂᕐᒧᑦ ᐊᒻᒪ ᖁᕝᕙᖅᓴᐃᓂᕐᒧᑦ ᐃᓄᒃᑐᒻᒥ ᐃᓗᐊᓃᑦᑐᒥ ᒪᓕᒐᕐᒥ ᑎᑭᐅᑎᔭᐅᕙᓪᓕᐊᙱᓚᑦ;

- ᓄᓇᕗᒻᒥ ᒪᓕᒐᑎᒍᑦ ᐱᔭᕆᐊᖃᕐᓂᐅᔪᑦ ᐊᑐᓕᖅᑎᑦᑎᓂᕐᒧᑦ ᒪᕐᕉᖕᓄᑦ ᐅᖃᐅᓯᕐᓄᑦ ᐃᓕᓴᐃᓂᐅᔪᒧᑦ ᑕᒪᒃᑭᓄᑦ 9-ᖑᔪᓄᑦ ᐃᓕᓐᓂᐊᕐᕕᓄᑦ ᖁᑦᑎᖕᓂᓕᖕᓄᑦ ᑎᑭᐅᑎᓯᒪᙱᓚᑦ;

- ᐃᓄᒃᑐᑦ ᐊᑐᖅᑕᐅᕐᔪᐊᖅᓯᒪᙱᓚᖅ ᐱᓕᕆᓂᐅᓂᖓᓂ ᐃᓕᓴᐃᓂᐅᔪᒧᑦ ᐃᓕᓐᓂᐊᕐᓂᓕᕆᓂᕐᒧᑦ ᓄᓇᕗᒻᒥ, ᐱᓗᐊᖅᑐᒥ ᖁᑦᑎᖕᓂᓕᖕᒧᑦ 3 ᐅᖓᑖᓄᑦ;

- ᒫᓐᓇᐅᔪᒥ ᐅᖃᐅᓯᐅᔪᒧᑦ ᐃᓕᓴᐃᓂᐅᔪᒧᑦ ᒪᓕᒐᖓ ᐊᖏᖃᑎᒌᒃᐳᑦ ᐊᒻᒪᓗ ᑖᔅᓱᒧᖓ ᐱᔾᔪᑕᐅᔪᒧᑦ ᒪᓕᙱᓐᓂᖃᖅᐳᖅ ᐃᓄᐃᑦ ᐅᖃᐅᓯᖓᓐᓂ ᓴᐳᔾᔨᓯᒪᓂᕐᒧᑦ ᒪᓕᒐᖓᓐᓂ;

- ᐊᑐᓕᖁᔭᐅᓯᒪᔪᓂᑦ ᐅᓂᒃᑳᓕᐊᓂ ᑕᑯᒃᓴᐅᑎᑦᑎᓯᒪᔪᓄᑦ ᖃᓄᖅ ᒪᕐᕉᖕᓂ ᐅᖃᐅᓯᕐᓂ ᐃᓕᓐᓂᐊᕐᓂᐅᔪᒥ ᐱᐅᓛᖑᔪᒥ ᐋᖅᑭᒃᓱᖅᑕᐅᔪᓐᓇᕐᓂᖓᓂ ᒪᓕᒃᑕᐅᓯᒪᙱᓚᖅ;

- ᐅᓄᕐᓂᖅᓴᒻᒪᕆᖕᓂ ᑕᒪᕐᒥᒐᓚᖕᓂ ᐃᓕᓴᐃᔨᐅᔪᓄᑦ ᐃᓕᓐᓂᐊᖅᑎᑦᑎᔪᓐᓇᙱᓚᑦ ᐃᓄᒃᑐᑦ; ᑕᒪᕐᒥᒐᓚᖕᓂ ᐃᓕᓴᐃᔨᐅᔪᓂ (80 ᐳᓴᓐᑎᑲᓴᖕᒥ 2016-ᒥ) ᖃᓪᓗᓈᖑᕗᑦ;

- ᑕᒪᕐᒥᒐᓚᑦ ᐱᓕᒻᒪᒃᓴᒃᑲᓐᓂᕐᓂᐅᔪᓂ ᐃᓕᓐᓂᐊᕐᓂᑐᐃᓐᓇᐅᔪᒥ ᐱᓕᕆᓂᖃᓲᖑᕗᑦ ᓄᓇᕘᑉ ᓯᓚᑖᓂ ᐊᒻᒪ ᑕᒪᒃᑭᑦᑎᐊᖅ ᖃᓪᓗᓈᑎᑐᑦ, ᐱᔪᓐᓇᖅᑎᑦᑎᙱᑦᑐᒥ ᓴᙱᒃᑎᒋᐊᖅᓯᓂᕐᒧᑦ ᐃᓄᒃᑐᒻᒥ;

- ᐃᓄᐃᑦ ᒪᒃᑯᒃᑐᑦ ᐱᕙᙱᓚᑦ ᐅᖃᐅᓯᕐᒥ ᖃᐅᔨᓴᕐᓂᐅᔪᒥ ᐅᕝᕙᓘᓐᓃᑦ ᐃᓕᓐᓂᐊᕐᓂᓕᕆᓂᕐᒧᑦ ᐱᔪᓐᓇᕐᓂᐅᔪᓄᑦ ᐱᔭᕆᐊᓕᖏᓐᓂ ᑎᑭᐅᑎᓂᕐᒧᑦ ᐱᓪᓚᕆᐅᔪᓂ ᑐᕌᒐᒃᓴᐅᔪᓄᑦ ᐱᖃᕐᓂᕐᒧᑦ 80 ᐳᓴᓐᑎᖓᓂ ᐃᖅᑲᓇᐃᔮᖑᔪᓄᑦ ᐃᓐᓄᒃᑕᐅᔪᓄᑦ ᐃᓄᖕᓄᑦ;

- ᐃᓄᐃᑦ ᒪᒃᑯᒃᑐᑦ ᐃᑲᔪᖅᓯᖅᑕᐅᙱᓚᑦ ᒫᓐᓇᐅᔪᒥ ᐃᓕᓐᓂᐊᕐᓂᓕᕆᓂᕐᒧᑦ ᐱᓕᕆᔾᔪᓯᐅᔪᒥ ᐱᕙᓪᓕᐊᑎᑦᑎᓂᖏᓐᓄᑦ ᐱᔪᓐᓇᕐᓂᕆᔭᖏᓐᓄᑦ ᑕᒪᒃᑭᐅᒪᔪᒧᑦ; ᐱᔪᓐᓇᕐᓂᐅᔪᒥ ᐃᓚᒡᑯᓂᖅᑕᖃᖅᐳᖅ;

- ᒐᕙᒪᑐᖃᒃᑯᑦ ᑮᓇᐅᔭᓂᒃ ᐊᑐᓲᖑᕗᑦ 44-ᖏᖅᓱᖅᑐᒥ ᐅᓄᕐᓂᖅᓴᐅᔪᒥ ᐊᑐᓂ ᓱᕈᓯᕐᒧᑦ ᐅᐃᕖᑎᑐᑦ ᓄᓇᕗᒻᒥ ᐱᓕᕆᓲᖑᓂᖏᓐᓂ ᐃᓄᒃᑐᒻᒥ

- ᐱᕋᔭᖕᓂᐅᔪᒃᑯᑦ ᓱᓕᙱᓐᓂᐅᔪᓂ ᖃᓪᓗᓈᑎᑐᑐᐊᖅ ᐱᔭᕆᐊᖃᕐᓂᖏᓐᓂ 'ᐱᕙᓪᓕᐊᑎᑦᑎᓂᕐᒧᑦ' ᐊᒻᒪᓗ ᖃᓪᓗᓈᑎᑐᑦ ᓄᓇᕐᔪᐊᓕᒫᒥ ᐊᑑᑎᖃᕐᓂᖓᓂ ᐊᒻᒪ ᐃᑲᔪᖅᓱᐃᓂᖃᕐᓂᖓᓂ ᓱᓕ ᐊᖏᔪᒥ ᒥᐊᓂᕆᕗᖅ ᐃᓕᓐᓂᐊᕐᓂᓕᕆᓂᕐᒧᑦ ᐱᓕᕆᔾᔪᓯᐅᔪᒥᑦ;

- ᑲᓇᑕ ᓱᕋᐃᓂᖃᓲᖑᕗᖅ ᐃᓕᓐᓂᐊᖅᑎᑦᑎᓂᐅᔪᒧᑦ ᐃᓄᖕᓂ ᓱᕈᓯᕐᓂ ᓄᓇᕗᒻᒥ ᐊᒥᓱᓂᑦ ᑐᕌᒐᒃᓴᕆᔭᖏᓐᓄᑦ ᓄᓇᕐᔪᐊᒥ ᒪᓕᒐᖓᓐᓂ ᐃᓕᓴᐃᓂᐅᔪᓄᑦ ᑲᓇᑕ ᐊᑎᓕᐅᕆᓯᒪᔭᖏᓐᓂ ᐊᒻᒪ ᐊᖏᖅᓯᒪᓂᖏᓐᓂ ᐅᕝᕙᓘᓐᓃᑦ ᐊᓯᐊᒍᑦ ᓈᒻᒪᒋᔭᐅᓯᒪᓪᓗᑎᒃ;

- ᑕᑯᔭᐅᓂᐅᓪᓗᓂ ᐃᓕᓐᓂᐊᓂᓕᕆᓂᕐᒧᑦ ᐊᒻᒪ ᐃᓱᒪᑎᒍᑦ ᑕᑯᔭᐅᓂᐅᔪᒥ, ᐊᒻᒪ ᐃᓅᖃᑎᒌᖕᓂᕐᓄᑦ ᖃᓄᐃᓐᓂᐅᔪᓄᑦ ᒫᓐᓇᐅᔪᒥ ᐊᑐᖅᑕᐅᕙᒃᑐᓂ, ᓯᕗᓪᓕᖅᐹᖓᓂ ᑕᑯᒃᓴᐅᓂᖃᖅᐳᖅ ᐃᓕᓐᓂᐊᕐᓂᐅᔪᒥ ᓄᓇᕗᒻᒥ ᐃᓚᐅᖃᑕᐅᓂᖓᓂ ᐱᓕᕆᓂᐅᔪᓄᑦ ᐊᒻᒪ ᐊᑐᖅᑕᐅᕙᒃᑐᓂ ᐅᖃᐅᓯᕐᒥ ᖃᐅᔨᓴᕐᓂᐅᔪᒥ and ᐃᓕᖅᑯᓯᒧᑦ ᑐᖁᕋᐃᓂᐅᔪᓂ.

"ᑐᐊᕕᕐᓇᖅᑐᒥ ᖃᓄᐃᓕᐅᕐᓂᐅᔪᒥ ᐱᓕᕆᔭᕆᐊᖃᕐᓂᐊᖅᐳᑦ ᑭᐅᓂᕐᒧᑦ ᐃᓚᑰᓂᐅᔪᓄᑦ ᐅᕙᓂ ᓇᓗᓇᐃᖅᓯᓯᒪᔭᑦᑎᓐᓂ ᐊᒻᒪ ᐱᓗᐊᖅᑐᒥ ᓇᓗᓇᐃᖅᓯᓂᕐᒧᑦ ᑲᓇᑕ ᐊᒻᒪ ᓄᓇᕗᑦ ᒪᓕᑦᑎᐊᕐᓂᖏᓐᓂ ᐊᔾᔨᒌᙱᑦᑐᓂ ᐊᖏᕐᕋᒥ ᐊᒻᒪ ᓄᓇᕐᔪᐊᒥ ᒪᓕᒐᑎᒍᑦ ᐱᓕᕆᔭᕆᐊᖃᕐᓂᐅᔪᓄᑦ ᓇᓗᓇᐃᖅᓯᓯᒪᔭᑦᑎᓐᓂ ᐅᑯᓇᓂ ᐃᓱᓕᑦᑎᓂᐅᔪᓄᑦ ᐊᒻᒪᓗ ᐆᒥᖓ ᐅᓂᒃᑳᓕᐊᖑᔪᒧᑦ."