Skip to content

ᓄᓇᕗᒻᒥᐅᑦ ᖃᖓᑕᔪᑦ ᑕᐅᑐᖕᓇᑎᒃ ᐊᑕᐅᓯᙳᖅᑎᑕᐅᓂᖓ ᖃᓂᒡᓕᓕᖅᑎᓪᓗᒍ

ᐅᔾᔨᕆᓚᐅᙱᓐᓂᕈᕕᑦ, ᐃᓱᓕᕝᕕᒃᓴᖓ ᐃᓄᓕᒫᓄᑦ ᐅᖃᖃᑎᖃᕐᓂᐅᔪᖅ ᑲᑎᓐᓂᐅᔪᒥ ᑲᓇᐃᑎᐊᓐ ᓄᐊᑦᒥ ᐊᒻᒪ ᕘᔅᑎᐊᒥ, ᒪᕐᕉᒃ ᖃᖓᑕᓲᖅᑎᓪᓗᐊᑕᐅᔪᑦ ᐱᔨᑦᑎᕋᖅᑐᓂ ᓄᓇᕗᒻᒥ, ᖄᖏᓚᐅᖅᐳᖅ ᐅᓪᓗᑐᐃᓐᓇᒥ ᑎᓯᐱᕆ 14−ᒥ.

ᐱᓇᓱᐊᕈᓯᐅᓚᐅᖅᑑᑉ ᐅᓂᒃᑳᓕᐅᕐᓂᖃᓚᐅᙱᒃᑯᓂ ᐅᖃᖃᑎᖃᕐᓂᐅᔪᒧᑦ, ᐱᓕᕆᓂᐅᔪᖅ ᐃᓄᓕᒫᑦ ᑐᓴᐅᒪᑎᑕᐅᓇᔭᓚᐅᙱᑦᑎᐊᖅᐳᑦ ᑭᓯᐊᓂ ᑭᖑᕙᓗᐊᖅᑎᓪᓗᒍ.

ᐃᖏᕐᕋᔪᓕᕆᔨᒃᑯᑦ ᑲᓇᑕᒥ ᐅᖃᖃᑎᖃᕐᓂᐅᔪᑦ ᐊᑕᐅᓯᙳᖅᑎᑕᐅᓂᖓᓂ ᑭᒡᓕᖃᖅᑎᑕᐅᕌᓂᓚᐅᖅᐳᑦ ᐊᖏᓂᕆᔭᖓᓄᑦ. ᓂᕈᐊᖅᑕᐅᓯᒪᔪᓄᑦ ᖃᔅᓰᓐᓇᓂᒃ ᐃᓄᖕᓂ ᐅᖃᖃᑎᒋᔭᐅᓚᐅᖅᐳᑦ ᐊᑕᐅᓯᙳᖅᑎᑕᐅᓂᖓᓂ ᑭᐅᔾᔪᑎᒃᓴᓕᐅᕐᓂᕐᒧᑦ ᐊᔾᔨᒌᙱᕈᓘᔭᖅᑐᓄᑦ ᐅᖃᐅᓯᐅᓂᐅᔪᓄᑦ, ᐃᓚᖃᖅᑐᒥ ᖃᖓᑦᑕᐅᑎᓂᑦ ᐊᑭᖏᓐᓂ, ᐃᖅᑲᓇᐃᔮᒃᓴᓄᑦ, ᐅᓯᑲᑦᑕᕐᓂᕐᒧᑦ, ᐊᑐᐃᓐᓇᖃᕐᓂᕐᒥ ᓄᓇᓕᖕᓄᑦ, ᐊᑦᑕᓇᔾᔭᐃᖅᓯᒪᓂᕐᒧᑦ, ᐊᕙᑎᓕᕆᓂᕐᒧᑦ, ᐊᒻᒪ ᓄᓇᖃᖅᑳᖅᓯᒪᔪᓄᑦ ᐃᓱᒪᒋᔭᐅᓂᐅᔪᓄᑦ, ᐊᓯᖏᓐᓂᓪᓗ.

ᐅᖃᐅᓯᒃᓴᐅᔪᓂ ᑕᒪᐃᑎᒍᑦ ᐃᓄᓕᒫᓂᑦ ᐱᔭᐅᑐᐃᓐᓇᖃᑦᑕᓚᐅᖅᐳᑦ ᑎᑎᕋᕐᓂᒃᑯᑐᐊᖅ.

ᐃᖏᕐᕋᔪᓕᕆᔨᒃᑯᑦ ᒥᓂᔅᑕᖓ ᒫᒃ ᒑᓅ ᑐᓂᓯᒍᓂ ᐊᑐᖁᓇᔭᖅᑕᒥᓂᑦ, ᓂᕆᐅᖕᓂᐊᖅᐳᑎᑦ ᖃᓄᐃᑉᐸᓚᐅᕐᓂᖏᓐᓂ ᓱᓇᒃᑯᑖᓂᑦ ᐃᓚᖃᕐᓂᐊᕐᓂᖓᓂ ᒥᑭᑦᑐᒻᒪᕆᑯᓗᖕᒥ ᐃᓄᓕᒫᓂᑦ ᑭᐅᔾᔪᑎᖏᓐᓂᑦ. ᐃᒪᐃᖁᔨᓂᐅᔪᑦ ᑕᒪᐃᑎᒍᑦ ᐃᓄᓕᒫᓄᑦ ᑐᓂᓯᓪᓗᐊᖅᐳᑦ ᑎᑎᕋᖅᓯᒪᔪᓂ ᑭᐅᔾᔪᑕᐅᔪᓂ ᐱᓇᓱᐊᕈᓯᕐᒥ ᒥᑭᓐᓂᖅᓴᐅᔪᒥ ᐅᖃᐅᔾᔨᓂᐅᔪᒥ ᕿᒪᐃᑎᑦᑎᕗᖅ ᐅᒃᐱᕈᓱᙱᓐᓂᐅᔪᒥ ᐃᔅᓴᒃᓯᒪᓂᐅᔪᒥ ᐱᓕᕆᓂᐅᔪᒥ.

ᓲᖃᐃᒻᒪ ᑐᐊᕕᕐᓇᕐᓂᖅᑕᖃᖅᐳᖅ ᑭᒡᓕᖃᖅᑎᑦᑎᓂᕐᒥ ᐊᖏᓂᕆᔭᖓᓂ ᐅᖃᖃᑎᖃᕐᓂᐅᔪᓂᑦ ᑭᓯᐊᓂ ᕿᒪᒃᑕᐅᕗᒍᑦ ᓂᕆᐅᖕᓂᕐᒧᑦ ᐃᓄᓕᒫᓂᒃ ᓂᕈᐊᖅᑕᐅᓯᒪᔪᓂ ᑲᑎᒪᔨᕐᔪᐊᖑᔪᓄᑦ ᐱᕕᒃᓴᖃᖅᑎᑕᐅᓂᐊᕐᓂᖏᓐᓂ ᑐᓂᓯᓂᕐᒥ ᑕᒪᒃᑭᓂ ᓂᕈᐊᖅᑕᐅᕕᒋᓯᒪᔭᖏᓐᓄᑦ ᐃᓱᒫᓘᑎᖏᓐᓂ ᑭᐴᔪᒧᑦ. ᐅᓄᕐᓂᐅᔪᓂ ᐃᓱᒫᓘᑕᐅᔪᓂ ᑕᑯᓯᒪᔭᑦᑎᓐᓂ ᐊᖏᕈᑕᐅᓇᓱᐊᖅᑐᒥ ᐊᑕᐅᓯᙳᖅᑎᑕᐅᓂᖓᓂ ᐊᒻᒪ ᓱᒃᑲᓂᖓᓂ ᐅᖃᖃᑎᖃᕐᓂᐅᔪᓂᑦ, ᐊᔪᕐᓇᖅᐳᖅ ᐅᒃᐱᕈᓱᖕᓂᕐᒧᑦ ᐊᒃᓱᕈᕈᑕᐅᔪᓂ ᓇᓗᓇᐃᖅᑕᐅᔪᓐᓇᕐᓂᖏᓐᓂ ᑐᑭᖃᑦᑎᐊᕐᓂᖏᓐᓂ

ᐅᖃᐅᓯᐅᓂᖓᓂ ᐃᖃᓗᖕᓂ ᒪᐃᔭᐅᔪᒧᑦ ᒫᑕᓕᓐ ᕆᐊᑦᕘᓐᒧᑦ, ᐊᖓᔪᖅᑳᖑᔪᒥ ᓄᓇᕗᒻᒥ ᑲᑐᔾᔨᖃᑎᒌᖑᔪᓄᑦ ᕼᐋᒻᓚᐅᔪᓄᑦ, ᑕᐃᒃᑯᐊᓘᓐᓃᑦ ᐅᖃᖃᑎᒋᔭᐅᔪᑦ ᑐᑭᓯᓂᖃᓗᐊᙱᓚᑦ ᐱᔾᔪᑎᖃᖅᑐᒥ ᐱᑕᖃᙱᓗᐊᕐᓂᖓᓂ ᐊᑐᐃᓐᓇᖃᖅᑎᑕᐅᓂᕐᒧᑦ ᐱᓪᓚᕆᐅᔪᓄᑦ ᐅᖃᐅᓯᒃᓴᓂ ᐊᑕᐅᓯᙳᖅᑎᑕᐅᓂᖓᓄᑦ.

ᖃᖓᑕᓲᖁᑎᓖᑦ ᓇᓗᓇᐃᖅᓯᕗᑦ ᐊᑕᐅᙳᙳᕆᐊᖃᕐᓂᖏᓐᓂ ᒥᒃᖠᒋᐊᖅᑎᑦᑎᓂᕐᒧᑦ ᒪᕐᕈᐃᓕᖓᓂᐅᔪᓂᑦ ᐱᔨᑦᑎᕋᕐᓂᐅᔪᓄᑦ ᐊᒻᒪ ᐊᖏᒡᓕᒋᐊᖅᓯᓗᑎᒃ ᑮᓇᐅᔭᓕᐅᕐᓂᐅᔪᒥ, ᑐᕌᖅᑎᑦᑎᓂᐊᖅᑐᒥ ᒪᑲᒪᔾᔪᑕᐅᔪᓐᓇᖅᑐᒥ. ᑕᒪᓐᓇ ᓈᒻᒪᒃᑑᔮᖅᐳᖅ ᓇᖕᒥᓂᖃᕐᓂᕐᒥᙶᖅᑐᒥ ᑭᓯᐊᓂ ᐊᑐᖅᑎᐅᔪᓄᑦ ᓇᖏᕐᓂᐅᔪᒥ, ᐊᔪᕐᓇᖅᐳᖅ ᐅᒃᐱᕈᓱᖕᓂᕐᒥ ᐊᑕᐅᓯᙳᖅᑎᑕᐅᓂᖓᓂ ᐱᕚᓪᓕᖅᑎᑦᑎᓂᐊᕐᓂᖓᓂ ᐃᑭᒪᒐᔪᒃᑐᓄᑦ ᐅᕝᕙᓘᓐᓃᑦ ᐅᓯᑲᑦᑕᕐᓂᕐᒧᑦ ᐅᓯᔨᐅᔪᓄᑦ.

ᐊᑭᑦᑐᕋᐅᑎᓂᖃᙱᓪᓗᑎᒃ, ᐊᑕᐅᓯᙳᖅᑎᑕᐅᔪᖅ ᑲᓇᐃᑎᐊᓐ ᓄᐊᑦ ᐃᓱᒪᖅᓱᕐᓂᖃᕐᓂᐊᖅᐳᖅ ᖁᕝᕙᕆᐊᖅᓯᓂᕐᒥ ᐊᑭᖏᓐᓂ ᐊᑭᕋᖅᑐᖅᑕᐅᙱᓪᓗᑎᒃ ᐊᑭᑦᑐᕋᐅᑎᔪᒥ ᖃᖓᑕᓲᖅᑎᐅᔪᒥᑦ. ᐃᓱᒪᓂᐅᔪᒥ ᖁᑦᑎᖕᓂᖅᓴᐅᔪᒥ ᖃᖓᑕᓂᕐᒧᑦ ᐊᑭᖓᓐᓂ ᐃᓱᒫᓗᖕᓇᖅᐳᖅ.

ᐃᖅᑲᐅᒪᔪᓐᓇᖅᐳᑎᑦ ᑲᓇᐃᑎᐊᓐ ᓄᐊᑦ ᐲᖅᓯᓚᐅᕐᓂᖓᓂ ᑲᖏᖅᖢᒑᐱᖕᒥ ᐊᕐᕌᓂ ᐃᓱᐊᓂ ᓇᓗᓇᐃᒃᑯᑕᖓᓐᓂ−ᐊᒥᖅᑳᕐᓂᐅᔪᖓ ᐊᖏᕈᑎᖓᓂ ᕘᔅᑎᐊᒃᑯᓐᓂ. ᐊᑕᐅᓯᙳᖅᑎᑕᐅᓂᖓ ᐊᖏᖅᑕᐅᒍᓂ, ᓄᖅᑲᖅᑎᑦᑎᓂᖃᔾᔮᙱᓚᖅ ᑲᓇᐃᑎᐊᓐ ᓄᐊᑦᒥ ᐅᐸᒃᐸᒍᓐᓃᕐᓂᖓᓂ ᓄᓇᓕᐅᔪᒥ ᐊᖅᑯᑎᒋᔭᐅᔪᓄᑦ ᓄᓇᙳᐊᖓᓐᓂ.

ᐊᑕᐅᓯᖅ ᐃᓱᒫᓗᓪᓗᐊᑕᑦᑎᓐᓂ ᓄᓇᕗᑦ ᐱᔪᒪᓂᖃᙱᓐᓂᖓᓂ ᐱᓕᕆᓂᐅᔪᓄᑦ ᓇᓕᐊᑐᐃᓐᓇᓂ ᖃᖓᑕᓲᖅᑎᐅᔪᓄᑦ, ᐊᒻᒪ ᑕᐃᒪᐃᓐᓂᖓᓄᑦ ᐱᔪᒪᓂᖃᙱᓚᑦ ᓄᑖᖑᔪᒥ ᖃᖓᑕᓲᓕᕆᔨᐅᔪᓄᑦ. ᐆᒧᖓ ᑐᑭᖃᖅᐳᖅ ᖃᖓᑕᓲᖁᑎᓖᑦ ᓇᖕᒥᓂᕆᔭᐅᕗᑦ ᐃᓄᖕᓂ ᓄᓇᑦᓯᐊᕐᒥ ᐊᒻᒪ ᓄᓇᕕᖕᒥ ᐃᓄᖕᓂᐅᙱᑦᑐᖅ ᓄᓇᕗᒻᒥ.

ᓇᓗᓇᐃᖅᓯᔾᔪᑎᑐᐊᖑᔪᓐᓇᖅᑐᖅ ᓄᓇᕗᒻᒥᐅᑦ ᐃᓱᒪᒋᔭᐅᓂᖓᓂ ᐱᓪᓚᕆᐅᔪᒥ ᓂᐅᕕᖅᐸᒃᑐᑦ ᐃᓚᐅᖃᑕᐅᓂᖏᓐᓂ ᑮᓇᐅᔭᖃᖅᑎᑦᑎᓂᒃᑯᑦ. ᓇᓗᓇᙱᓚᖅ ᓄᓇᕗᒻᒥ ᒐᕙᒪᒃᑯᓐᓂ ᐃᓚᐅᖃᑕᐅᔾᔮᙱᓐᓂᖓᓂ ᐊᒃᓱᕈᕈᑎᖃᕋᓗᐊᖅᑎᓪᓗᒋᑦ ᓇᓂᓯᓂᕐᒥ ᖃᖓᑕᓲᒃᑯᑦ ᐊᐅᓪᓛᕐᓂᕐᒧᑦ ᑐᓂᓯᔨᐅᔪᒥᑦ (ᑕᑯᒍᒃ ᐱᓇᓱᐊᕈᓯᐅᓚᐅᖅᑐᒥ ᑐᓴᒐᒃᓴᓕᐊᖑᔪᒥ) ᐊᒻᒪ ᑕᑯᒃᓴᐅᔪᒥ ᐱᔪᒪᓂᖃᙱᓐᓂᐅᔪᒥ ᐊᐅᓚᑦᑎᓂᖏᓐᓂ ᓇᖕᒥᓂᖅ ᖃᖓᑕᓲᖓᓐᓂ.

ᑕᐃᒪᓐᓇ ᓵᙵᕗᒍᑦ ᐃᓄᖕᓄᑦ ᐊᕕᒃᑐᖅᓯᒪᓂᐅᔪᓄᑦ ᑲᑐᔾᔨᖃᑎᒌᖑᔪᓄᑦ ᐃᓕᓯᓂᖏᓐᓂ ᑮᓇᐅᔭᖏᓐᓂ ᑭᐳᒧᑦ. ᐅᒃᐱᕈᓱᒃᑯᑦᑕ ᑲᓇᐃᑎᐊᓐ ᓄᐊᑦᒥ ᐊᒻᒪ ᕘᔅᑎᐊᒥ, ᐊᐅᓚᑦᑎᓂᕐᒥ ᐊᑭᑦᑐᕋᐅᑎᓂᕐᒥ ᖃᖓᑕᓲᒥᒃ ᐊᔪᕐᓇᑦᑎᐊᖅᐳᖅ ᐅᑭᐅᖅᑕᖅᑐᒥ ᑭᓯᐊᓂ ᐊᑕᐅᓯᙳᖅᑎᑕᐅᓯᒪᓂᐅᔪᒥ ᑮᓇᐅᔭᓕᐅᕆᓂᐅᓂᐊᖅᐳᖅ.

ᐊᑕᐅᓯᙳᖅᑎᑕᐅᓂᖓ ᐱᒋᐊᖅᐸᑦ, ᑖᓐᓇ ᑮᓇᐅᔭᓕᐅᕐᓂᖅ ᕿᒪᒃᓯᓂᐊᖅᐳᖅ ᓄᓇᕗᒻᒥ. ᑕᐃᒪᑐᖅ ᐊᕕᒃᑐᖅᓯᒪᓂᐅᔪᓂ ᑲᑐᔾᔨᖃᑎᒌᖑᔪᑦ ᓇᓂᓯᓂᐊᖅᐳᑦ ᑮᓇᐅᔭᓂ ᓄᖅᑲᖅᑎᑦᑎᓂᕐᒧᑦ ᑕᐃᒪᐃᓕᓂᕐᒧᑦ ᓇᖕᒥᓂᖃᖅᑎᙳᕐᓗᑎᒃ ᐊᑕᐅᓯᙳᖅᑎᑕᐅᔪᒥ ᖃᖓᑕᓲᒥᑦ, ᐅᕝᕙᓘᓐᓃᑦ ᖃᖓᑕᓲᖅᑖᕐᓗᑎᒃ ᓄᓇᕗᒻᒥ ᓇᖕᒥᓂᕆᔪᓐᓇᕐᓂᕋᕋᔭᖅᑕᒥᓂᑦ.