ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᑦ
ᐱᓕᕆᖃᑎᒌᖕᓂᐅᔪᖅ ᓄᓇᕗᒻᒥᐅᓂ ᐊᒻᒪ ᑲᓇᑕᒥ ᐸᓖᓯᒃᑯᓐᓂ ᐊᑯᓂᐅᓗᒃ ᐊᒃᓱᕈᕐᓇᖅᓯᒪᕗᖅ ᐊᒻᒪ ᖃᓪᓗᓈᑦ ᓄᓇᖓᓐᓂ ᑲᓇᑕᒥ ᐃᖅᑲᖅᑐᐃᕕᒃᑯᑦ ᐱᓕᕆᔾᔪᓯᐅᔪᒥ ᑐᓂᔭᐅᓯᒪᓂᐅᔪᒥ ᐅᑭᐅᖅᑕᖅᑐᕐᒥᐅᓄᑦ ᖃᓄᐃᓐᓂᖃᖅᓯᒪᕗᖅ ᐃᒃᐱᒋᔭᐅᕐᔪᐊᖅᓯᒪᓪᓗᓂ ᐊᕐᕌᒍᒐᓵᓗᖕᓂ.
ᐃᖏᕐᕋᓂᖃᕐᔪᐊᖅᓯᒪᓂᖃᖅᐳᖅ ᑕᐃᒪᙵᓂ ᓯᕗᓪᓕᖅᐸᐅᔪᓂ ᐅᓪᓗᓂᑦ ᐊᐅᐸᖅᑐᒥ–ᔭᐃᑲᓕᖕᓂ ᐸᓖᓯᓂᑦ ᒪᓕᒐᓕᐅᕐᓂᖃᖅᑐᓂ ᓄᓇᕗᒻᒥ, ᑭᓯᐊᓂ ᖃᓄᐃᓕᐅᕐᓂᖃᕐᔪᐊᒃᑲᓐᓂᕆᐊᖃᖅᐳᑦ ᓄᓇᖃᖅᑎᐅᔪᑦ ᓈᒻᒪᒍᓱᓕᕐᓂᖏᓐᓂ ᐊᒻᒪ ᐃᑲᔪᖅᓱᐃᓗᑎᒃ ᑲᓇᑕᒥ ᐸᓖᓯᒃᑯᓐᓂ ᐃᓚᐅᖃᑕᐅᓂᖏᓐᓂ ᐃᓅᓯᖏᓐᓂᑦ.
ᐅᔾᔨᕆᒍᒃ ᒫᓐᓇᓕᓴᐅᔪᒥ ᖃᓄᐃᓐᓂᐅᓚᐅᖅᑐᒥ ᑭᙵᕐᓂᑦ. ᐸᓖᓯᒃᑯᑦ ᐃᓚᐅᖃᑕᐅᓚᐅᖅᐳᑦ ᐅᓂᒃᑲᐅᓯᐅᓯᒪᓪᓚᕆᒃᑐᒥ "ᖃᓄᐃᓐᓂᐅᔪᒥ ᐸᓖᓯᒃᑯᓐᓂ ᐊᒻᒪ ᓄᓇᖃᖅᑎᐅᔪᓄᑦ." ᐊᓯᒃᑲᓐᓂᖓᓐᓂ ᑐᓴᒐᒃᓴᓂ ᑐᓂᔭᐅᓂᖃᑦᑎᐊᓚᐅᙱᓚᖅ ᐸᓖᓯᒃᑯᓐᓄᑦ ᐅᕝᕙᓘᓐᓃᑦ ᐱᖓᔪᖓᓐᓂ–ᐃᓚᐅᖃᑕᐅᔪᓄᑦ ᖃᐅᔨᓴᖅᑎᐅᔪᓄᑦ, ᐋᑐᕚᒥ ᐸᓖᓯᒃᑯᓐᓂ ᐱᔨᑦᑎᕋᕐᓂᐅᔪᒥ. ᐅᖃᖃᑎᖃᕆᐊᖃᓚᐅᖅᐳᑦ ᒪᐃᔭᒥ ᕼᐋᒻᓚᐅᔪᒥ ᓇᓗᓇᐃᖅᓯᓂᕐᒥ ᑐᖁᔪᖃᓚᐅᕐᓂᖓᓂ.
ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓄᑦ ᐅᖃᓕᒫᖅᑎᐅᔪᑦ ᑎᑎᕋᑲᑕᒃᓯᒪᕗᑦ ᐊᒻᒪ ᐊᐱᕆᓪᓗᑎᒃ ᓇᒦᓐᓂᖏᓐᓂ ᑎᑎᕋᖃᑦᑕᖅᑕᕗᑦ ᖃᓄᐃᓐᓂᐅᓚᐅᖅᑐᒧᑦ ᑭᓇᑐᐃᓐᓇᖅ ᓱᓕᔪᓂᒃ ᑐᓴᒐᒃᓴᖅᑖᕈᓐᓇᙱᒻᒪᑕ.
ᐱᓪᓚᕆᐅᓪᓗᐊᕐᓂᖓᓂ ᐊᐅᓚᑦᑎᓂᕐᒧᑦ ᑐᓴᒐᒃᓴᓂ ᐃᖏᕐᕋᐃᓐᓇᖅᑐᒥ ᖃᐅᔨᓴᖅᑕᐅᓂᐅᔪᒥ, ᐃᓄᐃᑦ ᐱᔪᒪᕐᔪᐊᖅᑐᓂ ᑭᐅᔾᔪᑎᓂᑦ ᖁᑦᑎᒃᑐᒥ–ᐊᒃᓱᕈᕐᓇᖅᑐᒥ ᖃᓄᐃᓐᓂᐅᔪᒥ ᐃᓄᑭᐸᓗᒃᑐᒥ ᓄᓇᓕᐅᔪᒥ, ᐱᓕᕆᓂᐅᔪᓐᓇᖅᑐᒥ ᑐᓴᕐᓂᕐᓘᑎᖃᕐᓂᕐᒥ ᓇᒧᙵᐅᕈᓘᔭᕈᓐᓇᖕᓂᖓᓂ.
ᒫᓐᓇᐅᔪᒥ ᓯᓚᑦᑎᓐᓂ, ᐊᑲᐅᙱᓕᐅᕈᑕᐅᔪᒥ ᐊᖏᒡᓕᒋᐊᖅᑕᐅᒃᑲᓐᓂᐅᔭᖅᑐᒥ ᒫᓐᓇᓕᓴᐅᔪᓂ ᐅᖃᐅᓯᐅᓂᐅᔪᓂ ᐸᓖᓯᒃᑯᓐᓂ ᐋᓐᓂᖅᓯᕆᖃᑦᑕᕐᓂᐅᔪᓂ ᑕᓗᕐᔪᐊᕐᒥ, ᐸᓖᓰᑦ ᓱᓕᙱᑦᑐᓂ ᐅᖃᐅᓯᖃᕈᓘᔭᖅᑎᑦᑎᓪᓗᐊᙱᓚᑦ ᑐᑮᕈᑎᓗᓂ.
ᑐᓄᓂᖅ ᐃᓚᒋᔭᐅᔪᖅ ᒪᓕᒐᓕᐅᖅᑎᒃᑯᓐᓂ ᑕᐃᕕᑦ ᖃᒪᓂᖅ ᖃᐃᖁᔨᓯᒪᕗᖅ ᐸᓖᓯᒃᑯᓐᓂ ᐊᑐᖅᐸᖕᓂᖏᓐᓂ ᑎᒥᒧᑦ–ᐊᑕᔪᓂ–ᑕᕐᕆᔭᓕᐅᕈᑎᓂᑦ -- ᐊᑐᖅᑕᐅᒐᔪᒃᑐᒥ ᐸᓖᓯᐅᔪᓄᑦ ᐅᐊᖕᓇᒥ ᐊᒥᐊᓕᑲᒥ -- ᒪᓕᒐᓕᐅᕐᕕᖕᒥ ᑭᐅᔭᐅᑐᐃᓐᓇᖅᖢᓂ ᐱᔪᓐᓇᙱᓐᓂᕋᐃᓂᐅᔪᓂ ᐅᖃᖅᖢᑎᒃ ᓄᑖᙳᖅᐸᓪᓕᐊᓂᐅᔪᑦ ᐊᑐᕈᓐᓇᕋᔭᙱᓐᓂᖓᓂ ᓄᓇᕗᒻᒥ.
ᖃᒪᓂᖅ, ᐊᒻᒪᓗ ᓇᑦᓯᓕᒃ ᐃᓚᒋᔭᐅᔪᖅ ᒪᓕᒐᓕᐅᖅᑎᒃᑯᓐᓂ ᐃᒦᓕᐋᓄ ᕿᖕᓄᖅ ᖃᐃᖁᔨᓯᒪᒋᕗᑦ ᐅᑎᖅᑎᕆᓂᐅᔪᒥ ᐃᓄᖕᓂ ᐊᓯᐊᒎᖅᑐᓂ ᐸᓖᓯᐅᔪᓂᑦ, ᐱᐅᓪᓗᓂ ᐱᓕᕆᐊᖑᓚᐅᖅᓯᒪᔪᒥ ᑐᕌᖓᓂᖃᖅᑐᒥ ᐱᐅᓯᒋᐊᖅᑎᑦᑎᓂᕐᒥ ᐱᓕᕆᖃᑎᒌᖕᓂᐅᔪᓂ ᐸᓖᓯᓂᑦ ᐊᒻᒪ ᑕᒪᒃᑭᒐᓚᖕᓂ ᐃᓄᒋᐊᕐᓂᖅᓴᐅᔪᓄᑦ ᓄᓇᕗᒻᒥ.
ᓄᓇᕗᒻᒥ ᖁᑦᑎᓛᖓᓂ ᐸᓖᓯᖓ ᐊᖓᔪᖅᑳᕐᔪᐊᖓ ᐊᒫᓐᑕ ᔫᓐᔅ ᐃᓱᒪᒃᓴᖅᓯᐅᕆᓯᒪᕙᖓ ᐅᑯᓇᓂ ᐊᑲᐅᙱᓕᐅᕈᑕᐅᔪᓂ, ᐱᓗᐊᖅᑐᒥ ᐅᖃᐅᓯᖃᖅᖢᓂ ᐅᓂᒃᑳᕆᓯᒪᑦᑎᐊᖅᑐᒥ ᐊᐅᓚᑕᐅᓂᖓᓂ ᐊᒃᓱᕈᕈᑕᐅᔪᓂ ᐱᓕᕆᓂᕐᒥ ᑕᕐᕆᔭᓕᐊᖑᓂᐅᔪᓂ ᖃᔅᓯᒐᓵᓗᖕᓂ ᑎᒥᒧᑦ ᐊᑕᔪᓂ–ᑕᕐᕆᔭᓕᐅᕈᑎᓂᑦ ᐊᒻᒪ ᐱᑕᖃᙱᓗᐊᕐᓂᖓᓂ ᑮᓇᐅᔭᓂᒃ ᐊᒻᒪ ᐊᖏᖅᑕᐅᓂᖓᓂ ᐅᑎᖅᑎᕆᓂᕐᒥ ᐃᓄᖕᓂ ᐊᓯᐊᒎᖅᑐᓂ ᐸᓖᓯᐅᔪᓂᑦ ᐱᓕᕆᐊᖑᔪᒥ.
ᓇᓗᓇᙱᑦᑎᐊᖅᐳᖅ ᔫᓐᔅ ᐊᒻᒪ ᐊᒥᐊᒃᑯᖏᑦ "V" ᐊᕕᒃᑐᖅᓯᒪᓂᐅᔪᒥ ᐊᖏᖅᓯᒪᓂᖃᕐᓂᖏᓐᓂ ᐱᐅᓯᒋᐊᖅᑎᑦᑎᓂᕐᒧᑦ ᐃᓄᖕᓂ–ᐸᓖᓯᓄᑦ ᐱᓕᕆᖃᑎᒌᖕᓂᐅᔪᒥ, ᑭᓯᐊᓂ ᖃᓄᐃᓕᐅᕐᓂᕐᔪᐊᖑᔪᓂ ᐅᒃᐱᕈᓱᒃᑎᑦᑎᓕᕐᓂᐊᖅᐳᑦ ᐅᒃᐱᕈᓱᙱᑦᑐᓄᑦ.
ᑎᒥᒧᑦ ᐊᑕᔪᓂ–ᑕᕐᕆᔭᓕᐅᕈᑎᑦ ᐃᑲᔪᕐᓂᖃᑐᐃᓐᓇᖃᕋᔭᖅᐳᖅ ᐱᓂᕐᒥ ᐅᒃᐱᕈᓱᓕᕐᓂᐅᔪᒥ ᐃᓄᓕᒫᓂᑦ ᑭᓯᐊᓂ ᓴᐳᔾᔨᓯᒪᖕᒥᓗᓂ ᐸᓖᓯᓂᑦ ᐸᓯᔭᐅᓂᖏᓐᓂ ᐋᓐᓂᖅᓯᕆᖃᑦᑕᕐᓂᐅᔪᒥ ᖃᓄᐃᓕᐅᕐᓂᖏᑦ ᓇᓗᓇᐃᖅᑕᐅᑦᑎᐊᕌᖓᒥᒃ. ᐅᓇ ᐱᑕᖃᙱᓗᐊᕐᓂᖓᓂ ᑕᑯᒃᓴᐅᓂᖅᓴᐅᓂᐅᔪᒥ ᐊᑲᐅᙱᓚᖅ ᑭᓇᑐᐃᓐᓇᕐᒧᑦ ᐊᒻᒪ ᖁᑦᑎᓛᖓᓃᖃᑕᐅᓪᓗᐊᖅᐳᖅ ᓯᕗᓪᓕᐅᔾᔭᐅᖁᔭᐅᔪᓂ ᐸᓖᓯᒃᑯᓐᓄᑦ ᐊᑐᖅᑕᐅᓂᐊᖅᑐᓄᑦ.
ᐊᖏᒡᓕᒋᐊᖅᓯᓂᖅ ᓄᑖᙳᖅᐸᓪᓕᐊᓂᐅᔪᓂ ᐊᔪᙱᓐᓂᐅᔪᓂ ᓄᓇᕗᒻᒥ ᐸᓖᓯᒃᑯᓐᓂ ᑎᑭᓐᓂᖃᖅᐸᑦ ᐊᑭᑐᔪᐊᓘᓂᖓᓂ ᐊᒻᒪ ᐱᔭᕆᐊᖃᕈᓂ ᐃᖅᑲᓇᐃᔭᖅᑎᑖᒃᑲᓐᓂᕐᓂᕐᒥ ᖃᔅᓯᐊᕐᔪᒃᑲᓐᓂᕐᓂ ᐃᓄᑐᐃᓐᓇᓂ ᐃᖅᑲᓇᐃᔭᖅᑎᓂᑦ, ᐊᑭᑭᑦᑑᕗᖅ ᐊᑭᓖᓂᕐᒥ ᓴᓇᓂᕐᒧᑦ ᐊᑦᑕᓇᙱᑦᑐᒥ ᐊᒻᒪ ᐅᒃᐱᕈᓱᖕᓂᖃᑦᑎᐊᖅᑐᒥ ᓄᓇᓕᐅᔪᓂᑦ.
ᐅᑕᖅᑭᓂᕐᒥ "ᓄᑖᙳᖅᐸᓪᓕᐅᓂᐅᔪᑦ ᐱᐅᓯᕙᓪᓕᐊᓂᖏᓐᓂ ᐊᕐᕌᒍᒐᓴᓄᑦ," ᔫᓐᔅ ᐅᖃᐅᓯᕆᔭᖏᑎᒍᑦ ᐊᒻᒪ ᐅᖃᕐᓗᓂ ᐅᑯᓄᖓ ᑐᒃᓯᕋᕐᓂᐅᔪᓂ ᐃᓚᒋᔭᐅᔪᓂ ᒪᓕᒐᓕᐅᖅᑎᒃᑯᓐᓂ ᐊᒻᒪ ᐃᓄᑐᐃᓐᓇᕐᓂᑦ, ᓈᒻᒪᔾᔮᙱᓚᖅ.