ᓄᓇᓕᓕᒫᑦ ᐳᕙᒃᓗᒃᑐᖅᑕᖃᕐᒪᖔᑕ (TB)-ᒥᒃ ᖃᐅᔨᓴᖅᑕᐅᓂᐊᕐᒪᑕ ᐱᒋᐊᖅᖢᑎᒃ ᕿᑭᖅᑕᕐᔪᐊᒥ ᑲᔪᓯᑦᑎᐊᓚᐅᖅᑐᖅ ᓱᒃᑲᓕᓪᓗᓂᓗ, ᓄᓇᕗᒥ ᐃᓗᐊᖅᓴᐃᔨᒃᑯᑦ ᐊᖓᔪᖅᑳᖓ ᑭᒻ ᐲᑯ ᐅᖃᓚᐅᖅᑐᖅ ᔮᓐᓄᐊᕆ 8-ᒥ. ᑕᒃᑯᐊ ᐅᓂᒃᑳᓚᐅᖅᑐᑦ ᑕᒪᑐᒪᓂ ᓯᑕᓂᒃ ᐅᓪᓗᓂᒃ ᑎᑭᓯᒪᓕᖅᑎᓪᓗᒋᑦ ᕿᓚᓈᓚᐅᕐᒪᑕ 7-ᓂᒃ ᖁᓕᓄᑦ ᐱᓇᓱᐊᕈᓯᓂᒃ ᓄᓇᕗᒥ ᐃᖏᕐᕋᓂᐊᕋᓱᒋᓪᓗᑎᒃ, $1-ᒥᓕᐊᓐᑖᓚᒥᒃ ᐊᑭᖃᕐᓂᐊᖅᑐᖅ ᑖᓐᓇ ᐱᓇᓱᐊᕆᔭᖓᑦ ᐃᓗᐊᖅᓴᐃᔩᑦ ᓄᖅᑲᖅᑎᑦᑎᓇᓱᐊᖅᖢᑎᒃ ᐳᕙᒃᓗᒃᑐᖃᐅᖃᑦᑕᓕᕐᒪᑦ ᕼᐊᒪᓚᖓᓂ.
ᐹᑯ ᐅᖃᓚᐅᖅᑐᖅ ᐳᓚᕋᑲᑕᒍᓯᖓᑦ ᐊᑭᑐᔫᔮᖅᑐᖅ, ᑭᓯᐊᓂᓕ ᑲᓕᒐᓂᒃ ᖃᐅᔨᓴᐅᑎᓂᒃ ᓂᐅᕕᕆᐊᖃᓚᐅᕋᒥᒃ ᐊᑐᕐᓂᖃᕐᓂᐊᖅᑐᓂᒃ ᓄᓇᓕᖕᓂ ᐳᕙᒃᓗᒃᑐᖃᐅᖅᑐᓂ ᐊᓯᖏᓐᓄᓪᓗ ᐋᓐᓂᕌᓗᖕᓄᑦ ᑎᑭᑕᐅᓐᓂᖅᐸᑕ ᐊᑐᕈᓐᓇᕐᓂᐊᕐᒪᑕ.
“ᐋᑐᕚᒥᐅᑦ ᐋᓐᓂᐊᕕᖓᓂᑦ Civic Hospital-ᒥᑦ ᑮᓇᐅᔭᓕᕆᔨᖓᓂᒃ ᓇᒃᓴᑲᐃᓐᓇᕋᑦᑕ ᐃᓗᐊᖅᓴᐅᑎᓂᒃ ᓂᐅᕕᕆᐊᖃᖅᑕᑦᑎᓐᓂᒃ ᐅᔾᔨᖅᓱᕐᓂᐊᕐᒪᑦ ᐊᒻᒪᓗ ᐃᑲᔪᕐᓗᓂ ᐸᕐᓇᐃᔪᑎᒋᓂᐊᖅᑕᑦᑎᓐᓄᑦ ᑕᒪᑐᒪᓂ,” ᐅᖃᕆᓪᓗᓂ ᐲᑯ ᐅᖃᓘᑎᒃᑯᑦ ᕿᑭᖅᑕᕐᔪᐊᒥᑦ. “ᐅᖃᐅᑎᔪᓐᓇᖅᑕᒋᑦ ᑕᒪᑐᒪᓂ, ᐱᖓᓱᐃᓐᓇᕐᓂᒃ ᐅᓪᓗᐃᓐᓇᕐᓂᒃ ᓄᓇᓕᖕᓂ ᐊᑐᕐᓂᖃᕐᓂᖓ ᓇᓗᓇᕈᓐᓃᓴᐅᑎᒋᓚᐅᖅᑐᖅ.”
ᑕᐃᒪᓐᓇ ᐃᓗᐊᖅᓴᐃᔩᑦ ᓄᓇᓕᖕᓄᑦ ᓂᐅᕈᑲᑕᒃᖢᑎᒃ ᐊᑐᕆᐊᖃᕐᒪᑕ 24-ᓂᒃ ᐱᔨᑦᓯᕋᖅᑎᓂᒃ ᓄᓇᓕᖕᓂᑦ ᐊᒻᒪᓗ ᓇᖕᒥᓂᖅ ᓇᒃᓴᖅᖢᑎᒃ, ᐊᔾᔨᐅᖏᑦᑐᒥᒃ ᐊᓯᑦᑎᓐᓂᑦ ᒐᕙᒪᑎᓂᑦ ᑕᒫᓂ ᑲᒪᔪᑎᓕᐅᕋᓱᐊᕋᑦᑕ ᑕᐃᒪᖓᓄᑦ ᐳᕙᒃᓗᒃᑐᓕᕆᔪᑏᑦ ᐱᑕᖃᖁᓪᓗᒋᑦ ᐃᓄᐃᑦ ᓄᓇᓕᖏᓐᓂ. ᑐᖁᕋᖅᑐᐊᓘᓕᓚᐅᖅᓯᒪᖕᒪᑕ ᐳᕙᒃᓗᒃᑐᑦ 1950-ᓂ 1960-ᓂᓗ, ᑕᐃᓱᒪᓂ ᐋᓐᓂᐊᖅᑐᑦ ᐊᐅᓪᓚᖅᑎᑕᐅᕙᔪᖕᒪᑕ ᖃᓪᓗᓈᓄᑦ ᐳᕙᒃᓗᒃᑐᒃᑯᕕᖕᓄᑦ - ᐃᓚᖏᑦ ᑕᐅᓇᓃᓱᑎᒃ ᑐᖁᓐᓂᕐᒪᑕ ᐅᑎᓚᐅᖅᓯᒪᖏᑦᑐᑦ - ᑭᓯᐊᓂᓕ ᐃᓚᖏᓐᓄᑦ ᐳᐃᒍᖅᑕᐅᓚᐅᖅᓯᒪᖏᑦᑐᑦ.
ᐊᓱᐃᓛᒃ ᑕᒪᑐᒪᓂ ᑐᑭᓯᑎᑦᑎᓇᓱᐊᖅᖢᑕ ᖃᖓᑕᓲᓂᒃ ᑲᑐᔾᔨᓪᓗᑕ ᐊᑐᖅᑐᐊᓕᓚᐅᖅᐳᒍᑦ ᓄᓇᓕᖕᓄᑦ ᓂᐅᕈᑲᑕᓯᒋᐊᖅᖢᑕ ᓯᕗᓪᓕᖅᐹᒥᒃ ᓇᒃᓴᓚᐅᖅᑐᒍᑦ ᑎᒥᖁᑎᒋᔭᐅᔪᓄᑦ ᐊᖓᔪᖅᑳᓂᒃ ᑎᑭᓯᒪᓚᐅᖅᑐᑦ ᐅᓐᓄᒃᓴᒃᑯᑦ ᐅᓐᓄᐊᓕᒫᕐᓗ ᑕᓪᓕᒻᒥᕐᒥ.
ᓯᕗᓕᖅᑎ ᐹᓪ ᖁᐊᓴᖅ, ᐋᓐᓂᐊᖃᕐᓇᖏᑦᑐᓕᕆᔨᒃᑯᓪᓗ ᒥᓂᔅᑕᖓ ᐹᑦ ᐊᕐᓇᑲᖅ, ᐃᓄᐃᑦ ᑕᐱᕇᒃ ᑲᓇᑕᒥ ᐊᖓᔪᖅᑳᖓᓗ ᓃᑕᓐ ᐅᐱᑦ, ᓄᓇᕗᑦ ᑐᓐᖓᕕᒃᑯᓪᓗ ᐊᖓᔪᖅᑳᖓ ᐊᓗᑭ ᑰᑦᑎᖅ ᐊᒻᒪᓗ ᕿᑭᖅᑖᓂ ᐃᓄᐃᑦ ᑲᑐᔾᔨᖃᑎᒌᖓᑦ ᐊᖓᔪᖅᑳᖓ ᐲ.ᔩ.ᐊᕿᐊᕈᖅ ᕿᒥᕈᒋᐊᖅᑐᕐᓂᐊᖅᑐᑦ ᑖᓱᒥᖓ ᐃᓗᐊᖅᓴᐃᔩᑦ ᑲᓕᒐᖁᑎᐊᓂᒃ ᐳᕙᒃᓗᒃᑐᓂᒃ ᖃᐅᔨᓴᕐᕕᐊᓂᒃ, ᐊᒻᒪᓗ ᓄᓇᓕᖕᒥᐅᑦ ᐊᖓᔪᖅᑳᖏᑦ ᑲᑎᒪᖃᑎᒋᒋᐊᖅᑐᕐᓗᓂᔪᒃᓗ, ᓂᕆᕕᒃᔪᐊᖅᑎᑕᐅᓚᐅᕐᒪᑕ.
ᐃᑲᔪᖅᓴᖅᑕᐅᓪᓗᑎᒃ ᖃᓪᓗᓈᓂ ᐋᓐᓂᐊᕕᖕᓄᑦ ᕿᓚᒥ ᑲᒪᒋᔭᐅᓴᐅᑎᒋᔪᓐᓇᓚᐅᕐᒪᑦ ᖃᐅᔨᒪᑎᑦᑎᓇᓱᐊᖅᖢᑎᒃ ᐳᕙᒃᓗᒃᑐᓂᒃ ᖃᐅᔨᓴᖅᑏᑦ ᐋᕿᒃᑕᐅᓚᐅᕐᒪᑕ ᓄᓇᖃᖅᑳᖅᑐᓂᒃ ᐱᔨᑦᓯᕋᖅᑏᑦ ᒥᓂᔅᑕᖓᓄᑦ ᔩᓐ ᐱᓕᐹᑦᒧᑦ, ᐅᖃᓚᐅᕐᒪᑦ ᐅᑭᐊᒃᓵᖅ ᓄᖑᓴᐃᓂᐊᕐᓂᕋᖅᖢᓂ ᐳᕙᒃᓗᒃᑐᓂᒃ ᐃᓄᐃᑦ ᓄᓇᓕᖏᓐᓂ.
ᑕᐃᒪᓐᓇ ᐋᕿᒃᓯᒪᑎᓪᓗᒋᑦ “ᑕᑎᒌᒃᖢᑎᒃ ᐃᓗᐊᖅᓴᐃᔩᑦ ᑲᒪᓴᐅᑎᒋᔪᓐᓇᓚᐅᕐᒪᑕ ᓄᓇᓕᖕᒥᐅᓄᑦ ᐅᔾᔨᖅᓱᕈᑎᓂᒃ”, ᐋᕿᒃᓱᐃᓪᓗᑎᒃ ᕿᑭᖅᑕᕐᔪᐊᒥ ᕿᓚᓈᖅᑐᒍᑦ “ᑲᔪᓰᓐᓇᕈᓐᓇᖅᖢᓂᓗ ᑕᐃᒪᓐᓇ ᐱᒋᐊᖃᖅᐸᑕ ᓄᓇᓕᓕᒫᓂ ᓄᓇᕗᒥ,” ᐅᖃᕆᓪᓗᓂ, ᑕᒪᑐᒥᖓ ᐋᓐᓂᐊᒥᒃ ᓄᖑᓴᐃᓇᓱᐊᕐᓗᑎᒃ.
ᕿᑭᖅᑕᕐᔪᐊᒥᐅᑦ ᒥᔪᖓ ᒥᐊᓕ ᕿᓕᖅᑎ, ᖁᔭᓕᔪᖅ ᓄᓇᓕᖓ ᐃᑲᔪᖅᑕᐅᓴᐅᑎᒋᖕᒪᑦ, ᑭᓯᐊᓂᓕ ᐊᐃᑦᑖᕈᓱᓚᐅᖅᑐᕉᖅ ᐃᒡᓗᓕᕆᔨᕐᔪᐊᒃᑯᑦ ᒥᓂᔅᑕᖓ ᓗᐊᓐ ᑯᓱᒐᖅ ᖃᐃᖃᑕᐅᓚᐅᖏᒻᒪᑦ ᑕᑯᔭᖅᑐᕐᓗᓂ ᑕᒪᑐᒪᓂ ᒐᕙᒪᑎᒃᑯᑦ ᐊᖓᔪᖅᑳᖏᑦ ᖃᖓᑕᓲᒥᒃ ᐊᑐᖅᑐᐊᖅᖢᑎᒃ ᑎᑭᓯᒪᑎᓪᓗᒋᑦ ᐳᓚᕋᖃᑕᐅᔪᒃᓴᐅᒐᓗᐊᕐᒪᑦ.
ᐃᒡᓗᓂ ᐸᖕᒥᐅᖅᑐᑦ ᐃᓄᒋᐊᓗᐊᓕᕐᓂᖏᓐᓄᑦ ᐊᐃᑦᑐᖃᑦᑕᐅᑎᓴᕋᐃᓕᕐᒪᑕ ᐋᓐᓂᐊᓂᒃ, ᐅᖃᕆᓪᓗᓂ ᐲᑯ, ᐳᕙᒃᓗᒃᑐᑦ ᐱᑕᖃᕈᑎᒋᔭᖓ ᓄᓇᕗᒥ.
“ᑕᐃᓐᓇ ᑕᕝᕙ ᕿᓚᓈᕆᓚᐅᖅᑕᕋ ᑕᑯᑎᒍᒪᓪᓗᒍ ᖃᐃᖃᑕᐅᓂᐊᕋᓱᒋᓚᐅᖅᑕᕋᓗᐊᕋ,” ᐅᖃᕆᓪᓗᓂ ᕿᓕᖅᑎ. “ᐃᒡᓗᑭᒃᓴᕐᓂᑦᑎᓐᓄᑦ ᓄᓇᓕᑦᑎᓐᓂ ᐊᒃᓱᕈᓗᐊᓕᕋᑦᑕ. ᐃᓚᖏᑦ ᐱᖓᓱᓂᒃ ᐃᒡᓗᕈᓯᓕᖕᓂ, 9-ᓄᑦ ᐅᖓᑖᓄᓪᓗ ᐃᓄᖃᖃᑦᑕᓕᕐᒪᑕ. ᐊᒃᓱᐊᓗᒃ ᐅᐊᑲᓪᓚᓗᐊᖑᓕᕐᒪᑕ ᐸᖕᒥᐅᖅᑐᑦ. ᐊᖏᕐᕋᒥᓂ ᐊᒃᓱᕉᑎᖃᐅᓗᐊᓕᕐᒪᑕ.”
ᑯᓱᒐᐅᑉ ᐊᒡᓚᒡᕕᐊᓂ ᐃᑲᔪᖅᑎᖓ ᒪᐃᑯᓪ ᑯᐊᑦᓂ ᐅᓂᒃᑳᓚᐅᖅᑐᖅ ᖃᕆᑕᐅᔭᑎᒍᑦ ᐊᐱᖅᓱᖅᑕᐅᓪᓗᓂ ᑎᑎᖅᑲᓕᒫᓂᒎᖅ ᕿᒥᕈᓚᐅᕋᓗᐊᕋᒥ ᐊᒡᓚᒡᕕᖓᓂ ᖃᐃᖁᔨᔪᒥᒃ ᑕᑯᓚᐅᖏᓐᓇᒥ ᕿᑭᖅᑕᕐᔪᐊᒥᐅᑦ ᒥᔪᖓᓂᑦ.
“ᐊᓱᐃᓛᒃ ᑕᕝᕙ ᐊᑕᐅᓯᕐᒥᒃ ᐱᔾᔪᑎᖃᖅᖢᓂ ᒥᓂᔅᑕ ᖃᐃᖏᔪᑎᖃᖅᐳᖅ. ᐊᒻᒪᓗ ᓱᓕᒃᑲᓐᓂᖅ, ᑕᒪᑐᒪᓂᒎᖅ ᐱᔭᒃᓴᖃᐅᓗᐊᒧᑦ ᐊᐅᓪᓚᖅᓯᒪᔪᓐᓇᖏᒻᒪᓘᓐᓃᑦ ᐅᓪᓗᓕᒫᒥᒃ ᐊᒡᓚᒡᕕᖕᒥᓂᑦ,” ᐅᖃᕆᓪᓗᓂ ᑯᐊᑦᓂ.
“ᑐᓴᖅᑎᑕᐅᓚᐅᖅᑐᖓᑦᑕᐅᖅ, ᐅᖃᓪᓚᖃᑎᒋᓪᓗᒋᑦ ᓯᕗᓕᖅᑎᐅᑉ ᐊᒡᓚᒡᕕᖓᓂᒥᐅᑦ, ᖃᖓᑕᓲᕉᖅ ᑕᑕᓴᐅᑎᒋᓚᐅᕐᒪᑦ ᐊᒻᒪᓗ ᑕᒪᐃᓐᓂᒃ ᑎᒥᖁᑎᒋᔭᐅᔪᑦ ᐊᖓᔪᖅᑳᖏᓐᓂᒃ ᓇᒃᓴᓚᐅᖅᖢᑎᒃ ᑭᒡᒐᖅᑐᖅᑎᖏᓐᓂᒃ ᓄᓇᕗᑦ ᒐᕙᒪᖓᑕ ᐊᐅᓚᑦᑎᕕᐊᓂ ᑲᑎᒪᔨᓂᒃ ᐊᓐᓂᐊᖅᑐᓕᕆᔨᒃᑯᓐᓂᓪᓗ, ᐊᓯᖏᓪᓗ ᐃᓄᐃᑦ ᑎᒥᖁᑎᖏᑕ ᐊᖓᔪᖅᑳᖏᑦ ᑎᑭᖃᑕᐅᓚᐅᕆᓪᓗᑎᒃ.”
ᕿᓕᖅᑎᐅᓪᓕ ᑭᐅᓚᐅᖅᑕᖏᑦ ᑭᖑᓪᓕᕐᒥᓕ ᑭᓯᐊᓂᖃᐃ ᓇᖕᒥᓂᖅ ᐃᖃᓗᖕᓄᖕᓅᒋᖃᖃᕐᓂᐊᓕᖅᑐᖓ ᑯᓱᒐᖅ ᐳᓛᕆᐊᕐᓗᒍ.