ᑕᓯᕐᔪᐊᕐᒥ ᒎᓘᒥᒃ ᐅᔭᕋᖕᓂᐊᕐᕕᒃ ᑲᖏᖅᖠᓂᐅᑉ ᖃᓂᒋᔮᓃᑦᑐᖅ ᓯᕗᒻᒧᐊᒋᐊᓚᐅᖅᑐᖅ ᑮᓇᐅᔾᔭᒃᓴᕐᓂᒃᑯᑦ ᐊᒡᓂᒍ ᐃᒍᒃᑯᑦ ᓴᓇᔨᖏᑦ ᑕᓯᕐᔪᐊᕐᒥ ᑲᑎᓚᐅᖅᑎᓪᓗᒋᑦ ᖁᕕᐊᓲᑎᖃᖅᖢᑎᒃ ᐅᔭᕋᖕᓂᐊᕐᕕᐅᑉ ᓯᕗᓪᓕᖅᐹᒃᑯᑦ ᑯᕕᓯᒪᔭᖓᓂᒃ ᒎᓘᒃᑯᑦ ᕕᕗᐊᕆ 21 ᐅᑉᓛᖓᓂ.
ᓯᕗᓪᓕᖅᐹᖅ ᑯᕕᔭᖑᐅᔪᖅ ᓇᓗᓇᐃᖅᓯᓚᐅᖅᑐᖅ ᐱᒋᐊᕈᑕᐅᔪᒧᑦ ᑕᒪᒃᑯᐊ ᑲᒪᒋᔭᐅᕙᓪᓕᐊᓂᖏᑦ ᐱᒋᐊᓚᐅᖅᓯᒪᑎᓪᓗᒋᑦ 12 ᐅᑭᐅᑦ ᐱᐊᓂᒃᓯᒪᓕᖅᑐᑦ ᐊᒻᒪᓗ, ᐅᑉᓗᒥ, ᓂᕆᐅᖕᓂᖃᕐᓂᖅᓴᐅᓕᖅᑐᑦ ᑮᓇᐅᔾᔭᒃᓴᒃᑲᓐᓂᕐᓂᐊᕐᓂᕐᒧᑦ ᐊᒻᒪᓗ ᐃᓅᖃᑎᒌᖕᓂᒃᑯᑦ ᐱᕙᓪᓕᐊᑎᑦᑎᓂᕐᒧᑦ ᑲᓇᑕᐅᑉ ᐅᑭᐅᖅᑕᖅᑐᖓᓂᒃ ᑕᒪᓐᓇ ᓴᖅᑭᓪᓚᑦᑖᕈᓐᓇᖅᓯᓂᐊᓕᖅᑐᖅ, ᑕᐃᒪᓐᓇ ᐅᖃᖅᖢᓂ ᐊᒡᓂᒍ ᐃᒍ ᐅᔭᕋᖕᓂᐊᖅᑐᓕᕆᔨᒃᑯᑦ ᑐᓴᐅᒪᖃᑦᑕᐅᑎᓕᕆᔨᖓ ᑎᐅᓪ ᑲᕕᓐ ᑐᓴᒐᒃᓴᑎᒍᑦ ᓴᖅᑭᑎᑕᐅᓯᒪᔪᒃᑯᑦ.
ᑕᐃᑲᓂ ᐅᑉᓗᕐᒥ ᐊᒡᓂᒍ ᐃᒍ ᐅᔭᕋᖕᓂᐊᖅᑐᓕᕆᔨᒃᑯᑦ ᑎᒍᓯᓚᐅᖅᑎᓪᓗᒋᑦ ᑲᒻᐳᓕᓐᑯᑦ ᓇᖕᒥᓂᖁᑎᖓᓂᒃ 2007-ᒥ, ᓂᐅᕕᖅᖢᑎᒡᓗ ᑯᒪᐱᓕᒃᔅᑯᑦ ᐃᓂᒋᔭᖓᓂᒃ 2010-ᒥ, ᐊᒡᓂᒍ ᐃᒍᒃᑯᑦ "ᐊᑕᐅᓯᕐᒥᒃ ᑐᕌᒐᖃᖅᓯᒪᔪᑦ" - ᐱᕙᓪᓕᐊᑎᑦᑎᔪᒪᕐᓂᒧᑦ ᐅᔭᕋᖕᓂᐊᕐᕕᖕᒥ ᐱᕚᓪᓕᕈᓐᓇᖁᑉᓗᒋᑦ ᑕᒪᕐᒥᒃ ᑲᓇᑕᒥᐅᑦ, ᑕᐃᒪᓐᓇ ᐅᖃᖅᖢᓂ ᑳᕕᓐ.
"ᑕᓯᕐᔪᐊᕐᒥ ᓯᕗᓪᓕᖅᐹᒥ ᑯᕕᓯᑎᓪᓗᒋᑦ ᓴᕆᒪᓇᖅᑐᒻᒪᕆᐊᓘᓚᐅᖅᑐᖅ ᐊᒡᓂᒍ ᐃᒍᒃᑯᓐᓄᑦ, ᓄᓇᕗᒧᑦ ᐊᒻᒪᓗ ᑲᓇᑕᒥᐅᓄᑦ," ᑕᐃᒪᓐᓇ ᐅᖃᖅᖢᓂ.
"ᓄᑖᒥᒃ ᐱᕙᓪᓕᐊᓂᖃᓕᖅᑐᒍᑦ ᐊᒻᒪᓗ ᐱᕙᓪᓕᐊᓂᖅᐳᖅ ᑲᓇᑕᐅᑉ ᐅᑭᐅᖅᑕᖅᑐᖓᓂᒃ ᑲᔪᓯᔪᖅ."
ᐅᔭᕋᖕᓂᐊᕐᕕᐅᑉ ᐃᓱᒪᑕᖓ, ᒪᕐᑎᓐ ᐸᓚᓐᑎ, ᐅᖃᓚᐅᖅᑐᖅ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ ᐊᒥᓱᒡᒎᖅ ᐃᓄᐃᑦ ᐱᓕᕆᓯᒪᔪᑦ ᐅᔭᕋᖕᓂᐊᕐᕕᐅᑉ ᐱᓕᕆᐊᕆᓇᓱᒃᓯᒪᔭᖓᒍᑦ ᓇᑉᐸᖅᑎᖅᑕᐅᒋᐊᓚᐅᖅᓯᒪᑎᓪᓗᒍ ᑕᐃᑉᓱᒪᓂ 2017-ᒥ ᐅᑉᓗᒥᒧᑦ.
ᐅᖃᖅᖢᓂ ᑯᕕᓯᓚᐅᖅᑎᓪᓗᒋᒡᒎᖅ ᕕᕗᐊᕆ 21-ᒥ ᓇᓗᓇᐃᖅᓯᔾᔪᑕᐅᓚᐅᖅᑐᖅ ᐱᐊᓂᒃᓯᓂᕐᒧᓪᓗ ᐱᓕᕆᕐᔪᐊᖅᓯᒪᔪᓂᒃ" ᐊᒥᓱᒻᒪᕆᐊᓗᖕᓄᑦ ᐃᓄᖕᓄᑦ.
"ᑕᒪᓐᓇ ᖁᕕᐊᓱᖃᑎᒌᒍᑎᒋᓚᐅᖅᑕᖅᐳᑦ ᐱᓕᕆᐊᖑᔪᖅ ᑲᔪᓯᔪᓐᓇᖁᑉᓗᒍ ᑭᖑᕙᖅᓯᒪᙱᑦᑐᒃᑯᑦ ᐊᒻᒪᓗ ᑮᓇᐅᔭᒃᑯᑦ ᐋᖅᑭᒃᓱᒪᔭᒃᑯᑦ, ᑕᒪᓐᓇ ᐱᓕᕆᖃᑎᒌᖕᓂᒃᑯᑦ ᐱᕚᓪᓕᕈᑕᐅᓯᒪᔪᖅ," ᑕᐃᒪᓐᓇ ᐅᖃᖅᖢᓂ ᐱᓛᓐᑎ.
"ᑕᐃᒪᓕ, ᑕᒡᕙᙵᑦ ᐱᒋᐊᕐᓗᒍ ᐊᐅᓪᓛᖅᑎᑦᑎᐊᕋᓱᒋᐊᖃᕐᓂᐊᖅᑕᖅᐳᑦ ᐱᓕᕆᐊᕆᔭᖅᐳᑦ ᐱᕙᓪᓕᐊᑎᒃᑲᓐᓂᕐᓗᒍᓗ," ᑕᐃᒪᓐᓇ ᐅᖃᖅᖢᓂ.
ᐱᓛᓐᑎ ᐅᖃᖅᖢᓂ ᐱᓕᕆᔪᒡᒎᖅ ᑕᓯᕐᔪᐊᕐᒥ ᐅᑉᓗᑕᒫᒃᑯᑦ 500-ᓃᓲᑦ , ᑕᐃᒪᐃᒻᒪᑦ ᐅᔭᕋᖕᓂᐊᕐᕕᖕᒥ ᐱᓕᕆᔪᖃᖃᑦᑕᕐᓂᐊᖅᑐᖅ 800 ᖃᓂᒋᔭᖓᓂᒃ ᐃᓄᖕᓂᒃ ᐃᓗᐃᑦᑐᒃᑯᑦ.
ᐅᖃᖅᖢᓂ ᐊᒡᓂᒍ ᐃᒍ ᐅᔭᕋᖕᓂᐊᖅᑐᓕᕆᔨᒃᑯᒡᒎᖅ ᐃᓄᖕᓂᒃ 50%-ᒦᓕᖁᔨᓂᐊᖅᑐᑦ ᓴᓇᔨᒥᒍᑦ ᑕᓯᕐᔪᐊᕐᒥ, ᐅᖓᑖᓂᓘᓐᓃᑦ.
"ᒫᓐᓇᐅᔪᖅ ᑐᖔᓃᑦᑐᒍᑦ, ᑭᓯᐊᓂ ᑖᒻᓇ ᓈᓴᐅᑎ ᑐᕌᕐᕕᒋᓇᓱᒃᑕᖅᐳᑦ," ᑕᐃᒪᓐᓇ ᐅᖃᖅᖢᓂ. "ᒫᓐᓇᐅᔪᒧᑦ, ᑕᓯᕐᔪᐊᖅ ᐊᐅᓪᓛᕋᔭᖅᑐᖅ 14-ᓂᒃ ᐅᑭᐅᓂᒃ ᑭᓯᐊᓂ ᐅᔭᕋᒃᓯᐅᖅᐸᓪᓕᐊᖏᓐᓇᖅᑐᒍᑦ ᐅᑭᐅᕆᓂᐊᖅᑕᕗᑦ ᐃᓚᕚᓪᓕᕈᓐᓇᖁᑉᓗᒋᑦ.
"ᑕᐃᒪᑐᖅ, ᑕᓯᕐᔪᐊᖅ ᐊᐅᓪᓛᕈᓐᓇᕐᓂᐊᖅᐳᖅ ᐊᒥᓱᒻᒪᕆᖕᓂᒃ ᐅᑭᐅᓂᒃ ᐊᒻᒪᓗ ᑮᓇᐅᔾᔭᒃᓴᕈᑕᐅᖏᓐᓇᕈᓐᓇᕐᓗᓂ ᓄᓇᓕᖕᓄᑦ ᑭᕙᓪᓕᕐᒥ."
ᐱᓛᓐᑎ ᐅᖃᖅᖢᓂ ᑕᓯᕐᔪᐊᕉᖅ ᓴᓇᔨᖃᓕᐊᓂᒃᑐᖅ ᐃᓄᖕᓂᒃ ᑭᕙᓪᓕᕐᒥᐅᑕᓂᒃ, ᒥᐊᓂᖅᓯᔨᖃᖅᖢᓂᓗ ᐊᕐᕕᐊᕐᒥᐅᑕᒥᒃ.
ᐅᖃᖅᖢᓂ ᐊᑎᕐᓂᒎᖅ ᓄᓇᓕᖕᓄᑦ ᑐᕌᖓᔪᓂᒃ ᐱᓯᒪᙱᑦᑑᒐᓗᐊᖅ ᒫᓐᓇᐅᔪᖅ ᑕᓯᕐᔪᐊᕐᒥ ᓴᓇᔨᐅᔪᓄᑦ, ᖃᑉᓰᑲᓪᓚᒃᖢᑎᒃ ᓵᑐᒃᑯᑦ ᑎᑭᑎᑦᑎᖃᑦᑕᖅᑎᓪᓗᒋᑦ ᐱᓇᓱᐊᕈᓯᑕᒫᑦ, ᓂᕆᐅᒃᑐᖅ ᑕᒪᕐᒥᒃ 7-ᖑᔪᑦ ᓄᓇᓖᑦ ᓴᓇᔨᖃᓕᕐᓂᐊᕐᓂᖏᓐᓄᑦ ᐅᔭᕋᖕᓂᐊᕐᕕᖕᒥ, ᑕᐃᒪᐃᓕᐊᓂᙱᒃᑯᑎᒃ.
"ᑎᑭᓯᒪᓕᕈᑉᑕ ᑐᕌᒐᕆᔭᑉᑎᓐᓄᑦ ᓴᖅᑭᑎᑦᑐᒪᔭᑉᑎᓐᓄᑦ, ᑯᕕᓯᓇᔭᖅᑐᒍᑦ 400,000 ᐊᐅᓐᓯᔅᓂᒃ ᒎᓘᒥᒃ ᐊᕐᕌᒍᑕᒫᒃᑯᑦ ᑕᐃᑯᙵ ᐱᐊᓂᒡᕕᒃᓴᒧᑦ ᑎᑭᓐᓇᓱᖕᓂᓗᒃᑖᕐᓂᕐᒧᑦ ᒪᑐᐃᖓᓂᐊᕐᓂᖓ ᒪᓕᒡᓗᒍ."