ᓄᓇᕗᒻᒥᐅᑕᐃᑦ "ᕿᒻᒪᑰᕗᑦ, ᐊᒻᒪ ᐱᓪᓚᕆᐅᔪᓂ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐱᔭᕆᐊᖃᕐᓂᐊᖅᐳᑦ ᐊᙳᑎᓂᕐᒧᑦ," ᐅᖃᖅᐳᖅ ᑲᓇᑕᐅᑉ ᒪᓕᒐᓕᐅᖅᑎᖏᑕ ᐃᓚᒋᔭᐅᔪᖅ ᐃᐊᕆᒃ ᒥᓕᓗ, ᑲᓐᓲᕕᑎᒃᑯᑦ ᓈᒻᒪᙱᔾᔪᑎᒃᓴᖅᓯᐅᖅᑎ ᐅᑭᐅᖅᑕᖅᑐᒥ ᐱᓕᕆᓂᐅᔪᒧᑦ.
ᒥᓕᓗ ᐅᖃᐅᓯᒃᓴᓕᐅᓚᐅᖅᐳᖅ ᑭᖑᓂᑦᑎᐊᖓᒍᑦ ᓄᓇᑖᕋᓱᐊᕐᓂᐅᔪᒥ ᑲᑐᔾᔨᖃᑎᒌᖑᔪᑦ ᓄᓇᕗᒻᒥ ᑐᙵᕕᒃᑯᑦ (NTI) ᓴᖅᑭᑎᑦᑎᓚᐅᖅᑎᓪᓗᒋᑦ 205-ᓂ ᒪᒃᐱᖅᑐᒐᐅᔪᒥ ᐅᓂᒃᑳᓕᐊᖓᓂ ᐅᒃᑐᐱᕆ 21–ᒥ ᑐᓂᓯᔪᒥ ᐅᓂᒃᑳᕆᓯᒪᕐᔪᐊᖅᑐᒥ ᖃᐅᔨᓴᐃᓂᐅᔪᒥ ᓄᓇᕘᑉ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐃᓚᑰᓂᐅᔪᓂ ᑕᐅᑐᒃᖢᒍ ᐊᒥᐊᒃᑰᔪᒥ ᑲᓇᑕᒥ.
"ᓇᓕᒧᙱᓐᓂᐅᔪᑦ ᓴᖅᑭᑕᐅᔪᑦ ᐆᒪᙵᑦ ᐅᓂᒃᑳᓕᐊᒥ ᐱᕐᔪᐊᖑᕗᑦ," ᐅᖃᓚᐅᖅᐳᖅ ᒥᓕᓗ, ᑲᓇᑕᐅᑉ ᒪᓕᒐᓕᐅᖅᑎᖏᑕ ᐃᓚᒋᔭᐅᔪᒥ ᑭᓄᐊᕋ, ᐋᓐᑎᐊᕆᐅᒧᑦ. "ᓴᐳᒻᒥᑦᑎᐊᖅᑐᒥ ᒐᕙᒪᐅᔪᒥ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᓂᖃᕐᓂᐊᖅᐳᖅ ᐱᓪᓚᕆᐅᔪᓄᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ, ᐅᓯᑲᑦᑕᕐᓂᕐᒧᑦ ᐊᖅᑯᑕᐅᔪᓄᑦ, ᐊᒻᒪ ᖃᕋᓴᐅᔭᒃᑰᕐᓂᐅᔪᒥ ᑲᑎᙵᓂᖃᕐᓂᐅᔪᒥ ᑮᖏᖅᓯᓂᕐᒧᑦ ᐱᔪᓐᓇᕐᓂᕆᔭᖓᓂ ᐅᑭᐅᖅᑕᖅᑐᒥ ᑲᓇᑕᒥ. ᐱᔪᓐᓇᖅᑎᓐᓂᐊᕆᕙᕗᑦ ᓄᓇᕗᒻᒥ 100 ᐳᓴᓐᑎᒥ ᐃᑲᔪᕈᑎᒃᓴᓄᑦ ᑮᓇᐅᔭᓂᒃ ᐃᓯᖅᐸᓪᓕᐊᓂᖏᓐᓂ, ᐱᔪᓐᓇᖅᑎᑦᑎᓗᓂ ᓄᓇᕗᒻᒥ ᒐᕙᒪᐅᔪᓂ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᓂᖏᓐᓂ ᓄᓇᓕᖕᓂ ᓯᕗᓪᓕᐅᔾᔭᐅᖁᔭᐅᔪᓂᑦ."
ᓄᓇᕗᒻᒧᑦ ᑲᓇᑕᐅᑉ ᒪᓕᒐᓕᐅᖅᑎᖏᑕ ᐃᓚᒋᔭᐅᔪᖅ ᒧᒥᓛᖅ ᖃᖅᑲᖅ ᐅᓂᒃᑳᕆᕗᖅ ᐃᒡᓗᒃᓴᖃᖅᑎᑕᐅᓂᖓᓂ ᐊᒻᒪ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᓄᓇᕗᒻᒥ ᐊᒻᒪ ᐅᑭᐅᖅᑕᖅᑐᓕᒫᒥ "ᑐᐊᕕᕐᓇᕐᓂᐅᔪᒥ ᖃᓄᐃᓕᖓᓂᐅᔪᒥ."
"ᒫᓐᓇᓕᓴᐅᔪᒥ ᐃᒡᓗᒃᓴᖃᕐᓂᕐᒧᑦ ᐳᓚᕋᕐᓂᖃᓚᐅᖅᐳᖓ ᑕᒪᒃᑭᓂ ᑭᕙᓪᓕᕐᒥ ᐊᒻᒪ ᕿᑎᕐᒥᐅᓂ ᐊᕕᒃᑐᖅᓯᒪᓂᐅᔪᓄᑦ ᐊᒻᒪ ᑕᑯᓚᐅᖅᑕᒃᑲ ᐃᓄᖕᓄᑦ ᐊᑐᖅᑕᐅᔪᒃᓴᐅᙱᑦᑐᑦ. ᐊᖏᓂᐅᔪᒥ ᐋᖅᑭᒃᓱᖅᑕᐅᔭᕆᐊᖃᕐᔪᐊᖅᑐᓄᑦ ᐱᔭᕆᐊᓕᖏᓂ ᑲᒪᓇᕐᔪᐊᓚᐅᖅᐳᖅ. ᐊᖏᕐᕋᓂ ᑕᑯᓚᐅᖅᐳᖓ ᓄᑕᕋᓛᓕᖕᓂ ᐊᒻᒪ ᓱᕈᓯᕐᓂᑦ ᐸᒻᒥᐅᓗᐊᖅᑐᓂ, ᐅᖁᖃᕐᔪᐊᖅᑐᓂ ᐊᒻᒪᓗ ᐃᑲᔪᕈᑎᒃᓴᖃᔮᕋᑎᒃ ᓄᑖᙳᕆᐊᖅᑎᑕᐅᓂᖏᓐᓄᑦ ᐊᕐᕌᒍᒐᓴᓄᑦ. ᐅᓇ ᓄᓇᕗᒻᒥ ᑐᙵᕕᒃᑯᑦ ᐅᓂᒃᑳᓕᐊᖓ ᓇᓗᓇᐃᖅᓯᑐᐃᓐᓇᖅᐳᖅ ᑕᑯᓚᐅᖅᑕᓐᓂ. ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᒥᑭᓗᐊᖅᑐᒻᒪᕆᐊᓗᖕᒥ ᑮᓇᐅᔭᖃᖅᑎᑕᐅᓲᖑᕗᖅ ᒐᕙᒪᑐᖃᒃᑯᓐᓂ. ᖄᖏᐅᑎᓯᒪᕐᔪᐊᖅᐳᖅ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐊᒻᒪ ᓄᓇᕗᒻᒥ ᐃᒡᓗᖃᖅᑎᑕᐅᓂᐅᔪᒥ ᐃᓱᒪᒋᔭᐅᕐᔪᐊᕐᓂᖓᓂ," ᖃᖅᑲᖅ ᐅᖃᓚᐅᖅᐳᖅ ᑭᖑᓂᑦᑎᐊᖓᒍᑦ ᐅᖃᓚᐅᖅᑳᕋᓂ ᐱᓇᓱᐊᕈᓯᓪᓗᐊᓂ 8–ᓂ ᓄᖅᑲᖓᓚᐅᑲᖕᓂᐊᖅᐳᖅ ᐃᖅᑲᓇᐃᔮᖓᓂ, ᐅᖃᐅᔾᔪᖅᑕᐅᓯᒪᓂᖓᓂ ᓘᒃᑖᖓᓂ, ᐱᔾᔪᑎᖃᖅᑐᒧᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᐃᓱᒫᓘᑕᐅᔪᓄᑦ. "ᓈᒻᒪᒃᑐᒥ ᐃᒡᓗᒃᓴᖃᖅᑎᑦᑎᓂᕐᒧᑦ ᒥᑭᓛᖑᔪᒥ ᐱᓕᕆᐊᖑᓪᓗᐊᖅᐳᖅ ᐊᕐᕌᒍᒐᓴᓂ ᒐᕙᒪᑐᖃᒃᑯᓐᓂ ᐃᒃᓯᓐᓇᖅᑕᐅᓯᒪᓂᐅᔪᒥ, ᐱᖅᑯᓯᕆᙱᑕᓄᑦ ᐱᐅᓯᖃᓕᖅᑎᑕᐅᓂᕐᒥ ᐊᒻᒪ ᐱᑦᑎᐊᖅᑕᐅᙱᓐᓂᐅᔪᒥ."
ᐅᑭᐅᖅᑕᖅᑐᒥ ᐱᓕᕆᓂᕐᒧᑦ ᒥᓂᔅᑕᖓ ᑖᓐ ᕚᓐᑎᐅᓪ ᑐᙵᓱᒃᑎᑦᑎᓚᐅᖅᐳᖅ ᓄᓇᕗᒻᒥ ᑐᙵᕕᒃᑯᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᖃᐅᔨᓴᖅᑕᐅᓂᖓᓂ.
"ᐃᓱᒪᕗᖓ ᑭᓱᑐᐃᓐᓇᖅ ᐅᕙᑦᑎᓐᓂ ᐃᑲᔪᖅᑐᒥ ᓴᓇᓂᕐᒧᑦ ᐱᐅᓂᖅᓴᐅᔪᒥ ᐊᖅᑯᒻᒥ ᓄᓇᙳᐊᖑᔪᒥ ᐅᕗᖓ ᖃᓄᖅ ᑭᐅᕙᖕᓂᑦᑎᓐᓂ ᑖᔅᓱᒥᖓ ᐊᑲᐅᙱᓕᐅᕈᑕᐅᔪᒥ ᐱᐅᕗᖅ," ᕚᓐᑎᐅᓪ ᐅᖃᐅᔾᔨᓚᐅᖅᐳᖅ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓂ. "ᖁᕕᐊᑉᐳᖓ ᐱᓕᕆᖃᑎᖃᕐᓂᐊᕐᓂᕐᒥ ᐱᓕᕆᖃᑎᒋᓗᒋᑦ ᓄᓇᕗᒻᒥ ᑐᙵᕕᒃᑯᓐᓂ ᐊᒻᒪᓗ ᓄᓇᕗᒻᒥ ᒐᕙᒪᒃᑯᓐᓂ ᖃᓄᖅ ᑭᐅᔪᓐᓇᕐᓂᑦᑎᓐᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐃᓚᑰᓂᐅᔪᓂ ᓯᕗᒻᒧᐊᖅᐸᓪᓕᐊᓗᑕ. ᐅᓇ ᑕᑯᕙᕋ ᐱᐅᓪᓗᓂ ᐱᒋᐊᕈᑕᐅᓂᖓᓂ ᐊᒻᒪᓗ ᐱᓕᕆᖃᑎᒋᔪᓐᓇᖅᑕᑦᑎᓐᓂ ᓯᕗᓂᒃᓴᐅᔪᒥ ᑲᑎᙵᓗᑕ.
"ᐃᓂᒃᓴᖃᐃᓐᓇᐅᔭᖅᑐᖅ ᐱᐅᓯᒋᐊᖅᑎᑦᑎᓂᕐᒧᑦ ᐊᒻᒪᓗ, ᖃᐅᔨᒪᕗᓯ, ᒐᕙᒪᕗᑦ ᐊᖏᖅᓯᒪᓂᖃᖅᐳᖅ ᐱᐅᓯᒋᐊᖅᑎᑦᑎᓂᕐᒧᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᓄᓇᕗᒻᒥ ᐊᒻᒪᓗ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᑲᓇᑕᓕᒫᒥ. ᐊᑯᓂᐊᓗᒃ ᖃᐅᔨᒪᓯᒪᕗᒍᑦ ᐊᖏᕐᔪᐊᖅᑐᒥ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐃᓚᑰᓂᖃᕐᓂᖓᓂ ᓄᓇᕗᒻᒥ, ᐃᓚᖃᖅᑐᒥ ᐃᒡᓗᒃᓴᖃᖅᑎᑦᑎᓂᕐᒧᑦ."
ᓄᓇᕗᒻᒥ ᑐᙵᕕᒃᑯᑦ ᐅᓂᒃᑳᓕᐊᖓ ᓇᓗᓇᐃᖅᓯᕗᖅ 41 ᐳᓴᓐᑎᖓᓂ ᓄᓇᕘᑉ ᐃᒡᓗᖁᑎᖏᓐᓂ ᐊᖏᔪᒥ ᐊᖅᑭᒃᓱᒃᑲᓐᓂᕆᐊᖃᕐᓂᖏᓐᓂ; 14 ᐳᓴᓐᑎᑐᐊᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ ᑐᓂᓯᔨᖃᖅᐳᑦ (ᑕᐅᑐᒃᖢᒍ 85 ᐳᓴᓐᑎᒥ ᑲᓇᑕᒥᐅᑕᓂᑦ ᑕᒪᐃᑎᒍᑦ); ᐃᒪᕐᒧᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐊᒻᒪ ᐊᒃᑕᑯᓄᑦ ᐊᐅᓚᑕᐅᓂᐅᔪᓂ ᐃᒡᓗᕐᔪᐊᓂ ᐃᓚᑰᓂᖃᖅᐳᑦ ᓲᕐᓗ ᐱᐅᙱᑦᑐᓂ ᐅᕝᕙᓘᓐᓃᑦ ᐱᐅᙱᕐᔪᐊᖅᑐᓂ ᖃᓄᐃᓕᖓᓂᖓᓂ; ᐅᓯᑲᑦᑕᕐᓂᕐᒧᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐃᓚᑰᓂᖃᖅᐳᖅ ᓲᕐᓗ ᐊᖅᑯᑎᕐᔪᐊᖑᔪᓂ, ᑐᓚᒃᑕᕐᕕᖕᓂ ᐊᒻᒪ ᑭᓴᕐᕕᖕᓂᑦ; ᓄᓇᕗᑦ ᑲᓇᑕᐅᑉ ᐊᕕᒃᑐᖅᓯᒪᓂᖏᓐᓂ ᐅᑭᐅᖅᑕᖅᑐᒥᓪᓘᓐᓃᑦ ᐊᕕᒃᑐᖅᓯᒪᓂᖏᓐᓂ ᐊᑐᐃᓐᓇᖃᙱᑦᑐᓂ ᖃᕋᓴᐅᔭᒃᑰᕋᑕᐅᔪᓂ ᓱᒃᑲᓂᐅᔪᓂ 25 megabits ᐊᑐᓂ ᓴᑲᓐᒧᑦ ᐅᖓᑖᓄᑦ; ᓄᓇᓕᐅᔪᑦ ᐊᑐᓲᖑᕗᑦ ᐅᖅᓱᐊᓗᑐᐃᓐᓇᕐᒨᖅᑐᓄᑦ ᐃᑯᒪᐅᑎᓂᑦ, ᒥᑭᑦᑐᑯᓗᖕᒥ ᐱᕙᓪᓕᐊᑎᑕᐅᓂᖃᖅᖢᓂ ᓄᓇᒥᙶᖅᑐᒥ ᐆᒻᒪᖅᑯᑎᓄᑦ ᐊᒻᒪᓗ ᐊᕕᒃᑐᖅᓯᒪᓂᐅᔪᒥ ᐆᒻᒪᖅᑯᑎᓄᑦ ᑐᓂᓯᓂᐅᔪᒥ ᐱᑕᖃᕐᓇᓂ.