ᐃᓚᐅᖃᑕᐅᔪᓂ ᐊᑯᓂᐅᔪᒥ−ᐅᑕᖅᑭᔭᐅᔪᒥ ᐊᓯᔾᔨᕐᓂᐅᔪᓄᑦ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᖅᑕᖅᑐᒥ ᑲᓇᑕᒥ ᐱᓕᕆᐊᖑᔪᒥ, ᐅᖃᐅᓯᐅᓚᐅᖅᑐᓂ ᐅᓐᓄᒃᓴᖓᓂ ᓄᕕᐱᕆ 10−ᒥ ᐃᖃᓗᖕᓂ, ᐊᑕᐅᓯᖅ ᐱᑕᖃᓚᐅᙱᓚᖅ.
ᒐᕙᒪᑐᖃᒃᑯᑦ ᑐᑭᓯᓇᑦᑎᐊᖅᑐᒥ ᑭᐅᓂᖃᑦᑎᐊᓚᐅᙱᓚᑦ ᐱᒻᒪᕆᐅᔪᒥ ᐃᓱᒫᓘᑕᐅᔪᒥ ᓄᓇᕗᒻᒥᐅᓄᑦ – ᓂᐅᕕᕐᕕᖕᓂ ᑕᑯᒃᓴᐅᑎᑦᑎᑦᐊᕐᓂᖏᓐᓂ – ᖃᔅᓯᒐᓚᖕᓂ ᐊᓯᖏᓐᓂ ᐊᓯᔾᔨᕐᓂᐅᔪᓂ ᓇᓗᓇᐃᖅᓯᓂᖏᓐᓂ ᑐᓴᕈᒥᓇᖅᑐᓂ ᐊᒃᓱᕉᓴᒃᑐᓄᑦ ᓂᐅᕕᖅᐸᒃᑐᓄᑦ.
"ᓯᕗᓪᓕᖅᐸᐅᔪᒥ ᑮᓇᐅᔭᖃᖅᑎᑕᐅᓂᖓ ᐊᒻᒪ ᐊᓯᖏᓐᓂ ᐊᓯᔾᔨᕐᓂᐅᔪᓄᑦ ᑐᙵᓱᒃᑎᑕᐅᕗᑦ. ᑭᓯᐊᓂ, ᐱᓕᕆᑦᑎᐊᒻᓯᒪᙱᓚᑦ, ᐋᖅᑭᒃᓯᒪᙱᓚᑦ ᐊᖏᓛᖑᔪᒥ ᐊᑲᐅᙱᓕᐅᕈᑕᐅᔪᒥ ᐱᓕᕆᐊᖑᔪᒧᑦ, ᑕᑯᒃᓴᐅᑎᑦᑎᑦᑎᐊᕐᓂᖓᓂ ᐊᒻᒪ ᓵᙵᔭᒃᓴᐅᔪᓐᓇᕐᓂᕐᒧᑦ," ᐅᖃᓚᐅᖅᐳᖅ ᐃᒻᒥᒃᑰᖅᑐᒥ ᓄᓇᕗᒻᒥ ᐃᓚᒋᔭᐅᔪᖅ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ ᕼᐊᓐᑐᕐ ᑑᑑ ᐊᐱᖅᓱᐃᓂᕐᒧᑦ ᐱᓕᕆᓂᐅᔪᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓂᑦ ᖃᐅᑎᓪᓗᒍ.
"ᓲᕐᓗ, ᐱᓕᕆᕝᕕᐅᔪᖅ ᐅᖃᖅᓯᒪᕗᑦ ᐱᓕᕆᐊᖑᔪᒥ ᐃᑲᔫᓯᖅᑕᐅᕙᒃᑐᓄᑦ ᐱᔭᐅᕙᒃᑐᓂ ᐃᓚᖏᓐᓂ ᓂᐅᕕᕐᕕᖃᖅᑐᓄᑦ ᖁᑦᑎᖕᓂᖅᓴᐅᕗᖅ ᐅᓯᔭᐅᓂᖓᓄᑦ ᐊᑭᖓᓐᓂ ᐊᑭᓕᖅᓱᖅᑕᒥᓂᑦ, ᑕᐃᒪᓐᓇ ᐃᓚᖏᑦ ᓄᓇᕗᒻᒥᐅᑦ ᐅᒃᐱᕈᓱᒃᐳᑦ ᐃᓚᖏᑦ ᓂᐅᕕᕐᕕᐅᔪᑦ ᐱᓕᕆᓂᖃᑦᑎᐊᙱᑦᑐᒥ ᑮᓇᐅᔾᔭᒃᓴᑐᐃᓐᓇᕐᓂᖏᓐᓂ ᐃᑲᔫᓯᖅᑕᐅᕙᒃᑐᒥ."
ᑑᑑ ᐊᐱᕆᓚᐅᖅᐳᖅ ᒥᓂᔅᑕᒧᑦ ᐊᔾᔨᒌᙱᑦᑐᓂᒃ ᒐᕙᒪᓂᒃ ᐊᒻᒪ ᐅᑭᐅᖅᑕᖅᑐᒥ ᐱᓕᕆᓂᐅᔪᓂ ᐊᒻᒪ ᐃᓗᐊᒍᑦ ᑕᐅᖅᓰᓂᐅᔪᒥ ᑖᒥᓂᒃ ᓚᐸᓛᖕᒃᒧᑦ ᐊᖏᕈᓐᓇᕋᔭᕐᒪᖔᑦ ᐋᖅᑭᒃᓯᑕᐃᓐᓇᕐᓂᕐᒧᑦ ᐊᑲᐅᙱᓕᐅᕈᑕᐅᔪᒥ ᓯᕗᓂᐊᓂ ᐅᐱᕐᙶᒃᑯᑦ ᑮᓇᐅᔭᓄᑦ ᐊᑐᖅᑐᒃᓴᓄᑦ.
"ᐃᓱᒪᒋᖃᑎᒋᑦᑎᐊᖅᐸᕋ ᐱᓕᕆᖃᑎᒪ ᐃᓱᒫᓘᑎᒋᔭᖏᓐᓂᑦ ᐱᔭᕆᐊᖃᕐᓂᐅᔪᒥ ᐃᓚᒋᐊᖅᓯᓂᕐᒧᑦ ᐊᖏᒡᓕᒋᐊᖅᑐᒥ ᑕᑯᒃᓴᐅᑎᑦᑎᑦᐊᕐᓂᖏᓐᓂ. ᐅᖃᓪᓚᖃᑎᖃᖅᓯᒪᕗᖓ ᑑᑑᒧᑦ ᑕᒪᑐᒥᖓ. ᐅᖃᖃᑎᖃᖅᓯᒪᕗᖓ ᐅᑭᐅᖅᑕᖅᑐᒥ ᓯᕗᓕᖅᑎᐅᔪᓄᑦ," ᐅᖃᓚᐅᖅᐳᖅ ᓚᐸᓛᖕᒃ, ᐃᓚᒋᐊᖅᓯᓪᓗᓂ ᐱᓕᕆᕝᕕᖓ ᑐᓂᓯᓂᐊᕐᓂᖏᓐᓂ ᐅᓄᕐᓂᖅᓴᓂ ᐊᒻᒪ ᐊᓯᔾᔨᕈᑕᐅᒃᑲᓐᓂᕐᓂᐊᖅᑐᓂᑦ.
"ᐱᒋᐊᕐᓂᐊᖅᐳᒍᑦ ᓄᑖᖑᔪᒥ ᑯᐃᓐᒧᑦ−ᐃᓄᖕᓄᑦ ᐱᓕᕆᓪᓗᑎᒃ ᑲᑎᙵᓂᐅᔪᓄᑦ ᓂᕿᒃᓴᖃᑦᑎᐊᕈᓐᓇᕐᓂᕐᒧᑦ."
ᐋᖅᑭᒃᑕᐅᓂᖓᓂ ᓄᑖᖑᔪᒥ ᐱᓕᕆᓪᓗᑎᒃ ᑲᑎᙵᓂᐅᔪᓂ ᐊᑕᐅᓯᐅᓚᐅᖅᐳᖅ ᐱᐅᓯᒋᐊᖅᑎᑕᐅᓂᐅᔪᒥ ᑲᓇᑕᐅᑉ ᒪᓕᒐᓕᐅᖅᑎᖏᑕ ᐃᑲᔪᖅᑎᖓ ᓚᐸᓛᖕᒃᒧᑦ, ᐃᕚᓐ ᔫᓐᔅ, ᐅᖃᓚᐅᖅᐳᖅ ᐃᖃᓗᖕᓂ.
ᔫᓐᔅ ᐊᐱᖅᓱᖅᑕᐅᓚᐅᖅᐳᖅ ᑐᓴᒐᒃᓴᓕᐊᖑᔪᒧᑦ ᑲᑎᒪᓂᐅᔪᒥ ᐊᑲᐅᙱᓕᐅᕈᑕᐅᔪᓄᑦ ᑕᑯᒃᓴᐅᑎᑦᑎᑦᐊᕐᓂᖏᓐᓂ ᐊᒻᒪ ᓵᙵᔭᒃᓴᐅᔪᓐᓇᕐᓂᕐᒧᑦ. ᐅᖃᕆᐊᓪᓚᓚᐅ1ᖅᐳᖅ ᑮᓇᐅᔭᓂᒃ ᖃᐅᔨᓴᖅᑕᐅᓂᖏᑦ ᐊᒃᓱᕈᕐᓂᖅᓴᐅᓯᒪᕗᑦ. ᑕᐃᒪᓐᓇᑦᑕᐃᓐᓇᖅ ᐅᖃᐅᓯᐅᓚᐅᖅᐳᖅ ᐱᓕᕆᔨᕐᔪᐊᖑᔪᒥ ᐱᔭᕆᑐᔪᒥ ᐅᓂᒃᑳᕆᓂᐅᔪᒥ ᑐᓴᒐᒃᓴᓕᕆᔨᐅᔪᓄᑦ ᓯᕗᓂᐊᓂ ᔫᓐᔅ ᐅᐸᓚᐅᖅᑳᕋᓂ.
ᓂᕿᑦᑎᐊᕙᓕᕆᓂᕐᒧᑦ ᐅᑭᐅᖅᑕᖅᑐᒥ ᑲᓇᑕᒥ ᓈᒻᒪᒋᔭᐅᙱᕐᔪᐊᓚᐅᖅᐳᑦ ᐱᒋᐊᕐᓂᖓᓂ ᐱᕚᓪᓕᖅᑎᑦᑎᓂᕐᒧᑦ ᓂᐅᕕᕐᕕᖕᓂᑦ ᓂᐅᕕᖅᐸᒃᑐᓅᙱᖔᖅᑐᓄᑦ. ᑭᓯᐊᓂ ᐅᓂᒃᑳᕆᔨᐅᔪᑦ ᐅᖃᐅᔾᔭᐅᓚᐅᖅᐳᑦ ᐱᔭᕆᑐᔪᒥ ᐅᖃᐅᔾᔨᓂᐅᔪᒥ ᓂᐅᕕᕐᕖᑦ ᓴᓂᕐᕙᐃᓯᒪᓂᖃᙱᒻᒪᑕ ᐱᕙᒃᑕᖏᓐᓂ ᐊᑭᓖᒑᖓᑕ ᐅᓯᔭᐅᓂᖓᓄᑦ, ᐊᒻᒪᓗᑦᑕᐅᖅ ᓇᓗᓇᐃᖅᓯᓪᓗᑎᒃ ᑮᓇᐅᔭᓕᐊᖑᔪᓄᑦ ᑭᒡᓕᐅᔪᓂᑦ, ᐊᑐᕈᓐᓇᕐᓂᕐᒧᑦ ᐃᒻᒥᒃᑰᖅᑐᓂ ᑮᓇᐅᔭᓂ ᖃᐅᔨᓴᖅᑕᐅᓂᐅᔪᓄᑦ. ᑮᓇᐅᔭᓂ ᖃᐅᔨᓴᖅᑕᐅᓂᐅᔪᑦ ᑎᑎᕋᖅᑕᐅᓲᖑᕗᑦ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᖅᑕᖅᑐᒥ ᖃᕋᓴᐅᔭᑎᒍᑦ ᑐᑭᓯᒋᐊᖅᑕᕐᕕᖓᓂ.
ᔫᓐᔅ ᑎᑎᕋᐃᓚᐅᖅᐳᖅ ᐱᐅᔪᓂ ᐊᓯᔾᔨᕐᓂᐅᔪᓂ.
"ᐊᓯᔾᔨᕐᓂᐅᔪᓂ ᐃᑲᔫᓯᖅᑕᐅᕙᒃᑐᒥ ᐊᑭᖏᓐᓂ, ᐊᒻᒪᓗᑦᑕᐅᖅ ᓂᕿᓂᒃ ᐱᔪᓐᓇᕐᓂᐅᔪᓄᑦ ᑎᑎᕋᖅᓯᒪᓂᖓᓂ ᓴᓇᔭᐅᕙᓪᓕᐊᕗᑦ ᑕᑯᒃᓴᐅᑎᑦᑎᓂᕐᒥ ᑐᓴᓚᐅᖅᑕᑦᑎᓐᓂ ᐃᓕᔅᓯᓐᓂᓕᒫᖅ ᐊᒻᒪ ᐊᓯᖏᓐᓂ ᐅᑭᐅᖅᑕᖅᑐᓕᒫᒥ ᖃᓄᖅ ᐊᑲᐅᓂᖅᓴᐅᔪᒥ ᐃᑲᔪᕈᓐᓇᕐᓂᑦᑎᓐᓂ ᐊᑐᐃᓐᓇᖃᖅᑎᑦᑎᓂᕐᒧᑦ ᓂᕿᑦᑎᐊᕙᐅᓂᖅᓴᓂᑦ," ᐅᖃᓚᐅᖅᐳᖅ, ᐃᖅᑲᐃᑎᑦᑎᓪᓗᓂ ᐱᓕᕆᔨᒻᒪᕆᐅᔪᓂ ᐅᐸᒃᓯᒪᔪᓄᑦ ᓄᑖᖑᔪᒥ ᐊᖑᓇᓱᒃᑎᓄᑦ ᐃᑲᔪᖅᓱᐃᓂᐅᔪᒥ ᑐᓂᕐᕈᑎᒥᒃ ᓴᖅᑭᑕᐅᓇᔭᕐᓂᖓᓂ ᓄᑖᖑᔪᒥ ᐊᕐᕌᒎᔪᒥ ᓯᕗᓂᐊᓂ ᐅᖃᐅᓯᐅᓚᐅᖅᑐᒥ.
ᖃᐅᔨᒪᔭᐅᓪᓗᐊᖅᑐᒥ, ᐃᓚᖏᑦ ᑭᓱᑐᐃᓐᓇᓂᒃ ᐅᕘᓇ ᓂᐅᕕᕐᕕᐅᔪᓄᑦ ᐅᓯᔭᐅᓂᖓᓂ ᐃᑲᔫᓯᖅᑕᐅᕙᒃᑐᒥ ᓴᖅᑭᑎᑕᐅᓂᐊᖅᑐᒥ ᓄᑖᖑᔪᒥ "ᖁᑦᑎᓛᖑᔪᒥ-ᑭᒡᓕᐅᔪᒥ ᐊᑭᖓᓐᓂ." ᐅᑯᐊ ᐃᓚᖃᖅᐳᖅ ᐃᒻᒧᒃ, ᖁᐊᖑᔪᓂ ᐱᕈᖅᑐᕕᓂᕐᓂ, ᓄᑕᕋᓛᒧᑦ ᐃᒻᒧᒃᓴᑦ ᐊᒻᒪ ᓄᑕᕋᓛᓄᑦ ᓂᕿᒃᓴᑦ.
ᑎᑎᕋᖅᑕᐅᓯᒪᓂᐅᔪᒥ ᐃᑲᔫᓯᖅᑕᐅᕙᒃᑐᓂ ᑭᓱᑐᐃᓐᓇᓂᒃ ᐋᖅᑭᒋᐊᖅᑕᐅᓯᒪᓕᖅᐳᖅ ᐊᒻᒪ ᐃᓚᖃᖅᖢᓂ ᕙᑕᒥ ᐊᒻᒪ ᐳᓐᓂᕐᓂᕐᒥ, ᐃᒐᔪᖅᓯᐅᑎᑦ ᐅᖅᓱᐃᑦ, ᐳᕙᓪᓚᖅᑯᑎ, ᑕᕆᐅᖅ ᐊᒻᒪ ᐳᑦᑐᖅᓴᐅᑎ ᑕᐃᑲᓂᑦᑕᐃᓐᓇᖅ ᐊᕕᒃᑐᖅᓯᒪᓂᐅᔪᒥ ᓴᓇᓯᒪᕙᒌᖅᑐᓂ ᖃᐅᓪᓗᖅᑕᒥ ᐸᓚᐅᒑᕐᒥ, ᐃᓚᒋᔭᐅᓪᓗᓂ ᐊᓯᖏᓐᓂ ᑭᓱᑐᐃᓐᓇᓂᒃ.
ᖁᐃᖏᓕᓴᐃᑦ ᐃᓚᔭᐅᒋᕗᑦ ᑕᐃᑯᖓ ᐊᕕᒃᑐᖅᓯᒪᓂᐅᔪᒧᑦ.
ᐊᓯᖏᑦ ᐱᑕᖄᓂᒃᑐᑦ ᐊᑭᖏᑦ ᐊᖏᒡᓕᒋᐊᖅᑕᐅᒋᕗᑦ.
ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᖃᓚᐅᖅᐳᖅ ᓄᓇᕗᒻᒥ ᑐᙵᕕᒃᑯᑦ ᖃᐅᔨᒪᓂᖅᓴᐅᔭᕆᐊᖃᓕᖅᐳᑦ ᐊᓯᔾᔨᕐᓂᐅᔪᓂᑦ. ᑭᓯᐊᓂ ᐅᖃᕆᐊᓪᓚᓚᐅᖅᐳᖅ ᑎᑎᕋᖅᑕᐅᓯᒪᓂᐅᔪᓄᑦ.
"ᐃᖅᑲᐅᒪᔭᕆᐊᖃᖅᐳᒍᑦ ᓄᓇᕗᒻᒥ 25−ᓂ ᓄᓇᓕᖃᕋᑦᑕ ᐊᒻᒪ ᑕᒪᒃᑭᑦᑎᐊᖅ ᓄᓇᓕᐅᔪᑦ ᐊᑐᓲᖑᕗᑦ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᖅᑕᖅᑐᒥ ᐱᓕᕆᐊᖑᔪᒥ, ᐊᔾᔨᐅᙱᑦᑑᔪᒥ ᐊᓯᖏᓐᓂ ᐱᔪᓐᓇᕐᓂᖃᕐᓂᐅᔪᓂᑦ. ᐃᖅᑲᐅᒪᔭᕆᐊᖃᕆᕗᒍᑦ ᓄᓇᕗᒻᒥ, ᐅᐱᕐᙶᒃᑯᑦ ᐅᓂᒃᑳᓕᐊᖑᔪᖃᓚᐅᖅᐳᖅ, 7−ᓂ 10−ᓄᑦ ᓱᕈᓯᕐᓂ ᓄᓇᕗᒻᒥ ᓯᓂᒋᐊᖅᑐᓲᖑᓂᖏᓐᓂ ᑳᒃᖢᑎᒃ ᖃᐅᑕᒫᑦᑎᐊᖅ – ᑲᓇᑕᒥ, ᓄᓇᐅᔪᒥ ᖃᐅᔨᒪᔭᐅᑦᑎᐊᖅᑐᒥ ᐊᒃᖢᙱᓐᓂᐅᔪᒥ," ᐅᖃᓚᐅᖅᐳᖅ ᑰᑦᑎᖅ.
"ᑳᒃᖢᓂ, ᐊᓯᓕᒫᖏᓐᓂ ᐃᓱᒪᙱᓚᑎᑦ. ᓂᕿᓂᑦ ᐃᓱᒪᕗᑎᑦ ᐊᒻᒪ ᓇᑭᑦ ᓂᕿᑖᕐᓂᐊᕐᓂᕐᓂᑦ. ᑎᑭᐅᑎᓂᖃᔾᔮᙱᓚᑎᑦ ᑎᑭᐅᑎᔭᒃᓴᕆᔭᕐᓂᑦ ᐃᓅᓯᕐᒥ ᐱᐅᓂᖅᓴᐅᑎᑦᑎᓂᕐᒧᑦ ᐃᓄᖕᓄᑦ ᑳᒃᑯᕕᑦ."