ᓄᓇᕗᒻᒥ ᒐᕙᒪᒃᑯᑦ ᐊᒃᓱᕉᓴᒃᑎᓪᓗᒋᑦ ᑭᐅᒪᓂᕐᒧᑦ ᐱᔪᒪᓂᐅᔪᒥ ᐃᓅᖃᑎᒌᖑᔪᓄᑦ ᐃᒡᓗᒃᓴᓄᑦ ᑐᙵᕕᖃᖅᑐᒥ ᒐᕙᒪᑐᖃᒃᑯᓐᓂ
ᑮᓇᐅᔭᖃᖅᑎᑕᐅᓂᐅᔪᒥ, ᐃᒡᓗᓕᕆᓂᕐᒧᑦ ᒥᓂᔅᑕᖓ ᓵᑉᐳᖅ ᓄᓇᕗᑖᕐᓂᕐᒧᑦ ᑲᑐᔾᔨᖃᑎᒌᖑᔪᑦ ᓄᓇᕗᒻᒥ ᑐᙵᕕᒃᑯᓐᓄᑦ
(NTI) ᐃᑲᔪᕐᓂᕐᒧᑦ ᒥᒃᖠᒋᐊᖅᑎᑦᑎᓂᕐᒧᑦ ᐃᒡᓗᒃᓴᖃᕐᓂᐅᔪᒥ ᐊᒥᒐᓗᐊᕐᓂᖓᓂ.
ᓄᓇᕗᒻᒥ ᑐᙵᕕᒃᑯᑦ ᐃᓕᓯᓪᓗᐊᕐᒪᖔᑕ ᑮᓇᐅᔭᓂᒃ ᐃᓄᓕᒫᓄᑦ ᐃᒡᓗᖁᑎᒃᓴᖏᓐᓄᑦ
"ᓂᕈᐊᖃᑕᐅᓚᐅᖅᓯᒪᕗᖓ ᓄᓇᕗᒻᒧᑦᑕᐅᖅ, ᐊᒻᒪ ᐅᑯᐊᖑᔪᑎᒍᑦ ᐱᔪᓐᓇᕐᓂᖅᑖᖅᑎᑕᐅᓯᒪᔪᑎᒍᑦ ᓄᓇᕗᒻᒥ ᐃᓚᒋᔭᐅᕗᒍᑦ ᐃᓄᖕᓂ ᐊᑐᖅᑐᓂ ᐃᒡᓗᒃᓴᑭᓗᐊᕐᓂᖏᓐᓄᑦ," ᓇᑦᓱᕐ ᐅᖃᓚᐅᖅᐳᖅ ᒪᓕᒐᓕᐅᖅᑎᒃᑯᓐᓂ ᔫᓂᒥ.
"ᐱᐅᔪᐊᓘᓇᔭᖅᐳᖅ ᓄᓇᕗᒻᒥ ᑐᙵᕕᒃᑯᑦ ᐃᒡᓗᓕᐅᕈᓐᓇᕈᑎᒃ ᐱᔪᓐᓇᕐᓂᑖᖅᑎᑕᐅᓯᒪᔪᓄᑦ ᓄᓇᕗᒻᒥ. ᑐᙵᓱᒃᑎᑦᑎᓇᔭᑦᑎᐊᖅᐳᖓ ᓄᓇᕗᒻᒥ ᑐᙵᕕᒃᑯᓐᓂ ᐅᕙᑦᑎᓐᓄᑦ ᑐᓂᓯᔪᓐᓇᕈᑎᒃ ᑮᓇᐅᔭᓂᒃ ᐃᒡᓗᒃᓴᐅᔪᓄᑦ. ᑕᑯᔪᒪᓇᔭᖅᐸᕋ." ᓇᑦᓱᕐ ᓇᓗᓇᐃᖅᓯᓚᐅᖅᐳᖅ ᒐᕙᒪᑐᖃᒃᑯᑦ ᑮᓇᐅᔭᖃᖅᑎᑕᐅᓂᖓᓂ ᐃᒡᓗᒃᓴᐅᔪᓄᑦ "ᒥᑭᓗᐊᐸᓗᖕᓂᖏᓐᓂ."
ᐋᑐᕚ ᐊᖏᖅᓯᒪᓂᖃᖅᐳᑦ $240 ᒥᓕᐊᓐᓂ ᐊᕐᕌᒍᓄᑦ 10–ᓄᑦ 2017–ᒥ ᐊᑲᐅᙱᓕᐅᕈᑕᐅᔪᒧᑦ, ᑭᓯᐊᓂ ᓇᓚᐅᑦᑖᕆᔭᐅᓯᒪᕗᖅ 3,500–ᖑᔪᑦ ᓄᑖᖑᔪᓂ ᐊᖏᕐᕋᒃᓴᐅᔪᓂ ᓄᓇᕗᒻᒥ ᖄᖏᐅᑎᓇᔭᕐᓂᖓᓂ $1 ᐱᓕᐊᓐᓂ.
"ᑕᑯᒃᓴᐅᓂᖅᓴᐅᔪᒥ ᐃᑲᔪᖅᓱᐃᓂᖃᕆᐊᖃᖅᐳᒍᑦ ᒐᕙᒪᑐᖃᒃᑯᓐᓂ ᐊᒻᒪ ᓄᓇᕗᒻᒥ ᑐᙵᕕᒃᑯᓐᓂ
ᒥᒃᖠᒋᐊᖅᑎᑦᑎᓂᕐᒧᑦ ᐸᖕᒥᐅᕐᓂᐅᓗᐊᖅᑐᓂ ᐊᒻᒪ ᐃᒡᓗᑭᒃᓴᓗᐊᕐᓂᖏᓐᓂ ᓵᙵᔭᑦᑎᓐᓂ," ᐅᖃᓚᐅᖅᐳᖅ ᓇᑦᓱᕐ.
ᐊᓗᑭ ᑰᑦᑎᖅ, ᐊᖓᔪᖅᑳᖑᔪᖅ ᓄᓇᕗᒻᒥ ᑐᙵᕕᒃᑯᓐᓄᑦ, ᐊᑐᐃᓐᓇᐅᓚᐅᙱᓚᖅ ᐊᐱᖅᓱᖅᑕᐅᓂᕐᒧᑦ ᑐᓴᒐᒃᓴᓕᐊᖑᔪᒧᑦ
ᑎᑎᕋᖅᑕᐅᔭᕆᐊᖃᕐᓂᖓᓄᑦ. ᑳᑎ ᑕᐅᑐᙱ, ᒪᓕᒐᓕᐅᖅᑎ ᑲᖏᖅᖠᓂᖅ ᐅᐊᖕᓇᒧᑦ/ᐃᒡᓗᓕᒑᕐᔪᖕᒧᑦ ᐊᒻᒪ ᐊᖓᔪᖅᑳᖑᓚᐅᖅᓯᒪᔪᒥ ᓄᓇᕗᒻᒥ ᑐᙵᕕᒃᑯᓐᓄᑦ, ᐃᓱᒪᕗᖅ ᐱᐅᓇᔭᙱᓚᖅ ᓄᓇᕗᒻᒥ ᑐᙵᕕᒃᑯᓐᓄᑦ ᐲᖅᓯᓂᖏᓐᓂ ᑮᓇᐅᔭᓂᒃ ᑎᒍᒥᐊᖅᑕᐅᔪᓂ ᐱᕈᖅᓯᒪᔪᓄᑦ $2 ᐱᓕᐊᓐᑲᓴᖕᓄᑦ ᐱᕈᖅᐸᓪᓕᐊᔪᒧᑦ ᕿᑐᙱᐅᕐᕈᑎᖓᓐᓄᑦ.
ᑲᑎᖅᓱᖅᑕᐅᕙᓪᓕᐊᔪᓄᑦ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᑮᓇᐅᔾᔭᒃᓴᓂᐅᔪᒥ ᑮᓇᐅᔭᓂᒃ ᑎᒍᒥᐊᖅᑕᐅᔪᓂ ᐊᑭᖃᙱᑦᑐᒥᒃ ᐃᓕᓐᓂᐊᕆᐊᒃᑲᓐᓂᕈᓯᐊᖏᑦ ᐊᔪᙱᓛᖑᓂᐊᒍᑦ, ᐃᓚᒋᔭᐅᔪᓄᑦ ᑐᖁᔪᒧᑦ ᖃᖓᑦᑕᐅᓯᖅᓯᓂᕐᒧᑦ ᐊᒻᒪ ᐊᖑᓇᓱᒃᑎᓄᑦ
ᐃᑲᔪᖅᓱᐃᓂᐅᔪᓂ ᐱᓕᕆᐊᖑᔪᓂ ᐱᔪᓐᓇᖅᑎᑦᑎᕗᖅ. ᐃᑲᔪᖅᓯᒪᒋᕗᖅ ᐃᓄᖕᓄᑦ ᓇᖕᒥᓂᕆᔭᐅᔪᓄᑦ ᐊᒻᒪ ᐊᑭᓖᓪᓗᓂ ᐊᐅᓚᑦᑎᓂᕐᒧᑦ ᐊᑭᓕᒐᒃᓴᐅᔪᓂ ᓄᓇᕗᒻᒥ ᑐᙵᕕᒃᑯᓐᓄᑦ ᐊᒻᒪ ᐊᕕᒃᑐᖅᓯᒪᔪᓄᑦ ᐃᓄᐃᑦ ᑲᑐᔾᔨᖃᑎᒌᖑᔪᓄᑦ.
"ᐃᓄᐃᑦ ᐱᓚᐅᖅᐳᑦ ᐊᑕᐅᓰᖅᑐᒥ ᐊᑭᓖᓂᐅᔪᒥ ᓄᖅᑲᖅᑎᑕᐅᓂᖓᓂ ᐊᒻᒪ ᓴᒃᑯᑕᐅᓂᖓᓂ ᑕᒪᒃᑭᓄᑦ
ᐱᔪᓐᓇᕐᓂᕆᔭᐅᔪᓄᑦ," ᐅᖃᓚᐅᖅᐳᖅ ᑕᐅᑐᙱ. "ᐃᓱᒫᓗᒃᑲᔭᖅᐳᖓ ᑕᑯᔪᓐᓇᕈᑦᑕ ᐊᕐᕌᒍᓄᒃ 20–ᓄ
30–ᓄᓪᓘᓐᓃᑦ ᖁᑦᑎᒃᑐᒻᒪᕆᐊᓗᖕᒥ ᕿᑐᙱᐅᕐᓂᖃᕋᑦᑕ ... ᖁᓱᓇᔭᖅᐳᖓ ᓄᓇᕗᒻᒥ ᑐᙵᕕᒃᑯᑦ ᐊᖏᓂᖅᓴᒥ
ᐊᑐᕐᓂᖃᐅᑎᖃᕐᓂᕈᑎᒃ ᐃᒡᓗᖃᖅᑎᑦᑎᓂᕐᒧᑦ."
ᓄᓇᕗᒻᒥ ᒐᕙᒪᒃᑯᑦ ᐱᕙᒃᐳᑦ ᐊᕐᕌᒍᑕᒫᒥ ᓄᒃᑎᖅᑕᐅᓯᒪᔪᓄᑦ ᐊᑭᓕᐅᑎᒥᑦ $1.6 ᐱᓕᐊᓐᐸᓗᖕᓂ.
ᐃᓄᐃᑦ ᐊᑭᓖᓲᖑᖕᒪᑕ ᑖᒃᓯᔅᓂ, "ᐅᖃᕈᒪᓇᔭᖅᐳᖓ ᒐᕙᒪᑐᖃᒃᑯᑦ ᐱᒋᐊᒃᑲᓐᓂᓪᓗᐊᖅᐳᑦ," ᐅᖃᓚᐅᖅᐳᖅ ᑕᐅᑐᙱ,
ᐃᓕᓯᓪᓗᓂ ᑲᒪᒋᔭᖃᕆᐊᖃᕐᓂᖓᓂ ᐋᑐᕚᒥ. ᐋᖅᑭᒃᑕᐅᓯᒪᔪᒥ ᑎᑎᕋᖅᓯᒪᓂᑕᖃᙱᓚᖅ ᓄᓇᕗᑖᕋᓱᐊᕐᓂᕐᒧᑦ
ᐊᖏᕈᑕᐅᔪᒥ ᒐᕙᒪᑐᖃᒃᑯᓐᓄᑦ ᑐᓂᓯᓂᖏᓐᓂ ᐃᒡᓗᒃᓴᓂ ᓄᓇᕗᒻᒥ, ᑕᐅᑐᙱ ᓇᓗᓇᐃᖅᓯᓚᐅᖅᐳᖅ.
ᓄᓇᕕᖕᒥ ᓄᓇᑖᕋᓱᐊᕐᓂᖏᓐᓂ ᑯᐸᐃᖕᒥ, ᑭᓯᐊᓂ, ᐃᓚᖃᖅᐳᖅ ᑎᑎᕋᖅᑕᐅᓯᒪᓂᐅᔪᒥ ᐱᔾᔪᑎᖃᖅᑐᒥ ᒐᕙᒪᐅᔪᓂ
ᑮᓇᐅᔭᓂᒃ ᐃᒡᓗᒃᓴᖃᖅᑎᑦᑎᓂᕐᒧᑦ.
"ᓯᕗᓪᓕᖅᐸᐅᓪᓗᓂ ᑐᕌᒐᒃᓴᖓ ᐃᓄᓕᒫᓄᑦ ᒐᕙᒪᖃᕐᓂᕐᒧᑦ," ᑕᐅᑐᙱ ᐅᖃᓚᐅᖅᐳᖅ ᑐᑭᖏᓐᓄᑦ ᓄᓇᕘᑉ
ᓄᓇᑖᕋᓱᐊᕐᓂᖓᓂ. "ᑕᐃᒃᑯᐊ (ᒐᕙᒪᒃᑯᑦ) ᐋᔩᖃᑎᖃᑐᐃᓐᓇᓚᐅᖅᐳᑦ ᐃᓅᖃᑎᒌᖕᓂᕐᒧᑦ, ᐃᓕᖅᑯᓯᒧᑦ, ᐱᓕᕆᐊᖑᔪᓄᑦ ᐊᒻᒪ
ᐱᓕᕆᐊᒧᑦ ᓴᓇᔭᐅᓂᖓᓄᑦ...ᐊᑐᖅᑕᐅᓇᔭᖅᑐᓂ ᐊᓯᖏᓐᓂ ᓲᕐᓗ ᐃᒡᓗᖃᖅᑎᑕᐅᓂᕐᒥ, ᐋᔩᖃᑎᒋᔭᐅᔪᒪᓚᐅᙱᓚᑦ."
ᐹᓪ ᖁᐊᓴ, ᐊᒡᒍᒥ ᒪᓕᒐᓕᐅᖅᑎ ᐊᒻᒪ ᐊᖓᔪᖅᑳᖑᓚᐅᖅᓯᒪᔪᒥ ᓄᓇᕗᒻᒥ ᑐᙵᕕᒃᑯᓐᓄᑦ, ᐅᖃᓚᐅᖅᐳᖅ ᐊᔭᐅᕆᕐᔪᐊᕐᓂᖓᓂ ᓄᓇᕗᒻᒥ ᑐᙵᕕᒃᑯᓐᓂ ᐊᒻᒪ ᓄᓇᕗᒻᒥ ᒐᕙᒪᒃᑯᓐᓂ ᐱᓕᕆᖃᑎᒌᖁᓪᓗᓂᒋᑦ, ᐃᒻᒪᖄᓘᓐᓃᑦ ᐃᒡᓗᒃᓴᖃᖅᑎᑦᑎᓂᐅᔪᓄᑦ ᐱᓕᕆᐊᒃᓴᐅᔪᓄᑦ ᓲᕐᓗ ᐃᓄᓕᒫᓄᑦ ᐃᔨᓗᒃᓴᖃᕐᓂᐅᔪᓄᑦ.
ᑲᑎᙵᓗᑎᒃ, ᐃᑲᔪᕈᓐᓇᖅᐳᑦ ᓄᓇᕗᒻᒥᐅᓂ ᐃᒻᒥᒃᑰᕈᓐᓇᖅᓯᓂᖏᓐᓂ, ᐅᖃᓚᐅᖅᐳᖅ.
"ᐅᑯᐊ ᐱᑕᖃᒐᔪᒃᑑᓪᓗᑎᒃ ᐊᑲᐅᙱᓕᐅᕈᑕᐅᕗᑦ ᑕᒪᒃᑭᑦ ᑎᒥᐅᔪᑦ ᐃᓱᒫᓘᑎᖃᕐᓂᖏᓐᓂ," ᐅᖃᓚᐅᖅᐳᖅ.
"ᖃᓄᐃᓕᐅᕐᓂᖃᕐᓗᓯ." ᐃᓄᐃᑦ ᑲᑐᔾᔨᖃᑎᒌᖑᔪᑦ ᑕᑯᒃᓴᐅᑎᑦᑎᓯᒪᕗᑦ ᐱᔪᓐᓇᕐᓂᖏᓐᓂ ᓇᑉᐸᖅᑎᕆᓂᖏᓐᓄᑦ ᑐᔪᕐᒥᕕᐅᔪᓂᑦ, ᑎᑎᕋᕐᕕᒃᓴᓄᑦ ᐃᓂᒃᓴᐅᔪᓂ ᐊᒻᒪᓗᓐᓃᑦ ᐱᓕᕆᖃᑎᒋᔭᐅᓪᓗᑎᒃ ᓴᓇᓂᕐᒧᑦ ᒪᓕᒐᓕᐅᖅᑎᒃᑯᓐᓂ ᖄᖏᖅᓯᒪᓕᖅᑐᓄᑦ ᐊᕐᕌᒍᓄᑦ 20–ᓄᑦ, ᐅᖃᓚᐅᖅᐳᖅ ᖁᐊᓴ.
"ᐊᑐᓂ ᑎᒥᖁᑕᐅᔪᖅ ᐱᔪᓐᓇᕋᔭᖅᐳᑦ ᐊᒥᓱᓂ ᒥᓕᐊᓐ–ᖏᓐᓂ ᑮᓇᐅᔭᓂᑦ. ᑕᒪᓐᓇ ᐊᖅᑯᑕᐅᒃᑲᓐᓂᕈᓐᓇᖅᐳᖅ," ᐅᖃᓚᐅᖅᐳᖅ
ᐱᔾᔪᑎᖃᖅᑐᒥ ᐃᓄᓕᒫᓄᑦ ᐃᒡᓗᒃᓴᖃᕐᓂᕐᒧᑦ. "ᓄᓇᕗᒻᒥ ᑮᓇᐅᔭᒥᒃ ᑎᒍᒥᐊᖅᑎᑦ ᐅᕙᓃᑉᐳᑦ ᐃᑲᔪᕐᓂᕐᒧᑦ ᐱᔪᓐᓇᕐᓂᖅᑖᖅᑎᑕᐅᓯᒪᔪᓄᑦ ᖃᓄᓕᒫᒃᑯᑦ. ᐄᓛᒃ, ᐊᑕᐅᓯᐅᕗᖅ ᐃᓂᐅᓪᓗᓂ ᐱᔪᓐᓇᕐᓂᖅᑖᖅᑎᑕᐅᓯᒪᔪᑦ ᐃᑲᔪᖅᑕᐅᔭᕆᐊᖃᕐᓂᖏᓐᓂ, ᐃᒡᓗᖃᖅᑎᑕᐅᓂᐅᔪᒥ, ᓈᒻᒪᒃᑐᒥ ᐃᒡᓗᖃᖅᑎᑕᐅᓂᖏᓐᓂ."