ᓄᓇᕗᑦ ᑭᖑᕙᓯᒃᐳᑦ 18–ᖑᔪᓂ ᓯᕗᓪᓕᐅᔾᔭᐅᖁᔭᐅᔪᓂ ᐃᓂᐅᔪᓂᑦ; 'ᑲᓇᑕᒥᐅᑕᐅᒐᔪᒃᑐᒥ, ᓇᓗᓇᐃᖅᓯᔪᒪᕗᒍᑦ ᑐᓂᓯᔪᓐᓇᕐᓂᑦᑎᓐᓂ ᐃᓚᑦᑎᓐᓄᑦ, ᓇᒡᓕᒋᔭᑦᑎᓐᓂ, ᐊᒻᒪᓗ ᐃᑲᔪᖅᓱᐃᓗᑕ ᓄᓇᓕᑦᑎᓐᓄᑦ,' ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐅᖃᖅᐳᖅ
"ᐱᐅᙱᕐᔪᐊᕐᓂᐅᔪᒥ" ᖃᓄᐃᓕᖓᓂᖓᓂ ᓄᓇᕘᑉ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᑎᑎᕋᐅᓯᐅᓯᒪᕗᖅ ᓄᑖᖑᔪᒥ 205-ᓂ ᒪᒃᐱᖅᑐᒐᐅᔪᒥ ᐅᓂᒃᑳᓕᐊᖑᓯᒪᔪᒥ ᓄᓇᕗᒻᒥ ᑐᙵᕕᒃᑯᓐᓄᑦ (NTI), ᐊᒻᒪᓗ ᑕᐃᓐᓇ ᖃᐅᔨᓴᕐᓂᐅᔪᖅ ᐊᑐᖅᑕᐅᓂᐊᖅᐳᖅ ᓯᕗᒻᒧᐊᕆᑎᑦᑎᓂᕐᒥ ᐋᔩᖃᑎᒌᖕᓂᐅᔪᓂ ᒐᕙᒪᑐᖃᒃᑯᓐᓂ ᐊᒻᒪᓗ ᓄᓇᕗᒻᒥ ᒐᕙᒪᐅᔪᓄᑦ, ᐅᖃᖅᐳᖅ ᓄᓇᕗᒻᒥ ᑐᙵᕕᒃᑯᓐᓂ ᐊᖓᔪᖅᑳᖓ.
image courtesy of NTI
"ᐱᒻᒪᕆᐅᔪᒥ ᐊᒻᒪ ᐆᒃᑐᕋᕐᓂᖓᓂ ᐱᐅᓂᖓᓂ" ᐊᔾᔨᒌᙱᕐᔪᐊᕐᓂᐅᔪᓂ ᐱᑕᖃᖅᐳᖅ ᓄᓇᕗᒻᒥ ᐊᒻᒪ ᐊᒥᐊᒃᑯᖓᓂ ᑲᓇᑕᒥ ᑕᒪᒃᑭᓂ 18–ᖑᔪᓂ ᓯᕗᓪᓕᐅᔾᔭᐅᖁᔭᐅᔪᓂ ᐃᓂᐅᔪᓂᑦ ᐆᒃᑐᕋᖅᑕᐅᔪᓄᑦ, ᐅᖃᐅᓯᐅᓪᓗᓂ ᐅᓂᒃᑳᓕᐊᑉ ᓇᓂᔭᖏᓐᓂ.
ᑎᑎᖅᑲᖁᑕᐅᔪᖅ ᐅᖃᖅᓯᒪᕗᖅ "ᑲᒪᒋᔭᐅᓂᖓᓂ, ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂᑦ ᐊᒻᒪ ᖃᓄᐃᓕᐅᕐᓂᐅᔪᓂ" ᐱᔭᕆᐊᖃᖅᐳᑦ ᒪᑐᓯᓂᕐᒧᑦ ᐃᓚᑰᓂᐅᔪᓂ ᓲᕐᓗ ᐃᒡᓗᒃᓴᖃᕐᓂᕐᒧᑦ, ᖃᕋᓴᐅᔭᕐᑰᕈᓐᓇᐅᑎᓂᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ, ᐆᒻᒪᖅᑯᑎᓄᑦ, ᐃᒥᖅᑕᐅᓲᒥ ᐃᒪᕐᒥ, ᐊᖅᑯᑎᓂᑦ, ᐊᒻᒪᓗ ᑐᓚᒃᑕᖅᓴᕐᕕᓄᑦ ᐊᒻᒪ ᑭᓴᕐᕕᒃᓴᓄᑦ. ᐱᔾᔪᑎᖓ ᓄᓇᕗᒻᒥ ᑐᙵᕕᒃᑯᑦ ᖃᐅᔨᓴᕐᔪᐊᕐᓂᐅᔪᒥ ᐆᒃᑐᕋᕐᓂᕐᒧᑦ ᐊᖏᓂᖓᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐃᓚᑰᓂᐅᔪᓂ ᐃᑲᔪᕐᓂᕐᒧᑦ ᑐᑭᓕᐊᕆᓂᖓᓂ ᑭᒡᓕᐅᔪᒥ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂᑦ ᐱᔭᕆᐊᖃᕐᓂᖏᓐᓂ.
"ᖃᐅᔨᓴᕐᓂᐅᔪᖅ ᑕᑯᒃᓴᐅᑎᑦᑎᕗᖅ ᓄᓇᕘᑉ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᑕᐃᒪᐃᒐᔪᒃᑐᒥ ᓈᒻᒪᙱᓚᖅ, ᐋᖅᑭᐅᒪᑦᑎᐊᕐᓂᖃᙱᖦᖢᓂ, ᐅᕝᕙᓘᓐᓃᑦ ᐱᑕᖃᙱᑦᑎᐊᒻᒪᕆᒃᐳᖅ ᑕᐅᑐᒃᖢᓂ ᑲᓇᑕᒥ ᖃᐅᔨᓴᕈᑕᐅᓚᐅᖅᑐᒥ," ᑎᑎᖅᑲᖁᑕᐅᔪᖅ ᐅᖃᖅᐳᖅ.
ᐅᓂᒃᑳᓕᐊᖅ ᓇᓗᓇᐃᖅᓯᒋᕗᖅ ᖃᓄᖅ ᓄᓇᕘᑉ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐊᒃᑐᐃᕙᖕᓂᖓᓂ ᐃᓄᖕᓄᑦ ᓈᒻᒪᑦᑎᐊᕐᓂᖓᓂ ᐊᒻᒪ ᖃᓄᐃᙱᑦᑎᐊᕐᓂᖏᓐᓂ ᐱᔾᔪᑎᖃᖅᑐᒧᑦ ᑮᓇᐅᔾᔭᒃᓴᓂᕐᒧᑦ ᐱᕕᒃᓴᖃᕐᓂᐅᔪᓄᑦ, ᓂᕿᒃᓴᖃᑦᑎᐊᕐᓂᕐᒧᑦ ᐊᒻᒪ ᐃᓚᒌᑦ ᐊᕕᒃᓯᒪᔭᕆᐊᖃᖅᑎᑕᐅᓪᓗᑎᒃ ᐊᔾᔨᒌᙱᕈᓘᔭᖅᑐᓄᑦ ᐱᔾᔪᑕᐅᔪᓄᑦ.
"ᓄᓇᕗᒻᒥ ᐃᓄᐃᑦ ᑐᒃᓯᕋᙱᓚᑦ ᐊᓯᐊᒎᖅᑐᒥ ᑲᒪᒋᔭᐅᓂᖏᓐᓂ. ᐊᐱᕆᕗᒍᑦ ᑕᐃᒪᓐᓇᑦᑕᐃᓐᓇᖅ ᑭᒡᓕᐅᔪᒥ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐊᒻᒪ ᐱᔨᑦᑎᕋᕐᓂᐅᔪᒥ ᐊᓯᖏᑦ ᑲᓇᑕᒥᐅᑕᑦ ᓂᕆᐅᒃᐸᖕᓂᖏᓐᓂ ᑲᓇᑕᓕᒫᒥ. ᐊᖏᓂᐅᔪᒥ ᐃᓚᑰᓂᐅᔪᒥ ᑲᒪᓇᙱᓚᖅ ᓄᓇᕗᒻᒥ ᐃᓄᖕᓄᑦ: ᖃᐅᑕᒫᑦᑎᐊᖅ ᐃᓅᓯᕆᕙᕗᑦ. ᐃᓚᑰᓂᖓ ᐊᒡᕕᐊᕈᑕᐅᕗᖅ ᐱᕕᒃᓴᖃᕈᓐᓇᕐᓂᑦᑎᓐᓂ, ᐊᒻᒪᓗ ᒪᑐᔭᐅᓂᖓᓂ ᐱᔭᕆᐊᖃᖅᑑᕗᖅ ᐱᓕᕆᐊᒃᓴᐅᓪᓗᓂ ᓴᐃᒻᒪᖃᑎᒌᖕᓂᐅᔪᒥ," ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᖃᓚᐅᖅᐳᖅ. "ᐃᓄᐃᑦ ᑐᑭᓯᓇᑦᑎᐊᖅᓯᒪᕗᑦ ᑐᕌᒐᒃᓴᕆᔪᒪᔭᑦᑎᓐᓂ: ᐱᔪᒪᕗᒍᑦ, ᐊᓯᖏᓐᓂᓪᓗ, ᐆᒻᒪᕆᒃᑐᒥ ᐊᒻᒪ ᒪᑭᒪᔾᔪᑕᐅᔪᓐᓇᖅᑐᒥ ᐊᖑᓇᓱᖕᓂᕐᒥ ᑮᓇᐅᔾᔭᒃᓴᓂᐅᔪᒥ. ᓂᕆᐅᒃᐳᒍᑦ ᑮᓇᐅᔭᒃᑯᕕᖃᕐᓂᕐᒥ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐱᔨᑦᑎᕋᕐᓂᐅᔪᒥ ᐃᓄᒃᑐᑦ. ᓂᕆᐅᒃᐳᒍᑦ ᐃᓕᓐᓂᐊᕐᓂᕐᒥ ᐱᓕᕆᔾᔪᓯᐅᔪᒥ ᐃᑲᔪᖅᓱᐃᔪᒥ ᐃᓄᒃᑐᒻᒥ ᐊᒻᒪᓗ ᓄᓇᕐᔪᐊᒥ ᑕᑯᔭᐅᓂᐅᔪᒥ ᓄᓇᕗᒻᒥ ᐃᓅᓪᓗᑕ. 'ᑲᓇᑕᒥᐅᑕᐅᒐᔪᒃᑐᒥ, ᓇᓗᓇᐃᖅᓯᔪᒪᕗᒍᑦ ᑐᓂᓯᔪᓐᓇᕐᓂᑦᑎᓐᓂ ᐃᓚᑦᑎᓐᓄᑦ, ᓇᒡᓕᒋᔭᑦᑎᓐᓂ, ᐊᒻᒪᓗ ᐃᑲᔪᖅᓱᐃᓗᑕ ᓄᓇᓕᑦᑎᓐᓄᑦ."
ᓴᖅᑭᓐᓂᐅᔪᒥ ᓄᕙᒡᔪᐊᕐᓇᖅ-19–ᒥ ᐃᑲᔪᕐᓂᖃᓚᐅᖅᐳᖅ ᑕᐅᑐᒃᑕᑐᐊᖃᑲᐃᓐᓇᕐᓂᕐᒥ ᓄᓇᕘᑉ ᓈᒻᒪᙱᓗᐊᕐᓂᖓᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ, ᓲᕐᓗ ᑭᒡᓕᖃᕐᓂᐅᔪᓂ ᓄᓇᓯᐅᑎᒃᑯᑦ ᐃᒥᖃᖅᑎᑕᐅᓂᐅᔪᓂ ᐊᒡᒐᓂᑦ–ᐅᐊᓴᕆᐊᖃᒃᑲᓐᓂᕐᔪᐊᕐᓂᐅᔪᒥ – ᐊᒻᒪᓗ ᑕᐃᒪᐃᓐᓂᖓᓄᑦ ᐃᒪᕐᒥ ᐊᑐᕐᓂᖅᓴᒃᑲᓐᓂᕐᓂᐅᔪᒥ – ᓴᙱᔪᒥ ᐅᖃᐅᔾᔨᓂᐅᓚᐅᖅᐳᖅ ᐊᖏᕐᕋᖃᖅᑎᐅᔪᓄᑦ. ᓄᖅᑲᖅᑎᑕᐅᓂᖓᓂ ᐃᓕᓐᓂᐊᕐᕕᖕᓂ ᐃᓕᓐᓂᐊᕐᓂᐅᔪᓂ ᐱᔾᔪᑎᖃᖅᑐᒥ ᐅᓗᕆᐊᓇᕐᓂᐅᔪᒥ ᓴᖅᑭᑕᐅᔪᒥ ᑯᕉᓇ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᓂ ᓴᙱᒃᑎᒋᐊᖅᓯᓚᐅᖅᐳᖅ ᓄᓇᕘᑉ ᖃᕋᓴᐅᔭᒃᑰᕈᓐᓇᕐᓂᖓ ᐱᔪᓐᓇᖅᑎᑦᑎᙱᓚᖅ ᑕᒪᒃᑭᓂ ᐃᓕᓐᓂᐊᖅᑎᓂᑦ ᐃᓕᑦᑎᓂᖏᓐᓂ ᐃᓕᓐᓂᐊᕈᑎᒃᓴᓂ ᖃᕋᓴᐅᔭᑎᒍᑦ. ᐸᖕᒥᐅᓗᐊᖅᑐᓂ ᐊᖏᕐᕋᐅᔪᓂ ᐊᖏᒡᓕᕙᓪᓕᐊᑎᑦᑎᕗᖅ ᓱᒃᑲᔪᒥ ᐊᐃᑐᐃᓂᐅᔪᒥ ᓄᕙᒡᔪᐊᕐᓇᖅ-19–ᒥ, ᑕᐃᒪᓐᓇᑎᑐᑦ ᖃᓄᐃᑦᑐᑐᐃᓐᓇᕐᒥ ᐊᐃᑦᑐᖅᑕᐅᓲᒥ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᓂᑦ.
"ᓈᒻᒪᙱᑦᑐᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐃᓕᔭᐅᓯᒪᔪᖃᖅᐳᖅ ᐊᕐᕌᒍᒐᓵᓘᓕᖅᑐᓂ ᓄᓇᓕᐅᖏᓐᓇᕐᓂᐊᖅᑐᓂ ᓴᖅᑭᑕᐅᑎᓪᓗᒋᑦ ᐃᓂᐅᔪᓂ ᐃᓱᒪᓕᐊᖑᔪᓂ ᐱᓗᐊᖅᑐᒥ ᑲᓇᑕᐅᑉ ᑕᐅᖅᓰᓂᖓᓄᑦ ᐊᒻᒪ ᐅᓇᑕᖅᑐᒃᓴᓄᑦ ᐱᔪᒪᔭᐅᓂᐅᔪᓄᑦ. ᓈᒻᒪᙱᓗᐊᖅᑐᒥ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᓄᓇᕗᒻᒥ ᐊᖏᕈᑕᐅᔪᖅ ᐊᑎᓕᐅᖅᑕᐅᑎᓪᓗᒍ. ᐊᒻᒪᓗ ᓱᓕ ᐊᒥᐊᒃᑯᕗᖅ ᐊᖏᔪᐊᓗᖕᒥ ᓈᒻᒪᙱᓐᓂᐅᔪᒥ ᐅᓪᓗᒥᐅᔪᒥ ᐱᐅᓂᖓᓂ ᐊᒻᒪ ᐊᖏᓂᖓᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᑐᓂᔭᐅᔪᓂ ᐊᓯᖏᓐᓄᑦ ᓄᓇᖃᖅᑎᐅᔪᓄᑦ ᑲᓇᑕᒥ," ᐅᖃᓕᒫᕐᓂᖃᖅᐳᖅ ᐅᓂᒃᑳᓕᐊᖑᔪᒥ ᓄᓇᕗᒻᒥ ᑐᙵᕕᒃᑯᓐᓂᙶᖅᑐᒥ, ᓄᓇᑖᕋᓱᐊᕐᓂᕐᒧᑦ ᑲᑐᔾᔨᖃᑎᒌᖑᔪᖅ ᑭᒡᒐᖅᑐᐃᔪᒥ 33,000 ᐃᓄᖕᓂ ᓄᓇᕗᒻᒥ, ᐋᖅᑭᒃᓱᖅᓯᒪᔪᒥ ᖃᓂᒋᔭᖓᓂ 85 ᐳᓴᓐᑎᒥ ᓄᓇᕘᑉ ᐃᓄᒋᐊᖕᓂᖏᓐᓂ.
"ᐊᑐᖅᑕᐅᓂᑰᔪᓂ ᐱᖅᑯᓯᕆᙱᑕᓄᑦ ᐱᐅᓯᖃᖅᑎᑕᐅᓂᕐᒥ ᑐᕌᒐᕆᔭᐅᔪᓄᑦ ᐊᒻᒪ ᐊᕐᕌᒍᒐᓵᓗᖕᓂ-ᐊᑯᓂᐅᔪᓂ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂᑦ–ᐊᑦᑎᖕᓂᖅᓴᐅᔪᓂ ᐊᒃᑐᐃᓲᖑᕗᑦ ᓄᓇᕗᒻᒥ ᐃᓄᖕᓂ ᒫᓐᓇᒧᑦ ᑎᑭᖦᖢᒍ. ᐱᓕᕆᖃᑎᖃᕐᓂᕐᒥ ᓄᓇᕗᒻᒥ ᐃᓄᖕᓂ, ᑲᓇᑕ ᐆᒪᔪᓐᓇᖅᐳᑦ ᓱᓕᓂᕋᐃᔪᓂ ᓄᓇᕗᒻᒥ ᐊᖏᕈᑕᐅᔪᒥ, ᐱᕈᖅᓴᐃᓗᑎᒃ ᐃᓅᖃᑎᒌᖑᔪᓄᑦ ᑕᐃᒪᐃᓪᓗᐊᖅᑎᑕᐅᓂᐅᔪᒥ, ᐊᖏᒡᓕᒋᐊᖅᓯᓗᓂ ᑮᓇᐅᔾᔭᒃᓴᓂᕐᒧᑦ ᐱᕕᒃᓴᖃᕐᓂᐅᔪᒥ ᐊᒻᒪᓗ ᑕᑯᒃᓴᐅᑎᑦᑎᓗᑎᒃ ᓯᕗᓕᐅᖅᑎᐅᓪᓚᕆᖕᓂᐅᔪᒥ ᐅᑭᐅᖅᑕᖅᑐᒥ ᓄᓇᐅᔪᒥ."