Skip to content

ᒫᓐᓇ ᐱᓕᕆᓐᓇᖅᓯᕗᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ

ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᑦ
ᓄᓇᕗᑦ ᐊᒥᓱᒻᒪᕆᐊᓗᖕᓂ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐸᖅᑭᔭᐅᓂᕐᒧᑦ ᐊᑲᐅᙱᓕᐅᕈᑎᖃᖅᐳᑦ, ᐱᕐᔪᐊᖑᓂᖅᓴᐅᒐᔪᒃᑐᓂ ᐊᒻᒪ ᓄᓇᖓᓄᑦ ᐊᒃᓱᕈᕐᓇᕐᔪᐊᖅᑐᒥ ᐊᒻᒪ ᐊᑭᑐᕐᔪᐊᖅᖢᓂ ᑲᒪᒋᔭᕆᐊᒃᓴᖅ ᐊᓯᓕᒫᑦᑎᐊᖏᓐᓂ ᑲᓇᑕᒥ.

ᐊᕐᕌᒍᑦ ᖄᖏᖅᐸᓪᓕᐊᑎᓪᓗᒋᑦ, ᓄᓇᕗᒻᒥᐅᑦ ᓯᕗᒻᒧᑦ ᐃᖏᕐᕋᓯᒫᕐᔪᑐᐃᓐᓇᖅᐳᑦ ᑕᐃᒪᐃᖏᓐᓇᖅᐸᒃᑐᒥ ᐊᒻᒪ ᐱᓕᕆᑦᑎᐊᖅᑐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐸᖅᑭᔭᐅᓂᕐᒥ ᐊᑲᐅᙱᓕᐅᕈᑕᐅᓪᓗᐊᖅᑎᓪᓗᒍ ᑲᓇᑕᓕᒫᒥ ᐃᓱᒫᓘᑕᐅᓪᓗᐊᖅᑎᓪᓗᒍ.
ᑭᒍᑕᐃᖅᑕᐅᑐᐃᓐᓇᕐᓂᐅᔪᒥ ᐱᑎᑦᑎᓂᖃᕐᓂᐊᖅᐳᖅ ᖃᖓᑕᓲᒃᑰᕆᐊᖃᕐᓂᐅᔪᒥ ᓄᓇᓕᖕᒥ ᐃᓅᓕᓴᖅᑕᐅᓂᕐᒧᑦ, ᓂᕆᐅᒃᐸᒃᖢᑎᒃ ᓈᒻᒪᒃᑐᒥ ᑐᔪᕐᒥᕕᒃᓴᖃᕐᓂᐊᕐᓂᖓᓂ ᐃᓄᒃᑎᑐᑦ–ᐅᖃᓪᓚᓲᓄᑦ ᐅᓂᒃᓯᒪᔪᓄᑦ.

ᑕᒪᓐᓇ ᐃᓚᒋᐊᖅᓯᑐᐃᓐᓇᓲᖑᕗᖅ ᐊᑲᖅᓴᙱᓐᓂᐅᔪᒥ ᐊᔪᕐᓇᖅᐸᒌᖅᑐᒥ ᐱᓕᕆᓂᐅᔪᒧᑦ.

ᐊᒃᓱᕈᕐᓇᖅᑐᒥ ᖃᓄᐃᓐᓂᐅᔪᒥ ᐅᐸᓗᖓᐃᑎᑦᑎᓐᓇᖅᐳᖅ ᐊᒃᓱᕈᕐᓇᖅᑐᓂ ᐱᓕᕆᓂᐅᔪᓂ. ᑕᐃᒪᐃᓐᓂᐅᓚᐅᖅᐳᖅ ᒪᐃ–ᖑᓚᐅᖅᑐᒥ, ᐊᕐᕕᐊᕐᒥᐅᑕᒥᒃ ᐊᖑᒻᒥ ᑭᒍᓯᕆᑲᑕᒃᑐᒥ ᐃᒻᒥᓂᒃ ᐱᓕᕆᓕᓚᐅᖅᐳᖅ ᐊᒻᒪ ᓯᑭᑑᒃᑯᑦ ᐊᐅᓪᓚᓚᐅᖅᐳᖅ ᐅᐊᖕᓇᒧᑦ ᑭᒍᑕᐃᖅᑕᐅᔭᖅᑐᖅᖢᓂ.

ᑖᓂᐅᓪ ᐊᓚᒐᓚᒃ ᐊᐅᓪᓛᓚᐅᖅᐳᖅ ᐃᑲᕐᕋᐸᓗᖕᓂ 7–ᓂ ᐊᕐᕕᐊᓂᑦ ᑲᖏᖅᖠᓂᕐᒧᑦ ᐃᓅᓕᓴᖅᑕᐅᔭᖅᑐᖅᖢᓂ ᑭᒍᑎᓕᕆᔨᒥ ᐱᓕᕆᔾᔪᑎᖃᖅᑐᒧᑦ ᐊᒻᒪ ᖃᐅᔨᒪᓂᐅᔪᒥ ᑭᒍᑕᐃᖅᓯᓂᕐᒧᑦ.

ᐃᓚᖓᒍᑦ, ᐅᓇ ᑲᔪᖏᖅᓴᐃᓂᐅᕗᖅ ᐅᓂᒃᑳᕐᓂᐅᔪᒥ ᖄᖏᐅᑎᓂᖓᓂ ᖃᓄᐃᓐᓂᐅᔪᓄᑦ ᐱᕐᔪᐊᖑᔪᒥ ᖃᓄᐃᓕᖓᓂᐅᔪᒥ, ᑭᓯᐊᓂ ᐊᓚᒐᓚᒃ ᐃᓱᒪᓕᐅᕆᓚᐅᖅᐳᖅ ᐊᐅᓪᓛᕐᓂᐊᕐᓂᖓᓂ ᐅᖃᐅᔾᔭᐅᒐᒥ ᒐᕙᒪᒃᑯᑦ ᐊᑭᓖᓇᔭᙱᓐᓂᖏᓐᓂ ᐊᐅᓪᓛᕐᓂᕐᒧᑦ ᐊᑭᖏᓐᓂ.

"ᑕᐃᒪᑐᖅ ᐱᐅᓯᒋᐊᕐᓂᐊᖅᐳᖅ ᐊᓯᖏᑦ ᐃᓄᐃᑦ ᐊᑐᕆᐊᖃᔾᔮᙱᒻᒪᑕ ᐊᑐᓚᐅᖅᑕᓐᓂ," ᐅᖃᐅᔾᔨᓚᐅᖅᐳᖅ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ ᒪᐃᒥ ᐊᕐᕌᓂᐅᓚᐅᖅᑐᒥ.

ᐊᔪᕐᓇᒃᑲᓐᓂᕐᓂᐅᔪᓂ ᑭᒍᑎᓄᑦ ᐊᑲᐅᙱᓕᐅᕈᑕᐅᔪᓂ ᐱᒻᒪᕆᐅᔪᓐᓇᖅᐳᑦ, ᐱᓗᐊᖅᑐᒥ ᐃᒻᒪᒃᓯᒪᓂᖃᖅᑎᓪᓗᒍ. ᓱᓕᓂᐅᔪᖅ ᐊᖑᑦ ᐊᐅᓪᓛᕆᐊᖃᓚᐅᕐᓂᖓᓂ ᓄᓇᒃᑯᑦ ᐱᖅᓯᑲᓴᐅᔭᖕᓂᐅᔪᒥ ᐅᓪᓗᓕᒫᒥᒃ ᑭᒍᑕᐃᖅᑕᐅᔭᖅᑐᕐᓗᓂ ᐊᑭᑭᓐᓂᖅᓴᐅᓚᐅᕐᒪᑦ ᓂᕆᐅᒐᒃᓴᐅᔪᓂ ᓇᓗᓇᐃᖅᓯᕗᖅ ᐱᓕᕆᑦᑎᐊᙱᓐᓂᐅᔪᒥ ᐱᓕᕆᔾᔪᓯᑦᑎᓐᓂ.

ᐅᑭᐅᖅᑕᖅᑐᒥ ᐱᓕᕆᓂᐅᔪᒥ ᒥᓂᔅᑕᖓ ᑖᓐ ᕚᓐᑖᓪ, ᓯᕗᓪᓕᖅᐹᖅ ᒐᕙᒪᑐᖃᒃᑯᓐᓂ ᒥᓂᔅᑕᖓ ᑐᓂᔭᐅᔪᒥ ᑲᒪᒋᔭᕆᐊᖃᖅᑕᖏᓐᓂ ᑐᕌᖓᓪᓗᐊᑕᖅᑐᒥ ᐅᑭᐅᖅᑕᖅᑐᒧᑦ, ᐳᑐᒍᖓᓂ ᒥᓱᖕᓂᐊᖅᐸᖓ ᓄᓇᕗᒻᒧᑦ ᐊᐅᓪᓛᕐᓂᖓᓂ ᐊᕐᕕᐊᕐᓄᑦ ᑕᒪᑐᒪᓂ ᐱᓇᓱᐊᕈᓯᐅᔪᒥ. ᒫᓐᓇ ᐃᓱᒫᓘᑎᒋᔭᐅᔪᓂ ᑐᓴᖅᑕᐅᑎᑦᑎᓐᓇᖅᓯᕗᖅ ᒐᕙᒪᑐᖃᒃᑯᑦ ᐅᑎᖅᑎᕆᔭᕆᐊᖃᕐᓂᐊᕐᒪᑕ ᓇᓗᓇᐃᖅᓯᓂᕐᒧᑦ ᖃᓄᐃᙱᑦᑎᐊᕐᓂᐅᔪᓂ ᓄᓇᖃᖅᑎᐅᔪᓄᑦ ᐅᐊᖕᓇᒥ ᒫᓂᑑᐸ ᑭᒡᓕᖓᓐᓂ.
ᐃᓚᒋᔭᐅᔪᖅ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ ᒧᒥᓛᖅ ᖃᖅᑲᖅ ᒫᓐᓇᓕᓴᒥ ᓇᓗᓇᐃᖅᓯᓚᐅᖅᐳᖅ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓄᑦ ᓯᕗᓪᓕᐅᔾᔭᐅᖁᔭᐅᔪᓂ ᓇᓗᓇᐃᖅᓯᓚᐅᖅᐳᖅ ᕚᓐᑖᓪᒧᑦ ᐊᒻᒪ ᐃᓚᖃᓚᐅᖅᐳᖅ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐸᖅᑭᓂᑐᐃᓐᓇᐅᔪᒥᒃ, ᐊᓯᖏᓐᓂᓪᓗ.

"ᐅᑯᐊ ᐊᑐᕆᐊᖃᖅᑕᓂ ᐃᓄᖕᓄᑦ ᐱᔪᓐᓇᕐᓂᕆᔭᐅᕗᑦ ᑐᓂᔭᐅᕙᙱᑦᑐᓄᑦ ᐅᕙᑦᑎᓐᓄᑦ ᐊᑯᓂᓗᐊᒻᒪᕆᐊᓗᒃ. ᒐᕙᒪᑐᖃᒃᑯᑦ ᐱᓕᕆᑦᑎᐊᒃᑲᓐᓂᕆᐊᖃᖅᐳᑦ ᐊᒻᒪᓗ ᐅᓇᑕᐃᓐᓇᕐᓂᐊᖅᐳᖓ ᓄᓇᕗᒻᒧᑦ," ᐅᖃᐅᔾᔨᓚᐅᖅᐳᖅ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓄᑦ ᐱᓇᓱᐊᕈᓯᐅᓚᐅᖅᑐᒥ.

ᒥᓂᔅᑕ ᕚᓐᑖᓪ ᐊᐱᕆᔭᐅᕗᖅ ᓇᓂᓯᓂᕐᒥ ᐋᖅᑭᒍᑎᒃᓴᐅᔪᓂ ᐊᑯᓂᐅᒧᒥ ᓴᖅᑮᓐᓇᖅᑐᓄᑦ ᐊᑲᐅᙱᓕᐅᕈᑕᐅᔪᓄᑦ, ᑭᓯᐊᓂ ᐃᖏᕐᕋᓂᓕᐅᕆᐊᖃᖅᐳᖅ ᒐᕙᒪᖓ ᐱᔪᓐᓇᕐᓂᐊᕈᓂ ᐅᒃᐱᕆᔭᐅᔪᓐᓇᕐᓂᐊᕐᓂᖓᓂ ᐊᒻᒪ ᐅᒃᐱᕈᓱᖕᓂᐅᔪᒥ ᓄᓇᕗᒻᒥᐅᓄᑦ.
ᑮᓇᐅᔭᖃᖅᑎᑦᑎᓂᐅᔪᓂ ᐋᖅᑭᒃᓱᖅᓯᒪᒐᓗᐊᖅᑎᓪᓗᒋᑦ ᒐᕙᒪᑐᖃᒃᑯᓐᓂ, ᐃᕐᙲᓐᓇᑲᐅᑎᒋ ᐋᖅᑭᒍᑎᒃᓴᓂ ᓄᓇᓕᖕᓄᑦ ᑐᙵᕕᖃᕈᓐᓇᖅᐳᑦ.

ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ ᐋᖅᑭᒃᓱᐃᔨ ᑎᐊᕈᓪ ᒍᕆᐅᕐ ᑎᒃᑯᐊᖅᓯᓯᒪᓂᖓᓂ ᑎᑎᕋᖅᓯᒪᓂᐅᔪᒥ ᔭᓄᐊᕆ 29–ᒥ, ᐅᖃᐅᓯᖃᖅᑎᓪᓗᒍ ᐅᖃᐅᓯᓕᐊᖑᔪᓂ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒥ ᐊᖓᔪᖅᑳᖑᓚᐅᖅᑐᒥ ᒪᐃᒃ ᓲᓪᑕᐃᔅᒥ, ᐅᖃᐅᓯᐅᔪᒥ ᐃᓄᑐᖃᕐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ-ᐸᖅᑭᕝᕕᐅᔪᒥ ᑐᓂᓯᓇᔭᕐᓂᖓᓂ ᖁᑦᑎᒃᑐᒥ ᐊᑭᓕᖅᓱᖅᑕᐅᔪᓂ ᐃᖅᑲᓇᐃᔮᒃᓴᓂ ᓄᓇᓕᖕᓂ ᐊᒻᒪ ᐃᓄᒃᑎᑐᑦ–ᐅᖃᓪᓚᓲᓂᑦ ᐃᓄᖕᓂ ᐸᖅᑭᔪᓂᑦ ᐃᓄᑐᖃᕐᓂᑦ.

ᐅᓄᕐᓂᖅᓴᓂ ᒥᑭᓐᓂᖅᓴᓂ ᓄᓇᓕᖕᓂ ᐋᓐᓂᐊᕕᖕᓂᑦ ᑐᓂᓯᔪᓐᓇᖅᐳᑦ ᐱᑎᑦᑎᑦᑕᐃᓕᒪᓂᐅᔪᒥ ᐃᓅᓕᓴᖅᑕᐅᓂᕐᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑲᐅᙱᓕᐅᕈᑕᐅᔪᑦ ᓄᖅᑲᖅᑎᑕᐅᔪᓐᓇᕐᓂᐊᕐᒪᑕ ᐱᔭᕆᐊᖃᓚᐅᖅᑳᕋᑎᒃ ᐊᑭᑐᔪᓂ ᐊᐅᓪᓛᕐᓂᐅᔪᓄᑦ ᖃᓪᓗᓈᑦ ᓄᓇᖓᓐᓄᑦ.

ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᒃ ᐊᐅᓚᑦᑏᓐᓇᕐᓂᐊᕈᑎᒃ ᐱᓕᕆᐊᖑᔪᓂ ᐱᓕᒻᒪᒃᓴᐃᔪᓂ ᐃᓄᖕᓂ ᑐᓂᓯᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐸᖅᑭᓂᐅᔪᒥ ᓄᓇᓕᖕᓂ ᐊᒻᒪ ᐅᓄᕐᓂᖅᓴᓂ ᓴᓇᔨᐅᔪᓂ ᐱᓕᒻᒪᒃᓴᖅᑕᐅᓗᑎᒃ ᓄᓇᓕᖕᓂ. ᑲᑎᖅᓱᖅᑕᐅᕙᓪᓕᐊᔪᒥ ᑮᓇᐅᔭᓂ ᑐᖅᑯᖅᑕᐅᓯᒪᓂᖓᓐᓂ ᓴᖅᑭᑎᑦᑎᔪᓐᓇᖅᐳᖅ ᑮᓇᐅᔭᓂᒃ ᐊᑐᓗᐊᙱᓐᓂᖅᓴᐅᓂᕐᒥ ᓯᕗᓂᒃᓴᒧᑦ.
ᐊᓐᓂᑭᑕᕐᓂᖃᖅᐳᖅ ᐱᔭᕆᐊᖃᕐᓂᐅᔪᓄᑦ ᐅᑭᐅᖅᑕᖅᑐᒥ, ᑭᓯᐊᓂ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐸᖅᑭᓂᐅᔪᒧᑦ ᐊᒻᒪᓗ ᐱᔪᓐᓇᕐᓂᑦᑎᓐᓂ ᑲᓇᑕᒥᐅᑕᐅᓪᓗᑕ ᐸᖅᑭᓂᕐᒧᑦ ᖃᓂᒪᔪᖁᑎᑦᑎᓐᓂ ᐊᒻᒪ ᐊᒃᑐᖅᑕᐅᓴᕋᐃᑦᑐᓄᑦ ᖁᑦᑎᓛᖑᔭᕆᐊᖃᖅᐳᑦ ᑎᑎᕋᖅᓯᒪᓂᐅᔪᓂᑦ.

ᓄᓇᕗᒻᒥᐅᑦ ᐊᑯᓂᐅᓗᐊᖅᑐᒥ ᐅᑕᖅᑭᓯᒪᕗᑦ ᐱᓂᖏᓐᓂ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐸᖅᑭᓂᐅᔪᒥ ᐊᓯᖏᓐᓂ ᑲᓇᑕᒥᐅᑕᓂ ᐃᓱᒪᖅᓲᑎᒋᕙᒃᑕᖏᓐᓂ.