ᐱᖓᓱᓂ ᐱᔪᓂᒃ ᐃᓕᓴᕆᔭᐅᕗᑦ ᐃᑲᔪᖅᓱᐃᓂᖏᓐᓂ ᐱᐅᓯᒋᐊᖅᑎᑦᑎᓂᕐᒧᑦ ᐃᓅᓯᐅᔪᓂ ᑕᒪᒃᑭᓄᑦ ᐃᓄᖕᓄᑦ
ᐱᖓᓱᓂ ᐃᓄᖕᓂ ᓄᓇᕗᒻᒥ ᐃᓕᓴᕆᔭᐅᓚᐅᖅᐳᑦ ᐊᖓᔪᖅᑳᖑᔪᒧᑦ ᓵᓚᖃᐅᓯᐊᒥᑦ ᑕᐃᑲᓂ ᓄᓇᕗᒻᒥ ᑐᙵᕕᒃᑯᓐᓂ ᐊᕐᕌᒍᑕᒫᒥ ᑲᑎᒪᓂᕐᔪᐊᖑᔪᒥ ᐃᖃᓗᒃᑑᑦᑎᐊᕐᒥ ᑕᒪᑐᒪᓂ ᐱᓇᓱᐊᕈᓯᐅᔪᒥ.
ᓘᐃ ᐳᕉᔅ ᓴᓕᕐᒥᐅᑕᖅ, ᐋᒡᓂᔅ ᐸᓂᐅᔭᖅ ᖁᕐᓗᖅᑑᕐᒥᐅᑕᖅ ᐊᒻᒪ ᓖᓇ ᐃᕕᒃ ᐃᖃᓗᖕᓂᕐᒥᐅᑕᖅ ᐱᔪᐃᓐᓇᐅᓚᐅᖅᐳᑦ ᓵᓚᖃᐅᓯᐊᖑᔪᓂ, ᑐᓂᔭᐅᓚᐅᖅᑐᓄᑦ ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓᓂ ᐊᓗᑭ ᑰᑦᑎᕐᒧᑦ ᑕᐃᑲᓂ ᐅᒃᑐᐱᕆ 20–ᒥ ᑲᑎᒪᓂᐅᔪᒥ.
"ᐱᖓᓱᑐᐃᓐᓇᕐᓂ ᐃᓕᓴᖅᓯᓚᐅᖅᐳᒍᑦ ᑭᓯᐊᓂ ᖃᐅᔨᒪᕗᒍᑦ ᐊᒥᓱᐊᓗᖕᓂ ᐃᓄᖕᓂ ᐱᓇᓱᐊᓲᓂᒃ ᐊᒻᒪ ᐊᔾᔨᐅᙱᑎᑦᑎᓂᖃᖅᑐᓂ ᐊᒻᒪᓗ ᐱᐅᓯᒋᐊᖅᑎᑦᑎᕙᒃᑐᓂ ᐃᓅᓯᐅᔪᓂ ᐃᓄᖕᓂ," ᐅᖃᓚᐅᖅᐳᖅ ᑰᑦᑎᖅ ᐃᓄᒃᑎᑐᑦ ᑐᓂᓯᓂᖃᖅᑎᓪᓗᒍ.
ᐳᕉᔅ ᓇᖕᒥᓂᖃᖅᑎᐅᕗᖅ ᓴᓪᓕᖅ ᐱᕙᓪᓕᐊᑎᑦᑎᓂᕐᒧᑦ ᓕᒥᑎᑦᒥ. ᑐᓂᔭᐅᓚᐅᖅᐳᖅ ᐱᓕᕆᓂᖓᓄᑦ ᐸᕐᓇᐃᓂᕐᒥ, ᐱᕙᓪᓕᐊᑎᑦᑎᓂᕐᒥ ᐊᒻᒪ ᓴᓇᓂᕐᒥ ᑕᑭᓛᖑᔪᒥ ᓇᖕᒥᓂᕆᔭᐅᔪᒥ ᐊᖅᑯᑕᐅᔪᒥ ᓄᓇᕗᒻᒥ ᓴᓪᓕᓂ ᐊᑭᐊᕈᖅᓇᕐᒧᑦ.
ᐊᖅᑯᑎ ᐊᑭᐊᕈᖅᓇᕐᒧᑦ ᑐᓂᓯᓲᖑᕗᖅ ᓴᓪᓕᕐᒥᐅᑕᓂᒃ ᐊᑐᐃᓐᓇᖃᕐᓂᖏᓐᓂ ᐊᑕᐅᓯᐅᔪᒥ ᐆᒪᔪᖃᕐᕕᐅᓛᖑᔪᒥ ᐊᖑᓇᓱᕐᓂᕐᒧᑦ ᐃᓂᐅᔪᓂ ᑕᒪᒃᑭᓄᑦ ᐃᖃᓗᖕᓄᑦ ᐊᒻᒪ ᑕᕆᐅᕐᒥᐅᑕᓄᑦ ᐳᐃᔨᐅᔪᓄᑦ ᐃᓚᖃᖅᑐᒥ ᓇᓄᕐᓂ, ᐊᓪᓚᙳᐊᑦ ᕿᓚᓗᒐᑦ, ᖃᐅᓪᓗᖅᑕᑦ ᕿᓚᓗᒐᑦ ᐊᒻᒪ ᓇᑦᑎᕐᓂ.
"ᐅᓇ ᐊᖅᑯᑎ ᐱᕚᓪᓕᕈᑎᖃᑐᐃᓐᓇᙱᓚᖅ ᓴᓪᓕᓂᑦ ᑭᓯᐊᓂᑦᑕᐅᖅ ᖃᓂᒡᓕᒋᐊᖅᑎᑦᑎᓪᓗᓂ ᓇᐅᔮᓄᑦ," ᐅᖃᓚᐅᖅᐳᖅ ᑰᑦᑎᖅ. "ᐃᓱᒪᕗᖓ ᐅᓇ ᐊᖅᑯᑎ ᐊᒥᓱᓂ ᐱᕚᓪᓕᕈᑎᖃᕐᓂᖓᓂ ᓯᕗᓂᒃᓴᒧᑦ."
ᐸᓂᐅᔭᖅ ᐃᓕᓴᕆᔭᐅᓚᐅᕆᕗᖅ ᐊᔪᙱᓐᓂᖓᓂ ᒥᖅᓱᖅᑎᐅᓂᖓᓂ. ᖃᐅᔨᒪᔭᐅᕐᔪᐊᖅᐳᖅ ᐱᓕᕆᐊᖏᓐᓄᑦ ᓄᓇᕗᓕᒫᒥ ᐊᒻᒪ ᐊᓕᐊᓇᐃᒋᔭᖃᖅᐳᖅ ᐃᓕᓐᓂᐊᖅᑎᑦᑎᓂᕐᒥ ᒪᒃᑯᖕᓂᖅᓴᓂ ᐃᓄᖕᓂ ᐊᕐᓇᓂᑦ ᐃᓕᑦᑎᔪᒪᕐᔪᐊᖅᑐᓂ ᐱᖅᑯᓯᑐᖃᖅᑎᒍᑦ ᐃᓄᐃᑦ ᐱᓕᕆᔾᔪᓯᖏᓐᓂ ᒥᖅᓱᕐᓂᐅᔪᓂ ᐃᓚᖃᖅᑐᒥ ᐆᒃᑑᑎᒃᓴᓕᐅᕐᓂᕐᒥ, ᐸᕐᓇᐃᓂᕐᒥ ᒥᖅᓱᒐᒃᓴᓂ ᐊᒻᒪ ᐊᑐᕐᓂᕐᒧᑦ ᐊᔾᔨᒌᙱᑦᑐᓂ ᓴᓇᕐᕈᑎᓂᑦ.
"ᐅᓐᓄᐊᖅ ᐅᖃᓗᒡᕕᒋᓚᐅᖅᐸᕋ ᐊᒻᒪ ᕿᐊᓱᙳᓕᓚᐅᖅᐳᖅ," ᐅᖃᓚᐅᖅᐳᖅ ᑰᑦᑎᖅ.
ᒫᓐᓇᓕᓴᐅᓛᖑᔪᒥ ᐱᓕᕆᓚᐅᖅᐳᖅ ᐳᕼᐃᑕᕐᒧᑦ ᐃᓕᓴᐃᔨᐅᓂᖓᓂ. ᐳᕼᐃᑕᖅ, ᐅᕝᕙᓘᓐᓃᑦ sunburst ᓄᐃᓚᒃᓴᖓᓂ ᖃᐅᔨᒪᔭᐅᕗᖅ ᐱᐅᓂᖅᓴᐅᓂᖓᓂ ᐊᓯᖏᓐᓄᑦ, ᐸᖅᑭᑦᑎᐊᕐᓂᖃᕆᐊᖃᖅᑐᒥ ᐊᒻᒪ ᐅᔾᔨᖅᓱᑦᑎᐊᕐᓗᒍ ᓴᓇᔭᕆᐊᖅᓴᖅ.
ᐱᓕᕆᓂᐅᔪᖅ ᐃᓚᖃᖅᐳᖅ ᐱᓂᕐᒥ ᐊᒥᓱᓂ ᑐᐊᑦᑐᓂ ᑭᓗᐊᕆᓯᒪᔪᓂ ᐊᒪᕉᑉ ᐊᒥᖓᓐᓂ ᐊᒻᒪ ᐃᓕᓪᓗᒍ ᑐᐱᒃᓴᔭᐅᔭᒧᑦ, ᓴᓇᓲᖑᔪᒥ ᐊᖕᒪᓗᖅᓯᓯᒪᔪᒥ ᓄᐃᓚᒥᒃ ᐊᖕᒪᔪᓕᖕᒥ ᑮᓇᒧᑦ. ᐳᕼᐃᑕᖅ ᐊᑦᑕᑕᓲᖑᕗᖅ ᖁᓕᑦᑕᐅᔭᐅᑉ ᓇᓴᖓᓄᑦ, ᐊᓄᕌᔾᔭᐃᒃᑯᑎᐅᓪᓗᓂ ᐊᒻᒪᓗ ᑐᓂᓯᓪᓗᓂ ᐊᑐᖅᑐᒥ ᐅᖅᑰᓂᖅᓴᒻᒪᕆᐅᔪᒥ.
"ᓴᓇᓲᕆᕙᖏᑦ ᐊᒻᒪᓗ ᖃᐅᔨᒪᔭᐅᕐᔪᐊᖅᐳᖅ ᑖᔅᓱᒧᖓ," ᐅᖃᓚᐅᖅᐳᖅ ᑰᑦᑎᖅ.
ᐃᕕᒃ ᓵᓚᖃᐅᓯᐊᒥᒃ ᑐᓂᔭᐅᓚᐅᖅᐳᖅ ᐱᓕᕆᓂᖓᓄᑦ ᓇᓂᓯᔨᐅᓂᖓᓂ ᐊᒻᒪ ᐊᖓᔪᖅᑳᖑᓂᕐᒧᑦ ᐱᕈᕐᕕᒃ ᐱᓕᕆᕝᕕᐅᔪᒧᑦ, ᓄᓇᕗᒻᒥ–ᑐᙵᕕᓕᖕᒥ, ᐱᓕᕆᕝᕕᒃ ᐱᑦᑎᐊᕐᔪᐊᕐᓂᐅᔪᒥ ᐃᓄᐃᑦ ᐅᖃᐅᓯᖓᓐᓂ, ᐃᓕᖅᑯᓯᖓᓐᓂ ᐊᒻᒪᓗ ᖃᓄᐃᙱᑦᑎᐊᕐᓂᐅᔪᒧᑦ.
ᐃᕕᒃ ᓴᓇᓚᐅᖅᐳᖅ ᐱᕈᕐᕕᐅᑉ ᐱᓕᕆᑦᑎᐊᕈᓐᓇᕐᓂᖓᓂ ᓇᓗᓇᐃᖅᓯᓯᒪᓂᖓᓄᑦ ᐃᓕᓴᐃᓂᕐᒥ ᐃᓄᒃᑐᒻᒥ ᐊᒻᒪ ᐃᓄᐃᑦ ᐱᖅᑯᓯᖏᓐᓂ. ᐊᕐᕌᒎᓚᐅᖅᑐᒥ ᐱᕈᕐᕕᒃ ᐱᓕᕆᕝᕕᖓ ᐱᕈᖅᓯᒪᕗᖅ ᐊᑐᐃᓐᓇᖃᕐᓂᕐᒥ ᐱᖓᓱᓂ ᓄᑖᖑᔪᓂ ᐅᓪᓗᓕᒫᖅᓯᐅᑎᓂᒃ ᐃᓕᓐᓂᐊᕐᓂᐅᔪᓂ ᐱᓕᕆᖃᑎᖃᖅᖢᑎᒃ ᓯᓚᑦᑐᖅᓴᕐᕕᒡᔪᐊᖅ ᕕᒃᑐᐊᕆᐊᒥ.
"ᐱᓪᓚᕆᐅᓂᐅᔪᒥ ᓄᓇᕘᑉ ᐊᑐᕐᓂᑯᖏᓐᓂ, ᐃᓄᒃᑐᑦ ᐅᖃᐅᓯᖓ ᐊᑐᖅᑕᐅᓂᖓ ᑲᑕᒃᐸᓪᓕᐊᓕᖅᑎᓪᓗᒍ 1 ᐳᓴᓐᑎᒥ ᐊᕐᕌᒍᑕᒫᒥ, ᐱᕈᕐᕕᒃ ᐱᓕᕆᕝᕕᖓ ᐊᖏᒡᓕᒋᐊᖅᑎᑦᑎᕗᖅ ᐱᓕᕆᐊᕆᔭᖏᓐᓂ ᑭᐅᓂᕐᒧᑦ ᐆᒪᙵᑦ ᑐᐊᕕᕐᓇᕐᓂᐅᓕᖅᑐᒥ ᓴᖅᑭᑎᑦᑎᓂᒃᑯᑦ ᐱᖓᓱᓂ ᐱᒻᒪᕆᐅᔪᓂ ᐱᓕᕆᐊᖑᔪᓂᑦ," ᐅᖃᓚᐅᖅᐳᖅ ᑰᑦᑎᖅ.
"ᓖᓇᐅᑉ ᖃᐅᔨᒪᓂᕐᔪᐊᕆᔭᖓᓂ ᐊᒻᒪ ᐅᖃᐅᓯᖃᕈᒪᓂᕐᒧᑦ, ᐃᓄᐃᑦ ᐃᓕᖅᑯᓯᖓ ᐊᒻᒪ ᐅᖃᐅᓯᕐᒧᑦ ᑐᓂᓯᓂᐅᔪᒥ ᐱᓕᕆᔪᓐᓇᖅᓯᕗᖅ ᒪᒃᑯᖕᓂᖅᓴᐅᔪᓂ ᐃᓄᖕᓄᑦ."
ᖄᒃᑲᓐᓂᐊᒍᑦ ᐃᓕᓴᕆᔭᐅᓂᖏᓐᓂ ᐊᑐᓂ ᓵᓚᖃᐅᓯᐊᒥᒃ ᐱᔪᑦ ᐱᓂᐊᕆᕗᑦ $500–ᓂ ᓄᓇᕗᒻᒥ ᑐᙵᕕᒃᑯᓐᓂ.